အခန်း ၃၁၆

ပြိုင်ဘက်ကင်း အင်ပါယာ။ အပိုင်း ၃၁၆

ဘာသာပြန် - Ko Yoohtoo

True Immortal Team

"အလုံးစုံ... အလုံးစုံစစ်ပွဲ ဟုတ်လား။"

လင်းချန်၏ စကားကို ကြားလိုက်ရသည့်အခါ ယွမ်ရှန့်သည် ရှေ့မှလူကို ဇဝေဇဝါဖြစ်နေသည့် မျက်နှာဖြင့် ကြည့်လိုက်၏။ သူသည် ထိုစကားလုံး၏ အဓိပ္ပါယ်ကို လုံးဝနားမလည်နိုင်ပုံရပေ။

"အလုံးစုံစစ်ပွဲဆိုတာ ဘာလဲ... မင်းက တကယ်ပဲ ဒီကမ္ဘာငယ်လေးထဲက အရိပ်မဲ့မျိုးနွယ်နဲ့ ကိုယ်ယောင်ဖျောက်မျိုးနွယ်တွေကို စစ်ကြေညာဖို့ စီစဉ်နေတာလား။"

လင်းချန်သည် ယွမ်ရှန့်ကို ယုံကြည်မှုအပြည့်ရှိသည့် အပြုံးဖြင့် ကြည့်လိုက်၏။

"ဟုတ်တယ်... အဲဒါက ကျွန်တော် လုပ်ဖို့ စီစဉ်ထားတဲ့ အရာပဲ။"

လင်းချန်၏ အဖြေကို ကြားလိုက်ရသည်နှင့် ယွမ်ရှန့်သည် အလန့်တကြား အော်ဟစ်လိုက်သည်။

"မင်း ရူးနေပြီ... ဒါကို လုံးဝ လုပ်လို့မရဘူး။"

ယွမ်ရှန့်သည် လင်းချန်ကို အလေးအနက်ထားသည့် အမူအရာဖြင့် ကြည့်လိုက်သည်။ ပြီးနောက် လက်ရှိ အခြေအနေမှန် အသေးစိတ်ကို ပြောပြလိုက်၏။ အစောပိုင်းက သူတို့အား အခြေအနေ ရှင်းပြစဉ်က အားလုံးကို အသေးစိတ် မပြောပြခဲ့ပေ။

"ဒီကမ္ဘာငယ်လေးထဲမှာ အရိပ်မဲ့မျိုးနွယ်နဲ့ ကိုယ်ယောင်ဖျောက်မျိုးနွယ်တွေ ဘယ်လောက်ထိ အမြစ်တွယ်နေပြီလဲဆိုတာ မင်းသိလား... သူတို့က ငါ့ရဲ့ ထိန်းချုပ်မှုတွေကို အဆက်မပြတ် တိုက်စားနေကြတာ။"

"အခုဆိုရင် သူတို့ သိမ်းပိုက်ထားတဲ့ နယ်မြေတွေက ငါ့ရဲ့ ထိန်းချုပ်မှုပြင်ပကို ရောက်နေပြီ။ အဲဒီမှာ ဘာတွေဖြစ်နေလဲဆိုတာတောင် ငါ မသိနိုင်တော့ဘူး။"

"ငါ အာရုံခံနိုင်ပြီး ထိန်းချုပ်လို့ရသေးတဲ့ နယ်မြေဆိုလို့ ပထမဟင်းလင်းပြင် စစ်မြေပြင်လမ်းကြောင်းနဲ့ ဒုတိယဟင်းလင်းပြင် စစ်မြေပြင်တောအုပ်ပဲ ရှိတော့တယ်။ ပြီးတော့ ငါ့ရဲ့ အမှတ်အသားလုပ်ထားတဲ့ ကိုယ်ပွားပုံရိပ်ကလည်း အတော်ပျက်စီးနေပြီ။"

အမှန်စစ်စစ် လွန်ခဲ့သော နှစ်ပေါင်းငါးရာခန့်ကပင် အရိပ်မဲ့မျိုးနွယ်နှင့် ကိုယ်ယောင်ဖျောက်မျိုးနွယ်တို့သည် ဤကမ္ဘာငယ်လေးကို ပြန်လည်ဖွင့်လှစ်ပြီး စတင် တိုက်စားခဲ့ကြခြင်း ဖြစ်၏။

