အခန်း ၂၆၈

အခန်း ၂၆၈ အိပ်မက်ဆိုး အမှတ်အသား

ကျိုးဟန်သည် အနက်ရောင် အရိပ်ကြီး၏ အခြေခံစွမ်းရည်များကို အကဲဖြတ်စစ်ဆေးပြီးသွားခဲ့ပြီ ဖြစ်သည်။ ၎င်း၏ တိုက်ခိုက်နိုင်စွမ်းမှာ အတော်လေး ကောင်းမွန်နေသဖြင့် ထိခိုက်မှု ရမှတ်များကို စုဆောင်းရန် အချိန်ကျလာပြီဖြစ်ရာ ကျိုးဟန်အနေဖြင့် ဤအခွင့်အရေးကို လက်လွတ်မခံလိုချေ။

ထို့နောက် တစ်ဖက်လူ၏ အခြေခံစွမ်းရည် အချက်အလက်များ အားလုံး ထွက်ပေါ်လာလေတော့သည်။

[ရေခဲငရဲ တစ္ဆေနတ်ဘုရား]

[လက်ရှိ တိုက်ခိုက်ရေးစွမ်းအား - ကြယ်ကိုးပွင့် ဧကရာဇ်အဆင့်]

[လက်နက် - အေးစက်သော ဒေါသ သွေးလက်သည်း (နတ်ဘုရားအဆင့်)]

[ဝတ်စုံ - ရေခဲပိတ်လှောင်မှု ချပ်ဝတ်တန်ဆာ (ဧကရာဇ်အဆင့်)]

[မှော်လက်နက် - ဝိညာဉ် ကျောက်တုံး (ဧကရာဇ်အဆင့်)]

[ကျွမ်းကျင်မှုစွမ်းရည် - အရိပ်အကြွင်းအကျန် ကောင်းကင်လွန် လက်သည်း... အသက်စွမ်းအင် စုပ်ယူခြင်း... ရေခဲခဲစေသော စွမ်းအား... အမှောင်ထု မျိုချခြင်း... သွေးတစ္ဆေ ဆွဲဆောင်ခြင်း]

[အခြေအနေ - တစ္ဆေအရိပ်]

"အို မဆိုးပါဘူး မင်းက တစ္ဆေနတ်ဘုရား တစ်ပါး ဖြစ်နေလိမ့်မယ်လို့ မထင်ထားဘူး"

ကြည့်ရှုပြီးနောက် ကျိုးဟန်က ပြုံးကာ ပြောလိုက်လေသည်။

"ဟားဟားဟား မင်း အခုမှ ကြောက်တတ်နေပြီလား နောက်ကျသွားပြီကွ"

ရေခဲငရဲ တစ္ဆေနတ်ဘုရား၏ မျက်နှာပေါ်တွင် ရက်စက်သော အပြုံးတစ်ခု ဖြတ်ပြေးသွားလေသည်။

"ဟေး မင်းက ဘာအကောင်မို့လို့ ကိုယ့်ကိုယ်ကိုယ် တစ္ဆေနတ်ဘုရား လို့ ခေါ်ရဲရတာလဲ ရယ်စရာပဲ"

"မင်း အရမ်းကောင်းတယ်"

"ငါ့ရှေ့မှာ ဒီလောက်တောင် မောက်မာရဲတဲ့ လူဆိုလို့ မင်းက ပထမဆုံးပဲ"

"မင်းကို သံစဉ်ကျကျနဲ့ သေသွားအောင် လုပ်ပေးမယ်"

ကျိုးဟန်၏ လှောင်ပြောင် သရော်လိုက်သော စကားများကြောင့် ရေခဲငရဲ တစ္ဆေနတ်ဘုရားမှာ ဒေါသထွက်လွန်း၍ပင် ရယ်မောလိုက်ပြီး ၎င်း၏ အေးစက်သော အသံကြီးက လူများကို ကျောချမ်းသွားစေလေသည်။

