အခန်း ၁၅၈၀

အခန်း ၁၅၈၀ မီဒီယာများက အဆိုးမြင်ခြင်း

ဒုတိယနေ့ မနက်စောစောတွင် ပွဲဦးထွက် ရုံတင်ငွေ စာရင်းထွက်ပေါ်လာခဲ့ပြီး ဝမ်ကျုံးကျွင်း၏ ရုံးစားပွဲပေါ်သို့ ရောက်ရှိနေခဲ့သည်။

တစ်သန်းနှစ်သိန်းကိုးသောင်း၊ ဤကိန်းဂဏန်းမှာ စုစုပေါင်း ထုတ်လုပ်မှု ကုန်ကျစရိတ် ယွမ် ခြောက်သန်းနှင့် နှိုင်းယှဉ်ပါက တကယ်တမ်းတွင် နိမ့်ကျသည်ဟု မဆိုနိုင်ပေ။ သို့သော် ဤအချက်အလက်ဖြင့် ယွမ် သန်းငါးဆယ် ရုံတင်ငွေ ရရှိရန် ဆိုသည်မှာ ညဉ့်ပုံပြင် တစ်ပုဒ်ကဲ့သို့ပင် ဖြစ်နေတော့သည်။

ဝမ်ကျုံးကျွင်းက ယခုတစ်ကြိမ် မေလတစ်ရက်နေ့ကို ပြသချိန် သတ်မှတ်ခဲ့ခြင်းမှာ မှားယွင်းသော ဆုံးဖြတ်ချက် တစ်ခု ဖြစ်ပုံရသည်ဟု ခံစားနေရသည်။ မန်နေဂျာဖုန်းသည် စီးပွားရေးတွင် အလွန်ထူးချွန်ပြောင်မြောက်သော်လည်း ရုပ်ရှင်အကြောင်းကိုမူ နားမလည်ပေ။ မည်သည့်နေရာတွင် မေလတစ်ရက်နေ့ ပြသချိန် ဆိုသည့် အခေါ်အဝေါ် ရှိပါသနည်း၊ ဤရုပ်ရှင်ကို ဤသို့ကြည့်ရလျှင် ရုံတင်ငွေ ယွမ် ဆယ်သန်းကျော် ရရှိပါကပင် မဆိုးလှတော့ပေ။

စုစုပေါင်း ရင်းနှီးမြှုပ်နှံမှု ယွမ် ခြောက်သန်းဖြစ်ရာ ရှုံးနိမ့်မည် မဟုတ်သော်လည်း ငွေရှာနိုင်မည်ဟု ပြောရန်မှာမူ အနည်းငယ် ခက်ခဲပေလိမ့်မည်။

လျိုထျန်းဝမ်သည်လည်း ပထမဆုံး အချိန်တွင် ရုပ်ရှင် ရုံတင်ငွေ စာရင်းကို အာရုံစိုက်ခဲ့ပြီး ဤအချက်အလက်ကို ကြားလိုက်ရချိန်တွင် သူလည်း မျက်မှောင်ကြုတ်သွားခဲ့သည်။ ကြော်ငြာစရိတ် ယွမ် သုံးသန်း တိုးမြှင့်ထားခဲ့ပြီး နာမည်ကြီး သရုပ်ဆောင် အများအပြားကလည်း ကူညီ ကြော်ငြာပေးခဲ့ကြသလို သူ ကိုယ်တိုင်လည်း နေရာ အနည်းငယ်သို့ သွားရောက် ကြော်ငြာပေးခဲ့သေးရာ ရလဒ်အနေဖြင့် ပွဲဦးထွက်နေ့တွင် ဤမျှလောက်သာ ရုံတင်ငွေ ရရှိခဲ့သည်လား။

ဤအချက်အလက်ဖြင့် ဘယ်လိုလုပ်ပြီး စုစုပေါင်း ရုံတင်ငွေ ယွမ် သန်းငါးဆယ် ရှိနိုင်မည်နည်း။

