အခန်း ၁၃၀
Vol. 13 Ch. 130
အခန်း (၁၃၀) ယဲ့ကျန်ထျန်း တံခါးပိတ်ကျင့်ကြံခြင်း၊ ကျင့်ကြံခြင်းက တကယ်ကို ခက်ခဲလွန်းတယ်
ယဲ့မိသားစု
ယဲ့ကိုင်က ပြန်ရောက်လာပြီးနောက် ချက်ချင်းပင် ခုနက ဝယ်ယူခဲ့သော ရွှေအူတိုင်အဆင့်တက် ဆေးလုံး ကို ယဲ့ကျန်ထျန်းထံသို့ ပေးလိုက်သည်။
"အဖေ... ဒါက"
"အဆင့်တက် ဆေးလုံးပဲ၊ ယူသွားပြီး သေသေချာချာ ကျင့်ကြံချေ"
ယဲ့ကျန်ထျန်း၏ ရင်ထဲ၌ တစ်စုံတစ်ခုကို ရိပ်မိသွားပုံရပြီး မေးလိုက်သည်။ "အဖေက အနန္တကုန်စုံဆိုင်ကို သွားခဲ့တာလား"
ယဲ့ကိုင်က ခေတ္တမျှ တွန့်ဆုတ်နေပြီးမှ ခေါင်းညိတ်ပြလိုက်သည်။
"သေသေချာချာ ကျင့်ကြံပါ၊ အနန္တကုန်စုံဆိုင်ရဲ့ ကိစ္စကို မင်း လောလောဆယ် ဂရုစိုက်ဖို့ မလိုဘူး၊ ငါ့မှာ ကိုယ်ပိုင်အစီအစဉ် ရှိတယ်"
ယဲ့ကျန်ထျန်းက နောက်ထပ် တစ်စုံတစ်ခုကို ထပ်မေးချင်သေးသော်လည်း ယဲ့ကိုင်ကမူ မျက်လုံးများကို မှိတ်ကာ စိတ်ငြိမ်သက်အောင် ပြုလုပ်နေပြီ ဖြစ်ရာ သူ့ကို နောက်ထပ် မမေးနိုင်တော့ပေ ။
"အဖေ့ကို ကျေးဇူးတင်ပါတယ်" ယဲ့ကျန်ထျန်းက ယဲ့ကိုင်က သူ့ကို အဆင့်တက် ဆေးလုံး ပေးခဲ့ခြင်းအတွက် ကျေးဇူးတင်နေခြင်း ဖြစ်ကာ သူ့ကို သားအရင်းတစ်ယောက်လို ဆက်ဆံနေဆဲ ဖြစ်သည်ဟု သတ်မှတ်လိုက်သည်။
ယဲ့ကိုင်ကမူ မည်သည့်တုံ့ပြန်မှုမျှ မပြုလုပ်ခဲ့ပေ။
ယဲ့ကျန်ထျန်းက တိတ်ဆိတ်စွာ ထွက်ခွာသွားခဲ့သည်၊ ယဲ့ကိုင်က ပြောပြီးပြီ ဖြစ်၍ အနန္တကုန်စုံဆိုင်၏ ကိစ္စကို သူလည်း ထပ်မံ၍ စိတ်မပူတော့ဘဲ လက်ရှိတွင် စိတ်အေးချမ်းသာစွာဖြင့် အဆင့်တက်လှမ်းရန်သာ လိုအပ်တော့သည်။
ယဲ့ကျန်ထျန်း ထွက်ခွာသွားပြီးနောက် မကြာမီမှာပင် ယဲ့ကိုင်၏ လျှို့ဝှက်အခန်းအပြင်ဘက်သို့ နောက်ထပ် လူရိပ်တစ်ခု ပေါ်ပေါက်လာခဲ့ပြီး လူမရောက်လာခင် အသံက အရင်ဆုံး ရောက်ရှိလာခဲ့သည်။
"အဘိုး... ကြည့်ပါဦး၊ မြေး အခု အုတ်မြစ်ချ ခြင်းအဆင့်ကို တက်လှမ်းနိုင်ခဲ့ပြီ"
