အခန်း ၂၉၁

အခန်း ၂၉၁ အစွမ်းကုန် ရှာဖွေခြင်း

မူလက အပျော်သဘောဖြင့် ကစားလိုပြီး ဤလူသားများကို လှောင်ပြောင် ဆော့ကစားရန် ရည်ရွယ်ထားခဲ့သော်လည်း မထင်မှတ်ဘဲ အစွမ်းထက်သော သူနှင့် သွားရောက် ထိပ်တိုက်တွေ့မိမည်ဟု ၎င်း လုံးဝ မထင်မှတ်ထားခဲ့ချေ။ အမြင့်ဆုံးအဆင့် လက်နက်ပင် ရှိနေသေးရာ ကြိုတင် သိရှိခဲ့ပါက ၎င်းအနေဖြင့် ဤမျှအထိ မောက်မာရဲမည် မဟုတ်ပေ။

"ဟားဟားဟား အခုတော့ မင်းဘယ်လို လေလုံးထွားဦးမလဲ ကြည့်ရသေးတာပေါ့ အခုတော့ အစွမ်းသိသွားပြီ မဟုတ်လား"

"ဒီကြက်ကောင်က တကယ်ကို ရွံစရာကောင်းတာပဲကွာ"

"ဒီ သံကြိုးချိတ် ကိုင်ထားတဲ့သူက ဘယ်သူလဲ အရင်က တစ်ခါမှ မမြင်ဖူးပါဘူး"

"သေချာတော့ မသိဘူး သူက အစ်ကိုကြီးကို သခင်လို့ ခေါ်တာတော့ ငါ ကြားလိုက်တယ်"

"အရမ်းမိုက်တယ်ကွာ သံကြိုးချိတ်နဲ့ တစ်ချက် ဆွဲလိုက်တာနဲ့ တစ်ဖက်လူက ဘာမှတောင် မလုပ်နိုင်တော့ဘူး အနည်းဆုံးတော့ နတ်ဘုရားအဆင့် စွမ်းအား ရှိရမယ်"

"ဒါက သာမန်ပါပဲ အစ်ကိုကြီးဆီမှာ တခြား နည်းလမ်းတွေ အများကြီး ရှိသေးတယ်ကွာ"

လူတိုင်း၏ ကိုယ်ပေါ်ရှိ ဖိအားများ ပျောက်ကွယ်သွားပြီး ကျုံးခွေ ကို မြင်တွေ့လိုက်ရချိန်တွင် အံ့သြတကြီး ရေရွတ်လိုက်ကြလေသည်။ ဤသံကြိုးချိတ်မှာ ခန့်ညားလွန်းလှပြီး အလွန်လည်း အစွမ်းထက်လှသဖြင့် သူတို့၏ ရင်ထဲတွင် အဆက်မပြတ် ခန့်မှန်း တွေးတောနေကြလေသည်။ ကျိုးဟန် ထုတ်ဖော် ပြသလိုက်သော အရာများက တစ်ကြိမ်ပြီးတစ်ကြိမ် သူတို့၏ မျှော်မှန်းချက်များကို ကျော်လွန်နေခဲ့လေသည်။

ထို့အပြင် ယခု အလွန် သနားစရာ ကောင်းနေသော အိပ်မက်မွေးမြူရေး နတ်ဘုရားကြက် ကို မြင်တွေ့လိုက်ရသဖြင့် သူတို့၏ ရင်ထဲတွင် အလွန် ကျေနပ်သွားကြလေသည်။

"အစ်ကိုကြီး ကျွန်တော့်ကို ချမ်းသာပေးပါဗျာ တကယ်ကို နောက်တစ်ခါ မလုပ်ရဲတော့ပါဘူး ကျွန်တော့်ကို မသတ်ပါနဲ့နော်"

အိပ်မက်မွေးမြူရေး နတ်ဘုရားကြက် သည် ထိုနေရာတွင် အဆက်မပြတ် အော်ဟစ် တောင်းပန်နေပြီး ကျုံးခွေ က မည်သည့်စကားမျှ ပြန်မပြောသည်ကို မြင်လိုက်ရသဖြင့် ရင်ထဲတွင် လုံးဝ ထိတ်လန့်သွားလေတော့သည်။

