အခန်း ၂၄၈

အခန်း ၂၄၈

ဆရာကြီးဟယ်လင်သည် သူသိရှိထားသမျှသော သတင်းစကားများကို ခေတ္တမျှ ပြောပြပြီးနောက် ကျောက်စိမ်းပေလွှာတစ်ခုကို ထုတ်ယူကာ သူကိုယ်တိုင် သိရှိနားလည်ထားသော နဂါးနီမသေမျိုးနန်းတော်၏ မြေပုံအစိတ်အပိုင်းအချို့ကို ၎င်းထဲ၌ မှတ်တမ်းတင်ပေးလိုက်သည်။

နဂါးနီမသေမျိုးနန်းတော်နှင့် ပတ်သက်၍ ဆရာကြီးဟယ်လင်ကိုယ်တိုင်၏ သိရှိနားလည်မှုမှာ အတိုင်းအတာတစ်ခုအထိ ကန့်သတ်ချက်ရှိသော်လည်း ဆေးဘုရင်တောင်၏ အကြီးအကဲတစ်ဦးဖြစ်သည့်အားလျော်စွာ ဂိုဏ်း၏သတင်းလမ်းကြောင်းများမှတစ်ဆင့် များစွာသော အချက်အလက်များကို သိရှိထားခဲ့ခြင်းပင်။

ထို့ကြောင့်ပင် သူ ကုယွမ်အား ပေးအပ်လိုက်သော မြေပုံနှင့် အလွန်တရာ အဖိုးတန်လှသော မှတ်စုအညွှန်းများက ကုယွမ်အတွက် များစွာ အသုံးဝင်သည်။

ကုယွမ်သည် ၎င်းကို ရိုသေစွာ လက်ခံလိုက်ပြီး အကျဉ်းချုပ်မျှ စစ်ဆေးကြည့်ရှုလိုက်ရာ စိတ်ထဲမှ အနည်းငယ် ထိတ်လန့်သွားရုံမျှမကဘဲ "ဆရာ... ဒီနဂါးနီမသေမျိုးနန်းတော်က နန်းတော်လို့ အမည်တွင်ပေမဲ့ အမှန်စင်စစ်တော့ လျှို့ဝှက်နယ်မြေတစ်ခု ဒါမှမဟုတ် ကမ္ဘာငယ်လေးတစ်ခုလို့ တပည့် အရင်က ကြားဖူးပါတယ်။ ဒါပေမဲ့ အဲ့ဒါရဲ့ အတွင်းပိုင်းက ဒီလောက်အထိ ကျယ်ဝန်းလှတာလားခင်ဗျာ။ ဆရာ ပေးတဲ့မြေပုံအရဆိုရင် ဒီကမ္ဘာငယ်လေးရဲ့ ပတ်လည်အကျယ်အဝန်းက အနည်းဆုံး မိုင်ပေါင်း သောင်းနဲ့ချီပြီး ရှိနေတာပဲ..."

"ဒါပေမဲ့ တပည့်သိသလောက်တော့ ဒီမသေမျိုးနန်းတော်က နဂါးနီတာအိုပညာရှင်ရဲ့ မသေမျိုးနန်းတော်ကြီး ငါးခုထဲက တစ်ခုတည်းသော လက်အောက်ခံနန်းတော်ခွဲတစ်ခုပဲ ရှိသေးတာလေ။ ဒါဆိုရင် ကျန်တဲ့နန်းတော်ခွဲသုံးခုနဲ့ ပင်မနန်းတော်ကြီးကလည်း ဒီလိုပဲ ကျယ်ဝန်းလှတာလား ခင်ဗျာ..."

