အခန်း ၈၈၄

အခန်း (၈၈၄) - ထိုက်ကျိ အကြီးအကဲ

"အဖွဲ့ခွဲပြီး မသင်္ကာစရာ နေရာတွေကို ရှာကြည့်ကြရအောင်... မီးတောက်နဂါး... ခင်ဗျားက မြေအောက်ကို ဆင်းစစ်လိုက်ပါ..."

အရှိန်အဝါ တစ်စအနမျှ အာရုံမရနိုင်သဖြင့် မသင်္ကာဖွယ် နေရာများကိုသာ သူတို့ အပူတပြင်း ရှာဖွေနေကြရသည်။ ပိတ်လှောင်ရေး အခင်းအကျင်းမှာ ဤပတ်ဝန်းကျင် တစ်ဝိုက်တွင် ရှိနေကြောင်း အတည်ပြုနိုင်သော်လည်း အခင်းအကျင်း၏ စွမ်းအင် အတက်အကျများကိုမူ လုံးဝ အာရုံခံ၍ မရနိုင်ခဲ့ချေ။ သူတို့အနေဖြင့် ပိတ်လှောင်ရေး အခင်းအကျင်း တည်ရှိရာ နေရာကို ရှာဖွေပြီး ဖျက်ဆီးပစ်ရန်သာ လိုအပ်တော့၏။

"စီနီယာ မီးတောက်နဂါး... စီနီယာ မီးလျှံဝိညာဉ်နဲ့ မီးလျှံမီးတောက်တို့ကလည်း ပထမအဆင့် နတ်ဘုရားဖြစ်တည်ဘုံကို ရောက်နေကြတာလား..."

ပေတိုယန်က သိချင်စိတ်ဖြင့် မေးလိုက်ရာ ယီထျန်းချင်းနှင့် အခြားသူများ၏ အကြည့်များကလည်း မီးတောက်နဂါးထံသို့ ရောက်ရှိသွားကြသည်။

"သူတို့က ပထမအဆင့် နတ်ဘုရားဖြစ်တည်ဘုံကို မရောက်သေးပါဘူး... နှမြောစရာ ကောင်းတာက သူတို့ဆီမှာ ဝိညာဉ် အစအနလေးတွေပဲ ကျန်တော့တာလေ... မဟုတ်ရင်တော့ သူတို့လည်း အဲဒီအဆင့်ကို ရောက်နေလောက်ပြီပေါ့..."

မီးတောက်နဂါးက ခပ်အေးအေးပင် ပြန်လည် ဖြေကြားလိုက်သော်လည်း သူ၏ လေသံတွင် ဝမ်းနည်းမှုနှင့် စိတ်သက်သာရာ ရမှုတို့ ရောယှက်နေသည်။

မီးလျှံဝိညာဉ်နှင့် မီးလျှံမီးတောက်တို့၏ ကံကြမ္မာအတွက် ဝမ်းနည်းနေသလို ဝိညာဉ် အစအနလေးများ ကျန်ရှိနေသေးသဖြင့်လည်း စိတ်သက်သာရာ ရနေလေ၏။ စကားပြောပြီးသည်နှင့် မီးတောက်နဂါးက မြေအောက်သို့ တိုးဝင်သွားခဲ့ပြီး ဖုန်းဝူချန်နှင့် အခြားသူများလည်း အဖွဲ့ခွဲကာ စုံစမ်းစစ်ဆေးကြတော့သည်။

အကယ်၍သာ မီးလျှံဝိညာဉ်နှင့် မီးလျှံမီးတောက်တို့ကို ကယ်တင်နိုင်ခဲ့လျှင် နဂါးနတ်ဘုရား မဟာမိတ်အဖွဲ့တွင် ထိပ်တန်း ပညာရှင်ကြီး နှစ်ဦး ထပ်မံ တိုးပွားလာမည်သာ ဖြစ်၏။

"သခင်... ပိတ်လှောင်ရေး အခင်းအကျင်းကို ရှာတွေ့ပါပြီ..."

မြေအောက်သို့ ဆင်းသွားသော မီးတောက်နဂါးမှာ ခဏချင်းပင် ပြန်လည် ထွက်ပေါ်လာသည်။

"ရှာတွေ့ပြီလား... မြန်လှချည်လား..."

ယဲ့ထျန်းဝေနှင့် အခြားသူများမှာ အလွန်အမင်း အံ့အားသင့် ဝမ်းသာသွားကြပြီး အနီးသို့ ပြေးဝင်လာကြ၏။

"သခင်... အဲဒီမှာ အခင်းအကျင်း သုံးခု ရှိနေတာပါ..."