ကျိုးဟန်က မည်သည့်စကားမျှ ပြန်မပြောတော့ဘဲ ရန်စလိုသော အဓိပ္ပာယ် အပြည့်ဖြင့် လက်ညှိုးလေး တစ်ချက် ကွေးယမ်းပြလိုက်လေသည်။

"အား"

ရေခဲငရဲ တစ္ဆေနတ်ဘုရား၏ ဟိန်းဟောက်သံကြီးထဲတွင် အဆုံးအစမဲ့သော ဒေါသများ ပါဝင်နေလေသည်။ ၎င်း ချုပ်နှောင် မခံရမီ အချိန်က အရပ်မျက်နှာ အနှံ့အပြားတွင် ကြီးစိုးခဲ့သော ထိပ်သီး တစ်ပါး ဖြစ်ပြီး မည်သူမဆို ၎င်းကို မြင်တွေ့ရုံဖြင့် ကြောက်လန့်တကြား ထွက်ပြေးခဲ့ကြရသည် မဟုတ်ပါလား။

နှစ်ပေါင်းများစွာ ကြာမြင့်သွားခဲ့ပြီဖြစ်ရာ လောကကြီးက ၎င်း၏ ကြီးစိုး ဖိနှိပ်ခဲ့မှုများကို မေ့လျော့သွားကြပြီလော။

"အရိပ်အကြွင်းအကျန် ကောင်းကင်လွန် လက်သည်း အစစ်အမှန် မျှော်လင့်ချက် ကင်းမဲ့ခြင်း ဆိုတာကို ခံစားကြည့်လိုက်စမ်း"

ပိုမို၍ စကားများ မနေတော့ဘဲ ရေခဲငရဲ တစ္ဆေနတ်ဘုရား၏ ကြီးမားလှသော ကိုယ်ထည်ကြီးထဲမှ အနက်ရောင် စွမ်းအင် အချို့ ကွဲထွက်လာပြီး အေးစက် ကြောက်မက်ဖွယ်ကောင်းသော ဧရာမ လက်သည်းကြီး တစ်ခုအဖြစ် ပြောင်းလဲသွားလေသည်။

ထို ဧရာမ လက်သည်းကြီး ထွက်ပေါ်လာသည်နှင့် တစ်ပြိုင်နက် လေဟာနယ် တစ်ခုလုံး၏ အပူချိန်မှာ အလွန် လျင်မြန်စွာ ကျဆင်းသွားပြီး ရေခဲပွင့်များက အဆက်မပြတ် အခဲဖွဲ့လာကြလေသည်။

လေဟာနယ် တစ်ခုလုံးမှာ ရေခဲပိတ်လှောင် ခံလိုက်ရသည့်အလား ဖြစ်သွားပြီး ထိုအထဲရှိ လှုပ်ရှားမှုများ အားလုံးမှာ အလွန် နှေးကွေးလေးလံ သွားလေတော့သည်။

"အရမ်း အစွမ်းထက်တဲ့ ရေခဲခဲစေတဲ့ စွမ်းအားပဲ ငါ လုံးဝ လှုပ်လို့ မရတော့ဘူး"

"ဒါက ဘယ်လို အဆင့်မျိုး ရှိတဲ့ သိုင်းပညာရှင် လဲကွာ အရမ်း အစွမ်းထက်လွန်းတယ်"

"ဖိအားတွေက အရမ်းကို ပြင်းထန်လွန်းတယ် သူ့ရှေ့မှာဆို ငါတို့က ပုရွက်ဆိတ် လေးတွေလိုပဲ ခံစားရတယ်"

"ဒီ သွေးဝိညာဉ် ယဇ်ပလ္လင် ထဲမှာ ဒီလို ကြောက်စရာကောင်းတဲ့ သတ္တဝါကြီးကို ချုပ်နှောင်ထားလိမ့်မယ်လို့ မထင်ထားဘူး"

