အခန်း ၂၆၅

အခန်း ၂၆၅ ကျိုးဟန်၏ ခြေရာကို စုံစမ်းခြင်း

သူတို့အားလုံးသည် သက်ဆိုင်ရာ နယ်မြေအသီးသီးမှ အစွမ်းအထက်ဆုံးသူများ ဖြစ်ကြသည်။ မွေးရာပါ စွမ်းရည် ကောင်းမွန်သူများ ရှိသလို အစွမ်းထက် ဝတ်စုံ များကို ပိုင်ဆိုင်ထားသူများလည်း ရှိကြသည်။

အားလုံးက ထူးခြားသော ကံကြမ္မာများနှင့် ဆုံတွေ့ခဲ့ဖူးကြပြီး သူတို့၏ လက်ထဲတွင် ဧကရာဇ်အဆင့် မှော်လက်နက် များ သာမက နတ်ဘုရားအဆင့် အရည်အသွေး ရှိသော ပစ္စည်းများကိုပါ ပိုင်ဆိုင်ထားကြသည်။

ထို့ကြောင့်ပင် သူတို့၌ ဤမျှ ကြီးမားသော ယုံကြည်မှုနှင့် မောက်မာမှုများ ရှိနေခြင်းသည် အလွန် ပုံမှန်ပင် ဖြစ်သည်။ မျက်နှာချင်းဆိုင် မတိုက်ခိုက်ဖူးသရွေ့ တစ်ဖက်လူ၏ တိုက်ခိုက်ရေးစွမ်းအား မည်မျှရှိသည်ကို မည်သူကမျှ သိနိုင်မည် မဟုတ်ချေ။

သူတို့ထံတွင် ကျိုးဟန် ကဲ့သို့ အဆင့်မြှင့်တင် ထားသော အကဲဖြတ်ခြင်း စွမ်းရည် မျိုး မရှိကြချေ။

ထို့ကြောင့် အခြား ကစားသမား များ၏ တိကျသော အခြေခံစွမ်းရည် များကို မြင်တွေ့နိုင်ခြင်း မရှိဘဲ တစ်ဖက်လူ၏ အရှိန်အဝါနှင့် ဝတ်စုံ များမှ ထွက်ပေါ်နေသော အလင်းရောင်ကို ကြည့်၍သာ စွမ်းအားများကို ခန့်မှန်း နှိုင်းယှဉ်နိုင်ကြလေသည်။

စနစ် ၏ ကြေညာချက် ထွက်ပေါ်လာပြီး သုံးမိနစ် အကြာတွင် လျှို့ဝှက်နယ်မြေ ရမှတ် အဆင့်သတ်မှတ်ချက် စာရင်း သည် တရားဝင် ပွင့်လှစ်သွားခဲ့ပြီ ဖြစ်ပြီး အဖွဲ့တစ်ဖွဲ့ချင်းစီ၏ အဆင့်သတ်မှတ်ချက်များကို ရှင်းလင်းစွာ မြင်တွေ့နိုင်လေသည်။

"အဲဒီ စီနီယာ က ကျိုးဟန် ပဲ ဖြစ်ရမယ်"

ဗုဒ္ဓဘာသာဝင် ဟာလာတဲ သည် အမောတကောဖြင့် ရင်တထိတ်ထိတ် ဖြစ်ကာ တီးတိုးရေရွတ်လိုက်လေသည်။

ကျိုးဟန် ထံမှ ခွင့်ပြုချက် ရရှိပြီးနောက် သူသည် တစ်ဖက်လူ စိတ်ပြောင်းသွားပြီး သူ၏ အသက်ကလေး ဤနေရာတွင် လမ်းဆုံးသွားမည်ကို ကြောက်ရွံ့ကာ ခြေမကိုင်မိ လက်မကိုင်မိဖြင့် နောက်လှည့်မကြည့်ဘဲ အမြန် ထွက်ပြေးလာခဲ့ခြင်း ဖြစ်သည်။

