အခန်း ၁၉၈၄

အခန်း (၁၉၈၄ )

ကံကြမ္မာက သတ်မှတ်သူ

အဆင့်တက်ရောက်ပြီးနောက် နတ်ဧကရာဇ် ရှီယွဲ့သည် သူမ၏ခန္ဓာကိုယ်အတွင်း၌ လှိုင်းတံပိုးထသကဲ့သို့ မုန်တိုင်းထန်နေသော နတ်ဆိုးစွမ်းအားများကို လျင်မြန်စွာ ငြိမ်သက်စေလိုက်ပြီး ခန္ဓာကိုယ်မှ ထွက်ပေါ်နေသော ဖိအားများကို ပြန်လည်ရုပ်သိမ်းလိုက်သည်။

ထိုအခိုက်အတန့်တွင် သူမ ရုတ်တရက် ခေါင်းလှည့်ကာ သူမ၏အမြီးကို ဆုပ်ကိုင်ထားသည့် ထိုလူယုတ်မာကို အေးစက်စက် စိုက်ကြည့်လိုက်သည်။

နှစ်ပေါင်းများစွာအတွင်း သူမ၏ ဝိညာဉ်အသိစိတ်သည် နတ်ဆိုးစွမ်းအားဖြင့် ဖိနှိပ်ခံခဲ့ရပြီး သူမ၏ ဖြစ်တည်မှုတစ်ခုလုံးလည်း တဏှာဆန္ဒ၏ ထိန်းချုပ်မှုကို ခံခဲ့ရကာ ဤလူ၏ နည်းမျိုးစုံဖြင့် နှိပ်စက်ခြင်းကို ခံခဲ့ရ၏။ ထိုအရာက သူမအတွက် အလွန် အရှက်ရစရာ ဖြစ်ခဲ့သည်။

လုချန်းက အခုထိ မလွှတ်သေးပဲ သူမကို ပြန်စိုက်ကြည့်နေသည်ကို တွေ့မြင်လျှင် နတ်ဧကရာဇ် ရှီယွဲ့က

“ရှင် အခုထိ လက်မလွှတ်သေးဘူးလား”

ဟု အေးစက်စွာ မေးလိုက်သည်။

လုချန်းသည် မဟာစွမ်းအားကြီးပုဂ္ဂိုလ်တစ်ဦး၏ လူဝင်စား ဖြစ်နေနိုင်သဖြင့် ယခင်က သူမ စိုးရိမ်ခဲ့သော်လည်း ယခုတော့ သူမသည် နတ်ဧကရာဇ်တစ်ပါး ဖြစ်နေပြီဖြစ်သည်။

လုချန်းက နတ်ဧကရာဇ် လူဝင်စား ဖြစ်နေလျှင်ပင် ဘာဖြစ်သနည်း။

သူမ၏ လက်ရှိစွမ်းအား လုချန်းထက် သာလွန်နေသည်မှာ ဧကန်မုချပင်။

ထို့ပြင် သူမ၏ နတ်ဧကရာဇ်အဆင့် နတ်ဝိညာဉ်စွမ်းအားဖြင့် သူမကိုယ်တိုင် ကစဉ့်ကလျား ဝိညာဉ်ပျက်စီးခြင်း ချိပ်ပိတ်နည်းဗျူဟာပုံစံ၏ နည်းဗျူဟာအင်းကွက်များကို ရေးဆွဲနိုင်ပြီဖြစ်ရာ လုချန်းက သူမအတွက် အသုံးမဝင်တော့ပေ။

ထိုခဏ၌ လုချန်းအား အစိမ်းလိုက်ဝါးစားမတတ် သတ်ပစ်ချင်သည့် စိတ်များ သူမ ရင်ထဲ ရုတ်တရက် ပေါ်လာခဲ့သည်။

သူမအား လုချန်းက စော်ကားခဲ့သည့် အကြောင်းသာ ပြင်ပသို့ ပြန့်နှံ့သွားပါက နတ်ဧကရာဇ်တစ်ပါးအနေနှင့် သူမ၏ သိက္ခာမှာ ဘယ်နား သွားထားရမည်နည်း။

