အခန်း ၄၅၉

အခန်း (၄၅၉)

အလင်းနှင့် အရိပ်တို့က ဓားတစ်လက်အဖြစ် ပေါင်းစည်းသွားလေ၏။

အထက်သို့ မြင့်မားစွာ မြှောက်ချီလိုက်သည်။

စွဲထင်နေသောမျက်ရည် ဓားက တိမ်တိုက်များကို ဖောက်ထွင်းကာ ဆက်တိုက် ရှည်ထွက်သွားခဲ့ချေပြီ။

ကျဆင်းလာခဲ့သည်။

စွဲထင်နေသောမျက်ရည် ဓားက စက်ဝိုင်းပုံသဏ္ဌာန် တစ်ခုကို ရေးဆွဲလိုက်၏။

မှန်ချပ်ကဲ့သို့ ပြန့်ပြူးညီညာလှသော စက်ဝိုင်းပုံ ဖြတ်ပိုင်းတစ်ခုကို ဤဓားက ခွဲဖြတ် ဖွင့်လှစ်လိုက်လေတော့သည်။

မာတမ်၏ မျက်နှာအမူအရာမှာ လေးနက်တည်ကြည်သွားခဲ့ပေသည်။

သူက ၎င်းကို ဟန့်တားရန် မကြိုးစားခဲ့သလို ဟန့်တားရန်လည်း မဝံ့ရဲခဲ့ချေ။

ထိုအစား သူ၏ ပင်မကိုယ်ထည်ကို ဒေါသထွက်နေသော ကိုယ်ပွားနှင့် နေရာချင်း ဖလှယ်လိုက်လေ၏။

ဒေါသထွက်နေသော ကိုယ်ပွားက အချိန်မီ မတုံ့ပြန်နိုင်ခဲ့ဘဲ ထိုခွဲဖြတ်ခံလိုက်ရသော လေဟာနယ် ဖြတ်ပိုင်းနှင့်အတူ ဖြည်းညင်းစွာ ပြုတ်ကျသွားခဲ့တော့သည်။

ပြုတ်ကျသွားသော ဖြတ်ပိုင်းမှာ လေဟာနယ်ပင် ဖြစ်၏။

ပြုတ်ကျသွားသော ကိုယ်ပွားမှာမူ ခန္ဓာကိုယ်တစ်ခု ဖြစ်လေသည်။

【ခွပ်...】

၎င်းက မှန်ကွဲသွားသည့် အသံနှင့် တူသော်လည်း အမှန်တကယ် ကွဲကြေသွားသည်မှာ မှန်မဟုတ်ဘဲ လေဟာနယ်နှင့် မာတမ်၏ ဒေါသထွက်နေသော ကိုယ်ပွားသာ ဖြစ်ပေသည်။

ညည်းတွားသံ မရှိသလို နာကျင်မှုလည်း မရှိဘဲ မာတမ်၏ ဒေါသထွက်နေသော ကိုယ်ပွားမှာ ခွဲဖြတ်ခံလိုက်ရသော လေဟာနယ်၏ အခြားတစ်ဖက်ရှိ ကြောက်မက်ဖွယ်ကောင်းသော ဖရိုဖရဲ လေဟာနယ် ရေစီးကြောင်းများထဲသို့ ချက်ချင်း မျိုချခံလိုက်ရပြီး သေဆုံးသွားသည့် တခဏ၌ပင် မြေမှုန့်အဖြစ် ကြိတ်ချေခံလိုက်ရလေတော့သည်။

လေဟာနယ်က လျင်မြန်စွာ ပြန်လည် ပုံမှန်ဖြစ်သွားပြီး မာတမ်က မျက်မှောင်ကြုတ်ကာ ရဲချီယန်ထံသို့ အံ့အားသင့်မှုများ ပြည့်နှက်နေသော အကြည့်ဖြင့် စိုက်ကြည့်လိုက်၏။

