အခန်း ၁၅၇၅

အခန်း ၁၅၇၅ ပူးပေါင်းပြီး လေယာဉ် ထုတ်လုပ်မလို့လား

ဖုန်းယွီက ပါးစပ်ထဲသို့ ယိုစုံတစ်ခုကို ပစ်ထည့်လိုက်ပြီး၊ မျက်နှာတစ်ခုလုံးတွင် အရသာခံနေသည့် အမူအရာမျိုးဖြင့် ရှိနေလေသည်။ ဤယိုစုံမျိုးသည် ယခင်က ရှရှားဘုရင် မိသားစုများအတွက်သာ သီးသန့ ပြုလုပ်ပေးရသည်ဟု ကြားသိရလေသည်။

“ညီလေးကီ၊ မင်း ငါ့ကို ဒီခေါ်လိုက်တာက၊ ဒီကိစ္စလေးတစ်ခုတည်းကြောင့်တော့ မဖြစ်နိုင်ဘူး မလား”

ဒီကိစ္စက ဖုန်းထဲကနေ ပြောလို့မရတဲ့ အရာ ဘာရှိလို့လဲ။ တကယ်တမ်းကျတော့ ဒီကိစ္စကြောင့် ဖုန်းယွီက အများကြီး ဆုံးရှုံးသွားမှာ မဟုတ်ပါဘူး၊ အဓိကက ကီရီလန်ကို ပဲ အမြတ်နည်းနည်း လျော့သွားမှာပါ။

ကီရီလန်ကိုက ခန္ဓာကိုယ်ကို မတ်မတ် ထိုင်လိုက်ပြီး “ဖုန်း သေချာပေါက် ဒီကိစ္စတစ်ခုတည်းကြောင့်တော့ မဟုတ်ပါဘူး။ ငါ မေးချင်တာက၊ မင်း လေယာဉ်ထုတ်လုပ်ဖို့ စိတ်ဝင်စားလား”

ဖုန်းယွီ၏ဝါးနေသော လှုပ်ရှားမှုမှာ ရပ်တန့်သွားခဲ့ပြီး၊ ပါးစပ်ထဲရှိ ယိုစုံကို ခက်ခဲပင်ပန်းစွာဖြင့် မျိုချလိုက်ကာ “ညီလေးကီ၊ ခင်ဗျား ဘာပြောလိုက်တာလဲ”

“လေယာဉ် ထုတ်လုပ်မယ်လေ။ မင်းက မင်းတို့ဇာတိက အဲဒီလေယာဉ်ထုတ်လုပ်ရေး စက်ရုံနဲ့ ဆက်ဆံရေး မဆိုးဘူး မဟုတ်လား။ ငါတို့တွေ အသီးသီး အဖွဲ့တစ်ခုစီ ဖွဲ့ပြီးတော့၊ ဖက်စပ်လုပ်ငန်းအနေနဲ့ စီးပွားဖြစ်သုံး လေယာဉ်တွေ ထုတ်လုပ်ရင် ဘယ်လိုနေမလဲ။ ငါ လူလွှတ်ပြီး ဈေးကွက် သုတေသန လုပ်ကြည့်ပြီးပြီ၊ နှစ်စဉ် လေယာဉ်ကြီး ဈေးကွက်က ဝယ်လိုအားက ရောင်းလိုအားထက် ပိုများနေတာချည်းပဲ၊ မင်း Boeing နဲ့ Airbus ကို ကြည့်ကြည့်လေ၊ တစ်နှစ်ကို အမြတ် ဘယ်လောက်ရလဲဆိုတာ”

