အခန်း ၁၂၄
Vol. 13 Ch. 124
အခန်း (၁၂၄) ရွှေအူတိုင်အဆင့် ပုဂ္ဂိုလ်ရောက်ရှိလာခြင်း၊ အခြေတည်ဝိညာဉ်အဆင့် တက် ဆေးလုံး
ယဲ့ကိုင်က ယဲ့ကျန်ထျန်း၏ မျက်နှာအမူအရာ အနည်းငယ် ပုံမှန်မဟုတ်သည်ကို သတိပြုမိပုံရသော်လည်း အလွန်အမင်း ဂရုမစိုက်ဘဲ မေးလိုက်သည်။ "ဒါက အနန္တကုန်စုံဆိုင်က ဝယ်လာတာလား"
"ဟုတ်ပါတယ်" ယဲ့ကျန်ထျန်းက ထုံထိုင်းစွာဖြင့် ခေါင်းညိတ်ပြလိုက်သည်။
"ကောင်းပြီ... ငါသိပြီ၊ ပြန်တော့၊ ကျင့်ကြံခြင်းကိုပဲ သေချာအာရုံစိုက်စမ်း၊ အဓိပ္ပာယ်မရှိတဲ့ ကိစ္စတွေကို လျှောက်ပြီး ပူပန်မနေနဲ့၊ ကျင့်ကြံခြင်းအဆင့်ကသာ အရေးအကြီးဆုံးပဲ၊ ရွှေအူတိုင်အဆင့်ကို အမြန်ဆုံး တက်လှမ်းနိုင်မယ့် အခွင့်အရေးကို ရှာဖွေပါ၊ အဆင့်တက်ဆေးလုံးအတွက်တော့ ငါပဲ နည်းလမ်းရှာပေးမယ်"
ယဲ့ကိုင်က ပြောပြီးနောက် လေထဲသို့ ထပ်မံဝဲပျံကာ ထွက်ခွာသွားတော့ရာ ယဲ့ကျန်ထျန်းတစ်ယောက်တည်း မြေပြင်ပေါ်၌ ကြောင်အမ်းအမ်းဖြင့် ကျန်ရစ်ခဲ့သည်။
သူ့စိတ်ထဲတွင် ယဲ့ကိုင်က သူ့ကို တစ်ခါမျှ အလေးအနက်မထားဘဲ အဖိုးမတန်သည့် သူ၏ အသုံးမကျသော သားဖြစ်သူကိုသာ ထူးထူးခြားခြား ပိုမိုဂရုစိုက်နေသည်ဟု ခံစားရသဖြင့် ရင်ထဲ၌ မချိတင်ကဲ ဖြစ်နေရသည်။
ယဲ့ကိုင်က ထွက်ခွာသွားပြီးနောက် ယဲ့မိသားစုအိမ်တော်မှ တိုက်ရိုက် ထွက်လာခဲ့သည်။ သူက နှစ်ရက်တိုင်တိုင် အချိန်ဖြုန်းကာ စောင့်ဆိုင်းစေခဲ့သော ဤအနန္တကုန်စုံဆိုင်က မည်သို့သော တည်ရှိမှုမျိုးလဲဆိုသည်ကို ကိုယ်တိုင်သွားရောက် စုံစမ်းချင်နေ၍ ဖြစ်သည်။
အနန္တကုန်စုံဆိုင်အတွင်း၌
ရှန်းဝမ်စန်းက ထုံးစံအတိုင်း ဝယ်သူအသစ်များကို စောင့်ဆိုင်းနေဆဲ ဖြစ်သည်။ သို့သော် ယခုအခါ အနန္တကုန်စုံဆိုင် တံခါးဝ၌ ယခင်ကကဲ့သို့ တန်းစီစောင့်ဆိုင်းနေသော လူအုပ်ကြီး မရှိတော့ဘဲ ရံဖန်ရံခါမှသာ ဝယ်သူတစ်ဦးစ၊ နှစ်ဦးစ ဆိုင်ထဲသို့ ဝင်ရောက်လာကြသည်။