ဆရာကြီးဟယ်လင်က ပြုံးလိုက်ရင်း "ဒါက ဘာဆန်းလို့လဲ..." ဟု ရှင်းပြလာခဲ့သည်။

"မင်းပြောတဲ့ ပင်မနန်းတော်နဲ့ လက်အောက်ခံနန်းတော်ခွဲဆိုတာက သာမန်လူတွေ ခေါ်ဝေါ်ကြတဲ့ အပေါ်ယံ အခေါ်အဝေါ်ပဲ။ အမှန်တရားကတော့... ကျန်တဲ့ မသေမျိုးနန်းတော်တွေဆိုတာ သာမန် နန်းတော်သက်သက်... ဒါမှမဟုတ် နဂါးနီတာအိုပညာရှင်ရဲ့ သာမန် ဂူဗိမာန်တွေပဲ။ ဒီနန်းတော်တစ်ခုတည်းကပဲ ထူးခြားပြီး ကွဲပြားနေတာ။ ဘာလို့လဲဆိုတော့... ဒီနန်းတော်က ကမ္ဘာကြီးတစ်ခုလုံး အစစ်အမှန် ပျက်စီးပြိုလဲသွားခဲ့စဉ်က ကျန်ရစ်ခဲ့တဲ့ ကမ္ဘာပျက်ကပ် အကြွင်းအကျန်တစ်ခုကို သုံးပြီး သွန်းလုပ်ထားလို့ပဲ..."

"ဘာ... အစစ်အမှန် ကမ္ဘာပျက်စီးခြင်းရဲ့ အကြွင်းအကျန် ဟုတ်လား"

ကုယွမ်သည် ဆွံ့အသွားခဲ့ရတော့သည်။

သူတို့ မှီတင်းနေထိုင်ရာ ဤကမ္ဘာလောကကြီးအပြင် အခြားသော ကမ္ဘာလောကကြီးများစွာ ရှိနေသေးကြောင်းကို ကုယွမ် သဘာဝကျစွာပင် သိရှိထားသည်။

အဆုံးတွင်မူ သူ၏ ယခင်ဘဝက ကမ္ဘာကြီးသည်လည်း သူတို့ထဲမှ တစ်ခုဖြစ်ခဲ့ပြီး ဒဏ္ဍာရီလာ မသေမျိုးလောကနှင့် ပြင်ပမိစ္ဆာလောကများမှာလည်း အခြားသော ကမ္ဘာကြီးများအဖြစ် သတ်မှတ်နိုင်သောကြောင့်ပင်။

သို့သော်လည်း ကမ္ဘာပျက်စီးခြင်း အကြွင်းအကျန်ဟူသော စကားလုံးကမူ ကုယွမ်ကို အချို့သောအရာများနှင့် မလွဲမသွေ ဆက်စပ်တွေးတောမိသွားစေသည်။

ကမ္ဘာပျက်ကပ်ရဲ့ အကြွင်းအကျန် ဟုတ်လား... ဒါဆို တစ်ချိန်တုန်းက ပြီးပြည့်စုံနေခဲ့တဲ့ ကမ္ဘာကြီးတစ်ခုလုံးက သုညဘဝရောက်အောင် ပျက်စီး ပြိုလဲသွားခဲ့တာပေါ့။ မတွေးရဲစရာပဲ... ကောင်းကင်ဘုံကို လှန်ပစ်နိုင်တဲ့ ဘယ်လိုမျိုး အတိုင်းအဆမရှိ ပြင်းထန်လွန်းတဲ့ စွမ်းအားကြီးကများ ကမ္ဘာကြီးတစ်ခုလုံးကို ဒီလောက်အထိ အစအနမကျန်အောင် ဖျက်ဆီးပစ်နိုင်ခဲ့တာပါလိမ့်...

"မှန်တယ်..."

