အခန်း ၃၁၃

အခန်း (၃၁၃) လခွမ်း... ငါအိပ်ရာထမြန်သွားလို့များလား... လိုက်ဖ်ထဲမှာ နတ်ဘုရားတိရစ္ဆာန်ကြီးကို မြင်လိုက်ရတယ်

ရှန်းနုန်ကျား။

ဤနေရာတွင် ယခင်က တောလူရိုင်းများ ရှိသည်ဟု ကောလာဟလများ ရှိခဲ့ဖူးသော်လည်း ယခုအခါ မည်သူကမျှ ထိုအကြောင်းကို မပြောကြတော့ချေ။ သို့သော် လမ်းသွားလမ်းလာများ ရိုက်ကူးထားသော ဗီဒီယိုအချို့တွင် ရှန်းနုန်ကျား၏ ရှားပါး တိရစ္ဆာန်များကို မြင်တွေ့ရတတ်ပေသည်။

၎င်းတို့မှာ မျိုးဗီဇပြောင်း အဖြူရောင် တိရစ္ဆာန်များပင် ဖြစ်သည်။

သဘာဝလောကတွင် မျိုးဗီဇပြောင်း အဖြူရောင် တိရစ္ဆာန်များစွာ ရှိသည်။ ဥပမာအားဖြင့် ကျားဖြူ၊ ခြင်္သေ့ဖြူ၊ ဒေါင်းဖြူ၊ မိကျောင်းဖြူ စသည်တို့ ဖြစ်သည်။ ၎င်းတို့ထဲတွင် ချွင်းချက်အနေဖြင့် ကျားသစ်များ၏ မျိုးဗီဇမှာမူ ပြောင်းပြန်ဖြစ်ပြီး အမည်းရောင်စစ်စစ်အဖြစ် ပြသလေ့ရှိသည်။

၎င်းတို့အပြင် ရှန်းနုန်ကျားတွင် အလွန်ရှားပါးသော အခြားတိရစ္ဆာန်များကိုလည်း တွေ့ရှိရတတ်သည်။ ဥပမာအားဖြင့် အဖြူရောင် ဒရယ်ပြောက်၊ အဖြူရောင် ဝက်ဝံမည်းနှင့် အဖြူရောင် မြွေပါတို့ ဖြစ်ကြသည်။

၎င်းတို့ထဲတွင် အဖြူရောင် ဝက်ဝံမည်းနှင့် ပတ်သက်၍ ရယ်စရာ ဇာတ်လမ်းတစ်ပုဒ် ရှိလေသည်။ တိရစ္ဆာန် ကာကွယ်စောင့်ရှောက်ရေး အဖွဲ့က ၎င်းကို တွေ့ရှိသွားသောအခါ လမ်းပျောက်နေသော ဝင်ရိုးစွန်းဝက်ဝံဟု ထင်မှတ်သွားပြီး မြောက်ဝင်ရိုးစွန်းသို့ ပို့ဆောင်ပေးခဲ့ကြသည်။

ထိုအဖြစ်အပျက်ကြောင့် အဖြူရောင် ဝက်ဝံမည်းခမျာ မြောက်ဝင်ရိုးစွန်းမှနေ၍ မြောက်ပိုင်း သစ်တောများဆီသို့ အရောက် တောင်ဘက်သို့ တောက်လျှောက် ပြေးခဲ့ရတော့သည်။

အကယ်၍သာ ထိုအဖြူရောင် ဝက်ဝံမည်း စကားပြောတတ်မည်ဆိုပါက သေချာပေါက် ဆဲဆိုနေမည်သာ ဖြစ်သည်။

'ငါက ဝက်ဝံမည်းကွ... မင်းတို့ကောင်တွေ သေချာကြည့်ကြစမ်း... ငါက ဝက်ဝံမည်းကွ'

မည်သို့ပင်ဆိုစေ တကယ်ကို ဆန်းကြယ်လှပေသည်။ ရှန်းနုန်ကျားတွင် ထူးခြားသော အရာတစ်ခုခု ရှိနေသကဲ့သို့ ဤနေရာတွင် မျိုးဗီဇပြောင်း အဖြူရောင် တိရစ္ဆာန်များ အလွန်များပြားလှသည်။

