အခန်း ၉၆၂

အခန်း (၉၆၂) - လှပကျော့ရှင်းသော တာအိုလက်တွဲဖော်၊ သတ္တမအဆင့် ရွှေအလင်းအဆိပ်တစ်ထောင်ကူ၊ ဖီးနစ်အင်မော်တယ်စံအိမ်တော် ပေါ်ထွက်လာခြင်း (၂)

ထင်ရှားလှသည်မှာ သတ္တမအဆင့် အောက်ခြေအဆင့်သို့ တက်လှမ်းသွားပြီးနောက် ‘ရွှေအလင်းအဆိပ်တစ်ထောင်ကူ’ သည် စွမ်းရည်အသစ်တစ်ခုကို ဖန်တီးနိုင်ခဲ့ခြင်း မရှိပေ။

‘ရွှေအလင်းအဆိပ်တစ်ထောင်ကူ’ အတွက်မူကား အဆိပ်ပြင်း စွမ်းရည်တစ်ခုတည်းကပင် လုံးဝ လုံလောက်နေခဲ့လေပြီ။

အမြန်နှုန်း လုံလောက်စွာ မြန်ဆန်ပြီး အဆိပ်ပြင်းအား လုံလောက်စွာ ပြင်းထန်ပါက ရန်သူကို ထိမှန်သည်နှင့်တစ်ပြိုင်နက် ရန်သူသည် သေချာပေါက် သေဆုံးရမည် ဖြစ်၏။

အကယ်၍ ရန်သူ မသေဆုံးပါက ဤစွမ်းရည်၏ အဆိပ်ပြင်းအား မလုံလောက်ခြင်းနှင့် အမြန်နှုန်း မလုံလောက်ခြင်းကြောင့်သာ ဖြစ်ပေမည်။

အဆိပ်ပြင်း၏ အာနိသင်ကို အဆက်မပြတ် နက်ရှိုင်းလာစေပြီး အမြန်နှုန်း၏ စွမ်းအားကို အားကောင်းလာစေပါက ဤစွမ်းရည်သည် ပြိုင်ဘက်ကင်း ဖြစ်လာပေလိမ့်မည်။

ဝုန်း...

ချက်ချင်းပင် သူသည် စိတ်အာရုံတစ်ချက် လှုပ်ရှားလိုက်ကာ လက်ဝါးတစ်ချက် အသာအယာ ရိုက်ထုတ်လိုက်သည်။

အဆိပ်တစ်ထောင်လက်ဝါး။

ချက်ချင်းပင် ရွှေရောင်လက်ဝါးကြီး တစ်ခုက ဒြပ်ရှိအဖြစ် စုစည်းသွားပြီး ဂူအိမ်တော်၏ မြေပြင်ဆီသို့ ရိုက်ချလိုက်၏။

ဒုန်းခနဲ အသံနှင့်အတူ မြေပြင်ပေါ်တွင် ထင်ရှားလှသော လက်ဝါးရာတစ်ခု ချက်ချင်း ပေါ်လာခဲ့သည်။

တစ်ချိန်တည်းမှာပင် မြေပြင်မှ ရှဲရှဲဟူသောအသံများ ထွက်ပေါ်လာပြီး ကြောက်မက်ဖွယ်ကောင်းသော အဆိပ်ငွေ့များက မြေပြင်ကို ဆွေးမြည့်သွားစေကာ ရွှံ့နွံတောအဖြစ် ပြောင်းလဲသွားစေပုံရလေသည်။

လေထုထဲတွင် ကြောက်မက်ဖွယ်ကောင်းသော အဆိပ်ငွေ့များ ပြန့်နှံ့နေ၏။

သာမန်ကျင့်ကြံသူများ အနည်းငယ်မျှ ရှူရှိုက်မိပါက အဆိပ်ပြင်းမိကာ သေဆုံးသွားပေမည်။

'ဒီစွမ်းရည်က တကယ်ကို အစွမ်းထက်တာပဲ...'