ရှေးဟောင်းခေတ် မဟာစစ်ပွဲကြီးသည် ဤကမ္ဘာငယ်လေးကို သက်ရောက်မှုရှိခဲ့သဖြင့် ယွမ်ရှန့်၏ အမှတ်အသားပြုထားသည့် ခန္ဓာကိုယ်မှာ နှစ်ခြိုက်စွာ အိပ်ပျော်သွားရသည်။

လွန်ခဲ့သော နှစ်ပေါင်းသုံးရာခန့်မှသာ ယွမ်ရှန့်၏ ခန္ဓာကိုယ်မှာ နိုးထလာခဲ့သော်လည်း ထိုအချိန်၌ အရိပ်မဲ့မျိုးနွယ်နှင့် ကိုယ်ယောင်ဖျောက်မျိုးနွယ်တို့သည် ကမ္ဘာငယ်လေး၏ အစိတ်အပိုင်းတစ်ခုကို တိုက်စားပြီးသား ဖြစ်နေခဲ့၏။

ယွမ်ရှန့်သည် ထိုနယ်မြေအပေါ် ထိန်းချုပ်မှုကို လုံးဝ လက်လွှတ်လိုက်ရပြီး အခြေအနေကိုပင် မသိရှိနိုင်တော့ပေ။

နောက်ဆုံး၌ အရိပ်မဲ့မျိုးနွယ်နှင့် ကိုယ်ယောင်ဖျောက်မျိုးနွယ်တို့သည် ထိုနယ်မြေငယ်လေးကို အခြေခံကာ အခြားသော နယ်မြေများကိုပါ တိုက်စားရန် ကြိုးပမ်းခဲ့ကြပြီး ကမ္ဘာငယ်လေး တစ်ခုလုံးကို သူတို့၏ ထိန်းချုပ်မှုအောက်သို့ သွတ်သွင်းရန် ရည်ရွယ်ခဲ့ကြသည်။

နှစ်ပေါင်းငါးရာ ကုန်ဆုံးသွားလေပြီ။ ယွမ်ရှန့်သည် သူ၏ အစွမ်းကုန် ခုခံခဲ့သော်လည်း သူ၏ ခန္ဓာကိုယ်မှာ ပျက်စီးနေသည့် အမှတ်အသားမျှသာ ဖြစ်ပေရာ အရိပ်မဲ့မျိုးနွယ်နှင့် ကိုယ်ယောင်ဖျောက်မျိုးနွယ်တို့၏ တိုက်စားမှုကို မတားဆီးနိုင်ခဲ့ပေ။

လက်ရှိအချိန်၌မူ အရိပ်မဲ့မျိုးနွယ်နှင့် ကိုယ်ယောင်ဖျောက်မျိုးနွယ်တို့သည် ခုနစ်ဆယ်ရာခိုင်နှုန်းခန့် ကောင်းမွန်နေဆဲဖြစ်သည့် လူသားမျိုးနွယ်နှင့် ပင်လယ်မျိုးနွယ်တို့၏ တံခါးပေါက်များကို တွေ့ရှိသွားကြသဖြင့် အကြံအစည်တစ်ခုကို ဖန်တီးခဲ့ကြ၏။

ယင်းမှာ ကိုယ်ယောင်ဖျောက်မျိုးနွယ်က ပင်လယ်မျိုးနွယ်၏ တံခါးပေါက်မှတစ်ဆင့် အပြင်သို့ ထွက်ခွာပြီး ပင်လယ်မျိုးနွယ်၏ နယ်မြေသို့ ရောက်ရှိသွားသည့်အခါ လူသားမျိုးနွယ်၏ ရှေးဟောင်းအမွေအနှစ်နယ်မြေကို ပေါ်ထွက်လာစေရန် နည်းလမ်းရှာရန်ပင် ဖြစ်သည်။

တောင်ပိုင်းပင်လယ်နယ်မြေရှိ လူသားမျိုးနွယ်၏ ရှေးဟောင်းအမွေအနှစ်နယ်မြေ ပေါ်ထွက်လာသည်နှင့် ဆက်ဆံရေး ကောင်းမွန်သည့် လူသားမျိုးနွယ်နှင့် ပင်လယ်မျိုးနွယ်တို့သည် ကျိန်းသေပေါက် ပူးပေါင်းကာ လာရောက် စူးစမ်းကြမည်ဖြစ်ပြီး သူတို့၏ ပါရမီရှင် တပည့်များကို စေလွှတ်ကြပေလိမ့်မည်။

