အခန်း ၁၄၂

🍄 Chapter 142

ယန်ပင်း၏အဆိုအရ ဤပရောဂျက်သည် ချင်ချွမ်းအုပ်စု၏ ရုံးခန်းဧရိယာတစ်ခုလုံး ဆောက်လုပ်ရန်ဖြစ်ပြီး ဘတ်ဂျက် ယွမ် ၃၀၀,၀၀၀ ရှိသဖြင့် တင်ဒါလာရောက်ယှဉ်ပြိုင်သော ကန်ထရိုက်တာ အယောက်ငါးဆယ်တိတိ ရှိသည်ဟု ဆို၏။

ထို့ကြောင့် အခွင့်အရေးမှာ မများလှပေ။

ယန်ပင်းသည် မကြာသေးမီက ချန်မေ့လန်အတွက် တစ်လခန့် အခေါက်ခေါက်အခါခါ ပြေးလွှား ဆောင်ရွက်ပေးခဲ့သည်။

ချန်မေ့လန်က သူ့ကို ယွမ် ၃၀၀ ပေးခဲ့၏။ သူ့ကို တိုက်ရိုက် မပေးဘဲ စုန့်ဟွိုင်ဟွာထံသို့ ပေးခဲ့ခြင်းဖြစ်သော်လည်း အနည်းဆုံးတော့ ယန်ပင်း နောက်ဆုံးတွင် ငွေရလိုက်သည်။

နှိုင်းယှဉ်ကြည့်မည်ဆိုလျှင် ချန်မေ့လန်သည် ရက်စက်သောချန်ဖျင်ထက် ပို၍ လိပ်ပြာလုံသည်။ သေချာပေါက် ယန်ပင်းသည် ယခုအခါ မေ့လန်အတွက်သာ အလုပ်လုပ်ပေးလိုတော့၏။

သို့သော် စီးပွားရေးလောကထဲသို့ ဝင်ရောက်ခြင်းမှာ ငွေအမြောက်အမြားရှာရန် ဖြစ်သည်။ မေ့လန်မှာ ခြေလှမ်းတစ်ခုမျှသာ ဖြစ်ပြီး သူမတွင် ကြီးမားသောရည်မှန်းချက် သိပ်မရှိလှချေ။

ငွေအမြောက်အမြား ရှာလိုပါက ယန်ပင်းအနေဖြင့် ယန်ရှီရှန်းနှင့် ဆက်လက်ပတ်သက်နေရမည်ဖြစ်သည်။

သူသည် လက်အောက်ငယ်သားများအပေါ် ကြမ်းတမ်းသော်လည်း ရက်ရောတတ်သူဖြစ်သည်။

တိုက်ဆိုင်စွာပင် ချန်မေ့လန်က ယန်ရှီရှန်းကို ကျောက်မီးသွေးတွင်းတူးဖော်ရေးအတွက် နောက်လုပ်ငန်းစဉ်များ ဆွေးနွေးရန် ယန်ကွမ်ရွာသို့ ခေါ်လိုက်သဖြင့် ယန်ပင်းက ယန်ရှီရှန်းအား သွားရောက် ကြိုဆိုခဲ့သည်။

ယန်ရှီရှန်းသည်လည်း အစွမ်းအစရှိသူတစ်ဦးဖြစ်သည်။ သူသည် ရှယ်ယာအများစုကို မေ့လန်ထံ လွှဲပြောင်းပေးခဲ့သော်လည်း ဟူရှောင်မေဘက်မှ ထိုအကြောင်းကို မသိရှိခဲ့ပေ။

မကြာသေးမီက သူမသည် အကြောင်းပြချက် အမျိုးမျိုးဖြင့် ဆက်တိုက် လဲကျနေခဲ့သည်။

ရှီရှန်းက သူမကို ဆေးရုံသို့ပို့ရန် အတင်းအကျပ် တိုက်တွန်းသော်လည်း ဟူရှောင်မေသည် ဗိုက်ထဲတွင် ကလေးမရှိသဖြင့် သွားရန်မရဲခဲ့ချေ။

ကိုယ်ဝန်ကို စောင့်ရှောက်ရန်ဟူသော အကြောင်းပြချက်ဖြင့် ဆေးခန်းငယ်လေး တစ်ခုတွင်သာ နေထိုင်နေရတော့သည်။