ဤအသံကို ကြားလိုက်ရသောအခါ ယဲ့ကိုင်က မျက်လုံးများကို ဖွင့်လိုက်ပြီး ဝင်ရောက်လာသော ယဲ့ပိုင်ရီကို နူးညံ့သော မျက်နှာထားဖြင့် စိုက်ကြည့်လိုက်သည်။
"မြေးလေးက တကယ်ကို တော်တာပဲ"
ယဲ့ပိုင်ရီ ဝင်လာပြီးနောက် ယဲ့ကိုင်က ယဲ့ပိုင်ရီ၏ အုတ်မြစ်ချ ခြင်းအဆင့် ကျင့်ကြံခြင်းနယ်ပယ်က စက္ကူဖြင့် ပြုလုပ်ထားသည့်အလား ဖြစ်နေပြီး ဆေးလုံးများဖြင့်သာ ပုံအော၍ မြှင့်တင်ထားခြင်း ဖြစ်ကြောင်း ချက်ချင်း သိလိုက်သည်၊ ယဲ့ပိုင်ရီ၏ ခန္ဓာကိုယ်အတွင်းမှ ဝိညာဉ်စွမ်းအားများက အလွန်ပင် နောက်ကျိရှုပ်ထွေးနေပြီး အားနည်းချက် အပြည့် ဖြစ်နေသည်။
ယဲ့ပိုင်ရီကမူ သူ့ကိုယ်သူ မသိဘဲ ယခုတိုင် အလွန်ပင် ဂုဏ်ယူဝါကြွားနေဆဲ ဖြစ်သည်။ "ဒါပေါ့... အဘိုးက ပိုတော်လို့ပါ၊ မြေးအတွက် အလယ်အလတ် အုတ်မြစ်ချ ဆေးလုံးကို ရှာပေးခဲ့လို့ အုတ်မြစ်ချ တာက လွယ်လွယ်လေးပဲ"
ယဲ့ပိုင်ရီ၏ စကားကို ကြားလိုက်ရသောအခါ ယဲ့ကို်င၏ မျက်လုံးထဲတွင် တောက်ပသော အရောင်အဝါတစ်ခု ဖြတ်သန်းသွားပြီး စိတ်ထဲမှ အေးစက်စွာ ပြုံးလိုက်သော်လည်း မျက်နှာအမူအရာကမူ မပြောင်းလဲဘဲ ယခင်အတိုင်း နူးညံ့နေဆဲ ဖြစ်သည်။
"ကောင်းပြီ... မြေးလေး ကိုယ်တိုင်က တော်လို့ပါ၊ လာ... အဘိုးက မင်းရဲ့ ကျင့်ကြံခြင်းနယ်ပယ် တည်ငြိမ်မှု ရှိမရှိကို ကြည့်ပေးမယ်"
"အဘိုး စိတ်ချပါ၊ မြေးက အခု ခွန်အား တွေ သုံးလို့မကုန်နိုင်အောင် ရှိနေတယ်လို့ ခံစားရတယ်၊ ပြီးတော့ တစ်ခါမှမရှိဖူးတဲ့အထိ သန်မာ နေသလိုပဲ"
"ဟားဟား... ဒါဆိုရင်တော့ အဘိုး စိတ်အေးရပြီ"
နောက်ဆုံးတွင် ယဲ့ကိုင်က ယဲ့ပိုင်ရီကို စည်းရုံးကာ ခန္ဓာကိုယ်ကို စစ်ဆေးပေးလိုက်သည်။
ခန္ဓာကိုယ်ကို စစ်ဆေးပေးသည်ဟု ဆိုသော်လည်း အမှန်တကယ်တော့ ယဲ့ပိုင်ရီ၏ ခန္ဓာကိုယ်အတွင်းမှ ဝိညာဉ်စွမ်းအားများနှင့် သွေးကြောများကို ပြုပြင်ပေးနေခြင်း ဖြစ်သည်။
