အခန်း ၂၄၄

အခန်း ၂၄၄

ဒီအလောင်းကောင်သုံးပါးနတ်ဆိုးအိုကြီး ပြောသွားတဲ့ တူလေးဆိုတာ... မူလမဟူရာဂိုဏ်းရဲ့ စစ်မှန်သောတပည့် ကျိချန်ဟိုင်ကို ပြောတာ သေချာသလောက်ပဲ။ ငါ အရင်က တွေ့ဖူးသမျှ မူလမဟူရာဂိုဏ်းသားတွေထဲမှာ ဒီနတ်ဆိုးအိုကြီးကလွဲရင် ကျိချန်ဟိုင် တစ်ယောက်ပဲ ရှိတာလေ။

ဒါပေမဲ့... အလောင်းကောင်သုံးပါးဆရာကြီးက ဒီလျှို့ဝှက်ချက်ကို ဘယ်လိုလုပ်ပြီး သိသွားရတာလဲ။ အဓိပ္ပာယ်မရှိလိုက်တာ... ဘယ်သူကများ သူ့ကို သတင်း သွားပေးလိုက်တာလဲ ဒါမှမဟုတ် ငါ သတိမထားမိတဲ့ တခြား အကြောင်းရင်းတစ်ခုခုကြောင့်များလား...

အလောင်းကောင်သုံးပါးဆရာကြီး၏ မျက်ဝန်းအစုံက တဖျတ်ဖျတ် လက်သွားပြီးနောက် ခဏမျှ တွေးတောလိုက်ပြီးမှ "ငါ့တူလေးက မင်းကို တစ်ခုခု ပြောခဲ့သေးလား..." ဟု မေးလိုက်သည်။

ကုယွမ်က တည်ငြိမ်စွာပင် "သူ ပြောခဲ့သည်ဖြစ်စေ၊ မပြောခဲ့သည်ဖြစ်စေ ဆရာကြီးနဲ့ ဘာမှမဆိုင်ဘူးထင်ပါတယ်။ နောက်ပြီး ကျွန်တော်က ဆရာကြီးကို ဘာလို့ ပြောပြရမှာလဲ..." ဟု ပြန်တုံ့ပြန်လိုက်၏။

ထိုသို့ပြောပြီးနောက် သူသည် ဤနတ်ဆိုးအိုကြီးနှင့် ရှည်ရှည်ဝေးဝေး စကားလက်ဆုံမကျချင်တော့သဖြင့် ဓားအလင်းကို လှုံ့ဆော်ကာ ကောင်းကင်ယံသို့ ပျံတက်လျက် အရှိန်အဟုန်ဖြင့် ထွက်ခွာခဲ့တော့သည်။

သူနှင့် ထိုနတ်ဆိုးအိုကြီးကြားတွင် ရန်ငြိုးရန်စများ ရှိနေသည်မှန်သော်လည်း ခုနကတင် တိုက်ပွဲပြင်းပြင်းထန်ထန် ဆင်နွှဲထားခဲ့ရသဖြင့် သူ၏ကျင့်စဉ်စွမ်းအင်များ အလွန်တရာ ကုန်ဆုံးနေပြီဖြစ်ရာ ရန်သူကို ရင်ဆိုင်ရန် ခဲယဉ်းလိမ့်မည်ဟူသောအချက်ကို ကုယွမ် ကောင်းစွာသဘောပေါက်သည်။

သူ၏ စွမ်းအင်အပြည့်ရှိနေသည့် အခြေအနေမျိုး၌ပင် ဤနတ်ဆိုးအိုကြီးကို အောင်နိုင်ရန် ခဲယဉ်းလှရာ တစ်ဖက်လူကို အမိဖမ်းကာ ချုပ်နှောင်နိုင်ဖို့ဆိုသည်မှာ ပို၍ပင် မသေချာလှချေ။

