အခန်း ၁၀၄၃

အခန်း (၁၀၄၃) သားရဲစစ်တို့၏ ဘုရင်အဖြစ် အသွင်ကူးပြောင်းခြင်း။

ကောင်းကင်ဘုံကို လွှမ်းမိုးသွားနိုင်သော စူးချန်ခုန်း၏ အမိန့်သံသည် အဖြူရောင် ဝတ်ရုံဖြင့် သိုင်းဝိဇ္ဇာသူတော်စင်၏ စိတ်အာရုံထဲတွင် ပဲ့တင်ထပ်သွားသည်။ ရိုးရှင်းသော်လည်း တန်ခိုးပါသော ထိုအသံသည် သူ့အား လမ်းကြောင်းမှန်သို့ ရောက်ရှိစေသကဲ့သို့ ရှိသည်။

"ဟုတ်…ဟုတ်ကဲ့ ကျွန်တော် သွားပါတော့မယ်"

အဖြူရောင်ဝတ်ရုံနှင့် သိုင်းဝိဇ္ဇာသူတော်စင်သည် လွတ်ငြိမ်းခွင့် ရရှိလိုက်သည့်အလား ခေါင်းကို အကြိမ်ကြိမ် ငြိမ့်ပြကာ အလျင်အမြန် လှည့်ထွက်သွားတော့သည်။ သူသည် ဤ ရှေးဟောင်း တန်းခိုးရှင်တစ်ဦးကို စော်ကားမိပြီး ကပ်ဘေးနှင့် ကြုံတွေ့ရမည့်အရေးကို လုံးဝ မလိုလားပေ။

ထိုသူ ထွက်ခွာသွားသည်နှင့် စူးချန်ခုန်းသည် သူ၏ မူလဝိညာဉ်ကို ပြန်လည်ရုပ်သိမ်းလိုက်ပြီး စစ်မှန်သော သားရဲတစ်ကောင်၏ အသားနှင့် သွေးကို ဆက်လက်သန့်စင်နေသည်။ ဤကာလအတွင်း ဆန်းကြယ်သားရဲများ အသွင်ကူးပြောင်းရာမှ ထွက်ပေါ်လာသည့် ဆူညံသံများကြောင့် နယ်မြေထဲသို့ ဝင်ရောက်လာသော သိုင်းဝိဇ္ဇာသူတော်စင်အချို့ ရှိနေတတ်သည်။

စူးချန်ခုန်းသည် ထိုသူများကို မောင်းထုတ်ရန် သူ၏ မူလဝိညာဉ်ကို ချက်ချင်း ထုတ်လွှတ်လိုက်သည်။ ရှေးဟောင်းတန်းခိုးရှင်ဟု သံသယရှိသူတစ်ဦးကို ရင်ဆိုင်ရချိန်တွင် ထိုသိုင်းဝိဇ္ဇာသူတော်စင်တို့သည် သဘာဝအတိုင်းပင် ကြောက်ရွံ့လေးစားသွားကြပြီး အငြင်းပွားမှုမရှိဘဲ ထွက်သွားကြသဖြင့် စူးချန်ခုန်းအတွက် ပြဿနာ မရှိခဲ့ပေ။

"သားရဲစစ် နှစ်ဆယ်ကောင်တောင် စားပြီးပြီ။ အဆင့်တက်ဖို့ နီးကပ်လာပြီပဲ"

စူးချန်ခုန်းသည် တိုးတိုးလေး ရေရွတ်လိုက်သည်။

တစ်နှစ်ခွဲကျော် ကုန်လွန်သွားပြီးနောက် သူ၏ ဧရာမဝေလငါးကျင့်စဉ်မှာ အောင်မြင်မှုသို့ အလွန်နီးကပ်နေပြီ ဖြစ်သည်။ သူ၏ အစာစားနှုန်းမှာလည်း ပိုမိုကြီးမားလာပြီး စစ်မှန်သော သားရဲတစ်ကောင်ကို နှစ်လလျှင် တစ်ကောင် သန့်စင်ရာမှ ယခုအခါတွင်မူ လဝက်တောင် မကြာတော့ပေ။ သူ၏ တိုးတက်မှုမှာ အောင်မြင်မှု တံခါးပေါက်ဝတွင် ရှိနေပြီဖြစ်သည်။