ဝမ်နန်မြို့တစ်ခုလုံးက အနည်းငယ် ခြောက်ကပ်နေပြီး တိတ်ဆိတ်ငြိမ်သက်နေသော လမ်းမများပေါ်တွင် လမ်းသွားလမ်းလာများကိုပင် ခက်ခက်ခဲခဲ မြင်တွေ့နေရသည်။
ထိုအချိန်တွင် အဖိုးအို တစ်ဦးက အနန္တကုန်စုံဆိုင်ထဲသို့ လှမ်းဝင်လာခဲ့ရာ ထိုသူမှာ အခြေအနေလာရောက် စုံစမ်းသော ယဲ့ကိုင်ပင် ဖြစ်သည်။
ရှန်းဝမ်စန်းက ယဲ့ကိုင်ကို မသိရှိသဖြင့် သူ၏ လုပ်ရိုးလုပ်စဉ်အတိုင်း နှုတ်ဆက်လိုက်သည်။ "ကြိုဆိုပါတယ်... ဘာများ ကူညီပေးရမလဲမသိဘူး"
ယဲ့ကိုင်က စကားမပြောဘဲ ရှန်းဝမ်စန်းကို အကဲခတ်ကြည့်နေသည်။
ရှန်းဝမ်စန်းလည်း သတိပြုမိလိုက်သည်၊ ယဲ့ကိုင်က သူ၏ စိတ်ဝိညာဉ်အာရုံ ကို အသုံးပြုကာ သူ၏ ကျင့်ကြံခြင်းအဆင့်ကို စစ်ဆေးနေခြင်း ဖြစ်သည်။
ထို့ကြောင့် ရှန်းဝမ်စန်းကလည်း ရှောင်ဖယ်မနေတော့ဘဲ ယဲ့ကိုင်ကို ပြန်လည်စိုက်ကြည့်ရင်း စိတ်ဝိညာဉ်အာရုံဖြင့် ယဲ့ကိုင်၏ ကျင့်ကြံခြင်းအဆင့်ကို ပြန်လည် စစ်ဆေး လိုက်သည်။
ယဲ့ကိုင်က ရှန်းဝမ်စန်းကို ခေတ္တမျှ စစ်ဆေးပြီးနောက် ရှန်းဝမ်စန်း ပြသထားသော အုတ်မြစ်ချခြင်းအဆင့် အဆင့် ၇ ကိုသာ မြင်တွေ့နိုင်သည်။
ရွှေအူတိုင်အဆင့် ယဲ့ကိုင်ပင်လျှင် လျှို့ဝှက်ဆန်းကြယ်လှသော "ဒဏ္ဍာရီအဆင့် အသက်ရှုသံဖျောက် ကျင့်စဉ် " ဖြင့် ဖုံးကွယ်ထားသော ရှန်းဝမ်စန်း၏ တကယ့်ကျင့်ကြံမှုကို မခွဲခြားနိုင်ပေ။
ရွှေအူတိုင်အဆင့် ယဲ့ကိုင်ကို ထားလိုက်ဦး၊ ထိုစဉ်က အခြေတည်ဝိညာဉ်အဆင့်ရှိသော ချင်းစုန့်ယွမ်ပင်လျှင် ဤကျင့်စဉ် ကို အသုံးပြုထားသော ချန်ဖန်ကို မရိပ်မိခဲ့ပေ။
ထို့ကြောင့် ရှန်းဝမ်စန်းက သူ့ကိုယ်သူ အလွန်ယုံကြည်မှုရှိနေပြီး ယဲ့ကိုင်၏ စစ်ဆေး မှုကို စိုးရွံ့ခြင်း လုံးဝမရှိပေ။
