အခန်း ၁၂၈
Vol. 13 Ch. 128
အခန်း (၁၂၈) အဆင့်နှစ် မိစ္ဆာသားရဲ၊ စစ်ဆေး ၍မရခြင်း
ကျိုးချွမ်နှင့် ယွီရှင်းစစ်တို့၏ မိစ္ဆာသားရဲကို ဝိုင်းဝန်းသတ်ဖြတ်မှု မပြီးဆုံးမီကတည်းက ချန်ကျီသည် ဤနေရာမှ ထွက်ခွာသွားခဲ့ပြီ ဖြစ်သည်။
၎င်းတို့နှစ်ဦးမှာမူ ချန်ကျီ ခုနက ရောက်ရှိလာခဲ့သည်ကို လုံးဝ သတိမထားမိလိုက်ကြပေ။
ယခုအခါ ၎င်းတို့က မိစ္ဆာသားရဲကို အမဲလိုက်သတ်ဖြတ်ပြီးနောက် အလောင်းကို ရှင်းလင်းသည့် အလုပ်ကို ကျိုးချွမ်တစ်ဦးတည်းအား အကုန်ပုံမပေးတော့ပေ။
လူနှစ်ယောက် အတူတူ ရှင်းလင်းကြသဖြင့် အမြန် နှုန်းမှာ ယခင်ကထက် သိသိသာသာ ပိုမိုမြန်ဆန်လာပြီး မကြာမီမှာပင် ၎င်းတို့နှစ်ဦးစလုံး ချန်ဖန်ရှိရာသို့ ပြန်လည်ရောက်ရှိလာခဲ့ကြသည်။
"စီနီယာအစ်ကိုချန်... သွားကြစို့၊ ကျွန်တော်တို့ ဆက်သွားရအောင်" ကျိုးချွမ်၏ စိတ်အားထက်သန်မှုက အရှိန်အဟုန် ကောင်းနေဆဲ ဖြစ်သည်။
ချန်ဖန်ကမူ ခေါင်းကိုခါယမ်းလိုက်ပြီး ပြောလိုက်သည်။ "အခုဆိုရင် ဒီအဆင့်တစ် မိစ္ဆာသားရဲတွေက မင်းတို့အတွက် ဘာခြိမ်းခြောက်မှုမှ မရှိတော့ဘူး၊ မင်းတို့လည်း မိစ္ဆာသားရဲတွေနဲ့ တိုက်ခိုက်ရမယ့် နည်းလမ်းကို အခြေခံအားဖြင့် ကျင့်သားရနေပြီဆိုတော့ ငါတို့ ပိုပြီး အတွင်းဘက်ကျတဲ့ နေရာကို သွားလို့ရပြီ"
"စီနီယာအစ်ကို... ကျွန်တော်တို့ အဆင့်နှစ် မိစ္ဆာသားရဲတွေကို သွားပြီး အမဲလိုက်ကြမလို့လား၊ အဲဒါက သိပ်ပြီး အန္တရာယ်များမနေဘူးလား" ယွီရှင်းစစ်က ပြော သည်။
ကျိုးချွမ်ကလည်း အနည်းငယ် စိုးရိမ်ပူပန်သော မျက်ဝန်းများဖြင့် ချန်ဖန်ကို ကြည့်လိုက်သည်။
ချန်ဖန်က ခေါင်းညိတ်ပြကာ ပြောလိုက်သည်။ "စိတ်ချပါ၊ မင်းတို့ရဲ့ ခွန်အားနဲ့ဆိုရင် အဆင့်နှစ်အစောပိုင်း မိစ္ဆာသားရဲအချို့ကို အမဲလိုက်ဖို့က လုံးဝ ပြဿနာမရှိပါဘူး၊ ပြီးတော့ အဆင့်နှစ် မိစ္ဆာသားရဲတွေရဲ့ ကုန်ကြမ်းတွေက ပိုပြီး တန်ဖိုးရှိသလို အဆင့်မြင့် ဝိညာဉ်ဆေးပင်တွေနဲ့လည်း တိုက်တိုက်ဆိုင်ဆိုင် ဆုံတွေ့နိုင်တယ်၊ ဒါ့အပြင် အဆင့်နှစ် မိစ္ဆာသားရဲတွေနဲ့ တိုက်ခိုက်ရတာက မင်းတို့အတွက် ပိုပြီး အထောက်အကူဖြစ်စေမှာပါ"
"ဒါပေမဲ့..."
