အခန်း ၉၃

အခန်း(၉၃) ကျောချင်းယွင်၏ စိန်ခေါ်မှု

ဘာချစ်သူ လဲ။

ရှောင်ပီလီက ခေါင်းခါယမ်းလိုက်ပြီး "သူက ရိုးရိုးသာမန် သူငယ်ချင်းပါ" ဟု ပြောလိုက်သည်။

"စန်းယွမ်ဓားဂိုဏ်းက သူတို့ကိုယ်သူတို့ ဖြောင့်မတ်တယ်လို့ ကြွေးကြော်နေပြီးတော့မှ အခုလို လူတွေနဲ့ ခြိမ်းခြောက်နေတာပဲ။ သူတို့ဂိုဏ်းရဲ့ ဂုဏ်သိက္ခာကို မငဲ့ကွက်ကြဘူးလား"

သာမန်အားဖြင့်ဆိုပါက နူထုန်တောင်ကြားတွင် ရရှိနိုင်သည့် ကျင့်ကြံမှုအမှတ်များနှင့် ခုနစ်သတ်ဓားသိုင်းသာ မရှိခဲ့လျှင် သူ ထိုနေရာသို့ သွားရောက်လိမ့်မည် မဟုတ်ပေ။

နင်ဝမ်ချင်းမှာ လူဆိုးတစ်ယောက် မဟုတ်ပေ။ အနည်းဆုံးတော့ ရွှယ်ကျိုးနဲ့ ရင်ဆိုင်ရချိန်တွင် သူမက သူ့ကို စွန့်ပစ်ပြီး ထွက်မပြေးခဲ့ပေ။ ဖုံးကွယ်ရနံ့ဆေးလုံးကိုပင် သူ့အား ပေးခဲ့သေးသည်။

သို့သော် ရှောင်ပီလီ၏ အမြင်တွင်မူ သူမက ရိုးရိုးသာမန် သူငယ်ချင်းတစ်ယောက်သာ ဖြစ်ပြီး နင်ဝမ်ချင်းကို အမျိုးသမီးဝတ်စုံဖြင့်ပင် မမြင်ဖူးသေးသဖြင့် ချစ်သူ ဟူ၍ ပြောစရာ အကြောင်းမရှိပေ။

ဝူရှန်သူရဲကောင်း သုံးယောက်မှာမူ အသိမိတ်ဆွေများမျှသာ ဖြစ်ပြီး ဝေ့ရှင်းပို့ဆောင်ရေးဌာနမှ လျှိုတာလီနှင့်သာ အနည်းငယ် အဆက်အသွယ် ရှိခဲ့သည်။

"ဂုဏ်သိက္ခာဆိုတာ ဘာများလဲ" ဖုန်းစစ်နန်းက မထီမဲ့မြင် ပြုံးရယ်ကာ ပြောလိုက်သည်။

"သိုင်းလောကမှာ ရန်ငြိုးတွေကြောင့် လူတွေက နေ့တိုင်း သေဆုံးနေတာပဲ"

"စန်းယွမ်ဓားဂိုဏ်းရဲ့ စွမ်းအားက ထင်ရှားတယ်။ သူတို့သာ အဲ့ဒီလူတွေကို သတ်ပစ်လိုက်ရင်တောင် လအနည်းငယ် ကြာတဲ့အခါ သိုင်းလောကမှာ ဘယ်သူမှ စကားပြောနေတော့မှာ မဟုတ်ဘူး"

"စန်းယွမ်ဓားဂိုဏ်းက လာတဲ့လူက တုန်းဖန့်ယန် ဖြစ်ပေမယ့် စိတ်ပူစရာ မလိုပါဘူး။ တုန်းဖန့်ယန် တစ်ယောက်တည်းနဲ့ ယန်နယ်မြေမှာရှိတဲ့ ငါ့ရဲ့ သွေးဝတ်ရုံခန်းမဆောင်ကို ဘာမှ လုပ်နိုင်မှာ မဟုတ်ဘူး"

"အခုတော့ စန်းယွမ်ဓားဂိုဏ်းက လူတွေက ကျောချင်းယွင်က ရှင့်ကို စိန်ခေါ်ချင်နေတယ်ဆိုတဲ့ သတင်းကို ဖြန့်ထားတယ်"