ယခုအချိန်တွင် သူသည် အလွန် သနားစရာ ကောင်းနေပြီး ကိုယ်ပေါ်ရှိ သင်္ကန်းမှာလည်း ညစ်ပတ်ပေရေနေကာ ဗုဒ္ဓဘာသာဝင် တစ်ယောက်၏ သန့်စင်မှုမျိုး အနည်းငယ်မျှပင် မရှိတော့ချေ။

သို့သော် အသက်ရှင်ရန်အတွက် ဂုဏ်သိက္ခာ ဆိုသည်မှာ မည်သည့် အသုံးမှ မဝင်ပေ။

'ကံကောင်းလို့ ငါ အခြေအနေကို ကြည့်ပြီး ကျိုးဟန် ကို မတိုက်ခိုက်လိုက်မိတာ မဟုတ်ရင်တော့...'

ဟာလာတဲ သည် တွေးကြည့်ရုံဖြင့်ပင် ကျောချမ်းသွားလေသည်။

ကျိုးဟန် နှင့် မဆုံတွေ့ရခင် အချိန်က သူသည် ကောင်းကင်အောက်တွင် သူ့ကိုယ်သူ အတော်ဆုံးဟု ထင်မှတ်ကာ အလွန် မောက်မာဝင့်ကြွား နေခဲ့သူ ဖြစ်သည်။

ဗုဒ္ဓ ၏ အမွေအနှစ်များကို ရရှိထားသဖြင့် တိုက်ခိုက်ရေးစွမ်းအားများ တဟုန်ထိုး တက်လာခဲ့ပြီး သူ၏ နယ်မြေအတွင်းတွင် စကားတစ်ခွန်းဖြင့် အာဏာပြနိုင်ခဲ့ရာ သဘာဝကျကျပင် အလွန် မောက်မာနေခဲ့ခြင်း ဖြစ်သည်။

သို့သော် လက်တွေ့ဘဝက သူ့ကို ရေအေးဖြင့် ပက်ဖျန်းလိုက်သကဲ့သို့ ဖြစ်သွားစေသည်။ ကိုယ်တိုင် တွေ့ကြုံလိုက်ရမှသာ ကျိုးဟန် ၏ ရှေ့တွင် သူသည် ပုရွက်ဆိတ် တစ်ကောင်သာ ဖြစ်ပြီး တစ်ဖက်လူ အနေဖြင့် သူ့ကို အလွယ်တကူ နင်းခြေ သတ်ဖြတ်နိုင်ကာ ပြန်လည် ခုခံနိုင်စွမ်း အနည်းငယ်မျှပင် မရှိကြောင်း သိရှိသွားခဲ့လေသည်။

ယခုအချိန်တွင်မူ ကျိုးဟန် သည် အစွမ်းထက် ကစားသမား များစွာ၏ ပစ်မှတ်ထားခြင်းကို ခံနေရကြောင်း အနည်းငယ်မျှပင် မသိရှိသေးပေ။

ထိပ်ဆုံးသို့ ရောက်နေသူသည် အမြဲတမ်း ပစ်မှတ်ထားခံရလေ့ ရှိပြီး ပထမနေရာ တွင် ရှိနေသူ အနေဖြင့် သဘာဝကျကျပင် ပစ်မှတ်ကြီးမားကာ အခြားသူများ၏ အာရုံစိုက်မှုကို အလွယ်တကူ ရရှိနိုင်လေသည်။

သို့သော် ကျိုးဟန် သိရှိသွားခဲ့လျှင်တောင် သူ၏ ရင်ထဲတွင် တုန်လှုပ်သွားမည် မဟုတ်ချေ။

အဆင့်သတ်မှတ်ချက် စာရင်း ကို ဖွင့်လှစ်ရဲသည် ဆိုကတည်းက သူ လုံးဝ မကြောက်ရွံ့၍ ပင်ဖြစ်သည်။ လူအများ ဝိုင်းဝန်း တိုက်ခိုက်လာမည် ဆိုလျှင်တောင် အနည်းငယ်မျှ ကြောက်ရွံ့နေမည် မဟုတ်ပေ။

