အခန်း ၁၂၉
Vol. 13 Ch. 129
အခန်း (၁၂၉) အဆင့်သုံး မိစ္ဆာသားရဲ၊ အဓိပ္ပာယ်မရှိသော ညှိနှိုင်းမှု
တရှုပ်ရှုပ် တရှဲရှဲနှင့် တွားသွားသံများ ပိုမိုနီးကပ်လာသည်ကို ချန်ကျီ ကြားလိုက်ရပြီး မြေပြင်ပေါ်တွင် လဲလျောင်းနေသော လပြည့် ခရစ်စတယ် ငွေရောင်မြွေထက်ပင် ပိုမိုကြီးမားလှသော မြွေခေါင်းကြီးတစ်ခု သူ၏ မျက်စိအရှေ့သို့ ထင်ဟပ်လာခဲ့သည်။
ချန်ကျီက သူ့ကိုယ်သး အလွန်ပင် သေးငယ်လှသည်ဟု ချက်ချင်း ခံစားလိုက်ရပြီး တစ်ဖက်လူ၏ မျက်လုံးထဲတွင်မူ သူက ကြက်ပေါက်စလေးတစ်ကောင်ကဲ့သို့ ဖြစ်နေပေလိမ့်မည်။
ချန်ကျီက စိတ်ကူး တစ်ခု ဖြစ်ပေါ်လာပြီး ကောင်းကင်မျက်စိ ကို လည်ပတ်စေလိုက်သည်။
ချက်ချင်းပင် ဤကြီးမားလှသော လပြည့် ခရစ်စတယ် ငွေရောင်မြွေ၏ ကျင့်ကြံခြင်းနယ်ပယ် သတင်းအချက်အလက်များက ချန်ကျီ၏ ဦးနှောက်ထဲ၌ ပေါ်ပေါက်လာခဲ့သည်။
"အဆင့်သုံး အလယ်အလတ်အဆင့် မိစ္ဆာသားရဲလား... သူ့ရဲ့ ခန္ဓာကိုယ် အရွယ်အစားကို ကြည့်ရတာ နှောင်းပိုင်းအဆင့်ကို ရောက်တော့မယ့် ပုံပဲ"
ချန်ကျီ၏ ရင်ထဲ၌ အဆင့်သုံး လပြည့် ခရစ်စတယ် ငွေရောင်မြွေက ဘာကြောင့် တိုက်ရိုက် ဝင်မတိုက်ခိုက်ရသလဲဆိုသည်ကို သံသယဝင်နေမိသည်၊ အဘယ်ကြောင့်ဆိုသော် အားနည်းလှသော သူက တစ်ဖက်လူ၏ မျက်လုံးထဲတွင် စာဖွဲ့လောက်စရာ မရှိသောကြောင့် ဖြစ်သည်။
"မြေပြင်ပေါ်က ဒီမြွေကြီးအတွက်ကြောင့်လား"
အဆင့်သုံး အလယ်အလတ်အဆင့်ရှိသော လပြည့် ခရစ်စတယ် ငွေရောင်မြွေနှင့် ရင်ဆိုင်နေရသော်လည်း ချန်ကျီကမူ အနည်းငယ်မျှပင် ကြောက်ရွံ့ခြင်း မရှိပေ။ အဆင့်သုံး အလယ်အလတ်အဆင့် မိစ္ဆာသားရဲက လူသားကျင့်ကြံသူ၏ ရွှေအူတိုင် အဆင့် အလယ်အလတ်အဆင့်နှင့် ညီမျှသည်။
ချန်ကျီက သူနှင့် ရွှေအူတိုင်အဆင့် ကျင့်ကြံသူတို့ကြားမှ ကွာဟချက်ကို ကိုယ်တိုင် လက်တွေ့စမ်းသပ်ကြည့်ချင်စိတ် ရှိနေသည်၊ ဘာပဲဖြစ်ဖြစ် သူ့တွင် အသုံးမပြုရသေးသော ဝှက်ဖဲ အမြောက်အမြား ရှိနေဆဲ ဖြစ်ရာ ဒါကပင် သူ၏ အားကိုးရာ ဖြစ်သည်။