ဟူးးးး

စူးချန်ခုန်းသည် သားရဲစစ်၏ အသားများကို အမြောက်အမြား စားသုံးလိုက်ပြီးနောက် ပက်လက်ထိုင်ကာ ဝေလငါးကျင့်စဉ်ကို စတင် ကျင့်ကြံသည်။ သူ၏ ပတ်လည်တွင် ချီစွမ်းအားနှင့် သွေးများမှာ အရှိန်အဟုန်ဖြင့် စီးဆင်းနေပြီး အစောပိုင်းထက် ဆယ်ဆမျှ ပိုမိုပြင်းထန်လာကာ အရည်အသွေး ပြောင်းလဲရန် စောင့်ဆိုင်းနေသော အတားအဆီးတစ်ခုသို့ ရောက်ရှိနေပြီဖြစ်သည်။

တဖြည်းဖြည်းနှင့် စူးချန်ခုန်းသည် အလွန်ထူးဆန်းသော အခြေအနေတစ်ခုသို့ ရောက်ရှိသွားသည်။

အဆုံးမဲ့ပင်လယ်ပြင်တွင် စူးချန်ခုန်းသည် မိမိကိုယ်ကို ဧရာမဝေလငါးကြီးတစ်ကောင်အဖြစ် ခံစားလိုက်ရသည်။ ထိုသတ္တဝါမှာ ရှေးဟောင်းဆန်ပြီး အစွမ်းထက်ကာ အလွန်ကြီးမားလွန်းလှသဖြင့် တစ်ချက်ကြည့်ရုံဖြင့် ခေါင်းနှင့် အမြီးကိုပင် မမြင်နိုင်သော ကျွန်းငယ်တစ်ခုပမာ ရှိနေသည်။

ဟူး

အသက်တစ်ချက် ရှူထုတ်လိုက်ရုံဖြင့် အရာအားလုံးကို ဖျက်ဆီးပစ်နိုင်သော မုန်တိုင်းကို ဖန်တီးနိုင်ပြီး လှိုင်းလုံးကြီးများကိုပင် ဖြစ်ပေါ်စေနိုင်သည်။ အသက်တစ်ချက် ရှူသွင်းလိုက်ရုံဖြင့် ကောင်းကင်မှ တိမ်တိုက်များကိုပင် စုပ်ယူနိုင်ပြီး ပတ်ဝန်းကျင်ရှိ သဘာဝ၏ ဝိညာဉ်စွမ်းအားများကို တစ်စက်မှ မကျန်အောင် စုပ်ယူပစ်နိုင်သည်။

အစွမ်းထက်လွန်းလှသည်။

ကမ္ဘာပေါ်တွင် မည်သည့်အရာနှင့်မျှ မနှိုင်းယှဉ်နိုင်သော စွမ်းအား၊ အရာရာကို ဝါးမြိုနိုင်သော ဘုရင်တစ်ပါးနှင့် တူညီသည်။ စစ်မှန်သော သားရဲမျိုးနွယ်စုတွင်ပင် သူသည် ဘုရင်တစ်ပါးအဖြစ် ရှိနေသည်။

စူးချန်ခုန်းသည် မိမိကိုယ်ကို သားရဲစစ်တို့၏ ဘုရင်အဖြစ် စိတ်ကူးယဉ်လိုက်ချိန်တွင် သူ၏ ဧရာမဝေလငါးကျင့်စဉ်သည် ကြာရှည်စွာ စုဆောင်းထားခဲ့သော အားထုတ်မှုများဖြင့် နောက်ဆုံးတွင် အတားအဆီးများကို ဖောက်ထွက်နိုင်ခဲ့လေပြီ။

"ဝူးးး"

စူးချန်ခုန်း၏ အရိုးနှင့် အကြောများအတွင်း ပေါင်းစပ်နေသော ဧရာမဝေလငါး စစ်မှန်သော ချီစွမ်းအားသည် သူ၏ ခန္ဓာကိုယ်ထဲရှိ နတ်ဘုရားသွေးများနှင့် နောက်ဆုံးတွင် လုံးဝ ပေါင်းစပ်သွားသည်။ တစ်စက်ချင်းစီတိုင်းသည် ပြီးပြည့်စုံအောင် စုစည်းထားပြီး တောက်ပ၍ လှပသော မီးတောက်ကဲ့သို့သော အနီရောင် ဖြစ်သည်။ ထိုနတ်ဘုရားသွေးတစ်စက်သာ ကျဆင်းသွားပါက ရေကန်ငယ်တစ်ခုကိုပင် ပြည့်စေနိုင်သည်။