ကျိုးစွေ့က လက်သီးကို ဆုပ်လိုက်သည်။

ယခုလေးတင် အနည်းငယ်မျှ စမ်းသပ်ကြည့်လိုက်ရုံသာ ဖြစ်သော်လည်း ဤစွမ်းရည်၏ ကြောက်မက်ဖွယ်ကောင်းမှုကို သူ သတိထားမိလိုက်ပြီ ဖြစ်၏။

လက်ဝါးတစ်ချက် ရိုက်ထုတ်လိုက်သည်နှင့် ရွှေရောင်အလင်းတန်းများကို ဖြစ်ပေါ်စေမည် ဖြစ်သည်။

ဤရွှေရောင်အလင်းတန်းများတွင် ကြောက်မက်ဖွယ်ကောင်းသော အဆိပ်များ ပါဝင်နေသည်။

အကယ်၍ ရန်သူကို ထိမှန်သွားပါက ပွတ်တိုက်မိရုံမျှဖြင့် ရန်သူကို အဆိပ်မိသွားစေမည် ဖြစ်၏။

ထိုမှတစ်ဆင့် အဆိပ်တက်ကာ သေဆုံးသွားပေမည်။

ထို့အပြင် ဤတိုက်ခိုက်မှုသည် လေဟာနယ်ထဲသို့ပါ ပျော်ဝင်သွားနိုင်ပြီး မျက်တောင်တစ်ခတ်အတွင်း ရောက်ရှိလာနိုင်သည်။

ရန်သူမှာ ဘာဖြစ်သွားမှန်းပင် မသိလိုက်ဘဲ ထိုလက်ဝါးချက်ကို ထိမှန်သွားမည် ဖြစ်လေသည်။

ဤအဆိပ်များသည် ရန်သူ၏ မှော်ရတနာများကိုပင် တိုက်စားနိုင်ပြီး ပျက်စီးသွားစေနိုင်သည်။

ထင်ရှားလှသည်မှာ အဆိပ်တစ်ထောင်လက်ဝါး၏ စွမ်းပကား အဆက်မပြတ် တိုးတက်လာသည်နှင့်အမျှ ဤစွမ်းရည်သည် ဝိညာဉ်ကမ္ဘာကို သေချာပေါက် တုန်လှုပ်သွားစေမည်ဖြစ်ပြီး ကမ္ဘာလောကကို ခြိမ်းခြောက်နိုင်လောက်ပေသည်။

ဟူး...

အတန်ကြာပြီးနောက် ကျိုးစွေ့သည် သတ္တမအဆင့် အောက်ခြေအဆင့် 'ရွှေအလင်းအဆိပ်တစ်ထောင်ကူ' ၏ စွမ်းအားကို အပြည့်အဝ ရင်းနှီးကျွမ်းဝင်သွားပြီးနောက် ၎င်းကို ပြန်ရုပ်သိမ်းကာ သူ၏ ခန္ဓာကိုယ်ထဲသို့ ပြန်လည်ထည့်သွင်းလိုက်သည်။

ထင်ရှားသည်မှာ ဤကူပိုးကောင်သည် သတ္တမအဆင့်သို့ တက်လှမ်းသွားပြီးနောက် သူ၏ တိုက်ခိုက်ရေးစွမ်းအားကို များစွာ တိုးတက်လာစေမည် ဖြစ်လေသည်။

ဝှမ်...

ထိုအခိုက်တွင် သူသည် စိတ်အာရုံတစ်ချက် လှုပ်ရှားလိုက်ပြီး သူ၏ခန္ဓာကိုယ်ပေါ်ရှိ အချက်အလက်ပြမျက်နှာပြင်ကို ချက်ချင်း ဖွင့်လိုက်၏။

လက်ရှိ သူ၏ ကျင့်ကြံခြင်းအဆင့် မည်မျှရှိနေပြီဖြစ်ကြောင်း သိချင်နေခဲ့သည်။

[ပိုင်ရှင် - ကျိုးစွေ့၊ ကျင့်ကြံခြင်းအဆင့် - လေဟာနယ်သန့်စင်ခြင်း နှောင်းပိုင်းအဆင့် (လက်ရှိတိုးတက်မှု - ၇၀%) ၊ သက်တမ်း - ၁၁၂၀ (၅၀၅၀၀၀) နှစ်]

