အခန်း ၁၅၇၂

အခန်း ၁၅၇၂ ပြည်သူတစ်ရပ်လုံး ရွာသူရွာသား သီချင်းကို သီဆိုနေကြခြင်း

“ငါ့ရဲ့ ဇာတိရွာလေးက ဒီရွာလေးမှာပါဗျာ၊ ငါက ဒီရွာလေးမှာ မွေးပြီး ဒီရွာလေးမှာ ကြီးပြင်းလာတဲ့သူပါ...”

ဖုန်းယွီသည် တံခါးကို ဖွင့်၍ အပြင်သို့ ထွက်လာသောအခါ၊ အတွင်းရေးမှူးကျောက် သီချင်း ညည်းနေသံကို ကြားလိုက်ရပြီး၊ ဒီသီချင်းက ဘာဖြစ်လို့ ဒီလောက်တောင် ရင်းနှီးနေရတာလဲ ဟု တွေးလိုက်မိလေသည်။

“မန်နေဂျာဖုန်း၊ ခင်ဗျား ပြန်တော့မလို့လား”

“မပြန်ဘဲ ဒီမှာ ဘာဆက်လုပ်နေရမှာလဲ။ မင်းတို့ရဲ့ခေါင်းဆောင်က အရမ်းကပ်စေးနည်းလွန်းတယ်။ ဟင်းလေးပွဲ ဟင်းရည်တစ်ပွဲပဲ ကျွေးတာကို ထားလိုက်ပါတော့၊ သုံးပွဲက သက်သတ်လွတ် ဟင်းတွေ ဖြစ်နေသေးတယ်”

ဖုန်းယွီ၏ ဤသို့သော မြည်တွန်တောက်တီးမှုများကို အတွင်းရေးမှူးကျောက်က စောစောစီးစီးကတည်းက အသားကျနေပြီဖြစ်ရာ၊ သူက ပြုံးရွှင်စွာဖြင့် ပြောလိုက်လေသည်။ “မန်နေဂျာဖုန်းရယ်၊ ခင်ဗျားက နောက်ပြန်ပြီ။ ခင်ဗျား စားချင်တာ ဘာရှိလို့လဲ၊ ခင်ဗျား မစားနိုင်တာမှ မရှိတာ”

ဖုန်းယွီက ခြေလှမ်းများကို ရပ်တန့်လိုက်ပြီး “ဒါနဲ့ မင်း ခုနက ဆိုနေတဲ့ သီချင်းက၊ လျိုထျန်းဝမ်ရဲ့ သီချင်းသစ်လား”

“ဟုတ်တယ်လေ၊ တော်တော်လေး စိတ်ဝင်စားဖို့ ကောင်းတယ်။ ကျွန်တော်လည်း တမင်သက်သက် သင်ထားတာ မဟုတ်ပါဘူး၊ ဒါပေမဲ့ အခု လမ်းမကြီးတွေ လမ်းသွယ်လေးတွေ အကုန်လုံးမှာ ဒီသီချင်းကို ဖွင့်နေကြတော့ မတတ်ချင်ရင်တောင် မရတော့ဘူး။ ဖုန်းခေါ်လိုက်ရင်လည်း Caller Ringtoneတွေက အဲဒီသီချင်းချည်းပဲ။ မန်နေဂျာဖုန်း၊ ခင်ဗျားက အတွေ့အကြုံ ဗဟုသုတ များတယ်ဆိုတော့၊ ဟောင်ကောင်ဘက်မှာလည်း ဒီလိုသီချင်းမျိုး ဆိုတာ ခေတ်စားနေတာလား ဟင်”

“အာ... အင်း၊ အခုက ဒီလို ဆိုတာ ခေတ်စားနေတာ။ နောက်ဆိုရင် မင်း သတိထားမိလာလိမ့်မယ်၊ မင်း တစ်ခါမှ မသင်ဖူးတဲ့ သီချင်းတွေ အများကြီးကို၊ ပါးစပ်ဟလိုက်တာနဲ့ တန်းဆိုတတ်နေတာမျိုးတွေ ရှိလာလိမ့်မယ်”

ဖုန်းယွီက စိတ်ထဲတွင် ပြောလိုက်လေသည်၊ မင်းက ပန်းခြံထဲက အကတွေရဲ့ ဆေးကြောမှုကို မခံရသေးလို့ပါ။ အဲဒီအချိန်ကျရင် လမ်းမကြီးတွေ လမ်းသွယ်လေးတွေ အကုန်လုံးမှာ သီချင်းနည်းနည်းလေးကိုပဲ အမြဲတမ်း ဖွင့်နေကြမှာ။ သုံးရက်လောက်အတွင်းမှာကို တစ်နိုင်ငံလုံး အနှံ့ နာမည်ကြီးသွားလိမ့်မယ်။