သို့သော်လည်း ရှန်းဝမ်စန်းကိုယ်တိုင် ယဲ့ကိုင်၏ ကျင့်ကြံခြင်းကို စစ်ဆေးလိုက်သည့်အခါတွင်မူ စိတ်ထဲ၌ ဇဝေဇဝါ ဖြစ်သွားပြီး ရှေ့မှ အဖိုးအို၏ ကျင့်ကြံခြင်းအဆင့်ကို မည်သို့မျှ မမြင်နိုင်သဖြင့် ရင်ထဲ၌ ထိတ်လန့်သွားမိသည်။
'ဒါ... ဒါက ဘယ်သူလဲ'
ဝမ်နန်မြို့တစ်ခုလုံးတွင် သူ ကျင့်ကြံခြင်းအဆင့်ကို မခွဲခြားနိုင်လောက်သော ပုဂ္ဂိုလ်ဟူ၍ ထိုတစ်ယောက်တည်းသာ ရှိသည်။
ရှန်းဝမ်စန်းက မောက်မာခြင်းမရှိဘဲ မျက်နှာအမူအရာကို ပုံမှန်အတိုင်း ထိန်းထားကာ စိတ်ထဲမှနေ၍ ချန်ကျီ ထံသို့ တိုက်ရိုက် ဆက်သွယ်လိုက်သည်။
"သခင်... ယဲ့မိသားစုရဲ့ ရွှေအူတိုင်အဆင့် ပုဂ္ဂိုလ်ကြီး ရောက်လာပုံရတယ်"
"အင်း... ငါ အခုပဲ လာခဲ့မယ်"
တစ်ခဏအတွင်းမှာပင် ယဲ့ကိုင်နှင့် ရင်ဆိုင်နေသော ရှန်းဝမ်စန်း၏ ခန္ဓာကိုယ်ထဲသို့ ချန်ကျီ၏ စိတ်အာရုံက ရောက်ရှိ သွားခဲ့ပြီ ဖြစ်သည်။
"ကောင်းကင် မျက်စိ" ချန်ကျီက အသိစိတ်ကို ရှန်းဝမ်စန်း၏ ခန္ဓာကိုယ်ပေါ်သို့ ချမှတ်လိုက်ပြီးနောက် ပထမဦးဆုံး လုပ်ဆောင်လိုက်သည်မှာ ယဲ့ကိုင်၏ တကယ့် ကျင့်ကြံခြင်းအဆင့်ကို အရင်ဆုံး သိရှိရန် ဖြစ်သည်။
ယခင်က ယဲ့မိသားစုဝင်များကို ဝိညာဉ်ရှာဖွေခြင်းဖြင့် စုံစမ်းစဉ်က ယဲ့ကိုင်က ရွှေအူတိုင်အဆင့် ဖြစ်ကြောင်းသာ သိရှိခဲ့သော်လည်း အတိအကျ မည်သည့် အဆင့်သို့ ရောက်ရှိနေသည်ကိုမူ မသိရှိခဲ့ပေ။
ယခုကဲ့သို့ အခွင့်အရေးမျိုး ရောက်ရှိလာရာ သူက သေချာပေါက် လက်လွတ်ခံမည် မဟုတ်ပေ။
"ရွှေအူတိုင်အဆင့် အဆင့် ၈ လား... ရွှေအူတိုင်အဆင့်ရဲ့ နှောင်းပိုင်းအဆင့်အထိ ရောက်နေတာပဲ၊ ဒီလောက်တောင် မြင့်တဲ့ ကျင့်ကြံခြင်းအဆင့်လား... အမှတ် ကလည်း ၁၀၀၀ တောင် ကုန်သွားတယ်၊ ယဲ့ကျန်ထျန်းကို စစ်ဆေးတုန်းကထက် နှစ်ဆတိတိ ပိုများသွားတာပဲ" ချန်ကျီက ယဲ့ကိုင်၏ ကျင့်ကြံခြင်းကို စစ်ဆေးပြီးနောက် ရင်ထဲ၌ များစွာ အံ့ဩသွားမိသည်။