"ကျောချင်းယွင်က မကြာသေးခင်ကမှ မဟာဆရာသခင်များ စာရင်းဝင် 'မြ‌ကျောက်ဓား' စုန့်ကျားနဲ့ လက်ရည်စမ်းခဲ့တယ်ဆိုတဲ့ သတင်းကို ရထားတယ်။ သူတို့ရဲ့ သိုင်းပညာက အချင်းချင်း မျှတနေလောက်တယ်"

"ကျောချင်းယွင်က အဆင့်(၄)နယ်ပယ်ကို ဝင်ရောက်ပြီးနောက်မှာ မူလဝိညာဉ်ဆေးလုံး တစ်လုံး၊ နှစ်လုံးလောက် သောက်ထားလောက်မှာပဲ"

ပြောရင်းနှင့် ဖုန်းစစ်နန်းက သူမ၏ အင်္ကျီလက်စမှ သိမ်မွေ့သော ကြွေပုလင်းငယ်တစ်လုံးကို ထုတ်ယူကာ ရှောင်ပီလီထံ ကမ်းပေးလိုက်ပြီး ပြောသည်။

"ဒီမူလဝိညာဉ်ဆေးလုံးကို ကျွန်မ အဖေက ကျွန်မအတွက် ကြိုတင်ပြင်ဆင်ပေးထားတာ။ ဒါပေမဲ့ ဒီနှစ်တွေမှာ ယန်နယ်မြေက ကိစ္စတွေကို ဖြေရှင်းနေရလို့ ကျွန်မရဲ့ ကျင့်ကြံမှု တိုးတက်နှုန်းက နှောင့်နှေးနေရတယ်။ အဆင့်(၄)နယ်ပယ်ကို ရောက်ဖို့ အနည်းဆုံး တစ်နှစ်၊ နှစ်နှစ်လောက် ထပ်လိုဦးမယ်"

"ဒီမူလဝိညာဉ်ဆေးလုံးကို အရင်ယူထားလိုက်။ ရှင့်ရဲ့ စွမ်းအားကို နည်းနည်း တိုးမြှင့်လိုက်ရင် ကျောချင်းယွင်ရဲ့ စိန်ခေါ်မှုကို ပိုကောင်းကောင်း ရင်ဆိုင်နိုင်လိမ့်မယ်"

"ဒါမှမဟုတ် ရှင်က မူလဝိညာဉ်ဆေးလုံးရဲ့ စွမ်းအားကို အသုံးပြုပြီး အဆင့်(၃) မဟာဆရာသခင်ကြီး နယ်မြေကို အဆင့်တက်ဖို့ ကြိုးစားကြည့်လို့ ရတယ်"

မူလဝိညာဉ်ဆေးလုံးမှာ အလွန်တန်ဖိုးရှိသည်။ သွေးဝတ်ရုံခန်းမဆောင်တွင် ၎င်းကို လဲလှယ်ရန် သတ်မှတ်ထားသော တန်ဖိုးမှာ သေရှင်နယ်နိမိတ်ကို ကျော်ဖြတ်နိုင်သည့် အတွင်းအား ကျင့်စဉ်ကို လဲလှယ်သည်ထက် ဆယ်ဆမျှ ပို၍ ဈေးကြီးသည်။

ထို့အပြင် သွေးဝတ်ရုံခန်းမဆောင်တွင် အ့တာက အမြဲတမ်း လက်ကျန်မရှိပေ။

အကြောင်းမူကား မူလဝိညာဉ်ဆေးလုံးများကို ဖော်စပ်ရန် ဆေးဖက်ဝင် ပစ္စည်းများအားလုံးမှာ အလွန်အဖိုးတန်သောကြောင့် ဖြစ်သည်။ ကိုးဂိုဏ်းနှင့် ခြောက်ဂိုဏ်းစုကဲ့သို့ အင်အားစုများပင်လျှင် နှစ်နှစ်ဆယ် သို့မဟုတ် သုံးဆယ်ကြာမှသာ ဆေးဖိုတစ်ခါ ဖွင့်လေ့ရှိကြသည်။

ဆေးဖိုတစ်ခါ ဖွင့်လျှင် ဆေးလုံး တစ်ဒါဇင်ခန့်သာ ရရှိသည်။

"မလိုပါဘူး" ရှောင်ပီလီက ခေါင်းခါကာ ငြင်းပယ်လိုက်သည်။

"အဲ့ဒါက ကျောချင်းယွင် ဆိုတဲ့ကောင်ပဲလေ"