ယန်ရှီရှန်းသည် ချီတုန်မိန်ကို သူမအား ပြုစုစောင့်ရှောက်ရန် စေလွှတ်ခဲ့ပြီး သူကိုယ်တိုင်မူ နံနက်၊ ည လာရောက်ကြည့်ရှုကာ ဟူရှောင်မေ၏လက်ကိုဆုပ်ကိုင်ရင်း ကလေးကို ကယ်တင်နိုင်သည်ဖြစ်စေ၊ မကယ်တင်နိုင်သည်ဖြစ်စေ သူမ နေကောင်းလာသည်နှင့်တစ်ပြိုင်နက် ချက်ချင်းလက်ထပ်မည်ဖြစ်ကြောင်း ပြောဆိုလေ့ရှိသည်။

သို့သော် သူ့သားအတွက် ချမ်းသာကြွယ်ဝမှုများ ပိုမို စုဆောင်းနိုင်ရန်အတွက်၊ ဟူရှောင်မေအား အခြားမိုင်းတွင်းများအတွက် တူးဖော်ခွင့် လိုင်စင်များ ရရှိရန် ဖန်ရှန်နှင့် ထပ်မံဆက်သွယ်စေခဲ့သည်။

ဖန်ရှန်တွင် ပြည်နယ်အဆင့်အရာရှိကြီးဖြစ်သော ကျောင်းနေဖက်ဟောင်းတစ်ဦးရှိသည်။

သူ့စကားတစ်ခွန်းက ပုံမှန်အားဖြင့် လာဘ်ပေးလာဘ်ယူနှင့် မျက်နှာလိုက်မှုများလိုအပ်သော ထိုလုပ်ငန်းစဉ်များကို အမြန်ဆုံး အတည်ပြုပေးနိုင်သည်။

ရလဒ်အနေဖြင့် ဟူရှောင်မေက ဖန်ရှန်နှင့်ဆက်သွယ်ခဲ့ပြီး လိုင်စင်များ မကြာမီ အတည်ပြုချက် ရရှိတော့မည်ဖြစ်သည်။

တစ်ချိန်တည်းမှာပင် ဟူရှောင်မေနှင့် ချီတုန်မိန်တို့သည် ဆေးခန်းငယ်လေး တစ်ခုတွင် တည်ရှိမနေသော ‘ယောကျ်ားလေးသန္ဓေသား’ ကို စောင့်ရှောက်ရင်း ကိုယ်ဝန်စောင့်ရှောက်နေဟန် ဆောင်နေကြသည်။

သူမ တကယ်ကိုယ်ဝန်ရှိကြောင်း သက်သေပြရန်အတွက် ဟူရှောင်မေသည် သူမကိုယ်သူမ ဝဖြိုးလာစေရန်ပင် ကြိုးစားအားထုတ်ခဲ့၏။

ယန်ရှီရှန်းက ပြုံးရင်း သူ့အိတ်ကပ်ထဲမှ ယွမ်တစ်ရာတန် သုံးရွက်ကို ထုတ်ကာ ယန်ပင်း၏ ပေါင်ပေါ်သို့ ရိုက်ချလိုက်သည်။

“ဒုတိယအစ်ကို၊ ကျေးဇူးပြုပြီး ကူညီပါဦး၊ ဒီတလော ချီတုန်မိန်ကို သေချာစောင့်ကြည့်ထားပေး၊ သူ မကြာခင် ကလေးတစ်ယောက်ဝယ်ဖို့ ကြိုးစားတော့မှာ သေချာတယ်၊

အစ်ကိုက အခုတလော အားနေတာပဲလေ၊ ကျွန်တော့်အတွက် သူ့ကို စောင့်ကြည့်ပေးပါ၊ သူ တစ်ခုခု လှုပ်ရှားရဲရင် ရဲကို တိုင်လိုက်ပါ၊ ကျွန်တော် ဆိုလိုတာကို အစ်ကို နားလည်တယ်မလား၊ ဒါက စရန်ငွေပါ”

ချီတုန်မိန်က ကလေးဝယ်ရန် အထိတ်တလန့် ဖြစ်နေချိန်တွင် ယန်ရှီရှန်းက သူမကို စောင့်ကြည့်နေပြီး သူမ လှုပ်ရှားရဲပါက တိုင်ကြားရန် အသင့်ရှိနေသည်လော။

‘ဒါက ထောင်ချောက်ဆင်တာ မဟုတ်ဘူးလား'

ယန်ပင်းသည် ဖြောင့်မတ်သူမဟုတ်သော်လည်း ယန်ရှီရှန်း ဤသို့ပြုမူသည်ကို ယခင်က တစ်ခါမျှ မမြင်တွေ့ခဲ့ဖူးချေ။

ဟူရှောင်မေမှာ ဉာဏ်ကောင်းသော်လည်း ယန်ရှီရှန်းက ပို၍ ကောက်ကျစ်စဉ်းလဲသည်။

သူသည် သူမကို အသုံးချကာ ကျောက်မီးသွေး တူးဖော်ခွင့်များကို ရယူခဲ့ပြီး သူမအား ထိုဆေးခန်းငယ်လေးတွင် ပိတ်မိနေစေရန်၊ အပြင်မထွက်ရဲစေရန်ပင် လှည့်စားထားနိုင်ခဲ့သည်။