"ဟက် ငါသာ မင်းကို သတ်ချင်ရင် မင်းက ကြယ်ငါးပွင့် အမြင့်ဆုံးအဆင့် ဖျက်ဆီးခြင်း သံကြိုးချိတ် ရဲ့ ဒဏ်ကို ခံနိုင်မယ် ထင်နေလား ခုနက ချိတ်နဲ့သာ ဆွဲလိုက်ရင် မင်းက အခုလောက်ဆို အလောင်းကောင် တစ်လောင်း ဖြစ်နေလောက်ပြီကွ"

"အဲဒါကြောင့် ငါ့ကို လာတောင်းပန်နေလည်း အလကားပဲ ငါ့သခင်ကိုသာ ပြောလိုက်တော့"

ကျုံးခွေ က အေးစက်စွာ ပြောလိုက်ပြီးနောက် ဝိညာဉ် တံခွန် ထဲသို့ ပြန်လည် ဝင်ရောက်သွားလေသည်။ ကျိုးဟန် ၏ ပုံရိပ်သည်လည်း ထွက်ပေါ်လာလေသည်။

"အစ်ကိုကြီး ကျွန်တော်က စနောက်ပြီး ကစားနေတာပါဗျာ သတ်ချင်တဲ့ ရည်ရွယ်ချက် လုံးဝ မရှိပါဘူး"

"နတ်ဘုရားကြက် နန်းတော် ထဲကနေ ထွက်ထွက်လာချင်း အရမ်း စိတ်လှုပ်ရှားသွားလို့ ကိုယ့်စွမ်းအားကိုယ် သေချာ မထိန်းချုပ်နိုင်ခဲ့တာပါ"

အိပ်မက်မွေးမြူရေး နတ်ဘုရားကြက် သည် ကျိုးဟန် ကို မြင်လိုက်ရချိန်တွင် သူသည် ခုနက သံကြိုးချိတ် ကိုင်ဆောင်ထားသူ၏ သခင်ဖြစ်ကြောင်း ချက်ချင်း နားလည်လိုက်လေသည်။ သေချာပေါက် ပိုမို အစွမ်းထက်မည်ဖြစ်ရာ ၎င်း၏ အမူအရာမှာ ပိုမို ရိုကျိုးသွားပြီး သနားစဖွယ် အသံဖြင့် တောင်းပန်လိုက်လေသည်။

"ဟွန့် မင်းမှာ သတ်ချင်တဲ့ စိတ်မရှိဘူး ဆိုတာကို ငါ သေချာ သိလို့ပေါ့ မဟုတ်ရင် မင်းက အခုချိန်ထိ အသက်ရှင်လျက်နဲ့ ဒီမှာ ရပ်နေနိုင်မယ်လို့ ထင်နေလား"

ကျိုးဟန် က အေးစက်စွာ ဟစ်အော်လိုက်လေသည်။

"ဟုတ်ပါတယ် ဟုတ်ပါတယ် ကျွန်တော့်မှာ သတ်ချင်တဲ့စိတ် လုံးဝ မရှိပါဘူး အရမ်းကို သဘောကောင်းတာပါဗျာ"

"နောက်ဆိုရင် ရိုးရိုးသားသားပဲ နေပါ့မယ်လို့ ကတိပေးပါတယ် နောက်တစ်ခါ လုံးဝ လေလုံးမထွားရဲတော့ပါဘူး"

အိပ်မက်မွေးမြူရေး နတ်ဘုရားကြက် သည် အကဲခတ်ကောင်းသူပီပီ ကျိုးဟန် ၏ စကားအရ ဤကိစ္စတွင် အသက်ရှူပေါက် ရနိုင်သေးကြောင်း သိလိုက်ရသဖြင့် အလျင်စလို ကတိပေးလိုက်လေသည်။

"မင်းရဲ့ အမွေအနှစ် ဝိညာဉ် က ချိုက်ခွန်းနဲ့ ပူးပေါင်းထားတဲ့ ဆက်ဆံရေးမျိုး မဟုတ်လား"

ကျိုးဟန် က အမူအရာ မပျက်ဘဲ မေးလိုက်လေသည်။

"ဟုတ်ပါတယ်ဗျာ နောက်ဆိုရင် သူ့ကိုပဲ သေချာ ကူညီပံ့ပိုးပေးပါ့မယ် သူ့အမိန့်ကိုလည်း အကြွင်းမဲ့ နာခံပါ့မယ်လို့ ကတိပေးပါတယ်"