စနစ် ၏ သတိပေးချက်ကို ကြားလိုက်ရပြီးနောက် ကျိုးဟန် သည် အခြေအနေ မျက်နှာပြင် ကို လျင်မြန်စွာ ဖွင့်လိုက်ပြီး လက်ရှိ အဆင့်သတ်မှတ်ချက် များကို ကြည့်ရှုလိုက်လေသည်။

[လျှို့ဝှက်နယ်မြေ ရမှတ် အဆင့်သတ်မှတ်ချက် စာရင်း]

[ငါးမိနစ်လျှင် တစ်ကြိမ် အသစ်ပြန်လည် ဖော်ပြပေးမည် ဖြစ်ပါသည်]

[၁... ကျိုးဟန်... နယ်မြေ ၆၆၆... ရမှတ် နှစ်ဆယ့်လေးသန်း]

[၂... ကျုံးချူးမေ့ဇီ... နယ်မြေ ၆၆၇... ရမှတ် ခြောက်သိန်းငါးသောင်း]

[၃... ကေယာ... နယ်မြေ ၆၆၅... ရမှတ် ငါးသိန်းလေးသောင်း]

[၄... ဟန်ချင်းရွှယ်... နယ်မြေ ၆၆၆... ရမှတ် လေးသိန်းသုံးသောင်း]

[၅... ဒန်နီရယ် ဝှိုက်... နယ်မြေ ၆၉၉... ရမှတ် သုံးသိန်းနှစ်သောင်း]

[၆... ကျောက်ရီထျန်း... နယ်မြေ ၇၀၀... ရမှတ် နှစ်သိန်းတစ်သောင်း]

[၇... ဟာလာတဲ... နယ်မြေ ၆၀၄... ရမှတ် နှစ်သိန်းတစ်သောင်း]

[၈... ချွမ်ကျိလုံ... နယ်မြေ ၆၀၃... ရမှတ် နှစ်သိန်းတစ်သောင်း]

[၉... ကက်သရင်း အယ်လီဇဘက်... နယ်မြေ ၆၈၈... ရမှတ် နှစ်သိန်းတစ်သောင်း]

[၁၀... ကုံးလျို့... နယ်မြေ ၆၆၆... ရမှတ် နှစ်သိန်းတစ်သောင်း]

[...]

[၁၆... အိုးဟွမ်... နယ်မြေ ၆၆၆... ရမှတ် တစ်သိန်းငါးသောင်း]

[၁၇... ဗင်းဆင့် အာဂူစတန်... နယ်မြေ ၆၂၃... ရမှတ် တစ်သိန်းလေးသောင်း]

[၁၈... မေအောက်ရွှယ်... နယ်မြေ ၆၆၆... ရမှတ် တစ်သိန်းသုံးသောင်း]

"ဒုတိယ နေရာက ရမှတ် ခြောက်သိန်းငါးသောင်းပဲ ရှိတာလား"

"ဒါ တကယ်ကြီးလား"

လျှို့ဝှက်နယ်မြေ ရမှတ် ပိုင်းတွင် သူ့ကို မည်သူကမျှ ကျော်တက်နိုင်မည် မဟုတ်ကြောင်း ကျိုးဟန် သေချာပေါက် သိထားလေသည်။ ထိုသို့မဟုတ်ပါက စနစ် အနေဖြင့် သူ့ကို အဆင့်သတ်မှတ်ချက် စာရင်း ဖွင့်လှစ်ခိုင်းမည် မဟုတ်ချေ။

သို့သော် ဒုတိယ နေရာရှိ ကစားသမား ၏ ရမှတ်က ဤမျှအထိ နည်းပါးနေလိမ့်မည်ဟု လုံးဝ ထင်မှတ်မထားခဲ့ချေ။ တစ်သန်းပင် မပြည့်ဘဲ စိတ်ကူးယဉ်နိုင်စွမ်းထက် ပိုမို နည်းပါးနေသဖြင့် ကျိုးဟန် ပင် အနည်းငယ် ကြောင်အမ်းအမ်း ဖြစ်သွားရလေသည်။

"ဟူး ပြိုင်ဘက်ကင်း ဖြစ်ရတာ ဘယ်လောက်တောင် အထီးကျန်ဆန်လိုက်လဲကွာ"

