အခန်း ၃၁၈

အခန်း (၃၁၈) တောင်ပေါ်က ရှုခင်း... အိမ်ပြောင်းနေတဲ့ ရှဉ့်လေး

ယခုအခါ လယ်ယာခြံဝင်းမှာ အတော်လေး စည်ကားနေပြီ ဖြစ်သည်။

ဝန်ထမ်းများနှင့် တိရစ္ဆာန်လေးများ အားလုံးက လယ်ယာခြံဝင်းထဲတွင် လှုပ်ရှားသွားလာနေကြသည်။

ကြည့်ရသည်မှာလည်း အသက်ဝင်လန်းဆန်းနေပေသည်။

ဖန်လုံအိမ်ထဲရှိ သစ်သီးများကလည်း ရင့်မှည့်ချိန်တန်လျှင် ရင့်မှည့်နေကြပြီ ဖြစ်သည်။ ဖန်လုံအိမ် တစ်ခုထဲတွင် သစ်သီးမျိုးစုံ စိုက်ပျိုးထားသဖြင့် ရာသီချိန်ရောက်တိုင်း စားစရာများ ရှိနေလေသည်။

ဟင်းသီးဟင်းရွက် စိုက်ခင်းထဲတွင်လည်း မျိုးစုံသော ဟင်းသီးဟင်းရွက်များ အပြည့်အမောက် ဖြစ်ထွန်းနေကြသည်။

စားလို့ပင် မကုန်နိုင်ချေ။

တစ်ခါတရံ ရွှီယန်၏ မိခင်က လယ်ယာခြံဝင်းသို့ လမ်းလျှောက်လာပြီး ပလတ်စတစ်အိတ် အနည်းငယ်ဖြင့် ငရုတ်သီး၊ သခွားသီး၊ ခရမ်းချဉ်သီး စသည်တို့ကို ခူးယူကာ သူမ၏ သူငယ်ချင်းများထံသို့ သွားရောက် ပေးကမ်းလေ့ ရှိသည်။

ယခုအခါ ဘဝအခြေအနေ ပိုမို ကောင်းမွန်လာသဖြင့် ရွှီယန်၏ မိခင်မှာ နေ့စဉ် စိတ်ပျော်ရွှင်နေပေသည်။

သို့သော် တစ်ခါတရံ ရွှီယန်ကို ချစ်သူရှာရန် အကြောင်းကိုတော့ ပြောလေ့ရှိသေးသည်။

ရွှီယန်က အမြဲတမ်း ပြုံး၍သာ ပြန်ဖြေတတ်သည်။

"ရှာရမယ့် အချိန်ရောက်ရင် ရှာမှာပေါ့... အခုတော့ မလောသေးပါဘူး"

တကယ်တမ်းတွင်လည်း ထိုသို့ပင် ဖြစ်၏။ ယခုအခါ သူ့တွင် ရတနာရှာဖွေရေး သံလိုက်အိမ်မြှောင် ရှိနေသဖြင့် နေရာအနှံ့အပြားသို့ သွားရောက်ကာ ရှုခင်းများကို ကြည့်ရှုပြီး ရတနာများကို ရှာဖွေရဦးမည် ဖြစ်သည်။

လွတ်လပ်သော ငှက်တစ်ကောင် ကဲ့သို့ပင်။

ချစ်သူထားမည် ဆိုပါက တစ်ဖက်လူ၏ ခံစားချက်ကို သေချာပေါက် ထည့်သွင်းစဉ်းစားရမည် ဖြစ်ရာ ချုပ်နှောင်မှုများ ရှိလာမည်သာ ဖြစ်၏။