အိပ်မက်မွေးမြူရေး နတ်ဘုရားကြက် ၏ ရင်ထဲတွင် မကောင်းသော နိမိတ်တစ်ခု ဖြစ်ပေါ်လာသဖြင့် အလျင်စလို ပြောလိုက်လေသည်။

"မင်း အဲဒီလို ပြောနေတာကို ငါ ယုံဖို့ ခက်တယ်ကွာ"

"ဒီလိုလုပ် မင်းက သူ့ရဲ့ ကျေးကျွန် အဖြစ် တိုက်ရိုက် ခံယူလိုက် ဒီ အကြံလေးက ဘယ်လိုလဲ"

ကျိုးဟန် သည် ငြင်းဆန်ခွင့် မပေးသော လေသံဖြင့် ပြောလိုက်လေသည်။

"ဒီ အကြံက... တကယ်ကို ကောင်းလွန်းပါတယ်ဗျာ"

အိပ်မက်မွေးမြူရေး နတ်ဘုရားကြက် မှာ အရှုံးပေးကာ ပြောလိုက်လေသည်။ ၎င်းအနေဖြင့် ဟင့်အင်း ဟု ငြင်းဆန်ရဲမည်လော။ အကယ်၍ ၎င်းသာ ငြင်းဆန်ရဲပါက နောက်တစ်စက္ကန့်တွင် ၎င်း၏ ကြက်ခေါင်းမှာ သေချာပေါက် မြေပြင်ပေါ်သို့ ကျဆင်းသွားမည်ဖြစ်ကြောင်း ၎င်း ယုံကြည်ထားလေသည်။

"ချိုက်ခွန်း မင်း ဒီကိုလာခဲ့ သူနဲ့ တိုက်ရိုက် သွေးကတိစာချုပ် ချုပ်လိုက်တော့"

"အစ်ကိုကြီး ကျေးဇူးတင်ပါတယ်ဗျာ တကယ်ကို ကျေးဇူးတင်ပါတယ်"

"အစ်ကိုကြီးရဲ့ ကျေးဇူးတရားတွေကို ကျွန်တော် ဘယ်လို ဆပ်ရမှန်းတောင် မသိတော့ပါဘူး ဂိုဏ်းအတွက် ပိုပြီး ကြီးမားတဲ့ အကျိုးဆောင်မှုတွေ လုပ်ပေးမှပဲ အစ်ကိုကြီးရဲ့ မြေတောင်မြှောက်ပေးမှုနဲ့ တန်တော့မယ်"

ချိုက်ခွန်း မှာ အလွန်အမင်း စိတ်လှုပ်ရှားနေလေသည်။ နတ်ဘုရားကြက်၏ အမွေအနှစ် ဝိညာဉ်ကို ရရှိခဲ့ခြင်းကပင် လုံလောက်သော ကံကောင်းမှု တစ်ခု ဖြစ်နေလေပြီ။ ယခု ဤ အိပ်မက်မွေးမြူရေး နတ်ဘုရားကြက် မှာ သူ၏ ကျေးကျွန် အဖြစ် တိုက်ရိုက် ရောက်ရှိသွားသဖြင့် အိပ်မက်မက်နေသလားဟုပင် ထင်မှတ်ရလေသည်။

ယခင်က အစပြုပိုင်ခွင့် အာဏာမှာ အိပ်မက်မွေးမြူရေး နတ်ဘုရားကြက် ၏ လက်ထဲတွင်သာ ရှိနေခဲ့ကြောင်း သိထားရမည် ဖြစ်သည်။ မည်သို့ပင်ဆိုစေ ချိုက်ခွန်း ၏ စွမ်းအားမှာ အလွန် အားနည်းလွန်းနေသေးရာ စကားပြောဆိုပိုင်ခွင့် လုံးဝ မရှိခဲ့ချေ။

ယခု ကျေးကျွန် ဖြစ်သွားပြီဆိုတော့ အခြေအနေမှာ လုံးဝ ပြောင်းလဲသွားခဲ့လေပြီ။ ချိုက်ခွန်း အနေဖြင့် နတ်ဘုရားကြက်၏ အရာအားလုံးကို အပြည့်အဝ ထိန်းချုပ်နိုင်ပြီဖြစ်ရာ ထိုခံစားချက်မှာ အလွန် သာယာကြည်နူးဖွယ် ကောင်းလှပေသည်။

