အခန်း ၁၂၆
Vol. 13 Ch. 126
အခန်း (၁၂၆) ခရီးထွက်ခြင်း၊ မိစ္ဆာသားရဲကို တိုက်ခိုက် ခြင်း
ချန်ကျီက မင်ရှင်းကျိုက်မှ ထွက်လာပြီးနောက် သူလိုအပ်သော မြေပုံကို ဝယ်ယူရရှိခဲ့ပြီဖြစ်ရာ ဝမ်နန်မြို့တွင် ဆက်၍ အချိန်ဆွဲမနေတော့ပေ။
သူက မည်သူ့ကိုမျှ သတိမမူမိစေဘဲ ဝမ်နန်မြို့၏ မြို့တံခါးဝမှ ရဲရဲတင်းတင်းပင် လျှောက်လှမ်းထွက်လာခဲ့သည်။
ဝမ်နန်မြို့၏ လမ်းမများပေါ်တွင် အနည်းငယ် ခြောက်ကပ်နေသည်ဟု ထင်ရသော်လည်း မကြာသေးမီက ဝမ်နန်မြို့အတွင်းသို့ အဝင်အထွက်ပြုလုပ်နေကြသော ကျင့်ကြံသူအရေအတွက်မှာမူ အတော်အတန် များပြားနေဆဲ ဖြစ်သည်။
ချန်ကျီက ဝမ်နန်မြို့တံခါးမှ ထွက်လာပြီးနောက် မင်ရှင်းကျိုက်တွင် ဝယ်ယူခဲ့သော တာ့ချန်မင်းဆက် တော်ဝင်အင်ပါယာ၏ မြေပုံကို ထုတ်ယူကာ ဟဲကွမ်းတောင်တန်း တည်ရှိရာ အရပ်မျက်နှာကို အမြန်ပင် ရှာဖွေလိုက်သည်။
သူက ချင်းယွမ်ဓားကို အလွယ်တကူ ထုတ်ယူလိုက်ပြီး ဓားပျံသန်းခြင်း ကို တိုက်ရိုက်အသုံးပြုကာ ခန္ဓာကိုယ်ကို အလင်းတန်းတစ်ခုအဖြစ် ပြောင်းလဲ၍ ဟဲကွမ်းတောင်တန်းရှိရာ ဘက်သို့ အရှိန်အဟုန်ပြင်းစွာ ပျံသန်းသွားခဲ့သည်။
"ဓားပျံစီးပြီး သွားရတာ တကယ်ကို လန်းဆန်းတာပဲ၊ ဒါက လေယာဉ်စီးရတာထက် အများကြီး ပိုမြန်တယ်"
ချန်ကျီက ဓားပျံသန်းခြင်း ကို ဒဏ္ဍာရီ အဆင့်အထိ ကျွမ်းကျင်အောင် လေ့ ကျင့်ပြီးနောက်ပိုင်း ၎င်းကို ကိုယ်တိုင် ပထမဆုံးအကြိမ် ထုတ်သုံးခြင်း ဖြစ်ရာ သူ့အတွက် ထူးခြားဆန်းသစ်သော ခံစားချက်မျိုးကို ပေးစွမ်းနေသည်။
ကောင်းကင်နှင့် မြေကြီး ကြားတွင် လွတ်လပ်စွာ ပျံသန်းနေရသကဲ့သို့ အရာအားလုံးကို သူကိုယ်တိုင် ထိန်းချုပ်ထားနိုင်သည်ဟူသော ခံစားချက်မျိုး ခံစားနေရသည်။