ထို့ကြောင့် သူ့ဘာသာသူ နေရသည်က ပို၍ လွတ်လပ်ပေါ့ပါးလှပေသည်။

ဒီလို လွတ်လွတ်လပ်လပ် နောက်ထပ် နှစ်အနည်းငယ်လောက် နေပြီးမှ နူးညံ့သိမ်မွေ့တဲ့ ကောင်မလေး တစ်ယောက်ကို ရှာလိုက်ရင် ဘဝက ပိုပြီး ပျော်စရာ ကောင်းလာမှာပဲလေ။

စပါးခင်းငါး ၏ အရသာက သူ့ကို အမြဲတမ်း သတိရနေစေသည်။

ရွှီယန်က နောက်နှစ် စိုက်ပျိုးရေး အစီအစဉ်တွင် စပါးကို သေချာပေါက် ထည့်သွင်းကာ စပါးခင်းငါး အချို့ကို မွေးမြူရန် ဆုံးဖြတ်လိုက်သည်။

မွန်းလွဲပိုင်းတွင် ရွှီယန်က အားလပ်နေသဖြင့် ဆိုင်ကယ်ကို စီးကာ သူ ကန်ထရိုက် ယူထားသော တောင်ကတုံး ဆီသို့ သွားလိုက်သည်။

သူက ဤတောင်ကို အရပ်မျက်နှာကို အစွဲပြု၍ မြောက်တောင် ဟု နာမည်ပေးထားလိုက်သည်။

ပွင့်ပွင့်လင်းလင်း ပြောရလျှင် ဤနာမည်က အရှေ့မြောက်ဒေသတွင် အတော်လေး ကောင်းမွန်လှပေသည်။

တကယ်တမ်းတွင် အရှေ့မြောက်ဒေသ၌ အလွန် လှပသော တောင်တန်းများနှင့် ရေပြင်များ ရှိပြီး ရှုခင်းများကလည်း အလွန် လှပလှသော်လည်း နာမည်များကတော့ နားထောင်လို့ သိပ်မကောင်းလှချေ။

ဥပမာအားဖြင့် တောင်ကတုံးလေး တစ်ခုက သန့်ရှင်းကြည်လင်ပြီး ငှက်ကလေးများ တေးဆိုကာ ပန်းများ ပွင့်လန်းနေသလို စမ်းချောင်းလေးများလည်း စီးဆင်းနေသဖြင့် လည်ပတ်ရန် အလွန် ကောင်းမွန်သော်လည်း နာမည်ကတော့ ထိပ်ပြောင်ကြီး ဟု ခေါ်ဆိုကြသည်။

ထိုအရာနှင့် ဆက်စပ်ပြီး ထိပ်ပြောင်လေး နှင့် ထိပ်ပြောင်အို တို့လည်း ရှိသေးသည်။

ဤဒေသ၏ နာမည်ပေးပုံများက အတော်လေး ထူးဆန်းလှပေသည်။ ထိပ်ပြောင် ဟု မခေါ်လျှင် ချောက် ဟု ခေါ်ပြီး... မဟုတ်လျှင် တဲအုပ် သို့မဟုတ် ရွာ ဟု ခေါ်တတ်ကြသည်။

ဥပမာအားဖြင့် ဘောင်းဘီတိုချောက်ကြီး... ဘောင်းဘီတိုချောက်လေး... တင်ပါးချောက်... ဖားရွာ နှင့် လျိုမိသားစုတဲအုပ် စသည်တို့ ဖြစ်သည်။

နားထောင်လိုက်ရုံဖြင့် အတော်လေး ထူးဆန်းနေသည်ဟု ခံစားရစေသည်။

တကယ်တမ်းတွင် ဤဘက်ရှိ နာမည်ပေးပုံများက နောက်ခံ သမိုင်းကြောင်း အချို့ ရှိကြသည်။

အရင်ခေတ်က နိုင်ငံတော် အခြေအနေ ဆင်းရဲမွဲတေနေချိန်တွင် ဤဘက်သို့ ပထမဆုံး လာရောက်သူများက မြောက်ပိုင်းမြေရိုင်းများကို ရှင်းလင်းပြီး နေရာတစ်ခုတွင် သီးနှံများ စိုက်ပျိုးအောင်မြင်ပါက ရွာငယ်လေး တစ်ရွာ ဖြစ်လာလေ့ ရှိသည်။