ကျိုးဟန် သည် သူ၏ ပခုံးကို ပုတ်ပေးလိုက်လေသည်။ ဤအရာများမှာ သူ့အတွက် လက်တစ်ကမ်း အကူအညီလေးသာ ဖြစ်လေသည်။ ဂိုဏ်းသားများ၏ စွမ်းအားများကို မြှင့်တင်ပေးခြင်းမှာ မိမိကိုယ်ကို သွယ်ဝိုက်၍ ကူညီပေးနေခြင်းလည်း ဖြစ်လေသည်။ အားလုံး အကျိုးအမြတ် ရရှိမှသာလျှင် ဂိုဏ်းဖွံ့ဖြိုး တိုးတက်ရေးအတွက် ရေရှည် အစီအစဉ် တစ်ခု ဖြစ်လာမည် မဟုတ်ပါလား။

ထို့အပြင် နတ်ဘုရားသတ်ဖြတ်ခြင်း နန်းတော် ၏ ထူးခြားချက်များကြောင့် ကျိုးဟန် အနေဖြင့် အဖွဲ့ဝင်များ၏ အခြေခံစွမ်းရည်များ အားလုံးကို အချိန်မရွေး ပြန်လည် ရုပ်သိမ်းနိုင်စွမ်း ရှိရာ သစ္စာဖောက်မည့် ကိစ္စအတွက် ပူပန်နေစရာ မလိုသဖြင့် အလွန် စိတ်အေးရလေသည်။

ထို့အပြင် သူသည် ရှေးဟောင်း ချောက်ကမ်းပါး အတွင်းသို့ ဝင်ရောက်ရန်အတွက်လည်း ကြိုတင် ပြင်ဆင်မှုများ စတင် လုပ်ဆောင်ရမည် ဖြစ်လေသည်။

ဝင်ရောက်နိုင်ရန် သတ်မှတ်ချက်မှာ ဧကရာဇ်အဆင့် စွမ်းအား ရှိရမည်ဖြစ်ပြီး လူဦးရေ ကန့်သတ်ချက်မှာ ၁ ယောက်မှ ၂၀ ယောက်အထိ ဖြစ်လေသည်။

ကက်သရင်း ၏ သတင်းအချက်အလက်များအရ ရှေးဟောင်း ချောက်ကမ်းပါး ထဲတွင် မဟာ တိုက်ကြီး အပိုင်းအစများ ကျဆင်းနိုင်ခြေ အလွန် များပြားလေသည်။

ဤသို့ဆိုပါက ဝင်ရောက်မည့် လူဦးရေ များပြားလေလေ ရရှိလာမည့် အကျိုးအမြတ်မှာ သဘာဝကျကျပင် ကြီးမားလေလေ ဖြစ်မည် မဟုတ်ပါလား။

ထို့ကြောင့် သူတို့ကို မြှင့်တင်ပေးရန် ကူညီရမည် ဖြစ်လေသည်။ ထိုသို့မဟုတ်ဘဲ အဖွဲ့ဝင်များ ကိုယ်တိုင် ကြိုးပမ်း၍ ဧကရာဇ်အဆင့် သို့ တက်လှမ်းရန် ဆိုသည်မှာ ဘယ်နှစ် ဘယ်လ ကြာမြင့်မည်ကိုပင် မသိနိုင်တော့ချေ။

"အစ်ကိုကြီးရဲ့ အကူအညီနဲ့ နတ်ဘုရားအဆင့် ကျေးကျွန်ကို သိမ်းသွင်းနိုင်ခဲ့တဲ့ အစ်ကိုခွန်းကို တကယ် အားကျတာပဲကွာ"

"အစ်ကိုခွန်းရဲ့ ကံတရားကလည်း တစ်ပိုင်းပေါ့ ဒါပေမဲ့ အစ်ကိုကြီးက တကယ်ကို သဘောထား ပြည့်ဝလွန်းတယ် ဒီလို အစ်ကိုကြီးမျိုး နောက်ကို လိုက်ရတာ တကယ် စိတ်ချရတယ်ကွာ"

