အခန်း ၂၆၁

အခန်း ၂၆၁ ခရမ်းရွှေရောင် ဗောဓိသီး

ဂွေ့ထူတိုင်းလန် ဤမျှ မောက်မာဝင့်ကြွားရဲခြင်းမှာ ပထမအချက်အနေဖြင့် သူ့ဘက်တွင် လူအင်အား များပြားနေသောကြောင့် ဖြစ်သည်။

နောက်တစ်ချက်မှာ ယခင်က သူသည် ကုံးလျို့ တို့အဖွဲ့နှင့် ဆုံတွေ့ခဲ့ဖူးပြီး ကုံးလျို့ ၏ ပုံစံကို အတော်လေး မှတ်မိနေခြင်း ပင်ဖြစ်သည်။ အနည်းငယ် ထိပ်တိုက်တွေ့သည်နှင့် ချက်ချင်း ထွက်ပြေးလေ့ရှိပြီး အလွန် ကြောက်တတ်သူ တစ်ယောက် ဖြစ်သည်။

ထိုအချက် နှစ်ချက် ပေါင်းစပ်လိုက်သောအခါ ဂွေ့ထူတိုင်းလန် သည် ဤမျှ ရဲတင်းလာခြင်း ပင်ဖြစ်သည်။

သေချာပေါက် ဤသည်မှာ ကုံးလျို့ ၏ လုပ်ဆောင်မှု ပုံစံနှင့် သက်ဆိုင်နေပြီး အလုံးစုံကို ကျိုးဟန် ၏ နည်းဗျူဟာ အတိုင်းသာ အကောင်အထည်ဖော် လုပ်ဆောင်နေခြင်း ဖြစ်သော်လည်း ပိုမို ကြောက်တတ်သည့် ပုံစံ ပေါက်နေခြင်းသာ ဖြစ်သည်။

ယခု ကုံးလျို့ ၏ မတုန်မလှုပ် တည်ငြိမ်နေသော ပုံစံကြောင့် ဂွေ့ထူတိုင်းလန် သည် အလွန် မကျေမနပ် ဖြစ်သွားလေသည်။

သူ၏ ခြိမ်းခြောက်မှုက အနည်းငယ်မျှပင် အလုပ်မဖြစ်ဘူးလား။

"ဆယ်အထိ ရေတွက်မယ်... မထွက်သွားရင် သေဖို့သာ ပြင်ထား... ငါက..."

"အား..."

ဂွေ့ထူတိုင်းလန် စကားပင် မဆုံးလိုက်ခင်မှာပင် ပြင်းထန်သော မီးတောက်တစ်ခု လွင့်ပျံလာပြီး နောက်တစ်စက္ကန့်တွင် သူ ချက်ချင်းပင် အသတ်ခံလိုက်ရလေသည်။

အော်ဟစ်ချိန်ပင် မရလိုက်ဘဲ ပြာအဖြစ်သို့ ပြောင်းလဲသွားလေတော့သည်။

"သေနာလေး စကားများလိုက်တာ"

"ညီအစ်ကိုတို့ တက်ကြ... ဂျပန်ကောင်တွေကို သတ်"

ကုံးလျို့ ၏ အမိန့်ပေးသံနှင့်အတူ ကြိုတင် ပြင်ဆင်ထားသော အဖွဲ့ဝင်များသည် ကြမ်းတမ်းသော တိုက်ခိုက်မှုများကို စတင်လိုက်ကြလေတော့သည်။

"ဘာ... ခေါင်းဆောင်ကြီး အသတ်ခံလိုက်ရပြီ"

"ဘယ်လိုလုပ် ဖြစ်နိုင်မှာလဲ... ဂွေ့ထူက ငါတို့နယ်မြေမှာ တိုက်ခိုက်ရေးစွမ်းအား အမြင့်ဆုံးလေ"

"ဒီ နဂါးနိုင်ငံ က ကစားသမား တွေ ဘယ်ကနေ ရောက်လာတာလဲ"

"အခြေအနေ မကောင်းတော့ဘူး"

"သေနာလေးတွေ... သူတို့ ဝတ်ထားတဲ့ ဝတ်စုံတွေက ဘာတွေလဲ... ဘာလို့ ကာကွယ်မှုကို ဖောက်လို့ မရတာလဲ"

"လက်နက် တွေကလည်း အရမ်း အစွမ်းထက်တာပဲ... ငါ့ရဲ့ ကြယ်ရောင်အဆင့် ဓားက တစ်ချက် ထိလိုက်တာနဲ့ ကျိုးသွားပြီလား"