ကုယွမ် အကြီးအကျယ် အံ့အားသင့်သွားသည်ကို မြင်သောအခါ ဆရာကြီးဟယ်လင်က ခပ်ဖွဖွပြုံးလျက် "ကောလာဟလတွေအရတော့ ဒီနဂါးနီမသေမျိုးနန်းတော်ကို နဂါးနီတာအိုပညာရှင်က ကမ္ဘာပျက်စီးခြင်း အကြွင်းအကျန်တစ်ခုအဖြစ် မတော်တဆ ရှာဖွေတွေ့ရှိခဲ့ပြီးနောက်မှ ပြန်လည်သွန်းလုပ်ခဲ့တာလို့ ပြောကြတယ်။ ဒါပေမဲ့ အစစ်အမှန်မှာတော့ ဒီအကြွင်းအကျန်ဟာ ကမ္ဘာကြီးတစ်ခုလုံးရဲ့ ထောင့်စွန်းလေးတစ်ခုပဲ ရှိသေးတာပါ။ ဒါတောင်မှ ဒါရဲ့ အတွင်းပိုင်း ဟင်းလင်းပြင်က အတိုင်းအတာထက်ကျော်လွန်ပြီး အရမ်း ကျယ်ဝန်းတာပေါ့..."

"ယွမ်အာ... မင်း သိထားရမှာက ငါတို့တွေရဲ့ ကောင်းကင်ယံအပြင်ဘက်မှာ အခြားသော ကောင်းကင်တွေ ရှိနေသေးတယ်ဆိုတာပဲ။ ဒီကမ္ဘာကြီးက ကြီးမားလှတယ်ဆိုပေမဲ့ တကယ်တမ်းတော့ ကမ္ဘာလောကကြီးတစ်ခုတည်းတင် ရှိနေတာ မဟုတ်ဘူး။ မင်းမှာ မွေးရာပါ နတ်ဘုရားအတတ်ပညာတွေရှိပြီး လူသားတွေထဲက ပါရမီရှင်တစ်ယောက်ဖြစ်မှန်း ငါသိပေမဲ့ ဘယ်လိုအခြေအနေမျိုးမှာမဆို ထောင်လွှားတာနဲ့ မောက်မာတာတွေကိုတော့ အမြဲတမ်း သတိပြုဆင်ခြင်ရမယ်... နားလည်လား..."

ကုယွမ်က ရိုသေစွာ လက်အုပ်ချီလျက် "ဆရာ့ရဲ့ လမ်းညွှန်မှုအတွက် ကျေးဇူးတင်ပါတယ် ခင်ဗျာ။ စိတ်ချပါ... တပည့်အနေနဲ့ ဆရာ့ကို စိတ်ပျက်စေမှာ မဟုတ်ပါဘူး..."

ထိုသို့ပြောဆိုရင်း ကုယွမ်သည် တစ်စုံတစ်ရာကို သတိရသွားဟန်ဖြင့် စူးစမ်းလိုစိတ်ဖြင့် "ဒါနဲ့ ဆရာ... လီချန်ရှန်းက အဲဒီ မီးလျှံနဂါး ကျောက်စိမ်းတံဆိပ်ပြားအတွက်နဲ့ နဂါးနီမသေမျိုးနန်းတော်ထဲကို ဝင်သွားတာ မဟုတ်ဘူးလား။ အခု သူ ဘာတွေ ဖြစ်ပျက်နေပြီလဲခင်ဗျာ။ သူ အဲဒီ မီးလျှံနဂါး ကျောက်စိမ်းတံဆိပ်ပြားကို ရရှိသွားခဲ့ပြီလား..." ဟု မေးမြန်းလိုက်၏။

အမှန်အတိုင်း ပြောရလျှင် လီချန်ရှန်းသည် အဘယ်ကြောင့် ဤမျှလောက်အထိ ထိုကျောက်စိမ်းတံဆိပ်ပြားကို ရရှိရန် ဇွဲနပဲဖြင့် ကြံစည်နေရသနည်းဆိုသည်ကို ကုယွမ် အမြဲတစေ သိချင်နေခဲ့ခြင်းပင်။

သို့သော် နောက်ပိုင်းတွင်မူ ထိုမီးလျှံနဂါး ကျောက်စိမ်းတံဆိပ်ပြားသည် သန့်စင်သော ယန်ရတနာတစ်ခုဖြစ်ပြီး အလွန်တရာ အစွမ်းထက်ရုံသာမက ကံကြမ္မာကိုပါ ဖိနှိပ်ချုပ်ထိန်းနိုင်စွမ်းရှိကာ ၎င်း၏ အရည်အသွေးမှာ ဝိညာဉ်ရတနာအဆင့်သို့ ရောက်ရှိရန် ခြေတစ်လှမ်းမျှသာ လိုတော့ကြောင်း သူ တဖြည်းဖြည်းချင်း နားလည်လာခဲ့သည်။