ထိုအချိန်၌ အရိပ်မဲ့မျိုးနွယ်နှင့် ကိုယ်ယောင်ဖျောက်မျိုးနွယ်တို့က ထောင်ချောက်များကို ကြိုတင်ပြင်ဆင်ထားပြီး မျိုးနွယ်စု နှစ်ခုလုံး၏ ပါရမီရှင်များကို ဆွဲဆောင် ဖမ်းဆီးမည် ဖြစ်၏။

လူသားမျိုးနွယ်နှင့် ပင်လယ်မျိုးနွယ်တို့၏ ခံတပ်များအတွင်းရှိ အစီအရင် ထောင်ချောက်များသည် ထိုအစီအစဉ်၏ အစိတ်အပိုင်းများ ဖြစ်သည်။

မျိုးနွယ်စု နှစ်ခုလုံး၏ ပါရမီရှင်များထံမှ သန့်စင်သည့် အသွေးအသားများသည် ယွမ်ရှန့်၏ စွမ်းအားကို တိုက်စားရန်အတွက် စွမ်းအင်အရင်းအမြစ်အဖြစ် အသုံးတော်ခံရမည် ဖြစ်ပြီး ထိုပါရမီရှင်များ၏ ခွန်အားကိုလည်း စောင့်ကြည့်နိုင်မည် ဖြစ်၏။

သို့သော်လည်း လူသားမျိုးနွယ်နှင့် ပင်လယ်မျိုးနွယ်တို့၏ ခံတပ်အတွင်းမှ အစီအရင်များသည် ပါရမီရှင်များ အားလုံးကို အမှန်တကယ် သတ်ဖြတ်နိုင်မည် မဟုတ်ကြောင်းကို သူတို့ သိရှိထားကြသည်။

ထိုအချိန် ကျရောက်လာပါက လူသားမျိုးနွယ်နှင့် ပင်လယ်မျိုးနွယ်တို့မှ အချို့သော ပါရမီရှင်များကို ကိုယ်ယောင်ဖျောက်မျိုးနွယ်က ဝါးမြိုပြီး မျိုးနွယ်စု နှစ်ခုကြား၌ သွေးထိုးလှုံ့ဆော်မှုများ ပြုလုပ်ကာ အတွင်းစိတ် ဝမ်းကွဲမှုကို ဖန်တီးကြမည် ဖြစ်၏။

ထိုသို့ဖြင့် ထိုနာကြည်းမှုများကို ကမ္ဘာငယ်လေး၏ အပြင်ဘက်အထိ သယ်ဆောင်သွားစေကာ မျိုးနွယ်စု နှစ်ခုကြား၌ ပဋိပက္ခများ ဖြစ်ပေါ်စေရန် ရည်ရွယ်ထားခြင်းပင်။

ထိုအခါမှသာ အရိပ်မဲ့မျိုးနွယ်နှင့် ကိုယ်ယောင်ဖျောက်မျိုးနွယ်တို့ လူသားမျိုးနွယ်နှင့် ပင်လယ်မျိုးနွယ်ကို တိုက်ခိုက်ရန်အတွက် အကြီးမားဆုံးသည့် အကျိုးကျေးဇူးကို ရရှိပေလိမ့်မည်။

ဤကမ္ဘာငယ်လေးကို လုံးဝ ထိန်းချုပ်ပြီးပါက အရိပ်မဲ့မျိုးနွယ်နှင့် ကိုယ်ယောင်ဖျောက်မျိုးနွယ်တို့ တိုက်ခိုက်မှုများ စတင်ရန်အတွက် ပြီးပြည့်စုံသည့် အခြေခံစခန်းကြီးတစ်ခု ဖြစ်လာပေလိမ့်မည်။

ယွမ်ရှန့်သည် ခဏတာ ရပ်တန့်လိုက်ပြီးနောက် အလေးအနက်ထားလိုက်သည်။

"ကမ္ဘာ့အမြုတေပေါ်မှာ ငါ့ရဲ့ အမှတ်အသားက ရှိနေသေးတာကြောင့် ဒီကမ္ဘာငယ်လေးရဲ့ စမ်းသပ်မှု အစီအရင်က မပျက်စီးသေးဘူး။ အထဲကို ဝင်လာတဲ့ စိတ်ဝိညာဉ်သိုင်းပညာရှင်တွေရဲ့ ခွန်အားနဲ့ လူဦးရေကို တစ်ကြိမ်ချင်းစီ ကန့်သတ်ထားနိုင်သေးတယ်။ ဒါပေမဲ့... ဒီနှစ်ပေါင်းငါးရာအတွင်းမှာ အရိပ်မဲ့မျိုးနွယ်နဲ့ ကိုယ်ယောင်ဖျောက်မျိုးနွယ်တွေက သူတို့လူတွေကို အကြိမ်တိုင်းမှာ စေလွှတ်ခဲ့တယ်။"

