အခန်း ၁၁၁၇

အခန်း (၁၁၁၇) - ရတနာကိုးသွယ် ဥပဒေသ နန်းတော်

အဂ္ဂိရတ်ဆရာတော်သည် မည်သည့် ကျင့်ကြံခြင်းအဆင့်သို့ ရောက်ရှိနေသည်ကို ယီယွင် မသိသော်လည်း သူသည် နတ်သခင် အဆင့်ထက် ကျော်လွန်နေကြောင်းမူ သေချာသည်။ ထိုမျှ ကြီးမားသော စွမ်းအားများက လူငယ်လေးတစ်ဦးကို မည်သို့ ဖောက်ခွဲမပစ်ဘဲ ရှိနေနိုင်ပါမည်နည်း။

ယီယွင်အတွက် ကံကောင်းသည်မှာ သူ့တွင် အရာအားလုံးကို လက်ခံနိုင်သည့် မြစိမ်းနတ်ဘုရားသစ်ပင်ရှိနေခြင်းပင် ဖြစ်သည်။ ထို့ပြင် ယန်နတ်ဘုရားမီးမျိုးစေ့သည်လည်း ယီယွင်နှင့် ပေါင်းစပ်ရန် အပြည့်အဝ ပူးပေါင်းဆောင်ရွက်နေသည်။

ဤအရာများကြောင့် ယီယွင်သည် အံ့ဖွယ်တခုကို ဖန်တီးနိုင်ခဲ့သည်။ သူ၏ ကျင့်ကြံခြင်းအဆင့်မှာ မယုံနိုင်စရာ အရှိန်အဟုန်ဖြင့် တိုးတက်လာသည်။

ဥပဒေသ ဖော်ဆောင်ခြင်း လမ်းစဉ် ထင်ရှားခြင်းအဆင့်၏ အထွတ်အထိပ်။

မီးတောက်များမှာ ကောင်းကင်သို့ ထိုးတက်သွားပြီး အရွက်များပေါ်တွင် ရှေးဟောင်းသတ္တဝါများ၏ ပုံရိပ်များ ပေါ်လာသည်။ ယီယွင်၏ ခန္ဓာကိုယ်မှာ ပေါက်ကွဲတော့မည့်အလား ခံစားရသည်။

သူသည် အားသာချက်များစွာ ရှိထားသော်လည်း ကျင့်ကြံခြင်းအဆင့်ကို ဤမျှ မြင့်တက်အောင် လုပ်ဆောင်နိုင်ခြင်းမှာ အလွန်ပင် ထူးခြားသည့် ကိစ္စဖြစ်သည်။ သူသည် ဥပဒေသ ဖော်ဆောင်ခြင်း အဆင့်၏ အထွတ်အထိပ်သို့ ရောက်ရှိနေပြီဖြစ်ရာ စွမ်းအင်များ ထပ်မံစုဆောင်းပါက အကျိုးဆက်များမှာ စဉ်းစားမရအောင် ဆိုးရွားနိုင်ပေသည်။

သာမန်အချိန်ဆိုလျှင် ယီယွင်သည် စွမ်းအင်များကို လွှတ်ထုတ်လိုက်မည်ဖြစ်သည်။ သို့သော် ယခုအချိန်တွင်မူ သူ ရပ်တန့်ရန် အစီအစဉ် မရှိပါ။ သူ၏ ရန်သူများမှာ ခုနှစ်စဉ်ကြယ်လမ်းစဉ်နန်းတော် မှ ဒုတိယ နန်းတော်သခင်များ ဖြစ်သည်။ သူသည် မိမိ၏ စွမ်းအား မလုံလောက်သေးဟု ခံစားရပြီး အဆင့်တက်ခြင်းကိုသာ လိုလားနေသည်။

ဥပဒေသ ဖော်ဆောင်ခြင်း အဆင့်၏ အထက်တွင် ဥပဒေသ နန်းတော် တည်ဆောက်ခြင်း ရှိသည်။ သူစုဆောင်းထားသော စွမ်းအင်များမှာ ဥပဒေသ နန်းတော် တည်ဆောက်ရန် လုံလောက်သော်လည်း အချိန်ယူ၍ တည်ဆောက်ခြင်းမရှိဘဲ ယခုကဲ့သို့ အလောတကြီး လုပ်ဆောင်ခြင်းမှာ အလွန် အန္တရာယ်ကြီးလှသည်။