“ငါတို့က လောလောဆယ် သူတို့ကို ကျော်တက်ဖို့ မတောင်းဆိုသေးဘူး၊ သူတို့ဆီကနေ ဈေးကွက်ဝေစု ဆယ်ရာခိုင်နှုန်းစီလောက် လုယူနိုင်ရင်ကို၊ အမြတ်ကြီးကြီး ရဖို့ လုံလောက်နေပြီ။ ပြီးတော့ ဒါက ရေရှည် စီးပွားရေးတစ်ခုပဲ၊ အနည်းဆုံး အနှစ်သုံးဆယ် ငါးဆယ်လောက်တော့ သေချာပေါက် တိုးတက်နေမှာပဲ”

“တခြားဟာတွေ အများကြီး မပြောတော့ဘူး၊ တရုတ်နဲ့ အရှေ့ဥရောပရဲ့ ဈေးကွက်ကို ဖမ်းဆုပ်နိုင်ရုံနဲ့တင်၊ ငါတို့ အများကြီး အမြတ်ရနိုင်တယ်၊ တကယ်လို့ တခြားဒေသတွေရဲ့ ဈေးကွက်ကိုပါ ထပ်ပြီး ဖော်ဆောင်နိုင်မယ်ဆိုရင်၊ အနာဂတ်မှာ ငါတို့က Boeingနဲ့ Airbus ကိုတောင် မကျော်တက်နိုင်ဘူးလို့ ပြောလို့မရဘူး”

ကီရီလန်ကိုမှာ အလွန်တရာ စိတ်လှုပ်ရှားနေလေသည်။ သူက ဤသို့သော စီးပွားရေးကောင်းတစ်ခုကို တွေးမိရန်မှာ အလွန် ခက်ခဲလှပေသည်။

ယခင်က ဖုန်းယွီကသာ စီးပွားရေးကောင်းများ ရှိသည့်အခါ သူ့အား ခေါ်ဆောင်သွားလေ့ရှိပြီး၊ နောက်ဆုံးတော့ သူလည်း ဖုန်းယွီအား တစ်ကြိမ်လောက် ပြန်လည် ခေါ်ဆောင်သွားနိုင်ပြီ ဖြစ်လေသည်။

“ညီလေးကီ၊ မင်း ငါ့ကို နောက်နေတာ မဟုတ်ဘူးမလား။ မင်းက လေယာဉ်ကြီးတွေရဲ့ အဓိက နည်းပညာတွေကို ရနိုင်လို့လား။ အဓိက အင်ဂျင်နီယာတွေကိုရော ခေါ်လာနိုင်လို့လား”

ရုရှားဘက်က လေယာဉ်ကြီး ထုတ်လုပ်ရေး စက်ရုံတွေကလည်း နိုင်ငံပိုင် စီးပွားရေးလုပ်ငန်းတွေချည်းပဲလို့ ဖုန်းယွီဘယ်လို မှတ်မိနေပါလိမ့်။ ပြီးတော့ တရုတ်လိုပဲ စစ်ဘက်နဲ့ အရပ်ဘက် ပေါင်းစပ်ထားတဲ့လုပ်ငန်းတွေပဲ၊ ကီရီလန်ကိုက အဲဒါကို သီးသန့် အရပ်ဘက်သုံးအဖြစ် ပြောင်းလဲပစ်နိုင်လို့လား။

ဒီကိစ္စကို ပူတင်က သဘောတူနိုင်လို့လား။

ဒါက ငွေကြေးကိစ္စ မဟုတ်ဘူး၊ အများကြီး သက်ဆိုင်မှု ရှိတယ်။ ရုရှားရဲ့ နိုင်ငံရေး အခြေအနေကလည်း၊ ဥရောပနဲ့ အမေရိကဘက်နဲ့ မတူညီဘူး၊ စီးပွားရေးသမားနဲ့ နိုင်ငံရေးသမား ကြားက အဆင့်အတန်းဆိုတာ အဲ့ဒီလောက် လွယ်လွယ်ကူကူနဲ့ ပြောင်းလဲလို့ ရတာမဟုတ်ဘူး။

