အခန်း ၁၈၂

အခန်း ၁၈၂ - တိရစ္ဆာန်အုပ်စုမျှသာ

ကျောက်ဖေး၏ စိတ်ထဲတွင် ခန့်မှန်းချက်အချို့ ရှိနေသည်။

ခေါင်းဝါတပ်မှ စေလွှတ်သော သံတမန်သည် စောလွန်းသည်လည်းမဟုတ်၊ နောက်ကျလွန်း သည်လည်းမဟုတ်ပေ

ဤအချိန်အခါသမယကို ရွေးချယ်လာခြင်းမှာ ကျူစုန်ယွင်ကိစ္စအတွက် ဖြစ်နိုင်ခြေအလွန်များသည်။

လီချင်းမင် ယခင်ဝန်ခံချက်အရ နတ်ဆိုးတစ်သောင်းဂိုဏ်း၏ ပဉ္စမမြောက်အကြီးအကဲ ဝမ်ပုယန်သည် ခေါင်းဝါတပ်မတော်တွင် စစ်ရေးအကြံပေးအရာရှိအဖြစ် တာဝန်ယူထားပြီး အာဏာအလွန်ကြီးမားကြောင်းသိရသည်။ ခေါင်းဝါတပ်မတော်၏ ခေါင်းဆောင်ဟွမ်ထောင်ပင်လျှင် သူ့ကို ရိုသေလေးစားမှု မရှိဘဲ မနေရဲပေ။

ဝမ်ပုယန်၏ တပည့်ရင်းဖြစ်သူ ကျူစုန်ယွင်၏ ဂိုဏ်းအတွင်း ရာထူးနှင့် အရေးပါမှုသည် လီချင်းမင်းထက် အဆပေါင်းများစွာ သာလွန်သည်မှာ အသေအချာပင်။

"ဟုတ်ကဲ့၊ ခရိုင်ဝန်။"

အစောင့်က အမိန့်ကိုနာခံပြီး ထွက်ခွာသွားသည်။

မကြာမီပင် အစောင့်တစ်ဦးက သံတမန်တစ်ဦးကို ခေါ်ဆောင်လာသည်။

"ခေါင်းဝါတပ်မတော်မှ လက်ဝဲဘက် အရာရှိချုပ် ချောင်ဖင်ဟိုင် ၊ ဟွမ်ထောင်ဘုရင်၏ အမိန့်တော်အရ တိမ်နီတပ်မတော်မှ ခရိုင်ဝန်ကျောက်ထံသို့ လာရောက်နှုတ်ဆက်အပ်ပါသည်။"

စကားပြောသူမှာ ပိုးသားဝတ်ရုံကို ဝတ်ဆင်ထားပြီး ခါးတွင် ဝံပုလွေစွယ်အဆင်တန်ဆာကို ချိတ်ဆွဲထားသော အရပ်ရှည်ရှည် လူပိန်တစ်ဦး ဖြစ်သည်။

သူသည် ခန်းမထဲသို့ ခြေလှမ်းကျဲကြီးများဖြင့် လျှောက်လှမ်းဝင်လာပြီး ခေါင်းဆောင်နေရာတွင် ထိုင်နေသော ကျောက်ဖေးကို အနည်းငယ် ငုံ့ညွှတ်နှုတ်ဆက်လိုက်သည်။

သူသည် ယဉ်ကျေးမှုရှိဟန် ပြသထားသော်လည်း သူ၏မျက်လုံးများထဲတွင် မဖုံးကွယ်နိုင်သော မာနတရားများ စိုးမိုးနေသည်။

သို့သော် ယခင်လာရောက်ခဲ့သော ကျန်းယွမ်ကျန်းဆိုသည့် သံတမန်နှင့်နှိုင်းယှဉ်လျှင် သူ၏သဘောထားမှာ သိသိသာသာ ပိုမိုကောင်းမွန်နေသည်။

အနည်းဆုံးတော့ သူသည် ကျန်းယွမ်ကျန်းကဲ့သို့ မောက်မာပြီး အထက်စီးက မဆန်ပေ။

စစ်မှန်သော အင်အားသည် တိုက်ပွဲများမှတစ်ဆင့် ရရှိလာခြင်းဖြစ်သည်မှာ ငြင်းမရသော အမှန်တရားပင်။