နတ်ဧကရာဇ် ရှီယွဲ့က လုချန်းအား သင်ခန်းစာပေးရန် ပြင်လိုက်စဉ်မှာပင် ရုတ်တရက် ကြီးမားလှသော မျိုးရိုးလိုက်အမွေအနှစ် မှတ်ဉာဏ်များက သူမ၏စိတ်ထဲသို့ တိုးဝင်လာခဲ့သည်။

အမြီးကိုးခု မြေခွေးသည် အသွင်ပြောင်းလဲမှု တစ်ကြိမ်ပြုလုပ်တိုင်း ချိပ်ပိတ်ထားသော မျိုးရိုးလိုက်အမွေအနှစ် မှတ်ဉာဏ်အချို့ကို ရရှိတတ်သည်။

ကြီးမားလှသော မျိုးရိုးလိုက်အမွေအနှစ် မှတ်ဉာဏ်များကို လက်ခံရရှိပြီးနောက်၊ နတ်ဧကရာဇ် ရှီယွဲ့၏ ယခင်က သတ်ဖြတ်လိုစိတ် ပြည့်လျှံနေသော မျက်ဝန်းများထဲတွင် ဇဝေဇဝါဖြစ်မှု အရိပ်အယောင်တစ်ခု ရေးရေး ပေါ်လာခဲ့သည်။

သူမ ယခုလေးတင် လက်ခံရရှိသည့် မျိုးရိုးလိုက်အမွေအနှစ် မှတ်ဉာဏ်များအရ အမြီးကိုးခု မြေခွေးသည် ကံကြမ္မာနှင့် ပတ်သက်၍ ထူးခြားသော ပါရမီရှိပြီး အဖော်ကို စည်းမထားပဲ လွတ်လွတ်လပ်လပ် ရွေးချယ်နိုင်မည် မဟုတ်ပေ။

အမြီးကိုးခု မြေခွေးသည် ကံကြမ္မာသတ်မှတ်ပေးထားသည့်သူနှင့် တွေ့ဆုံမှသာ မိတ်လိုက်သည့်ကာလသို့ ရောက်ရှိမည်ဖြစ်ပြီး ထိုကံကြမ္မာက သတ်မှတ်သူသည် အမြီးကိုးခု မြေခွေး၏ အင်အားကြီးထွားမှုကို များစွာ အထောက်အကူပြုသည်။ အမြီးကိုးခု မြေခွေးသည် ကံကြမ္မာ၏ သတ်မှတ်သူကို မည်သည့်အခါမှ အန္တရာယ်မပြုရပေ။

အကယ်၍ အမြီးကိုးခု မြေခွေး၏ ကံကြမ္မာသတ်မှတ်သူ သေဆုံးသွားပါက အမြီးကိုးခု မြေခွေး၏ ရှေ့ဆက် အဆင့်တက်ရောက်နိုင်မည့် အလားအလာ လုံးဝ ပြတ်တောက်သွားမည်ဖြစ်ပြီး နတ်ဧကရာဇ် အဆင့်တွင်သာ ထာဝရ ရပ်တန့်နေလိမ့်မည် ဖြစ်သည်။

လုချန်းဆိုတဲ့ ဒီလူယုတ်က သူမရဲ့ ကံကြမ္မာသတ်မှတ်သူ ဟုတ်လား။

ဘယ်လောက်တောင် အဓိပ္ပာယ်မဲ့တဲ့ ကိစ္စမျိုးလဲ။

ဤလူသား အမျိုးသားက နတ်ဆိုးမျိုးနွယ်ဝင်ဖြစ်သော သူမ၏ ကံကြမ္မာသတ်မှတ်သူ တကယ်ပဲ ဖြစ်နေတာလား။

ပြီးတော့ သူမက သူ့ကို အန္တရာယ်မပြုရဘူးတဲ့လား။

သူမ၏ အမွေအနှစ် မှတ်ဉာဏ်များက အတုအယောင်များ ဖြစ်နေမလားဟု နတ်ဧကရာဇ် ရှီယွဲ့ ယခု သံသယဝင်လာမိသည်။

