အခန်း ၄၅၇

အခန်း (၄၅၇)

သူမ၏ ရမ်းသမ်းခန့်မှန်းချက်လေးက တစ်ဖက်လူ၏ မည်သူမည်ဝါဖြစ်ကြောင်းကို တကယ်ကြီး ကွက်တိ မှန်ကန်သွားလိမ့်မည်ဟု အိုင်ရှာလာ ထင်မှတ်မထားခဲ့မိချေ။

ရှေးဟောင်းခေတ်ကတည်းက အိပ်စက်နေခဲ့ပြီး ယခုမှ နိုးထလာသော မှော်ဆရာ တစ်ယောက်တဲ့လား။

ဤလူငယ်လေး၏ ဘေးနားရှိ ဆင့်ခေါ်ထားသော သားရဲများက သာမန် ဆင့်ခေါ်သူများ၏ သားရဲများနှင့် လုံးဝ ကွဲပြားခြားနားနေခြင်းမှာ အံ့သြစရာတော့ မဟုတ်တော့ပေ။

သူမကိုယ်တိုင်ပင် မနာလိုဖြစ်ရလောက်အောင် လှပလှပါသည်ဟု ကုန်သည်ယာဉ်တန်းခေါင်းဆောင်က ဖော်ပြခဲ့သော ထိုမိန်းမလှလေး အသုံးပြုခဲ့သည့် မှော်ပညာရပ်များကလည်း သူမ တစ်ခါမျှ မကြားဖူးခဲ့သော အမျိုးအစားများ ဖြစ်နေခဲ့၏။

သို့သော် တစ်ဖက်လူက ရှေးဟောင်းခေတ်က မှော်ဆရာ တစ်ယောက်သာ ဖြစ်နေမည်ဆိုပါက... အရာအားလုံးက ယုတ္တိတန်သွားပြီ မဟုတ်ပါလား။

"ဒီလို... ဒီလိုကိုး။ ရှင်... ရှင် နက်ဖီလင်မ်နဲ့ ဆုံဖူးခဲ့တာလား"

"ဆုံဖူးတာပေါ့။ အကြိမ်မနည်း ဆက်ဆံဖူးတယ်။ သူနဲ့ ငါက အတော်လေး ရင်းနှီးတဲ့ ဆက်ဆံရေးမျိုး ရှိခဲ့တာ"

ဤသည်မှာ လိမ်ညာပြောဆိုနေခြင်း လုံးဝ မဟုတ်ချေ။ နက်ဖီလင်မ်ရဲ့ အကြွင်းအကျန်များမှာ သိုလှောင်ခန်း ရထားတွဲ အတွင်း၌ ရှိနေသည် မဟုတ်ပါလား။ ၎င်းနှင့် အပြန်အလှန် ဆက်ဆံဖူးရုံမျှမက အကယ်၍ ဤကောင်ကြီးက နောက်ဆုံးတွင် နိဗ္ဗာန်ဘုံသို့ ဝင်ရောက်ကာ ပြန်လည်မွေးဖွားလာနိုင်ခြင်း မရှိတော့ဘူးဆိုပါက... ၎င်း၏ အရိုးများကို အမှုန့်ကြိတ်ပြီး သိမ်းငှက် နှင့် ထိုတုံးလုံးတုံးလုံး ဝက်ဝံပေါက်လေး ကို ကျွေးလိုက်မည်ဆိုလျှင် သူတို့ကို ပိုမို အစွမ်းထက်လာစေနိုင်မည်ဟုပင် တွေးတောနေမိသေး၏။

အိုင်ရှာလာ၏ မျက်လုံးများက ဝမ်းမြောက်ဝမ်းသာ အရိပ်အယောင်များဖြင့် တောက်ပသွားခဲ့သည်။ သူမက ရဲချီယန်၏ စကားများကို အကြွင်းမဲ့ ယုံကြည်သွားခဲ့ပြီး စိတ်လှုပ်ရှားစွာဖြင့် ရှေ့သို့ တိုးလာလေ၏။