ဓားပျံပေါ်တွင် မတ်တတ်ရပ်နေရင်း သူ၏ရင်ထဲ၌ ရဲရင့်ပြတ်သားသော စိတ်ဓာတ်များ နိုးကြားလာခဲ့သည်။ ဤကောင်းကင်နှင့် မြေကြီးက သူ့ကို ထပ်မံ၍ ချုပ်နှောင်ထားနိုင်တော့မည်မဟုတ်ဘဲ ကောင်းကင်နှင့် မြေကြီးကြား တွင် သူအလိုရှိရာသို့ လွတ်လပ်စွာ သွားလာနိုင်တော့မည် ဖြစ်သည်။
ချန်ကျီက မည်သည့်စိုးရိမ်ပူပန်မှုမျှမရှိဘဲ သူ၏ ဝိညာဉ်စွမ်းအားများကို အပြည့်အဝအသုံးပြုကာ ချင်းယွမ်ဓားကို မောင်းနှင်လိုက်ရာ အမြန် နှုန်းမှာ အမြင့်ဆုံးအတိုင်းအတာသို့ ရောက်ရှိသွားတော့သည်။
ဟဲကွမ်းတောင်တန်းသို့ သွားရာလမ်းတစ်လျှောက်တွင် သူက တစ်ချက်ကလေးမျှ မရပ်နားခဲ့ပေ။
နေ့တစ်ဝက်ခန့်ပင် မကြာလိုက်ဘဲ ချန်ကျီ၏ မျက်စိအရှေ့သို့ အဆုံးအစမရှိ ရှည်လျားလှသော တောင်တန်းကြီးတစ်ခု ပေါ်လာခဲ့သည်။
တောင်တန်းကြီးပေါ်တွင် သစ်ပင်ပန်းမန်များ ဝေဆာစိမ်းလန်းနေပြီး ကောင်းကင်သို့ ထိုးထွက်နေသော ရှေးဟောင်းသစ်ပင်ကြီးများကြောင့် ၎င်းတို့၏အောက်ခြေတွင် မည်သည့်အရာများ ပုန်းကွယ်နေသည်ကို ရှင်းလင်းစွာ မမြင်တွေ့နိုင်ပေ ။
ဟဲကွမ်းတောင်တန်းနှင့် နီးကပ်လာသောအခါ ချန်ကျီက ဓားပျံသန်းခြင်းကို ရပ်တန့်လိုက်ပြီး နေရာတစ်ခုကို ရှာဖွေကာ တင်ပျဉ် ခွေ ထိုင်လိုက်သည်။ ထို့နောက် ရွှမ်ထျန်းလုကို လည်ပတ်စေပြီး ခုနက ဓားပျံသန်းစဉ်က ကုန်ခမ်းသွားသော ဝိညာဉ်စွမ်းအားများကို အားလုံး ပြန်လည်ဖြည့်တင်းလိုက်သည်။
"ငါ မိစ္ဆာသားရဲတောအုပ်ထဲကို ပထမဆုံးအကြိမ် ဝင်ဖူးတာပဲ၊ တကယ်ပြောရရင် ရင်ထဲမှာ အနည်းငယ် စိတ်လှုပ်ရှားနေမိတယ်"
သူက ဓားပျံသန်းခြင်းကို မပြုလုပ်တော့သော်လည်း သူ၏ အမြန်နှုန်း က အလွန်မြန်ဆန်ဆဲဖြစ်ရာ ဟဲကွမ်းတောင်တန်း၏ အပြင်ဘက်နယ်မြေ သို့ အမြန်ပင် ဝင်ရောက်လာခဲ့သည်။
"ဒီနေရာ တစ်ဝိုက်မှာ တိုက်ခိုက်ထားတဲ့ အမှတ်အသားတွေ အသစ်စက်စက် ရှိနေတုန်းပဲ၊ ကြည့်ရတာ ဝမ်နန်မြို့က တစ်ကိုယ်တော် ကျင့်ကြံသူတွေက အနန္တကုန်စုံဆိုင်အတွက် ဝိညာဉ်ကျောက်တုံးတွေ ရှာပေးဖို့ တကယ်ကို အားသွန်ခွန်စိုက် ကြိုးစားနေကြတာပဲ"