အဘယ်ကြောင့်ဆိုသော် အလောင်းကောင်သုံးပါးဆရာကြီးဟူသည်မှာ ဆရာကြီးစိမ်းပြာရောင်သစ်သားကဲ့သို့သော လူစားမျိုးနှင့် လုံးဝနှိုင်းယှဉ်၍ မရနိုင်သောကြောင့်ပင်။

ဤနတ်ဆိုးကြီးသည် ထူးခြားပြောင်မြောက်သော ကျင့်စဉ်ကို ပိုင်ဆိုင်ထားပြီး သူ၏ ခန္ဓာကိုယ်သုံးပါးဖြစ်သည့် ကရုဏာ၊ အဝိဇ္ဇာနှင့် အမိန့်ပေး နတ်ဆိုးတစ်ပါးချင်းစီ၏ စွမ်းအားမှာ ဆရာကြီးစိမ်းပြာရောင်သစ်သားထက်ပင် ပိုမိုကြောက်မက်ဖွယ်ကောင်းသည်။

နတ်ဆိုးသုံးပါး တစ်သားတည်း ပေါင်းစည်းသွားချိန်တွင်မူ သူ၏ သက်စောင့်နတ်ဆိုး ပေါ်ထွက်လာမည်ဖြစ်ပြီး သူ၏ကျင့်စဉ်အဆင့်အတန်းမှာလည်း ယင်ဝိညာဉ်အဆင့်သို့ပင် နီးကပ်နေပြီ ဖြစ်သည်။

ယခု ရှေ့တွင် ရောက်ရှိနေသည့်အရာမှာ ရုပ်ပွားတစ်ခုမျှသာ ဖြစ်သော်လည်း ကုယွမ်အနေဖြင့် ပေါ့ဆရဲခြင်း အလျဉ်းမရှိချေ။

ထို့ကြောင့်ပင် အောင်နိုင်ရန် မသေချာသည့်အတွက် တိုက်ခိုက်နေရန် အကြောင်းမရှိခြင်းပင်။

ကုယွမ် ပြတ်ပြတ်သားသား ထွက်ခွာသွားသည်ကို မြင်လိုက်ရသောအခါ အလောင်းကောင်သုံးပါးဆရာကြီးသည် မျက်မှောင်ကြုတ်လိုက်ပြီးနောက် နှာခေါင်းရှုံ့လျက် ဖျတ်ခနဲဆိုသလိုပင် ပျောက်ကွယ်သွားတော့သည်။

...

ချုံးမင်ဈေးဘက်သို့ ပြန်ရောက်လာပြီးနောက် ကုယွမ်သည် ပထမဆုံး လူမသိသူမသိဖြင့် သူ၏ နေအိမ်သို့ တိတ်တဆိတ် ဝင်ရောက်ခဲ့သည်။

သူရရှိထားသော ဒဏ်ရာအနည်းငယ်ကို ကုသရင်း ကုန်ဆုံးသွားသည့် ကျင့်စဉ်စွမ်းအင်များကို ပြန်လည်ဖြည့်တင်းရန်အတွက် နှစ်ရက်တိုင်တိုင် တိတ်တဆိတ်ကျင့်ကြံပြီးနောက်တွင်မှ သူသည် အပြင်သို့ထွက်ကာ ကျောက်စိမ်းအိုးမျှော်စင်သို့ တည့်တည့်မတ်မတ် ဦးတည်လိုက်တော့သည်။

ကုယွမ် မျှော်လင့်ထားသည့်အတိုင်းပင် ကျောက်စိမ်းအိုးမျှော်စင်အတွင်းရှိ လေထုမှာ သိသိသာသာ ပြောင်းလဲနေခဲ့ပြီ ဖြစ်သည်။

ဖြတ်သန်းသွားလာနေကြသော တပည့်များမှာ ယခင်ကကဲ့သို့ အေးအေးလူလူမရှိကြဘဲ အလောတကြီး ဖြစ်နေကြသည်။