"သခင်ကြီး... ကျေးဇူးပြုပြီး သဲကန္တာရကို ကယ်တင်ပေးပါ။ နက်ဖီလင်မ်ရဲ့ ခြံဝန်းကို သူ့ရဲ့ မှန်ကန်တဲ့ လမ်းကြောင်းပေါ် ပြန်ရောက်လာအောင် ကူညီပေးပါ"

နက်ဖီလင်မ်ရဲ့ ခြံဝန်း။

နောက်ဆုံးတွင်တော့ ရဲချီယန်သည် ဤဘူတာရုံကမ္ဘာ၏ အမည်နာမကို ဤကမ္ဘာရှိ ဌာနေလူသားများ၏ နှုတ်မှတစ်ဆင့် ကြားလိုက်ရချေပြီ။

"အဲဒီ ကောင်းကင်နတ်ဘုရား ဆိုတဲ့ကောင်က အပြင်လူ တစ်ယောက်ပါ။ သူက ရုတ်တရက်ကြီး ပေါ်လာခဲ့ပြီး သဘောထားပြည့်ဝတဲ့ နက်ဖီလင်မ်ရဲ့ ကယ်တင်မှုကို ခံခဲ့ရပေမဲ့ နက်ဖီလင်မ်က ကမ္ဘာကြီးကို ကယ်တင်ဖို့ အံ့ဖွယ်စွမ်းအားတွေ ပြသနေချိန်မှာ သစ္စာဖောက်ဖို့ ရွေးချယ်ခဲ့တာပဲ"

"မာတမ်။ အဲဒီ ယုတ်မာတဲ့ သစ္စာဖောက်။ သူက နက်ဖီလင်မ်ကို သတ်ပစ်ခဲ့တယ်။ သခင်ကြီး ကျေးဇူးပြုပြီး နက်ဖီလင်မ်အတွက် ကလဲ့စားချေပေးပါ၊ အဲဒီ မုန်းစရာကောင်းတဲ့ သစ္စာဖောက်ကို အနိုင်ယူပြီး နက်ဖီလင်မ်ရဲ့ ခြံဝန်း ဆိုတဲ့ အစစ်အမှန် နာမည်ကို ပြန်လည် ထိန်းသိမ်းပေးပါ"

အိုင်ရှာလာမှာ အလွန်အမင်း စိတ်လှုပ်ရှား တက်ကြွနေပြီး နေရာ၌ပင် ခုန်ပေါက်တော့မတတ် ဖြစ်နေ၏။

သို့သော် ရုတ်တရက် သူမ၏ နားရွက်များက တွန့်ခနဲ လှုပ်ရှားသွားပြီး မျက်နှာအမူအရာက ချက်ချင်းပင် အေးစက်သွားတော့သည်။ သူမက လှည့်ကာ တံခါးကို တွန်းဖွင့်လိုက်ရာ မြေပြင်ပေါ်တွင် ပစ်ကျနေပြီး သူမအား ထိတ်လန့်တကြား စိုက်ကြည့်နေသော လူငယ်တစ်ဦးကို မြင်တွေ့လိုက်ရလေသည်။

"ဥ... ဥက္ကဋ္ဌ... ကျွန်တော် ဘာမှ မကြားလိုက်ရပါဘူး၊ တကယ်ပါ... တကယ်ပါ"

ထိုလူငယ်က လှည့်၍ ထွက်ပြေးရန် ပြင်လိုက်သော်လည်း အိုင်ရှာလာ ပစ်လွှတ်လိုက်သော မီးလုံးတစ်လုံးက သူ၏ ခန္ဓာကိုယ်ကို ထိမှန်သွားခဲ့၏။ သူက စူးစူးဝါးဝါး အော်ဟစ်လျက် လဲကျသွားတော့သည်။

"သခင်ကြီး... ဒီကိစ္စကို ကျွန်မ ရှင်းလင်းလိုက်ပါ့မယ်။ ရှင်က နက်ဖီလင်မ်ရဲ့ ခြံဝန်းကို ကယ်တင်ပေးလိမ့်မယ်လို့ မျှော်လင့်ပါတယ်။ ဒါက မရှိမဖြစ် လိုအပ်တဲ့ စွန့်လွှတ် အနစ်နာခံမှု တစ်ခုပါ"