"ကျောချင်းယွင်က ယန်နယ်မြေကို ရောက်နေမှတော့ သူ့ကို တိုက်ရိုက် သတ်ပစ်လိုက်ရင် မကောင်းဘူးလား"

"ဘယ်လိုပဲဖြစ်ဖြစ် စန်းယွမ်ဓားဂိုဏ်းက အိမ်ရှေ့မင်းသားဘက်မှာ ရှိနေတာ မဟုတ်ဘူးလား"

ဖုန်းစစ်နန်းက တုန်းဖန့်ယန်သည် ယန်နယ်မြေရှိ သွေးဝတ်ရုံခန်းမဆောင်ကို ဘာမှလုပ်နိုင်မည် မဟုတ်ဟု ပြောခဲ့ရာ ယန်နယ်မြေတွင် သွေးဝတ်ရုံခန်းမဆောင်က အဆင့်(၃) အထွတ်အထိပ် ကျွမ်းကျင်သူ အနည်းဆုံး တစ်ယောက် ရှိနေကြောင်း သက်သေပြနေသည်။

သူသည်လည်း အဆင့်(၃) နှောင်းပိုင်းအဆင့်သို့ ရောက်ရှိနေပြီ ဖြစ်ရာ တုန်းဖန့်ယန် ဖြစ်နေပါစေ သူ့ကို သတ်နိုင်လိမ့်မည်ဟု ယုံကြည်မှု ရှိသည်။

တုန်းဖန့်ယန်ကို သတ်လိုက်လျှင် စန်းယွမ်ဓားဂိုဏ်းက အရူးအမူး ဖြစ်သွားပြီး အကျိုးအကြောင်းမဲ့ ပြုမူလာကာ အဆင့်(၂) ကောင်းကင်-လူသားနယ်ပယ် ကျွမ်းကျင်သူ သို့မဟုတ် အဆင့်(၁) နယ်မြေကို ကပ်သီနေသည့် ဒဏ္ဍာရီလာ စန်းယွမ်ဓားဂိုဏ်း ဂိုဏ်းအကြီးအကဲသခင်ကြီး ကိုယ်တိုင် လှုပ်ရှားလာပါက ဒုက္ခရောက်နိုင်ပြီး သွေးဝတ်ရုံခန်းမဆောင်က ကူညီရန် လိုအပ်နေဦးမည် ဖြစ်သည်။

ဤစကြာဝဠာတွင် ထျန်းကျီချိုင့်ဝှမ်းနှင့် နန်းတော်တွင်း နက္ခတ်ဗေဒင်ဌာန ရှိနေသည်။ သူတို့က သူ့၏ တိကျသော တည်နေရာကို ရှာမတွေ့နိုင်သော်လည်း ယေဘုယျ ဦးတည်ချက်ကို သိရှိပါက ထိုသို့သော အစွမ်းထက်သည့် ကျွမ်းကျင်သူများက တစ်စုံတစ်ယောက်ကို ရှာဖွေရန် လွယ်ကူလှသည်။

ဖုန်းစစ်နန်းက စဉ်းစားဟန်ဖြင့် ခေါင်းငုံ့ထားသည်။ ခဏအကြာတွင် သူမက ပြောလိုက်သည်။

"ဒီကိစ္စကို ယန်နယ်မြေမှာရှိတဲ့ အကြီးအကဲသခင်ကြီးနဲ့ ဆွေးနွေးမှ ဖြစ်မယ်"

"ရှင် မန်ယွဲ့မြို့ထဲမှာ လှည့်လည်ချင်ရင်တော့ အသွင်ပြောင်းထားတာ အကောင်းဆုံးပဲ။ ယန်နယ်မြေက သိုင်းလောကသားတွေအပြင် တခြားနယ်မြေတွေက ကျွမ်းကျင်သူတွေလည်း အများကြီး ရောက်နေကြပြီ။ သူတို့က ကျောချင်းယွင်နဲ့ ရှင့်ရဲ့ တိုက်ပွဲကို ကြည့်ချင်နေကြတာ ဖြစ်မယ်"

