အခန်း ၄၉၃

အခန်း။ ၄၉၃

မျှော်လင့်ထားသည့်အတိုင်းပင် သာယာနာပျော်ဖွယ်ကောင်းသော ငှက်အော်သံရှည်ကြီး ထွက်ပေါ်လာသည်။

ဧရာမ ငှက်နီကြီးတစ်ကောင် ကောင်းကင်မှ ဆင်းသက်လာပြီး နတ်ဆိုးအမြောက်အမြားကို သတ်ဖြတ်လိုက်သည်။

လူသားနှင့် နတ်ဆိုးတို့၏ အကြည့်များအောက်တွင် အနီရောင် အလင်းတန်းဖြင့် ဖုံးလွှမ်းနေသူတစ်ဦးမှာ ဝေးလံသောနေရာမှ လျင်မြန်စွာ ချဉ်းကပ်လာသည်။

လုံယီမှာ ဟွိုင်မြို့ ကျဆုံးခန်းကို အချိန်ကိုက် မြင်တွေ့ရလိမ့်မည်ဟု မမျှော်လင့်ထားခဲ့ပေ။ လူသားမျိုးနွယ်၏ ဆိုးရွားလှသော အဖြစ်ဆိုးကို မြင်လိုက်ရသောအခါ သူ၏ စိတ်နှလုံးထဲတွင် ယခင်က မရှိဖူးသေးသော ပြင်းထန်သည့် သတ်ဖြတ်လိုစိတ်များ ပေါက်ကွဲထွက်လာသည်။

"အနီရောင် သူရဲကောင်း မင်းကို ငါတို့ အကြာကြီး စောင့်ခဲ့ရတာ"

အရှိန်အဝါ ပြင်းထန်သော ဧရာမ အရိပ်ကြီးများက လုံယီကို ပတ်ပတ်လည်မှ ဝိုင်းရံထားလိုက်သည်။

ထိုအရိပ်များထဲတွင် ရင်ဘတ်တွင် အပြာရောင် ကျောက်မျက်ရတနာ မြှုပ်နှံထားသည့် သမင်နတ်ဆိုး၊ ရုပ်ပိုင်းဆိုင်ရာ မရှိဘဲ မီးခိုးငွေ့ကဲ့သို့ ဖြစ်နေသည့် တစ္ဆေ၊ အနီရောင်နှင့် ငွေရောင် ကိုယ်ခန္ဓာရှိပြီး ကြွက်သားများ ထွားကျိုင်းနေသည့် မျောက်နတ်ဆိုးတို့ ပါဝင်သည်။

သူတို့အပေါ်ရှိ ကောင်းကင်ယံတွင်လည်း ကြောက်မက်ဖွယ်ကောင်းသော သွေးရောင် အင်းဆက်များက ပျံဝဲနေကြသည်။

လုံယီမှာ လွတ်မြောက်ရန် လမ်းစမရှိတော့ပေ။ လုံယီကို ဝိုင်းထားသည့် နတ်ဆိုးဗိုလ်ချုပ်များမှာ အနည်းဆုံး အဆင့်မြင့် နတ်ဆိုးဗိုလ်ချုပ်အဆင့်ရှိကြသည်။ နတ်ဆိုးမျိုးနွယ်စုမှာ အနီရောင် သူရဲကောင်းကို သတ်ဖြတ်ရန် အသင့်ပြင်ထားခြင်းပင်။

ဟောကိန်းတွက်ချက်သူက ယုံကြည်မှုရှိစွာဖြင့် "အနီရောင် သူရဲကောင်း ဒီနေ့လာမယ်ဆိုတာ ငါတွက်ချက်ထားပြီးသား သူ့ရဲ့ သေဘေးက ဒီနားမှာပဲ" ဟု ပြောသည်။

သူ၏ ဘေးရှိ နတ်ဆိုးဗိုလ်ချုပ်တစ်ဦးက "လူသားတွေထဲမှာ မင်းရဲ့ ဟောကိန်းထုတ်စွမ်းရည်ကလွဲရင် ငါတို့ကို စိုးရိမ်စေတာ မရှိဘူး" ဟု ချီးကျူးလိုက်သည်။