တိမ်နီတပ်မတော်သည် ယခုအခါ ခရိုင်မြို့ကြီးသုံးမြို့ကို သိမ်းပိုက်ထားပြီး လင်ကျန်းစီရင်စုတွင် ကျော်ကြားလှသည်။

ခေါင်းဝါတပ်မတော်ပင်လျှင် တိမ်နီတပ်မတော်ကို အထင်မသေးရဲတော့ပေ။

ကျောက်ဖေးက သာမန်သံစဉ်ဖြင့် မေးလိုက်သည်။

"ဟွမ်ထောင်က မင်းကို ဘာကိစ္စနဲ့ လွှတ်လိုက်တာလဲ။"

ကျောက်ဖေး၏ ရိုင်းစိုင်းသော အပြုအမူ၊ ဟွမ်ထောင်ကို နာမည်တပ်ခေါ်လိုက်ခြင်းကို ကြားရသောအခါ သံတမန်၏ မျက်လုံးထဲတွင် ဒေါသအရိပ်အယောင်များ ဖြတ်ပြေးသွားသည်။

သို့သော် ဖြစ်လာမည့်ကိစ္စကို တွေးမိသဖြင့် ဒေါသကို မြိုသိပ်လိုက်ပြီး လက်ဆုပ်နှုတ်ဆက်ကာ ပြောလိုက်သည်။

"ခရိုင်ဝန်ကျောက်၊ ဘုရင်မင်းမြတ်က ကျွန်တော့်ကို လွှတ်လိုက်တာကတော့ ကျွန်တော်တို့ နှစ်ဖက်စလုံးရဲ့ မဟာမိတ်ဖွဲ့ရေးကို ဆွေးနွေးဖို့ ဖြစ်ပါတယ်။"

"မဟာမိတ်ဖွဲ့တာလား?"

ကျောက်ဖေးက မထီတရီ ရယ်မောလိုက်

သည်။

သံတမန်က ခေါင်းညိတ်ပြီး ကြည်လင်သော အသံဖြင့် ဆက်ပြောသည်။ "ဟုတ်ပါတယ် ခရိုင်ဝန်ကျောက်၊ အခုဆိုရင် ဧကရာဇ်မင်းရဲ့ နန်းတော်က ယိုယွင်းနေပြီး ပြည်သူတွေက အလွန်ဆင်းရဲဒုက္ခရောက်နေကြရပါတယ်။ “

“ကျွန်တော်တို့ ခေါင်းဝါတပ်မတော်နဲ့ တိမ်နီတပ်မတော်တို့က မူလဇစ်မြစ် မတူညီကြပေမဲ့၊ ကောင်းကင်ဘုံကိုယ်စား ဆောင်ရွက်နေတဲ့ ဖြောင့်မတ်တဲ့ တပ်မတော်တွေ ဖြစ်ကြပါတယ်။ “

“ဒါကြောင့်မို့လို့ ကျွန်တော်တို့ဟာ ရန်သူမျိုးစုံကို အတူတူရင်ဆိုင်ရမှာ ဖြစ်သလို တစ်ဦးနဲ့တစ်ဦးလည်း ရန်သူဖြစ်မနေသင့်ပါဘူး။"

"ကျွန်တော်တို့ ခေါင်းဝါတပ်မတော်က ကမ္ဘာကြီးကို အမြဲတမ်း နှလုံးသားထဲမှာ ထားရှိပြီး ယိုယွင်းနေတဲ့ နန်းတော်ကို ဖြိုချကာ ပြည်သူတွေအတွက် ငြိမ်းချမ်းသာယာမှုကို ယူဆောင်လာဖို့ ကတိကဝတ်ပြုထားပါတယ်။ “

“ခရိုင်ဝန်ကျောက်လည်း ကျွန်တော်တို့လိုပဲ ပြည်သူတွေရဲ့ ဒုက္ခကို ကယ်တင်ချင်တဲ့ စိတ်ဆန္ဒ ရှိနေမှာပါ။ “

“ဒါဆိုရင် ဘာလို့ ကျွန်တော်တို့ နှစ်ဖက်စလုံးက မဟာမိတ်ဖွဲ့ပြီး ဧကရာဇ်နန်းတော်ကို ဖြိုချကာ ကမ္ဘာကြီးကို ငြိမ်းချမ်းအောင် ပြန်လုပ်ကြမှာ မဟုတ်တာလဲခင်ဗျာ?"