အချို့သောသူများ၏ မျက်နှာတွင်မူ ဝမ်းနည်းပူဆွေးမှုများနှင့် စိုးရိမ်သောကရိပ်များပင် ဖုံးလွှမ်းနေကြ၏။

သူတို့သည် ကုယွမ်ကို မြင်တွေ့ရသဖြင့် အံ့အားသင့်သွားကြသော်လည်း မည်သူမျှ အနားသို့ ကပ်မလာကြချေ။

စီမာယန်၏ တပည့်ဖြစ်သူ ဖန်ရှောက်ကျဲတစ်ဦးသာ သတင်းရရချင်း မျက်နှာတွင် စိတ်မသက်မသာဖြစ်မှုအချို့ဖြင့် အပြေးအလွှား ရောက်ရှိလာခဲ့သည်။

"ကုညီငယ်... မင်း ဘာကိစ္စရှိလို့ ရောက်လာတာလဲ..."

ကုယွမ်ကို မြင်လိုက်ရသောအခါ ဖန်ရှောက်ကျဲက စူးစမ်းလိုစိတ်ဖြင့် မေးမြန်းရင်း အပေါ်ထပ်သို့ ခေါ်ဆောင်သွားခဲ့သည်။

သို့သော်လည်း သူ၏ အမူအရာမှာ ယခင်ကထက် များစွာ ပိုမိုရိုသေကိုင်းညွတ်နေသည်မှာ ထင်ရှားသည်။

တစ်ဖက်လူ၏ ဆက်ဆံရေးအပြောင်းအလဲမှာ သူက သေခြင်းရှင်ခြင်းစင်မြင့်ထက်တွင် လျူကွမ်းနှင့် ဝိညာဉ်အစွမ်းတိုက်ပွဲ ဆင်နွှဲပြီးနောက် ရရှိလာခဲ့သော ကျော်စောမှုများကြောင့်ဖြစ်ကြောင်း ကုယွမ် ကောင်းစွာသိရှိသည်။

နတ်ဘုရားကူဂိုဏ်း၏ စစ်မှန်သောတပည့်ကျော်ဖြစ်သော လျူကွမ်းပင်လျှင် ကုယွမ်၏လက်ချက်ဖြင့် တစ်ကြိမ် ကျဆုံးခဲ့ရဖူးသဖြင့် ဖန်ရှောက်ကျဲအနေဖြင့် ကုယွမ်အပေါ် ပိုမို၍ပင် လေးစားသမှု ပြုလာခြင်းပင်။

ကုယွမ်သည် မျက်နှာအမူအရာ မပျက်ဘဲ သာမန်ကာလျှံကာဟန်ဖြင့် "မကြာသေးခင်က ဆေးဖော်စပ်တဲ့ အတတ်ပညာပိုင်းမှာ သိချင်တာလေးတွေ ရှိလာလို့ ဆရာကြီးစီမာကို လာရောက်ဆွေးနွေးတာပါ..." ဟု ရှင်းပြလိုက်သည်။

ထို့နောက် သူက ဘာမှမသိနားမလည်သည့်အလား "ဒါနဲ့ စီနီယာအစ်ကိုကြီး... ဒီနေ့ ကျောက်စိမ်းအိုးမျှော်စင်ရဲ့ လေထုက ဘာလို့ နည်းနည်း ထူးဆန်းနေရတာလဲဗျာ။ တစ်ခုခု ဖြစ်လို့လား..." ဟု ထပ်မံ မေးမြန်းလိုက်၏။

ဖန်ရှောက်ကျဲသည် သက်ပြင်းအရှည်ကြီးတစ်ချက် ချလိုက်မိပြီး သူ၏မျက်နှာမှာ မှေးမှိန်သွားသည့်အပြင် ရှုပ်ထွေးလှသော အရိပ်အယောင်များ ပေါ်ထွက်လာကာ ဖုံးကွယ်ခြင်းမပြုဘဲ ခေါင်းညိတ်လျက် "ဟုတ်တယ်... တကယ်ပဲ အရေးကြီးတဲ့ ကိစ္စတစ်ခု ဖြစ်ပျက်ခဲ့တယ်..." ဟု ပြောလိုက်သည်။