လျှို့ဝှက်အခန်းအပြင်ဘက်တွင် အမြဲတမ်း စောင့်ကြပ်နေသော ဒုတိယ အကြီးအကဲက အတွင်းရေးကို အသိဆုံးလူ ဖြစ်ကာ ယဲ့ပိုင်ရီ အုတ်မြစ်ချ ခြင်းအဆင့်သို့ တက်လှမ်းနိုင်ရန် သူကိုယ်တိုင်လည်း အားစိုက်ထုတ်ပေးခဲ့ရသည်၊ လက်ရှိတွင် ယဲ့ကိုင်က ယဲ့ပိုင်ရီအတွက် ဘာလုပ်ပေးနေသလဲဆိုသည်ကို သူ ခန့်မှန်းကြည့်စရာပင်မလိုဘဲ သိရှိနေသည်။
သူ့ရင်ထဲ၌ သက်ပြင်းသာ အကြိမ်ကြိမ် ချမိပြီး အခြားနည်းလမ်း မရှိတော့ပေ။
အလိုလိုက်လည်း အလိုလိုက်ပါစေတော့၊ ဘိုးဘေးတွင် ကိုယ်ပိုင် အတိုင်းအဆ ရှိလိမ့်မည်ဟု သူ ယုံကြည်သည်။
ယဲ့ကျန်ထျန်းက ယဲ့ကိုင်၏ လျှို့ဝှက်အခန်းမှ ထွက်လာပြီးနောက် ချက်ချင်းပင် မိသားစုအတွင်းရှိ အကြီးအကဲအားလုံးကို စုစည်းလိုက်သည်။
အစည်းအဝေးခန်းမအတွင်း၌ ချန်ကျီ စီစဉ်ထားသော ကိုယ်ပွား သုံးဉီးကလည်း ထူးခြားစွာဖြင့် ပါဝင်နေခဲ့သည်။
ယဲ့ကျန်ထျန်း ယခုအကြိမ် အကြီးအကဲအားလုံးကို စုစည်းရသည့် ရည်ရွယ်ချက်က အလွန်ပင် ရိုးရှင်းပါသည်၊ သူက ရွှေအူတိုင်အဆင့်သို့ တက်လှမ်းရန်အတွက် တံခါးပိတ်ကျင့်ကြံခြင်းကို စတင်တော့မည် ဖြစ်သည်။
မိသားစု၏ အထွေထွေ ကိစ္စအားလုံးကို ယာယီအားဖြင့် တတိယ အကြီးအကဲက စီမံခန့်ခွဲရမည် ဖြစ်သည်။
ယဲ့ကျန်ထျန်းက ချန်ကျီ စီစဉ်ထားသော ကိုယ်ပွား သုံးဉီးကိုလည်း တာဝန်များ ခွဲဝေပေးလိုက်သေးသည်။
ယဲ့ကျန်ထျန်းက ကိုယ်ပွား သုံးဉီးကို ပေးအပ်လိုက်သော တာဝန်ကလည်း အလွန်ရိုးရှင်းပြီး သူတို့ သုံးယောက်ကို ရဲ့မိသားစု၏ လုပ်ငန်းတစ်ခုစီကို အသီးသီး စီမံခန့်ခွဲခိုင်းခြင်း ဖြစ်သည်။
ကိုယ်ပွား သုံးဉီးက သူတို့၏ တာဝန်ကို သိရှိပြီးနောက် စိတ်ထဲ၌ ခိုးပြုံးနေကြသည်၊ ဒါက သူတို့အတွက် ဝိညာဉ်ကျောက်တုံးများကို အလကား လာပေးနေခြင်းနှင့် အတူတူပင် ဖြစ်သည်။
အစည်းအဝေး ပြီးဆုံးသွားပြီးနောက် ယဲ့ကျန်ထျန်းက လူအားလုံးကို တိုက်ရိုက် လူစုခွဲလိုက်သည်။