"ငါ စွန့်စားမယ်။"

ယီယွင်သည် သွားများကို ကြိတ်ကာ သူ၏ နတ်အမြုတေ စွမ်းအင်အချက်အချာ အတွင်းရှိ ကိုးရွက်ပါ ဥပဒေသသစ်သီး လေးလုံးကို ပေါင်းစပ်လိုက်သည်။

ဥပဒေသ နန်းတော် တည်ဆောက်ခြင်း၏ ပထမခြေလှမ်းမှာ ဥပဒေသသစ်သီးများကို ပေါင်းစပ်ခြင်းဖြစ်သည်။ သူ ဂရုမစိုက်ပါက သူ၏ နတ်အမြုတေ ပေါက်ကွဲသွားနိုင်သည်။

"ရှဲ့အာ၊ ငါ့ကို ကူညီပါ။"

ယီယွင်၏ စိတ်ထဲတွင် ရေရွတ်လိုက်ရာ မြစိမ်းနတ်ဘုရားသစ်ပင်ထဲရှိ ယန်နတ်ဘုရားမီးမျိုးစေ့ မှာ တိတ်ဆိတ်စွာပင် လောင်ကျွမ်းလာသည်။

ဝိညာဉ်ချည်နှောင်သည့် ကြိမ်လုံးကြောင့် ပိတ်မိနေသော လင်ရှဲ့အာ၏ ခန္ဓာကိုယ်မှာ ပွင့်လင်းမြင်သာနေသည်။ သူမ၏ အသက်စွမ်းအင်မှာ လေထဲရှိ ဖယောင်းတိုင်မီးကဲ့သို့ အချိန်မရွေး ငြိမ်းသွားနိုင်သော အခြေအနေဖြစ်သည်။

သို့သော် ရုတ်တရက် သူမ၏ မျက်တောင်များ လှုပ်ခတ်သွားသည်။ သူမ၏ မျက်လုံးများ ပွင့်လာပြီး လျူရူယိနှင့် အဖွဲ့ကို ငြိမ်သက်စွာ ကြည့်လိုက်သည်။

"အို.... ဒီကလေးမလေးက သတိပြန်ဝင်လာတာလား။"

လျူရူယိက မျက်မှောင်ကြုတ်ကာ ပြောသည်။

"ဟဲဟဲ၊ သေခါနီးအချိန်မှာ ခဏတာ သတိဝင်လာတာ ဖြစ်လိမ့်မယ်။ သာမန် ဝိညာဉ်ပုံရိပ်တစ်ခုက ဒီလောက်အထိ ခံနိုင်ရည်ရှိတာကိုက အံ့ဩဖို့ကောင်းနေပြီ။ လူသား စစ်သည်တော်ဆိုရင် ဝိညာဉ်ကို ကြိမ်နဲ့ရိုက်ခံရတာ ရက်အနည်းငယ်ဆိုရင်ပဲ သေချာပေါက် သေလောက်အောင် နာကျင်နေမှာ" ဟု အရူးနတ်ဆိုး က ရယ်မောရင်း ပြောသည်။

"ဒုတိယ နန်းတော်သခင် အရူးနတ်ဆိုး ပြောတာ မှန်ပါတယ်။ ဝိညာဉ်ချည်နှောင်သည့် ကြိမ်လုံးရဲ့ နာကျင်မှုက သာမန်လူတွေ မခံနိုင်တဲ့အရာပါ။ ဒါပေမဲ့ ဒါက ယန် ဝိညာဉ်ရဲ့ တန်ဖိုးကိုပဲ ပြနေတာပါ။ ယန်နတ်ဘုရားကောင်းကင်ဘုံ မှာ ခုနှစ်စဉ်ကြယ်လမ်းစဉ်နန်းတော် က ပိုပြီး အင်အားကြီးမားလာတော့မှာပါ" ဟု ဆရာကြီး ထျန်းရှောင်က ဖားယားစကား ပြောလိုက်သည်။

သူသည် အပူဒဏ်ကြောင့် ခြောက်သွေ့နေသော်လည်း သူ၏ နာကျင်မှုကို မပြောရဲပေ။ လင်ရှဲ့အာ သေဆုံးတော့မည် ဖြစ်သဖြင့် သူ၏ ဒုက္ခများမှာလည်း ပြီးဆုံးတော့မည် ဖြစ်သည်။ သို့သော် ရုတ်တရက် ဆရာကြီး ထျန်းရှောင် တစ်စုံတစ်ခုကို ခံစားလိုက်ရသည်။ သူ၏ လမ်းညွှန်မှာ ထူးဆန်းစွာ တုံ့ပြန်နေသည်။

ရုတ်တရက်.......