တံခါးက ပိတ်သွားခဲ့လေပြီ။

ရဲချီယန်က ကျောက်မျက်ရတနာများ စီခြယ်ထားသော ဓားတစ်လက်နှင့် တူသည့် ထိုကြက်တောင်ကို ကစားချင်စရာကောင်းသကဲ့သို့ ထုတ်ယူလိုက်သည်။

"သူ့ကို... အကူအညီ ပေးဖို့ လိုလို့လား"

လီဆက်က တိုးညှင်းစွာ မေးမြန်းလိုက်၏။

"ငါတို့က ဒီကမ္ဘာကို ကယ်တင်ရှင်တွေ ဖြစ်လာဖို့ လာခဲ့တာ မဟုတ်ဘူး၊ တခြားသူတွေရဲ့ ဆန္ဒတွေကို ဖြည့်ဆည်းပေးဖို့လည်း မဟုတ်ပါဘူးလေ"

"ဒါပေမဲ့... အပြင်လူ ဟုတ်လား"

ရဲချီယန်၏ မျက်လုံးများက အနည်းငယ် ကျဉ်းမြောင်းသွားခဲ့သည်။

"တခြားလောကက အတုအယောင် နတ်ဘုရားလား၊ ဒါမှမဟုတ် တခြား အရာတစ်ခုခုများလား"

"အဲဒီ ခွေးခေါင်းနဲ့ကောင်ဆီကနေ နတ်ဘုရားတွေရဲ့ စွမ်းအားကို ငါ သိပ်ပြီး မခံစားခဲ့ရဘူး"

【ဘုရားသခင်များကို ဒေါသထွက်စေသူ】

သူ တပ်ဆင်ထားသော ဤဂုဏ်ပုဒ်သည် မြင့်မြတ်သော သက်ရှိများကို တိုက်ခိုက်ရာတွင် ပျက်စီးဆုံးရှုံးမှုကို ကြီးမားစွာ တိုးမြှင့်ပေးရုံသာမက အခြားသူများထံမှ နတ်ဘုရားစွမ်းအား သိပ်သည်းဆကိုပါ ခပ်ရေးရေး အာရုံခံသိရှိနိုင်စေလေသည်။

ထိုခွေးခေါင်းနှင့်ကောင်က ပုံရိပ်ယောင် အဖြစ်ဖြင့်သာ ပေါ်ထွက်လာခဲ့သော်လည်း...

သူ့ထံတွင်ရှိသော နတ်ဘုရားစွမ်းအားမှာ ရဲချီယန် တစ်ချိန်က ရှင်းလင်း သတ်ဖြတ်ခဲ့ဖူးသည့် အားအနည်းဆုံးသော ဂေါ်ဘလင် နတ်ဘုရား ထက်ပင် မရေမတွက်နိုင်အောင် အားနည်းနေသေး၏။

သူက... ရဲချီယန်အတွက် လူသားတစ်ယောက်နှင့် ပိုတူနေသလို ခံစားရသည် မဟုတ်ပါလား။

လူသား... အပြင်လူလား။

အဲဒါက... ရထားမောင်းနှင်သူ များလား။

"ဟင်... ဒီဘူတာရုံမှာ ပုန်းအောင်းနေတဲ့ ရထားမောင်းနှင်သူ အဟောင်း တစ်ယောက်များ ဖြစ်နေမလား"

ဘုရားကျောင်းမှ ဘာသာဝင်များ၏ ကြီးမား ကျယ်ပြန့်သော ရှာဖွေမှုကြီးက ညတစ်လျှောက်လုံး ဆက်လက် ဖြစ်ပေါ်နေခဲ့သည်။

မြို့တော်အတွင်းရှိ အခန်းတိုင်း၊ နေရာတိုင်းကို ၎င်းတို့က အလွန်အမင်း ရူးသွပ်သော စိတ်ဆန္ဒများဖြင့် ရှာဖွေခဲ့ကြ၏။