ကျိုးချွမ်က တစ်ခုခု ဆက်ပြောရန် ပြင်လိုက်သော်လည်း ချန်ဖန်က သူ့စကားကို ဖြတ်ပြောကာ ပြုံး၍ ပြော လိုက်သည်။ "စိတ်အေးအေးထားပါ၊ အဆင့်နှစ် မိစ္ဆာသားရဲနဲ့ တိုက်ပွဲမှာ ငါလည်း ဝင်ပြီး တိုက်ခိုက်ပေးမှာပါ"
ချန်ဖန်က ဤကဲ့သို့ ပြောလိုက်မှသာ ကျိုးချွမ်၏ ရင်ထဲ၌ အတော်လေး စိတ်အေးသွားရတော့သည်။
ယွီရှင်းစစ်သည်လည်း မိစ္ဆာသားရဲနှင့် တိုက်ခိုက်ရခြင်း၏ အကျိုးကျေးဇူးကို သိရှိသွားခဲ့ပြီ ဖြစ်ကာ သူ၏ ကျင့်ကြံခြင်းကလည်း မကြာမီ အဆင့်တက်တော့မည် ဖြစ်သဖြင့် ပိုမိုအဆင့်မြင့်သော မိစ္ဆာသားရဲများနှင့် တိုက်ခိုက်ပြီး ဖိအားအနည်းငယ် တိုးမြှင့်ရန် တကယ်ကို လိုအပ်နေသည်။
"ကောင်းပြီ... ဒါဆိုရင် ကျွန်တော်တို့ ဟဲကွမ်းတောင်တန်းရဲ့ ဗဟိုချက်ဆီကို ဦးတည်ပြီး ချီတက်ကြတာပေါ့" ချန်ဖန်က ပြုံး၍ ပြောလိုက်သည်။
ဤအချိန်တွင် ချန်ကျီက ဟဲကွမ်းတောင်တန်း၏ အတွင်းပိုင်းသို့ တစ်လှမ်းဦးအောင် ဦးစွာ ဝင်ရောက်နေခဲ့ပြီ ဖြစ်သည်။ အပြင်ဘက်နယ်မြေ ရှိ အဆင့်တစ် မိစ္ဆာသားရဲများက သူ့အတွက် မည်သည့် ခြိမ်းခြောက်မှုမျှ မရှိတော့ဘဲ မြင်တွေ့သင့်သည်များကိုလည်း အားလုံး မြင်တွေ့ပြီးပြီ ဖြစ်သည်။
ဟဲကွမ်းတောင်တန်း၏ ဗဟိုနယ်မြေ သို့ ဝင်ရောက်ပြီးနောက် ချန်ကျီက သူ၏ အသိစိတ်ကို ဖြန့်ကျက်ထားခဲ့ရာ သိသိသာသာ ပိုမိုအစွမ်းထက်သော အော်ရာ အနည်းငယ်က သူ၏ အသိစိတ် အာရုံခံ စုံစမ်းနိုင်စွမ်း အတိုင်းအတာအတွင်းသို့ ဝင်ရောက်လာခဲ့သည်။
သို့သော်လည်း အနက်ရှိုင်းဆုံးနေရာအထိ ဝင်ရောက်လာနိုင်သော တစ်ကိုယ်တော် ကျင့်ကြံသူကိုမူ သူ အနည်းငယ်မျှပင် မတွေ့ရှိရသေးပေ။
ဝမ်နန်မြို့မှ တစ်ကိုယ်တော် ကျင့်ကြံသူများက မိစ္ဆာသားရဲများကို အမဲလိုက်ရန် စိတ်အားထက်သန်မှု မြင့်မားကြသော်လည်း သေတွင်းထဲသို့ စုပြုံတိုးဝှေ့ရလောက်အောင်အထိ မိုက်မဲခြင်း မရှိကြသေးဘဲ သူတို့ကိုယ် သူတို့ သိနားလည်မှု ရှိကြဆဲ ဖြစ်သည်။
'အရင်ဆုံး မိစ္ဆာသားရဲတစ်ကောင်လောက်ကို အမှတ်မထင် ရှာပြီး လက်ရည်စမ်းကြည့်ရမယ်၊ အဆင့်တစ် မိစ္ဆာသားရဲတွေက တကယ်ကို အားနည်းလွန်းလို့ တိုက်ရတာ တစ်စက်ကလေးမှ အားရကျေနပ်မှု မရှိဘူး'