လက်ရှိတွင် နတ်ဧကရာဇ်အဆင့်သည် ထျန်းရန် နတ်ဘုရားနယ်မြေ၏ အမြင့်ဆုံးအဆင့် ဖြစ်သော်လည်း သူမ၏ မျိုးရိုးလိုက်အမွေအနှစ် မှတ်ဉာဏ်များထဲတွင် ကံကြမ္မာသတ်မှတ်သူ ရှိကြောင်း ဖော်ပြထားခြင်းကြောင့် သူမ၌ ရှေ့ဆက်ကြီးထွားရန် အလားအလာ ရှိနေသေးကြောင်း ပြသနေပြီး သူမ ပို၍ စွမ်းအားကြီးလာနိုင်သည်ကို သက်သေပြနေသည်။

ပို၍စွမ်းအားကြီးလာနိုင်သည့် အခွင့်အလမ်း ရှိနေပါက သူမ လုချန်းကို အန္တရာယ်မပြုနိုင်ပေ။

သို့သော်လည်း သူမနှင့် လုချန်းတို့သည် ဆယ်စုနှစ်များစွာတစ်လျှောက် ထိုကဲ့သို့သော ဗီဇဆန္ဒက ခိုင်းစေသည့် အပြုအမူများကို ပြုလုပ်ခဲ့ကြသည်ကို တွေးမိရုံဖြင့် သူမ၏နှလုံးသားထဲတွင် လက်ခံရန် အနည်းငယ် ခက်ခဲနေခဲ့သည်။

နတ်ဧကရာဇ်တစ်ပါးက လူသားတစ်ဦးနှင့်အတူ မူလဗီဇစိတ်အာရုံနောက်သို့ လုံးလုံးလျားလျား လိုက်ပါပြီး ထိုကဲ့သို့သော လုပ်ရပ်များကို ပြုလုပ်ခဲ့ကာ သူမကိုယ်တိုင်ပင် ဖိနှိပ်ခြင်းခံခဲ့ရသည်။ ၎င်းက စိတ်တွင်းမငြိမ်မသက်မှုကို မဖြစ်ပေါ်စေဘူး ဆိုလျှင်ပင် ထူးဆန်းနေလိမ့်မည်။

နတ်ဧကရာဇ် ရှီယွဲ့က သူ့ကို စိုက်ကြည့်နေသည်ကို တွေ့မြင်လျှင် လုချန်းက ပြုံးလိုက်ပြီး

“နတ်ဧကရာဇ် ဖြစ်သွားတော့ ကျုပ်ကို ခင်ဗျားရဲ့ အမည်းစက်လို့ သတ်မှတ်ပြီး နှုတ်ပိတ်ဖို့ သတ်ချင်နေတာတော့ မဟုတ်ပါဘူးနော်။”

လုချန်း၏ စကားကို ကြားလျှင် နတ်ဧကရာဇ် ရှီယွဲ့ သတိပြန်ဝင်လာပြီး

“ရှင်က လုံးဝတော့ မအေဘူးပဲ”

ဟု အေးစက်စွာ ပြောလိုက်သည်။

သူမသည် လုချန်းအား သူမ၏ အမည်းစက်တစ်ခုအဖြစ် တကယ် ခံစားခဲ့ရသော်လည်း မျိုးရိုးလိုက်အမွေအနှစ် မှတ်ဉာဏ်များ ရှိနေခြင်းကြောင့် ၎င်းမှာ အမည်းစက်တစ်ခု ဖြစ်နေရင်ပင် သူမ လက်ခံရမည်သာ ဖြစ်သည်။ ဤအမည်းစက်တစ်ခုတည်းကြောင့် သူမ၏ ရှေ့ဆက်တက်ရောက်မည့် လမ်းကြောင်းကို လုံးဝ မပြတ်တောက်စေနိုင်ပေ။

တစ်နေ့တွင် ထျန်းရန် နတ်ဘုရားနယ်မြေမှ ထွက်ခွာပြီး ပြင်ပလောကကို မြင်တွေ့လိုသည့် ဆန္ဒများ သူမ၌ ရှိနေဆဲ ဖြစ်သည်။

လုချန်းက မျက်နှာအမူအရာမပျက်ပဲ

“ကိုယ့်လင်သားကို သတ်ပစ်လို့ မရပါဘူး။ ကျုပ်တို့ကလေးက အဖေမရှိပဲ မွေးလာရင် ဘယ်လောက် သနားဖို့ကောင်းလိုက်မလဲ။”