ဗုန်း.... ဗုန်း... ဗုန်း။

မြေအောက်ကမ္ဘာမှာ ငလျင်လှုပ်သကဲ့သို့ တုန်ခါသွားသည်။ လင်ရှဲ့အာ အသုံးပြုထားသော မီးတောက် အစီအရင်မှာလည်း မတည်မငြိမ် ဖြစ်လာသည်။

"အိုး...... အစီအရင်မှာ ပြဿနာ တက်လာတာလား။"

ဆရာကြီး ထျန်းရှောင် ထိတ်လန့်သွားပြီး လမ်းညွှန်ဖြင့် တွက်ချက်ကြည့်သော်လည်း ဘာမျှ မသိနိုင်တော့ပေ။

"ဘာလို့ ထိတ်လန့်နေတာလဲ"

"ဒီကလေးမလေးက ဒီလောကရဲ့ အချက်အချာပဲလေ သူမကို သန့်စင်လိုက်ရင် အစီအရင်က မတည်မငြိမ် ဖြစ်လာမှာပေါ့။ သူမ နောက်ထပ် မခံနိုင်တော့ဘူး ဆိုတာ သေချာနေပြီ" ဟု သွေးနတ်ဆိုး က ပြောသည်။

အစီအရင် တုန်ခါမှုမှာ နှစ်နာရီကြာအောင် ဆက်လက် ဖြစ်ပေါ်နေပြီးနောက် ရပ်တန့်သွားသည်။

"သူမ သေသွားပြီလား။"

သွေးနတ်ဆိုး က လင်ရှဲ့အာကို စစ်ဆေးရန် ပြင်လိုက်စဉ် ရုတ်တရက် ဗုန်းခနဲ အသံတစ်ခု ထွက်ပေါ်လာသည်။ သူတို့အောက်ရှိ မြေပြင်မှာ ကွဲအက်သွားပြီး အရည်ပျော်နေသော သတ္တုများ စီးဆင်းလာသည်။

"ဘာဖြစ်တာလဲ"

သွေးနတ်ဆိုး သည် ကြီးမားသော လက်ဝါးဖြင့် အရည်ပျော် သတ္တုများကို ပိတ်ဆို့လိုက်သည်။ လျူရူယိသည် ဆရာကြီး ထျန်းရှောင်ဘေးတွင် ရပ်ကာ ကာကွယ်ပေးထားသည်။ သူမအတွက် ဆရာကြီး ထျန်းရှောင် အသက်ရှင်သည်ဖြစ်စေ၊ သေသည်ဖြစ်စေ ဂရုမစိုက်သော်လည်း ယန်နတ်ဘုရားမီးမျိုးစေ့ ၏ ရုပ်ခန္ဓာအစစ်အမှန်ကို ရှာဖွေရာတွင် သူက အသုံးဝင်သေးသည်။

"ဘာလို့ အစီအရင်က ပြိုကျတော့မလို ဖြစ်နေတာလဲ"

လျူရူယိက စိုးရိမ်တကြီး မေးသည်။

လျူရူယိ ပြောသည်မှာ မှန်သည်။ ထိုအချိန်တွင် ယီယွင်သည် ယန်နတ်ဘုရားမီးမျိုးစေ့ နှင့် ပေါင်းစပ်ပြီး အစီအရင်၏ အချက်အချာနေရာတွင် ရှိနေသည်။

သူသည် ကမ္ဘာဦးကစဉ့်ကလျားဖြစ်ခြင်း နည်းလမ်းကို အသုံးပြုကာ သေခြင်းရှင်ခြင်း အစီအရင်ကို ဖွင့်လှစ်လိုက်သည်။ နှစ်ပေါင်း ရာပေါင်းများစွာ တည်ရှိခဲ့သော အစီအရင်မှာ ယခု ပြိုကျလုနီးပါး ဖြစ်လာသည်။

"ဥပဒေသ နန်းတော်၊ စုစည်း။"