အဆင့်သုံး လပြည့် ခရစ်စတယ် ငွေရောင်မြွေသည်လည်း သူ့ကို အနည်းငယ်မျှပင် မကြောက်ရွံ့သော အဆင့်နိမ့် ကျင့်ကြံသူတစ်ဦးနှင့် ပထမဆုံးအကြိမ် တွေ့ ဖူးခြင်း ဖြစ်သည်။ ၎င်းက ခုနက ဝင်မတိုက်ခိုက်ခြင်းမှာ သူ၏ မျိုးဆက်ကို ထိခိုက်မှုမရှိစေချင်ခြင်းကြောင့် ဖြစ်သလို လက်ရှိတွင် ၎င်းကိုယ်တိုင်လည်း တိုက်ခိုက်ရန် အဆင်မပြေသောကြောင့် ဖြစ်သည်။
ချန်ကျီလည်း အချိန်ဆွဲမနေတော့ဘဲ တစ်ဖက်လူက ဝင်မတိုက်ခိုက်သရွေ့ သူကလည်း စမ်းသပ်ကြည့်ရန် ရည်ရွယ်ချက် ရှိနေသည်။
သူက အဆင့်သုံး လပြည့် ခရစ်စတယ် ငွေရောင်မြွေကို တိုက်ရိုက်ပင် ဥပေက္ခာပြုလိုက်ပြီး မြေပြင်ပေါ်ရှိ အဆင့်နှစ် လပြည့် ခရစ်စတယ် ငွေရောင်မြွေ၏ ခန္ဓာကိုယ်ပေါ်တွင် နဂါး လှံစိုက်ဝင်နေသော နေရာဆီသို့ ခန္ဓာကိုယ်ကို လှုပ်ရှားကာ ရောက်ရှိသွားခဲ့သည်။
ချန်ကျီက အဆင့်သုံး လပြည့် ခရစ်စတယ် ငွေရောင်မြွေမှာမူ ယခုတိုင် မည်သည့် လှုပ်ရှားမှုမျှ မရှိသည်ကို သတိပြုမိလိုက်ရာ ဤသို့ဖြစ်နေမှတော့ သူက ချင်းယွမ်ဓားပေါ်မှ တိုက်ရိုက်ခုန်ချလိုက်ပြီး အဆင့်နှစ် လပြည့် ခရစ်စတယ် ငွေရောင်မြွေ၏ ခန္ဓာကိုယ်ပေါ်တွင် မတ်တတ်ရပ်လိုက်ကာ သူ၏ လက်ကမူ နဂါး လှံ၏ လှံရိုးကို ဆုပ်ကိုင်လိုက်ပြီ ဖြစ်သည်။
ဤအချိန်တွင် ချန်ကျီက အဆင့်သုံး လပြည့် ခရစ်စတယ် ငွေရောင်မြွေထံမှ ထွက်ပေါ်လာသော ဒေါသတရားများကို အာရုံခံမိလိုက်သဖြင့် ခေါင်းမော့ကာ ၎င်းကို တစ်ချက် ကြည့်လိုက်သော်လည်း လက်မှ လှုပ်ရှားမှုကိုမူ ရပ်တန့်မထားဘဲ အားစိုက်၍ ဆွဲထုတ်လိုက်ရာ နဂါး လှံက ကျွတ်ထွက်လာခဲ့သည်။
ချက်ချင်းပင် အဆင့်နှစ် လပြည့် ခရစ်စတယ် ငွေရောင်မြွေ၏ ခန္ဓာကိုယ်မှ သွေးများ ပန်းထွက်လာခဲ့ပြီး အသိစိတ်မဲ့နေသော မြွေခန္ဓာကိုယ်ကြီးကလည်း လိုက်၍ တုန်ခါသွားခဲ့ရသည်။
အဆင့်သုံး လပြည့် ခရစ်စတယ် ငွေရောင်မြွေမှာမူ အလွန်အမင်း ဒေါသထွက်နေခဲ့ပြီ ဖြစ်ကာ ၎င်းက အလွန်ဒေါသထွက်နေသော်လည်း ချန်ကျီကို တိုက်ရိုက် ဝင်မတိုက်ခိုက်သေးပေ ၊ အဆင့်နှစ် လပြည့် ခရစ်စတယ် ငွေရောင်မြွေ မသေသရွေ့ လုံလောက်လှပြီ ဖြစ်သည်။