ဤသို့ ဖြစ်မည်ကို စောစောကတည်းက သိရှိခဲ့ပါက ယခင်က ကုမ္ပဏီကိုသာ ဖြန့်ချိခိုင်းလိုက်လျှင် ပိုကောင်းမည်ဖြစ်ပြီး ကြော်ငြာစရိတ် ယွမ် သုံးသန်းကို သက်သာသွားစေကာ ဤရုပ်ရှင်မှာ ငွေရှာနိုင်မည် ဖြစ်သည်။ ကုန်ကျစရိတ်မှာ ယွမ် ခြောက်သန်း ဖြစ်သွားခဲ့ရာ ဤရုပ်ရှင်တွင် သူ ထပ်မံ၍ ငွေရှုံးရတော့မည် ဖြစ်ပေသည်။

သို့သော် အချမ်းသာဆုံး ပုဂ္ဂိုလ် ဖုန်းယွီနှင့် အဆက်အသွယ် ရရှိနိုင်ခဲ့ရာ အနည်းငယ် ရှုံးနိမ့်သွားသည်ကလည်း ကိစ္စမရှိပေ။ ထို ဖျော်ဖြေပွဲနှင့် Aihua MP3 ၏ ကြော်ငြာ ကိုယ်စားလှယ် တစ်ခုတည်းနှင့်ပင် သူ့ကို ယွမ် သုံးသန်း အကြိမ်ပေါင်းများစွာ ပြန်လည်ရရှိသွားစေခဲ့ပြီ ဖြစ်သည်။

မီဒီယာများက ‘Crazy Stone’ ၏ ရုံတင်ငွေ စာရင်းကို ရရှိပြီးနောက် သတင်းဆောင်းပါးများလည်း တစ်ပုဒ်ပြီးတစ်ပုဒ် အလျင်အမြန် ထွက်ပေါ်လာခဲ့သည်။

[အချမ်းသာဆုံး ပုဂ္ဂိုလ် အမြင်မှားသွားခြင်း၊ ‘Crazy Stone’ ပွဲဦးထွက်နေ့ ရုံတင်ငွေမှာ တစ်သန်းနှစ်သိန်းကိုးသောင်းသာ ရှိရာ ရုံတင်ငွေ သန်းငါးဆယ်မှာ ဟာသတစ်ခု ဖြစ်သွားခဲ့သည်]

[လျိုထျန်းဝမ် ထပ်မံ၍ ရုပ်ရှင် ရင်းနှီးမြှုပ်နှံမှု ကျရှုံးသွားခြင်း၊ အာရှဒါရိုက်တာသစ်များ အစီအစဉ်မှာ ပျက်ပြားသွားနိုင်ချေ ရှိသည်]

[Huayi Brothers နောင်တရခြင်း၊ ကုန်ကျစရိတ်နည်း ရုပ်ရှင်အတွက် ကြော်ငြာစရိတ် အများအပြား သုံးစွဲခဲ့သော်လည်း ရလဒ်မှာ မျက်နှာဖြတ်ရိုက်ခံရသကဲ့သို့ ဖြစ်သွားသည်]

[နာမည်ကြီး သရုပ်ဆောင်များက ‘Crazy Stone’ အတွက် ဘလော့ဂ်များ တင်ပေးခဲ့ခြင်းမှာ Huayi Brothers ၏ တောင်းဆိုမှုကြောင့်သာ ဖြစ်ပြီး နာမည်ကြီး သရုပ်ဆောင် အများအပြားက သူတို့ တကယ်တမ်းတွင် ဤရုပ်ရှင်မှာ လုံးဝစိတ်ဝင်စားစရာ မကောင်းဟု ထင်မြင်ကြောင်း ဖော်ပြခဲ့ကြသည်]

[‘Crazy Stone’ ပြသချိန် သတ်မှတ်မှု မှားယွင်းသွားခြင်း၊ Huayi Brothersနှင့် လျိုထျန်းဝမ် တို့က ဆုံးဖြတ်ချက် မှားယွင်းမှုအတွက် ပေးဆပ်ရမည် ဖြစ်သည်]

......