ချန်ကျီက အသိစိတ် အာရုံခံနိုင်စွမ်း အတွင်း၌ သူနှင့် အနီးဆုံးနေရာတွင် ရှိနေသော အဆင့်နှစ် မိစ္ဆာသားရဲတစ်ကောင်ရှိရာဆီသို့ အလျင်အမြန် ပြေးသွားခဲ့သည်။
ထိုအဆင့်နှစ် မိစ္ဆာသားရဲသည်လည်း ချန်ကျီ၏ အော်ရာကို အာရုံခံမိသွားပုံရကာ ၎င်း၏ ခန္ဓာကိုယ်မှာလည်း အလျင်အမြန် စတင်ရွေ့လျားသွားခဲ့သည်။
"ထွက်ပြေးချင်လို့လား"
ချန်ကျီက မထီမဲ့မြင် ပြုံးလိုက်ပြီး ချင်းယွမ်ဓားက ချက်ချင်း ပေါ်လာခဲ့ကာ လက်မှ ချိပ်တံဆိပ် ကို ပုံဖော်၍ ချင်းယွမ်ဓားပေါ်သို့ ဖွဖွလေး ခုန်တက်လိုက်သည်။
'ခရီးသွားရတာ ဓားပျံကို သုံးတာက ပိုပြီး မြန်ဆန်တာပဲ'
မကြာမီ အချိန်အတွင်းမှာပင် ထိုအဆင့်နှစ် မိစ္ဆာသားရဲ၏ ပုံရိပ်က ချန်ကျီ၏ မျက်စိအရှေ့သို့ ပေါ်လာခဲ့ပြီး သူက တဖြည်းဖြည်းချင်း အမှီ လိုက်လာနိုင်ခဲ့ပြီ ဖြစ်သည်။
"လပြည့် ခရစ်စတယ် ငွေရောင်မြွေ" ချန်ကျီက ယခုအခါ မိစ္ဆာသားရဲ၏ ပုံစံကို မြင်ရုံမျှဖြင့် ထိုမိစ္ဆာသားရဲ၏ နာမည်ကို အလွယ်တကူ ခေါ်နိုင်နေပြီ ဖြစ်ကာ ထိုစာအုပ်များကို သူက အလကား ဖတ်ခဲ့ခြင်း မဟုတ်ပေ။
"အရှိန် က တော်တော်လေး မြန်တာပဲ" ချန်ကျီက ခပ်ဖွဖွ ရယ်မောလိုက်ပြီး ဓားပျံစီးသည့် အမြန်နှုန်း ကို ပိုမိုမြှင့်တင်လိုက်သည်။
အရှေ့ဘက်တွင် မီတာအတော် ရှည်လျားသော မြွေကြီးတစ်ကောင်က အလျင်အမြနခ တွားသွားနေပြီး ကြီးမားလှသော ခန္ဓာကိုယ်က လမ်းတစ်လျှောက်ရှိ မြေကြီးများနှင့် သစ်ကိုင်းကျိုးများကို လွင့်စင်သွားစေသည်။
လပြည့် ခရစ်စတယ် ငွေရောင်မြွေ ဖြတ်သန်းသွားသော နေရာများတွင် နက်ရှိုင်းသော မြောင်းကြီးတစ်ခု ထင်ကျန်ရစ်ခဲ့သည်။
ချန်ကျီက ဓားပျံဖြင့် ပျံသန်းသည့် အမြန် နှုန်းကို ထပ်မံ၍ မြှင့်တင်လိုက်ရာ သူက လပြည့် ခရစ်စတယ် ငွေရောင်မြွေ၏ မြွေအမြီးပိုင်းနားသို့ ချဉ်းကပ်မိလုနီးပါး ဖြစ်သွားခဲ့သည်။
သူက ချင်းယွမ်ဓားပေါ်တွင် မတ်တတ်ရပ်လျက် လက်ထဲ၌ ယခုအချိန်တွင် နဂါး လှံတစ်စင်း ထပ်မံပေါ်ပေါက်လာခဲ့ပြီးနောက် ဟစ်အော်လိုက်သည်။ "လှံချက်ကို ခံလိုက်စမ်း"