နတ်ဧကရာဇ် ရှီယွဲ့က နှာခေါင်းရှုံ့ကာ အေးစက်စွာ ပြောလိုက်သည်။

“ကျွန်မလို ဧကရာဇ်က ကောင်းကင်လမ်းစဉ် သစ္စာဆိုချက်ကို လိုက်နာဦးမယ်လို့ ရှင် ထင်နေတုန်းလား။”

“ကျွန်မက အခု နတ်ဧကရာဇ်တစ်ပါး ဖြစ်နေပြီ။ ကောင်းကင်လမ်းစဉ်ကတောင် ကျွန်မကို ဘာမှ မတတ်နိုင်တော့ဘူး။”

လုချန်းသည် သူမနှင့် ထိုကဲ့သို့သော လုပ်ရပ်များကို ဆက်လက်ပြုလုပ်ရန် ရည်ရွယ်နေဆဲဖြစ်သည်ဟု နတ်ဧကရာဇ် ရှီယွဲ့ ထင်မှတ်လိုက်သည်။

နတ်ဧကရာဇ် ရှီယွဲ့တစ်ယောက် သူမ၏ခန္ဓာကိုယ်အတွင်း ပြောင်းလဲမှုများကို သတိမပြုမိသေးသည်ကို လုချန်း ချက်ချင်း သိသွားပြီး

“ခင်ဗျား ခင်ဗျားရဲ့ခန္ဓာကိုယ်ကို အရင်ဆုံး စစ်ဆေးကြည့်သင့်တယ် ထင်တယ်”

ဟု သတိပေးလိုက်သည်။

ထိုအရာကို ကြားလျှင် နတ်ဧကရာဇ် ရှီယွဲ့လည်း ဝေခွဲမရဖြစ်လျက် သူမ၏ နတ်အာရုံကို သုံးကာ ခန္ဓာကိုယ်ကို စစ်ဆေးကြည့်လိုက်ရာ မိုးကြိုးပစ်ချခံရသကဲ့သို့ လုံးဝ ဆွံ့အမှင်တက်သွားခဲ့တော့သည်။

သူမ၏ ဝမ်းဗိုက်အတွင်း၌ သက်ရှိတစ်ခု၏ တည်ရှိမှု ရှိနေပြီ ဖြစ်သည်။

သူမ... သူမသည် တကယ်ပင် ဤလူယုတ်မာ၏ ကလေးကို ကိုယ်ဝန်လွယ်ထားရပြီ ဖြစ်သည်။

သို့သော်လည်း ၎င်းက အဓိပ္ပာယ်ရှိလှသည်။ လုချန်းနှင့် စုံတွဲကျင့်စဉ်ကို ကျင့်ကြံပြီးနောက် သူမသည် ဖန်တီးခြင်းလမ်းစဉ်ကို လျင်မြန်စွာ နားလည်သဘောပေါက်ခဲ့သည်။ သူမ၏ ခန္ဓာကိုယ်သည်လည်း ကောင်းကင်လမ်းစဉ်၏ ကန့်သတ်ချက်များကို တဖြည်းဖြည်း ချိုးဖျက်နိုင်ခဲ့သဖြင့် သာမန်နတ်များနှင့် နှိုင်းယှဉ်ပါက ကိုယ်ဝန်ရရှိရန် ပိုလွယ်ကူသွားစေခဲ့သည်။

ထို့ပြင် ထိုကဲ့သို့သော စိတ်ခံစားမှု အခြေအနေထဲတွင် ရှိနေပြီး လုချန်း၏ နှစ်ပေါင်းများစွာ နှိပ်စက်ခြင်းကို ခံခဲ့ရသဖြင့် ယခုလို ဖြစ်သွားသည်မှာ သဘာဝကျလှပေသည်။

ယခု သူမ ဘာလုပ်သင့်သနည်း။

ဤကလေး၏ ကံကြမ္မာပတ်သက်မှုမှာ အလွန်တရာ ကြီးမားလွန်းလှသည်။

အကယ်၍ ဤကလေး မွေးဖွားလာပါက သူမသည် တစ်သက်လုံး ဤလူနှင့် ကံကြမ္မာ ရစ်ပတ်နှောင်ဖွဲ့မိတော့မည် ဖြစ်သည်။ တစ်ကြိမ် ရှိခဲ့ပြီးလျှင် ဒုတိယအကြိမ်၊ တတိယအကြိမ်နှင့် ထောင်ပေါင်းများစွာသော အကြိမ်ပေါင်းများစွာ ရှိလာလိမ့်မည်...