လီချန်ရှန်းကိုယ်တိုင်ကလည်း သန့်စင်သော ယန်တာအိုခန္ဓာကိုယ်ကို ပိုင်ဆိုင်ထားသူဖြစ်၍ ခန္ဓာကိုယ်ဖွဲ့စည်းပုံချင်းအရ ထိုကျောက်စိမ်းတံဆိပ်ပြားနှင့် အလွန်တရာ ကိုက်ညီသည်။ အကယ်၍ သူသာ ၎င်း၏အတွင်းပိုင်းရှိ သန့်စင်သော ယန်တာအိုနိယာမကို အစဉ်မပြတ် သဘောပေါက်နားလည်နိုင်မည်ဆိုပါက သူ့အတွက် ကြီးမားလှသော ကောင်းကျိုးများကို ခံစားရရှိစေမည်မှာ အမှန်ပင်။

ထို့ကြောင့်ပင် လီချန်ရှန်းအနေဖြင့် ထိုကျောက်စိမ်းတံဆိပ်ပြားကို ရရှိရန်အတွက် တောင်အောက်သို့ တကူးတက ဆင်းလာခဲ့ခြင်းမှာ ဆန်းကြယ်သော ကိစ္စရပ်တစ်ခု မဟုတ်တော့ချေ။

သို့သော်ငြားလည်း ယခင်က ကုယွမ်သည် ရှန်ယွီမင်၏ ဖိတ်ကြားချက်အရ စားသောက်ပွဲသို့ တက်ရောက်စဉ်က... လျူကွမ်း၊ ရှန်ယွီမင်နှင့် ကျိချန်ဟိုင်တို့ကိုယ်တိုင်ပင် ဤမီးလျှံနဂါး ကျောက်စိမ်းတံဆိပ်ပြားအပေါ် အလွန်တရာ စိတ်ဝင်စားနေကြသည်ကို သတိပြုမိခဲ့ဖူးသည်။

ဤအချက်ကပင် ကုယွမ်၏ စိတ်ထဲ၌ သံသယအချို့ကို ဖြစ်ပေါ်စေခဲ့ခြင်း ဖြစ်တော့သည်။

"ဒီ မီးလျှံနဂါး ကျောက်စိမ်းတံဆိပ်ပြားမှာ ငါ မသိသေးတဲ့ တခြားသော လျှို့ဝှက်အစွမ်းသတ္တိတွေ ရှိနေလို့လား..."

ကုယွမ်သည် ကျိချန်ဟိုင်က သူ့ကို ယခုတစ်ခေါက် နဂါးနီမသေမျိုးနန်းတော်သို့ အတူတကွသွားရောက်ရန် ဖိတ်ခေါ်ခဲ့ခြင်း၏ နောက်ကွယ်က တကယ့်ရည်ရွယ်ချက်မှာလည်း ဤကျောက်စိမ်းတံဆိပ်ပြားကို ရယူရန် ဖြစ်နိုင်သည်ဟုပင် သံသယဝင်မိသွားသည်။

ဆရာကြီးဟယ်လင်က ခေါင်းကို ခါယမ်းလိုက်ရင်း "လီချန်ရှန်းက မွေးရာပါ တာအိုခန္ဓာကိုယ်ပိုင်ရှင်ပီပီ ပါရမီပဲဖြစ်ဖြစ်၊ မွေးရာပါ အလားအလာ၊ သဘောပေါက်နားလည်မှုနဲ့ ကံကြမ္မာပိုင်းမှာပါ ဒီလောကရဲ့ ထိပ်သီးပုဂ္ဂိုလ်တစ်ယောက်ဆိုတာ မှန်ပါတယ်"