[ပင်ကိုပါရမီ - ကောင်းကင်အဆင့် စိတ်ဝိညာဉ်အမြစ် (၇၀%)]

[ဓားလမ်းစဉ် - ဆဋ္ဌမအဆင့် အထွတ်အထိပ် (၉၉%)]

[အဆောင်ပညာရပ် - ဆဋ္ဌမအဆင့် အထွတ်အထိပ် (၁၅%)]

[အစီအရင်ပညာရပ် - သတ္တမအဆင့် အထွတ်အထိပ် (၉၉%)]

[ဆေးဖော်စပ်ပညာရပ် - သတ္တမအဆင့် အလယ်အလတ် (၄၀%)]

[လက်နက်သန့်စင်ခြင်း - ဆဋ္ဌမအဆင့် အထွတ်အထိပ် (၁၅%)]

[နတ်ဆိုးအသွင်ပြောင်းပညာရပ် - မဟာဆရာသခင်အဆင့်]

[ကောင်းကင်မြေကြီးဆေးမီးဖိုပညာရပ် - ပြီးပြည့်စုံခြင်းအဆင့်]

[မိစ္ဆာနှလုံးသားဆင့်ခေါ်ခြင်းပညာရပ် - မိစ္ဆာမျိုးစေ့၊ မိစ္ဆာဆင့်ခေါ်ခြင်း၊ မိစ္ဆာဝါးမြိုခြင်း]

[အလင်းမျက်လုံးခုနစ်လုံး လျှို့ဝှက်ကျမ်း - နှလုံးသားမျက်လုံး အသိအမှတ်ပြုခြင်း၊ နှလုံးသားမျက်လုံး ထိုးထွင်းသိမြင်ခြင်း၊ နှလုံးသားမျက်လုံး ဘာသာစကား၊ နှလုံးသားမျက်လုံး စိတ်အာရုံဖတ်ရှုခြင်း၊ နှလုံးသားမျက်လုံး တိုက်ရိုက်သေဆုံးခြင်း၊ နှလုံးသားမျက်လုံး ကြိုတင်သိမြင်ခြင်း (၁၇%)]

[ကျူးရှန်းဓားသိုင်း - ပထမပုံစံ သဏ္ဌာန်မဲ့ဓားအလင်း၊ ဒုတိယပုံစံ သတ်ဖြတ်ခြင်းဓားအလင်း၊ တတိယပုံစံ ကျော့ကွင်းဓားအလင်း]

[ဓာတ်ငါးပါးမိုးကြိုးမန္တန် - ပြီးပြည့်စုံမှုအဆင့်၊ ကုယုံဆန်းကြယ်အလင်း - မဟာဆရာသခင်အဆင့်၊ ရှေးဟောင်းလိပ်နက်ပညာရပ် - စတုတ္ထအလွှာ၊ ဝိညာဉ်ဖြန့်ကျက်အဆိပ်ဆူး - မဟာဆရာသခင်အဆင့်]