တတိယ အကြီးအကဲက မိသားစုကို ယာယီစီမံခန့်ခွဲမည့်အပေါ် သဘောထားကွဲလွဲနေကြသော အကြီးအကဲများပင်လျှင် ယဲ့ကျန်ထျန်း၏ ပြတ်သားမှုအောက်တွင် အလျှော့ပေးရန်သာ ရွေးချယ်ခဲ့ကြရသည်။
ယဲ့ကျန်ထျန်းက စိတ်ကြိုက် လျှောက်၍ စီစဉ်နေသည်ဟု ထင်ရသော်လည်း အမှန်တကယ်တော့ ယဲ့ကျန်ထျန်း၏ ရင်ထဲ၌ ရေလည်စွာ သိရှိထားသည်။
သူက စီမံခန့်ခွဲခွင့်ကို တတိယ အကြီးအကဲထံသို့ လွှဲပြောင်းပေးခဲ့သော်လည်း ယဲ့မိသားစု၏ အစစ်အမှန် ထိန်းချုပ်သူက ယဲ့ကိုင်သာ ဖြစ်သည်။
မိသားစုအတွင်းရှိ အကြီးအကဲများက ဤအချက်ကို ဘာကြောင့် ယခုတိုင် ထိုးထွင်းမမြင်နိုင်ကြသလဲဆိုသည်ကို သူ အမြဲတမ်း နားမလည်နိုင်ခဲ့ပေ ။
ယဲ့မိသားစု၏ အစစ်အမှန် အာဏာက အမှန်တကယ်တော့ အမြဲတမ်း သူ၏ ဖခင်ဖြစ်သူ၊ ယဲ့မိသားစုက ဘိုးဘေးအဖြစ် ကိုးကွယ်ထားသော ယဲ့ကိုင်သာ ဖြစ်သည်။
ဟဲကွမ်းတောင်တန်းအတွင်း၌
ချန်ကျီက ဝိညာဉ်ဆေးပင်နှစ်ပင်ကို အလကားရရှိပြီး ထွက်လာခဲ့ပြီးနောက် မူလက နောက်ထပ် အဆင့်သုံး မိစ္ဆာသားရဲတစ်ကောင်ကို ထပ်မံရှာဖွေချင်သေးသော်လည်း မိုးက ချုပ်နေပြီ ဖြစ်ကြောင်း သတိပြုမိလိုက်သည်။
"မင်း အရင်ဆုံး အော်ရာကို ရုပ်သိမ်းလိုက်၊ ပြီးရင် နေရာတစ်ခုရှာပြီး ကောင်းကောင်း အနားယူလိုက်တော့"
"ဟုတ်ကဲ့ပါ သခင်"
ချန်ကျီနှင့် စကားပြောနေသူမှာ အမှတ် ၆၆ ကိုယ်ပွား ဖြစ်သည်။
ချန်ကျီ၏ အသိစိတ်က သူ၏ အစစ်အမှန် ခန္ဓာကိုယ်ဆီသို့ ပြန်လည်ရောက်ရှိသွားခဲ့ပြီ ဖြစ်သည်။
မိုးချုပ်လျှင် အနားယူရမည် ဖြစ်ရာ သူ၏ ကုတင်ပေါ်တွင် အိပ်ရခြင်းကသာ သက်တောင့်သက်သာ အရှိဆုံး ဖြစ်သည်။
တောထဲတွင် အိပ်စက်ရမည့် ကိစ္စမျိုးကို ကိုယ်ပွား က သွားလုပ်လျှင် လုံလောက်လှပြီ ဖြစ်သည်။
"သခင်... ဘာလို့ ဒီလောက်အမြန်ကြီး ပြန်လာတာလဲ၊ အပြင်မှာ ပျော်ဖို့ မကောင်းလို့လား"