ကျိုးဟန် သည် အနည်းငယ် ဂုဏ်ယူဝင့်ကြွားစွာဖြင့် သက်ပြင်းချကာ ပြောလိုက်လေသည်။

အဆင့်သတ်မှတ်ချက် စာရင်း ကို ခေတ္တမျှ ကြည့်ရှုပြီးနောက် ဒုတိယ နေရာမှ ပဉ္စမ နေရာအထိ ရမှတ် ကွာဟချက်များမှာ အတော်လေး ကြီးမားသော်လည်း ဆဋ္ဌမ နေရာမှ စတင်၍ ကွာဟချက်များမှာ အလွန် သေးငယ်သွားကြောင်း တွေ့လိုက်ရသည်။

ဤသည်မှာ ထိပ်ဆုံး ငါးယောက်၏ စွမ်းအားက အခြားသူများထက် တစ်ဆင့် မြင့်မားနေပြီး နောက်ကလူများ၏ စွမ်းအားမှာမူ သိပ်မကွာခြားကြောင်း ပြသနေခြင်း ပင်ဖြစ်သည်။

နယ်မြေ တစ်ခု၏ အကြီးအကဲများ ဖြစ်ကြသော်လည်း စွမ်းအား ကွာဟချက်မှာ ကောင်းကင်နှင့် မြေကြီးကဲ့သို့ ကွာခြားနိုင်ပေသည်။

အရင်က သတ်ဖြတ်ခဲ့သော အာဖရိက ခေါင်းဆောင် ကာလမ် ကိုပဲ ကြည့်လိုက်ပါ။ နတ်ဘုရားအဆင့် မှော်လက်နက် ဖြစ်သော [ဖီးနစ် ဒိုင်းလွှား] မှလွဲ၍ သူ၏ ကိုယ်ပေါ်ရှိ အခြား ဝတ်စုံ များမှာ အလွန် သာမန်သာ ဖြစ်လေသည်။ အလွန် ဆင်းရဲသည်ဟုပင် ပြော၍ ရနိုင်ပေသည်။

သူသည် ရှားပါးသော ကံကြမ္မာ တစ်ခုကြောင့်သာ စွမ်းအားများ မြင့်တက်လာခဲ့ခြင်း ဖြစ်သော်လည်း မွေးရာပါ စွမ်းရည် က သာမန်သာ ဖြစ်သဖြင့် တိုက်ခိုက်ရေးစွမ်းအား မှာ မမြင့်မားဘဲ သာမန် အစွမ်းထက်သူ တစ်ယောက် အဖြစ်သာ သတ်မှတ်၍ ရနိုင်လေသည်။

မိမိ၏ နယ်မြေအတွင်းရှိ အသုံးမကျသူများ ကြားထဲတွင်သာ ဘုရင်တစ်ပါးလို ကြီးစိုးနိုင်သော်လည်း နယ်မြေများစွာ ပူးပေါင်း ယှဉ်ပြိုင်ရသည့် တိုက်ပွဲတွင်မူ ကာလမ် ကဲ့သို့သော လူမျိုးက ယှဉ်ပြိုင်နိုင်စွမ်း ကင်းမဲ့သွားလေတော့သည်။

"ထိပ်ဆုံး အယောက်နှစ်ဆယ် ထဲမှာ ငါတို့ ဂိုဏ်း က အဖွဲ့ငါးဖွဲ့တောင် ပါနေတာပဲ ဒါက သတင်းကောင်းပဲ"

"ဒါက အစပဲ ရှိသေးတယ် အချိန်နည်းနည်း ကြာလာရင် ထိပ်ဆုံး နှစ်ဆယ် စာရင်းထဲမှာ ငါတို့ အဖွဲ့တွေ ပိုပြီး နေရာယူလာနိုင်မယ် ဆိုတာ ယုံကြည်တယ်"