[‘ချစ်ခြင်းမေတ္တာကူ’ - သတ္တမအဆင့် အထွတ်အထိပ်၊ 'ကိုယ်ပွားကူ' - ဆဋ္ဌမအဆင့် အထွတ်အထိပ်၊ ‘အရက်ကူ’ - ဆဋ္ဌမအဆင့် အထွတ်အထိပ်၊ ‘ရွှေစားကူ’ - ဆဋ္ဌမအဆင့် အထွတ်အထိပ်၊ ‘စာအုပ်ကူ’ - အဋ္ဌမအဆင့် အောက်ခြေအဆင့်၊ 'အိပ်မက်ဝိညာဉ်ကူ' - သတ္တမအဆင့် အောက်ခြေအဆင့်၊ 'နဂါးဆင်ကူ' - ဆဋ္ဌမအဆင့် အထွတ်အထိပ်၊ ‘ရွှေအလင်းအဆိပ်တစ်ထောင်ကူ’ - သတ္တမအဆင့် အောက်ခြေအဆင့်၊ ‘တည်နေရာပြောင်းကူ’ - ဆဋ္ဌမအဆင့် အထွတ်အထိပ်၊ 'အစီအရင်နှလုံးသားကူ' - သတ္တမအဆင့် အထွတ်အထိပ်၊ ပစ္စည်းရှာဖွေကူ - ဆဋ္ဌမအဆင့် အထွတ်အထိပ်၊ 'မိုးကြိုးကပ်ဘေးကူ' - သတ္တမအဆင့် အောက်ခြေအဆင့်၊ ‘ဆေးဝါးကူ’ - ဆဋ္ဌမအဆင့် အထွတ်အထိပ်၊ ‘ကံကြမ္မာကူ’ - ဆဋ္ဌမအဆင့် အထွတ်အထိပ်၊ ‘ရွှေပုစဉ်းရင်ကွဲကူ’ - ဆဋ္ဌမအဆင့် အထွတ်အထိပ်]

ချက်ချင်းပင် ကိန်းဂဏန်းအချက်အလက် အများအပြားက သူ၏ရှေ့တွင် ရှင်းလင်းပြတ်သားစွာ အသေးစိတ်ပေါ်လာခဲ့သည်။

'ကျင့်ကြံခြင်းအဆင့် တိုးတက်မှုက ၇၀% အထိတောင် ရောက်သွားပြီလား...'

'ဒီလိုဆိုရင် လေဟာနယ်သန့်စင်ခြင်း ပြည့်စုံခြင်းအဆင့်ကို ရောက်ဖို့ သိပ်မဝေးတော့ဘူးပေါ့...'

ဤမြင်ကွင်းကို ကြည့်ရင်း ကျိုးစွေ့တစ်ယောက် အလွန် စိတ်လှုပ်ရှားသွားခဲ့၏။

“အိုး... ကောင်းကင်အဆင့် စိတ်ဝိညာဉ်အမြစ် ပါရမီရဲ့ တိုးတက်မှုကလည်း ၇၀% အထိ ရောက်သွားပြီလား..."

"ဒီလို တိုးတက်မှုနှုန်းအရဆိုရင် တာအိုကျင့်ကြံပြီး အင်မော်တယ်မဖြစ်ခင်မှာတင် အင်မော်တယ် စိတ်ဝိညာဉ်အမြစ်ကို တကယ် ရလာနိုင်တယ်..."

"တကယ်လို့များ ဒီလိုသာဆိုရင် အစစ်အမှန်အင်မော်တယ်အဆင့်ကို မတက်ခင်အထိ ဘာအတားအဆီးမှ ရှိမှာမဟုတ်တော့ဘူး..."

ကျိုးစွေ့က လက်သီးကို ဆုပ်လိုက်၏။

ထင်ရှားလှသည်မှာ သူ၏တာအိုလက်တွဲဖော် အရေအတွက် တိုးလာသည်နှင့်အမျှ သူ၏ စိတ်ဝိညာဉ်အမြစ်ပါရမီ တိုးတက်မှုနှုန်းကလည်း ပို၍ မြန်ဆန်လာခဲ့ခြင်းပင်။

အဘယ်ကြောင့်ဆိုသော် ယခုလက်ရှိ ဝိညာဉ်လောကတွင် သူ့၌ တာအိုလက်တွဲဖော် (၄) ဦးတိတိ ရှိနေသောကြောင့်ပင် ဖြစ်လေသည်။

တာအိုလက်တွဲဖော် (၁) ဦးစီ၏ ပါရမီမှာလည်း အံ့မခန်းဖြစ်ပြီး လူသားမျိုးနွယ်တွင် အထွတ်အထိပ် တည်ရှိမှုများအဖြစ် သတ်မှတ်နိုင်ကာ နှစ်ပေါင်းများစွာကြာမှ တစ်ယောက် ပေါ်ထွက်လာတတ်သည့် အမျိုးအစားများ ဖြစ်ကြပေသည်။