မီးတောက်နဂါးက ရိုသေစွာဖြင့် တင်ပြလိုက်သည်။

"မြေအောက်မှာ တကယ် ရှိနေတာပဲ..."

ဖုန်းဝူချန်က ထိုနေရာသို့ လျှပ်တစ်ပြက် ရောက်ရှိလာပြီး သူ၏ အစစ်အမှန်ယွမ် အစအန တစ်ခုကို မြေအောက်သို့ စီးဝင်စေကာ အာရုံခံကြည့်လိုက်၏။

"အိုး... ဒါက..."

အာရုံခံကြည့်ပြီးနောက် ဖုန်းဝူချန် အံ့အားသင့်သွားပြီး ရေရွတ်လိုက်သည်။

"ဒါက နဂါးမျိုးနွယ်စုရဲ့ ထာဝရနဂါးပျံ အခင်းအကျင်းပဲ... ပြီးတော့ ချန်ခွင်း မျက်လှည့် အခင်းအကျင်းနဲ့ ယင်ယန် ပိတ်လှောင်ရေး အခင်းအကျင်းတွေလည်း ပါနေသေးတယ်..."

"ဒါကြောင့်မို့လို့ကိုး... နဂါးပျံ အခင်းအကျင်းနဲ့ မျက်လှည့် အခင်းအကျင်းက တစ်ခုနဲ့တစ်ခု အထောက်အကူပြုပြီး ပိတ်လှောင်ရေး အခင်းအကျင်းရဲ့ စွမ်းအားကို မြှင့်တင်ပေးထားတာပဲ... ဒါ့အပြင် မျက်လှည့် အခင်းအကျင်းကို သုံးပြီး နဂါးမျိုးနွယ်စုရဲ့ အရှိန်အဝါကို ဖုံးကွယ်ထားသလို နဂါးပျံ အခင်းအကျင်းကလည်း နဂါးမျိုးနွယ်စုရဲ့ အကာအကွယ် အလွှာနဲ့ ပေါင်းစပ်ထားသေးတယ်... ဒီအခင်းအကျင်း သုံးခုက တစ်ခုတည်း အဖြစ် ပေါင်းစည်းနေတာပေါ့... ထိုက်ကျိ အကြီးအကဲ ခြောက်ယောက်ရဲ့ စွမ်းအားတွေပါ ပေါင်းစပ်လိုက်တော့ အင်အားက တကယ့်ကို ကြီးမားလှပေတာပဲ..."

ဖုန်းဝူချန်က ပြုံးလျက် မှတ်ချက်ချလိုက်ရာ ခဏမျှ စစ်ဆေးရုံဖြင့် အခင်းအကျင်းများ၏ တည်ဆောက်ပုံကို လျင်မြန်စွာ ဖော်ထုတ်နိုင်ခဲ့သည်။

"နန်းတော်သခင်... ဒီအခင်းအကျင်းတွေကို ချိုးဖျက်နိုင်မလား..."

ပေတိုယန်က စိုးရိမ်တကြီး မေးလိုက်သည်။

"ရှေးဦးကမ္ဘာဦး အခင်းအကျင်းတွေကိုတောင် ငါ ချိုးဖျက်နိုင်တာပဲ... ဒီလောက် အခင်းအကျင်း သုံးခုလေးကတော့ ဘာမှ မဟုတ်ပါဘူး... နဂါးမျိုးနွယ်စုရဲ့ နဂါးပျံ အခင်းအကျင်းကိုတော့ နဂါးနတ်ဆိုး အမိန့်တော်နဲ့ အလွယ်တကူ ဖြိုခွင်းနိုင်ပါတယ်... ငါ့အနေနဲ့ မျက်လှည့် အခင်းအကျင်းကိုပဲ ဖြိုခွဲဖို့ လိုတာပါ... အခင်းအကျင်း နှစ်ခု ပျက်စီးသွားရင် သူတို့ရဲ့ စွမ်းအားတွေက သိသိသာသာ လျော့နည်းသွားလိမ့်မယ်... အဲဒီအခါကျရင် မီးတောက်နဂါးက ပိတ်လှောင်ရေး အခင်းအကျင်းကို အင်အားသုံးပြီး ဖြိုခွင်းလိုက်ရုံနဲ့ မီးလျှံဝိညာဉ်နဲ့ မီးလျှံမီးတောက်တို့ကို ကယ်တင်နိုင်လိမ့်မယ်..."