"အခုတော့ အိမ်ရှေ့မင်းသားလက်အောက်က အင်အားစုတွေက ပွင့်ပွင့်လင်းလင်းပဲ ဝင်ရောက်စွက်ဖက်နေပြီ။ အိမ်ရှေ့မင်းသားသာ ဂုဏ်သိက္ခာ အပြည့်အဝ ကျဆင်းသွားရင် နန်းတော်က ဝင်ရောက်စွက်ဖက်ရတော့မယ်"

"သိုင်းလောကမှာ အများစုက နန်းတော်ရဲ့ ခွေးအဖြစ် အလိုလို အလုပ်လုပ်ပေးတဲ့သူတွေကို အထင်သေးကြပေမဲ့ အဆင့်(၄) သိုင်းဆရာကြီး တစ်ယောက်တောင်မှ အစွမ်းထက်တဲ့ မြှားပစ်စက်အစုလိုက် အပြုံလိုက် ပစ်ခတ်မှုကို ရှောင်တိမ်းနိုင်မှာ မဟုတ်ဘူး။ ငါ့ရဲ့ သွေးဝတ်ရုံခန်းမဆောင်လို အစွမ်းထက်တဲ့ အဖွဲ့အစည်းတောင်မှ နန်းတော်ရဲ့ စစ်တပ် ဝိုင်းရံတိုက်ခိုက်မှုကို ရင်ဆိုင်ရတဲ့အခါ ဆုံးရှုံးမှုတွေ အများကြီး ရှိခဲ့တယ်"

"နန်းတော်က အခု သိုင်းလောကရဲ့ အင်အားစုတွေကို အားနည်းသွားအောင်ပဲ လုပ်ချင်နေတာဆိုတော့ ငါတို့ သတိထားဖို့ လိုတယ်"

ရှောင်ပီလီက ခေါင်းညိတ်လိုက်သည်။

လွန်ခဲ့သည့် လအနည်းငယ်အတွင်း သူ နားလည်လာသည်မှာ ဤစကြာဝဠာတွင် မဟာချန်မင်းဆက်မှာ အကြီးဆုံးဂိုဏ်း ဖြစ်နေခြင်းပင်။ ၎င်းက ပင်လယ်လေးစင်းကို အုပ်စိုးထားပြီး မရေမတွက်နိုင်သော ဘုရားပေးပညာနှင့် အရင်းအမြစ်များကို ပိုင်ဆိုင်ထားသည်။

နှစ်တိုင်း မရေမတွက်နိုင်သော လူများက ကျန်းဝူဆောင်နှင့် နန်းတော်၏ အဖွဲ့အစည်းများသို့ ဝင်ရောက်ကြသည်။

သူတို့ထဲတွင် ပါရမီရှင်များလည်း အများကြီး ရှိကြသည်။

နှစ်ပေါင်းတစ်ထောင်ကျော်အတွင်း မဟာချန်မင်းဆက်လက်အောက်တွင် ကျွမ်းကျင်သူပေါင်း ဘယ်လောက်တောင် စုစည်းထားသလဲဆိုတာ ဘယ်သူသိနိုင်မလဲ။

လူအများစုအတွက် နန်းတော်သို့ ဝင်ရောက်ခြင်းမှာ အကောင်းဆုံး ရွေးချယ်မှု ဖြစ်သည်။

တကယ်ဆိုလျှင် စကြာဝဠာ၏ အဆုံးသတ်မှာ စာမေးပွဲဖြေဆိုပြီး အစိုးရဝန်ထမ်းလုပ်ခြင်းပင်။

ကံဆိုးစွာဖြင့် နန်းတော်သို့ ဝင်ရောက်ခြင်းက သူ့ကို ကန့်သတ်ချက်များသာ ဖြစ်စေလိမ့်မည်။ မဟုတ်လျှင် သူလည်း စမ်းကြည့်ချင်နေမိသည်။

ပေါ့ပေါ့ပါးပါး ဘဝမျိုးကို ဘယ်သူများ မနှစ်သက်ဘဲ ရှိမလဲ။

---

နောက်တစ်နေ့၊ နေ့လယ်အချိန်။

ရှောင်ပီလီက ခံတပ်ထဲမှ ထွက်လာခဲ့သည်။

သူ့အတွက်မူ အသွင်အပြင်ကို ပြောင်းလဲခြင်းမှာ စိတ်ကူးတစ်ခုတည်းဖြင့်ပင် ဖြစ်နိုင်ပြီ။ နင်ဝမ်ချင်းက သူ့မျက်နှာချင်းဆိုင် ရောက်နေပါစေ သူ့ကို မှတ်မိနိုင်မည် မဟုတ်ပေ။