စတင် တိုက်ခိုက်သည်နှင့် တစ်ပြိုင်နက် ဂျပန် ကစားသမား များသည် အံ့အားသင့်သွားကြလေသည်။ သူတို့ဘက်တွင် လူအင်အား များပြားသော်လည်း တစ်ဖက်လူ၏ အစွမ်းထက်လှသော ဝတ်စုံ များရှေ့တွင် မည်သည့် အသုံးမှ မဝင်ကြောင်း တွေ့ရှိလိုက်ရသည်။

မကြာမီ မိမိတို့ မည်မျှ အစွမ်းထက်သော အဖွဲ့ကို သွားရောက် ရန်စမိကြောင်း သိရှိလိုက်ကြသည်။

ဤကဲ့သို့သော တိုက်ခိုက်မှုများ အောက်တွင် သူတို့ ပြန်လည် ခုခံနိုင်စွမ်း လုံးဝ မရှိတော့ချေ။

"ဟားဟားဟား... သတ်ရတာ အရမ်း အရသာရှိတာပဲ"

"ဒါက ဘုရင်အဆင့် ဝတ်စုံ က ပေးတဲ့ စွမ်းအားလား... ဟင်းသီးဟင်းရွက် လှီးသလိုပဲ အရမ်း လွယ်ကူတာပဲ"

"အခု တိုက်ခိုက်ရေးစွမ်းအားတွေ အများကြီး မြင့်တက်လာပြီ... အရင်က မသွားရဲတဲ့ လျှို့ဝှက်နယ်မြေ တွေကို အခု လုံးဝ ဖိအားမရှိဘဲ သွားလို့ရပြီ"

"ဒီ ဂျပန် ကစားသမား တွေက အရမ်း ဆင်းရဲတာပဲ... အကုန်လုံးပေါင်းမှ ဘုရင်အဆင့် ဝတ်စုံ နှစ်ခုပဲ ကျလာတယ်"

"ဟွန့်... မွဲတေနေတဲ့ ကောင်တွေ... ကိုယ့်အင်အားကိုတောင် မသိဘဲ ငါတို့ကို လာလုရဲသေးတယ်... သေချင်နေတာပဲ"

မိနစ်အနည်းငယ် အတွင်းမှာပင် ကုံးလျို့ ဦးဆောင်သော အဖွဲ့သည် ဂျပန် ကစားသမား ရှစ်ရာကို အပြီးတိုင် ရှင်းလင်း သတ်ဖြတ်လိုက်လေတော့သည်။

...

[သင်သည် ကစားသမား ကုံးလျို့ ထံမှ ကိုယ်ပိုင် စာတို တစ်စောင် လက်ခံရရှိပါသည်... ကျေးဇူးပြု၍ ဝင်ရောက်ကြည့်ရှုပါ]

ကျိုးဟန် သည် ဝတ်စုံများကို ရှင်းလင်း သိမ်းဆည်းနေစဉ် စနစ် ၏ သတိပေးသံကို ကြားလိုက်ရသဖြင့် အနည်းငယ် သံသယ ဖြစ်သွားသော်လည်း ဖွင့်ကြည့်လိုက်လေသည်။

"ကုံးလျို့... မင်း ဘာကိစ္စ ရှိလို့လဲ"

"ဂိုဏ်းချုပ်... ကျွန်တော် ဧကရာဇ်အဆင့် အရည်အသွေးရှိတဲ့ လင်ချီ သစ်သီး တစ်ခု ရထားတယ်... အဲဒါ ဂိုဏ်းချုပ် ကို တကူးတက လာပေးတာပါ"

ကုံးလျို့ က အလျင်အမြန် ပြောလိုက်လေသည်။

"ဟင်... ဧကရာဇ်အဆင့် အရည်အသွေး"

ကျိုးဟန် အနည်းငယ် အံ့အားသင့်သွားလေသည်။

"ဟုတ်တယ်ဗျ... ပြောရရင် ဒီကိစ္စက တော်တော်လေး စိတ်ဝင်စားဖို့ ကောင်းတယ်... ဂျပန်ကောင်တွေက ကျွန်တော်တို့ကို လာလုဖို့ ကြိုးစားနေတာလေ"

"ဂိုဏ်းချုပ် ပေးထားတဲ့ ဘုရင်အဆင့် ဝတ်စုံ တွေ ရှိနေတာတောင် ငါတို့ကို လာရန်စရဲသေးတယ်... သေချင်နေတာပဲလေ"

