အခန်း ၁၁၂၀

အခန်း (၁၁၂၀) - လောကဓာတ် အစီအရင်

ဆရာကြီး ထျန်းရှောင် သေဆုံးသွားသည်ကို မြင်သောအခါ အဘိုးကြီး ကျီ မှာ ထိတ်လန့်တုန်လှုပ်သွားသည်။ အလွန်အန္တရာယ်များလှသော အခြေအနေမျိုးတွင် ယီယွင်သည် ဆရာကြီး ထျန်းရှောင်ကို သတ်ဖြတ်နိုင်ခဲ့သည်။

သူကိုယ်တိုင်လည်း ထိုသူ့ကို သတ်ချင်ခဲ့သော်လည်း ယခုမူ ယီယွင်က သူ၏ အလိုဆန္ဒကို ဖြည့်ဆည်းပေးလိုက်သည်။ ဤလူငယ်မှာ မည်သို့သော အရည်အချင်းမျိုး ပိုင်ဆိုင်ထားပါသနည်း။ ဤမျှ ထူးချွန်သော အရည်အချင်းကို တစ်ခါမျှ မကြားဖူးပေ။

"ငါ သတ်ချင်တဲ့သူကို ဘယ်သူမှ တားလို့မရဘူး။ မင်းတို့ရဲ့ အသက်တွေလည်း မကြာခင် ငါ့လက်ထဲ ရောက်တော့မယ်"

ယီယွင်၏ အသံမှာ ငရဲဘုံ၏ အနက်ရှိုင်းဆုံးနေရာမှ လာသကဲ့သို့ အေးစက်နေသည်။

သွေးနတ်ဆိုး, အရူးနတ်ဆိုး နှင့် လျူရူယိ တို့၏ မျက်နှာများမှာ ပျက်သွားသည်။ လျူရူယိက ယီယွင်ကို အေးစက်စွာ ကြည့်ကာ

"မင်း စကားလုံးတွေက တကယ့်ကို ရဲတင်းတာပဲ။ ထျန်းရှောင်ဆိုတဲ့ အသုံးမကျတဲ့ကောင်ကို သတ်လိုက်ရုံနဲ့ မင်း နိုင်ပြီလို့ ထင်နေတာလား။ အစီအရင်က ပြိုကျတော့မှာပါ။ သူ မရှိလည်း ဘာမှ မဖြစ်ဘူး။"

လျူရူယိ၏ အသံမှာ သတ်ဖြတ်လိုစိတ်များဖြင့် ပြည့်နှက်နေသည်။ ယီယွင်၏ တိုက်ခိုက်မှုမှာ သူမကို ပို၍ ဒေါသထွက်စေသည်။ ယီယွင်သည် ဥပဒေသ နန်းတော် အဆင့်သို့ ရောက်ရှိသွားသော်လည်း သူတို့ သုံးဦးကို တစ်ပြိုင်နက် ရင်ဆိုင်ရန် ကြိုးစားခြင်းမှာ အရူးအလုပ်သာ ဖြစ်သည်။

ခုနှစ်စဉ်ကြယ်လမ်းစဉ်နန်းတော် မှ လူများသည် တစ်ယောက်ချင်း တိုက်ခိုက်မည့်သူများ မဟုတ်ပေ။ လျူရူယိ၏ ဘေးတွင် သွေးနတ်ဆိုး နှင့် အရူးနတ်ဆိုး တို့၏ အရှိန်အဝါများမှာလည်း တိုးတက်လာသည်။

သူတို့သည် ကလေးငယ်များကဲ့သို့ မဟုတ်တော့ဘဲ နတ်ဆိုးများကဲ့သို့ ပြောင်းလဲသွားကြသည်။

"သခင်လေး ယီ..."