"ဒါပေမဲ့ နဂါးနီမသေမျိုးနန်းတော်ထဲကနေ အကျိုးအမြတ်တစ်ခုခုရဖို့၊ အထူးသဖြင့် အဲဒီ မီးလျှံနဂါး ကျောက်စိမ်းတံဆိပ်ပြားကို ရယူဖို့ ကြံစည်တာက ပါရမီတစ်ခုတည်းရှိရုံနဲ့ မလုံလောက်ဘူး... လုံလောက်တဲ့ ကံတရားနဲ့ အခွင့်အရေးလည်း လိုအပ်သေးတယ်ဗျ"

"ဒီတစ်ခေါက်တော့ ငါနဲ့ လီချန်ရှန်းက လမ်းခွဲပြီး သီးခြားစီ ရှာဖွေခဲ့ကြတာ။ ငါ့အနေနဲ့ အထိုက်အလျောက် အကျိုးအမြတ်တွေ အများကြီးရခဲ့တယ်... ငါ့ရဲ့ကျင့်စဉ် တိုးတက်လာရုံတင်မကဘဲ ဓားသိုင်းအတတ်မှာလည်း သိသိသာသာ အဆင့်တက်လှမ်းနိုင်ခဲ့သလို တခြားသော ကောင်းကျိုးတွေလည်း အများကြီး ရခဲ့တာပေါ့"

"ဒါပေမဲ့ လီချန်ရှန်းရဲ့ အကျိုးအမြတ်က ပိုပြီးကြီးမားတယ်ဆိုရမယ်... သူက အခုဆိုရင် ယင်ဝိညာဉ်အဆင့်ကိုတောင် ချဉ်းကပ်နေပြီလေ။ ဒါပေမဲ့ မီးလျှံနဂါး ကျောက်စိမ်းတံဆိပ်ပြားနဲ့ ပတ်သက်လို့ကတော့... ငါလည်း အတိအကျကြီး မသိရပေမဲ့ သူ မရလောက်ဘူးလို့ပဲ ထင်တယ်..."

ဆရာကြီးဟယ်လင်က ဤမျှအထိ ယုံကြည်ချက်ရှိရှိ ပြောဆိုနေသည်ကို မြင်သောအခါ ကုယွမ်က ဇဝေဇဝါဖြင့် "ဆရာ... ဘာဖြစ်လို့ ဒီလောက်အထိ သေချာနေရတာလဲ ခင်ဗျာ..." ဟု မေးလိုက်မိသည်။

"မင်းက အဲဒီ မီးလျှံနဂါး ကျောက်စိမ်းတံဆိပ်ပြားက အစစ်အမှန်မှာ ဘာလဲဆိုတာ သိလို့လား..."

ဆရာကြီးဟယ်လင်က ကုယွမ်ကို တစ်ချက် ဝေ့ကြည့်လိုက်သည်။

ကုယွမ်က "တပည့်ကြားရသလောက်တော့ အဲဒီ မီးလျှံနဂါး ကျောက်စိမ်းတံဆိပ်ပြားက နဂါးနီတာအိုပညာရှင်ရဲ့ ကိုယ်ပိုင်ရတနာဖြစ်ပြီး ဝိညာဉ်ရတနာအဆင့်နဲ့ သိပ်မကွာတော့ဘူးတဲ့။ အရမ်းအစွမ်းထက်တဲ့အပြင် ကံကြမ္မာကိုပါ ဖိနှိပ်ချုပ်ထိန်းနိုင်စွမ်း ရှိတယ်လို့ သိထားပါတယ်..." ဟု ပြန်ဖြေလိုက်သည်။