'အရင်က ယဲ့မိသားစုကို တကယ် အထင်သေးခဲ့မိတာပဲ၊ ယဲ့မိသားစုက ဝမ်နန်မြို့မှာ ဒီလောက်နှစ်ပေါင်းများစွာ ရပ်တည်နိုင်ပြီး သံနက်ရိုင်းမိုင်းတွင်းတစ်ခုကိုပါ တစ်ဦးတည်း ပိုင်ဆိုင်ထားနိုင်တာ၊ နောက်ပြီး ချင်းယွမ် ဂိုဏ်း ကိုပါ သိမ်းပိုက်ဖို့ ကြံစည်နေတာတွေက အကြောင်းမဲ့တော့ မဟုတ်ဘူးပဲ'
'ဒီယဲ့ကိုင်ရဲ့ အသက်အရွယ်အရဆိုရင် သူ့ရဲ့ ကျင့်ကြံခြင်း ပါရမီက လုံးဝမနိမ့်လှဘူး၊ သူ့ကို အချိန်အနည်းငယ် ထပ်ပေးမယ်ဆိုရင် ချင်းယွမ် ဂိုဏ်းကို သိမ်းပိုက်ဖို့က တကယ် ဖြစ်နိုင်ခြေ ရှိတယ်'
'ဘာပဲဖြစ်ဖြစ် ရွှေအူတိုင်အဆင့် အဆင့် ၈ ကနေ အခြေတည်ဝိညာဉ်အဆင့်ကို ရောက်ဖို့က လမ်းသိပ်မဝေးတော့ဘူး၊ ယဲ့ကိုင်ရဲ့ ပါရမီနဲ့ဆိုရင် အခြေတည်ဝိညာဉ်အဆင့်ကို တက်လှမ်းနိုင်ဖို့ မျှော်လင့်ချက် အများကြီး ရှိတယ်'
ယဲ့ကိုင်၏ ကျင့်ကြံခြင်းက ဤမျှအထိ မြင့်မားနေသည်ကို သိရှိသွားသော်လည်း ချန်ကျီက အလွန်အမင်း စိုးရိမ်မနေတော့ပေ။ အဆိုးဆုံးဖြစ်လာလျှင် ယခင်က ချမှတ်ထားသော အစီအစဉ်အားလုံးကို ဖျက်သိမ်းပြီး အသစ်ပြန်စရုံသာ ရှိသည်။
ချန်ကျီက ယဲ့ကိုင်၏ ကျင့်ကြံခြင်းကို စစ်ဆေးလိုက်သည်မှာ မျက်တောင်တစ်ခတ်အတွင်းသာ ဖြစ်ပြီး ယခုအခါ ယဲ့ကိုင်ကို စိုက်ကြည့်ရင်း ဘာမျှမဖြစ်ခဲ့သကဲ့သို့ နူးညံ့စွာ ပြုံးပြနေဆဲ ဖြစ်သည်။
ရှန်းဝမ်စန်းက သူ၏ ကျင့်ကြံခြင်းကို စစ်ဆေး လိုက်စဉ်က ယဲ့ကိုင်က သိရှိပြီးဖြစ်ရာ ရှန်းဝမ်စန်း၏ အံ့ဩတုန်လှုပ်သွားမည့် မျက်နှာအမူအရာကို စောင့်ကြည့်ရန် ပြင်ဆင်နေခဲ့သည်။
သို့သော်လည်း သူ ထင်မှတ်ထားသကဲ့သို့ ဖြစ်မလာခဲ့ပေ။
သူ့ရှေ့မှ ရှန်းဝမ်စန်းက သူ၏ ကျင့်ကြံခြင်းကို စစ်ဆေး ပြီးသည့်တိုင် ဘာမျှမဖြစ်ခဲ့သကဲ့သို့ တည်ငြိမ်နေဆဲ ဖြစ်သည်။
"မင်း ဘာမှ ထူးဆန်းတယ်လို့ မခံစားရဘူးလား" နောက်ဆုံးတွင် ယဲ့ကိုင်ကပင် အရင် စကားစပြောလိုက်ရသည်။