"အခုဆိုရင် အရိပ်မဲ့မျိုးနွယ်နဲ့ ကိုယ်ယောင်ဖျောက်မျိုးနွယ်တွေရဲ့ ဦးရေက သန်းငါးဆယ်ထက် မနည်းတော့ဘူးလို့ ငါထင်တယ်။ ပြီးတော့ သူတို့ရဲ့ ထိန်းချုပ်မှု ပိုအားကောင်းလာတာနဲ့အမျှ နိုးထခြင်းနယ်ပယ်ရှိတဲ့ လူတွေတောင် ဒီထဲကို ဝင်လာနိုင်လိမ့်မယ်... ဒါကြောင့်မို့လို့သာ အရိုးဓားငါးမျိုးနွယ်စုရဲ့ မျိုးနွယ်စုခေါင်းဆောင်က ကိုယ်ယောင်ဖျောက်မျိုးနွယ်ရဲ့ ဝါးမြိုခြင်းကို ခံလိုက်ရတာပေါ့။"

ယွမ်ရှန့်သည် လင်းချန်ကို ကျောခိုင်းလျက် အဝေးက မိုးကုတ်စက်ဝိုင်းဆီသို့ ငေးကြည့်ရင်း ဝမ်းနည်းစွာ ပြောလိုက်၏။

"မင်းမှာရှိတဲ့ ဒီလူအနည်းငယ်လေးနဲ့ သန်းငါးဆယ်ကို ဘယ်လိုများ အနိုင်ယူနိုင်မှာလဲ... ဒီကမ္ဘာငယ်လေးထဲက လူသားအားလုံး ပူးပေါင်းရင်တောင် ဒါက လုံးဝမဖြစ်နိုင်တဲ့ အရာပဲ။"

ထိုစကားများနှင့်အတူ ယွမ်ရှန့်သည် ဖြည်းညင်းစွာ လှည့်ကြည့်လိုက်ပြီး လင်းချန်ကို စိုက်ကြည့်လိုက်သည်။

သို့သော် ယွမ်ရှန့် မျှော်လင့်ထားသကဲ့သို့ လင်းချန်သည် ထိတ်လန့်ကြောက်ရွံ့သွားခြင်း မရှိဘဲ သူ၏ အကြံပြုချက်အတိုင်း လူသားမျိုးနွယ်၏ စမ်းသပ်မှုလမ်းကြောင်းဆီသို့ သွားချင်ပုံမရပေ။

သူ လှည့်ကြည့်လိုက်သည့်အခါ မြင်လိုက်ရသည်မှာ လင်းချန်၏ မျက်နှာပေါ်ရှိ လှောင်ပြောင်မှု၊ အထင်သေးမှုနှင့်... ရွံရှာစက်ဆုပ်မှုတို့ပင် ဖြစ်သည်။

လင်းချန်သည် ယွမ်ရှန့်ကို ကြည့်ကာ ရယ်မောချင်စိတ်ကို ထိန်းလိုက်၏။

"လူသန်းငါးဆယ်... အဲဒါက အများကြီးလား။"

ယွမ်ရှန့်မှာ လင်းချန်၏ စကားကြောင့် ရယ်ရခက်၊ ငိုရခက် ဖြစ်သွားပြီးနောက် အော်ဟစ်ရယ်မောလိုက်သည်။

"သန်းငါးဆယ်က မများဘူးလား... မင်းမှာ လူဘယ်နှစ်ယောက်ရှိလို့လဲ။ မင်း အဲဒီလူ ငါးဆယ့်ခြောက်ယောက်ကို ဒီကမ္ဘာငယ်လေးထဲ ဘယ်လိုခေါ်လာလဲဆိုတာ ငါ မသိပေမဲ့ သန်းငါးဆယ်ကို ရင်ဆိုင်ဖို့ကတော့ တကယ်ပဲ နည်းလွန်းတယ်။"