မန်ယွဲ့မြို့မှာလည်း လွန်ခဲ့သော ရက်အနည်းငယ်ထက် ပို၍ စည်ကားနေသည်။

လူအများစု၏ အဝတ်အစားမှာ သဲကန္တာရပုံစံ မဟုတ်ကြဘဲ ကျောချင်းယွင်က ရှောင်ပီလီကို ရှာရန် သဲကန္တာရသို့ လာနေပြီဆိုသည့် သတင်းကို ကြားပြီးနောက် အလျင်အမြန် ရောက်လာကြသူများ ဖြစ်ကြောင်း ထင်ရှားသည်။

ရှောင်ပီလီက သင့်တော်သည်ဟု ထင်ရသည့် စားသောက်ဆိုင်တစ်ခုထဲသို့ ကျပန်း ဝင်လိုက်ပြီး အစားအစာအချို့မှာယူကာ ထိုင်လိုက်သည်။

စားသောက်ဆိုင်များမှာ အမြဲတမ်း စည်ကားဆုံး နေရာများ ဖြစ်သည်။

အထူးသဖြင့် သိုင်းလောကတွင် မငြိမ်မသက်မှုများ ဖြစ်ပွားနေသည့် ဤကာလတွင် ပြောစရာ စကားများက များလွန်းနေသည်။

"ကြားပြီးပြီလား၊ အရင်က သွေးဝတ်ရုံခန်းမဆောင်ကို တိုက်ခိုက်ခဲ့တဲ့ လျန်ယွန်းခံတပ်က အခု အကုန်အစင် ပျက်စီးသွားပြီ"

"မဟာဆရာသခင်များ စာရင်းမှာ (၂၉) နေရာမြောက်ရှိ နတ်သမီး ယွင်ယွဲ့တောင် လျန်ယွန်းခံတပ်မှာ သေသွားတယ်လို့ ကြားတယ်"

"အဲ့ဒါကို 'နတ်ဆိုးဓား' ရှောင်ပီလီက လုပ်တာလို့ ကြားတယ်ဗျ။ ဓားချက်တစ်ချက်တည်းနဲ့ အဆင့်(၄) ကျွမ်းကျင်သူ အများအပြားကို နှစ်ပိုင်းဖြစ်အောင် ခုတ်ပစ်လိုက်တာတဲ့"

"မနေ့က သဲကန္တာရထဲမှာ အရှေ့ဘက်စခန်းက မိန်းမလျာတွေရဲ့ အလောင်း တစ်ဒါဇင်ကျော်ကို တွေ့သေးတယ်။ ဘယ်သူလုပ်မှန်း ဘယ်သူသိမလဲ"

"ရှောင်ပီလီက (၁၈) နှစ်ပဲ ရှိသေးတယ် မဟုတ်လား"

"ဘာ (၁၈) နှစ်လဲ။ (၁၈) နှစ်ပြည့်ဖို့ သုံးလတောင် လိုသေးတယ်။ အဲ့လောက် ပါရမီရှင်တစ်ယောက်ကို ဘယ်လို ကျွမ်းကျင်သူမျိုးက သင်ပေးလိုက်လဲ မသိဘူး"

"မတွေးနဲ့တော့။ ရှောင်ပီလီကို သွေးဝတ်ရုံခန်းမဆောင်က အရင်းအမြစ်တွေ အများကြီးသုံးပြီး မွေးထုတ်ထားတာ ဖြစ်ရမယ်။ မဟုတ်ရင် သူက ဘယ်လောက်ပဲ ပါရမီရှင် ဖြစ်ပါစေ ဒီအရွယ်နဲ့ အဆင့်(၄)သိုင်းဆရာကြီးအဆင့်ကို ရောက်ဖို့ဆိုတာ မဖြစ်နိုင်ဘူး"

"ကွေ့ဟုန်းကွတ်ယွမ်က သွေးဝတ်ရုံခန်းမဆောင်ရဲ့ ဌာနခွဲတစ်ခုလို့ ကြားတယ်... စန်းယွမ်ဓားဂိုဏ်းက ကျွီယန်မြို့က ကွေ့ဟုန်းကွတ်ယွမ်ရဲ့ တံခါးမှာ စိန်ခေါ်စာကို ချိတ်ထားပြီးသား။ နိုဝင်ဘာ (၁၁) ရက်နေ့မှာ ဟန်မန်တံခါးမှာ ရှောင်ပီလီကို တိုက်ခိုက်ဖို့ စိန်ခေါ်ထားတယ်"

"ရှောင်ပီလီ တကယ်ပဲ သွားရဲမလားဆိုတာပဲ စိတ်ဝင်စားဖို့ ကောင်းတယ်"

"..."