နဂါး လှံက လှံတိုတစ်စင်းကဲ့သို့ အရှိန်အဟုန်ပြင်းစွာဖြင့် လပြည့် ခရစ်စတယ် ငွေရောင်မြွေ၏ ခန္ဓာကိုယ်ပေါ်သို့ တည့်တည့်မတ်မတ် စိုက်ဝင်သွားခဲ့သည်။
ဤလှံချက်က လပြည့် ခရစ်စတယ် ငွေရောင်မြွေ၏ ခန္ဓာကိုယ်ပေါ်သို့ အောင်မြင်စွာ စိုက်ဝင်သွားခြင်း ဖြစ်ပြီး လပြည့် ခရစ်စတယ် ငွေရောင်မြွေတွင် မာကျောသော အကြေးခွံများ၏ အကာအကွယ် ရှိနေသော်လည်း နဂါး လှံ၏ ဖောက်ထွက်ခြင်းကို ခံလိုက်ရဆဲ ဖြစ်သည်။
လပြည့် ခရစ်စတယ် ငွေရောင်မြွေက စူးရှကျယ်လောင်လှသော အော် သံတစ်ခုကို ထုတ်ဖော်လိုက်ပြီး ယခုအချိန်တွင် နဂါး လှံက သူ၏ ခန္ဓာကိုယ်ပေါ်တွင် စိုက်ဝင်နေသည့်တိုင်အောင် ၎င်းမှာ အနောက်သို့ လုံးဝ လှည့်မကြည့်ရဲဘဲ အလျင်အမြန် ဆက်လက်ထွက်ပြေးနေဆဲ ဖြစ်သည်။
အနောက်ဘက်မှ ချန်ကျီ၏ အော်ရာက ၎င်းကို ထိတ်လန့်ချောက်ချားမှုကို ခံစားရစေကာ အကယ်၍ ရပ်တန့်ပြီး ရန်သူကို ထိပ်တိုက်ရင်ဆိုင်ပါက ဧကန်မုချ သေဆုံးရလိမ့်မည်ကို ၎င်း သိရှိထားသည်။
'ဒီလိုမျိုး ဖြစ်နေတာတောင် ထွက်ပြေးနိုင်သေးတာလား' ချန်ကျီက အံ့အားသင့်စွာ ရေရွတ်လိုက်သည်။
သို့သော်လည်း သူက လိုက်လံဖမ်းဆီးမှုကို လက်မလျှော့ခဲ့ပေ၊ နဂါး လှံက လပြည့် ခရစ်စတယ် ငွေရောင်မြွေ၏ ခန္ဓာကိုယ်ပေါ်တွင် စိုက်ဝင်နေဆဲ ဖြစ်ကာ ၎င်းမှာ ဆန်းကြယ်အဆင့်မြင့် လက်နက် ဖြစ်သဖြင့် ပျောက်ဆုံးသွားပါက အလွန်ပင် နှမြောစရာ ကောင်းပေလိမ့်မည်။
ချန်ကျီက နောက်မှ ထပ်ကြပ်မကွာ လိုက်နေသော်လည်း ဒဏ်ရာရရှိထားသော လပြည့် ခရစ်စတယ် ငွေရောင်မြွေ၏ အမြန် နှုန်းကမူ လျော့ကျသွားခြင်း မရှိပေ။
ချန်ကျီ၏ ခုနက လှံချက်သည် ၎င်း၏ အသက်လုထွက်ပြေးရမည့် ခွန်အား များကို လှုံ့ဆော်ပေးလိုက်သည့်အလား ဖြစ်နေသည်။
သူ့ကိုယ်သူ သတိမထားမိလိုက်ဘဲ ချန်ကျီက လပြည့် ခရစ်စတယ် ငွေရောင်မြွေကို လိုက်ရင်း ဟဲကွမ်းတောင်တန်း၏ ပိုမိုနက်ရှိုင်းသော နေရာသို့ ရောက်ရှိလာခဲ့ပြီ ဖြစ်သည်။