"အထူး ဖြစ်ရပ်ကို အသက်ဝင်သွားစေတာပဲ ဒါပေမဲ့ အဲဒါက ကံကြမ္မာကောင်း မဟုတ်ဘဲ ဘေးအန္တရာယ် ကြီးပဲကွ"

လူတိုင်းက ကြီးမားလေးလံသော ဖိအားများကို ခံစားနေရချိန်မှာပင် ထို ဧရာမ လက်သည်းကြီးသည် ကျိုးဟန်ကို လွှမ်းခြုံ ဖုံးအုပ်လိုက်လေပြီ။

လက်သည်းကြီး အပေါ်တွင် နက်ရှိုင်းသော အပြာရောင် ရေခဲပွင့်များ ကပ်ငြိနေပြီး ရေခဲခဲစေသော စွမ်းအားများက အလွန် ကြမ်းတမ်း ရိုင်းစိုင်းနေလေသည်။

"ကျိုးဟန် သတိထား"

ကက်သရင်းက အလျင်အမြန် အော်ဟစ်လိုက်လေသည်။ ဤကဲ့သို့သော ထူးဆန်းသည့် ရေခဲခဲစေသော စွမ်းအား အောက်တွင် ရှောင်တိမ်းရန်မှာ လုံးဝ မဖြစ်နိုင်သလောက်ပင် ဖြစ်ပြီး တိုက်ရိုက် ရင်ဆိုင်ရန်သာ ရှိတော့ကြောင်း သူမ သိထားလေသည်။

"ဝုန်း"

ကျယ်လောင်သော အသံကြီး တစ်ခု ထွက်ပေါ်လာလေသည်။

- ၁၂.၃၃ သန်း

- ၄.၆ သိန်း

- ၄.၅ သိန်း

+ ၅.၄ သန်း

- ၄.၃ သိန်း

- ၄.၅ သိန်း

...

[ပိုင်ရှင်သည် အရိပ်အကြွင်းအကျန် ကောင်းကင်လွန် လက်သည်း ၏ တိုက်ခိုက်မှုကို ခံလိုက်ရပြီး ထပ်ဆောင်း ဆုတ်ဖြဲ ထိခိုက်မှုများကိုပါ အသက်ဝင်သွားစေပါသည်]

[ပိုင်ရှင်၏ ခေတ်အဆက်ဆက် ဂုဏ်ကျက်သရေ ဝတ်စုံသည် အမြင့်ဆုံး သွေးပမာဏ ၏ ၆ ရာခိုင်နှုန်းကို အောင်မြင်စွာ ပြန်လည် ဖြည့်တင်းပေးလိုက်ပါသည်]

[ပိုင်ရှင်၏ ကြမ်းတမ်းသော ဝိညာဉ် ဓားအရိုး အပေါ်သို့ သက်ရောက်သော ထိခိုက်မှုပမာဏမှာ ၁၅ သန်းအထိ မြင့်တက်သွားပါသည်]

[ပိုင်ရှင်၏ ခေတ်အဆက်ဆက် ဂုဏ်ကျက်သရေ ဝတ်စုံသည် အထူးအာနိသင် ၃ ကို အသက်ဝင်စေလိုက်ပြီး ရေခဲငရဲ တစ္ဆေနတ်ဘုရား အပေါ်သို့ အိပ်မက်ဆိုး အမှတ်အသား ၂ ခုကို အောင်မြင်စွာ မှတ်သားလိုက်ပါသည်]

စနစ်၏ သတိပေးချက်များကို ကြားလိုက်ရချိန်တွင် ကျိုးဟန် စိတ်အေးသွားလေသည်။ ရေခဲငရဲ တစ္ဆေနတ်ဘုရားသည် နှစ်စက္ကန့် အချိန်အတွင်း ထိခိုက်မှုပမာဏ ၁၅ သန်းအထိ ပြုလုပ်နိုင်ခဲ့သည်။

