အခန်း ၃၄၂

အခန်း (၃၄၂) အသရေဖျက်ဆောင်းပါး ထုတ်ဝေခြင်း

အငှားအိမ်တစ်လုံး၏ ရှေ့တွင် မာစီဒီးဘင့်ဇ် ကားတစ်စီး ရပ်တန့်သွား၏။

စုန့်မင်သည် တောင့်တင်းသန်မာသော သက်တော်စောင့် နှစ်ဦးနှင့်အတူ ကားပေါ်မှ ဆင်းလာပေသည်။

"ဒေါက် ဒေါက် ဒေါက်... တံခါးဖွင့်စမ်း"

စုန့်မင်က တံခါးကို တိုက်ရိုက် ခေါက်ရင်း ပြောဆိုလိုက်၏။

"ဘယ်သူလဲ"

တံခါးအတွင်းဘက်မှ သိသာထင်ရှားစွာ ဒေါသထွက်နေသော အသံတစ်သံ ထွက်ပေါ်လာချေပြီ။

"ချီးး .. မနက်စောစောစီးစီး လာနှောင့်ယှက်နေတယ်"

ကျောက်ထျဲ့သည် တံခါးကို ဖွင့်လိုက်ပြီး သူ၏အရှေ့ရှိ လူသုံးဦးကို ဒေါသတကြီး စိုက်ကြည့်လိုက်ပေ၏။

"ဟားဟား.. မင်းက ကျောက်ထျဲ့ မဟုတ်လား"

"အရမ်းကောင်းတယ်"

"မင်းနေတဲ့ နေရာကို ကြည့်ပါဦး... တော်တော်လေး စုတ်ပြတ်နေတာပဲ"

စုန့်မင်က လှောင်ပြောင်သော အမူအရာဖြင့် ပြောဆိုလိုက်သည်။

"ဟင်... မင်းတို့က ဘယ်သူတွေလဲ... ငါ့ကို လှောင်ပြောင်ရဲတယ်ပေါ့လေ... ငါက ဖော်လိုဝါ သန်းချီရှိတဲ့ ဘလော့ဂါတစ်ယောက်ကွ... တကယ်လို့ ငါသာ ဒဏ်ငွေ အများကြီး မဆောင်ခဲ့ရရင် ဗီလာတစ်လုံးမှာ နေနေတာ ကြာလှပေါ့"

"မင်းတို့ ဒီကို ဘာလာလုပ်တာလဲ... ဘာကိစ္စရှိလို့လဲ"

ကျောက်ထျဲ့က ဆက်လက်မေးမြန်းလိုက်၏။

"လာ... အထဲဝင်ကြရအောင်"

စုန့်မင်သည် ကျောက်ထျဲ့ သဘောတူခြင်း ရှိမရှိကို ဂရုမစိုက်ဘဲ သူ့ကို ဘေးသို့ တွန်းဖယ်ကာ တိုက်ရိုက် လျှောက်ဝင်သွားတော့သည်။

"အူး... ဒီအနံ့ကြီးက... မင်းလို လူ့အသိုင်းအဝိုင်းရဲ့ အောက်ခြေက လူတွေ နေတဲ့နေရာဆိုတာ မဆန်းပါဘူး... ဒီအခန်းထဲမှာ ထိုင်စရာ သင့်တော်တဲ့ နေရာလေးတစ်ခုတောင် မရှိဘူးပဲ"

စုန့်မင်သည် သိသာထင်ရှားသော အထင်သေးမှုများဖြင့် ကြည့်ရှုလိုက်ပြီးနောက် သက်တော်စောင့်ကို မျက်စိတစ်ချက် မှိတ်ပြလိုက်ပေ၏။

သက်တော်စောင့်သည် ဆိုဖာပေါ်တွင် သန့်ရှင်းသော စောင်တစ်ထည်ကို အလျင်အမြန် ခင်းပေးလိုက်သည်။