ချန်ကျီက ဟဲကွမ်းတောင်တန်း၏ အပြင်ဘက်နယ်မြေ တစ်လျှောက် ဆက်လက်လျှောက်လှမ်းရင်း သူ၏ အသိစိတ်ကို ဖြန့်ကျက်ကာ ပတ်ဝန်းကျင်အခြေအနေကို သတိထား စောင့်ကြည့်နေလိုက်သည်။
ချန်ကျီ လျှောက်လှမ်းခဲ့သော ခရီးလမ်းတွင် တစ်ကိုယ်တော် ကျင့်ကြံသူအတော်များများ မိစ္ဆာသားရဲများနှင့် တိုက်ခိုက်နေကြသည်ကို မကြာခဏ တွေ့မြင်ခဲ့ရသော်လည်း ဂိုဏ်းတူညီအစ်ကိုများနှင့် မိသားစုမျိုးနွယ်စုဝင် ကျင့်ကြံသူများကိုမူ အလွန်တွေ့ရခဲပြီး မရှိသလောက်ပင် ဖြစ်သည်။
ကျင့်ကြံသူတစ်ဦးဦး မိစ္ဆာသားရဲနှင့် တိုက်ခိုက်နေသည်ကို မြင်တွေ့ရတိုင်း သူက မလှမ်းမကမ်းတွင် ငြိမ်သက်စွာ ရပ်ကြည့်နေတတ်သည်။
သို့သော်လည်း သူက ဝင်စွက်ဖက်ရန် လုံးဝစိတ်ကူးမရှိဘဲ စာအုပ်ထဲ၌သာ ဖော်ပြချက်အဖြစ် ပါရှိဖူးသော မိစ္ဆာသားရဲများကို သေသေချာချာ အကဲခတ်လေ့လာနေခြင်းသာ ဖြစ်သည်။
မိစ္ဆာသားရဲများ၏ လက္ခဏာများအလိုက် စာအုပ်ထဲမှ ဖော်ပြချက်များနှင့် တစ်ခုချင်းစီ တိုက်ဆိုင်စစ်ဆေးနေမိသည်။
"ဒီမိစ္ဆာသားရဲတွေရဲ့ ပုံပန်းသဏ္ဌာန်က ဒီလောက်တောင် ထူးဆန်းလိမ့်မယ်လို့ မထင်ထားမိဘူး၊ ဒါပေမဲ့ အရင်ဘဝက မြင်ဖူးခဲ့တဲ့ သားရဲတိရစ္ဆာန်တွေနဲ့ တူတဲ့အချက်တွေ အများကြီး ရှိနေသေးတာပဲ"
မိစ္ဆာသားရဲများနှင့် တိုက်ခိုက်နေကြသော ကျင့်ကြံသူများက ၎င်းတို့ တိုက်ခိုက်နေစဉ် ဘေးနားတွင် လူတစ်ယောက် ရပ်ကြည့်နေသည်ကို သတိပြုမိသွားကြသောအခါ ၎င်းတို့၏ ရင်ထဲ၌ သတိတစ်ခု ဝင်လာကြသည်။
သို့သော်လည်း ၎င်းတို့နှင့် မိစ္ဆာသားရဲများ၏ တိုက်ပွဲ ပြီးဆုံးသွားသည့်တိုင်အောင် ဘေးတွင်ရပ်နေသော ထိုထူးဆန်းသည့်လူမှာ မည်သည့် လှုပ်ရှားမှုမျှ ပြုလုပ်မလာသည်ကို တွေ့လိုက်ရသည်။
၎င်းတို့က မိစ္ဆာသားရဲ၏ အလောင်းကို အမြန်ဆုံး အပိုင်းပိုင်းဖြတ်တောက်ပြီး သားရဲ၏ ခန္ဓာကိုယ်ပေါ်မှ တန်ဖိုးရှိသော ပစ္စည်းများကို အားလုံး သိမ်းဆည်းလိုက်ကြသည်။