နောက်တစ်နေ့ နံနက်ပိုင်းတွင် ရွှီယန်က တိုက်ရိုက်ထုတ်လွှင့်မှုကို စတင်လိုက်သည်။

ဤတစ်ကြိမ် တိုက်ရိုက်ထုတ်လွှင့်မှု မြင်ကွင်းက ယခင်အချိန်များနှင့် လုံးဝ မတူညီချေ။

အင်တာနက်သုံးစွဲသူများ တိုက်ရိုက်ထုတ်လွှင့်မှုထဲသို့ ဝင်ရောက်လာသောအခါ ပထမဆုံး မြင်တွေ့လိုက်ရသည်မှာ မြူခိုးများ ဖုံးလွှမ်းနေသော မြင်ကွင်းပင် ဖြစ်သည်။

အရာအားလုံးက မှုန်ဝါးဝါးဖြစ်နေပြီး နတ်ပြည်ကဲ့သို့ပင် ဖြစ်နေတော့သည်။

[ဒါက ဘယ်ရောက်သွားတာလဲ... ပြည်တွင်းမှာပဲလား]

[လောင်ရွှီရဲ့ လိုက်ဖ်လွှင့်မှုကြီး... တခြားကမ္ဘာကို ရောက်သွားတာလား... သူက အချိန်ခရီးသွားလာသူလို့ ငါပြောသားပဲ]

[လိုက်ဖ်လွှင့်သူက နတ်ပြည် ပြန်သွားတာလား... ပေါ်သွားပြီပေါ့]

[မြူတွေ အရမ်းထူတာပဲ]

တိုက်ရိုက်ထုတ်လွှင့်မှုထဲတွင် မြူခိုးများ ဖုံးလွှမ်းနေသဖြင့် မြင်ကွင်းက သိပ်မရှင်းလင်းလှချေ။ ထိုအချိန်တွင် ရွှီယန်၏ အသံ ထွက်ပေါ်လာခဲ့သည်။

"ဒီဘက်ကတော့ ဒီလိုပဲ... မြူတွေ အရမ်းထူတယ်... နေ့လယ်လောက်ရောက်မှ မြူတွေ ကွဲသွားလောက်တယ်"

"အရမ်း စိုစွတ်လွန်းတော့ ပတ်ဝန်းကျင်မှာ လူတွေနေဖို့ မသင့်တော်ဘူး... မဟုတ်ရင် လေးဘက်နာ ဖြစ်လွယ်တယ်လေ"

"ဒါပေမဲ့ ဒီဘက်မှာ တိရစ္ဆာန်တွေတော့ မနည်းဘူး"

"ဝက်ဝံမည်းတွေ ဒရယ်ပြောက်တွေ အကုန်ရှိတယ်"

"သူတို့တွေရော လေးဘက်နာ ဖြစ်မလားတော့ မသိဘူး... သူတို့မှာက သားမွေးတွေ ပါလာတော့ ဒါတွေကို စဉ်းစားစရာ မလိုလောက်ဘူး ထင်တယ်"

ရွှီယန်၏ အသံနှင့်အတူ သူ၏ ပုံရိပ်ကလည်း တဖြည်းဖြည်း ပေါ်ထွက်လာခဲ့သည်။

သေချာ ကြည့်လိုက်သောအခါ ရွှီယန်က တောင်တက်ဝတ်စုံ အပြည့်အစုံ ဝတ်ဆင်ထားပြီး ကျောပိုးအိတ်ကိုလည်း လွယ်ထားရာ အလွန် ပရော်ဖက်ရှင်နယ် ဆန်လှပေသည်။ အပြင်ဘက်တွင် ရေငွေ့များကို အများစု ကာကွယ်ပေးနိုင်သည့် တစ်ခါသုံး မိုးကာအင်္ကျီ အကြည်ကိုပါ ထပ်မံ ဝတ်ဆင်ထားသေးသည်။