ပြီးတော့ Boeingစတဲ့ ကုမ္ပဏီတွေကို ကြည့်လိုက်၊ သူတို့က ဘယ်အချိန်ကတည်းက တည်ထောင်ခဲ့တာလဲ။ ပြီးတော့ ကုမ္ပဏီရဲ့ အစုရှယ်ယာရှင်တွေကလည်း စောစောစီးစီးကတည်းက အမြစ်တွယ်နေပြီဖြစ်ပြီး၊ အဲဒီလောက် လွယ်လွယ်ကူကူနဲ့ လှုပ်ခါလို့ ရတာမဟုတ်ဘူး။

နိုင်ငံရဲ့ အခြေအနေတွေ မတူညီတာကို၊ ဒါကို သွားပြီး အတုခိုးလို့ ရနိုင်ပါ့မလား။

ကီရီလန်ကိုက ပြုံးလိုက်ပြီး “ဖုန်း ကြည့်ရတာ တချို့ကိစ္စတွေကို မင်း သေချာ မသိသေးဘူးနဲ့ တူတယ်။ ငါတို့ ရုရှားက မင်းတို့ တရုတ်နဲ့ ပူးပေါင်းပြီး၊ စီးပွားဖြစ်သုံး လေယာဉ်ကြီး စီမံကိန်းကို အကောင်အထည်ဖော်မယ်ဆိုတာ မင်း မသိဘူးလား”

ဖုန်းယွီ၏ မျက်နှာတစ်ခုလုံး ဇဝေဇဝါ ဖြစ်သွားပြီး၊ ဤကိစ္စက သူနှင့် ဘာပတ်သက်မှု ရှိသနည်း။ ဖုန်းယွီသည် နည်းပညာများလည်း လှူဒါန်းခဲ့ပြီးပြီ၊ ငွေကြေးများလည်း လှူဒါန်းခဲ့ပြီးပြီဖြစ်ကာ၊ ကီရီလန်ကိုက လက်ဆောင်ပေးထားသော သမ္မတအဆင့် ကိုယ်ပိုင်လေယာဉ်ကိုပင် တစ်ဖက်လူအား ဖြုတ်ချ၍ အချိန်အတိုင်းအတာ တစ်ခုအထိ သုတေသန ပြုလုပ်ခွင့် ပေးခဲ့သေးရာ၊ သူ့အား မည်သို့ ကူညီစေချင်သေးသနည်း။

အချို့သော နည်းပညာများကို ငွေကြေးဖြင့် ဝယ်ယူ၍ မရနိုင်ပေ။ ဥပမာ Baidu၊ Google စသည့် Search Engine များ၏ အဓိက နည်းပညာများကို မင်းက ငွေပေးလျှင်တောင် သူတို့က ရောင်းမည်မဟုတ်ပေ။

သေချာသည်မှာ အကယ်၍ မင်းက မိုက်မဲစွာဖြင့် ကောင်းကင်တမျှ မြင့်မားသော ဈေးနှုန်းကို ပေးမည်ဆိုပါကလည်း၊ မဖြစ်နိုင်သည်တော့ မဟုတ်ပေ။ သို့သော် ထိုသို့ဆိုလျှင် လုံးဝတွက်ခြေကိုက်မည် မဟုတ်ပေ။ ထိုသို့လုပ်ခြင်းက ရင်းနှီးမြှုပ်နှံပြီး ငွေရှာခြင်း မဟုတ်တော့ဘဲ၊ ငွေတွေကို ရေထဲပစ်ချပြီး ကစားနေခြင်းသာ ဖြစ်လေသည်။

ကီရီလန်ကို၏ မျက်နှာထား အနည်းငယ် ပြောင်းလဲသွားပြီး “ဖုန်း ဒါဆိုရင် သူတို့ လာရှာတာက တကယ်ပဲ မင်းကို မဟုတ်တာလား”

ဖုန်းယွီက လက်ကာပြလိုက်ပြီး “နေပါဦး၊ မင်း အတိအကျ ဘာတွေ ပြောနေတာလဲ။ ငါ့ကို လာရှာတယ်ဆိုတာ ဘာကို ပြောတာလဲ”