ချန်ကျီက မည်သည့်အပြုအမူမျှ မလုပ်ဘဲ ငြိမ်သက်စွာသာ ဆက်ကြည့်နေပြီး ၎င်းတို့၏ ပစ္စည်းများကို လုယူရန် ရည်ရွယ်ချက်ရှိပုံ မပေါ်သည်ကို မြင်သောအခါ ၎င်းတို့သည်လည်း ဆက်၍ အချိန်ဆွဲမနေတော့ဘဲ နောက်ထပ် မိစ္ဆာသားရဲတစ်ကောင်ကို ရှာဖွေရန်အတွက် အမြန်ဆုံး ထွက်ခွာသွားကြတော့သည်။
ချန်ကျီက ထိုကျင့်ကြံသူများ ထွက်ခွာသွားပြီးနောက် အသတ်ခံလိုက်ရသော မိစ္ဆာသားရဲ၏ အလောင်းဘေးသို့ လျှောက်သွားကာ သေသေချာချာ အကဲခတ်လိုက်သည်။
"အော်... မိစ္ဆာသားရဲတွေရဲ့ ခန္ဓာကိုယ်ထဲက ပစ္စည်းတွေကို ခွဲထုတ်ရတာ ဒီလောက်တောင် ရှုပ်ထွေးတာကိုး၊ သူတို့ ခုနက ယူသွားတဲ့ အသားတုံးနဲ့ အင်္ဂါအစိတ်အပိုင်းတွေက ဒီမိစ္ဆာသားရဲရဲ့ တန်ဖိုးအရှိ ဆုံး အနှစ်သာရ အပိုင်း တွေ ဖြစ်ရမယ်"
ချန်ကျီက ယခုအချိန်တွင် ကျင့်ကြံခြင်း သုတေသနပညာရှင်တစ်ဦးအလား ဖြစ်နေပြီး အရာရာတိုင်းအပေါ် စူးစမ်းလိုစိတ်များ ပြည့်နှက်နေမိသည်။
ထိုအချိန်တွင် ဟဲကွမ်းတောင်တန်းအတွင်း၌ ရှိနေသော ချန်ဖန်သည်လည်း သူ၏ရင်ထဲ၌ ထူးဆန်းသော ခံစားချက်တစ်ခု ရုတ်တရက် ဖြစ်ပေါ်လာခဲ့သည်။
ချန်ဖန်က စိတ်ထဲတွင် ရုတ်တရက် ပေါ်ပေါက်လာသော ထိုထိတ်လန့်တုန်လှုပ်ဖွယ်ရာ ခံစားချက်ကို ပြန်လည်တွေးနေစဉ် ကျိုးချွမ်နှင့် ယွီရှင်းစစစ်တို့က အပြေးအလွှား ရောက်ရှိလာပြီး သူ၏ အတွေးစကို ဖြတ်တောက်လိုက်သည်။
"စီနီယာအစ်ကိုချန်... ဒီမိစ္ဆာသားရဲကို ရှင်းလင်းပြီးသွားပြီ၊ ကျွန်တော်တို့ နောက်တစ်ကောင်ကို ဆက်ရှာကြမယ်"
"မင်းတို့ အရင်ဆုံး အနားယူပြီး အားပြန်ဖြည့်ဖို့ လိုဦးမလား"
"မလိုပါဘူး၊ ကျွန်တော်တို့ နှစ်ယောက်ပေါင်းပြီး ဒီမိစ္ဆာသားရဲကို သတ်လိုက်တာဆိုတော့ စွမ်းအားကုန်ခမ်းမှုက သိပ်မရှိလှပါဘူး"
"ကောင်းပြီ... ဒါဆိုရင် ဆက်သွားကြတာပေါ့"