ထို့နောက် စုန့်မင်သည် ထိုင်ချလိုက်ပြီး စီးကရက်တစ်လိပ်ကို မီးညှိလိုက်လေ၏။

"မင်းတို့က ဘာတွေ လာလုပ်နေတာလဲ... ဒီနေရာက ငါနေတဲ့ နေရာကွ... ဒီမှာ ဆေးလိပ်သောက်ဖို့ မင်းကို ငါ ခွင့်ပြုထားလို့လား"

ကျောက်ထျဲ့က ဒေါသတကြီး ပြောဆိုလိုက်၏။

"ဟမ်.. သူ့ကို အရင်ဆုံး ရိုက်နှက်လိုက်စမ်း"

စုန့်မင်က တိုက်ရိုက် အမိန့်ပေးလိုက်ပေသည်။

ဤစကားကို ကြားလိုက်ရချိန်တွင် သက်တော်စောင့် နှစ်ဦးသည် ချက်ချင်း ရှေ့သို့တက်လာပြီး ကျောက်ထျဲ့အား ပြင်းပြင်းထန်ထန် ရိုက်နှက်လိုက်ကြတော့၏။

"အား"

ကျောက်ထျဲ့၏ မျက်နှာသည် ရိုက်နှက်ခံရမှုကြောင့် နီရဲကာ ဖူးယောင်သွားခဲ့သည်။ သူသည် မြေပြင်ပေါ်တွင် ကွေးကွေးလေး လဲကျနေပြီး စုန့်မင်အား ထိတ်လန့်တုန်လှုပ်စွာဖြင့် ကြည့်နေပေ၏။

"မင်းတို့က တကယ်ကို ဘယ်သူတွေလဲ... ဒီကို ဘာလာလုပ်တာလဲ"

ကျောက်ထျဲ့မှာ အလွန်အမင်း ကြောက်ရွံ့သွားခဲ့လေပြီ။

"ဟက်... ငါက မင်း ဘဝတစ်သက်တာလုံး ဘယ်တော့မှ လှမ်းမမီနိုင်တဲ့ လူတစ်ယောက်ပဲ"

"အခု အွန်လိုင်းပေါ်မှာ ရေပန်းစားနေတဲ့ ခေါင်းစဉ်တစ်ခု ရှိတယ်... ကြည်လင်အလှကုန်ကုမ္ပဏီ နဲ့ လင်းလက်အလှကုန်ကုမ္ပဏီ ကြားက ယှဉ်ပြိုင်မှုလေ"

"ငါက ကြည်လင်အလှကုန်ကုမ္ပဏီ ရဲ့ အထွေထွေမန်နေဂျာ စုန့်မင်ပဲ"

"ညီအစ်ကို... ဒါက ဘာလဲဆိုတာ ကြည့်လိုက်စမ်း"

စုန့်မင်သည် စားပွဲပေါ်သို့ ငွေအထပ်လိုက်ကို ရိုက်ချလိုက်ရာ ယွမ် တစ်သိန်း အပြည့်ဖြစ်နေပေ၏။

"ဒါက... ယွမ် တစ်သိန်း... မင်းက ဘာသဘောလဲ"

ကျောက်ထျဲ့သည် ပို၍ပင် နားမလည်နိုင်အောင် ဖြစ်သွားခဲ့သည်။

သူတို့က သူ့ကို ရိုက်နှက်ခဲ့ပြီးမှ ယခု ယွမ် တစ်သိန်းကို ပေးလာခဲ့ပြန်သည်။ ဤလူက အဘယ်အရာကို လုပ်ဆောင်ချင်နေသနည်း။

"မင်း မသိချင်ယောင် ဆောင်နေစရာ မလိုပါဘူး... စိတ်မပူပါနဲ့... ဒီ ယွမ် တစ်သိန်းက စရန်ငွေပဲ... ကိစ္စတွေ ပြီးသွားတာနဲ့ မင်းကို စုစုပေါင်း ယွမ် တစ်သန်း ပေးမယ်"

စုန့်မင်က ရက်ရောစွာဖြင့် ပြောဆိုလိုက်၏။

"တစ်သန်း..."