တိုက်ရိုက်ထုတ်လွှင့်မှုထဲသို့ လူအရေအတွက် လျင်မြန်စွာ ဝင်ရောက်လာပြီး ကျော်ကြားမှု အဆင့်သတ်မှတ်ချက်က ချက်ချင်းပင် ထိပ်ဆုံး အယောက်ငါးဆယ် စာရင်းဝင်သွားခဲ့သည်။

ရွှီယန်ကမူ မိမိကိုယ်ကို သာမန် တောတောင်ရှာဖွေသူ တစ်ဦးဟုသာ ထင်မှတ်ထားသော်လည်း အင်တာနက်သုံးစွဲသူများကတော့ သူ့ကို ပြည်တွင်းရှိ အကောင်းဆုံး ပြင်ပစွန့်စားသွားလာသူ တစ်ဦးဟု သတ်မှတ်ထားကြသည်။

အဘယ်ကြောင့်ဆိုသော် သူလုပ်ဆောင်နေသည့် အရာများကို အခြား မည်သူကမျှ လုပ်ဆောင်နိုင်ခြင်း မရှိသောကြောင့်ပင်။

[ဒါက ဘယ်နေရာလဲ]

[သူ ဘယ်ကို ရောက်သွားပြန်ပြီလဲ]

အင်တာနက်သုံးစွဲသူများက တိုက်ရိုက်ထုတ်လွှင့်မှုထဲတွင် ရွှီယန် ရောက်ရှိနေသည့် နေရာကို သိရှိရန် အဆက်မပြတ် မေးမြန်းနေကြသည်။

မည်သို့ပင်ဆိုစေ ပြည်တွင်း၌ မြူများ ဖုံးလွှမ်းနေသော တောင်တန်းများက အလွန် များပြားလွန်းလှသည် မဟုတ်ပါလော။ ပြည်နယ်တိုင်းတွင် တောင်တန်းကြီးများ ရှိကြပြီး မြို့အများစု၏ ပတ်ဝန်းကျင်တွင်လည်း တောင်ငယ်လေးများ ရှိတတ်ကြသည်။

တရုတ်နိုင်ငံတွင် တောင်တန်း မည်မျှရှိမည်ကို ခန့်မှန်းကြည့်၍ ရနိုင်သည်။ အကယ်၍ အားလုံးကို ထုတ်မပြောပြပါက မည်သူကမျှ ခန့်မှန်းနိုင်မည် မဟုတ်ချေ။

ရွှီယန်ကလည်း ဖုံးကွယ်မထားဘဲ ရှင်းပြလိုက်သည်။

"ကျွန်တော် အခု ရှန်းနုန်ကျားကို ရောက်နေတာပါ... ဒီနေရာက တကယ်ကို ထူးခြားတယ်... သစ်တောအုပ်ကြီးတွေနဲ့ ရှားပါး တောရိုင်းတိရစ္ဆာန်တွေ ရှိရုံတင်မကဘဲ ရှေးဟောင်း အမွေအနှစ် နေရာတွေပါ ရှိသေးတယ်"

"ဒါပေမဲ့ အမွေအနှစ် နေရာတွေဘက်ကိုတော့ ပိတ်ထားလို့ ဝင်လို့မရဘူး... တောင်ထိပ်က ရှန်းနုန် ကြေးအိုးကြီးကို သွားကြည့်ဖို့ဆိုတာ မဖြစ်နိုင်တော့ဘူးပေါ့"

"ကျွန်တော်က စည်းကမ်းလိုက်နာတဲ့သူဆိုတော့ မသွားရတဲ့ နေရာတွေကို မသွားပါဘူး"

"အခု ကျွန်တော် ရောက်နေတဲ့ နေရာက ရှန်းနုန်ကျားရဲ့ သစ်တောအုပ်ကြီးပါ... ဒီသစ်တောထဲကို ပုံမှန်ဆို ဘယ်သူမှ မဝင်ကြဘူး"