"ဘာကြောင့်လဲ။ အဆင့် ၉ ပလက်ဖောင်း ကမ္ဘာထဲကို ဝင်ရောက်နိုင်တဲ့ ရထားမောင်းနှင်သူ တစ်ယောက်က ဒီလိုအဆင့်အတန်းမျိုးရှိတဲ့ ရတနာကို မပိုင်ဆိုင်ထားသင့်ဘူး။ ဒီစွမ်းအားက... အနည်းဆုံး အဆင့် ၁၂ ပစ္စည်းတစ်ခုပဲ"

"မင်းက ဘယ်သူလဲ"

ဤသည်မှာ ရဲချီယန်၏ အမည်ကို သူ ပထမဆုံးအကြိမ် မေးမြန်းခြင်းဖြစ်ပြီး စွဲထင်နေသောမျက်ရည် ဓား၏ စွမ်းအားကို မြင်တွေ့ပြီးနောက် ရဲချီယန်အား သူ့ကို ခြိမ်းခြောက်နိုင်စွမ်းရှိသည့် အစစ်အမှန် ပြိုင်ဘက်တစ်ဦးအဖြစ် ပထမဆုံးအကြိမ် သတ်မှတ်လိုက်ခြင်းလည်း ဖြစ်လေသည်။

"ခန့်မှန်းကြည့်လေ"

သူ့ကို ဖြေရမှာလား။

ဘာကြောင့် ဖြေရမှာလဲ။

"အသက်ရှင်ဖို့အတွက် ကိုယ်ပွားတွေကို အသုံးပြုနေတာပေါ့လေ၊ ကောင်းပြီ... မင်း ဘယ်နှကြိမ်လောက် ရှောင်တိမ်းနိုင်မလဲဆိုတာ ငါ ကြည့်ချင်သေးတယ်"

ကိုယ်ပွားတစ်ခုကို ချေမှုန်းနိုင်ခဲ့ပြီဖြစ်ရာ ကျီးကန်းနတ်ဆိုး များကို လွှတ်ပေးလိုက်နိုင်ပြီး စစ်မြေပြင် တစ်ခွင်လုံးသို့ စစ်ကူများ ထောက်ပံ့ပေးနိုင်ခဲ့ချေပြီ။

ရဲချီယန်က နတ်ဆိုးဘုရင်၏ သရဖူကို ကြိတ်ချေပစ်လိုက်ရာ ပုန်ကန်မှု ၏ နတ်ဆိုးများအပေါ် အားဖြည့်ပေးမှုက အထွတ်အထိပ်သို့ ရောက်ရှိသွားတော့သည်။

သူက လက်ကို လွှတ်ပေးလိုက်ရာ မျက်ရည်နီ က သူမ၏ တောင်ပံများကို ခတ်လိုက်ပြီး သူမ၏ ပုံရိပ်က မာတမ်၏ အနောက်ဘက်၌ ထွက်ပေါ်လာခဲ့၏။

သူမ၏ နီရဲသော မျက်လုံးများက ထူးဆန်းသော အလင်းရောင်များဖြင့် တောက်ပနေပြီး ဓားတစ်ချက် ခုတ်ပိုင်းလိုက်လေသည်။

မာတမ်က သူ၏ မှော်တုတ်တံကို အနောက်သို့ လွှဲယမ်းကာ ကာကွယ်လိုက်၏။

ဒေါင်...။

သတ္တုချင်း ရိုက်ခတ်သံက စစ်မြေပြင် တစ်ခွင် ပဲ့တင်ထပ်သွားခဲ့သည်။

သူ၏ ခန္ဓာကိုယ်က အနောက်ဘက်သို့ လွင့်ထွက်သွားပြီး ကာကွယ်ရန် အသုံးပြုခဲ့သော မှော်တုတ်တံပေါ်တွင် သေးငယ်သော အက်ကွဲကြောင်းလေး တစ်ခု ထွက်ပေါ်လာလေတော့သည်။

"အဲဒီဓားက... အဆင့် ၁၂ တင် မကဘူးလား"

စွဲထင်နေသောမျက်ရည် ဓားနှင့် အနီးကပ် ရင်ဆိုင်လိုက်ရပြီးနောက် ၎င်း၏ ကြောက်မက်ဖွယ်ကောင်းသော အဓိပ္ပာယ်ကို သူ နောက်ဆုံးတွင် နားလည်သွားခဲ့ချေပြီ။