ချန်ကျီက တည်ငြိမ်စွာ ပြုံးလိုက်ပြီး "ဟားဟား... ဘာဆန်းလို့လဲ၊ ရွှေအူတိုင်အဆင့်ပဲဥစ္စာ၊ မမြင်ဖူးတာလည်း မဟုတ်ဘူး၊ ကြည့်ရတာ လူကြီးမင်းက ယဲ့မိသားစုရဲ့ ဘိုးဘေး ထင်တယ်"
ချန်ကျီက သူ၏ သရုပ်မှန် ကို ခန့်မှန်းနိုင်သည့်အပေါ် ယဲ့ကိုင်က အံ့ဩမနေဘဲ ခပ်ဖျော့ဖျော့ ရယ်မောကာ ပြောလိုက်သည်။ "မင်းက ဗဟုသုတ အတော်ရှိသားပဲ၊ ဒီလောက် ငယ်ငယ်ရွယ်ရွယ်နဲ့ ဒီလိုကျင့်ကြံခြင်းအဆင့် ရှိနေတာက ငါ ငယ်ငယ်တုန်းကထက်တောင် မနိမ့်ဘူး"
"ဒါ့အပြင် မင်းရဲ့ ဒီလို တည်ငြိမ်တဲ့ အရှိန်အဝါနဲ့ သတ္တိကို ကြည့်ရင် ပါရမီရှင်တစ်ယောက်လို့ ခေါ်ရင်တောင် လွန်မယ်မထင်ဘူး"
"ဒါပေမဲ့ မင်းက ဘာဖြစ်လို့ ဒီအနန္တကုန်စုံဆိုင်မှာ အဆင့်မရှိတဲ့ ဆိုင်ရှင်တစ်ဦးအဖြစ်နဲ့ပဲ တင်းတိမ်နေရတာလဲ... ဒါက တကယ်ကို ထူးဆန်းဖို့ကောင်းတယ်"
"ယဲ့မိသားစုဘိုးဘေးက မြှောက်ပြောလွန်းနေပါပြီ၊ ကျွန်တော့်လို ကျင့်ကြံခြင်းအဆင့်မျိုးက ကျွန်တော်တို့ အနန္တကုန်စုံဆိုင်မှာတော့ တကယ်ပဲ အဆင့်မရှိတဲ့ အဆင့်နိမ့် အဆင့်ပါပဲ"
"ဟားဟား... အနန္တကုန်စုံဆိုင်လား၊ ငါကပဲ ဗဟုသုတ နည်းပါးတာလား မသိဘူး၊ ဒီလောက် အသက်ကြီးတဲ့အထိ ဒီလိုဆိုင်မျိုး တစ်ခါမှ မကြားဖူးဘူး"
ချန်ကျီက ခပ်ဖွဖွ ပြုံးလိုက်ပြီး ယဲ့ကိုင်၏ စကားကို ပြန်လည်မချေပဘဲ သူ့ဘာသာသူ ခန့်မှန်းပါစေဟု ပစ်ထားလိုက်သည်။ ဆိုင်၏ နောက်ခံကို လာရောက်စုံစမ်းချင်လျှင်တော့ ရလိမ့်မည်မဟုတ်ပေ။
"လူကြီးမင်းက ကျွန်တော့်ရဲ့ အနန္တကုန်စုံဆိုင်ကို ရောက်လာတာကတော့ ဒီအတိုင်း စကားအနည်းငယ် လာ နောက်ပြောင်ဖို့ပဲတော့ မဟုတ်လောက်ဘူး ထင်တယ်"
ယဲ့ကိုင်က သူ စမ်းသပ်လိုသော စကားများကို တစ်ဖက်လူက လုံးဝ လွှဲရှောင်သွားသဖြင့် ဆက်လက် စမ်းသပ်ရန် ခက်ခဲသွားသည်။
သို့သော် ဤနည်းလမ်းက အဆင်မပြေလျှင် သူ့ထံ၌ အခြားနည်းလမ်းများ ရှိပါသေးသည်။