ဆရာကြီးဟယ်လင်က ခေါင်းညိတ်လိုက်ပြီး သူ၏မျက်နှာထက်တွင် အေးစက်သော အပြုံးတစ်ခု ပေါ်ထွက်လာကာ"မင်းတွေးမိတဲ့ အချက်တွေအားလုံးက မှန်လည်းမှန်တယ်၊ အကြောင်းပြချက်လည်း ခိုင်လုံပါတယ်။ ဒါပေမဲ့ ကန့်လန့်ကာနောက်ကွယ်က အမှန်တရားမှာတော့ ဒီရတနာမှာ တကယ့်ကို တုန်လှုပ်ချောက်ချားစရာ အစွမ်းတစ်ခု ရှိနေသေးတယ်ကွ။ နဂါးနီတာအိုပညာရှင်က ဒီရတနာကို သွန်းလုပ်တုန်းက... နဂါးနီမသေမျိုးနန်းတော်ရဲ့ အသက်သွေးကြောဖြစ်တဲ့ ကမ္ဘာဦးအမြုတေအစိတ်အပိုင်းအချို့ကို ဖဲ့ထုတ်ပြီး သွန်းလုပ်ခဲ့တာ။ ဆိုလိုတာက... တစ်ယောက်ယောက်ကသာ ဒီ မီးလျှံနဂါး ကျောက်စိမ်းတံဆိပ်ပြားကို အပိုင်ရပြီး သွေးစက်ချ သန့်စင်နိုင်ခဲ့မယ်ဆိုရင် နဂါးနီမသေမျိုးနန်းတော်တစ်ခုလုံးကို လက်ဝါးထဲက ပစ္စည်းလို စိတ်ကြိုက် ခြယ်လှယ်နိုင်ပြီး နန်းတော်ရဲ့ အရှင်သခင်အစစ်အမှန် ဖြစ်လာမှာပဲ"

"ကဲ... ဒါဆိုရင်တော့ မင်း သဘောပေါက်လောက်ပြီပေါ့။ ပြောစမ်းပါဦး... လီချန်ရှန်းဆိုတဲ့ ကောင်က ဘာဖြစ်လို့ ဒီရတနာကိုရဖို့ ခွေးရူးတစ်ကောင်လို ဒီလောက်အထိ အသည်းအသန် ဖြစ်နေရတာလဲဆိုတာ..."

ကုယွမ်သည် ဆွံ့အလျက် မှင်တက်သွားခဲ့ရတော့သည်။

ဆရာကြီးဟယ်လင်၏ ဆိုလိုရင်းကို သူ ကောင်းစွာ နားလည်သွားခဲ့ပြီ ဖြစ်သည်။ မီးလျှံနဂါး ကျောက်စိမ်းတံဆိပ်ပြားဟူသည်မှာ နဂါးနီမသေမျိုးနန်းတော်ဟူသော ကမ္ဘာငယ်လေးတစ်ခုလုံး၏ ပင်မဗဟိုချက် သို့မဟုတ် အရာအားလုံးကို ထိန်းချုပ်မောင်းနှင်နိုင်သည့် စနစ်ကြီးတစ်ခုနှင့် တူညီနေခြင်းပင်။

ဒီပစ္စည်းကိုသာ လက်ထဲ ထည့်နိုင်ခဲ့ရင် ကမ္ဘာငယ်လေးတစ်ခုလုံးကို ကိုယ့်စိတ်ကြိုက် ခြယ်လှယ်လို့ရတဲ့ ကောင်းကင်ဘုံသခင် ဖြစ်လာမှာပဲ။ အင်း ဒီလိုကြီးမားတဲ့ အကျိုးအမြတ်ရှိမှတော့ လီချန်ရှန်းဆိုတဲ့ကောင်က ဒီရတနာကို ရဖို့ ဘာလို့ အသည်းအသန် ကြံစည်နေရလဲဆိုတာ သံသယဝင်စရာ မလိုတော့ဘူး။

နဂါးနီမသေမျိုးနန်းတော်တစ်ခုလုံး တစ်ကိုယ်တော် ပိုင်ဆိုင်ခွင့်ရမှာဆိုတော့ ဒါက မတွေးဝံ့စရာကောင်းလောက်အောင် အရူးအမူးဖြစ်စရာ အခွင့်အရေးနဲ့ ကောင်းကင်ဘုံရဲ့ ကံတရားကြီးပဲ မဟုတ်ဘူးလား။