ထိုအခါ ပတ်ဝန်းကျင် အခြေအနေကို ကြည့်ကာ သာမန် နာမည်တစ်ခုကို အလွယ်တကူ ပေးလိုက်ကြခြင်း ဖြစ်သည်။

ဥပမာ သစ်ပင် သုံးပင် ရှိလျှင် သစ်သုံးပင်ရွာ... လျို မျိုးရိုး နာမည်ရှိသူများ များပြားပါက လျိုမိသားစုတဲအုပ် စသည်ဖြင့် ခေါ်ဆိုကြခြင်း ဖြစ်သည်။

ခန့်ညားသော နာမည်များလည်း ရှိပေသည်။ ဥပမာ တာ့ချင့် ရေနံမြေ တွေ့ရှိသော နေရာကို တာ့ချင့် (အောင်ပွဲကြီး) ဟု ခေါ်ဆိုသကဲ့သို့ ဖြစ်၏။

နာမည်တစ်ခုစီတိုင်းက သမိုင်း အမှတ်အသား တစ်ခုပင် ဖြစ်ပေသည်။

ရွှီယန်က မြောက်တောင် ပေါ်တွင် ရပ်ကာ စိုက်ပျိုးပြီးသော ထင်းရှူးနီ တောအုပ်လေးကို ကြည့်နေလိုက်သည်။

ထင်းရှူးပင် စုစုပေါင်း သုံးရာ့နှစ်ဆယ် ရှိသည်။

သစ်တော တစ်ခုအနေဖြင့် ဆိုလျှင်တော့ အများကြီး မဟုတ်လှချေ။

သို့သော် ကြည့်လိုက်လျှင်တော့ စိမ်းလန်းစိုပြည် နေပေသည်။

ယခုအချိန်တွင် ထင်းရှူးသီးများ သိပ်မသီးသေးသော်လည်း နောက်နှစ်တွင်တော့ အချို့အဝက် သီးလာနိုင်ပေသည်။ ထိုအချိန်ရောက်ပါက ထင်းရှူးသီးများ ခူးဆွတ်ကာ ကားဖြင့် သယ်ယူ ရောင်းချပြီး ငွေအချို့ ရှာဖွေနိုင်ပေမည်။

သေချာသည်မှာ ဤကဲ့သို့သော လုပ်ငန်းပုံစံက တည်ငြိမ်မှု ရှိသော်လည်း အရင်းကြေရန် အချိန်ကတော့ အလွန် နှေးကွေးလှပေသည်။

ဖြည်းဖြည်းချင်းသာ လုပ်ဆောင်ရမည် ဖြစ်၏။

ထိုအချိန်တွင် ရွှီယန်က အဝေးသို့ လှမ်းကြည့်လိုက်ရာ ချုံပုတ်ထဲတွင် ဟိုခုန်ဒီခုန် လုပ်နေသော ရှဉ့်ငယ်လေး တစ်ကောင်ကို တွေ့လိုက်ရသည်။

၎င်း၏ ပါးစပ်ထဲတွင် တစ်ခုခုကို ကိုက်ထားသဖြင့် ဖောင်းကားနေပေသည်။

ရွှီယန်က အတော်လေး စိတ်ဝင်စားသွားပြီး ဖုန်းကို ချက်ချင်း ထုတ်ယူကာ ရှဉ့်လေး၏ လှုပ်ရှားမှုများကို ဗီဒီယို ရိုက်ကူးထားလိုက်သည်။