မီဒီယာများ အားလုံးက ‘Crazy Stone’ ကို တစ်သံတည်း အဆိုးမြင်နေကြပြီး ဤရုပ်ရှင်၏ ရုံတင်ငွေမှာ ယွမ် ဆယ်သန်းတွင်သာ ရပ်တန့်သွားမည်ဟု ထင်မြင်နေကြပုံ ရသည်။ ထိုသို့ဆိုလျှင် စုစုပေါင်း ရင်းနှီးမြှုပ်နှံမှု ယွမ် ခြောက်သန်းနှင့် နှိုင်းယှဉ်ပါက အကြီးအကျယ် ရှုံးနိမ့်သွားပြီ ဖြစ်သည်။

ပုံမှန်ရုံတင်ငွေ ခွဲဝေမှု ပုံစံအရ ကြည့်မည်ဆိုပါက ရုံတင်ငွေ၏ သုံးပုံတစ်ပုံမှာ ရင်းနှီးမြှုပ်နှံသူများထံ ရောက်ရှိမည်ဖြစ်ရာ တစ်နည်းအားဖြင့် ပြောရလျှင် ယွမ် တစ်ဆယ့်ရှစ်သန်း ရရှိမှသာ ရင်းနှီးမြှုပ်နှံသူများ အရင်းကျေမည် ဖြစ်သည်။

ဖုန်းယွီသည်လည်း မနေ့က ရုံတင်ငွေ စာရင်းကို မြင်တွေ့ခဲ့ရသော်လည်း သူ၏မျက်နှာပေါ်တွင်မူ အပြုံးများ ပြည့်နှက်နေခဲ့သည်။

ဤပွဲဦးထွက် ရုံတင်ငွေမှာ မမြင့်မားကြောင်းကို သူ သိရှိသော်လည်း ယခင်ဘဝကထက်တော့ အများကြီး ပိုကောင်းနေသေးသည်။ ယခင်ဘဝက ‘Crazy Stone’ ၏ ပွဲဦးထွက်နေ့ ရုံတင်ငွေမှာ ယွမ် တစ်သန်းပင် မပြည့်ခဲ့ဘဲ ထိုအရာက တစ်နေ့လုံးစာ ဖြစ်သေးသည်။

ယခုမှာ တစ်ညတည်းသာ ရှိသေးပြီး ပွဲစဉ် နှစ်ပွဲသာ ရှိသေးသော်လည်း တစ်သန်းနှစ်သိန်းကိုးသောင်းပင် ရရှိနေပြီဖြစ်ရာ ဤရုံတင်ငွေက ယွမ် သန်းငါးဆယ် အထိ ထိုးတက်သွားရန် လုံးဝ ပြဿနာ မရှိတော့ပေ။

......

“မန်နေဂျာဖုန်း... ဒီရုံတင်ငွေ ရလဒ်က သိပ်မကောင်းဘူးနော်” ဝမ်ကျုံးကျွင်းက တုံ့ဆိုင်းစွာဖြင့် ပြောလိုက်သည်။

ဖုန်းယွီက ဝမ်ကျုံးကျွင်းကို ပြုံးစိစိဖြင့် ကြည့်လိုက်သည်။ “မနေ့ညက နှစ်ပွဲပဲ ရှိသေးတာလေ... ရုံတင်ပြသမှု နှုန်းထားကလည်း အရမ်းမမြင့်သေးဘူး... မင်း အင်တာနက်ပေါ်က မှတ်ချက်တွေကို မကြည့်ရသေးဘူးလား”

“မှတ်ချက်တွေ ဟုတ်လား... ကြည့်ပြီးပါပြီ... မီဒီယာတွေ အားလုံးက ‘Crazy Stone’ ကို တစ်သံတည်း အဆိုးမြင်နေကြတယ်... အများစုက ငါတို့ရဲ့ ရုံတင်ငွေက ယွမ် ဆယ်သန်း ဝန်းကျင်လောက်ပဲ ရှိမယ်လို့ ထင်ကြပြီး တချို့ကတော့ တစ်ဆယ့်ငါးသန်း အထက်ကို ထိုးတက်နိုင်တယ်လို့ ထင်ကြတယ်... ငါတို့ အရင်းကျေမယ်လို့ ထင်တဲ့ မီဒီယာ တစ်ခုလည်း ရှိသေးပြီး စုစုပေါင်း ရုံတင်ငွေက တစ်ဆယ့်ရှစ်သန်း ဝန်းကျင်လောက် ရှိမယ်လို့ ပြောကြတယ်”