ကျိုးချွမ်နှင့် ယွီရှင်းစစ်တို့ နှစ်ဦးက အနန္တကုန်စုံဆိုင်အကြောင်းကို သိရှိသွားပြီးကတည်းက ယခုအခါ မိစ္ဆာသားရဲများကို အမဲလိုက်ရန် စိတ်အားထက်သန်မှု အလွန်မြင့်မားနေကြပြီး အစောပိုင်းက ချန်ဖန် ၎င်းတို့ကို ဤနေရာသို့ ခေါ်ဆောင်လာခဲ့သည့် အဓိကအကြောင်းရင်းကိုပင် ခေတ္တမျှ မေ့လျော့နေကြပြီ ဖြစ်သည်။
ထို့ပြင် ကျိုးချွမ်က မိစ္ဆာသားရဲများကို အမဲလိုက်ရာတွင် ပိုမိုပါဝင်လာသည်နှင့်အမျှ ကျိုးချွမ်နှင့် ယွီရှင်းစစ်တို့အကြား ပူးပေါင်းဆောင်ရွက်မှုမှာလည်း ပိုမိုတွဲဖက်ညီလာခဲ့သည်။
ယခုအခါ ၎င်းတို့နှစ်ဦးပေါင်းလျှင် အဆင့်တစ် နှောင်းပိုင်းအဆင့် မိစ္ဆာသားရဲတစ်ကောင်ကို ဝိုင်းဝန်းသတ်ဖြတ်ရန်အတွက် ရင်ဆိုင်ရ ခက်ခဲလွန်းသော အမျိုးအစားမျိုး မဟုတ်ပါက အခြေခံအားဖြင့် ဆယ့်ငါးမိနစ်ခန့်ပင် အချိန်မပေးရပေ ။
ချန်ကျီ ဘက်တွင်မူ
သူက ကျင့်ကြံသူများနှင့် မိစ္ဆာသားရဲများ၏ တိုက်ပွဲကို အကြိမ်အနည်းငယ် ကြည့်ပြီးနောက်တွင် ကျင့်ကြံသူများနှင့် မိစ္ဆာသားရဲများ တိုက်ခိုက်နေကြသည်ကို ထပ်မံတွေ့မြင်ရသော်လည်း ယခင်ကကဲ့သို့ စိတ်ဝင်စားမှုမျိုး မရှိတော့ပေ။
သူက ယခုအခါ မိစ္ဆာသားရဲတစ်ကောင်နှင့် တိုက်ခိုက်ရသည့် ခံစားချက် မည်သို့ရှိသည်ကို ကိုယ်တိုင် လက်တွေ့ စမ်းသပ်ကြည့်ချင်နေပြီ ဖြစ်သည်။
ချန်ကျီက သူ၏ အသိစိတ်ကို အဝေးဆုံးအကွာအဝေးအထိ ဖြန့်ကျက်လိုက်ပြီး အုပ်စုကွဲနေသော မိစ္ဆာသားရဲများကို လိုက်လံရှာဖွေလိုက်သည်။
လက်ရှိတွင် ဟဲကွမ်းတောင်တန်းအတွင်း၌ မိစ္ဆာသားရဲများကို အမဲလိုက်နေကြသော ကျင့်ကြံသူ အရေအတွက် များပြားသည်ဟု ဆိုသော်လည်း ဟဲကွမ်းတောင်တန်း၏ အပြင်ဘက် နယ်မြေ တစ်ခုလုံးကို လွှမ်းခြုံထားနိုင်လောက်သည်အထိတော့ မများပြားလှပေ ။
ထိုကျင့်ကြံသူများနှင့် အနည်းငယ် ဝေးကွာသော နေရာများသို့ သွားရောက်မည်ဆိုပါက အမဲမလိုက်ရသေးသော မိစ္ဆာသားရဲ အများအပြား ရှိနေသေးသည်။