ကျောက်လင်းအာက ယနေ့တင် ထွက်ခွာသွားမည်ဟု ပြောခဲ့သော ချန်ကျီက တစ်ရက်ပင် မပြည့်သေးဘဲ ပြန်ရောက်လာသည်ကို အံ့အားသင့်စွာဖြင့် တွေ့ရှိသွားခဲ့သည်။
"ပျော်ဖို့ကောင်းတာပေါ့၊ မိစ္ဆာသားရဲတွေနဲ့ တိုက်ခိုက်ရတာ တကယ်ကို ရင်ခုန်စရာပဲ"
"ဒါဆိုရင် သခင်က ဘာလို့ ပြန်လာတာလဲ"
"လင်းအာ... မင်းက တုံးလိုက်တာ၊ မိုးချုပ်သွားတာကို မင်း သတိမထားမိဘူးလား"
ကျောက်လင်းအာက ကြောင်အမ်းအမ်းဖြင့် ခေါင်းညိတ်ပြပြီး မေးလိုက်သည်။ "ဒါက မိုးချုပ်တာနဲ့ ဘာဆိုင်လို့လဲ"
"မိုးချုပ်ရင် အိမ်ပြန်ပြီး အိပ်ရမှာလေ"
"ဒါက" ကျောက်လင်းအာ ဆွံ့အသွားခဲ့ရသည်။
"မိုးချုပ်ရင် အိမ်ပြန်ရမယ်၊ ဒီအမှန်တရားကို မင်းလည်း မှတ်ထားရမယ်၊ မဟုတ်ရင် အိမ်ကလူတွေ စိတ်ပူလိမ့်မယ်"
ကျောက်လင်းအာ ကြောင်သွားခဲ့ရသည်၊ ဒါတွေက ဘာတွေလဲ။
ကျောက်လင်းအာက တစ်ဖန် ပြန်တွေးကြည့်လိုက်ရာ ချန်ကျီ ပြန်လာနိုင်ခြင်းက ကောင်းမွန်သောအရာ ဖြစ်သည်ဟူ၍ ဖြစ်သည်။ "ဟီးဟီး... သခင်၊ အပြင်မှာ တစ်နေကုန်ဆိုတော့ ဆာနေပြီမလား၊ ကျွန်မ အခုပဲ သခင်စားဖို့ သွားလုပ်ပေးပါ့မယ်"
"ကောင်းပြီ... လင်းအာက အလိမ္မာဆုံးပဲ"
"သခင်... ခဏလောက် စောင့်ပါဦးနော်"
"အင်း... မင်း သွားတော့၊ ငါ ခဏလောက် နားလိုက်ဦးမယ်"
ချန်ကျီ၏ အသိစိတ်က ကိုယ်ပွား ပေါ်မှ ခွာလိုက်ပြီ ဖြစ်ကာ သူသည် ခန္ဓာကိုယ်က မပင်ပန်းဟု ခံစားရသော်လည်း စိတ်တွင်မူ အနည်းငယ် နွမ်းနယ်နေခဲ့ရသည်။
ချန်ကျီက ပက်လက်ကုလားထိုင်ပေါ်တွင် လဲလျောင်းလိုက်ရုံရှိသေး၊ အနန္တကုန်စုံဆိုင်ကလည်း ဆိုင်ပိတ်လောက်ပြီ ဖြစ်ကြောင်း တွေးမိသွားခဲ့သည်။
"ထားလိုက်ပါတော့... နားလိုက်ဦးမယ်၊ ဒီနေ့ရဲ့ ဝင်ငွေကလည်း အများကြီး မရှိလောက်သေးပါဘူး၊ သိမ်းဆည်းဖို့လည်း မလောပါဘူး၊ နောက်ထပ် ရက်အနည်းငယ်လောက် စောင့်လည်း ကိစ္စမရှိပါဘူး"