ချန်ကျီကမူ အမှန်တကယ်တော့ အချိန်မရွေး ပြန်လည်တိုက်ခိုက်ရန် ပြင်ဆင်ထားပြီး ဖြစ်ရာ ယခုအချိန်တွင် စိတ်ထဲ၌ သံသယဝင်နေမိသည်။ "ဒီလောက်အထိ လုပ်တာတောင် ဘာတုံ့ပြန်မှုမှ မရှိဘူးလား၊ ဒါဆိုရင် မင်းက ဘာလာလုပ်တာလဲ"
"မင်း ထွက်သွားလို့ရပြီ"
ထစ်ငေါ့နေသော စကားသံတစ်ခု ချန်ကျီ၏ ဦးနှောက်ထဲသို့ စီးဝင်လာခဲ့ရာ ၎င်းမှာ အဆင့်သုံး လပြည့် ခရစ်စတယ် ငွေရောင်မြွေက သူ့ကို စိတ်ချင်းဆက်သွယ်၍ စကားပြောနေခြင်း ဖြစ်ကြောင်း သူ သိလိုက်သည်။
သို့သော်လည်း ယခုအကြိမ် စိတ်ချင်းဆက်သွယ်မှုက ကနဦး ခံစားချက်နှင့်မူ အနည်းငယ် ကွဲပြားနေပြီး ဤစကားသံထဲတွင် ရက်စက်ကြမ်းကြုတ်သော အရိပ်အယောင်တစ်ခု စွဲကပ်နေသည်။
ချန်ကျီက ခပ်ဖွဖွ ပြုံးလိုက်ပြီး ပြောလိုက်သည်။ "ငါက မထွက်သွားဘူးဆိုရင်ကော"
သူက ရိပ်မိသွားခဲ့ပြီ ဖြစ်ကာ ဤအဆင့်သုံး လပြည့် ခရစ်စတယ် ငွေရောင်မြွေက တစ်စုံတစ်ခု၏ ချုပ်နှောင်ခြင်းကို ခံထားရရမည် ဖြစ်ပြီး လက်ရှိတွင် တိုက်ခိုက်ရန် မသင့်တော်ပေ။
သို့မဟုတ်ပါက ပထမဆုံး တွေ့ရုံမျှဖြင့် သူ့ကို သတ်ဖြတ်ခဲ့ပြီး ဖြစ်လိမ့်မည်ဖြစ်ကာ ယခုအချိန်အထိ စောင့်ဆိုင်းနေမည် မဟုတ်ပေ။
လပြည့် ခရစ်စတယ် ငွေရောင်မြွေက ဤကဲ့သို့ ဖြစ်နေလေလေ၊ ချန်ကျီက ပို၍ မထွက်သွားချင်လေလေ ဖြစ်ကာ သူသည် မူလကတည်းက သူ၏ ခွန်အားက မည်သည့်အဆင့်သို့ ရောက်ရှိနေပြီလဲဆိုသည်ကို လက်တွေ့စမ်းသပ်ရန် လာခဲ့ခြင်း ဖြစ်သည်။
ယခုအခါ ဤမျှကောင်းမွန်သော လေ့ကျင့် ဖော်တစ်ဦး ရှိနေပြီ ဖြစ်ရာ ဘယ်လိုလုပ်ပြီး ဒီအတိုင်း လက်လွှတ်လိုက်ပါအံ့နည်း။
သို့သော်လည်း ယခုအချိန်တွင် အဆင့်သုံး လပြည့် ခရစ်စတယ် ငွေရောင်မြွေက တိုက်ခိုက်မည့် အရိပ်အယောင်မျှပင် မရှိသဖြင့် ၎င်းကို ဒေါသထွက်အောင် လှုံ့ဆော်ရန်သာ ရွေးချယ်စရာ ရှိတော့သည်၊ 'မင်း အားနည်းနေတုန်း မင်းအသက်ကို နှုတ်ရမယ်' ဟူသော အမှန်တရားကို ချန်ကျီက ကောင်းကောင်း သိရှိထားသည်။
ချန်ကျီ၏ ခုနက စကားကြောင့် အဆင့်သုံး လပြည့် ခရစ်စတယ် ငွေရောင်မြွေမှာ ဒေါသထွက်သွားသည်ကို သူ သိသိသာသာ အာရုံခံမိလိုက်သော်လည်း ၎င်းကမူ ယခုတိုင် အောင့်အည်းသည်းခံနေဆဲ ဖြစ်သည်။