ဖုန်းယွီက ခေါင်းခါပြလိုက်သည်။ “ငါ ပြောတာက ဒီမှတ်ချက်တွေကို မဟုတ်ဘူး... Douban Movieကို မင်း သိတယ် မဟုတ်လား... ရုပ်ရှင် ဝေဖန်ရေးနဲ့ ပတ်သက်တဲ့ ဝက်ဘ်ဆိုက် တစ်ခုလေ... အဲဒီအပေါ်မှာ ‘Crazy Stone’ ရဲ့ အမှတ်ပေးထားတာကို မင်း ကြည့်ပြီးပြီလား”

Douban Movie တဲ့လား။ ဤအရာကို ဝမ်ကျုံးကျွင်း တကယ်ပင် သိရှိသော်လည်း ၎င်းမှာ ဝက်ဘ်ဆိုက် သေးသေးလေး တစ်ခုသာ ဖြစ်ပြီး အရမ်း နာမည်ကြီးသည်ဟုလည်း မဆိုနိုင်ရာ အလေးထားရန် ထိုက်တန်ပါသလော။

သို့သော် မန်နေဂျာဖုန်းက ပြောလာမှတော့ သူလည်း ဝက်ဘ်ဆိုက်ကို ဖွင့်လိုက်ပြီး ပူးပေါင်းထားသော OQ အကောင့်ဖြင့် တိုက်ရိုက် ဝင်ရောက်လိုက်သည်။

ဘယ်လိုလုပ် ဖြစ်နိုင်မှာလဲ။ ရုပ်ရှင်၏ အမှတ်မှာ မထင်မှတ်ဘဲ ၉.၂ မှတ် ဖြစ်နေသည်တဲ့လား။

သူက မှတ်ချက်ပေးသူ အရေအတွက်ကို တစ်ချက် ကြည့်လိုက်ရာ တစ်ထောင်ကျော်သာ ရှိပြီး ဤသည်မှာလည်း အလွန် များပြားလှသည် မဟုတ်ပေ။

“မန်နေဂျာဖုန်း... ဒါက မင်း လူငှားပြီး အမှတ်တင်ခိုင်းထားတာလား”

ဖုန်းယွီ“......”

“ဘာကို ငါက လူငှားပြီး အမှတ်တင်ခိုင်းရမှာလဲ... ဒါက အင်တာနက် အသုံးပြုသူတွေ သူတို့ဘာသာ မှတ်ချက်ပေးထားကြတာ... မင်း တခြားရုပ်ရှင်တွေရဲ့ အမှတ်နဲ့ မှတ်ချက်ပေးသူ အရေအတွက်ကို ကြည့်လိုက်... အဲဒါဆို ဒီရုပ်ရှင်က လူတွေရဲ့ နှစ်သက်မှုကို ဘယ်လောက်တောင် ရထားလဲ ဆိုတာကို သိလိမ့်မယ်”

ယခု ဤအမှတ်မှာ တကယ်ကို အနည်းငယ် မြင့်မားနေပြီး နောက်ပိုင်းတွင် သေချာပေါက် အနည်းငယ် ကျဆင်းသွားမည် ဖြစ်သော်လည်း အစစ်အမှန်ပင် ဖြစ်ကြောင်း ဖုန်းယွီအလွန် ရှင်းလင်းစွာ သိရှိပေသည်။

ယခုအခါ Douban Movieပေါ်ရှိ အသုံးပြုသူ အရေအတွက်မှာ မူလကတည်းက မများပြားလှသော်လည်း လားရာအချို့ကိုတော့ ကိုယ်စားပြုနိုင်ပေသည်။ ဤအမှတ်အရ ဤရုပ်ရှင်မှာ သေချာပေါက် ညံ့ဖျင်းမည် မဟုတ်တော့ပေ။

“မန်နေဂျာဖုန်း.. ဒါဆို အခုချိန်ထိ ဒီရုပ်ရှင် ရုံတင်ငွေက သန်းငါးဆယ် ကျော်နိုင်မယ်လို့ မင်း ထင်နေတုန်းပဲလား” ဝမ်ကျုံးကျွင်းက အနည်းငယ် သံသယဖြစ်စွာဖြင့် မေးလိုက်သည်။