"ကျွန်တော် ဒီကိုလာတာက ဒဏ္ဍာရီလာ နတ်ဘုရား တိရစ္ဆာန် မျိုးဗီဇပြောင်း အဖြူရောင် တိရစ္ဆာန်တွေကို လာရှာတာပါ"

"အားလုံးပဲ ဒီလို မြင်ကွင်းမျိုးမှာ ရုတ်တရက် အဖြူရောင် သမင်တစ်ကောင် ထွက်လာရင် နတ်ဘုရား တိရစ္ဆာန်နဲ့ မတူဘူးလား ဆိုတာ တွေးကြည့်ကြပါဦး"

ရွှီယန်၏ ရှင်းပြချက်ကို ကြားသောအခါမှ အားလုံးက သဘောပေါက်သွားကြသည်။

ဤနေရာက ရှန်းနုန်ကျား ပင် ဖြစ်သည်။

သို့သော် သိပ်မကြာခင်မှာပင် အင်တာနက်သုံးစွဲသူ အများစု၏ ခေါင်းထဲတွင် မေးခွန်းတစ်ခု ထပ်မံ ပေါ်ထွက်လာပြန်သည်။ ရှန်းနုန်ကျား က ဘယ်နေရာမှာလဲ ဟူ၍ ဖြစ်သည်။

ဤအကြောင်းအရာများနှင့် ပတ်သက်၍ လူအများစုက သိပ်မသိရှိကြသလို သစ်တောအုပ်ကြီးများကလည်း ၎င်းတို့နှင့် မည်သို့မျှ မသက်ဆိုင်သကဲ့သို့ ခံစားရတတ်သည်။

ထို့ကြောင့် ရွှီယန်၏ လိုက်ဖ်လွှင့်မှုကို ကြည့်ရှုသောအခါမှသာ ပို၍ အံ့ဩစိတ်လှုပ်ရှားဖွယ် ကောင်းသော ခံစားချက်များကို ရရှိကြခြင်း ဖြစ်သည်။

ရွှီယန်က သစ်တောထဲတွင် လှည့်လည် ရှာဖွေနေသည်။

တောင်ထွက်ပစ္စည်းများ ရှာဖွေခြင်းက ယခုအခါ ရွှီယန် အလုပ်ချင်ဆုံး အရာ မဟုတ်တော့ချေ။

မည်သို့ပင်ဆိုစေ တောင်ထဲရှိ တန်ဖိုးကြီး အပင်များမှာ ကာကွယ်စောင့်ရှောက်ရမည့် အပင်များဖြစ်ပြီး ယခု ဈေးကွက်ပေါက်ဈေးအရလည်း အများကြီး မရနိုင်သောကြောင့် ဖြစ်သည်။

သူက တောတောင်စူးစမ်းလေ့လာသူ တစ်ဦးအနေဖြင့် သစ်တောထဲသို့ ဝင်ရောက်ကာ ရှုခင်းများကို ကြည့်ရှုရသည်ကိုသာ နှစ်သက်သူ ဖြစ်သည်။

ငယ်ငယ်က တောင်ထဲသို့ အမြဲ သွားရောက် ကစားခဲ့သကဲ့သို့ပင် ဖြစ်၏။

ရွှီယန်က ဤတောင်တန်းကြီးနှင့် ရေစက်ပါသောကြောင့်လည်း ဖြစ်နိုင်ပေသည်။

သူ စကားပြောပြီး၍ သိပ်မကြာခင်မှာပင် ရှေ့တွင် လှုပ်ရှားနေသော ပုံရိပ်တစ်ခု ပေါ်ထွက်လာခဲ့သည်။

မြူများ ဖုံးလွှမ်းနေသဖြင့် ပထမတစ်ချက် ကြည့်လိုက်ရုံဖြင့် သေချာ မမြင်ရချေ။

ရွှီယန်က အရှေ့သို့ ခြေလှမ်းအနည်းငယ် တိုးသွားသောအခါ ထိုပုံရိပ်က မြူခိုးများကြားမှ ထွက်ပေါ်လာပြီး ရွှီယန်၏ မျက်နှာပေါ်တွင် အံ့ဩချီးကျူးမှုများ ချက်ချင်း ပေါ်လွင်လာတော့သည်။