ချန်ကျီက တစ်စုံတစ်ခုကို ရိပ်မိသွားပုံရကာ တွေးလိုက်သည်။ 'ဒီမြွေကြီးက ငါ့ကို တစ်နေရာရာကို တမင်သက်သက် ခေါ်သွားနေတာလား'
ချန်ကျီက ခေတ္တမျှ စဉ်းစားလိုက်ပြီး ဆုံးဖြတ်လိုက်သည်။ 'ဒါဆိုရင်လည်း မင်း ငါ့ကို ဘယ်နေရာ ခေါ်သွားမလဲဆိုတာ ကြည့်ရသေးတာပေါ့'
လပြည့် ခရစ်စတယ် ငွေရောင်မြွေကို မိတော့မည့်ဆဲဆဲ ဖြစ်နေသော ချန်ကျီက အမြန် နှုန်းကို တဖြည်းဖြည်းချင်း လျှော့ချလိုက်ပြီး သူ၏ ခန္ဓာကိုယ်ကို လပြည့် ခရစ်စတယ် ငွေရောင်မြွေ၏ အနောက်တွင် အဝေးကြီးလည်းမဟုတ်၊ အနီးကြီးလည်းမဟုတ်ဘဲ တန်းလန်းမျှသာ ထားရှိလိုက်သည်။
၎င်းမှာ လပြည့် ခရစ်စတယ် ငွေရောင်မြွေကို အလွန်အမင်း မျှော်လင့်ချက်မဲ့သွားစေသလို တစ်ဖက်ကလည်း မျှော်လင့်ချက် အရိပ်အယောင်တစ်ခုကို မြင်တွေ့နေရစေသည်။
ချန်ကျီက လပြည့် ခရစ်စတယ် ငွေရောင်မြွေကို အနောက်မှ လိုက်ရင်း အကွာအဝေးတစ်ခုအထိ ပျံသန်းလာခဲ့ပြီး သူက ယခုအချိန်တွင် သူကိုယ်တိုင် ဟဲကွမ်းတောင်တန်း၏ အနက်ရှိုင်းဆုံးနေရာသို့ မည်မျှအထိ ရောက်ရှိနေပြီလဲဆိုသည်ကို မသိတော့ပေ။
သို့သော်လည်း ချန်ကျီ၏ အသိစိတ်က အရှေ့ဘက်သို့ အမြဲတစေ စုံစမ်းထောက်လှမ်း နေဆဲ ဖြစ်ကာ လောလောဆယ်တွင် သူ့ကို ခြိမ်းခြောက်မှု ခံစားရစေမည့် အော်ရာမျိုး ပေါ်လာခြင်း မရှိသေးပေ။
လပြည့် ခရစ်စတယ် ငွေရောင်မြွေကို လိုက်ရင်း အကွာအဝေးတစ်ခုအထိ ထပ်မံပျံသန်းလာခဲ့ရာ လပြည့် ခရစ်စတယ် ငွေရောင်မြွေ၏ အမြန် နှုန်းကမူ ချန်ကျီသာ လိုချင်ပါက အချိန်မရွေး ၎င်း၏ အရှေ့သို့ ပြေးထွက်ကာ ပိတ်ဆို့ရပ်တန့်ပစ်နိုင်လောက်အောင်အထိ နှေးကွေးသွားခဲ့ပြီ ဖြစ်သည်။
'ဒါဆိုရင် ၎င်းက ရိုးရိုးသားသား အသက်လုပြီး ထွက်ပြေးနေတာ သက်သက်ပဲလား' ဤမျှအထိ ဝေးဝေးလံလံ လိုက်လာခဲ့သော်လည်း ချန်ကျီ ထင်မှတ်ထားခဲ့သော ထောင်ချောက်မျိုး ပေါ်ပေါက်လာခြင်း မရှိသေးပေ။
'ထားလိုက်တော့... မင်း ဘာလုပ်ချင်လုပ်၊ အရင်ဆုံး မင်းကို ဓားနဲ့ အပိုင်းပိုင်း ဖြတ်လိုက်ဦးမယ်'