ဒါကြောင့်ကိုး... လီချန်ရှန်းတင်မကဘူး ရှန်ယွီမင်၊ လျူကွမ်းနဲ့ ကျိချန်ဟိုင်တို့လို ထိပ်သီးကောင်တွေအထိပါ ဒီရတနာနောက်ကို တကောက်ကောက် လိုက်နေကြတာ။ သေချာတယ်... ဒီပွဲကတော့ သွေးချောင်းစီးမယ့် တိုက်ပွဲကြီး ဖြစ်လာမှာပဲ။

ထို့ပြင် ဆရာကြီးဟယ်လင်အနေဖြင့် လီချန်ရှန်း ၎င်းကို မရရှိသေးကြောင်း အဘယ်ကြောင့် ရဲရဲကြီး အာမခံနိုင်တာလဲဟူသည်ကိုလည်း ကုယွမ် သဘောပေါက်သွားခဲ့သည်။

အကြောင်းမှာ အကယ်၍ လီချန်ရှန်းသာ ၎င်းကို ရရှိသွားခဲ့လျှင် သူသည် ယခုအချိန်တွင် ၎င်းကို သန့်စင်ပြီးစီးသွားကာ နဂါးနီမသေမျိုးနန်းတော်တစ်ခုလုံးကိုပါ သိမ်းပိုက်ရယူသွားခဲ့လောက်ပြီ ဖြစ်သောကြောင့်ပင်။

"ကြည့်ရတာ... ကျိချန်ဟိုင်ရဲ့ အဓိက ရည်ရွယ်ချက်ကလည်း ဒီမီးလျှံနဂါး ကျောက်စိမ်းတံဆိပ်ပြားပဲ ဖြစ်ဖို့များတယ်..."

ကုယွမ်သည် စိတ်ထဲမှ တိတ်ဆိတ်စွာ တွေးတောလိုက်ပြီးနောက် ဤကိစ္စနှင့် ပတ်သက်၍ ထပ်မံ၍ စကားမဆိုတော့ဘဲ လမ်းကြောင်းလွှဲကာ

"ဆရာ... တပည့်အနေနဲ့ နောက်ပိုင်းကျရင် ငွေရောင်နဂါးမြစ်ဓားကို ပြန်လည်သွန်းလုပ်ဖို့ အစီအစဉ် ရှိပါတယ်။ ဒါကြောင့်မို့လို့ ဆရာ့အနေနဲ့ တပည့်ကို ပျံသန်းနိုင်သောဓား သွေးပူဇော်ခြင်းအတတ်လမ်းညွှန်ချက်တွေကို သင်ကြားပေးပါဦး ခင်ဗျာ..."

မကြာမီ အချိန်အတွင်း သူသည် နဂါးနီမသေမျိုးနန်းတော်သို့ ဝင်ရောက်ရတော့မည် ဖြစ်ရာ သူ၏ ပင်မရည်မှန်းချက်မှာ ခရမ်းရောင်အမြွာကြာပန်းအပြင် ငွေရောင်နဂါးမြစ်ဓားကို ပြန်လည်သွန်းလုပ်ရန်အတွက် လိုအပ်သော ဆန်းကြယ်ရွှေရိုင်းများနှင့် နတ်ဘုရားသံမဏိများကို ရှာဖွေရန်လည်း ပါဝင်နေခြင်းကြောင့်ပင်။

ဤပျံသန်းနိုင်သောဓားမှာ အရည်အသွေး အလွန်တရာ ပြောင်မြောက်လှပြီး အဆင့်မြင့်သက်စောင့်မှော်လက်နက်တစ်ခု ဖြစ်ပေရာ နောင်တစ်ချိန်တွင် ကုယွမ် ရွှေအမြုတေကို သွန်းလုပ်အောင်မြင်ပြီးနောက် ၎င်းကို သူ၏ သက်စောင့်မှော်လက်နက်အဖြစ် ပြန်လည် သန့်စင်သွန်းလုပ်လျှင်ပင် လုံလောက်မှု ရှိစေရန်အတွက်ပင်။