"ငါ ကြားမိသလောက်တော့ အနန္တကုန်စုံဆိုင်က ကမ္ဘာပေါ်က ဘယ်ပစ္စည်းကိုမဆို စိတ်ကြိုက် ရောင်းဝယ်နိုင်တယ်ဆိုတာပဲ၊ ဒါပေမဲ့ မင်းရဲ့ဆိုင်ထဲမှာတော့ ရွေးချယ်စရာ ပစ္စည်းအမယ် သိပ်မရှိလှဘူးပဲ"
ချန်ကျီက ရိပ်မိလိုက်သည်၊ ဤယဲ့ကိုင်က ရည်ရွယ်ချက်ရှိရှိ ပြဿနာလာရှာခြင်း ဖြစ်သည်။ ယခုအချိန်တွင် သူက မလောဘဲ ယဲ့ကိုင်နှင့် ဆက်လက် ကစားပေးရန် ဆုံးဖြတ်လိုက်သည်။ ဘာပဲဖြစ်ဖြစ် သူ့မှာ အချိန်တွေ အများကြီး ရှိနေပြီး ယဲ့ကိုင် ဘာလုပ်ချင်သည်ကို စောင့်ကြည့်ရုံသာ ရှိသည်။
"ဆိုင်ထဲမှာ ပြသထားတဲ့ ဒီပစ္စည်းအသေးအဖွဲတွေက လူကြီးမင်းရဲ့ မျက်စိထဲကို မဝင်တာ သဘာဝကျပါတယ်၊ ဒါပေမဲ့ လူကြီးမင်းမှာ ဝယ်ယူချင်တဲ့ ပစ္စည်းတစ်ခုခု ရှိမယ်ဆိုရင်တော့ ကျွန်တော့်ကို ပြောပြနိုင်ပါတယ်၊ လူကြီးမင်း စိတ်ကျေနပ်မှု ရစေရမယ်လို့ အာမခံပါတယ်"
"တကယ်ပဲ အရာအားလုံး ရှိတာလား" ယဲ့ကိုင်က ရည်ရွယ်ချက်ရှိရှိ စမ်းသပ်လိုက်ခြင်း ဖြစ်သည်။
နှစ်ရက်တိုင်တိုင် စောင့်ဆိုင်းခဲ့သော်လည်း ဘာမျှ အရေးပါသောအရာ မတွေ့ရှိခဲ့သဖြင့် သူ၏ စိတ်ထဲတွင် အနန္တကုန်စုံဆိုင်အပေါ် သံသယများစွာ ဝင်နေခဲ့သည်။
ချန်ကျီက ခေါင်းကို ဖြည်းညှင်းစွာ ညိတ်ပြလိုက်ပြီး ယဲ့ကိုင် မည်သည့် တောင်းဆိုချက်မျိုး ပြုလုပ်လာမည်ကို စောင့်ကြည့်နေလိုက်သည်။
"ရွှေအူတိုင်အဆင့် တက် ဆေးလုံး ရှိလား"
"ရှိပါတယ်၊ ဒီနေ့တင် ပစ္စည်းအသစ် ရောက်ထားတာပါ၊ အဆင့်နိမ့် ဝိညာဉ်ကျောက်တုံး လေးသောင်းကို တစ်လုံးပါ၊ အလယ်အလတ် အရည်အသွေး ဖြစ်ပါတယ်၊ လူကြီးမင်း လိုအပ်ပါသလား"
ပြီးခဲ့သည့်အကြိမ်က လျူထိုင်ကို အဆင့်တက်ဆေးလုံးတစ်လုံးအား နှစ်သောင်းဖြင့် ရောင်းချပေးပြီးနောက် ချန်ကျီက ရွှေအူတိုင်အဆင့်တက်ဆေးလုံး၏ ပေါက်ဈေးမှာ ဤမျှမကနိုင်ကြောင်း ခန့်မှန်းမိခဲ့သည်။