“မဟုတ်ဘူး”

ဝမ်ကျုံးကျွင်း မျက်နှာတစ်ခုလုံး စိတ်ပျက်သွားခဲ့သည်။ တကယ်ပဲ မန်နေဂျာဖုန်းသည်လည်း ရုံတင်ငွေ သန်းငါးဆယ် ရနိုင်မည်ကို မယုံကြည်တော့ပေ။

သို့သော် ဖုန်းယွီက ချက်ချင်း ဆက်ပြောလိုက်သည်။ “ရုံတင်ငွေက သန်းငါးဆယ် မကဘူးလို့ ငါ ထင်တယ်... ဖြစ်နိုင်တာက ဒီမေလတစ်ရက်နေ့ ပြသချိန်မှာတင် သန်းငါးဆယ်ကို ရောက်သွားနိုင်တယ်”

ဘာ... မေလတစ်ရက်နေ့ ပြသချိန်မှာတင် သန်းငါးဆယ် ရနိုင်မယ် ဟုတ်လား။

ခုနစ်ရက်တဲ့လား။ ရုံတင်ငွေ သန်းငါးဆယ် ဟုတ်လား။

ထိုသို့ဆိုလျှင် ပုံမှန် ပြသချိန်ဖြစ်သော တစ်လခွဲမှ နှစ်လအထိ ကြည့်မည်ဆိုပါက ရုံတင်ငွေက ယွမ် သန်းခုနစ်ဆယ် ရှစ်ဆယ်တောင် ရနိုင်မည်တဲ့လား။

“မန်နေဂျာဖုန်း.. ဒါ... ဖြစ်နိုင်ပါ့မလား” ဝမ်ကျုံးကျွင်းက သိပ်မယုံကြည်ပေ။

ရုံတင်ငွေက ရေစီးကြောင်းကိုဆန်၍ မြင့်တက်လာသော ရုပ်ရှင်များကို သူ မမြင်ဖူးသည်တော့ မဟုတ်သော်လည်း ရေဆန် တက်လာမှု ဤမျှ ကြမ်းတမ်းသည်မျိုးကိုမူ လုံးဝ မရှိခဲ့ဖူးပေ။

ဤရုပ်ရှင်မှာ နာမည်ကြီး သရုပ်ဆောင် အများအပြား၏ ထောက်ခံချက်ကို ရရှိထားပြီး သူ ကြည့်ရသည်မှာလည်း တကယ်ကို အရယ်ရဆုံး ဖြစ်သော်လည်း ယခု ရုပ်ရှင် ဈေးကွက်တွင် ဖြစ်စဉ်တစ်ခုရှိပြီး ၎င်းမှာ နာမည်ကြီး သရုပ်ဆောင် မပါဝင်ပါက ရုံမပြည့်ခြင်းပင် ဖြစ်သည်။

အားလုံး မျက်မှန်းတန်းမိနေသော ရုပ်သံ ဇာတ်လမ်းတွဲ သရုပ်ဆောင်များ လာရောက် သရုပ်ဆောင်လျှင်ပင် သရုပ်ဆောင် စွမ်းရည် စသည်တို့မှာ ပြောစရာ မလိုသော်လည်း ရုံတင်ငွေမှာ အတူတူပင် ဝမ်းနည်းဖွယ် ကောင်းလှပေသည်။ လုပ်ငန်းတူ အများအပြားက ပြောကြသည်မှာ ယခု ရုပ်ရှင်များက သရုပ်ဆောင်များကို ရောင်းစားခြင်းသာဖြစ်ပြီး ဇာတ်လမ်းကို ရောင်းစားခြင်း မဟုတ်ပေ။

နာမည်ကြီး သရုပ်ဆောင်တစ်ဦး ပါဝင်လျှင် ထိုရုပ်ရှင်၏ ရုံတင်ငွေမှာ မဆိုးနိုင်ပေ။ အကယ်၍ နာမည်ကြီး တစ်ဦးမှ မပါဝင်ပါက ရုပ်ရှင် ရုံတင်ငွေမှာ တစ်ခုခု လုပ်ပြနိုင်ရန် အလွန် ခက်ခဲလှပေသည်။