လူအများအပြားက ထိုကဲ့သို့သော သီချင်းမျိုးကို ဦးနှောက်ဆေးသည့် သီချင်းဟု ခေါ်ဆိုကြပြီး၊ မသိမသာဖြင့် နတ်ဆိုးအသံ၏ ဦးနှောက်ဆေးခြင်းကို ခံလိုက်ရခြင်းပင် ဖြစ်လေသည်။

သေချာသည်မှာ ပညာရှင်ဆိုသူများကလည်း ခုန်ထွက်လာကြပြီး၊ ဤသည်မှာ ယဉ်ကျေးမှုနှင့ ဂီတ၏ နောက်ကြောင်းပြန်လှည့်မှုဖြစ်ကြောင်း၊ တားမြစ်သင့်ကြောင်း စသည်ဖြင့် အကြီးအကျယ် ရင်နာနာဖြင့် ပြောဆိုကြပေလိမ့်မည်။

ဖုန်းယွီ၏ ကိုယ်ပိုင် အမြင်အရဆိုလျှင်မူ၊ ဂီတဆိုသည်မှာ လူများထံသို့ စိတ်ခံစားမှုများကို ထုတ်ဖော်ပေါက်ကွဲစေနိုင်သော အရာတစ်ခုကို ယူဆောင်လာပေးခြင်းဖြစ်ပြီး၊ နိုင်ငံတော်ကို ချီးကျူးဂုဏ်ပြုသော သီချင်းမျိုးလည်း ဖြစ်နိုင်သလို၊ ယောက်ျားလေးနှင့် မိန်းကလေးကြားရှိ သံယောဇဉ်ကို သီဆိုသော သီချင်းမျိုးလည်း ဖြစ်နိုင်ကာ၊ အမှားအမှန် ဟူ၍ မရှိပေ။

လူအများ၏ တူညီသော ခံစားချက်ကို လှုံ့ဆော်ပေးနိုင်ပြီး ဥပဒေကိုလည်း မချိုးဖောက်သရွေ့၊ ၎င်းကို တားမြစ်ပိတ်ပင်ရန် မလိုအပ်ပေ။

ပါးစပ်ဟလိုက်သည်နှင့် ‘ငါတို့ရဲ့ လှေပြိုင်လေးကို လှော်ခတ်ကြစို့’ ကဲ့သို့သော သီချင်းမျိုးကို သီဆိုမှသာ ယဉ်ကျေးမှု၏ တိုးတက်မှုဟု ခေါ်ဆိုရမည်လား။

အတွင်းရေးမှူးကျောက်သည် ဖုန်းယွီပြောသော စကားများ၏ အဓိပ္ပာယ်ကို နားမလည်ဘဲ၊ အလွန်တရာ ဇဝေဇဝါ ဖြစ်နေလေသည်။ သို့သော် မန်နေဂျာဖုန်းက တကယ်ပဲ နားလည်ရခက်လောက်အောင် နက်နဲလွန်းသည်ဟု ထင်မြင်မိလေသည်။

ဖုန်းယွီက ကားပါကင်သို့ ရောက်ရှိသွားသောအခါ၊ ယာဉ်မောင်းမှာ ကားဘေးတွင် ရပ်၍ ဆေးလိပ်သောက်နေသည်ကို မြင်တွေ့လိုက်ရပြီး၊ ပါးစပ်မှ ညည်းနေသည်မှာလည်း... ‘ငါတို့ရွာက လူတွေ’ ပင် ဖြစ်နေလေသည်။

ဖုန်းယွီလျှောက်လာသည်ကို မြင်သောအခါ၊ ယာဉ်မောင်းက အလျင်အမြန် ဆေးလိပ်ကို ငြိမ်းသတ်လိုက်ပြီးနောက်၊ ပီကေတစ်ခုကို ပါးစပ်ထဲသို့ ပစ်သွင်းလိုက်ကာ၊ တစ်ချိန်တည်းမှာပင် ခပ်သုတ်သုတ် ပြေးသွား၍ ကားတံခါးကို ဖွင့်ပေးလိုက်လေသည်။ “သူဌေး မင်္ဂလာပါ”

ဖုန်းယွီက ခေါင်းညိတ်၍ ကားပေါ်သို့ တက်လိုက်ပြီး “အရမ်း တိတ်ဆိတ်လွန်းနေတယ်၊ သီချင်းတစ်ပုဒ်လောက် ဖွင့်ပါဦး”