အဆင့်သုံး လပြည့် ခရစ်စတယ် ငွေရောင်မြွေက အဆုံးစွန်အထိ ဒေါသထွက်နေခဲ့ပြီ ဖြစ်ကာ ၎င်းက မျက်စိအရှေ့ရှိ လူသား၏ အသက်ကို ချမ်းသာပေးရန် ရည်ရွယ်ထားသော်လည်း တစ်ဖက်လူကမူ အဆိုးအကောင်းကို မသိတတ်ပေ ။
၎င်းတွင်လည်း လက်ရှိ၌ ထုတ်ဖော်မပြောနိုင်သော အခက်အခဲများ ရှိနေသဖြင့်သာ ဖြစ်ပြီး သို့မဟုတ်ပါက ဤလူသားကို ဟင်းတစ်လုပ်အဖြစ် ဟိုးကတည်းက ဝါးမြိုခဲ့ပြီးပြီ ဖြစ်သည်။
အတိအကျပင် ထိုအချိန်တွင် ချန်ကျီက အဆင့်သုံး လပြည့် ခရစ်စတယ် ငွေရောင်မြွေ၏ ခန္ဓာကိုယ်ပေါ်မှ ပုံမှန်မဟုတ်သော အော်ရာတစ်ခု ဖြတ်သန်းသွားသည်ကို ရုတ်တရက် အာရုံခံမိလိုက်သည်။
သို့သော်လည်း ၎င်းမှာ ခဏတာမျှသာ ဖြစ်ပြီး ချန်ကျီက သေသေချာချာ ထပ်မံအာရုံခံရန် ပြင်ဆင်လိုက်ချိန်တွင် ထိုအော်ရာက ပျောက်ကွယ်သွားခဲ့ပြီ ဖြစ်သည်။
ချန်ကျီ၏ ရင်ထဲ၌ သံသယဝင်သွားကာ မျက်လုံးများကို အနည်းငယ် ပင့်၍ အဆင့်သုံး လပြည့် ခရစ်စတယ် ငွေရောင်မြွေကို ကြည့်ကာ တွေးလိုက်သည်။ "တစ်ခုခုတော့ မှားနေပြီ"
တစ်ချိန်တည်းမှာပင် အဆင့်သုံး လပြည့် ခရစ်စတယ် ငွေရောင်မြွေသည်လည်း စိတ်ထဲမှနေ၍ ရေရွတ်လိုက်မိသည်။ "မကောင်းတော့ဘူး"
ထိုအချိန်တွင် အနည်းငယ် ထစ်ငေါ့နေသော စိတ်ချင်းဆက်သွယ်မှုတစ်ခု ချန်ကျီ၏ ဦးနှောက်ထဲသို့ ထပ်မံရောက်ရှိလာခဲ့ပြန်သည်။
"မင်းကို ဝိညာဉ်ဆေးပင်တစ်ပင် ပေးမယ်၊ သူ့ကို လွှတ်ပေးလိုက်ပါ"
"ဒီလိုမျိုး အဆင်ပြေတဲ့ ကိစ္စမျိုးလည်း ရှိသေးတာလား"
ချန်ကျီက တွန့်ဆုတ်နေစဉ် အဆင့်သုံး လပြည့် ခရစ်စတယ် ငွေရောင်မြွေရှိရာ ဘက်မှ ဝိညာဉ်ဆေးပင်တစ်ပင် ပျံသန်းလာခဲ့သည်။
ချန်ကျီက အာရုံစိုက်၍ ကြည့်လိုက်ရာ ဤဝိညာဉ်ဆေးပင်ကို သူ သိရှိထားသည်၊ အနန္တစတိုးဆိုင် ထဲတွင် မြင်တွေ့ဖူးခြင်း ဖြစ်ကာ မြေပြင်ပေါ်ရှိ အဆင့်နှစ် လပြည့် ခရစ်စတယ် ငွေရောင်မြွေ၏ ခန္ဓာကိုယ်ပေါ်မှ ကုန်ကြမ်းပစ္စည်းများထက် တကယ်ကို ပိုမိုတန်ဖိုးရှိလှသည်။