ဤ ‘Crazy Stone’ တွင် နာမည်ကြီး သရုပ်ဆောင် မပါဝင်သည်ကို မဆိုထားနှင့်၊ ရုပ်ရည် အနည်းငယ် ချောမောသူပင် တစ်ဦးမျှ မပါဝင်ပေ။ ရုပ်ရည် သာမန်ဖြစ်သူများကို ဖယ်လိုက်ပါက ရုပ်ဆိုးသူများသာ ဖြစ်နေသည်။

ဤရုပ်ရှင်က ရုံတင်ငွေ ဤမျှ ကြီးမားစွာ ပြောင်းပြန်လှန်နိုင်မည်တဲ့လား။

စောစောက မန်နေဂျာဖုန်း၏ အရှေ့ပိုင်းမှ ခွဲခြမ်းစိတ်ဖြာမှုကို နားထောင်ပြီးနောက် ဝမ်ကျုံးကျွင်း ထင်မြင်သည်မှာ ဤရုပ်ရှင် ရုံတင်ငွေက ယွမ် သန်းနှစ်ဆယ် ကျော်လွန်နိုင်ပြီး ရှုံးနိမ့်မည် မဟုတ်ပေ။ ထို့နောက် အခွေ ဖြန့်ချိခြင်း၊ ၎င်းအပြင် ရုပ်ရှင် ချန်နယ်သို့ ရောင်းချခြင်းနှင့် ယူဆောင်သွားကာ ပွဲထွက် ပြသခြင်းများ ပေါင်းထည့်လိုက်ပါက အနည်းငယ်တော့ အမြတ်ရနိုင်မည် ဖြစ်သော်လည်း မန်နေဂျာဖုန်းက အကြီးအကျယ် အမြတ်ထွက်နိုင်သည်ဟု ပြောနေရာ ဤသည်မှာ ဘယ်လိုလုပ် ဖြစ်နိုင်မည်နည်း။

ဖုန်းယွီလည်း အများကြီး ရှင်းပြမနေတော့ဘဲ မတ်တတ်ထရပ်ကာ ပြောလိုက်သည်။ “ကိစ္စမရှိပါဘူး... ရုံတင်ငွေက အကောင်းဆုံး သက်သေပြချက် ဖြစ်လာမှာပါ... သုံးရက်တောင် အချိန်မလိုပါဘူး... အရင်က ငါတို့ကို အထင်မကြီးခဲ့တဲ့ မီဒီယာတွေ အားလုံး မျက်နှာဖြတ်ရိုက်ခံရတော့မှာပါ”

ဖုန်းယွီထရပ်ကာ ထွက်ခွာသွားသည်ကို ကြည့်ပြီးနောက် ဝမ်ကျုံးကျွင်း ခေတ္တမျှ တိတ်ဆိတ်သွားခဲ့ပြီး လက်ထောက်ထံ ဖုန်းဆက်လိုက်သည်။ “ဒီနေ့ ရုပ်ရှင် ရုံတင်ငွေ စာရင်း ထွက်လာတာနဲ့ ငါ့ဆီကို ပထမဆုံး အချိန်မှာ သတင်းပို့ပါ... အဓိကက ‘Crazy Stone’ ပဲ”

ဝမ်ကျုံးကျွင်း အင်တာနက်ပေါ်ရှိ ထိုသတင်းများကို ကြည့်ရင်း ကြောင်အမ်းအမ်း ဖြစ်နေခဲ့သည်။ ဤရုပ်ရှင်က တကယ်ပဲ မန်နေဂျာဖုန်း ပြောသကဲ့သို့ အံ့ဖွယ်များကို ဖန်တီးနိုင်မည်လား။ ရုပ်ရှင် တစ်ကားတည်းကို အားကိုးပြီး ရုပ်ရှင် ပြသချိန် တစ်ခုကိုပါ တကယ်ပဲ ဆွဲတင်သွားနိုင်မည်လား။

ရလဒ်ကို အလျင်အမြန်ပင် အဖြေပေါ်လာတော့မည် ဖြစ်သည်။

......

******