ကျောက်ဖေးက စားပွဲကို လက်ချောင်းဖြင့် "တောက်... တောက်" ဟု ခေါက်လိုက်ပြီး ရယ်သွမ်းသွန်း ပြောသည်။

"ဟွမ်ထောင်က ဘယ်တုန်းကတည်းက သတ်သတ်လွတ်စား ဖြစ်သွားတာလဲ။"

"ဟဲဟဲ၊ ငါမှတ်မိသလောက်ဆိုရင် လွန်ခဲ့တဲ့ လအနည်းငယ်ကပဲ ဟွမ်ရဲ့ သူပုန်တပ်တွေက ရှန်နန်ကောင်တီက ပြည်သူတွေကို ခြေနှစ်ချောင်းရှိတဲ့ သိုးတွေလို့ သတ်မှတ်ပြီး လုပ်နေခဲ့တာ မလား။ “

“လူသားစားတဲ့ တိရစ္ဆာန်အုပ်စုက ကောင်းကင်ဘုံကိုယ်စား ဆောင်ရွက်တယ်လို့ ပြောနေတာ၊ ရယ်စရာကောင်းလိုက်တာ”

သံတမန်၏ မျက်နှာမှာ ချက်ချင်းဆိုသလို ပြာနှမ်းသွားပြီး သူ၏လက်များမှာ ဆုပ်ထားမိသဖြင့် သွေးကြောများပင် ထောင်လာသည်။

သူသည် ခါးတွင်ချိတ်ထားသည့် ဝံပုလွေစွယ်ကို မသိမသာ ထိကိုင်မိလိုက်သည်—၎င်းမှာ လက်နက်ချရန် ငြင်းဆန်ခဲ့သော အုပ်ချုပ်ရေးမှူးထံမှ အတင်းအဓမ္မ ခွာယူထားခြင်းဖြစ်သည်။

"ခရိုင်ဝန်က နောက်နေတာပါ။ “

“ကျွန်တော်တို့ ခေါင်းဝါတပ်မတော်က ပြည်သူတွေအတွက်ပါ။ ခရိုင်ဝန်ပြောတာတွေက နန်းတော်ဘက်က ထုတ်လွှင့်တဲ့ ကောလာဟလတွေ သက်သက်ပါ။ ချင်းဟယ် ခရိုင်ကို မလာခင်က ခရိုင်ဝန်ကို အမြော်အမြင်ရှိသူလို့ ထင်ထားခဲ့တာ၊ ဒါပေမဲ့ ကောလာဟလတွေကို ယုံကြည်နေသူလို့တော့ မထင်ခဲ့မိဘူး။ အရမ်းကို မိုက်မဲလှချည်လား”

ချောင်ဖင်ဟိုင်သည် ဒေါသကို ထိန်းချုပ်ထားသော်လည်း မျက်နှာပေါ်တွင် အတင်းအဓမ္မ ပြုံးပြရန်မှာ ခက်ခဲနေသည်။

"ကောလာဟလ ဟုတ်လား?"

"အမျိုးသမီးနဲ့ ကလေးငယ် ရာနဲ့ချီကို စစ်ရိက္ခာအတွက် အသားခြောက်အဖြစ် ပြောင်းလဲပစ်ခဲ့တာ၊ အသက် ၈၀ အရွယ် သက်ကြီးရွယ်အိုတွေကို စည်ပြုလုပ်ဖို့အတွက် အရှင်လတ်လတ် အရေခွံခွာခဲ့တာ... ဒီအချက်တွေက ငါ့တောင် ပြောရတာ ရွံ့ရှာလွန်းလှတဲ့ အရာတွေပဲ”

ကျောက်ဖေးက အေးစက်စက် နှာမှုတ်လိုက်သည်။

သူသည် စားပွဲပေါ်မှ စာအုပ်တစ်အုပ်ကို ကောက်ယူလိုက်ပြီး ချောင်ဖင်ဟိုင်၏ ခြေရင်းသို့ ပစ်ချလိုက်သည်။

"ကိုယ်တိုင်သာ ဖတ်ကြည့်လိုက်စမ်းပါ။ ဒါတွေက ကောလာဟလတွေလား?"