“ဟုတ်ကဲ့”

ထို့နောက် ဖုန်းယွီသည် ရင်းနှီးကျွမ်းဝင်နေသော တေးသွားကို ကြားလိုက်ရလေသည်၊ ဘာဖြစ်လို့ ဒီသီချင်းပဲ ဖြစ်နေရတာလဲ။

“ရေဒီယိုလိုင်း ပြောင်းလိုက်ပါ”

ယာဉ်မောင်းမှာ သူဌေးက ဘာဖြစ်လို့ ရုတ်တရက် စိတ်ပြောင်းသွားသည်ကို မသိရှိသော်ငြားလည်း၊ ရေဒီယိုလိုင်းသို့ ပြောင်းပေးလိုက်လေသည်။

“...ရွာလေးထဲမှာ ကိစ္စတွေ အများကြီး အများကြီး ဖြစ်ပျက်ခဲ့ဖူးတယ်၊ ပြန်တွေးကြည့်ရင် အဲ့ဒါတွေက အရမ်းကို ရယ်စရာကောင်းပါတယ်...”

ဖုန်းယွီ”......”

ထားလိုက်ပါတော့၊ ဒီဟာပဲ နားထောင်လိုက်ပါတော့မယ်။ ကြည့်ရတာ ဒီသီချင်းက တကယ်ပဲ အချိန်တိုလေး အတွင်းမှာကို တစ်နိုင်ငံလုံး အနှံ့ နာမည်ကြီးသွားတာပဲ။

တကယ်တမ်းတွင် ဤအရာက Sohu ရုပ်သံလိုင်းနှင့်လည်း သက်ဆိုင်လေသည်။ ထိုဗီဒီယိုကို အင်တာနက်ပေါ်တွင် တင်လိုက်ပြီး၊ အဖွဲ့ဝင်များ ကြည့်ရှုခွင့်ပြုလိုက်သောအခါ၊ လျိုထျန်းဝမ်၏ ဖျော်ဖြေပွဲကို ကိုယ်တိုင် သွားရောက် မကြည့်ရှုနိုင်ခဲ့ကြသော ပရိသတ် အများအပြားမှာ ဤဗီဒီယိုအတွက် အဖွဲ့ဝင်ဝင်ခဲ့ကြလေသည်။

သူတို့အားလုံးက ထျန်းဝမ်၏ သီချင်းသစ်မှာ အတိအကျ ဘာသီချင်း ဖြစ်သည်ကို နားထောင်ချင်ခဲ့ကြသော်လည်း၊ မည်သူကမျှ ဤကဲ့သို့ ဖြစ်နေလိမ့်မည်ဟု ထင်မှတ်မထားခဲ့ကြပေ။ ထို့အပြင် ဤအစိတ်အပိုင်းလေးကို အင်တာနက် အသုံးပြုသူများ အခမဲ့ ကြည့်ရှုနိုင်ရန် တမင်သက်သက် ဖြတ်တောက်၍ တင်ပေးထားသေးလေသည်။

အစပိုင်းတွင် သူတို့ အားလုံးက အလွန်တရာ စိတ်ပျက်ခဲ့ကြလေသည်။ လျိုထျန်းဝမ်က ဘယ်လိုလုပ်ပြီး ဒီလို သီချင်းမျိုးကို ဆိုနိုင်ရတာလဲ။

သို့သော် ညဘက် အိပ်ရာဝင်ချိန်တွင်မူ၊ စိတ်ထဲတွင် ထိုတေးသွားလေးက တဝဲလည်လည် ဖြစ်နေပြီး၊ ဘယ်လိုမှ မေ့ပစ်လို့ မရနိုင်သကဲ့သို့ ဖြစ်နေလေသည်။

ထို့နောက် ဘာလုပ်နေသည်ကိုပင် သတိမထားမိဘဲ၊ ပါးစပ်မှ အလိုအလျောက် လိုက်ညည်းမိလာကြလေသည်။

လျိုထျန်းဝမ်သည် ဤသီချင်းအတွက် သီးသန့် အယ်လ်ဘမ်တစ်ခုကို ထုတ်ဝေခဲ့ခြင်း မရှိဘဲ၊ သီချင်းတစ်ပုဒ်တည်းပါသော EP(Extended Play) တစ်ခုကိုသာ ဖြန့်ချိခဲ့သော်လည်း၊ မမျှော်လင့်ဘဲ အလွန်တရာ ရောင်းကောင်းနေခဲ့လေသည်။