"ဂျပန်ကောင် ရှစ်ရာကို ထပ်သတ်လိုက်ရတယ်... အရမ်းကို နေလို့ကောင်းသွားတာပဲ"

"ဂိုဏ်းချုပ်... ကျွန်တော် စကားတွေ အများကြီး ပြောလိုက်မိပြီ... စိတ်မဆိုးပါနဲ့ဗျာ"

ကုံးလျို့ သည် အလွန် ပျော်ရွှင်နေသဖြင့် စကားများ အဆက်မပြတ် ပြောဆိုနေလေသည်။

သူ ဧကရာဇ်အဆင့် လင်ချီ သစ်သီး ကို ရရှိခဲ့သဖြင့် ကျိုးဟန် သည် သူ၏ စကားများမှုကို အပြစ်မတင်တော့ပေ။

"အချက်အလက် ပုံတွေကို ဂိုဏ်းချုပ် ဆီ ပို့လိုက်ပြီနော်... အရင်ဆုံး ဝင်ကြည့်လိုက်ပါဦး"

ကုံးလျို့ က ချက်ချင်း ဖြည့်စွက် ပြောလိုက်လေသည်။

ကျိုးဟန် သည် မျှော်လင့်ချက်များဖြင့် ပုံများကို ဖွင့်ကြည့်လိုက်လေသည်။

[ခရမ်းရွှေရောင် ဗောဓိသီး]

[အရည်အသွေး - ကြယ်တစ်ပွင့် ဧကရာဇ်အဆင့်]

[အမျိုးအစား - သဘာဝ ရတနာ]

[ဖော်ပြချက် - ထူးခြားဆန်းကြယ်သော စွမ်းအားများ ပြည့်နှက်နေသည့် ဝိညာဉ်သစ်သီး ဖြစ်ပြီး စားသုံးပြီးနောက် ကစားသမား ၏ အခြေခံစွမ်းရည် အားလုံးနှင့် အတွေ့အကြုံရမှတ် များကို မြှင့်တင်ပေးနိုင်ပါသည်]

[အကျိုးသက်ရောက်မှု - စားသုံးပြီးနောက် လက်ရှိ အဆင့်မှ နှစ်ဆင့် တိတိ မြင့်တက်သွားမည် ဖြစ်ပါသည်]

[ကန့်သတ်ချက် - တစ်ကြိမ်သာ စားသုံးခွင့် ရှိပြီး အကြိမ်ကြိမ် စားသုံးပါက အကျိုးသက်ရောက်မှု ထပ်မံ မရရှိနိုင်ပါ... စားသုံးသူ၏ အဆင့်သည် ၇၀ ထက် မကျော်လွန်ရပါ]

[ရှင်းလင်းချက် - ဤသစ်သီးသည် ရင့်မှည့်နေပြီ ဖြစ်သဖြင့် တစ်နာရီ အတွင်း စားသုံးရမည် ဖြစ်ပြီး ထိုသို့မဟုတ်ပါက အကျိုးသက်ရောက်မှု အလွန် လျော့ကျသွားမည် ဖြစ်ပါသည်]

'အရမ်း မိုက်တာပဲ... ကစားသမား ရဲ့ အဆင့်ကို တိုက်ရိုက် မြှင့်တင်ပေးနိုင်တာလား'

ကျိုးဟန် အံ့သြသွားလေသည်။ ဤကဲ့သို့သော ဝိညာဉ်သစ်သီး မျိုး ရှိနေလိမ့်မည်ဟု မထင်မှတ်ထားခဲ့ချေ။

တကယ့်ကို သဘာဝ ရတနာ ပင်ဖြစ်သည်။ အကျိုးသက်ရောက်မှုများက အလွန် ထူးခြားဆန်းကြယ်လှပေသည်။

သို့သော် တစ်နာရီအတွင်း စားသုံးရမည် ဆိုခြင်းက အနည်းငယ် နှမြောစရာ ကောင်းလေသည်။

ကျိုးဟန် ၏ လက်ရှိ အဆင့်မှာ ၅၉ ဖြစ်ပြီး ဤ ဝိညာဉ်သစ်သီး ကို စားသုံးလိုက်ပါက ၆၁ သို့ ရောက်ရှိသွားမည် ဖြစ်ရာ အနည်းငယ် နစ်နာသလို ခံစားရလေသည်။