ချောင်ဖင်ဟိုင်သည် စာအုပ်ကို ကောက်ယူပြီး စာမျက်နှာအနည်းငယ် လှန်လှောကြည့်လိုက်ရာ သူ၏ မျက်လုံးများ မထိန်းနိုင်အောင် တုန်ရီလာသည်။

၎င်းတို့ထဲတွင် ခေါင်းဝါတပ်မတော်၏ လူသတ်ပွဲမှ လွတ်မြောက်လာသူများ၏ တိုင်ကြားချက်များစွာ ပါဝင်နေသည်။

တိမ်နီတပ်မတော်က ချင်းဟယ်ခရိုင်တွင် ခြေကုပ်ယူလိုက်ချိန်မှစ၍ ဤမှတ်တမ်းများကို ပြုစုထားခြင်း ဖြစ်သည်။

တိမ်နီတပ်မတော်သည် စစ်ရေးလှုပ်ရှားမှု မရှိသေးဘဲ နေ့စဉ် စစ်ရေးလေ့ကျင့်မှုများသာ ပြုလုပ်နေသော်လည်း၊

ပတ်ဝန်းကျင်ဒေသများ၏ သတင်းအချက်အလက်များကို စုဆောင်းခြင်းမှာမူ တစ်ခဏမျှ ရပ်တန့်သွားခြင်းမရှိခဲ့ပေ။

တစ်ဖက်တွင်လည်း ၎င်းသည် တိမ်နီတပ်မတော်အတွက် အနာဂတ်တွင် စစ်ရေးအရ လှုပ်ရှားရန် တရားဝင်အကြောင်းပြချက် ရရှိစေရန်ဖြစ်၏

နောက်တစ်ဖက်တွင်မူ ပြည်သူများ မတော်တဆ ထိခိုက်သေဆုံးမှုကို ကာကွယ်ရန် ဖြစ်သည်။

မည်သို့မျှ ငြင်းဆန်၍မရနိုင်သည်မှာ လင်ကျန်းစီရင်စုတွင် ခေါင်းဝါတပ်မတော်သည် ရာဇဝတ်မှု အများဆုံး ကျူးလွန်ထားသူများ ဖြစ်သည်။

၎င်းတို့၏ ရာဇဝတ်မှုများသည် ရေတွက်၍ပင် မကုန်နိုင်အောင် များပြားလှသည်။ ကျောက်ဖေး စုဆောင်းထားသော အထောက်အထားများမှာ ခေါင်းဝါတပ်မတော်၏ ပြစ်မှုများထဲမှ အစိတ်အပိုင်းအနည်းငယ်မျှသာ ရှိပေလိမ့်မည်။

အကြောင်းမှာ တရားမျှတမှုကို ရှာဖွေသူများအတွက် တရားခံကို မဖော်ထုတ်နိုင်ဘဲ သေဆုံးသွားသူများစွာ ရှိနေသောကြောင့်ပင် ဖြစ်သည်။

သို့သော်လည်း ကျောက်ဖေးသည် ဤအချက်များကို အရေးကြီးသည်ဟု မယူဆတော့ပေ။

သူပိုင်ဆိုင်ထားသော အထောက်အထားများပင်လျှင် တိမ်ဝါတပ်မတော်ကို တိုက်ခိုက်ရန် လုံလောက်သော အကြောင်းပြချက် ဖြစ်နေပြီဖြစ်သောကြောင့် ဖြစ်သည်။