ဤလမ်းတစ်လျှောက်လုံးတွင် ချန်ကျီလည်း လိုက်ရသည်မှာ ငြီးငွေ့လာခဲ့ပြီ ဖြစ်ကာ အဓိကမှာ ဤကဲ့သို့ အမြဲတစေ လိုက်နေရခြင်းက အလွန်ပင် ပျင်းစရာကောင်းလွန်းသောကြောင့် ဖြစ်သည်။
ချက်ချင်းပင် ချန်ကျီက အရှိန်မြှင့်တင်လိုက်ရာ သူ၏ ကိုယ်ဟန်က လပြည့် ခရစ်စတယ် ငွေရောင်မြွေ၏ ခန္ဓာကိုယ်ပေါ်တွင် နဂါး လှံစိုက်ဝင်နေသော နေရာဆီသို့ ရောက်ရှိသွားခဲ့သည်။
ချန်ကျီက လက်ကို ဝှေ့ယမ်းလိုက်ပြီး နဂါး လှံကို တိုက်ရိုက် ပြန်လည်ရယူရန် ကြိုးပမ်းလိုက်သော်လည်း နှမြောစရာကောင်းစွာပင် နဂါး လှံမှာ အနည်းငယ်မျှပင် လှုပ်ရှားခြင်းမရှိဘဲ ငြိမ်သက်နေခဲ့သည်။
'ညပ်နေတာလား'
'ဒါဆိုရင်တော့ စိတ်မရှိပါနဲ့တော့'
ချန်ကျီက နောက်တစ်ကြိမ် ထပ်မံ၍ အရှိန်မြှင့်လိုက်ရာ လပြည့် ခရစ်စတယ် ငွေရောင်မြွေ၏ မြွေခေါင်းပိုင်းနေရာသို့ ကျော်တက်ရောက်ရှိသွားခဲ့ပြီ ဖြစ်သည်။
ချန်ကျီ၏ ပုံရိပ်က လပြည့် ခရစ်စတယ် ငွေရောင်မြွေ၏ မျက်လုံးကြီးများအတွင်းသို့ ထင်ဟပ်သွားခဲ့ရာ ၎င်း၏ မျက်ဝန်းတစ်စုံလုံးတွင် ထိတ်လန့်ချောက်ချားမှုများဖြင့် ပြည့်နှက်သွားတော့သည်။
လပြည့် ခရစ်စတယ် ငွေရောင်မြွေ၏ ဤအမူအရာကို ချန်ကျီက ဖမ်းမိသွားပြီး သူက တည်ငြိမ်စွာပင် ပြုံးလိုက်ကာ ပြောလိုက်သည်။ "ရပ်လိုက်တော့"
လပြည့် ခရစ်စတယ် ငွေရောင်မြွေက နားလည်နိုင်သော်လည်း ၎င်းက ဘယ်လိုလုပ်ပြီး ရပ်တန့်ရဲပါအံ့နည်း၊ ၎င်း၏ မျက်စိအရှေ့ရှိ လူသားကျင့်ကြံသူ၏ လက်ထဲ၌ သူ၏ ခြေထောက်အောက်တွင် နင်းထားသော ဓားပျံနှင့် ပုံစံတူညီသော ဓားတစ်စင်း ထပ်မံပေါ်ပေါက်လာခဲ့ပြီ ဖြစ်သည်။
ချန်ကျီလည်း အလွန်ပင် ကူကယ်ရာမဲ့နေမိကာ လက်နက်များကို သူ ပြင်ဆင်ထားသည်မှာ တကယ်ကို နည်းပါးလွန်းလှသည်။
နဂါး လှံနှင့် ချင်းယွမ်ဓားတို့ကို ယခုအချိန်တွင် လက်နက်အဖြစ် အသုံးပြု၍မရနိုင်သဖြင့် ကိုယ်ပွားများ အသုံးပြုနေသော ချင်းယွမ်ဓားကိုသာ အရင်ဆုံး ယူဆောင်၍ အသုံးပြုလိုက်ရသည်။
"မရပ်ဘူးဆိုရင်တော့ ငါ့ရဲ့ ဓားချက်တစ်ချက်ကို မြည်းစမ်းကြည့်လိုက်တော့"