ကျောက်ထျဲ့သည် လုံးဝ အံ့အားသင့်သွားရပေသည်။

"ဟုတ်တယ်... တစ်သန်းတောင်မှ... မင်းက ဖော်လိုဝါ သန်းဆယ်ချီ ရှိတဲ့ ဘလော့ဂါတစ်ယောက် မဟုတ်လား"

စုန့်မင်က အနည်းငယ် ပြုံးလိုက်ပြီးနောက် ကျောက်ထျဲ့အနီးသို့ လျှောက်သွားကာ ပြောဆိုလိုက်၏။

"အရမ်းရိုးရှင်းပါတယ်... လင်းလက်အလှကုန်ကုမ္ပဏီ လို့ခေါ်တဲ့ ကုမ္ပဏီတစ်ခုက ဝက်ခြံပျောက်ဆေး တစ်မျိုး ထုတ်ထားတယ်... မင်းက သူတို့ကို တတ်နိုင်သမျှ ဖော်ထုတ်ပေးရမယ်... ပြီးတော့ သတင်းကို တတ်နိုင်သမျှ ကျယ်ကျယ်ပြန့်ပြန့် ဖြန့်ပေးရမယ်... တကယ်လို့ သူတို့ ဒေဝါလီခံသွားရရင် အကောင်းဆုံးပဲ"

စုန့်မင်က ပြောဆိုလိုက်သည်။

"အာ... ဒါက... ဒါက နည်းနည်း တရားမဝင်ဘူးနော်... ဒါက အသရေဖျက်တာပဲ... ငါ မလုပ်ရဲဘူး"

ကျောက်ထျဲ့သည် အလျင်အမြန် ခေါင်းခါကာ ငြင်းဆန်လိုက်ပေ၏။

"မလုပ်ရဲဘူး... ကျောက်ထျဲ့... ငါက အရမ်းယဉ်ကျေးလွန်းနေတယ်လို့ မင်းထင်နေတာလား... အခု မင်းက ကံဆိုးနေတဲ့ အချိန်လေ... တခြား အင်တာနက် နာမည်ကြီးတွေလိုမျိုး ကြော်ငြာအလုပ်တွေ ရနိုင်ဦးမယ်လို့ မင်း တကယ် ထင်နေတာလား"

"မင်းရဲ့ လက်ရှိ အခြေအနေနဲ့ဆိုရင် အိမ်လခတောင် ပေးနိုင်မှာ မဟုတ်ဘူးမလား"

"မင်းဆီကို အကူအညီလာတောင်းတာက မင်းကို သနားလွန်းလို့ကွ... အဲဒါကို မင်းက ဒီမှာ ငြင်းဆန်နေသေးတယ်ပေါ့လေ"

"ငါက ဘယ်သူလဲဆိုတာ မင်း သိလား... ဒီမြို့မှာ ငါ့ရဲ့ အဆက်အသွယ်တွေက ဘယ်လောက်တောင် ကျယ်ပြန့်လဲဆိုတာ မင်း သိလား... မင်းကို ငါ ပြောမယ်... ဒီနေ့ မင်းက ငါ့ကို ဆန့်ကျင်ရဲရင် မင်းကို အရိပ်အယောင်တောင် မကျန်အောင် ဖျောက်ပစ်လိုက်မယ်"

စုန့်မင်က တိုက်ရိုက် ခြိမ်းခြောက်လိုက်လေသည်။

ကျောက်ထျဲ့သည် တံတွေး နှစ်ကြိမ်မျှ မြိုချလိုက်ပြီး အလျင်အမြန် ရှင်းပြလိုက်၏။

"ညီအစ်ကို... မင်း နားလည်မှုလွဲနေပြီ... ငါဆိုလိုတာက... ငါ့ကို ပိုက်ဆံနည်းနည်းလောက် အရင် ထပ်ပေးနိုင်မလားလို့... ငါက မင်းကို ဘယ်လိုလုပ် ငြင်းဆန်ရဲမှာလဲ..."