ဝိညာဉ်ဆေးပင်က ချန်ကျီ၏ လက်ထဲသို့ ပျံသန်းရောက်ရှိလာခဲ့ရာ ချက်ချင်းပင် သူက အနန္တနေရာလွတ်ထဲသို့ တိုက်ရိုက်သိမ်းဆည်းလိုက်သည်၊ အလကားရတာကို မယူဘဲ နေစရာ အကြောင်းမရှိပေ ။
အဆင့်သုံး လပြည့် ခရစ်စတယ် ငွေရောင်မြွေ၏ ဝိညာဉ်ဆေးပင်ကို သိမ်းဆည်းပြီးနောက်တွင်လည်း ချန်ကျီကမူ ထွက်ခွာသွားမည့် အရိပ်အယောင် မရှိသေးဘဲ သူက စကားပြောရန် ပြင်လိုက်သည်။
အတိအကျပင် ထိုအချိန်တွင် ခုနက သူ အာရုံခံမိခဲ့သော ပုံမှန်မဟုတ်သည့် အော်ရာက ထပ်မံပေါ်ပေါက်လာခဲ့ပြန်သည်။
'ဒီတစ်ခေါက်တော့ လုံးဝ မမှားနိုင်တော့ဘူး၊ ဒီလပြည့် ခရစ်စတယ် ငွေရောင်မြွေရဲ့ ခန္ဓာကိုယ်ပေါ်မှာ လျှို့ဝှက်ချက်အကြီးကြီး ရှိနေတယ်၊ သူက တစ်စုံတစ်ခုကို အစွမ်းကုန် ဖိနှိပ်နေတာပဲ'
အဆင့်သုံး လပြည့် ခရစ်စတယ် ငွေရောင်မြွေသည်လည်း လက်ရှိတွင် အလွန်ပင် ခဲယဉ်းပင်ပန်းနေခဲ့ရသည်၊ ၎င်းက ခန္ဓာကိုယ်အတွင်းမှ စွမ်းအားများကို အစွမ်းကုန် ဖိနှိပ်နေရခြင်း ဖြစ်သော်လည်း ချန်ကျီကမူ ၎င်းကို ဆက်တိုက် ဒေါသထွက်အောင် လှုံ့ဆော်နေသဖြင့် ၎င်း အစွမ်းကုန် ဖိနှိပ်ထားသော စွမ်းအားများက သူ့ကိုယ်သူ မထိန်းချုပ်နိုင်ဘဲ အပြင်သို့ လျှံထွက်နေခြင်း ဖြစ်သည်။
အဆင့်သုံး လပြည့် ခရစ်စတယ် ငွေရောင်မြွေ၏ ခန္ဓာကိုယ်ပေါ်မှ ထိုအော်ရာက ပိုမို၍ ထင်ရှားလာခဲ့သည်။
"သူက အဆင့်တက်နေတာလား" ချန်ကျီက အဆင့်သုံး လပြည့် ခရစ်စတယ် ငွေရောင်မြွေ တစ်လျှောက်လုံး ဝင်မတိုက်ခိုက်ရသည့် အဓိက အကြောင်းရင်းကို ခန့်မှန်းမိသွားခဲ့ပြီ ဖြစ်သည်။
ဤကဲ့သို့သော အခွင့်ကောင်းကို ချန်ကျီက ဘယ်လိုလုပ်ပြီး လက်လွှတ်ခံပါအံ့နည်း၊ ဒါက ကောင်းကင်ဘုံက ပေးသနားသော အခွင့်အရေး ဖြစ်သည်။
အကယ်၍ သာမန် ကျင့်ကြံသူတစ်ဦးဦးသာဆိုပါက ဤမျှကြီးမားလှသော စည်းစိမ်ချမ်းသာကြောင့် မူးဝေသွားလောက်ပြီ ဖြစ်သော်လည်း ချန်ကျီကမူ မတူပေ ၊ ဝိညာဉ်ဆေးပင်တစ်ပင် ပိုမိုရရှိခြင်းက အမှတ်အနည်းငယ် ပိုမိုရရှိခြင်းသာ ဖြစ်ရာ နည်းသည်ဖြစ်စေ၊ များသည်ဖြစ်စေ မယူဘဲနေစရာ အကြောင်းမရှိသည့် အမှန်တရားပင် ဖြစ်သည်။