ဖုန်းဝူချန်က ခပ်အေးအေးပင် ပြန်လည် ဖြေကြားလိုက်၏။ ထိုက်ကျိ အကြီးအကဲ ခြောက်ဦး တည်ဆောက်ထားသော အခင်းအကျင်းများကို သူက အမှုမဲ့အမှတ်မဲ့သာ သဘောထားနေတော့သည်။

စကားပြောပြီးနောက် ဖုန်းဝူချန်က သူ၏ ဖျက်ဆီးခြင်း စွမ်းအားများကို နဂါးနတ်ဆိုး အမိန့်တော် အတွင်းသို့ စီးဝင်စေလိုက်သည်။ နဂါးနတ်ဆိုး အမိန့်တော်ကို အသုံးပြု၍ ထာဝရနဂါးပျံ အခင်းအကျင်းကို ချိုးဖျက်ရန် သူက ရည်ရွယ်ထားလေ၏။ ဖုန်းဝူချန်က ယုံကြည်မှု အပြည့် ရှိနေသည်ကို မြင်ရသဖြင့် လင်ရှောင်ရှောင်နှင့် အခြားသူများလည်း မျှော်လင့်ချက် အပြည့်ဖြင့် စောင့်ကြည့်နေကြတော့သည်။

"ဝီ... ဝီ..."

ကြီးစိုးသော ဧရာမ စွမ်းအားက နဂါးနတ်ဆိုး အမိန့်တော်ထံမှ ရုတ်တရက် ပေါက်ကွဲထွက်လာပြီး ကောင်းကင်နှင့် မြေကမ္ဘာကိုပါ တုန်လှုပ်သွားစေသည်။ မြေပြင်မှာလည်း ဧရာမ အက်ကွဲကြောင်းကြီးများပမာ ရူးသွပ်စွာ ပွင့်ဟလာတော့သည်။

နဂါးနတ်ဆိုး အမိန့်တော်မှ မျက်စိကျိန်းမတတ် တောက်ပသော အနက်ရောင် အလင်းတန်းများ လျှပ်တစ်ပြက် ထွက်ပေါ်လာပြီး ကြောက်မက်ဖွယ်ကောင်းသော စွမ်းအားများ အဆက်မပြတ် ဖြာထွက်လာ၏။ ပေပေါင်း ဒါဇင်ချီ မြင့်မားသော အနက်ရောင် စွမ်းအင် အလင်းတိုင်ကြီး တစ်ခုက ကောင်းကင်ယံသို့ တိုက်ရိုက် ထိုးတက်သွားကာ ဧရာမ အနက်ရောင် အလင်းရေဝဲကြီး တစ်ခုကို ဖန်တီးလိုက်ရာ မြင်ကွင်း တစ်ခုလုံးမှာ အလွန်တရာ ခမ်းနား ကြီးကျယ်လှသည်။

ဖုန်းဝူချန် အသက်သွင်းလိုက်သော နဂါးနတ်ဆိုး အမိန့်တော်၏ စွမ်းအားမှာ မီးတောက်နဂါးလောက် မစွမ်းဆောင်နိုင်သော်ငြား အလွန်တရာ ကြောက်မက်ဖွယ် ကောင်းနေဆဲပင်။ ဤအရှိန်အဝါမှာ နတ်ဘုရားဖြစ်တည်ဘုံ ပထမ အဆင့် နဝမအလွှာ အထွတ်အထိပ် အဆင့်သို့ပင် ရောက်ရှိနေခဲ့ပြီ မဟုတ်ပါလော။

“ဟူး…”

ယဲ့ထျန်းဝေနှင့် အခြားသူများမှာ ကြောက်လန့်တကြားဖြင့် လေအေးများကို ရှူသွင်းလိုက်မိကြပြီး သူတို့၏ မျက်လုံးအိမ်များ လုံးဝ ပြူးကျယ်သွားကာ ဝိညာဉ်ပင် တုန်လှုပ်သွားတော့သည်။

"ဒီကြောက်စရာကောင်းတဲ့ အရှိန်အဝါပဲ... အရင်တုန်းက နဂါးနတ်ဘုရား နန်းတော်မှာလည်း ငါတို့ ခံစားခဲ့ရတာ..."

"ဟုတ်တယ်... ဒါ နဂါးနတ်ဆိုး အမိန့်တော်ရဲ့ စွမ်းအားပဲကိုး... တကယ်ကို ကြောက်ဖို့ ကောင်းတာပဲ..."