"အော်... ဒီလိုကိုး... စိတ်မပူပါနဲ့... ငါ စုန့်မင်က အရမ်းရက်ရောပါတယ်... မင်းကို ငွေသား နောက်ထပ် ယွမ် နှစ်သိန်း ထပ်ပေးမယ်... ကိစ္စပြီးသွားရင် ကျန်တဲ့ ယွမ် ရှစ်သိန်းကို ဘာမှ တုံ့ဆိုင်းမနေဘဲ ပေးမယ်"

ထိုသို့ပြောဆိုပြီးနောက် စုန့်မင်သည် သူ၏ စီးကရက်တိုကို မြေပြင်ပေါ်သို့ တိုက်ရိုက် ပစ်ချလိုက်ပေသည်။

"ပြီးတော့ မင်းကို သတိပေးလိုက်မယ်... ဒီကိစ္စကို ဘယ်သူ့ကိုမှ မပြောနဲ့... တကယ်လို့ မင်း ပြောရဲရင် ငါ့ကို အပြစ်မတင်နဲ့"

ထို့သို့ပြောဆိုပြီးနောက် စုန့်မင်သည် လက်ကိုဝှေ့ယမ်းပြလိုက်ပြီး သက်တော်စောင့် နှစ်ဦးက သူ၏နောက်မှ လိုက်ပါသွားကာ ထွက်ခွာသွားကြလေတော့၏။

"လင်းလက်အလှကုန်ကုမ္ပဏီ ဟုတ်လား"

ကျောက်ထျဲ့သည် သူ့ကိုယ်သူ အားပြု၍ မတ်တပ်ရပ်လိုက်ပြီး စားပွဲပေါ်ရှိ ယွမ် နှစ်သိန်းကို ကြည့်ကာ ဝမ်းမြောက်ဝမ်းသာ ပြုံးရွှင်နေပေသည်။

"ပိုက်ဆံဘယ်လိုရှာရမလဲဆိုတာကို စိတ်ပူနေချိန်မှာပဲ တစ်ယောက်ယောက်က လာပို့ပေးသွားတာပဲ... ဒါ့အပြင် ဒီ လင်းလက်အလှကုန်ကုမ္ပဏီ ဆိုတာက တစ်ခါမှ မကြားဖူးတဲ့ ကုမ္ပဏီသေးသေးလေးတစ်ခုပဲမလား..."

သူသည် ဖော်လိုဝါ သန်းချီရှိသော နာမည်ကြီး အွန်လိုင်း ဩဇာလွှမ်းမိုးသူ တစ်ဦးဖြစ်ပြီး အများအားဖြင့် Big V အဖြစ် လူသိများပေ၏။ သူသည် ဖော်ထုတ်ရေး ဗီဒီယိုတစ်ခုကို အွန်လိုင်းပေါ်တင်လိုက်ရုံဖြင့် ကြည့်ရှုသူ အမြောက်အမြားကို ရရှိနိုင်ပေသည်။

ဤကုမ္ပဏီငယ်လေးတွင် ပြည်သူ့ဆက်ဆံရေး စွမ်းရည် များများစားစားပင် ရှိပုံမပေါ်ချေ။ သူသည် စုန့်မင်ထံမှ ငွေရယူနိုင်ရုံသာမက ဤကုမ္ပဏီထံမှလည်း ငွေကြေးအမြောက်အမြားကို လိမ်လည်တောင်းခံနိုင်သေးသည်။ ဤသည်မှာ တစ်ချက်ခုတ် နှစ်ချက်ပြတ် ဖြစ်ပေ၏။