နောင်အနာဂတ်တွင်လည်း သူမသည် ဤလူ၏ စော်ကားခြင်းကို ဆက်လက်ခံနေရမှာလား။

ဤလူက သူမ၏ ကံကြမ္မာသတ်မှတ်သူလည်း ဖြစ်နေသေးသည်။ သူက သူမ၏ ခန္ဓာကိုယ် သို့မဟုတ် အမြီးကို ထိတွေ့မိရုံ သို့မဟုတ် သူမအနား၌ ရှိနေရုံမျှဖြင့် သူမသည် မိတ်လိုက်သည့် အခြေအနေသို့ ရောက်ရှိသွားနိုင်သည်။

ခဏလေး...

လုချန်းက သူမ၏ ကံကြမ္မာသတ်မှတ်သူ ဖြစ်နေပြီးဖြစ်ကာ သူတို့နှစ်ဦးမှာ အတူတကွ နှောင်ဖွဲ့ထားပြီးဖြစ်ကြောင်း နတ်ဧကရာဇ် ရှီယွဲ့ လျင်မြန်စွာ သတိပြုမိသွားသည်။ ဤကံကြမ္မာနှောင်ကြိုးမှာ ကလေးတစ်ယောက် လွယ်ထားရသည့် ပတ်သက်မှုထက်ပင် ပိုကြီးမားနိုင်ခြေရှိသည်။

သူမ ကလေးကို မလိုချင်ဟု ဆိုလျှင်ပင် လုချန်းကို အန္တရာယ်ပြု၍ မရသေးပေ။

နတ်ဧကရာဇ် ရှီယွဲ့ တွေဝေသွားခဲ့သည်။

ဤကလေးက...

မည်သို့ပင်ဆိုစေ ၎င်းမှာ သူမ၏ ပထမဦးဆုံး ကလေးဖြစ်ပြီး မွေးဖွားလာလျှင်ပင် သူမအပေါ် သက်ရောက်မှု အလွန် ရှိလိမ့်မည်မဟုတ်ပေ။

သူမသည် ဤလုချန်းကို အလွန် မနှစ်သက်သော်လည်း ကလေးကတော့ အပြစ်မဲ့၏။ သူမ၏နှလုံးသားထဲတွင်လည်း သားသမီးအပေါ် အနည်းငယ် မျှော်လင့်တောင့်တမှု တကယ် ရှိနေခဲ့သည်။

သူမသည် ယခုအခါ နတ်ဧကရာဇ်တစ်ပါး ဖြစ်နေပြီဖြစ်ကာ ဤလောက၏ အထွတ်အထိပ်တွင် ရပ်တည်နေပြီး နောင်အနာဂတ်တွင် ပိုစွမ်းအားကြီးလာရန် ခက်ခဲလိမ့်မည် ဖြစ်သည်။ ထို့ပြင် သူမ၌ ကုန်ဆုံးနိုင်ခြင်းမရှိသော သက်တမ်း ရှိနေသဖြင့် နောက်ပိုင်းတွင် သူမ၌ လုပ်စရာ အမြောက်အမြား ရှိတော့မည် မဟုတ်ရာ ကလေးတစ်ယောက်ကို ဘာကြောင့် မမွေးမြူရမည်နည်း။

အကယ်၍ နောင်အနာဂတ်တွင် သူမသည် ကောင်းကင်လမ်းစဉ်၏ ကန့်သတ်ချက်များကို မချိုးဖျက်နိုင်ပဲ ပိုမြင့်မားသော နယ်ပယ်သို့ တက်လှမ်းနိုင်ခြင်း မရှိပါက၊ ထျန်းရန် နတ်ဘုရားနယ်မြေမှ မထွက်ခွာနိုင်ပါက သူမ၏ မျှော်လင့်ချက်အားလုံးကို သူမ၏ကလေးအပေါ်၌ ထားရှိနိုင်သည်။