ဤလပြည့် ခရစ်စတယ် ငွေရောင်မြွေက သူ ပြောသော စကားကို နားလည်နိုင်စွမ်းရှိကြောင်း ချန်ကျီ ယုံကြည်ထားသည်၊ အဘယ်ကြောင့်ဆိုသော် ဤလပြည့် ခရစ်စတယ် ငွေရောင်မြွေက အဆင့်နှစ် နှောင်းပိုင်းအဆင့်သို့ ရောက်ရှိနေပြီ ဖြစ်ကာ အဆင့်သုံး ရောက်၍ ဉာဏ်ပညာပွင့်ရန် ခြေတစ်လှမ်း သာ လိုတော့သောကြောင့် ဖြစ်သည်။
ချန်ကျီက လက်ကို ဝှေ့ယမ်းကာ ဓားအလင်းတန်းတစ်ချက်ကို ပစ်လွှတ်လိုက်ပြီး ဒုတိယမြောက် ဓားချက်ကို ထပ်မံ၍ ခုတ်ပိုင်းရန် ပြင်လိုက်သည်။
ထိုအချိန်တွင် စိတ်အာရုံမှတစ်ဆင့် စကားသံတစ်ခု ချန်ကျီ၏ ဦးနှောက်ထဲသို့ လှမ်း၍ ရောက်ရှိလာခဲ့သဖြင့် သူက ခေတ္တမျှ တွန့်ဆုတ်သွားခဲ့ရသည်။
"ခဏနေ ပါဦး" စကားသံက အနည်းငယ်မျှ ထစ်ငေါ့နေခဲ့သည်။
ချန်ကျီ၏ မျက်နှာထက်တွင် မေးခွန်းထုတ်စရာများဖြင့် ပြည့်နှက်သွားကာ တွေးလိုက်မိသည်။ 'ဘယ်သူလဲ... ဘယ်သူက ငါ့ကို စိတ်အာရုံကနေတစ်ဆင့် စကားလှမ်းပြောနေတာလဲ'
သူ၏ အသိစိတ်ထဲတွင်မူ မည်သည့် အာရုံခံမိခြင်းမျှ ပေါ်ပေါက်လာခြင်း မရှိသေးပေ။
လပြည့် ခရစ်စတယ် ငွေရောင်မြွေမှာမူ ယခုအချိန်တွင် ထွက်ပြေးခြင်းကို ရပ်တန့်လိုက်ပြီ ဖြစ်ကာ ခွန်အားများ အကုန်အစင် ကုန်ခမ်းသွားပြီးနောက် မီတာအတော် ရှည်လျားသော ခန္ဓာကိုယ်ကြီးက မြေပြင်ပေါ်သို့ ဘုန်းဘုန်းလဲကျသွားတော့သည်။
ချန်ကျီက မြေပြင်ပေါ်ရှိ လပြည့် ခရစ်စတယ် ငွေရောင်မြွေကို တစ်ချက် ကြည့်လိုက်ပြီး မျက်မှောင်ကြုတ်ကာ ပတ်ဝန်းကျင်ကို သတိကြီးစွာဖြင့် အကဲခတ်လိုက်သည်။
သူ၏ အသိစိတ်က အာရုံခံ ၍မရနိုင်သော အော်ရာပိုင်ရှင်၏ ခွန်အားမှာ ဧကန်မုချ သူ၏ အထက်တွင် ရှိနေပေလိမ့်မည်။
သို့သော်လည်း တစ်ဖက်လူက ဘာကြောင့် တိုက်ရိုက် ဝင်မတိုက်ခိုက်ရသလဲဆိုသည်ကိုမူ သူ သံသယဝင်နေမိသည်။
ချန်ကျီ သံသယဝင်နေစဉ် အတိအကျမှာပင် တရှုပ်ရှုပ် တရှဲရှဲနှင့် တွားသွားသံတစ်ချို့ ထွက်ပေါ်လာခဲ့သည်။
ချန်ကျီ၏ အသိစိတ်ထဲတွင် နောက်ဆုံး၌ အာရုံခံမိခြင်းတစ်ခု ပေါ်ပေါက်လာခဲ့ပြီ ဖြစ်ကာ ကြီးမားလှသော အော်ရာတစ်ခု ပေါ်ထွက်လာခဲ့သော်လည်း တစ်ဖက်လူ၏ ကျင့်ကြံခြင်းနယ်ပယ် အဆင့် ကိုမူ လုံးဝ အာရုံခံ စုံစမ်း၍ မရနိုင်ခဲ့ပေ။