သို့သော် ရဲချီယန်က သူတို့ရှေ့၌ တကယ်တမ်း ထွက်ပေါ်လာခဲ့လျှင်တောင် ဤလူများက သူ့ကို လုံးဝ မှတ်မိနိုင်မည် မဟုတ်ချေ။

အိုင်ရှာလာ အမည်ရသော ကြောင်မလေး ဥက္ကဋ္ဌက ဒုတိယနေ့ နံနက်ခင်းတွင် ရဲချီယန်သည် ကုန်သည်အသင်း၏ အထူး ဧည့်သည်တော် ဖြစ်လာခဲ့ပြီး သူ၏ အမိန့်တိုင်းကို အကြွင်းမဲ့ နာခံရမည်ဟု ကြေညာလိုက်လေသည်။

အမှတ်မထင်ပင် သူမက ငွေကြေး အမြောက်အမြား အသုံးပြုကာ ရဲချီယန်နှင့် လီဆက်တို့အတွက် ဘုရားကျောင်း၌ မှတ်ပုံတင်ထားသော ကိုယ်ရေးအချက်အလက် တစ်ခုကိုပါ လုံခြုံစွာ ရယူပေးခဲ့၏။

ယခုအခါ ရဲချီယန်သည် ရှာဖွေတွေ့ရှိခံရခြင်း မရှိဘဲ နေ့ခင်းကြောင်တောင်တွင် ဘုရားကျောင်းဆီသို့ ပင်မတံခါးပေါက်မှတစ်ဆင့် ဝင်ရောက်ကာ တကယ်ကြီး သွားလာလှုပ်ရှားနိုင်ပြီ ဖြစ်လေသည်။

နောက်ရက်များတွင် အိုင်ရှာလာက ရဲချီယန်ကို နက်ဖီလင်မ်အား ကိုးကွယ်ယုံကြည်နေကြဆဲ ဖြစ်သော ဘာသာဝင် အများအပြားနှင့် တွေ့ဆုံရန် ခေါ်ဆောင်သွားခဲ့သည်။

ဤလူများ၏ အသက်အရွယ်မှာ ကွဲပြားကြသော်လည်း သူတို့၏ တူညီသော အချက်မှာ ခွေးခေါင်းနှင့် ကောင်းကင်နတ်ဘုရား မာတမ် အပေါ် နက်ရှိုင်းသော နာကြည်းချက် ရှိနေခြင်းပင် ဖြစ်၏။

ထိုကဲ့သို့သော လူများမှာ မနည်းလှချေ။ ထို့အပြင် ကုန်သည်အသင်းက ဆယ်စုနှစ်တစ်ခုကျော်ကြာ အခြားမြို့တော်များနှင့် မျိုးနွယ်စုများတွင် ငွေကြေးများ အသုံးပြု၍ တည်ဆောက်ထားခဲ့သော တပ်မတော်နှင့် သတင်းထောက်လှမ်းရေး ကွန်ရက်တို့နှင့် ပေါင်းစပ်လိုက်ပါက...

သူတို့က လှုပ်ရှားရန် ပြင်ဆင်နေကြလေပြီ။

ထို့ပြင် ယခုမှ နိုးထလာသော 【ရှေးဟောင်းနှင့် အစွမ်းထက်သော မှော်ဆရာ】 ဖြစ်သည့် ရဲချီယန်ကလည်း အိုင်ရှာလာနှင့် အခြားသော နက်ဖီလင်မ် ဘာသာဝင်များအတွက် ယုံကြည်မှုကို ထောက်ပံ့ပေးနေခဲ့သည်။