"ဟုတ်ပါ့ အစ်ကိုကြီးကတော့ တကယ်ကို အပြစ်ပြောစရာ မရှိဘူး ရုပ်ရည်ပိုင်းမှာပဲဖြစ်ဖြစ် စွမ်းအားပိုင်းမှာပဲဖြစ်ဖြစ် လူနေမှု စရိုက်ပိုင်းမှာပါ တကယ်ကို လေးစားဖို့ ကောင်းလွန်းတယ်"

ကျိုးဟန် ၏ လုပ်ရပ်များက လူတိုင်း၏ ရင်တွင်း၌ သံယောဇဉ်များ ဖြစ်ပေါ်သွားစေသည်မှာ သိသာလှပေသည်။ ဤကဲ့သို့သော ခေါင်းဆောင် တစ်ယောက်မှာ ကြီးမားလှသော ကိုယ်ရည်ကိုယ်သွေး ဆွဲဆောင်မှု ရှိပြီး လူများကို ပိုမို ကြည်ဖြူစွာ အညံ့ခံလာစေလေသည်။

ဤကိစ္စမှာ ကြားဖြတ် အဖြစ်အပျက်လေး တစ်ခုသာ ဖြစ်ပြီး လျှင်မြန်စွာပင် လူတိုင်းသည် စူးစမ်းရှာဖွေမှု ထဲသို့ ပြန်လည် နစ်မြောသွားကြလေသည်။

အချိန်များ ကုန်ဆုံးသွားသည်နှင့်အမျှ အထူး ကိုဩဒိနိတ် နေရာများကို နင်းမိသူများ ပိုမို များပြားလာပြီး ကိုယ်စီ အကျိုးအမြတ်များ ရရှိနေကြလေသည်။

...

မှောင်မိုက် အေးစက်နေသော နန်းတော် ကြီး တစ်ခုထဲတွင် ပါးလွှာသော အနက်ရောင် မြူခိုးများ ပြည့်နှက်နေပြီး အေးစက်သော အငွေ့အသက်များ အရပ်မျက်နှာ အနှံ့အပြားသို့ ပျံ့နှံ့နေလေသည်။

"အလကားကောင်တွေ မင်းတို့ အကုန်လုံး အသုံးမကျတဲ့ အလကားကောင်တွေပဲကွ"

"ဒီလောက်များတဲ့ အစောင့်အရှောက်တွေ ရှိနေတာတောင်မှ လူတစ်ယောက်ကို ရှာမတွေ့ဘူးလား"

"မင်းတို့ကို အသက်ရှင်ခွင့် ပေးထားတာ ဘာအသုံးကျလို့လဲ"

မြေအောက် ကမ္ဘာ တစ္ဆေ ဧကရာဇ် သည် ရာဇပလ္လင် ပေါ်တွင် ထိုင်ကာ အသံကျယ်ကြီးဖြင့် ဟိန်းဟောက်လိုက်လေသည်။ နဖူးပေါ်တွင် သွေးကြောများ ထောင်ထနေပြီး သူ၏ ကြောက်မက်ဖွယ်ကောင်းသော မျက်နှာကြီးကို ပိုမို အရုပ်ဆိုး အကျည်းတန် သွားစေလေသည်။

တစ္ဆေ မျက်လုံး လျှို့ဝှက် ခိုးကြည့်ခြင်း ကို အသုံးပြု၍ ကျိုးဟန် နှင့် တစ္ဆေ မိဖုရား ဝေ့ရှောင်ချန်း တို့၏ မတော်မတရား ဆက်ဆံရေးကို ရှာဖွေ တွေ့ရှိခဲ့ပြီးနောက် သူ၏ ဒေါသများမှာ တစ်နေ့ထက်တစ်နေ့ ပိုမို ပြင်းထန်လာခဲ့လေသည်။

ဤကာလ အတွင်း ကျိုးဟန် ၏ ခြေရာကို ရှာဖွေရန် တစ်ကြိမ်တစ်ခါမျှ မရပ်တန့်ခဲ့ချေ။ မြေအောက် ကမ္ဘာ တစ္ဆေ ဧကရာဇ် ဖြစ်သော သူသည် ဧကရာဇ် နိုင်ငံ တစ်ခု၏ အရှင်သခင် အနေဖြင့် မည်မျှတောင် အာဏာရှင်ဆန်ပြီး မောက်မာခဲ့သနည်း။