ဟောကိန်းတွက်ချက်သူမှာ ကျယ်လောင်စွာ ရယ်မောလိုက်သည်။

"ဒီအနီရောင် သူရဲကောင်း ဘယ်လောက်တောင် စွမ်းသလဲဆိုတာ ငါကိုယ်တိုင်ပဲ သတ်ကြည့်လိုက်မယ်"

လုံယီ၏ လမ်းကို ပိတ်ဆို့ထားသူမှာ အနီရောင်နှင့် ငွေရောင် ကိုယ်ခန္ဓာရှိသည့် မျောက်နတ်ဆိုးဖြစ်သည်။

၎င်းမှာ ခုနစ်ပေ သို့မဟုတ် ရှစ်ပေခန့်သာ မြင့်သော်လည်း ကြွက်သားများ တင်းရင်းနေပြီး ကိုယ်ခန္ဓာမျက်နှာပြင်တွင် သတ္တုကဲ့သို့ တောက်ပနေကာ သွေးစွမ်းအင်များ တရွှဲရွှဲ တက်နေသဖြင့် ရုပ်ပိုင်းဆိုင်ရာ အလွန်သန်မာကြောင်း သိသာသည်။ ၎င်းကို မြင်သောအခါ နတ်ဆိုးများမှာ ပြုံးပျော်နေကြသည်။

"ဒီမျောက်ရဲ့ သွေးမှာ နတ်မျောက်မျိုးဆက်ရဲ့ အစွမ်းအနည်းငယ် ပါနေတယ်။ ရုပ်ပိုင်းဆိုင်ရာ သန်မာမှုနဲ့ မာကျောမှုမှာ သူ့ကို ယှဉ်နိုင်မယ့်သူ ဒီမှာ မရှိဘူး"

"အရင်တစ်ခါ လူသား ကျင့်ကြံသူတစ်ယောက်က အဆင့်မြင့် ဝိညာဉ်ဓားပျံနဲ့ ခုတ်လိုက်တာတောင် သူက ဘာမှ မဖြစ်ခဲ့ဘူး"

"အနီရောင် သူရဲကောင်းက ဒီမျောက်ကို ဘယ်လိုမှ မယှဉ်နိုင်ပါဘူး။ ဒါပေမဲ့ သူ လွတ်မသွားအောင်တော့ ဂရုစိုက်ကြ"

နတ်ဆိုးများမှာ သက်သောင့်သက်သာ ရှိနေကြသည်။

ငွေရောင်မျောက်၏ ကိုယ်ခန္ဓာမှာ အဆင့်မြင့် ဝိညာဉ်လက်နက်ကဲ့သို့ မာကျောသည်ဟု သူတို့ ယုံကြည်ထားကြသည်။ လုံယီမှာ သူ၏ ရှေ့ရှိ မျောက်နတ်ဆိုးကို ငေးကြည့်နေသည်။ အရည်အသွေးပြမျက်နှာပြင်၏ စူးစမ်းရှာဖွေခြင်း မှော်အတတ်ကို သူ အသုံးပြုလိုက်သည်။

[အမည်: မျောက်နတ်ဆိုး ]

[အသက်: ၈၇၅ / ]

[အဆင့်: အဆင့်မြင့် နတ်ဆိုးဗိုလ်ချုပ်]

[စွမ်းရည်: မာကျောခြင်း]

[အမျိုးအစား: ရွှေ]

မာကျောခြင်က ကိုယ်ခန္ဓာ၏ မာကျောမှုကို အတိုင်းအတာတစ်ခုအထိ တိုးမြှင့်ပေးနိုင်သည်။

"မင်း ငါ့ကို သတ်နိုင်တယ်လို့ ယုံကြည်တယ်ဆိုရင် နောက်မဆုတ်ဘဲ ငါ့ကို အကြိမ်တစ်ထောင်လောက် ထိပ်တိုက်ရင်ဆိုင်ဖို့ ရဲရဲ့လား"

လုံယီက အေးစက်စွာ မေးလိုက်သည်။

"ဘာလို့ မရဲရမှာလဲ မင်းလို အောက်တန်းကျတဲ့ လူသားက ငါ့ကို အထင်သေးရဲတယ်ပေါ့" မျောက်နတ်ဆိုးမှာ ဒေါသထွက်သွားသည်။

"တစ်ချက်တောင် မခံနိုင်ရင် ငါ့ကို မင်းရဲ့ မြေးလို့ သတ်မှတ်လိုက်"