စားသောက်ဆိုင်ထဲတွင် ဆူညံနေသည်။

သို့သော် စကားပြောဆိုသံ အများစုမှာ ရှောင်ပီလီအကြောင်းသာ ဖြစ်သည်။

နိုဝင်ဘာ (၁၁) ရက်နေ့ ဟုတ်လား။ တခြားစကြာဝဠာမှာတောင် (၁၁)ရက်နှစ်ခါရှိရင်တောင် မရှောင်လွှဲနိုင်ဘူးပေါ့။

ရှောင်ပီလီက သေရည်ခွက်ကို ဖြည့်ကာ တစ်ယောက်တည်း သောက်လိုက်သည်။

စားသောက်ဆိုင်ထဲက လူအများစုမှာ သာမန် သိုင်းလောကသားများ ဖြစ်ကြသော်လည်း ကျွမ်းကျင်သူအချို့လည်း ရောနှောနေကြသည်။

ရှောင်ပီလီက မျက်လုံးကို မြှောက်ကာ တစ်ခန်းလုံးကို လှည့်ကြည့်လိုက်သည်။

စားသောက်ဆိုင်ထဲတွင် အဆင့်(၄) သိုင်းဆရာကြီး နှစ်ယောက် ရှိနေသည်။ နှစ်ယောက်စလုံးမှာ အသက်အရွယ် ကြီးရင့်နေကြပြီး လူငယ် ခုနစ်ယောက် သို့မဟုတ် ရှစ်ယောက်က လိုက်ပါလာကြသည်။ သူတို့က ငယ်ရွယ်သော တပည့်များကို အတွေ့အကြုံ ရရှိစေရန် ခေါ်ဆောင်လာခြင်း ဖြစ်ကြောင်း ထင်ရှားသည်။

သိုင်းဆရာကြီး နှစ်ယောက်နှင့် အဆင့်(၆) အထွတ်အထိပ်တွင် ရှိနေသော လူငယ် နှစ်ယောက်က စားပွဲတစ်ခုတွင် ထိုင်နေကြသည်။

သူတို့မိသားစု နှစ်ခုစလုံးမှာ ယွီနယ်မြေမှ အင်အားစုများ ဖြစ်ကြသည့် နတ်ဘုရားလက်သီးဂိုဏ်းနှင့် ဟွမ်မိသားစုတို့ ဖြစ်ကြသည်။ သူတို့မှာ ကောင်းမွန်သော ဆက်ဆံရေး ရှိကြပြီး မန်ယွဲ့မြို့တွင် တွေ့ဆုံကြသည့်အခါ သဘာဝကျစွာပင် အတူတူ ထိုင်နေကြခြင်း ဖြစ်သည်။

ဟွမ်မိသားစုခေါင်းဆောင် ဟွမ်ပိုင်ချွမ်က တိုးတိုးလေး ပြောလိုက်သည်။

"ညီအစ်ကို လျှို၊ မနေ့က မဟာဆရာသခင်များ စာရင်းမှာ (၃၀) နေရာမြောက်ရှိ 'မြကျောက်ဓား' စုန့်ကျားကို မြင်လိုက်တယ်။ သူလည်း စန်းယွမ်ဓားဂိုဏ်းနဲ့အတူ ကျွီယန်မြို့မှာ တည်းခိုနေတာ။ တစ်စုံတစ်ယောက်ကို စောင့်နေပုံပဲ"

"သူတို့က အရှေ့ဘက်စခန်းက မိန်းမလျာတွေနဲ့အတူတူပဲ။ စန်းယွမ်ဓားဂိုဏ်းက တကယ်ပဲ အိမ်ရှေ့မင်းသားဘက်ကို ရောက်သွားတာလား"