၎င်းမှာ အဖြူရောင် ဒရယ်ပြောက် တစ်ကောင်ပင် ဖြစ်သည်။

အဖြူရောင် ဒရယ်ပြောက်များက သာမန် ဒရယ်များထက် ပို၍ ပေါ့ပါးသွက်လက်ပြီး အထူးသဖြင့် အရွယ်ရောက်၍ ချိုထွက်လာသောအခါ ပို၍ပင် သိသာပေသည်။

ပွင့်ပွင့်လင်းလင်း ပြောရလျှင် ဒရယ်ချိုများက အလွန်ကောင်းမွန်သော အလှဆင်ပစ္စည်းများ ဖြစ်သည်။

တချို့ မွေးမြူရေးခြံများတွင် အဖြူရောင် ဒရယ်ပြောက်များကို မွေးမြူထားလေ့ ရှိပြီး ချိုမပါရှိပါက အဖြူရောင် ဒရယ်ပြောက်များမှာ သိုးများနှင့် အလွန် တူညီလှပေသည်။ သိုးဟုပင် ခံစားရစေနိုင်သည်။

သို့သော် ချိုထွက်လာသည်နှင့် တစ်ပြိုင်နက် အဆင့်အတန်းက ချက်ချင်း မြင့်မားသွားတော့သည်။ တကယ့် နတ်ဘုရား တိရစ္ဆာန်ပင် ဖြစ်၏။

သေချာသည်မှာ ဆံပင်ပုံစံက ရုပ်ရည်အပေါ် သက်ရောက်မှု ရှိပေသည်။

ထိုဒရယ်ပြောက်က တောင်စောင်းတွင် ရပ်နေပြီး ခန္ဓာကိုယ်ကို ချုံပုတ်တစ်ခုက ကွယ်ထားလေသည်။ ရွှီယန်က ၎င်းကို မြင်သောအခါ အံ့ဩတကြီး ရေရွတ်လိုက်မိသည်။

"လခွမ်း... တကယ်ကြီး လာတာပဲ"

ဒရုန်းက ပထမဆုံး အချိန်တွင် ဒရယ်ပြောက်ကို မရှာဖွေနိုင်ခဲ့ဘဲ စက္ကန့်အနည်းငယ် ကြာမှသာ ကင်မရာက ထိုဘက်သို့ လှည့်သွားခဲ့သည်။

အင်တာနက်သုံးစွဲသူများကလည်း အဖြူရောင် ဒရယ်ပြောက်၏ အသွင်အပြင်ကို သေချာစွာ မြင်တွေ့လိုက်ရသည်။

ထိုဒရယ်ပြောက်၏ တစ်ကိုယ်လုံးမှာ အဖြူရောင် အမွေးများ ဖုံးလွှမ်းနေပြီး ခေါင်းပေါ်တွင်တော့ အခက်အလက်များစွာ ရှိနေသည့် ဧရာမ ချိုကြီး တစ်စုံ ရှိနေသည်။

ပတ်ဝန်းကျင်ရှိ အဖြူရောင် မြူခိုးများနှင့် ပေါင်းစပ်လိုက်သောအခါ တကယ့် နတ်ဘုရား တိရစ္ဆာန် တစ်ကောင်နှင့်ပင် တူညီနေတော့သည်။

[လခွမ်း... မင်း တခြားကမ္ဘာမှာ မဟုတ်ဘူးလို့ ပြောရဲသေးလား]

[ဒါက တကယ် လိုက်ဖ်လွှင့်နေတာ သေချာရဲ့လား... ရုပ်ရှင် ရိုက်နေတာ မဟုတ်ဘူးလား]

[ဒါက ဘာကြီးလဲ... ဘယ်သူမွေးထားတာလဲ... နတ်ဘုရားတွေ ရှိနေတာလား]

[လခွမ်း... ငါ အိပ်ရာထမြန်သွားလို့များလား... လိုက်ဖ်ထဲမှာ နတ်ဘုရား တိရစ္ဆာန်ကြီးကို မြင်လိုက်ရတယ်... ပြန်အိပ်လိုက်ဦးမယ်]