သူက အသံပါ ထည့်သွင်း ပြောဆိုလိုက်သည်။

"ကျွန်တော် ကန်ထရိုက် ယူထားတဲ့ တောင်ပေါ်မှာ တိတ်တိတ်လေး လှုပ်ရှားနေတဲ့ ရှဉ့်လေး တစ်ကောင်ကို တွေ့လိုက်ရတယ်... ကျွန်တော် ထင်တာတော့ သူ အိမ်ပြောင်းနေတာ ဖြစ်မယ်"

"ဒီကောင်လေးက နေရာရွေး တတ်တာပဲ... ကျွန်တော် ထင်းရှူးနီ တောအုပ်လေး စိုက်ပြီးခါစပဲ ရှိသေးတယ်... သူ ချက်ချင်း ရောက်လာပြီ"

"တော်တော်လေး ဉာဏ်ကောင်းတာပဲ"

ရွှီယန်၏ အသံထဲတွင် ပျော်ရွှင်မှုများ ပါဝင်နေပေသည်။

သူက ဤတိရစ္ဆာန်လေးများကို အတော်လေး သဘောကျသူ ဖြစ်သည်။

ရှဉ့်ငယ်လေးက ရှေ့သို့ ဆက်တိုက် သွားနေပြီး ပုန်းအောင်းကာ ပတ်ဝန်းကျင်ကို သတိကြီးစွာဖြင့် ကြည့်ရှုနေလေသည်။ အန္တရာယ် တစ်ခုခု ရှိမည်ကို စိုးရိမ်နေသည့် အလားပင်။

ထို့နောက် ၎င်းက ထင်းရှူးနီ တစ်ပင်ကို သေချာ ရွေးချယ်ကာ အပေါ်သို့ အလျင်အမြန် တက်သွားတော့သည်။

သေချာ ကြည့်လိုက်သောအခါ ထင်းရှူးနီပင် ပေါ်တွင် သဘာဝ သစ်ခေါင်း တစ်ခု ရှိနေပြီး အထဲတွင် နေရာလွတ် အချို့ ရှိနေပုံ ရသည်။

ရှဉ့်ငယ်လေးက သစ်ခေါင်းထဲသို့ ဝင်သွားပြီး ပါးစပ်ထဲရှိ အစာများကို ချထားလိုက်သည်။ ထို့နောက် သစ်ခေါင်းထဲမှ ပြန်ထွက်လာကာ အဝေးရှိ သစ်တောထဲသို့ တောက်လျှောက် ပြေးထွက်သွားပြန်သည်။

"ဒီကောင်လေးက တော်တော် ပါးနပ်တာပဲ... အကယ်လို့ ထင်းရှူးနီ တောအုပ်ထဲမှာ အိမ်ဖွဲ့လိုက်မယ် ဆိုရင်တော့ တစ်သက်လုံး စားစရာ သောက်စရာ ပူစရာ မလိုတော့ဘူးပေါ့... အရမ်းကို ဇိမ်ကျသွားမှာပဲ"

"ဒါကြောင့်မလို့ ဒီလို စွန့်စားရတာက တန်ပါတယ်"

ရွှီယန်က ဝေးကွာသွားသော ရှဉ့်လေးကို ဗီဒီယို ရိုက်ကူးနေလိုက်သည်။

ထို့နောက် သူက ဗီဒီယိုကို အင်တာနက်ပေါ်သို့ တင်လိုက်သည်။

မကြာခင်မှာပင် ပရိသတ်များက ဤဗီဒီယိုကို မြင်တွေ့သွားကြသည်။

အားလုံးက လိုက်ခ်ပေးကာ မှတ်ချက်များ ရေးသားကြတော့သည်။

"လောင်ရွှီ... မြန်မြန်သွား... သူဝှက်ထားတဲ့ အစာတွေကို အကုန် ခိုးယူလိုက်... ဒီလောကကြီးရဲ့ အန္တရာယ်တွေကို သူ သိသွားအောင်လို့"