"ကိုးဂိုဏ်းနှင့် ခြောက်ဂိုဏ်းစု တစ်ခုအနေနဲ့၊ မင်းတရားကြီးကလည်း ထွန်းတောက်နေချိန်မှာ စန်းယွမ်ဓားဂိုဏ်းက ဘာလို့ ဒီလောက် စောစောစီးစီး ဘက်လိုက်ရတာလဲ"

လျှိုယုံက ပတ်ဝန်းကျင်ကို ကြည့်ကာ သက်ပြင်းချလိုက်သည်။

"လွန်ခဲ့တဲ့ နှစ်ပေါင်းကိုးဆယ်က အကြီးအကျယ် မငြိမ်မသက်မှုတွေ ဖြစ်ပွားပြီးနောက်ပိုင်း သိုင်းလောကက တိုးတက်လာခဲ့တာပဲ။ ဒါကို နန်းတော်က မမြင်ချင်ဘူး"

သိုင်းလောကက ပိုသန်မာလေလေ နန်းတော်က ထိန်းချုပ်ရ ပိုခက်လေလေ ဖြစ်သည်။

သိုင်းလောကကို အားနည်းအောင် လုပ်ဖို့ နည်းလမ်းရှာခြင်းမှာ သဘာဝကျပါသည်။

"ကျောချင်းယွင်က ရှောင်ပီလီကို စိန်ခေါ်ဖို့ ပြင်ဆင်နေတယ်လို့ ကြားတယ်။ ဘယ်သူက အနိုင်ရဖို့ အခွင့်အရေး ပိုများမယ်လို့ ထင်လဲ" ဟွမ်ပိုင်ချွမ်က အရင်အကြောင်းအရာကို ဆက်မပြောတော့ဘဲ ပြုံး၍ မေးလိုက်သည်။

လျှိုယုံ။

"ကျောချင်းယွင်က အသက်ကြီးပေမယ့် ရှောင်ပီလီက အနိုင်ရဖို့ အခွင့်အရေး ပိုများမယ်လို့ ထင်တယ်"

ဟွမ်ပိုင်ချွမ်က ခေါင်းခါလိုက်သည်။

"အကယ်၍ သူတို့နှစ်ယောက်တည်း တိုက်ခိုက်ကြမယ်ဆိုရင် ရှောင်ပီလီ အနိုင်ရဖို့ အခွင့်အရေးက ပိုများတာ မှန်တယ်"

"ဒါပေမဲ့ ဒီတစ်ခါတော့ အရှေ့ဘက်စခန်းနဲ့ စန်းယွမ်ဓားဂိုဏ်းက သိုင်းဆရာကြီး နှစ်ယောက်ကို ခေါ်လာခဲ့တယ်။ အမှောင်ထဲမှာ ပုန်းကွယ်နေတဲ့ သိုင်းဆရာကြီးတွေလည်း ရှိနိုင်သေးတယ်"

"အဲ့ဒီအချက်တွေကြောင့် ရှောင်ပီလီက သူ့ရဲ့ စွမ်းအားအပြည့်ကို ထုတ်ဖော်ဖို့ မရဲလောက်ဘူး။ အနည်းဆုံးတော့ ထိုကျွမ်းကျင်သူတွေ လှုပ်ရှားလာမှာကို ကာကွယ်ဖို့ (၃) ပုံ၊ (၇) ပုံလောက် လျှော့ပြီး ထိန်းထားရလိမ့်မယ်"

"ကျောချင်းယွင်ကတော့ ဘာမှ ထိန်းစရာ မလိုဘဲ တိုက်ခိုက်နိုင်တာကြောင့် ကျောချင်းယွင်က အနိုင်ရဖို့ အခွင့်အရေး ပိုများမှာ သေချာတယ်"

"ကျောချင်းယွင်က မူလဝိညာဉ်ဆေးလုံး နှစ်လုံးသောက်ထားပြီး အဆင့်(၃)ကို ရောက်ဖို့ တစ်လှမ်းပဲ လိုတော့တယ်ဆိုတဲ့ ကောလာဟလတွေ ရှိတယ်။ ဒီတစ်ခါတော့ သူက ရှောင်ပီလီကို သုံးပြီး သေရှင်နယ်နိမိတ်ကို ကျော်ဖြတ်ကာ အဆင့်(၃) မဟာဆရာသခင်ကြီး နယ်မြေကို ဝင်ရောက်ချင်နေတာ ဖြစ်လိမ့်မယ်"