"အဆင့် ၁၃ လား"

"ငါ အစစ်အမှန် နတ်ဘုရား နေရာကို တက်လှမ်းသွားမှာကို လွင်တီးခေါင်ပြင်က ကြောက်နေတာလား"

"ငါ့ကို သတ်ဖို့ ဒီလောက် အစွမ်းထက်တဲ့သူ တစ်ယောက်ကို တကယ်ကြီး စေလွှတ်လိုက်တာပဲ"

မာတမ်က အပျက်အစီးများကြားမှ ကုန်းရုန်း ထလာခဲ့သည်။

သူက ကျိုးပဲ့သွားသော အဆင့် ၈ မှော်တုတ်တံကို လွှင့်ပစ်လိုက်၏။

လက်တစ်ချက် ဝှေ့ယမ်းလိုက်ရာ ခွေးခေါင်းက သူ၏ လက်ထဲသို့ ရောက်ရှိလာလေသည်။

သူက ခွေးခေါင်းကို သူ၏ ခေါင်းပေါ်တွင် စွပ်လိုက်ရာ မာတမ်၏ အငွေ့အသက်များက တဖြည်းဖြည်း ပြင်းထန်လာတော့၏။

"နှမြောစရာပဲ၊ မင်း အရမ်း နောက်ကျသွားပြီ"

နတ်ဘုရားစွမ်းအားများ ထွက်ပေါ်လာခဲ့လေပြီ။

မာတမ်၏ ခန္ဓာကိုယ်က တဖြည်းဖြည်း ကြီးမားလာကာ ရုပ်တုပေါ်ရှိ ခွေးခေါင်းနှင့် နတ်ဘုရားနှင့် တစ်ပုံစံတည်း ဖြစ်သွားသည်အထိပင်။

တစ်ချိန်တည်းမှာပင် စနစ်၏ အလင်းမျက်နှာပြင်က ရဲချီယန်၏ အရှေ့တွင် ရုတ်တရက် ပေါ်ထွက်လာခဲ့သည်။

【သတိပေးချက်၊ လွင်တီးခေါင်ပြင် နတ်ဘုရားစွမ်းအား ပေါ်ထွက်လာပါပြီ၊ ကျေးဇူးပြု၍ သတိထား ဆောင်ရွက်ပါ】

လွင်တီးခေါင်ပြင် နတ်ဘုရားစွမ်းအား... အရင်က ဟိုနံပါတ်စဉ်တပ် နတ်ဘုရားတွေ မဟုတ်ဘူးလား။

ထို့အပြင် အတုအယောင် ဟူသော ရှေ့ဆက်စာလုံးလည်း မပါဝင်ချေ။

အခြားတစ်နည်း ပြောရလျှင် ဤမြင့်မြတ်သော သက်ရှိသည် စနစ်က အသိအမှတ်ပြုထားသော အစစ်အမှန် နတ်ဘုရား တစ်ပါး ဖြစ်နေသည်ပေါ့လေ။

ခွေးဟောင်သံများက မရပ်မနား ထွက်ပေါ်နေပြီး မာတမ်၏ ဘာသာဝင်များ၏ ဦးခေါင်းများမှာလည်း ခွေးခေါင်း ပုံသဏ္ဌာန်များအဖြစ် ပြောင်းလဲသွားကြလေသည်။

သာမန် ဘာသာဝင်များ ဖြစ်စေ၊ အစွမ်းထက်သော ဘုန်းတော်ကြီးများ ဖြစ်စေ အသွင်ပြောင်းပြီးနောက် သူတို့၏ စွမ်းအားများက ကြီးမားစွာ တိုးတက်လာခဲ့၏။

ကျန်ရစ်နေသော ကိုယ်ပွား ငါးခုပင်လျှင် မတူညီသော အတိုင်းအတာများဖြင့် အားဖြည့်မှုကို ရရှိသွားကြပေသည်။

ဝါကျင်ကျင် သဲတိမ်တိုက်များက ကောင်းကင်ယံကို တစ်ဖန် ပြန်လည် ဖုံးလွှမ်းသွားပြီး မျက်ရည်နီ ၏ မိုးစက်များကို ဟန့်တားထားလိုက်လေ၏။