သို့သော် အလုပ်ပြီးမြောက်ပါက ယွမ်တစ်ထောင် ရရှိမည်ဖြစ်သည်။

‘ထားပါတော့လေ’

ယန်ပင်း ဤတာဝန်ကို လက်ခံလိုက်သည်။

ယန်ရှီရှန်း ယနေ့လာခဲ့ခြင်းမှာ ထိုငွေတစ်သိန်းကို လုပ်ငန်းလည်ပတ်ငွေအဖြစ် ရယူရန်ဖြစ်သည်။ သူသည် သူ၏ ကိုယ်ပိုင်ကျောက်မီးသွေးများကို ယူဆောင်သွားရန်သာမက လက်ရှိရှန်ရှီပြည်နယ်တွင် ပိုလျှံနေသော ကျောက်မီးသွေးအားလုံးကိုပါ ဝယ်ယူကာ ရထားတွဲများဖြင့် တောင်ပိုင်းသို့ပို့ဆောင်ပြီး အမြတ်အစွန်းကြီးကြီးမားမားရယူရန် စီစဉ်ထားသည်။

ဤသည်မှာ သူ့ကို တစ်ဟုန်ထိုး သန်းကြွယ်သူဌေးတစ်ဦး ဖြစ်လာစေရန် ကူညီပေးနိုင်မည်ဖြစ်သည်။

သို့သော် ချန်မေ့လန်က သူ့အစီအစဉ်များကို ရေအေးဖြင့် ပက်ဖျန်းလိုက်၏။

“မရဘူး၊ ရှင် အရင်ဆုံး အဆင့်မြင့်ဆုံးလုံခြုံရေး မိုင်းတွင်းစက်ကိရိယာတွေကို ကျောက်မီးသွေးတွင်းထဲမှာ တပ်ဆင်ရမယ်၊ ပြီးတော့ စက်ဝိုင်းပုံ ကျောက်မီးသွေးဆေးကြောတဲ့စက် တစ်စုံကိုလည်း ဝယ်ရမယ်၊

အဲဒါတွေ တပ်ဆင်ပြီးသွားရင် ထုတ်လုပ်သူကို ကျွန်မဆီ တိုက်ရိုက်လာပြီး ငွေတောင်းခိုင်းလိုက်”

လက်ရှိတွင် ကျောက်မီးသွေးတူးဖော်မှု အများစုမှာ လက်ဖြင့် တူးဖော်ခြင်းနှင့် သယ်ယူခြင်းများဖြင့်သာ လုပ်ဆောင်ကြသည်။

ပြိုကျနိုင်မည့် နေရာမျိုး တွေ့ပါက သစ်သားဆွေး တစ်ချောင်းဖြင့်သာ ထောက်ထားတတ်ကြသည်။

လုံခြုံရေးမိုင်းတွင်း စက်ကိရိယာများတွင်မူ ကြီးမားသော တိမ်းစောင်းမှု ကာကွယ်ရေး ထောက်တိုင်များ၊ ကျောက်မီးသွေး ဖြတ်စက်များ၊ ဥမင်တူးစက်များနှင့် တိမ်းစောင်းမှုနှင့် ပြိုကျမှုသတိပေး ကိရိယာများ ပါဝင်၏။

စက်ဝိုင်းပုံ ကျောက်မီးသွေးဆေးကြောခြင်းမှာ ပြည်တွင်းဈေးကွက်သို့ ယခုမှ ဝင်ရောက်လာသော နည်းပညာသစ်တစ်ခုဖြစ်သည်။

ထိုသို့သော စနစ်အပြည့်အစုံမှာ ယွမ်တစ်သိန်းကျော် ကုန်ကျမည်ဖြစ်သည်။

ယန်ရှီရှန်းသည် ဤစကားကို ကြားသောအခါ ဒေါသတကြီးဖြင့် စောဒကတက်လိုက်၏။

“မေ့လန်၊ မင်း ငါ့ပိုက်ဆံတွေကို အကြွေးတင်အောင် လုပ်ချင်နေတာပဲ၊ ဟုတ်တယ်မလား၊ ဒါ အဓိပ္ပာယ်ရှိပါတယ်၊ ယန်ကျောက်က တစ်လကို ယွမ် ၄၀၀ ပဲရတဲ့ ဆင်းရဲတဲ့ ရဲတစ်ယောက်လေ၊ မွဲတေနေတာပဲ၊