ကျိုးဟန် သည် ယုံကြည်မှု အပြည့်ဖြင့် ပျော်ရွှင်စွာ ရေရွတ်လိုက်လေသည်။

အဘယ်ကြောင့်ဆိုသော် ကျိုးဟန် အနေဖြင့် သူတို့ကို ဘုရင်အဆင့် ဝတ်စုံ များ ချီးမြှင့်ထားခဲ့သည့် အချိန်မှာ အလွန် တိုတောင်းသေးသဖြင့် အကျိုးသက်ရောက်မှု အပြည့်အဝ ထွက်ပေါ်လာရန်အတွက် အချိန်အနည်းငယ် လိုအပ်သေးသောကြောင့် ပင်ဖြစ်သည်။

လျှို့ဝှက်နယ်မြေ ရမှတ် နှင့် စွမ်းအားတို့သည် လုံးလုံးလျားလျား ဆက်စပ်နေခြင်း မရှိသော်လည်း အတိုင်းအတာ တစ်ခုအထိတော့ သက်ဆိုင်မှု ရှိနေလေသည်။ လျှို့ဝှက်နယ်မြေ ရမှတ် များသူတိုင်း စွမ်းအားကြီးချင်မှ ကြီးမည် ဖြစ်သော်လည်း စွမ်းအားကြီးသူများ၏ လျှို့ဝှက်နယ်မြေ ရမှတ် မှာမူ သေချာပေါက် နည်းပါးနေမည် မဟုတ်ချေ။

ဂိုဏ်း တွင် လူ နှစ်ထောင် ရှိပြီး အဖွဲ့ဆယ်ဖွဲ့ ခွဲထားလေသည်။ ကျိုးဟန် ၏ ရည်မှန်းချက်မှာ အဖွဲ့ ဆယ်ဖွဲ့လုံး ထိပ်ဆုံး နှစ်ဆယ် စာရင်းဝင်ရန် ပင်ဖြစ်သည်။ ထိုသို့ဖြစ်လာပါက ဂိုဏ်း ၏ ပျမ်းမျှ ရမှတ် မှာ ပထမ နေရာသို့ ရောက်ရှိရန် အလွန် လွယ်ကူသွားမည် ဖြစ်သည်။

လျှို့ဝှက်နယ်မြေ ရမှတ် အဆင့်သတ်မှတ်ချက် စာရင်း ကို ထုတ်ပြန်လိုက်သည်နှင့် တစ်ပြိုင်နက် ကစားသမား များစွာသည် လက်ရှိ အဆင့်သတ်မှတ်ချက် များကို မြင်တွေ့သွားကြပြီး အထူးသဖြင့် ကျိုးဟန် ၏ ကြောက်မက်ဖွယ်ကောင်းသော ရမှတ်များကို မြင်လိုက်ရချိန်တွင် မယုံနိုင်လောက်အောင်ပင် ဖြစ်သွားကြလေသည်။

"ဘာ ရမှတ် နှစ်ဆယ့်လေးသန်းကျော်တောင်လား ဒုတိယ နေရာက လူထက် အဆလေးဆယ်တောင် များနေတာ စနစ် များ မှားယွင်းနေတာလား"

"လခွမ်း ဒီ ကျိုးဟန် က အရမ်းကို လွန်လွန်းနေပြီ ဒီ အဆင့်သတ်မှတ်ချက် စာရင်း ကို သူက ဖွင့်လိုက်တာဆိုတော့ တကယ်ပဲ အဲဒီလောက် အရည်အချင်း ရှိနေတာကိုး"

"သေနာလေး သူက သေချာပေါက် လျှို့ဝှက်ဆော့ဝဲလ်တွေ သုံးထားတာပဲ ဒီလောက် အစွမ်းထက်နိုင်ပါ့မလား ငါကတော့ မယုံဘူး ငါ ချွမ်ကျိလုံ ကသာ အစွမ်းအထက်ဆုံးပဲ"

"မင်းတို့ သတိမထားမိကြဘူးလား ဒီ နယ်မြေ ၆၆၆ က ရိုးရှင်းတဲ့ ပုံမပေါ်ဘူး ထိပ်ဆုံး အယောက်နှစ်ဆယ် ထဲမှာ ငါးယောက်တောင် ပါနေတာ တော်တော်လေး စိတ်ဝင်စားဖို့ ကောင်းတယ်"