သူက ဘေးဘီပတ်ပတ်လည်ကို အကဲခတ်လိုက်ပြီးနောက် လေသံကို တိုးလျက် "လွန်ခဲ့တဲ့ နှစ်ရက်က ဂိုဏ်းဆီကနေ သတင်းရောက်လာတယ်... ဆရာကြီးစိမ်းပြာရောင်သစ်သားရဲ့ ဝိညာဉ်မီးအိမ်ငြိမ်းသွားပြီတဲ့..."

"ဘာ... ဝိညာဉ်မီးအိမ် ငြိမ်းသွားပြီ ဟုတ်လား"

ကုယွမ်၏ မျက်နှာသည် ရုတ်ချည်းပင် အကြီးအကျယ် ပျက်ယွင်းသွားခဲ့ရပြီး ထိတ်လန့်တုန်လှုပ်ဟန်ဖြင့ "ဆရာကြီးစိမ်းပြာရောင်သစ်သားက အဆင့်မြင့်ရွှေအမြုတေကို သွန်းလုပ်ထားတဲ့ ရွှေအမြုတေအဆင့် ကျင့်ကြံသူကြီးတစ်ဦး မဟုတ်ဘူးလားဗျာ။ ဘယ်လိုလူကများ သူ့ကို သတ်ဖြတ်နိုင်လောက်တဲ့အထိ အစွမ်းထက်နေရတာလဲ..." ဟု အလန့်တကြား ရေရွတ်လိုက်တော့သည်။

ဝိညာဉ်မီးအိမ်ဟူသည်မှာ အဆင့်မြင့်ဂိုဏ်းကြီးများမှ တပည့်များနှင့် ကျင့်ကြံခြင်းမိသားစုကြီးများ အဓိကအသုံးပြုလေ့ရှိကြသော အထူးဆန်းကြယ်သည့် သက်စောင့်မှော်လက်နက်တစ်မျိုး ဖြစ်သည်။

ကျင့်ကြံသူ၏ အသက်သွေးကြော သွေးတစ်စက်ကို ၎င်းထက်သို့ ချမှတ်ပြီး ရိုးရှင်းသော အစီအရင်တစ်ခု ပြုလုပ်ပြီးသည်နှင့် ထိုကျင့်ကြံသူနှင့် မီးအိမ်ကြားတွင် ဆန်းကြယ်သော ဝိညာဉ်ဆက်နွှယ်မှုတစ်ခု ဖြစ်ပေါ်သွားလေ့ရှိသည်။

"မင်းသိထားရမှာက... ကျင့်ကြံသူတစ်ယောက် သေဆုံးသွားပြီဆိုရင် အဲဒီဝိညာဉ်မီးအိမ်ပေါ်က ဝိညာဉ်မီးတောက်က ချက်ချင်း ငြိမ်းသွားတတ်တယ်။ တကယ်လို့ ဒဏ်ရာအပြင်းအထန်ရတာ ဖြစ်ဖြစ်၊ မူလချီစွမ်းအင်တွေ အကြီးအကျယ် ခန်းခြောက်သွားတာပဲဖြစ်ဖြစ် ဝိညာဉ်မီးတောက်က မှေးမှိန်ပြီး အားနည်းသွားတတ်တာပေါ့။ ဆိုလိုချင်တာက ဒီမီးအိမ်က အဲဒီကျင့်ကြံသူရဲ့ အသက်အန္တရာယ် အခြေအနေကို နိမိတ်ပြနေတဲ့ သဘောပဲ။