စကားပြောအပြီးမှာပင် ဘုန်းဟူသော အသံနှင့်အတူ အနီရောင် အလင်းတန်းနှင့် ငွေရောင် အလင်းတန်းတို့ ပြင်းထန်စွာ တိုက်မိသွားသည်။

မြေကြီးပင် တုန်ခါသွားလောက်အောင် အသံမှာ ကျယ်လောင်လွန်းသဖြင့် တိုက်ပွဲနယ်မြေရှိ လူသားနှင့် နတ်ဆိုးတို့၏ နားများမှာပင် အူသွားသည်။

ထိုကဲ့သို့ ကြောက်မက်ဖွယ်ကောင်းသော တိုက်ခိုက်မှုများမှာ အကြိမ်တစ်ထောင်ကျော်အထိ ဆက်လက် ဖြစ်ပွားနေတော့သည်။

ဘုန်း ဘုန်း ဘုန်း

နှစ်ဦးသား တိုက်မိရာမှ ထွက်ပေါ်လာသည့် ကြောက်မက်ဖွယ်ကောင်းသော ဆူညံသံများ၊ လျှပ်စီးအလင်းတန်းများ၊ မီးပွားများနှင့် ဧရာမ အဖြူရောင် လေလှိုင်းများမှာ စစ်မြေပြင်တစ်ခွင် ပျံ့နှံ့သွားသည်။

ထိုတုန်ခါမှုကြောင့် ပတ်ဝန်းကျင်ရှိ နတ်ဆိုးများမှာ လဲကျကုန်ပြီး နား၊ နှာခေါင်းနှင့် ပါးစပ်တို့မှ သွေးများ စီးကျလာကြသည်။ ဟွိုင်မြို့တံတိုင်းအနီးတွင် တိုက်ခိုက်နေသည့် နတ်ဆိုးများမှာလည်း ပြင်းထန်သော လေတိုက်ခတ်မှုကြောင့် တိုက်ပွဲမှာ ရပ်တန့်သွားကြရသည်။

လုံယီနှင့် ငွေရောင်မျောက်ကဲ့သို့ အဆင့်မြင့် ကျင့်ကြံသူများအတွက် အကြိမ်တစ်ထောင် တိုက်ခိုက်ခြင်းမှာ အသက်ရှူနှုန်း အနည်းငယ်မျှသာ ကြာမြင့်သည်။

တိုက်ခိုက်မှုအပြီးတွင် နှစ်ဦးစလုံးသည် မူလနေရာသို့ ပြန်လည် ရောက်ရှိသွားကြသည်။

လုံယီမှာ အနီရောင်အလင်းတန်းဖြင့် ဖုံးလွှမ်းထားသော်လည်း နတ်ဆိုးဗိုလ်ချုပ်များမှာ လုံယီ၏ ခန္ဓာကိုယ်တွင် သွေးများ စီးကျနေပြီး ဒဏ်ရာများဖြင့် ပြည့်နှက်နေသည်ကို မြင်နိုင်သည်။ ငွေရောင်မျောက်မှာမူ ဒဏ်ရာတစ်စက်မျှမရှိဘဲ အသစ်အတိုင်းပင် ဖြစ်နေသည်။

သို့သော် သူတို့ ဝမ်းမြောက်မည့်အချိန် မရရှိလိုက်ပေ။

ဖြတ်ဟူသော အသံကို ကြားလိုက်ရသည်။

ငွေရောင်မျောက်၏ ရင်ဘတ်ဗဟိုချက်တွင် အနက်ရောင် အမှတ်အသားတစ်ခု ချိုင့်ဝင်သွားပြီး ထိုနေရာမှတစ်ဆင့် ပင့်ကူအိမ်ကဲ့သို့ အက်ကြောင်းများမှာ တစ်ကိုယ်လုံးသို့ လျင်မြန်စွာ ပျံ့နှံ့သွားသည်။

"ဘယ်လို... ဘယ်လိုဖြစ်နိုင်မှာလဲ"

မျောက်နတ်ဆိုးမှာ သူ၏ ခန္ဓာကိုယ်ကို ငုံ့ကြည့်ရင်း မယုံကြည်နိုင်သည့် အမူအရာဖြင့် ရေရွတ်သည်။