ချန်ကျီက ယခုအခါ လူသူနည်းပါးသော နေရာတစ်ခုဆီသို့ အမြန်နှုန်း ဖြင့် ပြေးလွှားသွားနေပြီး သူ ဖြန့်ကျက်ထားသော အသိစိတ်က ထိုနေရာရှိ မိစ္ဆာသားရဲတစ်ကောင်ကို ရှာဖွေတွေ့ရှိထားပြီး ဖြစ်သည်။
ချန်ကျီက ထိုမိစ္ဆာသားရဲ၏ အရှေ့သို့ ရုတ်တရက် ပေါ်လာသောအခါ ထိုမိစ္ဆာသားရဲမှာ အသက်ပြင်းပြင်းရှူနေပြီး ချန်ကျီကို ဒေါသတကြီးဖြင့် စိုက်ကြည့်နေခဲ့သည်။
"ဟင်... ဘာလို့ ဒီမိစ္ဆာသားရဲက ဒီလောက်တောင် သနားစရာကောင်းတဲ့ ပုံစံ ဖြစ်နေရတာလဲ"
အဆင့်တစ် မိစ္ဆာသားရဲများ၏ ဉာဏ်ပညာက မမြင့်မားလှသော်လည်း ဤကာလအတွင်း ဟဲကွမ်းတောင်တန်းထဲသို့ ရုတ်တရက် ရောက်ရှိလာကြသော ကျင့်ကြံသူများ၏ အပြုအမူများက ဤမိစ္ဆာသားရဲများကို လုံးဝ အမျက်ဒေါသထွက်စေခဲ့ပြီ ဖြစ်သည်။
ကျင့်ကြံသူများက မိစ္ဆာသားရဲတစ်ကောင်ကို တွေ့ရှိတိုင်း သေကျေပျက်စီးသည်အထိ အဆုံးစွန် တိုက်ခိုက်ကြသည့် အခြေအနေမျိုး ဖြစ်ပေါ်နေတတ်သည်။
တိုက်တိုက်ဆိုင်ဆိုင်ပင် ချန်ကျီ ရင်ဆိုင်နေရသော ဤမိစ္ဆာသားရဲမှာ ကျင့်ကြံသူအများအပြား၏ လိုက်လံသတ်ဖြတ်မှုကြောင့် နေရာအနှံ့သို့ ထွက်ပြေးတိမ်းရှောင်နေရသော ကောင် ဖြစ်သည်။
၎င်းက တောင်တန်းအတွင်းသို့ ရုတ်တရက် ဝင်ရောက်လာပြီး ၎င်းတို့၏ အေးချမ်းသော ဘဝကို လာရောက်နှောင့်ယှက်ဖျက်ဆီးနေကြသော ကျင့်ကြံသူများအပေါ် အလွန်အမင်း နာကျည်းဒေါသထွက်နေမိသည်။
၎င်း ရင်ဆိုင်ခဲ့ရသော ကျင့်ကြံသူများမှာ အမြဲတမ်း အုပ်စုလိုက်အဖွဲ့လိုက် ဖြစ်မနေခဲ့ပါက ၎င်းသည် ထိုကျင့်ကြံသူများနှင့် အသက်ပေး၍ အသေအလဲ တိုက်ခိုက်ခဲ့သည်မှာ ကြာပြီ ဖြစ်သည်။
အကယ်၍ ကျင့်ကြံသူတစ်ဦးတည်းနှင့်သာ သီးသန့် ရင်ဆိုင်ရမည်ဆိုပါက ၎င်း၏ ခွန်အား ဖြင့် မည်သူက အနိုင်ရမည်၊ မည်သူက အရှုံးပေးရမည်ကို အတတ်မပြောနိုင်ပေ။