ဒါပေမဲ့ ဒီလိုပစ္စည်းမျိုးကို သွန်းလုပ်ဖို့က ကောင်းကင်ဘုံက ကြယ်ကို ဆွတ်ရသလို အရမ်းခဲယဉ်းပြီး အဖိုးတန်လွန်းတယ်။ ဒါကြောင့် ငါတို့ ဆေးဘုရင်တောင်မှာတောင် လက်ချိုးရေလို့ရတဲ့ လူနည်းစုလောက်ပဲ ပိုင်ဆိုင်နိုင်ကြတာ။ ဥပမာ ဂိုဏ်းရဲ့ အကြီးအကဲကြီးတွေ၊ ဂိုဏ်းချုပ်၊ ပြီးတော့ ကျင့်စဉ်နက်ရှိုင်းတဲ့ ရာထူးမြင့်အကြီးအကဲတွေနဲ့ စစ်မှန်သောတပည့်တွေပေါ့။ ဆရာကြီးစိမ်းပြာရောင်သစ်သားလို လူမျိုးကတော့ ဒီလိုပစ္စည်းမျိုး ပိုင်ဆိုင်ဖို့ လုံလောက်တဲ့ အရည်အချင်းရှိတာပေါ့..."

"ဟူး... ဆရာလည်း ဒီကိစ္စကို သိပြီးကတည်းက လူတွေ အပြည့်လွှတ်ပြီး စုံစမ်းခိုင်းထားတာ... အခု သတင်းစအချို့ ရလာပြီ။ ကြားရသလောက်တော့... ဒီကိစ္စက ဆရာကြီးစိမ်းပြာရောင်သစ်သားရဲ့တပည့် မာဖုန်းနဲ့ ပတ်သက်နေပုံရတယ်။ တစ်ယောက်ယောက်က တမင် အကွက်ချပြီး မာဖုန်းကို မြို့ပြင်ထွက်လာအောင် မျှားခေါ်သွားတာ။ အဲဒါနဲ့ ဆရာကြီးစိမ်းပြာရောင်သစ်သားလည်း စိတ်ပူပြီး နောက်ကနေ လိုက်သွားရာကနေ ပြန်မလာတော့ဘဲ ဝိညာဉ်မီးအိမ်ပါ ငြိမ်းသွားခဲ့တာပဲ..."

ဖန်ရှောက်ကျဲသည် မျက်နှာတွင် ရှုပ်ထွေးလှသော ခံစားချက်ရိပ်များ ဖုံးလွှမ်းလျက် သက်ပြင်းအရှည်ကြီး ချလိုက်မိပြီး သူ၏ ဒေါသနှင့် ထိတ်လန့်တုန်လှုပ်မှုများကို မနည်းဖုံးကွယ်ထားရသည်။

အမှန်စင်စစ် ဤကိစ္စမှာ သာမန်ကိစ္စ လုံးဝမဟုတ်ဘဲ အလွန်တရာ ကြီးမားသည်။

ချင်ကျိုးပြည်နယ်၏ အထွတ်အထိပ်ဂိုဏ်းကြီးအဖြစ် ဆေးဘုရင်တောင်သည် တောင်ဘက်နယ်စပ်တစ်ခုလုံးတွင် အလွန်ကျော်ကြားသည်။

သာမန်အားဖြင့် မည်သူက ဆေးဘုရင်တောင်ကို လာရောက်ရန်စရဲမည်မဟုတ်ပေ။

အပြင်စည်းတပည့်တစ်ဦးမျှ သေဆုံးလျှင်ပင် လှိုင်းတံပိုးများ ထက်ဆင့်ကာ စုံစမ်းစစ်ဆေးမှုများ ပြုလုပ်ပြီး ပြတ်ပြတ်သားသား ဖြေရှင်းလေ့ရှိကြသည်။

အကယ်၍ ရန်သူသည် နတ်ဘုရားကူဂိုဏ်း သို့မဟုတ် ကြယ်တာရာမြစ်ဓားဂိုဏ်းကဲ့သို့ ဂိုဏ်းကြီးများ မဟုတ်ခဲ့လျှင် ကြီးလေးသော တန်ဖိုးကို ဧကန်မုချ ပြန်လည်ပေးဆပ်ရလိမ့်မည်။