အဘိုးကြီး ကျီ နှင့် အစေခံမလေးနှစ်ဦးမှာ စိုးရိမ်တကြီး ကြည့်နေကြသည်။

ခုနှစ်စဉ်ကြယ်လမ်းစဉ်နန်းတော် မှ အလွန်အစွမ်းထက်သူ သုံးဦးက ဝိုင်းရံထားချိန်တွင် ယီယွင် မည်သို့ ရုန်းထွက်မည်နည်း။ သို့သော် ယီယွင်မှာမူ ကြောက်ရွံ့ခြင်း အစအနမျှ မရှိဘဲ သန့်စင် ယန် ဓားကို ကိုင်ကာ တည်ငြိမ်စွာ ရပ်နေသည်။

"လူငယ်တွေက ရဲတင်းလွန်းတော့ သေလမ်းကို မမြင်တတ်ကြဘူး" ဟု အရူးနတ်ဆိုး က တွေးသည်။

ခုနှစ်စဉ်ကြယ်လမ်းစဉ်နန်းတော် တွင် ပူးပေါင်း တိုက်ခိုက်သည့် နည်းလမ်းများ ရှိသည်။

ဤနည်းလမ်းဖြင့် ယီယွင်ကို ချက်ချင်း သုတ်သင်ပစ်နိုင်သည်။ သို့သော် သူတို့သည် ယီယွင်ကို ချက်ချင်း မသတ်သေးဘဲ သူ့အားနည်းချက်ကို ရှာဖွေရန် ကြိုးစားနေသည်။

"သေလိုက်စမ်း"

အရူးနတ်ဆိုး ရုတ်တရက် ရှေ့သို့ ခုန်ထွက်လာသည်။ သူ၏ တိုက်ခိုက်မှုမှာ ယီယွင်ဆီသို့ မဟုတ်ဘဲ နောက်ကွယ်ရှိ အဘိုးကြီး ကျီ တို့ဆီသို့ ဖြစ်သည်။

"မင်း ငါ့လူကို သတ်တယ်မလား..... အခု ငါ မင်းလူကို သတ်ပြမယ်။"

သူသည် ယီယွင်၏ အားနည်းချက်မှာ လင်ရှဲ့အာ ဖြစ်ကြောင်း သိသည်။ လင်ရှဲ့အာကို သတ်ပစ်ပါက ယီယွင်၏ စိတ်တည်ငြိမ်မှု ပျက်ပြားသွားလိမ့်မည်။ သို့သော် ယီယွင်၏ မျက်နှာတွင် အပြုံးတစ်ခု ပေါ်လာသည်။ ၎င်းမှာ အရူးနတ်ဆိုး ကို လှောင်ပြောင်သည့် အပြုံးဖြစ်သည်။

အရာတစ်ခုခု မှားယွင်းနေကြောင်း အရူးနတ်ဆိုး ခံစားလိုက်ရသည်။ သို့သော် သူ သတိမပေးနိုင်ခင်မှာပင် ယီယွင်၏ ဓားမှာ မြေပြင်ထဲသို့ ထိုးစိုက်လိုက်သည်။

ဗုန်း........

မြေပြင်မှာ ပြင်းထန်စွာ တုန်ခါသွားသည်။ လျူရူယိတို့အဖွဲ့မှာ သူတို့ပတ်ဝန်းကျင်ရှိ ဟင်းလင်းပြင်များ ပြောင်းလဲသွားသည်ကို ခံစားလိုက်ရသည်။ အစွမ်းထက်သော ဟင်းလင်းပြင် အတားအဆီးများက သူတို့ကို ဝိုင်းရံသွားသည်။

"ဘာဖြစ်တာလဲ"

အရူးနတ်ဆိုး ၏ တိုက်ခိုက်မှုမှာ အတားအဆီးတစ်ခုကို ရိုက်ခတ်သွားသော်လည်း အတားအဆီးမှာ မပျက်စီးပေ။

ယီယွင်က "မင်းတို့ စွမ်းအားတွေကို အလကား မဖြုန်းနဲ့တော့။ ဒါ ဒီနေရာရဲ့ လောကဓာတ် အစီအရင်ပဲ" ဟု ပြောသည်။

"လောကဓာတ် အစီအရင်။ ဒါက ပြိုကျတော့မှာ မဟုတ်ဘူးလား။"

သွေးနတ်ဆိုး က မေးသည်။

သို့သော် သူတို့သည် အတားအဆီးများဖြင့် သီးခြားစီ ဖြစ်နေကြောင်း သိလိုက်ရသည်။

"ဒါက နောက်ဆုံးအနေနဲ့ ပြိုကျတော့မှာ"

ယီယွင်က တည်ငြိမ်စွာ ပြောသည်။

သူသည် အဂ္ဂိရတ်ဆရာတော်၏ မှတ်စုများကို လေ့လာထားပြီး အစီအရင်၏ အချက်အချာကို ထိန်းချုပ်ထားနိုင်သည်။ ယန်နတ်ဘုရားမီးမျိုးစေ့ ၏ အနှစ်သာရကို စုပ်ယူထားသောကြောင့် သူသည် ဤအစီအရင်ကို ထိန်းချုပ်နိုင်သည်။ အစီအရင် ပျက်စီးတော့မည် ဖြစ်သော်လည်း သူသည် ၎င်းကို တစ်ကြိမ်ခန့် အသုံးပြုနိုင်သေးသည်။

ဗုန်း....