"ငါ... မာတမ် က ဒီကမ္ဘာကြီးကို ဦးဆောင်ပြီး လွင်တီးခေါင်ပြင်ထဲကို ခရီးနှင်မယ်"

"ငါက လူသားတွေထဲက ပထမဆုံးသော အစစ်အမှန် နတ်ဘုရား တစ်ပါးဖြစ်လာမယ်"

"ပြီးတော့ မင်းက ငါ့ရဲ့ နင်းခုံ ဖြစ်လာလိမ့်မယ်"

ပွတ်...။

၎င်းက ဥဩသံ တစ်ခုဖြစ်ပြီး အရင်းအမြစ်မှာ ရဲချီယန်၏ ရထားဆီမှ မဟုတ်ဘဲ မာတမ်၏ စက်ခေါင်းတွဲ ဆီမှ ဖြစ်လေသည်။

ဤစက်ခေါင်းတွဲက အပျက်အစီးများကို ဖြတ်သန်းကာ၊ လေဟာနယ်ကို ထိုးခွဲပြီး လွင်တီးခေါင်ပြင် ကမ္ဘာဆီသို့ တည့်မတ်စွာ ဦးတည်လျက် တစ်စင်းတည်း ခရီးဆက်သွားလေတော့သည်။

မဟုတ်သေး၊ ၎င်းက တစ်စင်းတည်း ခရီးဆက်နေခြင်း မဟုတ်ချေ။

အဘယ်ကြောင့်ဆိုသော်... ဤကမ္ဘာကြီးက ၎င်း၏ ရထားတွဲ ဖြစ်နေသောကြောင့်ပင်။

တစ်ခုတည်းသော ရထားတွဲ။

မာတမ်သည် ကမ္ဘာကြီး တစ်ခုလုံးကို သူ၏ ရထားတွဲအဖြစ် ဆွဲငင်ကာ လွင်တီးခေါင်ပြင်၌ ဆက်လက် ခရီးနှင်နေခြင်းပင် ဖြစ်ပေသည်။

"အခု ငါ့မှာ ဘာမှ လိုအပ်ချက် မရှိတော့ဘူး။ မင်းရဲ့ အဆင့် ၁၃ ပစ္စည်းကိုလည်း သုံးပြီးသွားပြီ။ မင်းမှာ တခြား ဘာစွမ်းရည်တွေ ရှိသေးလဲ။ ထုတ်ပြလိုက်စမ်းပါ၊ မဟုတ်ရင် မင်းမှာ နောက်ထပ် အခွင့်အရေး ရတော့မှာ မဟုတ်ဘူး"

မာတမ်က လက်တစ်ချက် ဝှေ့ယမ်းလိုက်ရာ မြို့တော်အတွင်းမှ သဲကုန်းများ ထွက်ပေါ်လာပြီး သူ၏ ကိုယ်ပွားများနှင့် တစ်ပုံစံတည်း တူညီသော ခွေးခေါင်းနှင့် နတ်ဘုရားများအဖြစ် အဆက်မပြတ် ပြောင်းလဲသွားကြလေသည်။

ဝမ်းမြောက်ခြင်း၊ ဒေါသထွက်ခြင်း၊ ပူဆွေးသောကရောက်ခြင်း နှင့် အခြားသော စိတ်ခံစားချက်များကို သူက ဖယ်ရှား ခွာချပစ်လိုက်ချေပြီ။

"ငါက အကန့်အသတ်ကျော်လွန်သူ တစ်ယောက်ပဲ၊ ငါက အစစ်အမှန် နတ်ဘုရား တစ်ပါးပဲ"

"ဒီကမ္ဘာကြီးက ငါ့နောက်ကို လိုက်ပါလာလိမ့်မယ်"

"ဒါကြောင့်... ငါတို့ ခရီးစတင်ကြမယ်"

ဖိညှစ်ခြင်း၊ တွန်းထုတ်ခြင်း။

ရဲချီယန်သည် ဤကမ္ဘာကြီး၊ မဟုတ်... ဤရထားတွဲကြီး၏ သူ့အပေါ် ထားရှိသော အငြိုးတကြီး ရန်လိုမှုများကို ခံစားလိုက်ရလေ၏။