"နဂါးနတ်ဆိုးနတ်ဘုရားရဲ့ ရတနာ ဆိုတော့လည်း ထိုက်တန်ပါတယ်... ဒီနဂါးနတ်ဆိုး အမိန့်တော်က သေချာပေါက် နတ်ဘုရား လက်နက် ဖြစ်ရမယ်..."

ယဲ့ထျန်းဝေနှင့် အခြားသူများမှာ အံ့အားသင့်တကြား အော်ဟစ်နေကြပြီး သူတို့၏ ရင်ထဲတွင်လည်း လှိုင်းတံပိုးကြီးများပမာ ပြင်းထန်စွာ တုန်လှုပ်နေတော့သည်။ ချောက်ကမ်းပါး အက်ကွဲကြောင်း အောက်ခြေရှိ ကြောက်မက်ဖွယ် စွမ်းအားများက အခင်းအကျင်း၏ အင်အားများကို လှုံ့ဆော်ပေးလိုက်သဖြင့် အုံ့မှိုင်းနေသော ချောက်နက်ကြီး အတွင်းမှ တောက်ပသော အလင်းတန်း သုံးခု ရုတ်တရက် ဖြာထွက်လာ၏။

"နဂါးနတ်ဆိုးနတ်ဘုရားပါလား..."

နဂါးနတ်ဆိုး အမိန့်တော်၏ စွမ်းအားက အခင်းအကျင်း သုံးခုနှင့် ထိတွေ့သွားသည့် အခိုက်အတန့်မှာပင် နဂါးမျိုးနွယ်စု၏ ရှေးဦးကမ္ဘာဦး အကြီးအကဲ ခြောက်ယောက်စလုံး ချက်ချင်းပင် အာရုံခံမိလိုက်ကြသည်။

"တစ်ခုခုတော့ မှားနေပြီ... ဒါက နဂါးနတ်ဆိုး အမိန့်တော်ရဲ့ အရှိန်အဝါ ဆိုပေမဲ့... ရှေးဦးကမ္ဘာဦး စွမ်းအားတွေ ပါဝင်နေတာပဲ..."

အကြီးအကဲ တစ်ဦးက မျက်မှောင်ကြုတ်လျက် လေးနက်သော အမူအရာဖြင့် မှတ်ချက်ချလိုက်သည်။

နောက်ထပ် အကြီးအကဲ တစ်ဦးကလည်း မျက်မှောင်ကြုတ်ရင်း ဆိုလိုက်၏။

"တစ်စုံတစ်ယောက်က နဂါးနတ်ဆိုး အမိန့်တော်ကို သုံးပြီး ပိတ်လှောင်မှုကို ချိုးဖျက်ကာ မီးလျှံဝိညာဉ်နဲ့ မီးလျှံမီးတောက်တို့ကို ကယ်တင်ဖို့ ကြိုးစားနေတာပဲ... ပြီးတော့ အဲဒီလူက ရှေးဦးကမ္ဘာဦး စွမ်းအားကိုလည်း ပိုင်ဆိုင်ထားသေးတယ်... ဒါက တကယ်တမ်း ဘယ်သူ ဖြစ်နိုင်မလဲ..."

နောက်တစ်စက္ကန့်တွင် ရှေးဦးကမ္ဘာဦး အကြီးအကဲ ခြောက်ယောက်စလုံး၏ ပုံရိပ်များမှာ ဟင်းလင်းပြင် အတွင်း၌ အရိပ်အယောင်မျှ မကျန်ဘဲ တစ်ပြိုင်နက်တည်း ပျောက်ကွယ်သွားခဲ့လေပြီ။ ၎င်းမှာ နဂါးမျိုးနွယ်စု အကြီးအကဲ ခြောက်ဦး၏ ကျင့်ကြံခြင်း အဆင့် မည်မျှအထိ နက်နဲ ခန့်မှန်းရ ခက်ကြောင်းကို သက်သေပြနေလေ၏။

"ဖြိုခွင်းစမ်း..."