"ရှဉ့်လေးက အရမ်း ချစ်စရာ ကောင်းတာပဲ... လိုက်ဖ်လွှင့်သူရေ... သူ့အပေါက်ထဲကို အခွံမာသီးလေးတွေ နည်းနည်းလောက် ထည့်ပေးလိုက်ပါလား"

မှတ်ချက်များက လူသားများ၏ မျက်နှာစာ နှစ်ဖက်ကို ပြသနေပေသည်။

တချို့က နောက်ပြောင်ရသည်ကို နှစ်သက်ပြီး တချို့ကမူ နွေးထွေးသော မြင်ကွင်းများကို သဘောကျကြသည်။

ရွှီယန် ကတော့ သဘာဝအတိုင်းသာ လွှတ်ထားပြီး အများကြီး ဝင်ရောက် စွက်ဖက်ခြင်း မပြုလုပ်ချေ။

သစ်တောလေး စိုက်ပျိုးလိုက်ပြီးနောက် ဤတောင်ကတုံးလေး၏ အသွင်အပြင်က တကယ်ကို ပြောင်းလဲသွားခဲ့ပြီ ဖြစ်သည်။

သက်ဝင်လှုပ်ရှားမှုများဖြင့် ပြည့်နှက်နေပေသည်။

သစ်တော ဧရိယာ၏ အလယ်တွင် မြေလမ်းလေး တစ်လမ်းကို သီးသန့် ချန်ထားခဲ့ပြီး ကားကြီးများလည်း ဝင်ရောက်နိုင်ပေသည်။

နောက်ပိုင်း ကုန်ပစ္စည်းများ သယ်ယူရာတွင်ဖြစ်စေ... သစ်ပင်ပေါက်လေးများ သယ်ယူရာတွင်ဖြစ်စေ ဤလမ်းက အလွန် အဆင်ပြေပေလိမ့်မည်။

ရွှီယန်က ဆိုင်ကယ်ကို စီးကာ လမ်းအတိုင်း တောက်လျှောက် ဝင်ရောက်သွားခဲ့သည်။

မကြာခင်မှာပင် မြေရိုင်း ဧရိယာသို့ ထပ်မံ ရောက်ရှိသွားတော့သည်။

ပတ်ဝန်းကျင်က ပြောင်ရှင်းနေပြီး တောရိုင်းမြက် အချို့သာ ပေါက်ရောက်နေပေသည်။

ဒီလောက် ကောင်းတဲ့ မြေနေရာတွေ အလကား ဖြစ်နေတာ နှမြောစရာပဲ။

ရွှီယန်က တစ်ပတ်ခန့် လှည့်ပတ် ကြည့်ရှုလိုက်သည်။

နောက်ပိုင်းတွင် တခြား သစ်ပင်များ ထပ်မံ စိုက်ပျိုးရမည်ဟု တွေးလိုက်မိသည်။

ဤနေရာကို သစ်တောအဖြစ် ပြောင်းလဲလိုက်ပါက နောက်ပိုင်း ကျားသစ် မွေးမည်ဖြစ်စေ... ဝက်ဝံမည်း မွေးမည်ဖြစ်စေ အလွန် လွယ်ကူသွားမည်သာ ဖြစ်၏။

ခဏမျှ လှည့်ပတ် ကြည့်ရှုပြီးနောက် လုပ်စရာ မရှိတော့သဖြင့် ရွှီယန်က ဆိုင်ကယ်ကို စီးကာ ပြန်လာခဲ့တော့သည်။

ပွင့်ပွင့်လင်းလင်း ပြောရလျှင် ယခုအခါ ဆိုင်ကယ်ကို အသုံးနည်းသွားပြီး လုံးဝနီးပါး မစီးဖြစ်တော့ချေ။

ကားရှိလာပြီးနောက် သူက ဆိုင်ကယ် သိပ်မစီးတော့ဘဲ ဘယ်သွားသွား ကားဖြင့်သာ သွားရသည်က ပို၍ အဆင်ပြေသောကြောင့် ဖြစ်သည်။