ကီရီလန်ကိုက ဖုန်းယွီအား ရှင်းပြလိုက်ရာ၊ တကယ်တမ်းတွင် တရုတ်သည် ရုရှားနှင့်စီးပွားဖြစ်သုံး လေယာဉ်များ ပူးပေါင်းထုတ်လုပ်ရေးအတွက် ဆွေးနွေးမှုများကို စတင်ပြုလုပ်နေပြီဖြစ်ကြောင်း သိရှိလိုက်ရလေသည်။ ဤအကြံအစည်ကို တရုတ်က စောစောစီးစီးကတည်းက အဆိုပြုခဲ့ဖူးသော်ငြားလည်း၊ ယခင်က တရုတ်၏နည်းပညာ စွမ်းဆောင်ရည်ဖြင့် ရုရှားနှင့် ပူးပေါင်းရန်မှာ၊ ရုရှားဘက်က သဘောတူမည် မဟုတ်ပေ။

သို့သော် ဖုန်းယွီက ထိုနည်းပညာများကို နိုင်ငံတော်သို့ ပေးအပ်ခဲ့ပြီးနောက် သူတို့ကို သေချာစွာ လေ့လာနားလည်ပြီး အဆင့်မြှင့်တင်မှုများ ပြုလုပ်ပြီးနောက်တွင်မူ၊ တရုတ်သည် လေယာဉ် အီလက်ထရောနစ်စနစ်တွင် အောင်မြင်မှုများ ရရှိလာခဲ့ပြီး၊ ကမ္ဘာ့အဆင့်မီ လေယာဉ်ပေါ်ပါ အီလက်ထရောနစ် စနစ်ကို သုတေသနပြု ထုတ်လုပ်နိုင်ခဲ့လေရာ၊ ဤအပိုင်းသည် ရုရှားအတွက် အားအနည်းဆုံး အပိုင်းများထဲမှ တစ်ခု ဖြစ်လေသည်။

သေချာသည်မှာ ရုရှားတွင် အားနည်းသော အပိုင်းများ အများအပြား ရှိနေသေးသော်ငြားလည်း၊ အဓိက အင်ဂျင် နည်းပညာအပိုင်းတွင်မူ ကမ္ဘာ့ရှေ့တန်းတွင် ရှိနေသည်မှာ အမှန်ပင် ဖြစ်လေသည်။

မနှစ်က တရုတ်သည် ရုရှားထံသို့ လူစေလွှတ်၍ ဆက်သွယ်ခဲ့ပြီး၊ နှစ်ဦးနှစ်ဖက် ဆွေးနွေးတိုင်ပင်ခဲ့ကြကာ၊ စီးပွားဖြစ်သုံး လေယာဉ်ကြီး ဈေးကွက်၏ ဖွံ့ဖြိုးတိုးတက်မှုမှာ ပို၍ပို၍ ကောင်းမွန်လာမည်ဟု ယူဆခဲ့ကြပြီး၊ ကမ္ဘာ့နိုင်ငံကြီးများ၊ အင်အားကြီး နိုင်ငံများအနေဖြင့် ဤအရာများကို သေချာပေါက် ကိုယ်တိုင် ထုတ်လုပ်ရမည်ဟု ဆုံးဖြတ်ခဲ့ကြလေသည်။

နှစ်ဦးနှစ်ဖက်သည် နည်းပညာပိုင်းဆိုင်ရာ ပူးပေါင်းဆောင်ရွက်မှုများ ပြုလုပ်ရန် သဘောတူညီခဲ့ကြသည်။ ထို့နောက် နှစ်ဦးနှစ်ဖက်၏ အရောင်းလမ်းကြောင်းများကို အသုံးပြု၍ တွန်းအားပေး ရောင်းချသွားရန်ဖြစ်ကာ၊ ဤကိစ္စကို ကီရီလန်ကိုက သိရှိသွားသောအခါ သူက လှုပ်ရှားမှု အချို့ ပြုလုပ်ခဲ့လေသည်။