လုံးဝ တုံ့ဆိုင်းနေခြင်းမရှိဘဲ ကျောက်ထျဲ့သည် လင်းလက်အလှကုန်ကုမ္ပဏီ နှင့် ပတ်သက်သော သတင်းအချက်အလက်များကို အွန်လိုင်းပေါ်တွင် ချက်ချင်း စတင်ရှာဖွေလိုက်လေသည်။

ဝက်ခြံပျောက်ဆေး ထုတ်ကုန်များကို ယှဉ်ပြိုင်မှုကြောင့် နှစ်ဖက်စလုံးသည် ဤမျှကြီးမားသော ပြည်သူ့သဘောထားကို ဖန်တီးထားကြောင်း မြင်တွေ့ရချိန်တွင် သူ့ထံ၌ အကြံဉာဏ်တစ်ခု ချက်ချင်း ရလာခဲ့ပေ၏။

သူသည် တစ်ပတ်ရစ် ဈေးဝယ်ပလက်ဖောင်းတစ်ခုပေါ်တွင် လင်းလက်အလှကုန်ကုမ္ပဏီ ဝက်ခြံပျောက်ဆေးများကို ဈေးကောင်းပေး၍ ပြန်လည်ဝယ်ယူမည် ဟူသော ခေါင်းစဉ်ဖြင့် မက်ဆေ့ခ်ျတစ်ခု တင်လိုက်ပြီး တစ်ဘူးလျှင် ယွမ် ၁,၀၀၀ အဖြစ် ဈေးနှုန်းသတ်မှတ်လိုက်လေသည်။

ဝက်ခြံပျောက်ဆေးကို လက်ခံရရှိသည်နှင့် တစ်ပြိုင်နက် အသရေဖျက်မည့် လှုပ်ရှားမှုအတွက် စတင်ပြင်ဆင်မည် ဖြစ်သည်။ နောက်ဆုံးတွင် ဗီဒီယိုတစ်ခု ရိုက်ကူးကာ အွန်လိုင်းပေါ်တွင် တင်လိုက်ပြီးနောက် လူဝင်ရောက်ကြည့်ရှုမှုများကို ဖန်တီးလိုက်မည်ဆိုပါက ပြီးပြည့်စုံသွားပြီ ဖြစ်ပေ၏။

တစ်မနက်ခင်းလုံး ပြင်ဆင်ပြီး အချိန်အတော်ကြာ ဗီဒီယို တည်းဖြတ်ပြီးနောက် မွန်းလွဲ ၁ နာရီ ချိန်တွင် ကျောက်ထျဲ့သည် ဗီဒီယိုကို ပလက်ဖောင်းပေါ်သို့ တင်လိုက်တော့သည်။

မျက်စိတစ်မှိတ်အတွင်းမှာပင် တစ်လကြာ ရပ်နားထားခဲ့သော ကျောက်ထျဲ့ ပြန်လည်ရောက်ရှိလာခြင်းက အသေးစား လှုပ်ခတ်မှုတစ်ခုကို ဖြစ်ပေါ်စေခဲ့ပေ၏။

မည်သို့ပင်ဆိုစေကာမူ အင်တာနက် အသုံးပြုသူများ၏ အမြင်တွင် ကျောက်ထျဲ့သည် အလွန်အာဏာပါသော အတုအယောင် နှိမ်နင်းရေး ဘလော့ဂါတစ်ဦး ဖြစ်လေသည်။

အွန်လိုင်းပေါ်တွင် သူ ဖန်တီးတည်ဆောက်ထားသော စရိုက်လက္ခဏာမှာ သာမန် ပြည်သူများအတွက် ရဲဝံ့စွာ ဝင်ရောက်ပြောဆိုပေးတတ်သော ခပ်ကြမ်းကြမ်း လူမိုက်တစ်ဦး၏ ပုံစံမျိုး ဖြစ်ပေ၏။