ထို့အပြင် ဆိုင်ကယ်စီးရသည်မှာလည်း အန္တရာယ် များသည်ဟု ခံစားရပြီး အထူးသဖြင့် တောင်တက်လမ်းများတွင် ပို၍ ဆိုးရွားလှပေသည်။

ထို့ကြောင့် သူက ရောင်းပစ်ရန် စဉ်းစားနေသည်။

နောက်ပိုင်း တောင်ထဲ ဝင်မည်ဆိုလျှင် ကားစီး၍ မရသော်လည်း ရွှီယန်တွင် တခြား စီးစရာ တစ်ခု ရှိနေသေးသည်။ ၎င်းမှာ အမည်းရောင် မြင်းကြီး ကျင်းကျယ် ပင် ဖြစ်၏။

အမည်းရောင် မြင်းကြီးကို စီးကာ တောင်ပေါ် တက်၍လည်း ရနိုင်ပေသည်။

ရွှီယန်က အားလပ်နေသဖြင့် ဟင်းသီးဟင်းရွက် စိုက်ခင်းထဲသို့ တစ်ခေါက် သွားကြည့်လိုက်သည်။

စိုက်ခင်းထဲရှိ သခွားသီးများက ရင့်မှည့်နေပြီ ဖြစ်သည်။

နျိုကျွမ်း က ညစာအတွက် ငရုတ်သီးနှင့် အသားကြော်ရန် ငရုတ်သီးများ ခူးနေလေသည်။

ရွှီယန်က အထဲသို့ ဝင်သွားပြီး သခွားသီး အကြီးကြီး တစ်လုံးကို ခူးလိုက်သည်။

သူ စိုက်ပျိုးထားသော သခွားသီး အကြီးများမှာ အမြီးပိုင်းတွင် ပန်းပွင့်များ မပါရှိဘဲ သဘာဝအတိုင်း ကြီးထွားလာခြင်း ဖြစ်ပြီး ဟော်မုန်းများနှင့် ဓာတ်မြေဩဇာများ လုံးဝ အသုံးမပြုထားချေ။

ဤကဲ့သို့သော သခွားသီးများက ကြီးထွားချိန် ပိုကြာသဖြင့် အရသာက ပို၍ ကောင်းမွန်လှပေသည်။

ဈေးကွက်ထဲရှိ သခွားသီး အများစုမှာ ကြီးထွားချိန် တိုတောင်းသဖြင့် အရသာမှာလည်း သိပ်မကောင်းလှချေ။

ရွှီယန်က ဘေးသို့ သွားကာ သခွားသီးကို အကြမ်းဖျင်း ဆေးကြောလိုက်ပြီး ချက်ချင်း ကိုက်စားလိုက်သည်။

တစ်ကိုက် ကိုက်လိုက်သည်နှင့် ကြွပ်ရွသွားပြီး အရသာကလည်း ချိုမြိန် လန်းဆန်းလှပေသည်။

သူက ဤသို့ သခွားသီး စိမ်းစားရသည်ကို နှစ်သက်ပြီး သခွားသီး သုပ်စားရသည်ကိုလည်း နှစ်သက်သည်။ အကယ်၍ ဟင်းတစ်ခွက်ထဲတွင် သခွားသီး ထည့်ကြော်ထားပါက သူ သိပ်မစားချင်တော့ချေ။

"နျိုကျွမ်း... ညကျရင် သခွားသီး တစ်ပွဲလောက် သုပ်ပေးပါလား"

ရွှီယန်က တစ်ကိုက် ကိုက်စားလိုက်ပြီး အရသာ ကောင်းမွန်သဖြင့် လှမ်းပြောလိုက်သည်။

"ဟုတ်ကဲ့ သူဌေး... ပြဿနာ မရှိပါဘူး"