Aihua ဂီတ၊ Baidu ဂီတ၊ QQ ဂီတ စသည့် တရားဝင် MP3 ဒေါင်းလုဒ် ပြုလုပ်ခွင့် ပေးထားသော ဝက်ဘ်ဆိုက်များတွင်လည်း၊ ဒေါင်းလုဒ် ပြုလုပ်သည့် အရေအတွက်မှာ အရှိန်အဟုန်ဖြင့် တိုးတက်လာခဲ့ပြီး၊ မျက်စိတစ်မှိတ်အတွင်း ထိပ်ဆုံးဆယ်ခု စာရင်းသို့ ဝင်ရောက်သွားကာ၊ ဆက်လက်၍လည်း လျင်မြန်စွာ မြင့်တက်နေဆဲ ဖြစ်လေသည်။

ဖုန်းယွီအိမ်သို့ ပြန်ရောက်သောအခါ၊ လီနကလည်း ဤသီချင်းကို ညည်းနေသည်ကို ကြားလိုက်ရပြန်လေသည်။

“မိန်းမ၊ မင်းက ဒီသီချင်းကို နားထောင်လို့ မကောင်းဘူးဆို။ အခုကျတော့ ဘာဖြစ်လို့ ဆိုတတ်နေပြီလဲ။ ဘယ်နှရက်မှတောင် မရှိသေးဘူးလေ” ဖုန်းယွီက မနေနိုင်တော့ဘဲ မေးလိုက်လေသည်။

“အာ... ဘာလဲ၊ ကျွန်မက ဒီအတိုင်း ဖြစ်သလို လျှောက်ညည်းနေတာပါ”

သာမန်လူများအနေဖြင့် ဖြစ်သလို ညည်းလေ့ရှိသော သီချင်းများမှာ၊ အများအားဖြင့် မိမိတို့ အနှစ်သက်ဆုံး သို့မဟုတ် အရင်းနှီးဆုံး သီချင်းများသာ ဖြစ်လေ့ရှိရာ၊ ကြည့်ရသည်မှာ ဤသီချင်းက တကယ်ကို နာမည်ကြီးသွားပြီ ဖြစ်လေသည်။

ဖုန်းယွီက စာကြည့်ခန်းထဲသို့ သွားရောက်ကာ၊ ကွန်ပျူတာကို ဖွင့်လိုက်လေသည်။

လျိုထျန်းဝမ်၏ Tie Baတွင် အားလုံးက ဤသီချင်းအကြောင်းကိုသာ ပြောဆိုနေကြပြီး၊ လူအများအပြားက လျိုထျန်းဝမ်က ဤသို့သော သီချင်းမျိုး သီဆိုလိမ့်မည်ဟု ထင်မထားခဲ့သော်ငြားလည်း၊ တကယ်တမ်း နားထောင်လို့ ကောင်းပါတယ် ဟု ပြောဆိုနေကြလေသည်။

အချို့သော ဝက်ဘ်ဆိုက်များရှိ သတင်းများတွင်လည်း၊ ဤသီချင်းနှင့် ပတ်သက်သည့် အကြောင်းအရာများ အများအပြား ရှိနေလေသည်။

ဖုန်းယွီက တစ်ခုကို ဖြစ်သလို နှိပ်ကြည့်လိုက်ရာ၊ ၎င်းမှာ လမ်းသွားလမ်းလာများကို အင်တာဗျူး လုပ်ထားခြင်းပင် ဖြစ်လေသည်။

[လျိုထျန်းဝမ်ရဲ့ သီချင်းသစ် ‘ငါတို့ရွာက လူတွေ’ကို ခင်ဗျား နားထောင်ဖူးပါသလား ခင်ဗျာ။]

[နားထောင်ဖူးတာပေါ့၊ ကျွန်တော်တောင် ဆိုတတ်သေးတယ်၊ ကျွန်တော်တို့ အဆောင်က သူငယ်ချင်းတွေ အကုန်လုံး ဆိုတတ်ကြတယ်။]

[ဒါဆိုရင် နားထောင်ပြီးသွားတဲ့ အခါကျတော့ ခင်ဗျား ဘယ်လို ခံစားရလဲ။]

[ခံစားချက်လား၊ သိပ်ပြီးတော့ ထူးခြားတဲ့ ခံစားချက်တော့ မရှိပါဘူး။ ဒီသီချင်းရဲ့ စာသားတွေက အရမ်းကောင်းတယ်လို့ ထင်တယ်၊ အင်တာနက်က စကားနဲ့ ပြောရရင်တော့ လူထုနဲ့ ရင်းနှီးကျွမ်းဝင်မှုရှိတယ်ပေါ့။ အရင်က ကွမ်တုန်း သီချင်းတွေကို၊ ကျွန်တော်တို့က လုံးဝ နားမလည်ခဲ့ဘူးလေ။]