ဘုန်း…

ထို့နောက် ငွေရောင်မျောက်မှာ အပိုင်းပိုင်း ပြတ်ထွက်သွားပြီး ငွေရောင် အပိုင်းအစများနှင့် အသားစိုင်များအဖြစ်သို့ ရောက်ရှိသွားတော့သည်။

အခြားတစ်ဖက်တွင်မူ လုံယီ၏ ဒဏ်ရာများမှာ တစ်ခဏချင်းပင် ပျောက်ကွယ်သွားသည်။

"မိုက်မဲလိုက်တာ"

လုံယီက ငွေရောင်မျောက်ကို အေးစက်စွာ ကြည့်ကာ ထိုသို့ မှတ်ချက်ပေးလိုက်သည်။ သူ၏ ကျောက်ဖြစ်ခြင်း စွမ်းရည်နှင့် မှန်သံချပ်ကာတို့ကို အပြည့်အဝ အသုံးပြုထားသဖြင့် သူ၏ ခန္ဓာကိုယ်မှာ အဆင့်မြင့် ဝိညာဉ်လက်နက်အဆင့်သို့ ရောက်ရှိသွားပြီး ငွေရောင်မျောက်ထက်ပင် ပိုမိုမာကျောသွားပြီ ဖြစ်သည်။

ငွေရောင်မျောက်မှာ သူ၏ ခန္ဓာကိုယ်ကို အလွန်အမင်း ယုံကြည်ကာ လုံယီနှင့် တိုက်ရိုက် ထိပ်တိုက်ရင်ဆိုင်ခဲ့ခြင်းမှာ အဆုံးသတ်တွင် ကိုယ့်ကိုကိုယ် သတ်သေလိုက်ခြင်းပင်။

လုံယီ၏ စွမ်းအားနှင့် စနစ်၏ ပြန်လည်ကျန်းမာစေခြင်း လုပ်ဆောင်ချက်တို့ ပေါင်းစပ်လိုက်သောအခါ ဤသို့သော ထိပ်တိုက်တွေ့ဆုံမှုမျိုးတွင် မျောက်နတ်ဆိုးမှာ လုံယီကို ယှဉ်နိုင်မည် မဟုတ်ပေ။

မျောက်နတ်ဆိုးမှာ လုံယီ၏ ထောင်ချောက်ထဲသို့ တည့်တည့်တိုးဝင်သွားပြီး လုံယီ၏ လက်ချက်ဖြင့် ပထမဆုံး သေဆုံးသွားသည့် အဆင့်မြင့် နတ်ဆိုးဗိုလ်ချုပ် ဖြစ်လာသည်။

ချက်ချင်းပင် လုံယီသည် နတ်ဆိုးအုပ်စုထဲရှိ ဟောကိန်းတွက်ချက်သူဆီသို့ အကြည့်ရောက်သွားပြီး သူ၏ မျက်ဝန်းထဲတွင် ပြင်းထန်သော သတ်ဖြတ်လိုစိတ်များ တောက်လောင်နေသည်။

ယနေ့ သူ၏ အဓိက ပန်းတိုင်မှာ ထိုသူကို သတ်ရန်ဖြစ်သည်။ ဟောကိန်းတွက်ချက်သူကို မသတ်ရပါက သူ အိပ်မပျော်နိုင်ပေ။

"မကောင်းတော့ဘူး"

ဟောကိန်းတွက်ချက်သူက လက်ချောင်းများကို ရေတွက်ရင်း အမူအရာ ပျက်ယွင်းသွားကာ ဒေါသတကြီး အော်ဟစ်လိုက်သည်။

"ဘယ်လိုလုပ် ဖြစ်နိုင်မှာလဲ သူ့ရဲ့ ကျင့်စဉ်အဆင့်က ဘယ်လိုလုပ် ဒီလောက်မြန်မြန် တိုးတက်နိုင်မှာလဲ သူ့ကို အခုချက်ချင်း တားလိုက်ကြ"

"ကိုယ်ခန္ဓာဓားအသွင်"

နိမ့်သော လေသံနှင့် ပြောလိုက်သည်နှင့် တစ်ကမ္ဘာလုံးမှာ တောက်ပပြင်းထန်သည့် လူပုံသဏ္ဌာန် ဓားအလင်းတန်းကြီးဖြင့် ပြည့်နှက်သွားတော့သည်။