နျိုကျွမ်း က အလျင်အမြန် ပြန်ဖြေလိုက်သည်။

ရွှီယန်က သိပ်မဝသေးသဖြင့် ထပ်မေးလိုက်သည်။

"မင်း သခွားသီး ချဉ်ဖတ် တည်တတ်လား... ဟင်းရည်အိုး နည်းနည်းလောက် ရှာပြီး သခွားသီးကို ချဉ်ဖတ် တည်ပေးပါလား"

"ငါတို့ဆီက သခွားသီးက ကြီးတော့ ခွဲပြီးမှ တည်ရမယ်... သခွားသီး အသေးလေးတွေ ရှိရင် ပိုကောင်းတာပေါ့... တည်လိုက်ရင် ပိုစားကောင်းတယ်"

ရွှီယန်၏ စကားကို ကြားသောအခါ နျိုကျွမ်း က ချက်ချင်း လက်ခံလိုက်သည်။

"သူဌေး... ပြဿနာ မရှိပါဘူး... ခင်ဗျား ခိုင်းတာကို ကျွန်တော့်ကိုသာ လွှဲထားလိုက်ပါ"

"သခွားသီး အသေးလေးတွေ စိုက်ထားတဲ့ နေရာကို ကျွန်တော် သိတယ်... အချိန်ရရင် သွားရှာလိုက်မယ်"

သူဌေးက ခိုင်းလာပါက ဝန်ထမ်း အနေဖြင့် သေချာပေါက် လုပ်ဆောင်ပေးရမည်သာ ဖြစ်၏။

ဤသည်ကလည်း မရှိမဖြစ် လိုအပ်သော စွမ်းရည် တစ်ခုပင် ဖြစ်သည်။

"အေး... အချိန်ရရင် တည်ထားလိုက်"

ရွှီယန်က သခွားသီးကို စားရင်း ခေါင်းညိတ်ပြလိုက်ပြီးနောက် ခြံဝင်းထဲသို့ ပြန်ဝင်လာခဲ့သည်။

သခွားသီး၏ အရသာက တကယ်ကို ကောင်းမွန်လှသည်။ စားပြီးနောက် လူကိုပင် အတော်လေး လန်းဆန်းသွားစေသည်။

ထို့အပြင် ညစာ စားချိန်လည်း နီးလာပြီဖြစ်ရာ ဤသို့ သခွားသီး စားလိုက်သဖြင့် အနည်းငယ်ပင် ဗိုက်ဆာလာတော့သည်။

ရွှီယန်က ခြံဝင်းထဲတွင် ညစာစားရန် စောင့်နေရင်း ရပ်ကွန်းလေး နှင့် ကြောင်လေး ခွေးလေးများကို ကျီစယ်နေလိုက်သည်။

ရွှီယန်၏ ဤရပ်ကွန်းလေးက အတော်လေး လှပပြီး သန့်ရှင်းသပ်ရပ်ကာ မျက်လုံးများကလည်း အတော်လေး ဖြူစင်လှပေသည်။

အခြား ရပ်ကွန်းလေးများ ကဲ့သို့ 'ခိုးကြောင်ခိုးဝှက်' ပုံစံမျိုး လုံးဝ မရှိချေ။

ထို့အပြင် ၎င်း၏ ခန္ဓာကိုယ် အချိုးအစားကိုလည်း ကောင်းစွာ ထိန်းသိမ်းထားနိုင်ပြီး ဝဝဖိုင့်ဖိုင့်ကြီး မဟုတ်ဘဲ အတော်လေး သွက်လက်နေပေသည်။

တစ်ခါတရံ ၎င်းကို ကျီစယ်ရသည်ကလည်း စိတ်အပန်းပြေစေသည်။

မိန်းကြောင်လေး ကတော့ ပို၍ ကြီးလာပြီ ဖြစ်ပြီး အရွယ်အစားက လီဟွာကြောင်လေး ဆန်းပြောင် ထက်ပင် ကြီးမားနေပြီ ဖြစ်သည်။