ဤမြင်ကွင်းက လူများကို အလွန် အံ့ဩမှင်တက် သွားစေသည်။

အဖြူရောင် ဒရယ်ပြောက်က မလှမ်းမကမ်းတွင် ရပ်တန့်နေပြီး ခေါင်းကို ဟိုဟိုဒီဒီ လှည့်ကာ ပတ်ဝန်းကျင်ကို ကြည့်ရှုနေသည်။

တစ်ခါတရံ နားရွက်လေးများ လှုပ်သွားပြီး အနည်းငယ် သတိထားနေပုံ ရသည်။

၎င်းက ထိုနေရာတွင် ခုနစ်စက္ကန့် ရှစ်စက္ကန့်ခန့် ရပ်နေပြီးနောက် ခုန်ပေါက်ကာ ပြေးထွက်သွားတော့သည်။

ရွှီယန်က ဒရယ်ပြောက်ကို ထပ်မံ ရှာဖွေနိုင်ရန် အလျင်အမြန် ရှေ့သို့ တိုးသွားလိုက်သည်။

သို့သော် ထိုနေရာသို့ ရောက်သောအခါ မြူခိုးများကိုသာ မြင်တွေ့ရပြီး အဖြူရောင် ဒရယ်ပြောက်၏ အရိပ်အယောင်ကို လုံးဝ မတွေ့ရတော့ချေ။

ဤနေရာက အလွန် လျှို့ဝှက်ဆန်းကြယ်လှပြီး ရွှီယန်ကိုပင် အနည်းငယ် တွေဝေသွားစေသည်။

"ပျောက်သွားပြီ... ပြေးတာ တော်တော် မြန်တာပဲ"

ရွှီယန်က သက်ပြင်းချကာ ပြောလိုက်သည်။

အင်တာနက်သုံးစွဲသူများက ပို၍ပင် အံ့ဩသွားကြသည်။ ဤမြင်ကွင်းလေး တစ်ခုတည်းကပင် အားလုံးကို အံ့ဩမှင်တက် သွားစေခဲ့သည်။

ရွှီယန်ကတော့ အထဲသို့ ဆက်လက် ဝင်ရောက်သွားခဲ့သည်။

နံနက် ဆယ်နာရီကျော်သို့ ရောက်သောအခါ မြူခိုးများက မျက်စိရှေ့တွင်ပင် တဖြည်းဖြည်း ကွဲသွားတော့သည်။

ဆယ့်တစ်နာရီသို့ ရောက်သောအခါ မြူခိုးများ လုံးဝ ပျောက်ကွယ်သွားပြီး ပတ်ဝန်းကျင် ရှုခင်းများက ရှင်းလင်းသွားတော့သည်။

တစ်ချက် ကြည့်လိုက်ရုံဖြင့် တောင်ခြေရှိ ရှုခင်းများကိုပါ မြင်တွေ့နိုင်ပေသည်။

ရွှီယန်က အချိန်သင့်ပြီဟု ထင်သဖြင့် တောနက်ထဲသို့လည်း ရောက်နေပြီဖြစ်ရာ ရတနာရှာဖွေရေး သံလိုက်အိမ်မြှောင်ကို အသုံးပြုရန် ဆုံးဖြတ်လိုက်သည်။

[ရတနာရှာဖွေရေး တာဝန် နှိုးဆွလိုက်ပါပြီ... အတူ ဓာတ်ပုံရိုက်ခြင်း... မျိုးဗီဇပြောင်း အဖြူရောင် တိရစ္ဆာန်]

[တာဝန် လိုအပ်ချက်... ပိုင်ရှင် အနေဖြင့် မည်သည့် မျိုးဗီဇပြောင်း အဖြူရောင် တိရစ္ဆာန် တစ်ကောင်နှင့်မဆို အတူ ဓာတ်ပုံ ရိုက်ပါ]