ကျိုးဟန်မှာမူ ဝတ်စုံ အသစ်၏ အကူအညီဖြင့် သွေးပမာဏ ၁၀ သန်းကျော်ကို ပြန်လည် ဖြည့်တင်းနိုင်ခဲ့ရာ ထိခိုက်နစ်နာမှု အလွန် နည်းပါးလှပေသည်။

'အိပ်မက်ဆိုး အမှတ်အသား ဆိုတာ ဘာကြီးလဲ'

[ခေတ်အဆက်ဆက် ဂုဏ်ကျက်သရေ ဝတ်စုံ ၏ အထူးအာနိသင် ဖြစ်ပါသည် ပြိုင်ဘက်၏ ကိုယ်ပေါ်တွင် အိပ်မက်ဆိုး အမှတ်အသား များလေလေ ပိုင်ရှင်မှ ပြုလုပ်နိုင်သော ထိခိုက်မှုပမာဏ ကြီးမားလေလေ ဖြစ်ပါသည် တိကျသော အကျိုးသက်ရောက်မှုများကို ပိုင်ရှင် ကိုယ်တိုင် ဆက်လက် စူးစမ်းလေ့လာပါ]

'ဒီလို အကျိုးသက်ရောက်မှုမျိုး ရှိနေတာကို ငါ အရင်က ဘာလို့ သတိမထားမိခဲ့ပါလိမ့်'

ကျိုးဟန်သည် ချက်ချင်းပင် စိတ်ဝင်စားသွားလေသည်။ ဝတ်စုံ အသစ်ကို လဲလှယ်ပြီးနောက် သူသည် အပေါ်ယံမျှသာ ကြည့်ရှုခဲ့သဖြင့် တိကျသော အခြေခံစွမ်းရည်များကို သေချာ မသိရှိခဲ့ချေ။

ထိုအချက်ကို တွေးမိပြီးနောက် ဝတ်စုံ၏ အခြေခံစွမ်းရည်များကို စစ်ဆေးကြည့်ရှုလိုက်လေသည်။

[ခေတ်အဆက်ဆက် ဂုဏ်ကျက်သရေ (၁၀ ကြိမ်မြှင့်)]

[အရည်အသွေး - ကြယ်ငါးပွင့် ဧကရာဇ်အဆင့်]

[အမျိုးအစား - ဝတ်စုံအစုံလိုက်]

[အခြေခံစွမ်းရည် - သွေးပမာဏ ၂ သန်း တိုးလာမည် တိုက်ခိုက်မှု စွမ်းအား ၂ သိန်း ၈ သောင်း တိုးလာမည် ကာကွယ်မှု စွမ်းအား ၁ သိန်း ၂ သောင်း တိုးလာမည် လျင်မြန်မှု ၅၀ ရာခိုင်နှုန်း တိုးလာမည် အခြေခံစွမ်းရည် အားလုံး၏ ခုခံနိုင်စွမ်း ၃ ဆ တိုးလာမည်]

[အထူးအာနိသင် ၁ - ၆၀ ရာခိုင်နှုန်းသော ဖြစ်နိုင်ခြေဖြင့် ထိန်းချုပ်မှုများကို ခုခံကာကွယ်နိုင်ပြီး လက်ခံရရှိသော ထိခိုက်မှုများကို ကြီးမားစွာ လျှော့ချပေးကာ ပြင်းထန်သော ထိခိုက်မှု ဖြစ်ပေါ်နိုင်ခြေကို မြင့်တက်စေပါသည်]