"မလုံလောက်သေးဘူး" ချန်ကျီက အဆင့်သုံး လပြည့် ခရစ်စတယ် ငွေရောင်မြွေကို ပြုံး၍ ကြည့်လိုက်ရာ သူက အရာရာကို အကုန်အစင် ထိုးထွင်းသိမြင်သွားသည့် အမူအရာမျိုး ဖြစ်နေသည်။
"လူသားကျင့်ကြံသူ... မင်းက တကယ်ကို ရောင့်ရဲတင်းတိမ်မှု မရှိလှဘူးပဲ" အဆင့်သုံး လပြည့် ခရစ်စတယ် ငွေရောင်မြွေက ထစ်ငေါ့နေသော စကားသံဖြင့် ချန်ကျီကို စိတ်ချင်းဆက်သွယ်၍ ပြောလိုက်သည်။
အဆင့်သုံး လပြည့် ခရစ်စတယ် ငွေရောင်မြွေက လက်ရှိတွင် စိတ်ထဲ၌ ချန်ကျီကို တကယ်ကို နာကျည်းမုန်းတီးနေခဲ့ပြီ ဖြစ်သည်။
အကယ်၍ ၎င်းက ခုနတင် သူနှင့် အဆင့်တူသော မိစ္ဆာသားရဲတစ်ကောင်ကို ဝါးမြိုထားခဲ့ခြင်းကြောင့် ခန္ဓာကိုယ်တွင် ဒဏ်ရာရရှိထားခြင်းနှင့် ဝိညာဉ်ဆေးပင်တစ်ပင်ကို ထပ်မံစားသုံးထားခဲ့သဖြင့် ခန္ဓာကိုယ်အတွင်းမှ ထိုစွမ်းအားများကို စုပ်ယူပြီး ကျင့်ကြံခြင်းနယ်ပယ် အဆင့်တက်ရန် ပြင်ဆင်နေရခြင်းသာ မဟုတ်ပါက ၎င်းသည် အဘယ်ကြောင့် ယခုကဲ့သို့ ပြုလုပ်နေပါအံ့နည်း။
ခေတ္တမျှကြာပြီးနောက်တွင် အဆင့်သုံး လပြည့် ခရစ်စတယ် ငွေရောင်မြွေရှိရာ အရပ်မှ နောက်ထပ် ဝိညာဉ်ဆေးပင်တစ်ပင် ချန်ကျီရှိရာဆီသို့ ပျံသန်းလာခဲ့ပြန်သည်။
ဝိညာဉ်ဆေးပင်ကို မြင်တွေ့လိုက်ရသောအခါ ချန်ကျီ၏ ရင်ထဲ၌ အလွန်အမင်း ဝမ်းမြောက်သွားခဲ့ရပြီး အဆင့်သုံး လပြည့် ခရစ်စတယ် ငွေရောင်မြွေက ဤကဲ့သို့ ပြုလုပ်လေလေ၊ သူက ပို၍ စိုးရိမ်ပူပန်မှုမရှိလေလေ ဖြစ်ကာ ၎င်း၏ အားနည်းချက်ကို ဆုပ်ကိုင်ထားနိုင်ခဲ့သည့်အလား ဖြစ်နေသည်။
ချန်ကျီက ဝိညာဉ်ဆေးပင်ကို လှမ်းယူလိုက်ပြီး တွေးလိုက်သည်။ "ထပ်ပြီး မြတ်ပြန်ပြီ၊ ဒီအဆင့်သုံး မိစ္ဆာသားရဲရဲ့ ခန္ဓာကိုယ်ပေါ်က ကုန်ကြမ်းတွေထက်တောင် ပိုပြီး တန်ဖိုးရှိသေး တယ်"
အဆင့်သုံး လပြည့် ခရစ်စတယ် ငွေရောင်မြွေက ယခုအချိန်တွင် ချန်ကျီကို ဒေါသတကြီးဖြင့် စိုက်ကြည့်နေခဲ့ပြီး ချန်ကျီ၏ အော်ရာကို ရင်ထဲ၌ စွဲမြဲစွာ မှတ်သားထားလိုက်သည်။