ချန်ကျီက လဲလျောင်း၍ အနားယူနေစဉ် ခဏအကြာ၌ ဒန်တျန် နေရာမှ ရုတ်တရက် တုန်ခါသွားခဲ့ပြီး နွေးထွေးသော ခံစားချက်တစ်ခု တစ်ကိုယ်လုံးသို့ ပျံ့နှံ့သွားခဲ့သည်။
"အုတ်မြစ်ချ ခြင်းအဆင့် ၉ ကို ရောက်သွားပြီပဲ"
မျက်လုံးမှိတ်၍ အနားယူနေသော ချန်ကျီက မျက်လုံးကို တစ်ချက်ကလေးမျှပင် ဖွင့်မကြည့်ခဲ့ပေ ။
ဒုတိယမြောက်နေ့
ချန်ကျီက တစ်ညလုံး သက်တောင့်သက်သာဖြင့် အနားယူခဲ့ပြီး နံနက်ခင်း အိပ်ရာထပြီးနောက်တွင် ကျောက်လင်းအာ ပြင်ဆင်ပေးသော မနက်စာကို စားသောက်လိုက်သည်။
ချန်ကျီက ခန္ဓာကိုယ်ကို သက်တောင့်သက်သာရှိသော ပုံစံဖြင့် ပက်လက်ကုလားထိုင်ပေါ်တွင် လဲလျောင်းနေစေပြီး အသိစိတ်ကမူ အမှတ် ၆၆ ကိုယ်ပွား ပေါ်သို့ ထပ်မံရောက်ရှိသွားခဲ့ပြန်သည်။
"ဒီနေ့ကလည်း လန်းဆန်းတက်ကြွတဲ့ နေ့တစ်နေ့ပဲ၊ အဆင့်သုံး မိစ္ဆာသားရဲကို ဆက်ပြီး ရှာဖွေပြီး လေ့ကျင့်ရမယ်"
ချန်ကျီက အမှတ် ၆၆ ၏ ခန္ဓာကိုယ်ကို ထိန်းချုပ်ကာ တစ်ချက် အညောင်း ဆန့်လိုက်သည်။
ထို့နောက်တွင် ချန်ကျီ၏ တစ်ကိုယ်လုံးရှိ အော်ရာက အရှိန်အဟုန်ဖြင့် မြင့်တက်လာခဲ့ပြီး ယခင်က အမှတ် ၆၆ သိမ်းဆည်းထားခဲ့သော အော်ရာများကို အကြွင်းအကျန်မရှိ ထုတ်ဖော်လိုက်ရာ အုတ်မြစ်ချ ခြင်းအဆင့် ၉ ကျင့်ကြံခြင်းနယ်ပယ်က ထင်ထင်ရှားရှား ပေါ်လာခဲ့သည်။
မနေ့က ကျင့်ကြံခြင်းနယ်ပယ် မြင့်တက်သွားပြီးနောက် ချန်ကျီက ခံစားကြည့်ရန် အချိန်မရခဲ့ဘဲ ယခုအချိန်တွင် အုတ်မြစ်ချ ခြင်းအဆင့် ၉ ကျင့်ကြံခြင်းနယ်ပယ် ပေါက်ကွဲထွက်လာသောအခါ သူက သူ့ကိုယ်သူ ကုန်ခမ်းနိုင်ခြင်းမရှိသော ခွန်အားများ ရှိနေသည့်အလား ခံစားလိုက်ရပြီး သူ့ကိုယ်သူ ဤမျှအထိ သန်မာ နေသည်ဟု တစ်ခါမှ မခံစားဖူးပေ ။
ချန်ကျီက လက်ရှိ ကျင့်ကြံခြင်းနယ်ပယ် ကို ခံစားပြီးနောက် ဒန်တျန်ကို လှမ်း၍ ကြည့်လိုက်သည်။