အခုတော့... ဆေးဘုရင်တောင်ရဲ့ ရွှေအမြုတေအဆင့်ကျင့်ကြံသူကြီးတစ်ယောက်လုံးတောင် အသက်ပျောက်သွားခဲ့ပြီ။ ရွှေအမြုတေအဆင့် ကျင့်ကြံသူကြီးတစ်ယောက် ဒီလို ပုဂ္ဂိုလ်မျိုးက သိုင်းလောကရဲ့ ဘယ်နေရာမှာမဆို ဒူးလှုပ်ရင် တုန်စေလောက်တဲ့ ထိပ်တန်းဆရာကြီးတွေလေ။ ဆေးဘုရင်တောင်မှာဆိုရင်လည်း ဂိုဏ်းရဲ့အသက်သွေးကြော မဏ္ဍိုင်ကြီးတွေ၊ အထက်တန်းလွှာတွေအဖြစ် သတ်မှတ်ခံထားရတဲ့သူပဲ။

အခုလို ထိပ်သီးပုဂ္ဂိုလ်ကြီးတစ်ဦးက တမင်ထောင်ချောက်ဆင် သတ်ဖြတ်ခြင်းခံလိုက်ရတယ်ဆိုတော့ ဒါက သိုင်းလောကတစ်ခုလုံးကို ငလျင်လှုပ်သလို အကြီးအကျယ် ဂယက်ရိုက်ခတ်သွားစေမှာ မြေကြီးလက်ခတ်မလွဲဘူး။ ဆေးဘုရင်တောင်ဘက်ကလည်း အခြေအနေမှန်ကို မရှင်းလင်းနိုင်ဘဲ တရားခံကို စုံစမ်းမဖော်ထုတ်နိုင်ဘဲနဲ့တော့ ဒီကိစ္စကို ဘယ်လိုနည်းနဲ့မှ ဒီအတိုင်း အလွယ်တကူ လက်စဖျောက် ပြီးခွင့်ပေးမှာ မဟုတ်ဘူး။ ရင်ဆိုင်ရတော့မှာပဲ...

သို့သော်လည်း ဤကိစ္စမှာ ကြီးကျယ်လွန်းလှသဖြင့် ဖန်ရှောက်ကျဲကိုယ်တိုင်ပင် စိုးရိမ်တုန်လှုပ်နေမိသည်။

ဆရာကြီးစိမ်းပြာရောင်သစ်သားသည် လူအများအပြားကို ရန်ငြိုးဖွဲ့ခဲ့ဖူးသည်။

အကယ်၍ ၎င်းက ရန်ငြိုးဟောင်းကြောင့် သက်သက်ဆိုလျှင် ကိစ္စမရှိသော်လည်း အခြားသော အကြောင်းအရင်းများ ပါဝင်ပတ်သက်နေပါက အခြေအနေများ ရှုပ်ထွေးသွားနိုင်သည်။

အကယ်၍ နတ်ဘုရားကူဂိုဏ်း သို့မဟုတ် ကြယ်တာရာမြစ်ဓားဂိုဏ်းကဲ့သို့သော ကျင့်ကြံခြင်းဂိုဏ်းကြီးများ နောက်ကွယ်က ပါဝင်နေပါက ရှောင်လွှဲ၍မရသော စစ်ပွဲကြီးများ ဖြစ်ပွားလာပေလိမ့်မည်။

သို့သော် အကယ်၍ မူလမဟူရာဂိုဏ်း၏ လက်ချက်သာဆိုလျှင်မူ ဤကိစ္စက စဉ်းစား၍ပင် မရလောက်အောင် ကြီးမားသွားသည်။