[ဒါဆိုရင် ဒီသီချင်းရဲ့ မန်ဒရင်း ဗားရှင်း ထွက်လာပြီဆိုတာကိုရော ခင်ဗျား သိပြီးပြီလား။]

[မန်ဒရင်း ဗားရှင်း။ လျိုထျန်းဝမ်ပဲ ဆိုတာလား။ ကျွန်တော် သွားပြီး ဒေါင်းလုဒ် လုပ်ရမယ်။]

ဟင်။ အခုကတည်းက မန်ဒရင်း ဗားရှင်းကို ကြော်ငြာနေပြီလား။ ဒါဆိုရင် ဦးလေးဘန်ရှန်းရဲ့ ရုပ်သံဇာတ်လမ်းတွဲကို စတင်ပြသတော့မှာပေါ့။

သို့သော် လျိုထျန်းဝမ်၏ ထိုပရိသတ်များကသာ ဤသီချင်းသည် တကယ်တမ်းတွင် ဖုန်းယွီက ဦးလေးဘန်ရှန်းအတွက် ရေးပေးခဲ့ခြင်းဖြစ်ပြီး၊ လျိုထျန်းဝမ်အား ပေးလိုက်ခြင်းမှာ စိတ်ဝင်စားစရာ ကောင်းသည်ဟု ထင်မြင်သောကြောင့်သာ ဖြစ်ကြောင်းကို သိရှိသွားမည်ဆိုပါက၊ မည်သို့ တွေးတောကြမည်ကိုတော့ မသိပေ။

ဤသတင်းများမှတစ်ဆင့် ဖုန်းယွီသည် သွယ်ဝိုက်သော ကြော်ငြာများ၏ အဓိပ္ပာယ်ကို နားလည်သွားခဲ့လေသည်။ ကြည့်ရသည်မှာ ဤအရာများ အားလုံးက သတင်းများ ဖြစ်ပုံရသော်ငြားလည်း၊ တကယ်တမ်းတွင် အားလုံးက ရုပ်ရှင်ဇာတ်လမ်းတွဲများ၊ သီချင်းများ သို့မဟုတ် လှုပ်ရှားမှု တစ်ခုခုကို ကြော်ငြာရန်အတွက်သာ ဖြစ်လေသည်။

ဥပမာအားဖြင့် လျိုထျန်းဝမ်၏ ဤသတင်းများ အများစုမှာ၊ A Battle of Witsဇာတ်ကားကို ကြော်ငြာနေခြင်းဖြစ်ပြီး၊ ထိုအထဲတွင် ‘Crazy Stone’ ဇာတ်ကားကို ကြော်ငြာနေသည်များလည်း အချို့ ပါဝင်လေသည်။ ဖျော်ဖြေရေး သတင်းများဆိုသည်မှာ မူလကတည်းက ဤကဲ့သို့ပင် ဖြစ်ပြီး၊ သို့မဟုတ်ပါက ထိုလူများက သတင်းထဲ ပါလာအောင် အလုအယက် ကြိုးစားကြမည် မဟုတ်ပေ။

လူများ၏ အာရုံစိုက်မှုကို ခံရခြင်းမှာ ကောင်းမွန်သော ကိစ္စရပ်တစ်ခု ဖြစ်သော်ငြားလည်း၊ လွန်ကဲစွာ အာရုံစိုက်ခံရပါကလည်း အလွန် စိတ်အနှောင့်အယှက် ဖြစ်ရမည်သာ ဖြစ်သည်။ အကယ်၍ အလုပ်က ကိုယ်ပိုင်ဘဝကို နှောင့်ယှက်လာပြီး၊ ကြယ်ပွင့်များကို ကိုယ်ပိုင်ဘဝ လုံးဝမရှိတော့သကဲ့သို့ ဖြစ်သွားစေမည်ဆိုပါက၊ လူအများအပြားမှာ 'ငါ ဘာဖြစ်လို့ ဒီလောက်တောင် နာမည်ကြီးနေရတာလဲ' ဟု နောင်တရကြပေလိမ့်မည်။

ဖုန်းယွီသည် အင်တာနက်ပေါ်တွင် သတင်းများကို ဖတ်ရှုနေစဉ်၊ ရုတ်တရက် စိတ်ဝင်စားစရာကောင်းသော သတင်းတစ်ပုဒ်ကို မြင်တွေ့လိုက်ရလေသည်။

......

******