၎င်းတို့၏ အကူအညီများကြောင့်သာ ဤကဲ့သို့သော အခြေအနေမျိုး ပေါ်ပေါက်လာရခြင်း ဖြစ်၏။

အကယ်၍ ဤကဲ့သို့ ပါရမီရှင်တာအိုလက်တွဲဖော် အနည်းငယ်မျှ ထပ်တိုးလာပါက စိတ်ဝိညာဉ်အမြစ်ပါရမီ တိုးတက်မှုနှုန်းကိုပါ ထပ်မံ အရှိန်မြှင့်တင်နိုင်မည်မှာ သေချာလှသည်။

"အင်း... ကျင့်ကြံခြင်းဆိုင်ရာ ပညာရပ်အမျိုးမျိုးရဲ့ တိုးတက်မှုနှုန်းကတော့ သိပ်မကြီးမားလှဘူး..."

"နည်းနည်းလေး တိုးတက်လာတယ်လို့ ဆိုနိုင်ပေမယ့် အရည်အသွေးပိုင်းအရ အကြီးအကျယ် ပြောင်းလဲသွားတာမျိုးတော့ မဟုတ်ဘူး..."

"ဒါပေမဲ့ ဒါကလည်း အရမ်းကို ပုံမှန်ပါပဲ... နှစ်ပေါင်း (၂၀) ဆိုတဲ့ အချိန်တိုလေးပဲ ရှိသေးတာကိုး..."

"ကောင်းကင်နဲ့မြေကြီး မှောက်ခုံလန်သွားသလိုမျိုး ကြီးမားတဲ့ အပြောင်းအလဲတွေ ပေါ်လာဖို့က သဘာဝအရကို မဖြစ်နိုင်ဘူးလေ..."

ဤသည်ကလည်း အလွန်ပုံမှန်ဖြစ်သော ကိစ္စရပ်တစ်ခုဟု ကျိုးစွေ့က တွေးလိုက်လေသည်။

မည်သို့ပင်ဆိုစေ ယခုအခါတွင် သူ၏သက်တမ်းမှာ အလွန်တရာ ရှည်လျားနေပြီဖြစ်ရာ အချိန်အများအပြား အသုံးပြုကာ သူ၏ ခန္ဓာကိုယ်ပေါ်ရှိ ပညာရပ်အမျိုးမျိုးကို ပြီးပြည့်စုံခြင်းအဆင့်သို့ တဖြည်းဖြည်းချင်း မြှင့်တင်နိုင်မည်ဖြစ်ပြီး အရာအားလုံးကို တတ်ကျွမ်းသော သခင်ကြီးတစ်ဦး ဖြစ်လာနိုင်ပေသည်။

'’နဂါးဆင်ကူ’ကလည်း သတ္တမအဆင့်ကို တက်တော့မယ့်ပုံပဲ...'

ကျိုးစွေ့၏ စိတ်ထဲတွင် လှုပ်ရှားသွားခဲ့၏။

သူသည် မိမိကိုယ်ပေါ်ရှိ ကူပိုးကောင်တစ်ကောင်ချင်းစီကို အာရုံခံနိုင်သော်လည်း ‘နဂါးဆင်ကူ’၏ လက္ခဏာရပ်များက အထင်ရှားဆုံးဖြစ်နေပြီး ခန္ဓာကိုယ်အတွင်း၌ တောင့်တင်းခိုင်မာသော သွေးချီစွမ်းအင်များ ပါဝင်နေကာ အချိန်မရွေး အဆင့်တက်သွားနိုင်မည့်ပုံ ပေါ်နေလေသည်။

မြေကမ္ဘာအင်မော်တယ် တာအိုအသီးကို ဝါးမြိုပြီးသည့်အချိန်မှစ၍ ‘နဂါးဆင်ကူ’သည် အသားနှင့်သွေးများကို စားသုံးရန် မလိုအပ်တော့ပေ။