ဖုန်းဝူချန်က နဂါးနတ်ဆိုး အမိန့်တော်၏ စွမ်းအားများကို အစွမ်းကုန် အသက်သွင်းလိုက်ပြီး ရက်စက်စွာ ဟိန်းဟောက်လိုက်သည်။ ထိုအခါ အနက်ရောင် အလင်းတန်းကြီး တစ်ခုက ဧရာမ အနက်ရောင် လျှပ်စီးတန်းကြီး တစ်ခုပမာ ချောက်ကမ်းပါး အောက်ခြေရှိ ထာဝရနဂါးပျံ အခင်းအကျင်းဆီသို့ ရူးသွပ်စွာ ပစ်ဝင်သွားတော့သည်။ ၎င်း၏ စွမ်းအားမှာ အရာအားလုံးကို ဝါးမြိုပစ်နိုင်စွမ်း ရှိနေတော့သည်။

လင်ရှောင်ရှောင်နှင့် အခြားသူများလည်း ထိုကြောက်မက်ဖွယ် အနက်ရောင် စွမ်းအင်ကြီးကို ကြောက်ရွံ့မှု၊ စိတ်လှုပ်ရှားမှုများ ရောယှက်နေသော အကြည့်များဖြင့် စောင့်ကြည့်နေကြသည်။

သို့သော် ကြောက်မက်ဖွယ် အနက်ရောင် စွမ်းအင်ကြီး ချောက်နက်ထဲသို့ ထိုးဆင်းသွားသည့် အခိုက်အတန့်မှာပင် ချောက်နက် အတွင်းမှ ဧရာမ အပြာရောင် စွမ်းအင် အလင်းတန်း တစ်ခု ရုတ်တရက် ထွက်ပေါ်လာသည်။ ထိုအပြာရောင် အလင်း အကာအရံကြီး၏ စွမ်းအားမှာ အလွန်တရာ ကြောက်မက်ဖွယ် ကောင်းလှပြီး အသံတိတ် လျှို့ဝှက်စွာ ဖြစ်ပေါ်လာသည့်တိုင် ဝိညာဉ်ကိုပါ တုန်လှုပ်သွားစေမည့် လွှမ်းမိုးဖိနှိပ်နိုင်စွမ်းများ ပါရှိနေသည်။

"အကြီးအကဲ ခြောက်ယောက်ပါလား..."

မီးတောက်နဂါး၏ မျက်နှာအမူအရာ အနည်းငယ် ပြောင်းလဲသွားသည်။ ထိုအလင်း အကာအရံ၏ အရှိန်အဝါကို မြင်ရုံဖြင့် ရှေးဦးကမ္ဘာဦး အကြီးအကဲ ခြောက်ဦး ဖြစ်ကြောင်း သူ ချက်ချင်း မှတ်မိသွားခဲ့လေ၏။

“ဘုန်း…”

"ဝီ... ဝီ..."

ကြောက်မက်ဖွယ် အနက်ရောင် စွမ်းအင်ကြီးက အပြာရောင် အလင်း အကာအရံနှင့် ပြင်းထန်စွာ ဝင်တိုက်မိသွားရာ ကမ္ဘာနှင့် မြေကြီးကို တုန်လှုပ်စေသော ပေါက်ကွဲသံ ထွက်ပေါ်လာပြီး အဖျက်အားများမှာလည်း ထိန်းချုပ်၍ မရနိုင်လောက်အောင် ဖြာထွက်သွားတော့သည်။

သို့သော်လည်း ထိုကဲ့သို့သော ကြောက်မက်ဖွယ် စွမ်းအားက အပြာရောင် အလင်း အကာအရံကို နည်းနည်းလေးမျှ လှုပ်ခတ်အောင် မစွမ်းဆောင်နိုင်ခဲ့ချေ။ နဂါးနတ်ဆိုး အမိန့်တော်၏ စွမ်းအားမှာ လုံးဝ ပိတ်ဆို့ခံလိုက်ရပြီး ပေါက်ကွဲအားများမှာ သူတို့ထံသို့ပင် ပြန်လည် ရိုက်ခတ်လာတော့သည်။

"မကောင်းတော့ဘူး..."

ဖုန်းဝူချန်၏ မျက်နှာအမူအရာ ရုတ်ချည်း သုန်မှုန်သွားပြီး အနောက်သို့ လျင်မြန်စွာ ဆုတ်ခွာလိုက်သည်။

မီးတောက်နဂါးက မျက်တောင်တစ်ခတ် အတွင်းမှာပင် သူ၏ အနီးသို့ ရောက်ရှိလာပြီး ဤအဖျက်အားများကို ကာကွယ်ရန် နဂါးနတ်ဘုရား အကာအကွယ် အခင်းအကျင်း တစ်ခုကို တည်ဆောက်လိုက်သည်။

"သူတို့ ရောက်လာကြပြီ..."