ယွမ်ရှန့်သည် အလေးအနက်ထားသည့် အမူအရာပြလိုက်၏။

"ဒါ့အပြင်... အရိပ်မဲ့မျိုးနွယ်နဲ့ ကိုယ်ယောင်ဖျောက်မျိုးနွယ် သန်းငါးဆယ်ဆိုတာ ငါ့ရဲ့ ခန့်မှန်းခြေပဲ။ အစစ်အမှန် ကိန်းဂဏန်းက ဒီထက်မက ကျိန်းသေများလိမ့်မယ်... သူတို့ကို တိုက်ခိုက်ဖို့ ကြိုးစားတာက တကယ်ကို မဖြစ်နိုင်တဲ့ ကိစ္စပဲ။"

လင်းချန်သည် သူ၏ ပုခုံးကို လှုပ်ရှားလိုက်ပြီး ယွမ်ရှန့်ကို စူးစမ်းလိုစိတ်ဖြင့် ကြည့်လိုက်သည်။

"အဲဒါက ဘာလို့ မဖြစ်နိုင်တာလဲ။"

လင်းချန်၏ ခေါင်းမာသည့် ရပ်တည်ချက်ကို မြင်သည့်အခါ ယွမ်ရှန့်သည် စိတ်ရှည်လက်ရှည်ဖြင့် ထပ်မံ ဖျောင်းဖျလိုက်၏။

"လင်းချန်... ရူးမိုက်တာကို ရပ်လိုက်စမ်းပါ။ မင်းရဲ့ ပါရမီနဲ့ ခွန်အားက တကယ်ပဲ ငါ့ကို အံ့အားသင့်စေတယ်။ နိဗ္ဗာန်စက်ဝန်း တစ်ဆယ့်နှစ်ကြိမ်ဆိုတာမျိုးလည်း တစ်ခါမှ မရှိဖူးဘူး... ဒါပေမဲ့ နောက်ဆုံးမှာတော့ လူတစ်ယောက်ရဲ့ အင်အားက အကန့်အသတ် ရှိတယ်၊ လူတော်တစ်ယောက်ဟာ လက်လေးဖက်ကို မယှဉ်နိုင်ဘူး ဆိုတဲ့ အမှန်တရားကို မင်း မသိဘူးလား။"

သို့သော် လင်းချန်မှာမူ ထိုစကားများကို အာရုံမစိုက်ဘဲ ယွမ်ရှန့်ကိုသာ စူးစမ်းစွာ ကြည့်လိုက်သည်။

"စီနီယာ... ကျွန်တော် တကယ် သိချင်မိတယ်။ ခင်ဗျားက ဘာလို့ ကျွန်တော့်အပေါ် ဒီလောက် ကောင်းနေရတာလဲ။"

ယွမ်ရှန့် မျက်နှာတည်သွား၏။

"မင်းသာ ငါ့ရဲ့ အကြံပြုချက်ကို နားထောင်မယ်ဆိုရင်... မင်းကို အချက်အလက် အနည်းငယ် ပေးဖို့ ငါ ဆန္ဒရှိတယ်။"

ယွမ်ရှန့်၏ အဖြေကို လင်းချန်က လက်ယပ်ကာ ငြင်းပယ်လိုက်သည်။

"အဲဒါမျိုး မလိုဘူး... ခင်ဗျား ကျွန်တော့်ကို လှည့်ဖြားနေတာလို့ပဲ ကျွန်တော် ယူဆလိုက်မယ်။ အဖြေကို ကျွန်တော့်ဘာသာ ကျွန်တော်ပဲ ရှာဖွေသွားမှာပါ။ ပြီးတော့ အရိပ်မဲ့မျိုးနွယ်နဲ့ ကိုယ်ယောင်ဖျောက်မျိုးနွယ်တွေကို တိုက်ခိုက်မယ့် ကိစ္စအတွက်လည်း စီနီယာ အရမ်း စိုးရိမ်မနေနဲ့။ ကျွန်တော် စောစောက ပြောခဲ့သလိုပဲ... အဲဒီမျိုးနွယ်စု နှစ်ခုကို အလုံးစုံစစ်ပွဲ ဆင်နွှဲဖို့ ကျွန်တော် စီစဉ်ထားပြီးသား။"