သီးသန့် ပုဂ္ဂလိကပိုင်အနေဖြင့် လုံးဝ မဖြစ်နိုင်သော်ငြားလည်း၊ အစိုးရနှင့် ပုဂ္ဂလိက ဖက်စပ်လုပ်ငန်းအနေဖြင့်မူ ပြဿနာ မရှိနိုင်သကဲ့သို့၊ အရောင်းပိုင်းတွင်လည်း ပို၍ ပြောင်းလွယ်ပြင်လွယ် ရှိနိုင်ပေသည်။ ထို့အပြင် ဤကဏ္ဍတွင် လိုအပ်သော ရင်းနှီးမြှုပ်နှံမှု ပမာဏမှာ အတော်လေး ကြီးမားလှပေသည်။ ရုရှား၏ စီးပွားရေး အခြေအနေမှာလည်း အထူးတလည် ကောင်းမွန်နေသည်မျိုး မဟုတ်ပေ။

လေယာဉ်ထုတ်လုပ်ရေး စက်ရုံအသစ်အတွက် ငွေကြေးအမြောက်အမြား ရင်းနှီးမြှုပ်နှံရမည် ဖြစ်သည့်အပြင်၊ ထိုစက်ရုံအသစ်ကို မဖြစ်မနေ အသုံးပြုကာ မူလစက်ရုံများနှင့်လည်း သီးခြားခွဲထုတ်ထားရန် လိုအပ်လေသည်။ ဤအခြေအနေများကပင် ကီရီလန်ကိုအား အခွင့်အရေးကောင်းတစ်ခုကို ရှာတွေ့သွားစေခဲ့ခြင်း ဖြစ်တော့သည်။

သူက ဝင်ပါချင်စိတ် ပေါ်လာပြီး၊ ငွေတစ်တန် ရင်းနှီးမြှုပ်နှံကာ ဤကုမ္ပဏီတွင် အစုရှယ်ယာ အနည်းငယ် ပိုင်ဆိုင်ထားချင်ပြီး၊ အနာဂတ်တွင် သေချာပေါက် ပို၍ ငွေရှာနိုင်မည် ဖြစ်လေသည်။ သေချာသည်မှာ ရုရှားဘက် တစ်ဖက်တည်းတွင်သာ ပုဂ္ဂလိက ရင်းနှီးမြှုပ်နှံမှု ရှိနေ၍ လုံးဝ မဖြစ်နိုင်ဘဲ၊ တရုတ်ဘက်တွင်လည်း သေချာပေါက် ရှိနေမှသာ ရမည် ဖြစ်လေသည်။

ဖုန်းယွီက ကီရီလန်ကိုကို ကြည့်ကာ အားကိုးရာမဲ့စွာဖြင့် ပြောလိုက်လေသည်။ “ညီလေးကီ မင်းက ကိစ္စတွေကို အရမ်း လွယ်လွယ်လေး တွေးနေတာလား။ ပထမဆုံးအနေနဲ့ ဒီအစောပိုင်း ရင်းနှီးမြှုပ်နှံမှုက အရမ်း ကြီးမားပေမဲ့၊ နိုင်ငံကြီး နှစ်နိုင်ငံက တကယ်ပဲ မထုတ်ပေးနိုင်ဘူးလို့ မင်း ထင်နေတာလား”

အစောပိုင်း ရင်းနှီးမြှုပ်နှံမှုက အထူးတလည် မြင့်မားမည်မဟုတ်သည်ကို အရင် မပြောသေးဘဲ၊ အမေရိကန်ဒေါ်လာ ဘီလီယံ တစ်ရာလောက် ဖြစ်နေလျှင်တောင်မှ၊ အမြတ်အစွန်းကို မြင်တွေ့ရမည်ဆိုပါက ထိုနိုင်ငံကြီး နှစ်နိုင်ငံထဲမှ မည်သည့်နိုင်ငံကမဆို ဤငွေကြေးကို သီးသန့် ထုတ်ပေးနိုင်စွမ်း ရှိလေသည်။ ဤအရာတွင် အခက်ခဲဆုံးမှာ နည်းပညာသာဖြစ်ပြီး ငွေကြေး မဟုတ်ပေ။