သို့သော်လည်း ထိုကျင့်ကြံသူများက အလွန်ပင် ကောက်ကျစ်စဉ်းလဲလှပြီး အများစုမှာ ၎င်းတို့ကို ဝိုင်းရံပိတ်ဆို့ တိုက်ခိုက်ကြသဖြင့် ၎င်းတို့အား အသက်စွန့်၍ ပြန်လည်တိုက်ခိုက်ရန် အခွင့်အရေး လုံးဝမပေးကြပေ ။
ထို့ကြောင့်သာ ၎င်းက ဤမျှအထိ အသည်းအသန် ထွက်ပြေးခဲ့ရခြင်း ဖြစ်သည်။
ယခုအချိန်တွင် ချန်ကျီကဲ့သို့ တစ်ဦးတည်းပေါ်လာသော ကျင့်ကြံသူတစ်ဦးနှင့် တိုးမိသောအခါ ဤမိစ္ဆာသားရဲက သူ့အတွက် အခွင့်အရေး ရောက်ရှိလာပြီဟု ခံစားလိုက်ရပြီး ၎င်း၏ မိစ္ဆာသားရဲ အဖော် များအတွက် ကနဦး ကလဲ့စားချေမှုကို အရင်ဆုံး ရယူနိုင်တော့မည်ဟု တွေးလိုက်သည်။
၎င်းက အခြားသော မိစ္ဆာသားရဲများနှင့် သွားပူးပေါင်းပြီး စုပေါင်းအင်အားဖြင့် အကာအကွယ်ယူရန် တွေးထားသော အတွေးများကို ဘေးဖယ်ထားလိုက်တော့သည်။
၎င်းက ချန်ကျီကို အရှိန်အဟုန်ဖြင့် တိုက်ခိုက်ရန်အတွက် အဆင်သင့် ပြင်ဆင်လိုက်ပြီ ဖြစ်သည်။
"စိတ်ဝင်စားဖို့ကောင်းသားပဲ" ချန်ကျီက သူ၏အရှေ့တွင် ဒေါသထွက်နေသော မိစ္ဆာသားရဲကို စိတ်ဝင်တစားဖြင့် စိုက်ကြည့်လိုက်သည်။
"ဒါက ရွှေဝါရောင် ကြေးနီကျားသစ် ဖြစ်ရမယ်၊ ကျားသစ်တစ်ကောင်ရဲ့ ပုံစံ ရှိနေပေမယ့် ကျားတစ်ကောင်လို သန်မာ တဲ့ ခန္ဓာကိုယ်မျိုး ရှိပြီးတော့ အမြန်နှုန်း ကတော့ အလွန်အမင်း လျင်မြန်ဖြတ်လတ်တယ်၊ တကယ်ပဲ စာအုပ်ထဲက မိတ်ဆက်ဖော်ပြချက်တွေအတိုင်းပဲ"
ထိုရွှေဝါရောင် ကြေးနီ ကျားသစ်က ချန်ကျီထံသို့ အချိန်မရွေး ပြေးဝင်တိုက်ခိုက်တော့မည့် အခြေအနေတွင် ရှိနေသော်လည်း သူကမူ စာအုပ်ထဲမှ ဖော်ပြချက်များကို လက်တွေ့တိုက်ဆိုင်စစ်ဆေးရန်အတွက် တည်ငြိမ်နေဆဲ ဖြစ်သည်။
ရွှေဝါရောင် ကြေးနီ ကျားသစ်က ဒေါသတကြီး ဟိန်းဟောက်လိုက်ပြီး ချန်ကျီထံသို့ တဟုန်ထိုး ပြေးဝင်လာခဲ့သည်။
ထိုပုံရိပ် လှုပ်ရှားမှုက လျှပ်စီးတစ်ခုအလား ချန်ကျီ၏ မျက်စိအရှေ့တွင် လျင်မြန်စွာ ဖြတ်သန်းသွားခဲ့သည်။
ချန်ကျီက ခပ်ဖွဖွ ပြုံးလိုက်ပြီး "နှေးလွန်းတယ်"