အဆုံးစွန်၌ လုချန်းကိုယ်တိုင်က နတ်ဧကရာဇ် လူဝင်စားတစ်ဦး ဖြစ်နိုင်ပြီး သူမကလည်း အမြီးကိုးခု မြေခွေးတစ်ကောင် ဖြစ်သည်။ သူတို့နှစ်ဦး ပေါင်းစပ်မွေးမြူမည့် ကလေးတစ်ယောက်က သာမန်တော့ လုံးဝ မဖြစ်နိုင်ပေ။

ဤရှုထောင့်မှကြည့်လျှင် လုချန်း သူမ၏ ကံကြမ္မာသတ်မှတ်သူ ဖြစ်နေခြင်းက တစ်နည်းအားဖြင့် အဓိပ္ပာယ်ရှိလှပေသည်။

သူမသည် အမြီးကိုးခု မြေခွေးတစ်ကောင်ဖြစ်ပြီး နတ်ဆိုးမျိုးနွယ်စု၏ တော်ဝင်မျိုးနွယ် ဖြစ်သည်။ သူမ၏ သွေးမျိုးဆက်မှာ ပြင်ပလောကမှ မြစ်ဖျားခံလာခြင်း ဖြစ်နိုင်ပြီး လက်ရှိ ထျန်းရန် နတ်ဘုရားနယ်မြေအတွင်း၌ မဟာစွမ်းအားကြီးပုဂ္ဂိုလ်တစ်ဦး၏ လူဝင်စားဟု သံသယရှိရသော လုချန်းကဲ့သို့သော သူကသာ သူမနှင့် ထိုက်တန်နိုင်ပေသည်။

နတ်ဧကရာဇ် ရှီယွဲ့၏ အေးစက်ပြီး ညှို့ဓာတ်ပြည့်ဝသော မျက်နှာပေါ်မှ မယုံကြည်နိုင်မှုကို တွေ့မြင်လျှင် လုချန်းက လက်တစ်ဖက်ကို လွှတ်လိုက်ပြီး နတ်ဧကရာဇ် ရှီယွဲ့၏ ဆီးနှင်းကဲ့သို့ ဖြူသော အမြီးကို အသာအယာ ပွတ်သပ်ပေးကာ

“ခင်ဗျား ကျုပ်တို့ကလေးကို အန္တရာယ်ပြုမှာ မဟုတ်ပါဘူးနော်”

လုချန်းသည် နတ်ဧကရာဇ် ရှီယွဲ့၏ အတွေးကို လုံးဝ သေချာရေရာခြင်း မရှိပေ။ အဆုံးစွန်၌ နတ်ဧကရာဇ် ရှီယွဲ့သည် ယခုအခါ နတ်ဧကရာဇ်တစ်ပါး ဖြစ်နေပြီဖြစ်ရာ ကောင်းကင်လမ်းစဉ် သစ္စာဆိုချက်က သူမအပေါ် သက်ရောက်မှု မရှိတော့ပေ။

နတ်ဧကရာဇ်တစ်ပါးအနေနှင့် အခြားသူတစ်ဦး၏ ကလေးကို မွေးဖွားပေးရခြင်းက သူမ၏ သိက္ခာကို လုံးဝ ပျက်စီးစေမည် ဖြစ်သည်။

လုချန်း၏ လက်က နတ်ဧကရာဇ် ရှီယွဲ့၏ အမြီးကို ပွတ်သပ်မိလျှင် သူမ၏ခန္ဓာကိုယ်အတွင်း လျှပ်စစ်စီးဆင်းသွားသကဲ့သို့ နတ်ဧကရာဇ် ရှီယွဲ့ ရုတ်တရက် ခံစားလိုက်ရသည်။

သူမသည် သတိကို လျင်မြန်စွာ ပြန်လည်စုစည်းလိုက်ပြီး လုချန်းအား ဒေါသတကြီး စိုက်ကြည့်လိုက်သည်။

“ထွက်သွားစမ်း။”

--

………