ထို့ကြောင့် သူသည် ဤကြီးမားလှသော အရှက်ကွဲမှုကို ဖြေဖျောက်နိုင်ရန် ကျိုးဟန် ကို ကိုယ်တိုင်ကိုယ်ကျ သတ်ဖြတ်ပစ်ရမည်သာ ဖြစ်လေသည်။

မှန်ပေသည် များပြားလှသော စစ်တပ် များကို စေလွှတ်ခဲ့သော်လည်း ယခုအချိန်အထိ မည်သည့် သဲလွန်စမျှ မရရှိသေးချေ။

"အရှင်မင်းကြီးကို လျှောက်တင်ပါတယ်ဗျာ ကျွန်တော်မျိုး ထင်တာတော့ အဲဒီ ကျိုးဟန် က စန်းချုန်း ဧကရာဇ် မြို့တော် နယ်မြေ တစ်ဝိုက်မှာ မရှိလောက်တော့ဘူး ထင်ပါတယ်"

"ပိုပြီး ဝေးတဲ့ နေရာတွေကို ရောက်သွားတာလည်း ဖြစ်နိုင်သလို နောက်ထပ် ဖြစ်နိုင်ချေ တစ်ခုကတော့ သူက တစ္ဆေနယ်မြေ ထဲမှာ ပုန်းအောင်းနေတာလည်း ဖြစ်နိုင်ပါတယ်"

တပ်မှူး တစ်ယောက်သည် သတ္တိမွေးကာ သတိကြီးစွာဖြင့် ပြောလိုက်လေသည်။

"ကျွန်တော်လည်း ဒီခန့်မှန်းချက်ကို သဘောတူပါတယ်"

"အန္တရာယ် အများဆုံး နေရာက အလုံခြုံဆုံး နေရာပဲလေ"

"အဲဒီ ကျိုးဟန် ကောင်က အရှင်မင်းကြီးရဲ့ ကြီးမားလှတဲ့ ဒေါသ မီးလျှံတွေ ရှေ့မှာ သေချာပေါက် စားမဝင် အိပ်မပျော် ဖြစ်ပြီး အရိပ်မြင်တိုင်း လန့်နေမှာပဲ"

"အကယ်၍ သူက သာမန် နည်းလမ်းတွေ သုံးပြီး ပုန်းရှောင်မယ် ဆိုရင် ငါတို့ရဲ့ တစ္ဆေ ဧကရာဇ် အစောင့်အရှောက် တွေရဲ့ အထူး ရှာဖွေရေး နည်းလမ်းတွေ ကနေ ဘယ်လိုမှ လွတ်ကင်းနိုင်မှာ မဟုတ်ဘူး"

"အဲဒါကြောင့် သူက သေချာပေါက် ပြောင်းပြန် လမ်းစဉ်ကို ရွေးချယ်ပြီး လှုပ်ရှားနေတာ ဖြစ်ရမယ်"

နန်းတော် ထဲရှိ တပ်မှူး အချို့မှာ ထွက်ပေါက် တစ်ခုကို ရှာဖွေတွေ့ရှိသွားသည့်အလား ချက်ချင်းပင် စကားပြောဆိုမှုများ စတင်လာကြပြီး ဤခန့်မှန်းချက် အပေါ် ပိုမို ယုံကြည်လာကြလေသည်။

"အင်း မင်းတို့ ပြောတာလည်း ယုတ္တိရှိတာပဲ"

"ဒီလိုဆိုမှတော့ ငါတို့ နှစ်ဘက်ခွဲပြီး ပြင်ဆင်ကြတာပေါ့ သာမန် တပ်သား အချို့ကို ခေါ်ထုတ်ပြီး တစ္ဆေနယ်မြေ ထဲမှာ ရှာဖွေရေး လုပ်ခိုင်းလိုက်စမ်း"

မြေအောက် ကမ္ဘာ တစ္ဆေ ဧကရာဇ် သည် အတန်ကြာ တွေးတောနေပြီးနောက် တပ်မှူး များ၏ အကြံပြုချက် များကို ပေါင်းစပ်ကာ ဆုံးဖြတ်ချက် ချလိုက်လေတော့သည်။