သူသည် ခေါင်းဝါတပ်မတော်ကို ထိုက်တန်သော ပြစ်ဒဏ်ပေးကာ အပြစ်မဲ့ ဝိညာဉ်များအတွက် တရားမျှတမှုကို ရှာဖွေပေးသွားမည် ဖြစ်သည်။

ချောင်ဖင်ဟိုင်သည် ခဏမျှ တိတ်ဆိတ်သွားပြီးနောက် အားတင်းကာ ဆက်လက် ငြင်းခုံပြန်သည်။ "ခရိုင်ဝန်ကျောက်၊ ဒီလိုကောလာဟလတွေကို ယုံကြည်ပြီး အဲဒီအတွက် စွပ်စွဲချက်တွေ ရေးသားတယ်ဆိုတာ အလွန်ရယ်စရာကောင်းပြီး အဓိပ္ပာယ်မရှိပါဘူး”

"ဒါတွေက ကောလာဟလ ဟုတ်မဟုတ်ဆိုတာ မင်းနဲ့ ငါတို့ နှစ်ယောက်လုံး သိပါတယ်။ ဒီမှာ လာပြီး လှည့်ဖြားဖို့ မကြိုးစားပါနဲ့။"

ကျောက်ဖေးက မထီတရီ ရယ်မောသည်။ "ဒီအုပ်ချုပ်ရေးမှူးရဲ့ အမိန့်တစ်ခုတည်းနဲ့တင် သက်သေပေါင်း ထောင်သောင်းမက ရှာတွေ့နိုင်ပါတယ်။ ဒါက ဘယ်လိုလုပ် ကောလာဟလ ဖြစ်နိုင်မှာလဲ။"

"ကျွန်တော်တို့ ခေါင်းဝါတပ်မတော်က နန်းတော်နဲ့ တိုက်ခိုက်နေချိန်မှာ စစ်မြေပြင်မှာ တိုက်ပွဲကြား ထိခိုက်မှုတွေ ရှိတာက မလွဲမသွေပါပဲ။ တိမ်နီတပ်မတော် စတင်လှုပ်ရှားကတည်းက အပြစ်မဲ့သူတွေ မထိခိုက်ခဲ့ဘူးလို့ ကျွန်တော် မယုံပါဘူး။ ခရိုင်ဝန်ကျောက်က ဒီအချက်ကိုပဲ ဖိပြီးပြောနေတာဟာ သေးသိမ်ပြီး အရုပ်ဆိုးလှပါတယ်။"

ချောင်ဖင်ဟိုင်သည် ဤအကြောင်းအရာကို ဆက်မပြောလိုတော့သဖြင့် စကားလမ်းကြောင်း လွှဲလိုက်သည်။

"ခရိုင်ဝန်ကျောက်၊ ကျွန်တော် ဒီကို လာတာက ကျွန်တော်တို့ရဲ့ ဘုရင်မင်းမြတ်ရဲ့ အမိန့်တော်အရ နန်းတော်ကို တိုက်ခိုက်ဖို့ တိမ်နီတပ်မတော်နဲ့ မဟာမိတ်ဖွဲ့ဖို့ လာတာပါ။ ဒါက ကျွန်တော်တို့ နှစ်ဖက်စလုံးအတွက် အရေးအကြီးဆုံးကိစ္စပါ။ “

“ဒါ့အပြင် ကျွန်တော်တို့ စစ်ဗျူဟာမှူးရဲ့ တပည့်ကိစ္စလည်း ရှိပါသေးတယ်..."

ချောင်ဖင်ဟိုင် စကားမဆုံးမီ ကျောက်ဖေးက စိတ်မရှည်စွာ ဖြတ်ပြောလိုက်သည်။ "တော်လိုက်တော့။ မဟာမိတ်ဖွဲ့တဲ့အကြောင်း ထပ်မပြောနဲ့တော့။ ငါ့ရဲ့ တိမ်နီတပ်မတော်ဟာ ပြည်သူတွေကို ညှဉ်းပန်းနှိပ်စက်တဲ့ လူသားစား တိရစ္ဆာန်တွေနဲ့ ဘယ်တော့မှ လက်တွဲမှာ မဟုတ်ဘူး။"