မီးတောက်နဂါးက လေးနက်သော လေသံဖြင့် ဆိုလိုက်၏။

"ပထမအဆင့် နတ်ဘုရားဖြစ်တည်ဘုံ... နဝမအလွှာ အထွတ်အထိပ်ပါလား..."

ဖုန်းဝူချန်က အလွန်တရာ ထက်ရှသော အရှိန်အဝါများကို အာရုံခံမိလိုက်သည့်အခါ မျက်မှောင်ကို ပြင်းထန်စွာ ကြုတ်လိုက်သည်။

"ဒါ... ဒါ ဘယ်လိုလုပ် ဖြစ်နိုင်မှာလဲ..."

"နဂါးနတ်ဆိုး အမိန့်တော်ရဲ့ စွမ်းအားက လုံးဝ အသုံးမဝင်ဘူးပေါ့..."

"ပထမအဆင့် နတ်ဘုရားဖြစ်တည်ဘုံရဲ့ အရှိန်အဝါတွေပါလား... နဂါးမျိုးနွယ်စုရဲ့ ရှေးဦးကမ္ဘာဦး အကြီးအကဲတွေများ ရောက်လာတာလား..."

"ဒီအခင်းအကျင်း သုံးခုကို အကြီးအကဲ ခြောက်ယောက်က တည်ဆောက်ထားတာ ဆိုတော့... ဒီလောက် ဧရာမ စွမ်းအားကို သူတို့ သေချာပေါက် အာရုံခံမိမှာပဲ..."

ယဲ့ထျန်းဝေနှင့် အခြားသူများမှာ အလွန်အမင်း အံ့အားသင့် ထိတ်လန့်သွားကြပြီး ဤမျှ ကြောက်မက်ဖွယ် ကောင်းလှသော စွမ်းအားက အပြာရောင် အလင်း အကာအရံကို နည်းနည်းလေးမျှ မလှုပ်ခတ်နိုင်သည်ကို မည်သူကမျှ မယုံကြည်နိုင်အောင် ဖြစ်နေကြသည်။

ဖုန်းဝူချန်နှင့် အဖွဲ့သားများ၏ အကြည့်များမှာ အပြာရောင် အလင်း အကာအရံထံတွင်သာ စုစည်းနေကြသည်။

ထိုကြောက်မက်ဖွယ် အလင်း အကာအရံ အောက်တွင် အလွန်တရာ ခြောက်ခြားဖွယ် ကောင်းလှသော အရှိန်အဝါ ခြောက်ခု ဖြာထွက်နေပြီး တစ်ခုချင်းစီမှာ အရိုးထဲထိ စိမ့်ဝင်သွားမတတ် အေးစက်လှသည်။ အစွမ်းထက် ပညာရှင်များ... အထွတ်အထိပ် အစွမ်းထက် ပညာရှင်ကြီးများပင်။

ခဏမျှ ကြာပြီးနောက် အပြာရောင် အလင်း အကာအရံမှာ ဖြည်းညင်းစွာ ပျောက်ကွယ်သွားပြီး ဖုန်းဝူချန် အပါအဝင် လူတိုင်း၏ မျက်စိရှေ့မှောက်တွင် အိုမင်းသော ပုံရိပ် ခြောက်ခု ထွက်ပေါ်လာတော့သည်။

ဤအသံ ခြောက်ခုမှာ သူတို့ တစ်သက်တွင် ကြုံတွေ့ဖူးသမျှ အစွမ်းထက် ပညာရှင်များ အားလုံးထဲတွင် အကြောက်စရာ အကောင်းဆုံးသော တည်ရှိမှုများ ဖြစ်သည်မှာ သေချာလှသည်။ ထိုအိုမင်းသော ပုံရိပ် ခြောက်ခုမှာ အမှန်တကယ်ပင် နဂါးမျိုးနွယ်စု၏ ရှေးဦးကမ္ဘာဦး အကြီးအကဲ ခြောက်ဦးပင်။

"ကြည့်ရတာ... နဂါးအရှင်သခင် မီးတောက်နဂါး ပါလား... မင်း.. မျိုးနွယ်စု ခေါင်းဆောင်ကြီးရဲ့ ပိတ်လှောင်မှုကို ချိုးဖျက်ပြီး အပြင်ထွက်လာနိုင်လိမ့်မယ်လို့ ငါ လုံးဝ ထင်မထားခဲ့ဘူး..."

ဩဇာအာဏာ ပြည့်ဝလှသော အိုမင်းသည့် အသံ တစ်ခု ဟင်းလင်းပြင် အတွင်း၌ ဟိန်းထွက်လာတော့သည်။

--