သို့သော် မကြာသေးမီက ဆန်းပြောင် က မိန်းကြောင်လေးကို ခြံဝင်းထဲတွင် မကြာခဏ လာကြည့်တတ်သော်လည်း အချစ်ရေး အတွက်တော့ မဟုတ်ချေ။ မည်သို့ပင်ဆိုစေ မိန်းကြောင်လေး ကလည်း အထီးဖြစ်ပြီး သင်းကွပ်ထားပြီးသား ဖြစ်သည်။

အဓိကအားဖြင့် ဆန်းပြောင် က မိန်းကြောင်လေး ကို ကြည့်ရသည်မှာ အရွယ်အစား ကြီးမားသော်လည်း သတ္တိနည်းသဖြင့် ၎င်း၏ အနားတွင် မိမိ၏ အဆင့်အတန်းကို ပြသရသည်ကို နှစ်သက်နေခြင်း ဖြစ်သည်။

မိန်းကြောင်လေး ကလည်း ၎င်းကို အစ်ကိုကြီး အဖြစ် သတ်မှတ်ရန် ဝန်လေးခြင်း မရှိချေ။

ဤတိရစ္ဆာန်များက အတူတကွ နေထိုင်လာသည်မှာ ကြာပြီဖြစ်ရာ ၎င်းတို့၏ ကိုယ်ပိုင် အကြိုက်များ အသီးသီး ရှိလာကြသည်။

ဥပမာအားဖြင့် ဟက်စကီ နှင့် တုံးအအ ဒရယ်ပြောက် တို့က သူငယ်ချင်းများ ဖြစ်ကြသော်လည်း လီဟွာကြောင်လေး ကတော့ ဟက်စကီ ကို အလွန် မုန်းတီးပြီး ဟက်စကီ ကလည်း လီဟွာကြောင်လေး ကို မုန်းတီးပေသည်။

ဝံပုလွေပေါက်လေး ကတော့ ရှောင်ဟေး နှင့် အတူ ကစားရသည်ကို နှစ်သက်ပြီး ယွမ်ပေါင် ကတော့ သူ့ဘာသာသူ တိတ်တဆိတ် လျှောက်သွားရသည်ကို နှစ်သက်သည်။ ရှောင်ဟေး ကတော့ ဘယ်သူ့ကို မြင်မြင် အပြေးသွား နှုတ်ဆက်တတ်လေသည်။

အားလုံးက ကိုယ်ပိုင် ဘဝလေးများ ရှိနေကြသည်။

သို့သော် အားလုံး သိထားသည့် အချက်တစ်ခု ရှိသည်။ ထိုအရာမှာ ရွှီယန်က လယ်ယာခြံဝင်း၏ အကြီးအကဲ ဖြစ်ပြီး သူတို့အားလုံး ရွှီယန်နှင့် ရင်းနှီးကြခြင်းပင် ဖြစ်သည်။

မည်သို့ပင်ဆိုစေ မည်သူကမျှ လယ်ယာခြံဝင်း၏ အဖွဲ့ဝင် အဖြစ်မှ အထုတ်ခံရမည်ကို မလိုလားကြချေ။

တိရစ္ဆာန်လေးများနှင့် ခဏမျှ ဆော့ကစားပြီးနောက် ညစာစားချိန် ရောက်လာသဖြင့် ရွှီယန်လည်း ထမင်းစားခန်း သို့ သွားရောက် စားသောက်လိုက်သည်။

ညဘက်တွင် ဂိမ်းခဏ ကစားပြီးနောက် အိပ်ရာဝင်တော့သည်။

တစ်နေ့တာက ဤသို့ဖြင့် ကုန်ဆုံးသွားခဲ့ပြန်သည်။

နေ့ရက်တွေ ကုန်သွားတာ တကယ် မြန်တာပဲ။