လင်းချန်သည် ရှေ့ရှိ ပုံရိပ်ယောင် အစီအရင်ကိုသာ အာရုံစိုက်လိုက်၏။

"အလုံးစုံစစ်ပွဲဆိုတာ အလုံးစုံ တိုက်ခိုက်မှုကို ဆိုလိုတာပဲ... ကျွန်တော်က ဒီကမ္ဘာငယ်လေးထဲက အဲဒီလူတွေ အားလုံးကို တစ်ယောက်တည်း ရင်ဆိုင်ဖို့ အစကတည်းက မစီစဉ်ထားဘူး။"

"စီနီယာ... ခင်ဗျားအနေနဲ့ သေချာ စောင့်ကြည့်နေလိုက်ပါ။ စစ်ပွဲ စတင်လာတဲ့ အချိန်ကျရင်... အလုံးစုံ ချေမှုန်းခြင်းဆိုတဲ့ မြင်ကွင်းက တကယ်တမ်း ဘယ်လိုမျိုးလဲဆိုတာ သိရလိမ့်မယ်။"

လင်းချန်သည် အလွန်တရာ ခေါင်းမာနေဆဲဖြစ်သည်ကို မြင်ရသည်မှာ ယွမ်ရှန့်အတွက် ခေါင်းခဲစရာပင် ဖြစ်သည်။

ဖျောင်းဖျ၍ မရတော့သည်ကို သိလိုက်ရသဖြင့် ယွမ်ရှန့်သည် ဆက်မပြောတော့ဘဲ စိတ်ထဲမှသာ တိတ်တဆိတ် တွေးတောနေမိ၏။

'တကယ်လို့ တစ်ခုခုဖြစ်လာရင်တော့... ငါ့ရဲ့ ဒီအမှတ်တံဆိပ်ထဲက စွမ်းအားတွေကို အကုန်လောင်ကျွမ်းစေပြီး လင်းချန်ကို ဒီကမ္ဘာငယ်လေးထဲကနေ အပြင်ကို ပို့ပေးရုံပဲ ရှိတော့တာပေါ့... နှမြောစရာကောင်းတာက သိုင်းဝိညာဉ်တိုက်ကြီးပေါ်က လူသားမျိုးနွယ်တွေဟာ ဒီအတွက်ကြောင့် ဒုက္ခရောက်ကြရတော့မှာပဲ။'

အကယ်၍ လင်းချန်သာ ယွမ်ရှန့်၏ အတွေးကို သိလျှင် သူ ပို၍ပင် အံ့အားသင့်သွားပေလိမ့်မည်။ ယွမ်ရှန့်သည် လင်းချန်၏ ဘေးကင်းမှုအတွက် သိုင်းဝိညာဉ်တိုက်ကြီးရှိ လူသားမျိုးနွယ်စု တစ်ခုလုံးကို စတေးရန်ပင် ဝန်မလေးသူ ဖြစ်သည်။

ရွှီးးး ရွှီးးး ရွှီးးး

ယွမ်ရှန့်၏ စိတ်ထဲ၌ အတွေးပေါင်းစုံ ဖြတ်သန်းနေစဉ်မှာပင် သူ၏ နောက်ကွယ်မှ လေတိုးသံအချို့ ရုတ်တရက် ထွက်ပေါ်လာပြီး မျက်စိတစ်မှိတ်အတွင်းမှာပင် သူ့ဘေးမှ ဖြတ်ကျော်ကာ ရှေ့ရှိ ပုံရိပ်ယောင် အစီအရင် အတွင်းသို့ ပြေးဝင်သွားကြ၏။

ထိုပုံရိပ်အချို့ ရုတ်တရက် ပေါ်ပေါက်လာသည်ကို မြင်လိုက်ရသည့်အခါ ယွမ်ရှန့်၏ နာမ်ပိုင်းဆိုင်ရာ ခန္ဓာကိုယ်မှ မျက်လုံးသူငယ်အိမ်များမှာ ကျုံ့သွားပြီး အစီအရင်အတွင်းသို့ ပျောက်ကွယ်သွားသည့် အစိမ်းရောင်ပုံရိပ်များကို အံ့အားသင့်စွာ စိုက်ကြည့်နေမိသည်။

ထို့နောက်၌ ယွမ်ရှန့်သည် လင်းချန်ရှိရာသို့ အမြန်လှည့်ကြည့်လိုက်၏။

"မင်း... မင်းက..."