[အထူးအာနိသင် ၂ - စက္ကန့်တိုင်းတွင် အမြင့်ဆုံး သွေးပမာဏ၏ ၆ ရာခိုင်နှုန်းကို ပြန်လည် ဖြည့်တင်းပေးမည် ဖြစ်ပါသည် သွေးပမာဏ ၅၀ ရာခိုင်နှုန်း အောက်သို့ ကျဆင်းသွားပါက စက္ကန့်တိုင်းတွင် အမြင့်ဆုံး သွေးပမာဏ၏ ၈ ရာခိုင်နှုန်းကို ပြန်လည် ဖြည့်တင်းပေးမည် ဖြစ်ပါသည် သွေးပမာဏ ၃၀ ရာခိုင်နှုန်း အောက်သို့ ကျဆင်းသွားပါက အမြင့်ဆုံး သွေးပမာဏ၏ ဆယ်ဆနှင့် ညီမျှသော အကာအကွယ် အလင်းလွှာ တစ်ခုကို အလိုအလျောက် ဖန်တီးပေးမည် ဖြစ်ပါသည်]

[အထူးအာနိသင် ၃ - ပြိုင်ဘက်မှ သင့်အပေါ်သို့ တိုက်ခိုက်မှု တစ်ကြိမ် ပြုလုပ်တိုင်း ထိုပြိုင်ဘက်၏ ကိုယ်ပေါ်တွင် အိပ်မက်ဆိုး အမှတ်အသား တစ်ခုကို အလိုအလျောက် မှတ်သားသွားမည် ဖြစ်ပါသည် သင်သည် အိပ်မက်ဆိုး အမှတ်အသား ရှိနေသော ပြိုင်ဘက်ကို ထပ်ဆောင်း ထိခိုက်မှုများ ပြုလုပ်နိုင်ပါသည် အိပ်မက်ဆိုး အမှတ်အသား တစ်ခုစီတိုင်းက ၂ ဆသော ထပ်ဆောင်း ထိခိုက်မှုများကို ဖြစ်ပေါ်စေပြီး အဆက်မပြတ် ထပ်မံ ပေါင်းစပ်နိုင်ပါသည် တိုက်ပွဲမှ ထွက်ခွာပြီး ငါးမိနစ် အကြာတွင် အိပ်မက်ဆိုး အမှတ်အသား များသည် အလိုအလျောက် ပျောက်ကွယ်သွားမည် ဖြစ်ပါသည်]

[ဖော်ပြချက် - ဓား၏ ဂုဏ်ကျက်သရေ ကို သင်ကိုယ်တိုင် စောင့်ရှောက်ပါ ကာကွယ်ရေး စွမ်းအား အလွန် ကောင်းမွန်သော ဝတ်စုံ ဖြစ်ပြီး ခုခံကာကွယ်ပြီးမှ ပြန်လည် တိုက်ခိုက်သည့် နည်းဗျူဟာအတွက် အထူး သင့်လျော်ပါသည်]

ဆက်စပ်နေသော အခြေခံစွမ်းရည် အချို့ကို ကျိုးဟန် အသေးစိတ် မကြည့်ရှုတော့ပေ။ မည်သို့ပင်ဆိုစေ ဝတ်စုံအစုံလိုက်များ၏ အခြေခံစွမ်းရည်များမှာ များသောအားဖြင့် ဆင်တူကြသည်သာ ဖြစ်လေသည်။

သူသည် သူ၏ အာရုံများကို အထူးအာနိသင်များအပေါ်သို့သာ တိုက်ရိုက် အာရုံစိုက်လိုက်လေသည်။

အထူးအာနိသင် ၁ တွင် ထိန်းချုပ်မှုများကို ခုခံကာကွယ်နိုင်သော အကျိုးသက်ရောက်မှု ပါဝင်နေသဖြင့် အလွန် လက်တွေ့ကျပြီး အသုံးဝင်လှပေသည်။ စွမ်းအားများ မြင့်တက်လာသည်နှင့်အမျှ ရင်ဆိုင်ရမည့် ပြိုင်ဘက်များမှာလည်း ပိုမို ခက်ခဲကြမ်းတမ်း လာမည်ဖြစ်ရာ ပြိုင်ဘက်များတွင် အစွမ်းထက်သော ထိန်းချုပ်ရေး စွမ်းရည်များ ရှိနေနိုင်သည်ကို လုံးဝ မေ့ထား၍ မရနိုင်ပေ။