ဖန်ရှောက်ကျဲက အလွန်အမင်း စိုးရိမ်ပူပန်နေသော်လည်း ကုယွမ်ကမူ စကားတစ်ခွန်းမျှ မဆိုချေ။

သူသည် ဖန်ရှောက်ကျဲ၏ စိုးရိမ်မှုများကို ကောင်းစွာနားလည်သော်လည်း အစစ်အမှန်တရားခံမှာ သူကိုယ်တိုင် ဖြစ်နေသဖြင့် ဖန်ရှောက်ကျဲ၏ ပူပန်မှုများက သူ့အတွက် ဘာအဓိပ္ပာယ်မျှ မရှိချေ။

မိုးပြိုရင်တောင် ခံနိုင်တဲ့ အရပ်အမောင်းမြင့်တဲ့သူတွေ ရှိနေသေးတာပဲ။

ဤကိစ္စတွင် စီမာယန်သည်လည်း အတိုင်းအတာတစ်ခုအထိ ပါဝင်ပတ်သက်နေပြီး အစီအစဉ်တစ်ခုလုံးကိုလည်း ချောမွေ့စွာ အကောင်အထည်ဖော်နိုင်ခဲ့သည်။

သာမန်အခြေအနေမျိုးတွင် ဤကိစ္စသည် မည်သို့မျှ အလင်းပေါ်လာစရာ အကြောင်းမရှိချေ။

အရေးကြီးဆုံးအချက်မှာ ကုယွမ်သည် ဆရာကြီးစိမ်းပြာရောင်သစ်သားကို အကြောင်းမဲ့ သတ်ဖြတ်ခဲ့ခြင်း မဟုတ်ပေ။ ဆရာကြီးစိမ်းပြာရောင်သစ်သားကိုယ်တိုင်က ပြင်ပလူများနှင့် ထပ်ခါတလဲလဲ ပူးပေါင်းကာ သူကို လုပ်ကြံရန် ကြိုးစားခဲ့ခြင်းပင်။

ထို့ကြောင့် ဤကိစ္စတွင် အကြောင်းရှိ၍ အကျိုးဖြစ်ရခြင်းသာ။

အကယ်၍ အကြောင်းအမျိုးမျိုးကြောင့် ပေါ်ပေါက်သွားခဲ့လျှင်ပင် သူ၏ လက်ရှိကျော်စောမှု၊ စီမာယန်နှင့် ဆရာကြီးဟယ်လင်းတို့၏ ကာကွယ်စောင့်ရှောက်မှုများကြောင့် သူ့အပေါ် မည်သည့်ထိခိုက်မှုမျှ ကျရောက်လာမည် မဟုတ်ချေ။

ထို့ကြောင့်ပင် ကုယွမ်သည် တည်ငြိမ်အေးဆေးနေနိုင်ခြင်းပင်။

ဖန်ရှောက်ကျဲနှင့် စကားအချို့ ဆက်လက်ပြောဆိုပြီးနောက် ကုယွမ်သည် သူ၏ လမ်းပြမှုဖြင့် ဆေးဖော်စပ်ရာ အခန်းသို့ ရောက်ရှိလာခဲ့သည်။

ဖန်ရှောက်ကျဲသည် အခန်းထဲတွင် ကြာကြာမနေဘဲ အခြားသော ကိစ္စရပ်များကို စီမံရန်အတွက် မကြာမီပင် နှုတ်ဆက်ထွက်ခွာသွားခဲ့သည်။

"ဆရာဦးလေးကို ဂါရဝပြုပါတယ် ခင်ဗျာ..."

ဂါရဝပြုပြီးနောက် ကုယွမ်သည် စီမာယန်၏ ရှေ့တွင် မည်သည့်စိုးရိမ်ပူပန်မှုမျှမရှိဘဲ သက်တောင့်သက်သာရှိလှသော အမူအရာဖြင့် ပေါ့ပေါ့ပါးပါးပင် ထိုင်လိုက်တော့သည်။