ထို့ကြောင့် ယခုအကြိမ်တွင် ယဲ့ကိုင်ကို ဈေးနှုန်း နှစ်ဆ တိုးမြှင့်ပြောလိုက်ပြီး ဆေးလုံး၏ အရည်အသွေးကိုပါ အထူးတလည် အလေးပေး ပြောလိုက်သည်။
ယဲ့ကိုင်က ချန်ကျီ၏ ဈေးနှုန်းကို ကြားရပြီးနောက် ခေတ္တမျှ စဉ်းစားလိုက်မိပြီး အနန္တကုန်စုံဆိုင်က ဤကဲ့သို့သော တန်ဖိုးကြီး ဆေးလုံးမျိုးကို တန်ဖိုးမရှိသည့် ပစ္စည်းတစ်ခုကဲ့သို့ အလွယ်တကူ ရောင်းချနေသည့်အပေါ် စိတ်ထဲတွင် ဇဝေဇဝါ ဖြစ်သွားသည်။
ယဲ့ကိုင်က တုံ့ဆိုင်းမှု ခေတ္တဖြစ်သွားပြီးနောက် ပြောလိုက်သည်။ "ယူမယ်"
ချန်ကျီက ထိုအခွင့်အရေးကို အသုံးပြုကာ အသိစိတ်ကို ရှန်းဝမ်စန်း၏ ခန္ဓာကိုယ်ထဲမှ ခွာထုတ်လိုက်ပြီး ရှန်းဝမ်စန်းအား ယဲ့ကိုင်ကို ဆက်လက် ဧည့်ခံစေကာ သူကိုယ်တိုင်မူ စနစ်စျေးဝယ် နေရာရှိ ဝတ်စုံစိမ်းနှင့် အမျိုးသမီးထံသို့ သွားရောက်လိုက်သည်။
ခဏအတွင်းမှာပင် ချန်ကျီက ရွှေအူတိုင်အဆင့်တက်ဆေးလုံးကို လဲလှယ်ယူပြီးနောက် ရှန်းဝမ်စန်း၏ ခန္ဓာကိုယ်ထဲသို့ ပြန်လည် ရောက်ရှိလာခဲ့သည်။
ချန်ကျီက ခုနကတင် လဲလှယ်ထားသော ရွှေအူတိုင်အဆင့်တက်ဆေးလုံး ပါရှိသည့် ကျောက်စိမ်းပုလင်းလေးတစ်လုံးကို တိုက်ရိုက် ထုတ်ယူလိုက်သည်။
ကျောက်စိမ်းပုလင်းကို ကောင်တာပေါ်သို့ တင်လိုက်ပြီးနောက် ချန်ကျီက ယဲ့ကိုင်ကဲ့သို့သော လူမျိုးက မျက်နှာပြောင်တိုက်ကာ လုယက်သွားမည်ကို မစိုးရိမ်ပေ။
လုယက်သွားလျှင်ပင် အမှတ် ၆၀၀ သာ ဆုံးရှုံးမည်ဖြစ်ရာ သူ့အတွက် အရေးမကြီးလှပေ။
သို့သော်လည်း ချန်ကျီက ယဲ့ကိုင်ကဲ့သို့သော ကျင့်ကြံသူကြီးတစ်ဦးက နေ့ခင်းကြောင်တောင်တွင် ဤကဲ့သို့ အောက်တန်းကျသော လုပ်ရပ်မျိုးကို လုပ်လိမ့်မည်မဟုတ်ကြောင်း ယုံကြည်သည်။ ဘာပဲဖြစ်ဖြစ် အဆင့်အတန်းရှိသူများ ဖြစ်ကြသဖြင့် သိက္ခာကိုတော့ ထိန်းရမည်သာ ဖြစ်သည်။
ယဲ့ကိုင်က ကျောက်စိမ်းပုလင်းကို ကြည့်ရင်း စိတ်ထဲတွင် တွေးမိသည်။ 'ဒီလောက် အလွယ်တကူ ရနိုင်တာလား... ငါ ငယ်ငယ်တုန်းက ဘာလို့ ဒီလောက်တောင် ခက်ခဲခဲ့ရတာလဲ'