"ဒီနေ့ ရောက်လာဖို့အတွက် ဒီနေရာမှာ နေပြီးတော့ နှစ်တစ်ရာတိုင်တိုင် ငါ ပြင်ဆင်နေခဲ့တာ"

"မင်းကတော့ ငါ့ကို တားဆီးဖို့ လွင်တီးခေါင်ပြင်က စေလွှတ်လိုက်တဲ့ ကံဆိုးသူ တစ်ယောက် သက်သက်ပါပဲ"

"အကန့်အသတ်ကျော်လွန် မုဒ် ကို မင်း ရင်ဆိုင်နိုင်မှာ မဟုတ်ပါဘူး"

သူ၏ စိတ်ခံစားချက်များကို အပြည့်အဝ ခွာချပစ်လိုက်ပြီးနောက် သူက ယခင်ကထက်ပင် ပို၍ စကားများလာခဲ့ပေသည်။

သူ၏ တက်ကြွမှုကင်းမဲ့နေသော လေယူလေသိမ်းက ရဲချီယန်၏ အသိဉာဏ်ကင်းမဲ့မှုနှင့် ကံဆိုးမှုများကို အဆက်မပြတ် သရော် လှောင်ပြောင်နေလေ၏။

"ဒီဘူတာထဲကို အတင်းအကျပ် ဝင်ရောက်လာရတဲ့ အချိန်ကစပြီး မင်းက ကံကြမ္မာရဲ့ စွန့်ပစ်တာကို ခံလိုက်ရပြီ၊ စနစ်ရဲ့ စွန့်ပစ်တာကို ခံလိုက်ရပြီ။ မင်းရဲ့ ဇာတ်သိမ်းက ကြိုတင် သတ်မှတ်ပြီးသားပဲ"

မာတမ်ကို အကဲခတ်နေခဲ့သော ရဲချီယန်က ရုတ်တရက် အသံထွက်၍ ရယ်မောလိုက်လေသည်။

"မင်းက နိုင်သွားပြီလို့ ထင်နေပုံရတယ်နော်"

"မင်းကို တစ်ခုလောက် ပြောပြမယ်"

"ဒီဘူတာထဲကို လာခဲ့တာက ငါ့ရဲ့ ကိုယ်ပိုင် ရွေးချယ်မှုပဲ"

"အခုအချိန်အထိ ငါ့ရဲ့ ရွေးချယ်မှုက မှန်ကန်တယ်လို့ ငါ ယုံကြည်နေတုန်းပဲ"

သူက ကောင်းကင်ယံဆီသို့ လက်ကို မြှောက်လိုက်ပြီး လက်ချောင်းငါးချောင်းကို ခပ်လျော့လျော့ ဆုပ်ကိုင်ထားလိုက်၏။

ဝါကျင်ကျင် သဲတိမ်တိုက်များ၏ အထက်၊ မြင့်မားလှသော ကောင်းကင်ယံ၏ ထိပ်ဖျား၌။

စက်ယန္တရား နဂါးတစ်ကောင်၏ ဟိန်းဟောက်သံက ဝါကျင်ကျင် သဲများကို ဖောက်ထွင်းကာ ကမ္ဘာကြီး၏ အကန့်အသတ်ကို ကျော်လွန်၍ ထွက်ပေါ်လာလေတော့သည်။

【အမဲလိုက် စက်ယန္တရားနဂါး — အကန့်အသတ်ကျော်လွန် မုဒ်】

【သုံးစွဲမှု အကြီးအကျယ် လျှော့ချခြင်း၊ အမြင့်ဆုံး စွမ်းအား】

ဆင့်ကဲပြောင်းလဲပြီးကတည်းက အမဲလိုက် စက်ယန္တရားနဂါး သည် ရထားဒင်္ဂါး ၃၀၀ နှင့် ညီမျှသော အရာခပ်သိမ်း ကို အများဆုံး စုပ်ယူနိုင်စွမ်း ရှိလာခဲ့ပေသည်။