အကြိမ်ကြိမ် အပြောခံရပြီးနောက်

ချောင်ဖင်ဟိုင် နောက်ဆုံးတွင် မထိန်းနိုင်တော့ပေ။ သူ၏ မျက်နှာပေါ်ရှိ ဟန်ဆောင်ယဉ်ကျေးမှုများ ပျက်ပြယ်သွားပြီး သူ၏ ရက်စက်ကြမ်းကြုတ်သော သဘာဝကို ဖော်ပြလိုက်သည်။ "ခရိုင်ဝန်ကျောက်၊ ကျွန်တော် အကြံပေးချင်ပါတယ်။ မင်းအခုလို လမ်းကြောင်းမှားရင် နောက်ဆုံးမှာ နောင်တရလိမ့်မယ်၊ ကျွန်တော်တို့ရဲ့ လူပေါင်း ငါးသိန်းရှိတဲ့ ခေါင်ူဝါတပ်မတော်က မင်းရဲ့ အကြိမ်ကြိမ် စော်ကားမှုကို ဘယ်လိုလုပ် သည်းခံနိုင်မှာလဲ..."

"သူတို့က လူသားစားတဲ့ တိရစ္ဆာန်ပေါင်း ငါးသိန်းပဲ ရှိတာပါ။ ငါ့ရဲ့ တိမ်နီတပ်မတော်ရှေ့မှာဆိုရင် ကြက်ကလေး၊ ခွေးကလေးတွေထက် မပိုပါဘူး။ ငါ့ကို ခြိမ်းခြောက်ဖို့တောင် ဘယ်လိုလုပ် ရဲဝံ့ရတာလဲ?"

ကျောက်ဖေးက အေးစက်စွာ ရယ်မောသည်။

သူသည် ချောင်ဖင်ဟိုင် စကားဆက်ပြောရန် အချိန်မပေးတော့ပေ

အသံကို မြှင့်၍ အမိန့်ပေးလိုက်သည်။ "အပြင်ကလူတွေ၊ အထဲဝင်

ခဲ့”

လက်နက်ကိုင်ဆောင်ထားသော တိမ်နီတပ်မတော်သား လေးဦး ချက်ချင်းဝင်ရောက်လာသည်။

ချောင်ဖင်ဟိုင်၏ မျက်နှာမှာ အလွန်အမင်း ပြောင်းလဲသွားပြီး သူ၏ ခါးရှိဓားကို ဆွဲထုတ်ရန် ပြင်လိုက်သည်။

"ငါက ဘုရင်မင်းမြတ်ရဲ့ သံတမန်ပဲ၊ မင်းတို့က ငါ့ကို ထိရဲတာလား?"

"စစ်ဖြစ်ရင် သံတမန်ကို မသတ်ရဘူးဆိုတဲ့ စကားပုံရှိတယ်။"

"စိတ်မပူပါနဲ့၊ မင်းကို သတ်ပြီး ငါ့ရဲ့ တိမ်နီတပ်မတော်ရဲ့ နာမည်ပျက်အောင် မလုပ်ပါဘူး။"

ကျောက်ဖေးက ဖြည်းညင်းစွာနှင့် ရည်ရွယ်ချက်ရှိရှိဖြင့် သူ၏ ထိုင်ခုံတွင် ပြန်ထိုင်လိုက်သည်။

ချောင်ဖင်ဟိုင်မှာ သက်ပြင်းတစ်ချက် ချလိုက်မိသည်။

သို့သော် သူ စကားပြန်မပြောရသေးခင်မှာပင်

ကျောက်ဖေးက အမိန့်ပေးလိုက်သည်။ “ဒါပေမဲ့ မင်းရဲ့ ပါးစပ်က အရမ်းကို အပုပ်နံ့နံနေတယ်။ ဒီနေ့ မင်းကို သင်ခန်းစာတစ်ခု ပေးမှ ငါ စိတ်အေးရမယ်။ သူ့ကို ဆွဲထုတ်သွားပြီး ကြိမ်ဒဏ် အချက် ၂၀ ရိုက်၊ နားရွက်တွေကို ဖြတ်ပြီး မြို့ပြင်ကို ပစ်ထုတ်လိုက်”