ယီယွင်၏ ဓားမှ မီးတောက်များ ထွက်ပေါ်လာသည်။

"အခု မင်းတို့အားလုံး သေရတော့မယ်" ဟု ပြောကာ ယီယွင်သည် သွေးနတ်ဆိုး ၏ ရှေ့သို့ ရောက်သွားသည်။

"မင်းနဲ့ စလိုက်ရအောင်"

"မင်း..."

သွေးနတ်ဆိုး ၏ မျက်နှာ ပျက်သွားသည်။ ဟင်းလင်းပြင် ထောင်ချောက်ထဲတွင် သူသည် လျူရူယိနှင့် အရူးနတ်ဆိုး တို့ထံမှ သီးခြားစီ ဖြစ်နေသည်။ သူတို့က ယီယွင်ကို အတူတူ ဝိုင်းသတ်ရန် စီစဉ်ထားသော်လည်း ယခုမူ ယီယွင်က သူ့ကို တစ်ယောက်ချင်း တိုက်ခိုက်ရန် ဖိအားပေးလိုက်သည်။

သို့သော် သွေးနတ်ဆိုး ၏ မျက်နှာမှာ ရက်စက်သွားသည်။

"အရူးအလုပ်ပဲ။ ငါ့ကို တစ်ယောက်ချင်း တိုက်နိုင်မယ်လို့ ထင်နေတာလား။"

"အေး"

ဓားမှာ ရုတ်တရက် ရှေ့သို့ ရောက်သွားသည်။ ယီယွင်၏ ဓားလမ်းစဉ်မှာ နောက်မဆုတ်တမ်း ရှေ့ဆက်ရန်သာ ဖြစ်သည်။

"သေလိုက်"

ယီယွင် အော်ဟစ်လိုက်သည်။

"သေမယ့်သူက မင်းပဲ။"

သွေးနတ်ဆိုး က နတ်ဆိုးလက်သည်းများဖြင့် တိုက်ခိုက်လိုက်သည်။ သူ၏ လက်သည်းများ ပတ်ဝန်းကျင်တွင် သွေးစက်များဖြင့် ဖုံးလွှမ်းနေသည်။ သူသည် လူပေါင်း များစွာကို သတ်ဖြတ်ခဲ့သူ ဖြစ်သည်။

သို့သော် ထိုအချိန်တွင် ယီယွင်၏ ခြေအောက်တွင် နတ်ဆိုးတစ်သောင်းစက်ဝန်း ပေါ်လာသည်။

ဖျက်စီးခြင်း ဥပဒေသ နယ်ပါယ်, သန့်စင် ယန် ဥပဒေသ နယ်ပါယ် နှင့် အချိန်နှင့်ဟင်းလင်းပြင် ဥပဒေသ နယ်ပါယ် တို့မှာ တစ်ပြိုင်နက် ပေါ်လာသည်။ ယီယွင်၏ ဓားမှာ နဂါးတစ်ကောင်ကဲ့သို့ ဟိန်းဟောက်ကာ ဟင်းလင်းပြင်ကို ခုတ်ထွင်လိုက်သည်။

ဗုန်း........

တိုက်ခိုက်မှု အပြီးတွင် အရာအားလုံးမှာ တိတ်ဆိတ်သွားသည်။ သွေးနတ်ဆိုး သည် ငြိမ်သက်စွာ ရပ်နေသည်။ ထို့နောက် သူသည် သွေးများကို အန်ထုတ်လိုက်သည်။ သူ၏ နတ်ဆိုးလက်သည်းများမှာ အပိုင်းပိုင်း ပြတ်ထွက်သွားခဲ့ပြီ ဖြစ်သည်။