"သူတို့က ရမှတ်တွေ အလွယ်တကူ ရနိုင်မယ့် လျှို့ဝှက်ချက် တစ်ခုခုကို ရှာတွေ့ထားတာ သေချာတယ် မဟုတ်ရင် ဘယ်လိုလုပ် ဒီလောက် အစွမ်းထက်နေမှာလဲ ဒီတစ်ခါ ယှဉ်ပြိုင်ရတာက နယ်မြေ တစ်ရာတောင် ရှိတာလေ ဘယ်သူမှလည်း အားနည်းတဲ့သူတွေ မဟုတ်ဘူး ပြိုင်ဆိုင်မှု ဘယ်လောက် ပြင်းထန်မလဲ ဆိုတာ တွေးကြည့်လို့ ရပါတယ်ကွာ"

"ရမှတ်တွေ မြင့်နေတော့ရော ဘာဖြစ်လဲ မီအောင် မလိုက်နိုင်ရင်လည်း သတ်ပစ်လိုက်ရုံပဲလေ"

ကျုံးချူးမေ့ဇီ က ဝင့်ကြွားစွာဖြင့် ပြောလိုက်လေသည်။

သူ၏ မျက်နှာပေါ်တွင် မည်သည့် လှုပ်ရှားမှုမျှ မရှိဘဲ အရေးမပါသော ကိစ္စသေးသေးလေး တစ်ခုကို ပြောနေသကဲ့သို့ အရာအားလုံးကို ထိန်းချုပ်ထားနိုင်သည့် ယုံကြည်မှုမျိုး ရှိနေလေသည်။

လက်ရှိ သူ၏ ရမှတ်များဖြင့် ကျိုးဟန် ကို ကျော်တက်ရန်မှာ လုံးဝ မဖြစ်နိုင်ကြောင်း သူ သိထားလေသည်။ ထို့ကြောင့် တစ်ခုတည်းသော နည်းလမ်းမှာ တစ်ဖက်လူကို သတ်ပစ်လိုက်ရန်သာ ဖြစ်သည်။ သေသွားပါက အဆင့်သတ်မှတ်ချက် စာရင်း မှ အလိုအလျောက် ပျောက်ကွယ်သွားမည် ဖြစ်ပြီး ပထမနေရာသည် သူ၏အပိုင် ဖြစ်လာမည်သာ ဖြစ်သည်။

ထို့ကြောင့် ယခုအချိန်တွင် သူသည် အလွန် တည်ငြိမ်နေပြီး ပုံမှန်အတိုင်း ဆက်လက် တိုးတက်အောင် လုပ်ဆောင်ကာ တတိယ နေရာနှင့် ကွာဟချက်ကို ဆက်လက် ထိန်းသိမ်းထားနိုင်ရုံဖြင့် လုံလောက်ပြီ ဖြစ်သည်။

"ယိုရှီ သခင်ကြီး ရဲ့ နည်းလမ်းက တကယ်ကို အကောင်းဆုံးပဲ"

"သခင်ကြီး ကျွန်တော် အခုပဲ ဂိုဏ်း က တခြား အဖွဲ့ဝင် တွေကို ကျိုးဟန် ရဲ့ ခြေရာကို စုံစမ်းခိုင်းလိုက်ပါ့မယ်"

ဂျပန် နောက်လိုက်များက အလျင်အမြန် ပြောလိုက်ကြလေသည်။

"စူးစမ်း ထောက်လှမ်းတာနဲ့ ကိုယ်ဖျောက်တာကို ကျွမ်းကျင်တဲ့ နင်ဂျာ တချို့ကို လွှတ်လိုက် အခြေအနေထူးရင် ငါ့ကို အချိန်မီ သတင်းပို့ကြ"

ကျုံးချူးမေ့ဇီ သည် ခေတ္တမျှ စဉ်းစားပြီးနောက် အမိန့်ပေးလိုက်လေသည်။

"ဟိုင်း ကျွန်တော် အခုပဲ ရှောင်ရှယ်ဝမ် နဲ့ တိုက်တူ တို့ နှစ်ယောက်ကို လွှတ်လိုက်ပါ့မယ် လုံးဝ အမှားအယွင်း မရှိစေရပါဘူး”