ဒုန်း

နှလုံးခုန်သံများကြားတွင် စစ်မှန်သော သွေးများ စီးဆင်းနေပြီး ပူပြင်းသော အပူချိန်ကို ထုတ်လွှတ်နေသည်။ ပတ်ဝန်းကျင်ရှိ လေထုမှာ လျင်မြန်စွာ ပူနွေးလာပြီး အနီးရှိ ပင်လယ်ရေများပင် ဆူပွက်လာသကဲ့သို့ ဖြစ်ပေါ်နေသည်။

စူးချန်ခုန်းသည် ချီနှင့် သွေးကို ကျင့်ကြံစဉ် ထွက်ပေါ်လာသော သဘာဝ အပူဓာတ်ကြောင့်ပင် အလွန်ပူပြင်းသော နေလုံးငယ်တစ်ခုကဲ့သို့ ဖြစ်နေပြီး ပျမ်းမျှ သိုင်းဝိဇ္ဇာသူတော်စင်တစ်ဦးကိုပင် ပြာကျအောင် လုပ်ဆောင်နိုင်စွမ်း ရှိသည်။

စူးချန်ခုန်း၏ နှလုံးသားအတွင်းတွင် တတိယမြောက် နတ်ဘုရားမျိုးစေ့မှာ ဖြည်းဖြည်းချင်း စုစည်းသွားပြီး သွေးနီရောင် နတ်ဘုရားမျိုးစေ့တစ်ခု ဖြစ်လာသည်။

"ဂျိမ်း"

တတိယမြောက် နတ်ဘုရားမျိုးစေ့မှာ စူးချန်ခုန်း၏ ခန္ဓာကိုယ်အတွင်း ပုံဖော်လိုက်သည်နှင့် လခြမ်းကွေးပင်လယ်၏ ကောင်းကင်ယံတွင် ဝိညာဉ်စွမ်းအားများ တဟုန်ထိုး တိုးပွားလာသည်။ မိုင်ပေါင်းတစ်ထောင်အတွင်း မိုးကြိုးနှင့် လျှပ်စီးများ ဖြတ်သန်းသွားပြီး အမည်းရောင် တိမ်တိုက်များ စုဝေးလာကြသည်။

အထက်ရှိ တိမ်တိုက်များအတွင်းတွင် မိုင်ထောင်ပေါင်းများစွာ ရှည်လျားသော ဧရာမဝေလငါးကြီးတစ်ကောင်က ကမ္ဘာမြေကို ဝါးမြိုရန် အသင့်ပြင်ထားသကဲ့သို့ ဧရာမပါးစပ်ကို ဟထားသည်။

"ဝုန်း"

ပင်လယ်ပြင်အထက်တွင် ပြင်းထန်သော လေပြင်းများ တိုက်ခတ်ပြီး လှိုင်းလုံးများ ကြမ်းတမ်းစွာ ရိုက်ခတ်နေသည်။ လခြမ်းကွေးပင်လယ် တစ်ခုလုံးရှိ ပင်လယ်သတ္တဝါများနှင့် ဆန်းကြယ်သားရဲများအားလုံးသည် တစ်စုံတစ်ရာကို အာရုံခံမိသကဲ့သို့ စစ်မှန်သော ဘုရင်တစ်ပါး မွေးဖွားလာသကဲ့သို့ တုန်လှုပ်ချောက်ချားနေကြသည်။

ဧရာမဝေလငါးကျင့်စဉ် (ဒွါရဒသမနယ်ပယ်၊ သူတော်စင်အဆင့်ကို ကျော်လွန်ခြင်း ၁%)

စူးချန်ခုန်း၏ ဧရာမဝေလငါးကျင့်စဉ်မှာ အဆင့် ၁၂ သို့ ရောက်ရှိသွားပြီး တတိယမြောက် နတ်ဘုရားမျိုးစေ့ကို စုစည်းနိုင်ကာ ကျန်းယောင် သူ၏ နတ်ဘုရားခန္ဓာကိုယ်ကို ဖော်ဆောင်စဉ်က ထွက်ပေါ်လာသော ဖြစ်စဉ်ထက် မလျော့နည်းသည့် ကောင်းကင်နှင့် မြေကြီး၏ ထူးခြားသော ဖြစ်စဉ်တစ်ခုကို ဖန်တီးနိုင်ခဲ့သည်။