၎င်းက ချန်ကျီကို အေးစက်သော မျက်ဝန်းများဖြင့် စိုက်ကြည့်နေပြီး အကယ်၍ ချန်ကျီသာ ထပ်မံ၍ မထွက်သွားပါက ၎င်းသည် ခန္ဓာကိုယ်အတွင်းမှ စွမ်းအားအချို့ ဆုံးရှုံးပျက်စီးခြင်းနှင့် ကျင့်ကြံခြင်းနယ်ပယ် အဆင့်မတက်နိုင်တော့ခြင်းတို့ကို ရင်ဆိုင်ရမည့်အရေးကို ဂရုမစိုက်တော့ဘဲ ချန်ကျီကို ဧကန်မုချ သတ်ဖြတ်ပစ်တော့မည် ဖြစ်သည်။
လူသားတို့၏ လောဘဇောက အဆုံးအစမရှိလှရာ ၎င်းက မည်မျှပင် ပေးသည်ဖြစ်စေ နောက်တစ်ကြိမ် ရှိနေဦးမည်သာ ဖြစ်သည်။
ချန်ကျီက ခပ်ဖွဖွ ပြုံးလိုက်ပြီး ပြောလိုက်သည်။ "ကောင်းကင်ဘုံမှာ သက်ရှိတွေအပေါ် သနားကြင်နာတတ်တဲ့ နှလုံးသား ရှိတယ်၊ မင်းရဲ့ အသက်ကို တစ်ကြိမ် ချမ်းသာပေးလိုက်မယ်... သွားပြီ"
ချန်ကျီက လုံလောက်စွာ ရရှိခဲ့ပြီဖြစ်ရာ အဆင့်သုံး လပြည့် ခရစ်စတယ် ငွေရောင်မြွေက ဤမျှအထိ စိတ်ရင်းစေတနာ ရှိနေမှတော့ သူကလည်း အလွန်အမင်း အနိုင်ကျင့်ရန် အဆင်မပြေတော့ပေ၊ ဘာပဲဖြစ်ဖြစ် သူသည်လည်း စည်းကမ်းချက် ရှိသော လူတစ်ယောက် ဖြစ်သည်။
ယခုအချိန်တွင် လပြည့် ခရစ်စတယ် ငွေရောင်မြွေကို ရှာဖွေပြီး လက်ရည်စမ်းရန် မလိုအပ်တော့ပေ၊ ဘာပဲဖြစ်ဖြစ် ၎င်းကို သတ်ဖြတ်လိုက်လည်း ထိုမျှသာ ဖြစ်ကာ ဟဲကွမ်းတောင်တန်းအတွင်း၌ ၎င်းတစ်ကောင်တည်းသာ ရှိနေသော မိစ္ဆာသားရဲ မဟုတ်ပေ ။
ချန်ကျီက ချင်းယွမ်ဓားကို ပစ်လွှတ်လိုက်ပြီး ဖွဖွလေး ခုန်တက်ကာ လှပစွာ ထွက်ခွာသွားခဲ့တော့သည်။
အဆင့်သုံး လပြည့် ခရစ်စတယ် ငွေရောင်မြွေကမူ ချန်ကျီ ထွက်ခွာသွားသည်ကို အေးစက်သော မျက်ဝန်းများဖြင့် စိုက်ကြည့်နေခဲ့သည်။
ချန်ကျီ၏ အော်ရာကို ၎င်းက ရင်ထဲ၌ မှတ်သားထားပြီး ဖြစ်ရာ ၎င်းကို နောက်ထပ် အချိန်အနည်းငယ်မျှသာ ပေးပါက ၎င်းအား ခြိမ်းခြောက်ငွေညှစ်ခဲ့သော ဤလူသားကျင့်ကြံသူကို ဟဲကွမ်းတောင်တန်းထဲမှ လုံးဝ ထွက်ခွာမသွားနိုင်အောင် ပြုလုပ်ပစ်မည် ဖြစ်သည်။
အဆင့်သုံး လပြည့် ခရစ်စတယ် ငွေရောင်မြွေက တစ်ဖက်မှ ခန္ဓာကိုယ်အတွင်းမှ စွမ်းအားများကို ဖိနှိပ်နေရင်း တစ်ဖက်မှလည်း ဝိညာဉ်စွမ်းအားအချို့ကို ထုတ်ဖော်ကာ အဆင့်နှစ် လပြည့် ခရစ်စတယ် ငွေရောင်မြွေကို ဆွဲယူ၍ သူ့ အသိုက်ရှိရာဆီသို့ ဦးတည်ရွေ့လျားသွားခဲ့သည်။