[တာဝန် ဆုလာဘ်... မျိုးဗီဇပြောင်း အဖြူရောင် ကျီးကန်း... ချန်ပိုင်တောင်တန်း သစ်တောထဲတွင် မွေးကင်းစ ကျီးကန်းလေး တစ်ကောင် ဖြစ်ပြီး ကြီးပြင်းလာပါက ပိုင်ရှင်နှင့် အလိုအလျောက် ရင်းနှီးလာမည် ဖြစ်သည်]

မျက်နှာပြင်ပေါ်တွင် တာဝန်၏ အချက်အလက်များ ထွက်ပေါ်လာခဲ့သည်။

ဆုလာဘ်ကို မြင်သောအခါ ရွှီယန်၏ မျက်လုံးများပင် အရောင်လက်သွားတော့သည်။

'အဖြူရောင် ကျီးကန်း ဟုတ်လား'

အဖြူရောင် ကျီးကန်း ဆိုသည်မှာ အလွန် ရှားပါးသော ကျီးကန်း မျိုးစိတ် တစ်ခုဖြစ်ပြီး အလွန် ရှားပါးလွန်းလှကြောင်း ရွှီယန် သိရှိထားပေသည်။ ဤကဲ့သို့သော တိရစ္ဆာန်မျိုးကို ငွေကြေးဖြင့် တိုင်းတာ၍ မရနိုင်ချေ။

လောကရှိ ကျီးကန်း အားလုံး အမည်းရောင်ချည်းသာ ဟူသော စကားပုံ ရှိသော်လည်း ဤအဖြူရောင် ကျီးကန်းလေးကတော့ ထူးခြားစွာပင် အဖြူရောင်စစ်စစ် ဖြစ်နေပေသည်။

သေချာသည်မှာ ကျီးကန်းများက အမှန်တကယ်တော့ အမည်းရောင် မဟုတ်ဘဲ အရောင်စုံ ဖြစ်ပြီး နေရောင်အောက်တွင် အရောင်စုံ တောက်ပနေသော အလင်းရောင်များကို မြင်တွေ့နိုင်သော်လည်း အပြင်ပန်းတွင်မူ အမည်းရောင် အဖြစ်သာ မြင်တွေ့ရခြင်း ဖြစ်သည်။

'အဖြူရောင် ကျီးကန်း... ဒါက တကယ် ရှားပါးတာပဲ'

'တစ်ကောင်လောက် ရရင်တော့ တကယ် မိုက်မှာပဲ'

ရွှီယန် လည်း စိတ်ဝင်စားသွားတော့သည်။

နိုင်ငံခြားတွင် မိကျောင်းများကို တရားဝင် မွေးမြူခွင့် ရှိပြီး အဖြူရောင် မိကျောင်း တစ်ကောင်လျှင် ဒေါ်လာ သန်းချီ တန်ဖိုးရှိရာ အဖြူရောင် တိရစ္ဆာန်များ၏ တန်ဖိုး မည်မျှ ကြီးမားကြောင်း သိသာနိုင်ပေသည်။

အကယ်၍ အိမ်မွေးတိရစ္ဆာန် ဖမ်း၍ရသော ကမ္ဘာတွင်သာ ဆိုပါက ဤသည်က မျိုးဗီဇပြောင်း အိမ်မွေးတိရစ္ဆာန် တစ်ကောင် ဖြစ်ပြီး ရွှေပုံပေး၍တောင် ဝယ်၍ ရမည် မဟုတ်ချေ။

စနစ်က အဖြူရောင် တိရစ္ဆာန် သုံးကောင်၏ တည်နေရာကို ပြသပေးခဲ့သည်။

အဖြူရောင် တိရစ္ဆာန် သုံးကောင်လုံးက အတော်လေး ဝေးကွာသဖြင့် ရွှီယန်က တစ်ကောင်ကိုသာ ရွေးချယ်ရမည် ဖြစ်သည်။

ထို့အပြင် တစ်ကောင်က အလွန် လျင်မြန်စွာ ရွေ့လျားနေသဖြင့် သတိကြီးသော ဒရယ်ပြောက် ဖြစ်မည်ဟု ရွှီယန် ခန့်မှန်းလိုက်သည်။ ဓာတ်ပုံ တွဲရိုက်ရန် မလွယ်ကူချေ။