ထို့ကြောင့် ဤကဲ့သို့သော အထူးအာနိသင်မျိုးက သေချာပေါက် အသုံးဝင်လာမည် ဖြစ်လေသည်။

အထူးအာနိသင် ၂ မှာ သွေးပြန်လည် ဖြည့်တင်းပေးသော အကျိုးသက်ရောက်မှု ဖြစ်ပြီး ယခင်က သူ အသုံးပြုခဲ့သော သန့်ရှင်းသော အလင်းတန်း ဝတ်စုံ ထက်ပင် များစွာ ပိုမို အစွမ်းထက်လှပေသည်။ စတင်ချိန်မှာပင် အမြင့်ဆုံး သွေးပမာဏ၏ ၆ ရာခိုင်နှုန်းကို ပြန်လည် ဖြည့်တင်းပေးနိုင်လေသည်။

သွေးပမာဏ ၅၀ ရာခိုင်နှုန်းနှင့် ၃၀ ရာခိုင်နှုန်း အောက်သို့ ကျဆင်းသွားချိန်တွင် အသက်ဝင်လာမည့် အကျိုးသက်ရောက်မှုများမှာလည်း ပိုမို၍ပင် ကြောက်မက်ဖွယ် ကောင်းလှပေသည်။

ကျိုးဟန် အလွန် ကျေနပ်သွားလေသည်။ ဤကဲ့သို့ဆိုပါက သူ၏ အသက်ရှင်သန်နိုင်စွမ်းမှာ များစွာ မြင့်တက်သွားပြီဖြစ်ရာ အလွန် သာယာလှပေသည်။

နောက်ဆုံးတွင် ကျိုးဟန်၏ အကြည့်များသည် အထူးအာနိသင် ၃ အပေါ်သို့ ကျရောက်သွားလေသည်။

"ဒါက အိပ်မက်ဆိုး အမှတ်အသား ပေါ့"

"တကယ်ကို အံ့မခန်းပဲ ဒါက ငါ့အတွက် သီးသန့် ဖန်တီးပေးထားသလိုပဲကွ"

ဖော်ပြချက်များကို ဖတ်ရှုပြီးနောက် ကျိုးဟန်၏ ရင်ထဲတွင် အလွန် စိတ်လှုပ်ရှားသွားလေသည်။

သူ အဆက်မပြတ် အရိုက်ခံနေရသရွေ့ ပြိုင်ဘက်၏ ကိုယ်ပေါ်ရှိ အိပ်မက်ဆိုး အမှတ်အသားများက အဆက်မပြတ် ထပ်မံ ပေါင်းစပ်နေမည် ဖြစ်သည်။

ထို အမှတ်အသားများ ပေါင်းစပ်မှုမှာ အလွန် ကြောက်မက်ဖွယ်ကောင်းသော ကိန်းဂဏန်း တစ်ခုသို့ ရောက်ရှိသွားချိန်တွင် သူက သာမန် တိုက်ခိုက်မှု တစ်ချက် ပြုလုပ်လိုက်ရုံဖြင့် ပြိုင်ဘက်ကို အလွယ်တကူ သတ်ဖြတ်နိုင်မည် ဖြစ်သည်။

ထိုမြင်ကွင်းကို တွေးကြည့်ရုံဖြင့်ပင် အလွန် ကျေနပ်စရာ ကောင်းလှပေသည်။

ယခုအချိန်တွင် ကျိုးဟန် အနေဖြင့် အရိုက်ခံရန် လိုအပ်နေပြီး လုံလောက်သော ထိခိုက်မှု ရမှတ်များကို စုဆောင်းနိုင်မှသာ သူ၏ ကြမ်းတမ်းသော ဝိညာဉ် ဓားအရိုး ကို အဆင့်မြှင့်တင် နိုင်မည် ဖြစ်လေသည်။