၎င်းမှာ မူလကတည်းက ကျင့်ကြံခြင်းနယ်ပယ် အဆင့်တက်ရန်အတွက် တံခါးပိတ်ကျင့်ကြံနေခြင်း ဖြစ်ပြီး အကယ်၍ သူ့ ဤမျိုးဆက်က သးနှင့် ဤမျှအထိ နီးကပ်သော အကွာအဝေးသို့ ရောက်ရှိမလာခဲ့ပါက ၎င်းသည်လည်း အာရုံခံမိလိမ့်မည် မဟုတ်ပေ။
ကူကယ်ရာမဲ့စွာဖြင့် ဤကဲ့သို့သော အရေးကြီးလှသော အချိန်အခါတွင် ၎င်းသည်လည်း ယာယီအားဖြင့် ခေတ္တမျှ ရပ်တန့်ရန်သာ ရွေးချယ်ခဲ့ရသည်။
သို့သော်လည်း အဆင့်နှစ် လပြည့် ခရစ်စတယ် ငွေရောင်မြွေကို ကယ်တင်လိုက်ရခြင်းက ၎င်းကို ရင်ထဲ၌ အလွန်ပင် နှမြောတသ ဖြစ်စေခဲ့သည်၊ အဘယ်ကြောင့်ဆိုသော် ထိုဝိညာဉ်ဆေးပင်များက အဆင့်လေးသို့ တက်လှမ်းရန်အတွက် ၎င်း ကြိုတင်ပြင်ဆင်ထားခဲ့သော အရာများ ဖြစ်သောကြောင့် ဖြစ်သည်။
အရေအတွက် အများအပြား မဟုတ်သော်လည်း ဤကဲ့သို့ အလကား ပေးလိုက်ရခြင်းက ၎င်းကို ထုတ်မပြောနိုင်သော ခံစားချက်မျိုး ဖြစ်ပေါ်စေသည်။
၎င်းက ယခုအချိန်တွင် ခန္ဓာကိုယ်အတွင်းမှ စွမ်းအားများကို အမြန်ဆုံး သန့်စင်ပြီး အဆင့်တက်လှမ်းကာ ဟဲကွမ်းတောင်တန်းကို သွေးချောင်းစီးအောင် ပြုလုပ်ပစ်ရန်သာ တွေးတောနေမိသည်။
ဘေးအန္တရာယ်များ ကျရောက်လာတော့မည်ကို ချန်ကျီကမူ ယခုတိုင် မသိရှိသေးဘဲ အဆင့်သုံး မိစ္ဆာသားရဲကို ဆက်လက်ရှာဖွေနေဆဲ ဖြစ်သည်။
အဆင့်သုံး မိစ္ဆာသားရဲကို ရှာဖွေတွေ့ရှိပြီးနောက်တွင်မူ သူသည် အဆင့်နှစ် မိစ္ဆာသားရဲများအပေါ် စိတ်ဝင်စားမှု မရှိတော့ပေ။
"ငါ ဘယ်တုန်းက ဒီလောက်အထိ စိတ်ကောင်းရှိသွားရတာလဲ၊ နောက်ထပ် နည်းနည်းလောက် ပိုပြီး တောင်းခဲ့သင့်တာ" နောက်ထပ် အဆင့်သုံး မိစ္ဆာသားရဲတစ်ကောင်ကို ရှာဖွေနေသော ချန်ကျီက သူ့ကိုယ်သူ ရုတ်တရက် မေးခွန်းထုတ်လိုက်မိသည်။
သူ၏ ဤမေးခွန်းထုတ်မှုက အလွန်ပင် စိုးရိမ်ပူပန်မှုမရှိသော ပုံစံမျိုး ဖြစ်နေခဲ့သည်။
သူက စိုးရိမ်ပူပန်မှုမရှိ ဖြစ်နေသော်လည်း ထိုတစ်ကိုယ်တော် ကျင့်ကြံသူများမှာမူ ဒုက္ခရောက်ကြရတော့မည် ဖြစ်သည်။