ထို့ကြောင့် သူက သိပ်မလှုပ်ရှားသော အခြား အဖြူရောင် တိရစ္ဆာန် တစ်ကောင်ကို ရွေးချယ်ကာ ထိုဘက်သို့ ထွက်လာခဲ့သည်။

ဓာတ်ပုံ တွဲရိုက်ရသည့် တာဝန်များက တချို့ လွယ်ကူပြီး တချို့က ခက်ခဲလှသည်။ ကံတရားကိုသာ ယုံကြည်ရမည် ဖြစ်၏။

မြူခိုးများ ပျောက်ကွယ်သွားပြီးနောက် သစ်တောအုပ်ကြီး၏ ရှုခင်းများက အနည်းငယ် ခြောက်သွေ့သွားသယောင် ရှိသည်။

ရွှီယန်က တစ်ခါသုံး မိုးကာအင်္ကျီကို ချွတ်ကာ ကျောပိုးအိတ်ထဲသို့ ပြန်ထည့်လိုက်ပြီး ခရီးဆက်ခဲ့သည်။

မိုးကာအင်္ကျီ မရှိတော့သဖြင့် လှုပ်ရှားရသည်မှာ အတော်လေး ပေါ့ပါးသွားတော့သည်။

အင်တာနက်သုံးစွဲသူများက သစ်တောအုပ်ကြီးကို ကြည့်ရင်း ပေါ့ပေါ့ပါးပါး စကားပြောနေကြသည်။

[ခုနက အဖြူရောင် သမင်က အစစ်ကြီးလား... ထင်ယောင်ထင်မှား မြင်ကွင်းများ ဖြစ်နေမလား]

[လိုက်ဖ်လွှင့် ကင်မရာက ထင်ယောင်ထင်မှား မြင်ကွင်းကို ရိုက်လို့ရလို့လား]

[အစစ်ပဲ ဖြစ်ရမယ်... အဲဒီမှာက အဖြူရောင် သမင်တွေ ရှိနေပြီးသားပဲလေ... ထူးဆန်းတဲ့ ကိစ္စမှ မဟုတ်တာ]

[အဖြူရောင် သမင် မွေးမြူရေးခြံတွေ တောင် ရှိတယ်... ဒါပေမဲ့ ခုနက ကောင်လောက်တော့ မလှဘူးပေါ့]

[လောင်ရွှီ သွားတဲ့ နေရာတိုင်းက အရမ်း ထူးဆန်းတာပဲ... သူက နေရာရွေး တကယ် တတ်တာပဲ]

ရွှီယန်ကတော့ ဤအရာများကို သိပ်ဂရုမစိုက်ချေ။ သူက အရှေ့သို့သာ တောက်လျှောက် သွားနေခဲ့သည်။

လမ်းတွင် မြွေပါ တစ်ကောင်နှင့် ကတိုးကောင် နှစ်ကောင်ကို တွေ့လိုက်ရရာ အင်တာနက်သုံးစွဲသူများ အားလုံး အံ့ဩသွားကြတော့သည်။

နောက်ဆုံးတွင် ရွှီယန်က တာဝန် သတ်မှတ်ထားသော နေရာသို့ ရောက်ရှိသွားတော့သည်။

ဒရုန်း၏ ကင်မရာက အရှေ့သို့ လှည့်သွားပြီး အင်တာနက်သုံးစွဲသူများ လိုက်ဖ်လွှင့်မှု မြင်ကွင်းကို ရှင်းလင်းစွာ မြင်တွေ့လိုက်ရသောအခါ။

ဤအချိန်တွင် အားလုံးက တွေဝေသွားကြပြီး တချို့က မျက်လုံးများကိုပင် မနေနိုင်ဘဲ ပွတ်သပ်လိုက်ကြသေးသည်။

'လခွမ်း... အဲဒါ ဝင်ရိုးစွန်းဝက်ဝံ ကြီးလား’