ချန်ကျီက အနည်းငယ် ထူးဆန်းသည်ဟု ခံစားလိုက်ရသည်။ "ငါ့ရဲ့ အသိစိတ်က အခု ကိုယ်ပွား ပေါ်မှာ ရှိနေတာဆိုတော့ မြင်ရတာက ကိုယ်ပွား ရဲ့ ဒန်တျန် ဖြစ်ရမှာ မဟုတ်ဘူးလား"
ချန်ကျီက အသိစိတ်ကို နှစ်မြှုပ်လိုက်ပြီး ကိုယ်ပွား ၏ ဒန်တျန်ကို အာရုံစိုက်၍ ကြည့်လိုက်ရာ ခဏအကြာတွင် တစ်စုံတစ်ခုကို စဉ်းစားမိသွားဟန်ဖြင့် တွေးလိုက်သည်။ "ဩော်... ဒီဒန်တျန်က ငါ့ရဲ့ ဒန်တျန်နဲ့ တစ်ပုံစံတည်းပဲကိုး၊ ဒါကြောင့်လည်း ကိုယ်ပွား က ငါနဲ့ တူညီတဲ့ ကျင့်ကြံခြင်းနယ်ပယ်ကို ရရှိနိုင်တာပဲ"
"အခု ဒန်တျန်ထဲက ဝိညာဉ်စွမ်းအားတွေက အကုန်လုံး ဝိညာဉ်အရည်တွေအဖြစ် ပြောင်းလဲသွားခဲ့ပြီပဲ၊ ဒီဝိညာဉ်အရည်တွေက ရေကန်တစ်ခုလို စုစည်းနေပြီး ရေကန်ထဲမှာ ဝဲကရက်လိုမျိုး ဆက်တိုက် လည်ပတ်နေရင်းနဲ့ ဝိညာဉ်စွမ်းအား အသစ်တွေကို ဆက်လက် စုပ်ယူသိုလှောင်နေပြီး ဝိညာဉ်စွမ်းအားတွေကို ဆက်တိုက် ဖိသိပ် သန့်စင်ပေးနေတာပဲ။ ဒီဒန်တျန်ထဲက ဝိညာဉ်အရည်တွေ အဆုံးစွန်အထိ ဖိသိပ်ခံလိုက်ရတဲ့ အချိန်ကျရင်တော့ ရွှေအူတိုင်ကို သိပ်သည်းနိုင်မှာ ဖြစ်ပြီး အဆင့်တက် ဆေးလုံးရဲ့ အာနိသင်ကလည်း ဖိသိပ်သန့်စင်ဖို့အတွက် အသုံးပြုတာ ဖြစ်ရမယ်"
ချန်ကျီက ခေတ္တမျှ စဉ်းစားလိုက်ပြီးနောက် အုတ်မြစ်ချ ခြင်းအဆင့် ကျင့်ကြံသူများ၏ ကျင့်ကြံခြင်း အဆင့်တက်လှမ်းမည့် နည်းလမ်းကို အကြမ်းဖျင်းအားဖြင့် နားလည်သွားခဲ့ပြီ ဖြစ်သည်။
သူက တစ်ဖန် ခပ်ဖွဖွ ရယ်မောလိုက်ပြီး "ကျင့်ကြံခြင်းက တကယ်ကို မလွယ်ကူပါလား၊ ဒါပေမဲ့ ဒါက သာမန်ကျင့်ကြံသူတွေ လျှောက်ရမယ့် လမ်းပဲ၊ ငါ့မှာက စနစ်မျက်နှာပြင် ရှိနေတာဆိုတော့ အဆင့်တက်လှမ်းတာက ငါ့အတွက် ရေစီးအတိုင်း သဘာဝကျကျ ဖြစ်ပေါ်လာမယ့် ကိစ္စပဲ၊ ဘယ်လို အတားအဆီးမှ ရှိလာမှာ မဟုတ်ဘူး။ ဟားဟား... ကျင့်ကြံခြင်းက ဒီလောက်အထိ ခက်ခဲလိမ့်မယ်လို့ မထင်ထားမိဘူး၊ စနစ် ရှိတာကမှ တကယ်ကောင်းတာပဲ၊ မဟုတ်ရင် ဘယ်လိုလုပ်ပြီး ကျင့်ကြံနိုင်ပါ့မလဲ"