ထို့အပြင် ဤ ရေခဲငရဲ တစ္ဆေနတ်ဘုရားမှာ ကြယ်ကိုးပွင့် ဧကရာဇ်အဆင့် စွမ်းအားရှိပြီး နတ်ဘုရားအဆင့် သို့ ရောက်ရှိရန် ခြေတစ်လှမ်းသာ လိုတော့လေသည်။ ၎င်းကို အချိန်ကြာမြင့်စွာ အသက်ရှင် နေထိုင်လာခဲ့သော အစွမ်းထက်သူ တစ်ယောက်အဖြစ် သတ်မှတ်နိုင်ပြီး ၎င်း၏ ကိုယ်ပေါ်တွင် အစွမ်းထက်သော မှော်လက်နက်များ အများအပြား ရှိနေမည်မှာ သေချာလှပေသည်။

အကယ်၍ ပုံမှန်အတိုင်းသာ တိုက်ခိုက်မည် ဆိုပါက အချိန်အနည်းငယ် ဖြုန်းတီးရမည် ဖြစ်သည်။

ထို့ကြောင့် အိပ်မက်ဆိုး အမှတ်အသားများကို စုဆောင်းလိုက်ခြင်းက ပို၍ ကောင်းမွန်ပေလိမ့်မည်။ သတ်ဖြတ်ရန် အချိန်ကျလာသည်အထိ ထိခိုက်မှု ရမှတ်များကိုလည်း စုဆောင်းနိုင်မည်ဖြစ်ရာ တစ်ချက်ခုတ် နှစ်ချက်ပြတ် ပင်ဖြစ်သည်။

သေချာပေါက် ခေတ်အဆက်ဆက် ဂုဏ်ကျက်သရေ ၏ ဝတ်စုံ အကျိုးသက်ရောက်မှုမှာ တကယ်ပင် အလွန် အစွမ်းထက်လှသည်။ သို့သော် ၎င်းတွင် ကြိုတင် သတ်မှတ်ချက် တစ်ခု ရှိပြီး ကစားလွန်၍ မရနိုင်ခြင်း ပင်ဖြစ်သည်။

သာမန်လူ တစ်ယောက် အနေဖြင့် ကျိုးဟန် ကဲ့သို့သော ကာကွယ်မှု စွမ်းအားနှင့် အသက်ရှင်သန်နိုင်စွမ်းမျိုး မရှိပါက ဤကဲ့သို့ လုံးဝ ကစားရဲမည် မဟုတ်ချေ။

ထို့အပြင် ကျိုးဟန်သည် ပြိုင်ဘက်၏ အခြေခံစွမ်းရည်များကိုလည်း မြင်တွေ့ထားနိုင်သဖြင့် သူ၏ ရင်ထဲတွင် ကြိုတင် တွက်ဆထားမှုများ ရှိနေပြီး အနည်းငယ်မျှပင် စိုးရိမ်ပူပန်နေခြင်း မရှိပေ။

ခဏလေး အတွင်းမှာပင် သူ၏ သွေးပမာဏမှာ အပြည့်အဝ ပြန်လည် ပြည့်ဝသွားခဲ့လေပြီ။

"ဟေး သောက်ရူး တစ္ဆေနတ်ဘုရား မင်းက တကယ်ကို သောက်ရူးပဲကွ ထမင်းမစားထားဘူးလား ဒီလောက်လေးပဲ အားရှိတာလား"

ကျိုးဟန်က သူ၏ အင်္ကျီပေါ်ရှိ ဖုန်များကို ခါထုတ်လိုက်ရင်း လှောင်ပြောင် ပြောဆိုလိုက်လေသည်။