ယဲ့ကိုင်က ကျောက်စိမ်းပုလင်းကို ယူကာ စစ်ဆေးပြီးနောက် သိုလှောင်အိတ်တစ်ခုကို ကောင်တာပေါ်သို့ လွှဲပေးလိုက်သည်။
ချန်ကျီ၏ ရင်ထဲ၌ စိတ်လှုပ်ရှားသွားပြီး နောက်ထပ် တစ်ခေါက် အမြတ် အများကြီး ရရှိပြန်ပြီ ဖြစ်သည်။ သို့သော် မျက်နှာကိုမူ တည်ငြိမ်စွာ ထားရှိရင်း သိုလှောင်အိတ်ကို ယူကာ စစ်ဆေးလိုက်သည်။
သိုလှောင်အိတ်ထဲရှိ ဝိညာဉ်ကျောက်တုံးများကို မြင်လိုက်ရသည့်အခါ ချန်ကျီက အံ့အားသင့်သွားမိသည်။ 'ဒါ... ဒါတွေက အလယ်အလတ်အဆင့် ဝိညာဉ်ကျောက်တုံး တွေပဲ'
သိုလှောင်အိတ်ထဲ၌ အလယ်အလတ်အဆင့် ဝိညာဉ်ကျောက်တုံး ၄၀၀ တိတိ တစ်တုံးမျှ မလိုဘဲ ရှိနေသည်။ ( အလယ်အလတ်အဆင့် ဝိညာဉ်ကျောက်တုံး ၁ တုံးလျှင် အဆင့်နိမ့် ဝိညာဉ်ကျောက်တုံး ၁၀၀ နှင့် ညီမျှသဖြင့် ၄၀၀ ဟု ဆိုလျှင် လေးသောင်းနှင့် ညီမျှသည်။)
ချန်ကျီက အလယ်အလတ်အဆင့် ဝိညာဉ်ကျောက်တုံးကို နောက်ဆုံး မြင်တွေ့ခဲ့ရသည်မှာ ဆိုင်ရှင်ထုံ၏ သိုလှောင်အိတ်ထဲတွင် ဖြစ်ပြီး ယဲ့ကိုင်က တစ်ကြိမ်တည်းဖြင့် ဤမျှများပြားသော အလယ်အလတ်အဆင့် ဝိညာဉ်ကျောက်တုံးများကို ထုတ်ပေးနိုင်လိမ့်မည်ဟု မထင်မှတ်ထားခဲ့ပေ။
သူ့စိတ်ထဲတွင် သိရှိသည်မှာ ယခုအချိန်တွင် ယဲ့ကိုင်၏ အရှေ့၌ အမူအရာ ပျက်၍မဖြစ်ဘဲ လောကကြီးကို အနှံ့အပြား မြင်ဖူးသော အရှိန်အဝါမျိုးကို ဆက်လက် ထိန်းသိမ်းထားရမည် ဖြစ်သည်။
"ကျေးဇူးတင်ပါတယ်"
ချန်ကျီက သိုလှောင်အိတ်ကို တည်ငြိမ်စွာ သိမ်းဆည်းလိုက်သည်။
သို့သော် ချန်ကျီ မထင်မှတ်ထားသည်မှာ ယဲ့ကိုင်က ရွှေအူတိုင်အဆင့်တက်ဆေးလုံးကို ဝယ်ယူပြီးသည့်တိုင် ဆိုင်မှ ထွက်ခွာသွားမည့် အရိပ်အယောင် မရှိသေးဘဲ စကားကို လွှဲပြောင်းကာ ပြောလိုက်ပြန်သည်။
"ငါ နောက်ထပ် အခြေတည်ဝိညာဉ်အဆင့် တက်ဆေးလုံး တစ်လုံးလည်း ထပ်ဝယ်ချင်သေးတယ်"