ရုရှားက မည်မျှပင် ဆင်းရဲသည်ဖြစ်စေ ဤအမေရိကန်ဒေါ်လာ ဘီလီယံ တစ်ရာလောက်ကိုတော့ ကပ်စေးနည်းနေမည် မဟုတ်ပေ။ တရုတ်၏ နှစ်စဉ် GDP မှာလည်း အမေရိကန်ဒေါ်လာ ထရီလီယံ သုံးရာကိုပင် ကျော်လွန်နေပြီဖြစ်ရာ၊ ဤငွေကြေးမှာ များပြားသည် ဆိုသော်ငြားလည်း အလွန်ကြီးမားသော ဖိအားတစ်ရပ်တော့ မဟုတ်ပေ။

ထို့အပြင် ဤသည်မှာ ရေရှည် စီမံကိန်းတစ်ခုဖြစ်ပြီး အနာဂတ်တွင် နိုင်ငံတော်အတွက် ငွေကြေး အများအပြား သက်သာစေနိုင်ရုံသာမက ငွေလည်း ရှာပေးနိုင်ဦးမည်ဖြစ်ရာ၊ ၎င်းတို့က မည်သို့လုပ်၍ ဤငွေကြေးများကို ညှစ်ထုတ်ရန် နည်းလမ်းမရှာဘဲ နေကြမည်နည်း။

“ငါ သိတယ်၊ ဒီလေယာဉ်ထုတ်လုပ်ရေး ကုမ္ပဏီက စီးပွားဖြစ်သုံး လေယာဉ်တွေ ထုတ်လုပ်မှာဆိုတာကို။ ဒါပေမဲ့ မင်း မစဉ်းစားမိဘူးလား၊ ဒီနည်းပညာတွေက စီးပွားဖြစ်သုံး အပိုင်းမှာတင် သုံးလို့ရတာ မဟုတ်ဘူးဆိုတာကို။ ဒီလို စီးပွားရေးမျိုးကို၊ ငါတို့ တကယ် ဝင်ပါသင့်တယ်လို့ ခင်ဗျား ထင်လို့လား”

“မင်းတို့နိုင်ငံရဲ့ အထက်လူကြီးတွေကို မင်း ဘယ်လို ပြောဆိုစည်းရုံးခဲ့တယ်ဆိုတာကို ငါ မသိဘူး၊ ဒါပေမဲ့ ဒီကိစ္စကိုတော့ ငါ ဝင်မပါချင်ဘူး။ ညီလေးကီ၊ ငွေဆိုတာက ရှာလို့မကုန်နိုင်ပါဘူး၊ စီးပွားရေး လုပ်ငန်းတိုင်းကို ကိုယ့်ဆီ အကုန်ဆွဲမသွင်းပါနဲ့” ဖုန်းယွီက ကီရီလန်ကို၏ ပခုံးကို ပုတ်ကာ သတိပေးလိုက်လေသည်။

ကီရီလန်ကို၏ မျက်နှာတစ်ခုလုံးတွင် စိတ်ပျက်သွားသော အမူအရာများ ပေါ်လွင်နေပြီး “ဖုန်း ဒီစီးပွားရေးက ဘယ်လောက်တောင် ငွေရနိုင်လဲဆိုတာကို မင်း မသိလို့တော့ မဟုတ်ပါဘူးနော်။ ငါတို့က ကိုယ်စီ ငွေနည်းနည်းစီ ရင်းနှီးမြှုပ်နှံလိုက်ရုံနဲ့တင်၊ နောက်ဆိုရင် အမြတ်ဝေစု ခွဲယူဖို့ စောင့်နေရုံပဲလေ”