ထိုခဏ၌ လင်းချန်သည်လည်း ယွမ်ရှန့်ဘက်သို့ လှည့်ကြည့်လိုက်ရာ သူ၏ မျက်နှာပေါ်၌ ဆန်းကြယ်သည့် အပြုံးတစ်ခု ရှိနေသည်။

"စီနီယာ... ခင်ဗျား ကျွန်တော့်အပေါ် ထားတဲ့ စေတနာက တကယ်ကို ထူးခြားတယ်။ ကျွန်တော်တို့ကြားမှာ နက်ရှိုင်းတဲ့ ပတ်သက်မှုတစ်ခုခု ရှိနေလို့လည်း ဖြစ်နိုင်တာပဲ... အဲဒါကြောင့် ခင်ဗျားကို ဒါလေး မြင်ခွင့်ပေးလိုက်တာ ဘာမှမဖြစ်ပါဘူး။"

ယွမ်ရှန့်သည် သူ၏ရှေ့မှ လင်းချန်ကို ကြည့်ရင်း ခဏတာ စကားလုံး ပျောက်ရှသွားရ၏။

ဒုတိယဟင်းလင်းပြင် အတွင်းရှိ တိုက်ပွဲမှာ သူ၏ ထိန်းချုပ်မှုအောက်၌ ရှိနေဆဲပင် ဖြစ်သည်။ သူသည် တိုက်ရိုက် ကိုင်တွယ်နိုင်စွမ်း မရှိတော့သော်လည်း နေရာအနှံ့အပြားကို အာရုံခံနိုင်စွမ်း ရှိနေသေး၏။

အစောပိုင်းက ရုတ်တရက် ပေါ်ပေါက်လာသည့် ထို လေဟုန်စစ်သည် တစ်ရာခန့်မျှမှာ သူ၏ နောက်ကွယ်ရှိ ဟင်းလင်းပြင်ထဲမှနေ၍ မည်သည့်နေရာက ပေါ်လာသည်မသိဘဲ ထွက်ပေါ်လာခြင်းဖြစ်ကြောင်း ရှင်းလင်းစွာ အာရုံခံမိလိုက်သည်။

ယွမ်ရှန့်သည် စိတ်ထဲမှ ထိတ်လန့်သွား၏။

'စောစောက လူငါးဆယ့်ခြောက်ယောက်ကိုလည်း မင်းက ဒီလိုပဲ ဘာမှမရှိတဲ့နေရာကနေ ဆင့်ခေါ်လိုက်တာလား။'

"ဒါက ဟင်းလင်းပြင် စိတ်ဝိညာဉ်ပစ္စည်း တစ်ခုခုလား... အဲဒါက ဘယ်လိုလုပ် ဖြစ်နိုင်မှာလဲ။ ယုတ္တိဗေဒအရ သိုင်းဝိညာဉ်တိုက်ကြီးဟာ အဲဒီလို ပစ္စည်းမျိုးကို မသွန်းလုပ်နိုင်သေးဘူး မဟုတ်လား။"

ယွမ်ရှန့် ဇဝေဇဝါ ဖြစ်နေစဉ်မှာပင် ရှေ့ဘက်မှနေ၍ ကြည်လင်ပြတ်သားသည့် အက်ကွဲသံကြီးတစ်ခု ထွက်ပေါ်လာသည်။

ထို့နောက်၌မူ ခိုင်မာလှသည့် အစီအရင်မှာ ရုတ်တရက် အက်ကွဲသွားပြီး အက်ကြောင်းများမှာ အရပ်မျက်နှာ အသီးသီးသို့ ပျံ့နှံ့သွားလေ၏။

ဘုန်းးး။

ကြီးမားသည့် ပေါက်ကွဲသံကြီးတစ်ခု ထွက်ပေါ်လာပြီးနောက် ဖန်စအသီးသီး လွင့်စင်သွားသကဲ့သို့ ဖြစ်ပေါ်လာကာ နောက်ဆုံး၌ သန့်စင်သော စိတ်ဝိညာဉ်စွမ်းအားများနှင့် သဘာဝ၏ စွမ်းအင်များအဖြစ် ပြောင်းလဲသွားပြီး လေထုထဲ၌ ပျောက်ကွယ်သွားတော့သည်။

ပြိုင်ဘက်ကင်း အင်ပါယာ။ အပိုင်း ၃၁၆ ပြီး။

ဘာသာပြန် - Ko Yoohtoo

True Immortal Team