မာတမ်ကို အနိုင်ယူနိုင်မည့် ယုံကြည်မှုပင် ဖြစ်လေသည်။

စစ်ပွဲအတွက် အချိန်ကို မာတမ် ကောင်းကင်နတ်ဘုရား ပွဲတော် စတင်မည့် ၉ ရက်အကြာတွင် သတ်မှတ်ထားခဲ့သည်။ ထိုအချိန်ရောက်လျှင် အခြားသော မျိုးနွယ်စုများနှင့် သဲကန္တာရ မြို့တော်များမှ ပုန်ကန်သူ သောင်းနှင့်ချီ၍ ဘုရားဖူးခရီးစဉ် ဟူသော အမည်ခံဖြင့် စုရုံးလာကြမည် ဖြစ်သည်။

သူတို့သည် ခွေးခေါင်းနှင့် ကောင်းကင်နတ်ဘုရား မာတမ် တည်ထောင်ခဲ့သော ပထမဆုံး ဘုရားကျောင်းရှိရာ မာတမ် သန့်ရှင်းသော မြို့တော်ဆီသို့ ဦးတည် ချီတက်ကြမည် ဖြစ်သည်။ ၎င်းမြို့တော်မှာ သူ၏ ဒဏ္ဍာရီလာ ဇာတ်လမ်းများအရ လူသားကမ္ဘာဆီသို့ ဆင်းသက်ကာ ဆိုးယုတ်သော သားရဲများကို အနိုင်ယူပြီး ကမ္ဘာကြီးကို ကယ်တင်ခဲ့သည့် ပထမဆုံး မှတ်တိုင်ပင် ဖြစ်၏။

မည်သူ့၏ သန့်ရှင်းသော နေရာဆီသို့ သူတို့ ဘုရားဖူးသွားနေကြသနည်း ဆိုသည်ကိုတော့ စောင့်ကြည့်ရမည်သာ ဖြစ်ပေသည်။

ကုန်သည်ယာဉ်တန်းက တတိယမြောက်နေ့တွင် ထွက်ခွာခဲ့သည်။ ဤတစ်ကြိမ်တွင်မူ အိုင်ရှာလာနှင့် ယာဉ်တန်းခေါင်းဆောင်တို့ အတူတကွ လိုက်ပါလာခဲ့ကြ၏။ သူတို့သည် ၎င်းတို့၏ ပိုင်ဆိုင်မှု အားလုံးနီးပါးကို ယူဆောင်လာခဲ့ပြီး ကောင်းကင်နတ်ဘုရား မာတမ်ကို မယုံကြည်သော ကြေးစားစစ်သည် အများအပြားကိုလည်း ငှားရမ်းခဲ့ကြသည်။

သူတို့၏ ကိုယ်ပိုင် အစောင့်အကြပ်များနှင့်အတူ လူရာဂဏန်းခန့်ရှိသော အဖွဲ့ကြီးက ပိုမို ကြမ်းတမ်းလာသော လေပြင်းများကို အန်တုရင်း မာတမ် သန့်ရှင်းသော မြို့တော်ဆီသို့ ခမ်းနား ကြီးကျယ်စွာ ချီတက်သွားကြလေတော့သည်။

လမ်းခရီးတစ်လျှောက်တွင် လေပြင်းများကြောင့် ဖြစ်ပေါ်လာသော သဲမုန်တိုင်းများနှင့် ဖုန်မုန်တိုင်း အများအပြားကို သူတို့ ကြုံတွေ့ခဲ့ကြရသည်။ ရဲချီယန်က နေသာသော အရုပ်လေး၏ ရာသီဥတု ခန့်မှန်းချက်ကို အထူးတလည် စစ်ဆေးကြည့်လိုက်၏။

လေပြင်းများက မုန်တိုင်း အဖြစ်သို့ ပြောင်းလဲနေချေပြီ။

ဤဘူတာရုံကမ္ဘာနှင့် လွင်တီးခေါင်ပြင် အကြားရှိ အချိန်အချိုးအစားမှာ မည်သို့ရှိသည်ကို ရှင်းလင်းစွာ မသိရပေ။

သို့သော် ဤမုန်တိုင်းထန်သော ရာသီဥတု ပြောင်းလဲမှုက လွင်တီးခေါင်ပြင်ရှိ လေပြင်းများလည်း ပိုမို အားကောင်းလာနေသည်ဟု ဆိုလိုခြင်း ဖြစ်နိုင်ပေသည်။