“ညီလေးကီ၊ ဒါကိုတော့ ငါ တကယ် ရင်းနှီးမြှုပ်နှံမှာ မဟုတ်ဘူး။ သေချာပေါက် ငွေရမယ်ဆိုတာကို ငါ သိပါတယ်၊ ဒါပေမဲ့ ဒီလို အရေးကြီးတဲ့ စက်မှုလုပ်ငန်းမျိုးကို၊ ငါတို့နိုင်ငံက ကန့်သတ်ချက်တွေ အတော်လေး များတယ်၊ မင်းတို့ နိုင်ငံမှာ ကန့်သတ်ချက်တွေ မရှိဘူးဆိုတာကို ငါ မယုံဘူး”

ကီရီလန်ကိုမှာ ဆိုဖာပေါ်တွင် အားလျော့စွာ မှီချလိုက်ပြီး “ဟူး… ဒီလောက် ငွေရနိုင်တဲ့ စီးပွားရေးကို၊ ဘာဖြစ်လို့ မလုပ်ရတာလဲကွာ”

တကယ်တမ်းတွင် ၎င်းတို့နိုင်ငံကလည်း သူ့အား ရင်းနှီးမြှုပ်နှံရန် သဘောတူထားခြင်း မရှိပေ။ အကယ်၍ တရုတ်ဘက်မှ ပုဂ္ဂလိက ရင်းနှီးမြှုပ်နှံမှု ရှိလာမည်ဆိုပါက၊ ဤဘက်ကလည်း သဘောတူခွင့်ပြုပေးနိုင်သည်ဟုသာ ပြောဆိုထားခြင်း ဖြစ်လေသည်။ ထို့ကြောင့်သာ ကီရီလန်ကိုသည် ဖုန်းယွီအား ရင်းနှီးမြှုပ်နှံရန် ပြောဆိုစည်းရုံးနိုင်ရေးအတွက် အစွမ်းကုန် ကြိုးစားနေခြင်းဖြစ်ပြီး၊ ထိုသို့ဆိုလျှင် သူလည်း ရင်းနှီးမြှုပ်နှံနိုင်မည် ဖြစ်လေသည်။

ဤအရာက ငွေရနိုင်သည်မှာ မျက်မြင်ကိုယ်တွေ့ပင်ဖြစ်ပြီး၊ ယခုအခါ လေယာဉ်ကြီးများမှာ ဝယ်လိုအားက ရောင်းလိုအားထက် ပိုများနေကာ၊ သူတို့ကသာ ထုတ်လုပ်နိုင်မည်ဆိုပါက ရောင်းစရာမရှိမည်ကို လုံးဝပူပန်နေရန် မလိုအပ်ဘဲ၊ အမြတ်များမည် နည်းမည် ဆိုသည့် ပြဿနာသာ ဖြစ်လေသည်။

သို့သော် ဖုန်းယွီ၏ စိတ်ထဲတွင် လုံးဝစိတ်မဝင်စားမည်ဟု သူ ထင်မှတ်မထားခဲ့ပေ။ ငွေစက္ကူများတွင် အတောင်ပံပေါက်လာပြီး အဝေးသို့ တဖြည်းဖြည်း ပျံသန်းသွားသည်ကို သူ မြင်တွေ့နေရသကဲ့သို့ ခံစားနေရလေသည်။

ဒေါက် ဒေါက် ဒေါက်... စာကြည့်ခန်း တံခါးကို ခေါက်သံ ထွက်ပေါ်လာလေသည်။ ကီရီလန်ကို၏ မျက်မှောင်များ တွန့်ကွေးသွားလေသည်။ သူက ဖုန်းနှင့် စကားပြောနေသည့် အချိန်တွင် ဘယ်သူကများ လာခေါက်ရဲသနည်း။

......

******