အခု ငါတို့ အိမ်ကို ကြည့်စမ်း၊ ရေခဲသေတ္တာရော ဖုန်းရော ရှိနေပြီ၊ မင်း ငါ့ပိုက်ဆံတွေအားလုံး ယန်ကျောက်ဆီ တိတ်တဆိတ် ပေးလိုက်တာ မဟုတ်လား”

ချန်မေ့လန် ထသွားပြီး အခန်းထဲမှ ယန်ရှီရှန်း၏ မိကျောင်းသားရေအိတ် အနီရောင်လေးကို ယူဆောင်လာသည်။

သူမက အိတ်ကို ဖွင့်ပြလိုက်ရာ စက္ကူအဖြူရောင်ကြိုးများဖြင့် စည်းနှောင်ထားဆဲဖြစ်သော ယွမ်တစ်ရာတန် အထပ်လိုက်ကို တွေ့လိုက်ရသည်။

ချန်မေ့လန်က ရှင်းပြလိုက်၏။

“ကျွန်မက ထုတ်လုပ်မှုလိုင်းတွေအတွက်ပဲ ငွေရင်းနှီးမြှုပ်နှံမှာ၊ ဘာလို့လဲဆိုတော့ ကျောက်မီးသွေးမိုင်းလုပ်သားတွေ သေသွားရင် လျော်ကြေးပေးရမှာက ကျွန်မ ပိုက်ဆံတွေမလို့ပဲ”

ယန်ရှီရှန်းသည် ဤသဘောတရားကို နားလည်သော်လည်း လုံခြုံရေးထုတ်လုပ်မှုကိစ္စကို ရွှေ့ဆိုင်းထားနိုင်သည်ဟု ခံစားရသည်။

အကယ်၍ မေ့လန် တကယ် စိုးရိမ်နေပါက တာအိုဘုန်းကြီး တစ်ပါးကို ပင့်ကာ ယတြာချေပြီး နတ်များကို ပူဇော်ခိုင်းနိုင်သည်။

သူမသည် လူကောင်းတစ်ယောက်ဖြစ်ရာ ကောင်းကင်ဘုံက သေချာပေါက် ကောင်းချီးပေးမည်ဖြစ်သည်။

ယခုအခါ ကျောက်မီးသွေးလိုအပ်ချက်မှာ အလွန်မြင့်မားနေပြီး တောင်ပိုင်းသို့ ပို့ဆောင်လိုက်သည်နှင့်တစ်ပြိုင်နက် သူ ယွမ်တစ်သန်းကျော် အမြတ်ရရှိနိုင်ပေမည်။

ဤငွေရှာနိုင်မည့်အခွင့်အရေးကြီး လက်လွတ်သွားမည်ကို ကြည့်နေရခြင်းက သူ့အား ဒေါသထွက်စေပြီး ကျွဲမြီးတိုစေသည်။

ဤအချိန်တွင် သူသည် ချန်မေ့လန်နှင့် ကွာရှင်းခဲ့ခြင်းကိုပင် နောင်တမရတော့ချေ။ အဘယ်ကြောင့်ဆိုသော် သူမသည် ငွေရှာမည့် သူ၏လမ်းခရီးတွင် အကြီးမားဆုံးသော အတားအဆီးကြီးတစ်ခု ဖြစ်နေသောကြောင့်ပင်။

အကယ်၍ သူမ ပြောသမျှကို တကယ်နားထောင်မည်ဆိုပါက ဤဘဝတွင် ငွေအမြောက်အမြား ရှာနိုင်မည့်အကြောင်းကို မေ့ထားလိုက်ရုံသာ ရှိတော့သည်။

ထိုစဉ် ရှောင်လန်သည် တံခါးပေါက်မှနေ၍ အပြေးအလွှားဝင်လာကာ သူ၏ကျောင်းလွယ်အိတ်ကို ပစ်ချပြီး ကက်ဆက်ခွေများ ထည့်ထားသောခြင်းတောင်းကို ကောက်ယူရင်း အပြင်သို့ ပြေးထွက်ရန် ပြင်လိုက်သည်။

ယွမ်ယွမ်လည်း အနောက်မှ ကပ်ပါလာ၏။

သမီးဖြစ်သူကို မြင်သောအခါ ယန်ရှီရှန်း၏ဒေါသများ အနည်းငယ် ပြေလျော့သွားသည်။

သူ အမြန်မတ်တတ်ရပ်ကာ ပြုံးရွှင်စွာဖြင့် ခေါ်လိုက်၏။

“ကျောင်းတိ”

ယွမ်ယွမ်က မကြားချင်ယောင်ဆောင်ကာ ရှောင်လန်နှင့်အတူ လေပြင်းတစ်ချက်ပမာ ပြေးထွက်သွားလေသည်။