ဤပမာဏမှာ သိပ်မများလှသကဲ့သို့ ထင်ရသော်လည်း အမှန်တကယ်တွင်မူ နည်းပါးလှခြင်း မရှိချေ။

မာတမ်က သူ၏ ကမ္ဘာကြီး ရထားတွဲ မှာ စွမ်းအားတစ်ခုခု၏ ဝါးမျိုခြင်းကို ခံနေရကြောင်း ခံစားလိုက်ရချိန်တွင်... သူ နှစ်တစ်ရာတိုင်တိုင် အချိန်ယူ ပြင်ဆင်ခဲ့ရသည့် အကန့်အသတ်ကျော်လွန် မုဒ် ၏ စွမ်းအားထက် လျော့နည်းခြင်းမရှိသော၊ မဟုတ်သေး... ပို၍ပင် ကြီးမားသော အကန့်အသတ်ကျော်လွန် မုဒ် စွမ်းအားတစ်ခုကို သတိပြုမိသွားချိန်တွင်...

စိတ်ခံစားချက် အားလုံး ခွာချခံထားရသော မာတမ်၏ နှလုံးသားထဲတွင် စိတ်အနှောင့်အယှက်ဖြစ်မှု တစ်ချက် ဖြတ်ပြေးသွားခဲ့လေတော့သည်။

"ဒီလိုကိုး။ ငါ့ကို တားဆီးဖို့အတွက် အကန့်အသတ်ကျော်လွန်သူ တစ်ယောက်ကို စေလွှတ်လိုက်တာပဲ"

"မင်း..."

"နေပါဦး"

【ပုန်ကန်မှု × ဖြားယောင်းသွေးဆောင်ခြင်း】

ရဲချီယန်၏ ညာဘက် လက်ညှိုးက သူ၏ နှုတ်ခမ်းထက်၌ တင်ထားလျက်သား ဖြစ်နေ၏။

သူ၏ မျက်နှာထက်တွင် အပြုံးတစ်ခု ရှိနေပြီး သူ၏ အသံကို မာတမ် ရှင်းလင်းစွာ ကြားလိုက်ရလေသည်။

နတ်ဆိုးက တီးတိုး ပြောဆိုလိုက်သည်။

"မင်းက ကိုယ့်ကိုယ်ကိုယ် သိပ်ပြီး အထင်ကြီးလွန်းနေပြီ"

"အကန့်အသတ်ကျော်လွန် မုဒ် ဆိုတာက အသုံးပြုလို့ရတဲ့ စွမ်းအားတစ်ခု၊ ကိရိယာတစ်ခု သက်သက်ပါပဲ"

"ကိရိယာတစ်ခုအတွက်နဲ့ ကိုယ့်ကိုယ်ကိုယ် ဒီနေရာမှာ ရပ်တန့်ထားခဲ့တယ်ပေါ့လေ"

"စီနီယာ"

"မင်းရဲ့ စွမ်းရည်တွေက လွင်တီးခေါင်ပြင်ရဲ့ ပစ်မှတ်ထားခံရလောက်အောင် မထိုက်တန်ပါဘူး"

"မင်းက ဂေါ်ဘလင် တစ်ကောင်လောက်တောင် အသုံးမကျဘူး"

"ဂေါ်ဘလင် တစ်ကောင်ထက် ပိုသာတဲ့ တစ်ခုတည်းသောအရာက မင်းရဲ့ ကိုယ်ပွားတွေနဲ့ စစ်သည်တော်တွေက ပိုပြီး အဆင့်မြင့်နေတာလေး တစ်ခုပါပဲ"

ဤသည်မှာ အမှန်တရားပင် ဖြစ်ပြီး သရော် လှောင်ပြောင်နေခြင်း မဟုတ်ချေ။

ရဲချီယန်က သူ၏ ပခုံးပေါ်သို့ ဆင်းသက်လာသော ကျီးကန်းနတ်ဆိုး ကို ပွတ်သပ်ပေးလိုက်၏။

သူက နောက်ဆုံး မေးခွန်းကို မေးမြန်းလိုက်လေတော့သည်။

"စီနီယာ"

"မင်း သေသွားမလား"