အဘယ်ကြောင့်ဆိုသော် မြေကမ္ဘာအင်မော်တယ် တာအိုအသီးမှ ထွက်ပေါ်လာသော စွမ်းအင်များကပင် ၎င်း၏ စွမ်းအင်လိုအပ်ချက်ကို ဖြည့်ဆည်းပေးရန် လုံလောက်နေသောကြောင့် ဖြစ်၏။

ထို့အပြင် ဤကဲ့သို့သော စွမ်းအင်မျိုးက ယခင်အရာများထက် ပို၍ အဆင့်မြင့်နေသည်မှာ သံသယဖြစ်ဖွယ်မရှိချေ။

ထို့ကြောင့် ‘နဂါးဆင်ကူ’သည်လည်း ဖြည်းဖြည်းချင်း ဆင့်ကဲပြောင်းလဲနေလေသည်။

ဤအတိုင်း ဆက်သွားပါက အချိန်သိပ်မကြာမီမှာပင် သတ္တမအဆင့် အောက်ခြေအဆင့်သို့ တက်လှမ်းနိုင်ချေရှိသည်။

ထိုအချိန်သို့ ရောက်လာပါက သူ၏ ရုပ်ခန္ဓာပိုင်းဆိုင်ရာ ဆင့်ကဲပြောင်းလဲမှုကိုပါ လှုံ့ဆော်ပေးမည်ဖြစ်ပြီး သူ့အား ခန္ဓာပေါင်းစည်းခြင်းအဆင့် ရုပ်ခန္ဓာကျင့်ကြံသူတစ်ဦး ဖြစ်လာစေ‌ပေမည်။

...

နာရီအနည်းငယ် ကြာပြီးနောက်။

ကျင့်ကြံမှုကို ခေတ္တမျှ တည်ငြိမ်စေပြီးနောက် ကျိုးစွေ့သည် ကျင့်ကြံခြင်းဂူထဲမှ ထွက်လာခဲ့လေသည်။

ထိုအချိန်တွင် ပိုင်စုကျဲ့၊ ဟွားစစ်ချင်၊ ထောင်ချီလီနှင့် စစ်ယွီရှီးဟူသော တာအိုလက်တွဲဖော် ၄ ဦးကလည်း ဧည့်ခန်းထဲ၌ စကားစမြည် ပြောဆိုနေကြ၏။

"ယောက်ျား..."

ကျိုးစွေ့တစ်ယောက် ကျင့်ကြံခြင်းဂူထဲမှ ထွက်လာသည်ကို မြင်လိုက်ရသောအခါ စစ်ယွီရှီး၏ လှပသောမျက်နှာလေးမှာ ရဲတက်သွားခဲ့သည်။

သူမသည် ကျိုးမိသားစုသို့ ဝင်ရောက်လာသည်မှာ နှစ်ပေါင်း ၂၀ ရှိနေပြီဖြစ်ပြီး ကျိုးစွေ့၏ တာအိုလက်တွဲဖော်ဖြစ်လာသည်မှာလည်း အချိန်အတိုင်းအတာ တစ်ခုအထိ ကြာမြင့်နေပြီဖြစ်ရာ ဤကဲ့သို့သော ဘဝနေထိုင်မှုပုံစံနှင့် အတော်လေး အသားကျနေပြီ ဖြစ်၏။

သို့သော်လည်း ကျိုးစွေ့ကို မြင်ရတိုင်း သူမ၏ မျက်နှာနှင့် နားရွက်များ ရဲတက်လာကာ ရင်ခုန်မြန်နေဆဲပင် ဖြစ်လေသည်။

ဤအမျိုးသား၏ စိတ်ကြိုက် အနိုင်ကျင့်ခြင်းကို ခံချင်စိတ်များပင် ပေါက်နေခဲ့ချေပြီ။

“အိုး... မင်းတို့ပုံစံကို ကြည့်ရတာ တစ်ခုခု ဖြစ်ထားပုံပဲ..."

ကျိုးစွေ့က မျက်ခုံးပင့်လိုက်ပြီး သူ၏ တာအိုလက်တွဲဖော်များကို ကြည့်ကာ တစ်ခုခု ဖြစ်ပျက်နေကြောင်း သတိပြုမိသွားလေတော့သည်။