သို့သော် မတတ်နိုင်ပေ။ [ခရမ်းရွှေရောင် ဗောဓိသီး] ရင့်မှည့်ချိန်နှင့် တိုက်ဆိုင်နေသဖြင့် ဤအချိန်ကို ပြောင်းလဲ၍ မရနိုင်ချေ။

"ကုံးလျို့... မင်း တော်တယ်"

ကျိုးဟန် သည် စာပြန်လိုက်ပြီး သူ၏ လုပ်ဆောင်ချက်ကို အသိအမှတ်ပြုကြောင်း ဖော်ပြလိုက်လေသည်။

"ဒါက ကျွန်တော် လုပ်သင့်တဲ့ အလုပ်ပါ... ဒီလို ပစ္စည်းမျိုးက ဂိုဏ်းချုပ် သုံးမှပဲ အကျိုးသက်ရောက်မှု အပြည့်အဝ ရရှိနိုင်မှာလေ"

"ကျွန်တော်သာ သုံးလိုက်ရင် သဘာဝ ရတနာ တွေကို ဖြုန်းတီးပစ်သလို ဖြစ်သွားမှာပေါ့"

ကုံးလျို့ က အလျင်အမြန် ပြောလိုက်လေသည်။

ဤကိစ္စကို သူ သဘာဝကျကျပင် စဉ်းစားပြီး ဖြစ်လေသည်။

သူ၏ လက်ရှိ အဆင့်မှာ အလွန် နိမ့်ကျနေသေးပြီး [ခရမ်းရွှေရောင် ဗောဓိသီး] ကို သိုလှောင်ထားနိုင်သည့် အချိန်မှာလည်း အလွန် တိုတောင်းလှပေသည်။

ထို့ကြောင့် သူသည် ကျိုးဟန် ထံသို့ ချက်ချင်းပင် ဆက်သလိုက်ခြင်း ဖြစ်သည်။

ထိုသို့ ပြုလုပ်ခြင်းဖြင့် ဂိုဏ်းချုပ် ၏ အသိအမှတ်ပြုမှုကို ရရှိနိုင်ရုံသာမက ကြီးမားသော ဆုလာဘ်များပါ ရရှိနိုင်သဖြင့် နှစ်ဦးနှစ်ဖက် အကျိုးရှိသော ကိစ္စကို မည်သူက မရွေးချယ်ဘဲ နေမည်နည်း။

'ကြည့်ရတာ ဂိုဏ်း အဖွဲ့ဝင်တွေရဲ့ စွမ်းအားကို မြှင့်တင်ပေးတဲ့ လမ်းကြောင်းက အမှန်ကန်ဆုံးပဲ... နောက်ပိုင်းလည်း ဒီအတိုင်း ဆက်လုပ်သွားရမယ်'

ကျိုးဟန် ရင်ထဲတွင် တွေးလိုက်မိလေသည်။

ဤကဲ့သို့ ရင်းနှီးမြှုပ်နှံမှုမှာ လုံးဝ မရှုံးပေ။ အသုံးမဝင်သော အရင်းအမြစ်များကို ခွဲဝေပေးလိုက်ခြင်းဖြင့် ပိုမို ကြီးမားသော အကျိုးအမြတ်များကို ပြန်လည် ရရှိလာနိုင်လေသည်။

မည်သို့ပင်ဆိုစေ လူတစ်ယောက်၏ ခွန်အားမှာ ကန့်သတ်ချက် ရှိပြီး နောင်တွင် ပစ္စည်းများ ရှာဖွေခြင်း၊ သတင်းအချက်အလက် စုံစမ်းခြင်း၊ ထောက်ပံ့ရေး ပစ္စည်းများ စုဆောင်းခြင်း စသည့် ကိစ္စရပ်များကို ဂိုဏ်း အဖွဲ့ဝင်များကို တာဝန်ပေး လုပ်ဆောင်စေနိုင်သဖြင့် အချိန်များစွာ သက်သာစေပြီး ပိုမို အရေးကြီးသော ကိစ္စရပ်များကို လုပ်ဆောင်နိုင်မည် ဖြစ်သည်။ ထို့အပြင် လူအင်အား များပြားသဖြင့် လုပ်ငန်းခွင် တွင်လည်း ပိုမို မြန်ဆန်ပေလိမ့်မည်။

"ဒီမှာ ဧကရာဇ်အဆင့် မှော်လက်နက် တွေချည်းပဲ... မင်း ကြိုက်တာ တစ်ခု ရွေးလိုက်"