သဲကန္တာရထဲတွင် သဲဓားပြများ သောင်းကျန်းနေရုံသာမက မာတမ်၏ မျက်လုံးများ ဟု ခေါ်ဆိုကြသော မှော်သားရဲ အများအပြားလည်း ရှိနေသေး၏။

မြွေနဂါးများ၊ ဧရာမ သဲကန္တာရ ကင်းမြီးကောက်ကြီးများ၊ ပါးစပ်ပေါက် ဧရာမ သဲတီကောင်ကြီးများ... ကဲ့သို့သော အရာများ ဖြစ်သည်။ ဤသတ္တဝါများကို မာတမ်အား ယုံကြည်ကိုးကွယ်သူများ၏ ဆုတောင်းမှုများဖြင့် အဝေးသို့ နှင်ထုတ်ထားနိုင်စွမ်း ရှိသည်ဟု ဆိုကြပေသည်။

သို့သော် ဤတစ်ကြိမ်တွင်တော့ ဆုတောင်းမှုများက လုံးဝ အကျိုးသက်ရောက်မှု မရှိတော့ချေ။

ခွေးခေါင်းနှင့် ကောင်းကင်နတ်ဘုရား မာတမ်သည် ဤမှော်သားရဲများကို သဲကန္တာရအတွင်း ခရီးသွားနေသူများအား သတ်ဖြတ်ရန် ခွင့်ပြုထားလိုက်သည်။

ဤသည်မှာ မာတမ်၏ ပြစ်ဒဏ် ဟု ခေါ်ဆိုသော အရာပင် ဖြစ်လေတော့သည်။

မာတမ် သန့်ရှင်းသော မြို့တော်ဆီသို့ သူတို့ ပိုမို နီးကပ်လာသည်နှင့်အမျှ...

ရဲချီယန်က အာနိသင်မဲ့နေသော စိတ်ဝိညာဉ် ကျောက်စိမ်းနှင့် နက်ဖီလင်မ်ရဲ့ ကြက်တောင်တို့ နှစ်ခုစလုံးသည် တစ်စုံတစ်ခုကြောင့် ပဲ့တင်ထပ် တုန်ခါနေကြကြောင်းကို ရှာဖွေတွေ့ရှိသွားခဲ့သည်။

မာတမ်က ဤကြက်တောင်ကို သူ့အနားမှနေ၍ အဝေးသို့ အဘယ်ကြောင့် ဖုံးကွယ်ထားခဲ့သနည်း ဆိုသည်ကို သူ အကြမ်းဖျင်း နားလည်သွားခဲ့ပြီ ဖြစ်၏။

ဤဘူတာရုံ၏ တာဝန်ကို မည်သို့ ပြီးမြောက်အောင် လုပ်ဆောင်ရမည် ဆိုသည်ကိုလည်း သူ အကြမ်းဖျင်း သိရှိသွားခဲ့ပြီ ဖြစ်လေသည်။

မာတမ် သန့်ရှင်းသော မြို့တော်ရှိ မီတာ တစ်ထောင်ခန့် မြင့်မားသော ဧရာမ ခွေးခေါင်းနှင့် ကောင်းကင်နတ်ဘုရား ရုပ်တုကြီး၏ အမြင့်ဆုံး ထိပ်ဖျား၌...

ရထားတွဲများ မပါဝင်သော ရထားတစ်စင်းက ထိုနေရာတွင် ရပ်နားထားလေ၏။

ခွေးခေါင်းနှင့် ကောင်းကင်နတ်ဘုရား မာတမ်က သူ၏ ခွေးခေါင်းကို ချွတ်လိုက်ရာ အောက်ဘက်မှ လူသား မျက်နှာတစ်ခု ပေါ်ထွက်လာခဲ့တော့သည်။

"ဒီတော့... သူတို့ နောက်ဆုံးတော့ ရောက်လာကြပြီပေါ့လေ။ တခြား ရထားမောင်းနှင်သူတွေ..."