ကျောက်ထျဲ့ အင်တာနက်ပေါ်သို့ ပြန်လည်ရောက်ရှိလာချိန်တွင် ပရိသတ်အချို့က အလွန် စိတ်အားထက်သန်စွာ တုံ့ပြန်ခဲ့ကြလေသည်။

ကျောက်ထျဲ့က လုံးဝ အသစ်စက်စက် တိုက်ပွဲဝင်ပုံစံတစ်ခုကို ယူဆောင်လာမည်ဟု ၎င်းတို့က တကယ်ကို မျှော်လင့်စောင့်စားနေကြပေသည်။

မျှော်လင့်ထားသည့်အတိုင်းပင် ဤတစ်ကြိမ်တွင် ကျောက်ထျဲ့သည် အခြားသော ကုမ္ပဏီတစ်ခုကို ပစ်မှတ်ထားလိုက်ချေပြီ။

"အားလုံးပဲ မင်္ဂလာပါ... ကျွန်တော်က ကျောက်ထျဲ့ပါ"

"အကြောင်းအမျိုးမျိုးကြောင့်ပဲဖြစ်ဖြစ် ငွေရှင်ကြေးရှင်တွေရဲ့ အကျိုးစီးပွားကို ထိခိုက်စေလို့ပဲဖြစ်ဖြစ် ကျွန်တော် အမည်ပျက်စာရင်း သွင်းခံရလုနီးပါး ဖြစ်ခဲ့ပါတယ်"

"လွန်ခဲ့တဲ့ ရက်အနည်းငယ်က ကြီးမားလှတဲ့ ဖိအားတွေအောက်မှာ ကျွန်တော် တကယ်လုပ်ချင်တဲ့အရာက ဘာလဲဆိုတာကို စဉ်းစားနေခဲ့တာ... ကျွန်တော် လက်လျှော့လိုက်သင့်လား ဆိုတာကိုတောင် တွေးခဲ့မိသေးတယ်"

"တကယ်လို့ ကျွန်တော်သာ ဒီအတုအယောင်တွေကို ဖော်ထုတ်တဲ့ အလုပ်ကို လက်လျှော့လိုက်မယ်ဆိုရင် ပိုပြီး တည်ငြိမ်တဲ့ ဘဝတစ်ခုနဲ့ နေထိုင်နိုင်ပြီး အဲဒီ ငွေရှင်ကြေးရှင်တွေရဲ့ ခြိမ်းခြောက်မှုကို ခံရတော့မှာ မဟုတ်ဘူးလေ"

"ကျွန်တော် တကယ်ကို အဲဒီလိုမျိုး ယိမ်းယိုင်ခဲ့ဖူးပါတယ်"

"ဒါပေမဲ့ အခုတော့ အဲဒီအတွေးကို ကျွန်တော် လက်လျှော့လိုက်ပါပြီ"

"ဘာလို့လဲဆိုတော့ ဒီလောကကြီးထဲက သာမန် ပြည်သူတွေရဲ့ အင်အားက အရမ်းကို အားနည်းလွန်းနေလို့ပါပဲ"

"ပြဿနာတစ်ခုခု ဖြစ်လာတဲ့အခါ သူတို့မှာ တရားမျှတမှုကို ရှာဖွေဖို့ ဘယ်လိုနည်းလမ်းမှ မရှိကြဘူး"

"တကယ်လို့ ကျွန်တော်သာ ထွက်သွားခဲ့ရင် ဘယ်သူက သူတို့ကို ကူညီပေးတော့မှာလဲ"

"အားလုံးအတွက်... သာမန် ပြည်သူတွေရဲ့ အခွင့်အရေးတွေအတွက်... ငွေရှင်ကြေးရှင် စနစ်ကို တိုက်ဖျက်ဖို့အတွက်"

"ကျွန်တော် ကျောက်ထျဲ့... ပြန်လာပါပြီ"

ကျောက်ထျဲ့သည် ကြီးမားလှသော ခံစားချက်များဖြင့် ပြောဆိုလိုက်လေတော့သည်။