ကျိုးဟန် သည် ယခုရရှိလာသော ဧကရာဇ်အဆင့် မှော်လက်နက် များကို ကုံးလျို့ အား တိုက်ရိုက် ပြသလိုက်လေသည်။

အဖွဲ့ဝင်များတွင် ဤကဲ့သို့သော အသိစိတ်မျိုး ရှိနေခြင်းကို ကျိုးဟန် သဘာဝကျကျပင် အလွန် သဘောကျပြီး ဤကဲ့သို့ လုပ်ဆောင်မှုမျိုးကို ဆုချီးမြှင့်သင့်ပေသည်။ ထိုသို့မဟုတ်ပါက အားလုံး၏ စိတ်အားထက်သန်မှုကို ထိခိုက်သွားစေနိုင်ပေသည်။

"လခွမ်း... ဒီလောက်များတဲ့... ဧကရာဇ်အဆင့် မှော်လက်နက် တွေ"

"ဂိုဏ်းချုပ်... မင်းက တကယ်ကို ကြမ်းတာပဲ"

တောက်ပနေသော မှော်လက်နက် များက ကုံးလျို့ ကို မျက်စိကျိန်းသွားစေလေသည်။

လူအများစုမှာ ဧကရာဇ်အဆင့် မှော်လက်နက် ဆိုသည်မှာ ထားလိုက်ပါဦး... ဘုရင်အဆင့် မှော်လက်နက် ပင် မရှိကြချေ။ သို့သော် ဂိုဏ်းချုပ် ထံတွင်မူ အမြောက်အမြား ရှိနေသဖြင့် လူတစ်ယောက်နှင့် တစ်ယောက် ကွာခြားချက်မှာ အလွန် ကြီးမားလှပေသည်။

ကုံးလျို့ သည် အချိန်ဆွဲမနေဘဲ သူ ကြိုက်နှစ်သက်သော ပစ္စည်းကို လျင်မြန်စွာ ရွေးချယ်လိုက်လေသည်။

"ဂိုဏ်းချုပ်... ကျွန်တော့်မှာ တောင်းဆိုစရာ တစ်ခု ရှိတယ်"

"ဂိုဏ်း အဖွဲ့ဝင်တွေ အကုန်လုံး ရှိတဲ့ ဂရု ထဲမှာ ဒီ ဝိညာဉ်သစ်သီး ကို ဂိုဏ်းချုပ် ဆီ လွှဲပေးချင်လို့ပါ"

ကုံးလျို့ က ပြောလိုက်လေသည်။

"အင်း... မင်းရဲ့ အကြံအစည်ကို ပြောကြည့်လေ"

"အဲဒီလို လုပ်လိုက်ရင် အားလုံးအတွက် စံနမူနာ တစ်ခု ဖြစ်သွားမယ်လို့ ထင်လို့ပါ... စဉ်းစားကြည့်လေ... ဧကရာဇ်အဆင့် မှော်လက်နက် ကိုတောင် ဆုလာဘ် အဖြစ် ပေးတယ်ဆိုရင် ညီအစ်ကိုတွေ အကုန်လုံး ပိုပြီး ကြိုးစားချင်စိတ်တွေ ဖြစ်လာမှာ မဟုတ်ဘူးလား"

"အားလုံးရဲ့ စိတ်အားထက်သန်မှုကို လှုံ့ဆော်ပေးနိုင်ရင် ပိုပြီး ကြီးမားတဲ့ အကျိုးသက်ရောက်မှုတွေ ရလာနိုင်မယ်လေ"

ကုံးလျို့ က ရှင်းပြလိုက်လေသည်။

ဧကရာဇ်အဆင့် မှော်လက်နက် အကြောင်း သိသွားပါက အားလုံး မည်မျှ ရူးသွပ်သွားမည်ကို သူ တွေးကြည့်၍ ရနေလေသည်။

"အင်း... မင်း စဉ်းစားထားတာ တော်တော်လေး ပြည့်စုံတယ်"

"အဲဒီလိုဆိုရင် မင်းလည်း တော်တော်လေး နာမည်ကြီးသွားမှာပေါ့ ဟုတ်တယ်မလား"

ကျိုးဟန် ပြုံးလိုက်ပြီး ကုံးလျို့ ၏ အကြံအစည်ကို တိုက်ရိုက်ပင် ဖွင့်ဟလိုက်လေသည်။

လူငယ်တွေပဲ... ဘယ်သူက နာမည်မကြီးချင်ဘဲ နေပါ့မလဲ... နားလည်ပေးနိုင်ပါတယ်။