ယီယွင်သည် အော်ဟစ်လိုက်သည်။ သူ၏ သွေးကြောများမှာ ပေါက်ထွက်တော့မည့်အလား တင်းမာနေသည်။ သူ၏ ခန္ဓာကိုယ်ထဲရှိ ဥပဒေသသစ်သီး လေးလုံးမှာ ပေါင်းစပ်ခြင်း၏ နောက်ဆုံးအဆင့်သို့ ရောက်ရှိနေပြီ ဖြစ်သည်။ ဥပဒေသ နန်းတော် ၏ ပုံရိပ်မှာ ယီယွင်၏ နတ်အမြုတေ တစ်ခုလုံးကို ပြည့်နှက်သွားစေသည်။

ယီယွင်၏ မျက်လုံးများတွင် မီးခိုးရောင် မီးတောက်များ တောက်လောင်နေသည်။ မြစိမ်းနတ်ဘုရားသစ်ပင်၏ စွမ်းအားကြောင့် သူသည် စွမ်းအင်အားလုံးကို အကုန်အစင် စုပ်ယူနိုင်ခဲ့သည်။ သူသည် စွမ်းအင်များ မယိုဖိတ်စေရန် သူ၏ အရေပြားပေါက်များအထိ ပိတ်ဆို့ထားလိုက်သည်။ ထိုအချိန်တွင် သူသည် နတ်ဆိုးတစ်ပါးကဲ့သို့ပင် ဖြစ်နေသည်။

သူသည် ကျင့်ကြံလာသည်မှာ နှစ်ပေါင်း ခြောက်ဆယ်ပင် မပြည့်သေးပေ။ သူသည် ယခုကဲ့သို့ ကြီးမားသော အဆင့်ကျော်တက်မှုကို တစ်ခါမျှ မပြုလုပ်ခဲ့ဖူးပေ။

သူ၏ ခန္ဓာကိုယ်ပေါ်ရှိ သွေးများမှာလည်း အလွှာတစ်ခုကဲ့သို့ ဖြစ်လာသည်။ ဥပဒေသ နန်းတော် မှာ တဖြည်းဖြည်း ကျုံ့ဝင်လာပြီးနောက် အရာတစ်ခု ကွဲအက်သွားသည့် အသံကို ကြားလိုက်ရသည်။

စက္ကန့်အနည်းငယ်အတွင်းမှာပင် ဥပဒေသ နန်းတော် မှာ ဆယ်ဆမျှ ကျုံ့ဝင်သွားပြီး ကြည်လင်သော ကျောက်သလင်းကဲ့သို့ ဖြစ်လာသည်။

ဥပဒေသ နန်းတော် တည်ဆောက်ပြီးပြီ။

ဥပဒေသ နန်းတော် မှာ စေတီပုံစံ ဖြစ်ပြီး အဆင့်တိုင်းတွင် အနားကိုးခု ပါရှိသည်။

၎င်းမှာ "ရတနာကိုးသွယ် ဥပဒေသ နန်းတော်" ပင် ဖြစ်သည်။

ကျင့်ကြံသူတစ်ဦး၏ ဥပဒေသ နန်းတော် တွင် အမြင့်ဆုံး ပုံစံမှာ ဤရတနာကိုးသွယ် ဥပဒေသ နန်းတော် ဖြစ်သည်။ စေတီထိပ်တွင် ဥပဒေသသစ်သီးလေးလုံးကြောင့် ဖြစ်ပေါ်လာသော မှန်လုံးလေးလုံးမှာ ဆွဲလွဲထားသကဲ့သို့ တောက်ပနေသည်။

မိမိ၏ နတ်အမြုတေ ထဲတွင် ပေါ်လာသော နန်းတော်ငယ်လေးကို မြင်သောအခါ သွေးတို့ဖြင့် ဖုံးလွှမ်းနေသော ယီယွင်သည် ကျယ်လောင်စွာ ဟိန်းဟောက်လိုက်သည်။

သူ၏ ခန္ဓာကိုယ်ပေါ်ရှိ သွေးအလွှာများမှာ ကွဲအက်သွားပြီး သူသည် နောက်ဆုံးတွင် ဥပဒေသ နန်းတော် အဆင့်သို့ အောင်မြင်စွာ တက်လှမ်းနိုင်ခဲ့ပြီ ဖြစ်သည်။