အခန်း ၁၂၁
Vol. 7 Ch. 121
အခန်း(၁၂၁) ကောင်းကင်-လူသား နယ်ပယ်၏ အထွတ်အထိပ်။
“ဒေါင်းမွှေးလက်နက်လား”
ရှောင်ပီလီသည် ခေါင်းကို အသာအယာ ခါယမ်းလိုက်သည်။ ဒေါင်းမွှေးလက်နက်သည် ကူးလုံ၏ ဝတ္ထုများထဲတွင် အပြင်းထန်ဆုံးသော လျှို့ဝှက်လက်နက် ဖြစ်သော်လည်း၊ သူသည် ယခုအခါတွင် အလွန်ပင် သန်မာနေပြီ ဖြစ်သည်။ အဆင့်(၅)၌ ရှိစဉ်ကလိုမျိုး ရန်သူအချို့ကို ရင်ဆိုင်ရန် မိုးရေထဲက မက်မွန်ပွင့်အပ်များကို အားကိုးနေရသည့် အချိန်အခါမျိုး မဟုတ်တော့ပေ။
သွေးဝတ်ရုံခန်းမဆောင်မှ အကြီးအကဲသည် တုန်ရီလျက် ပြောလိုက်သည်။
“ဆရာကြီး၊ အခု ဘာဆက်လုပ်ကြမလဲ”
ဤခန်းမဆောင်မှ ဆရာကြီးမှာ အလွန်ပင် ရက်စက်လွန်းလှသည်။ နာရီဝက်ပင် မပြည့်မီသည့် အချိန်အတွင်းမှာပင် ကျန်းမိသားစု၊ ကျန်းနန်ပြည်နယ်မှ အရှေ့ဘက်စခန်းနှင့် ပန်းပွင့်စိမ်းအိမ်တော်တို့ အားလုံးသည် အမြစ်ပြတ် ချေမှုန်းခြင်း ခံလိုက်ရပြီ ဖြစ်သည်။
ယနေ့ဖြစ်ရပ်သတင်း ပျံ့နှံ့သွားသည်နှင့် သိုင်းလောက တစ်ခုလုံး တုန်လှုပ်ချောက်ချားသွားလိမ့်မည် ဖြစ်ပြီး၊ နန်းတော်ဘက်မှ ဖိအားပေး နှိမ်နင်းမှုများလည်း ပိုမိုပြင်းထန်လာလိမ့်မည်ဟု သူ ခန့်မှန်းမိသည်။
လက်ရှိအချိန်တွင် သွေးဝတ်ရုံခန်းမဆောင်၏ မဖော်ထုတ်ရသေးသည့် ခံတပ်အချို့သာ အနည်းငယ် ကျန်ရစ်နေသေးသည်။
သို့သော် နန်းတော်ဘက်မှ အလုံးအရင်းနှင့် စတင်လှုပ်ရှားလာပါက၊ ခန်းမဆောင်အနေဖြင့် ထပ်မံ၍ ဆုံးရှုံးမှုများစွာ ကြုံတွေ့ရပေလိမ့်မည်။ ခန်းမဆောင်ထဲမှ ကျွမ်းကျင်သူများအနေဖြင့် ပြင်ဆင်ထားခြင်း ရှိ၊ မရှိကိုတော့ သူ မသိပေ။
“သူတို့ အခု ဘယ်မှာ ခိုလှုံနေကြသလဲဆိုတာ သွားကြည့်ရအောင်” ရှောင်ပီလီက တည်ငြိမ်စွာ ပြောလိုက်သည်။
ဧရာမဝိညာဉ်ဂိုဏ်းနှင့် ဖူဟူအစောင့်ရှောက်အဖွဲ့အစည်းတို့မှာ မန်ဟွာနယ်မြေ၌ မရှိကြ၍ ထိုနေရာသို့ အလျင်စလို သွားရောက်ခြင်းမှာ အချိန်ကုန်ရုံသာ ရှိမည်ဖြစ်သည်။
ယခုရရှိထားသော အတွေ့အကြုံများကို အရင်ဆုံး စုပ်ယူပြီးမှ ဧရာမဝိညာဉ်ဂိုဏ်းကို ပိုမိုယုံကြည်ချက်ရှိရှိ ကိုင်တွယ်ခြင်းက ပို၍ ကောင်းမွန်ပေလိမ့်မည်။
---
အိမ်ယာငယ်လေး တစ်ခု၏ ခြံဝင်းအတွင်း၌ သွေးဝတ်ရုံခန်းမဆောင်မှ လူတစ်ဒါဇင်ခန့်ကို ဝူယုံက စုစည်းထားသည်။ သူတို့၏ မျက်လုံးများထဲတွင်မူ ဝေဝါးမှုများ ရှိနေဆဲဖြစ်သည်။
မနေ့က ကျန်းနန်းပြည်နယ် သွေးဝတ်ရုံခန်းမဆောင်မှ ကျန်ရစ်သူ လူတစ်ဒါဇင်ခန့်မှ လွဲ၍ ပြင်ပလူကို မည်သူ့ကိုမျှ မယုံကြည်ရဟု ဆိုထားသည် မဟုတ်ပါလော။
အဘယ်ကြောင့် ဆရာကြီး ဝူယုံသည် လူငယ်တစ်ယောက်ကို ခေါ်ဆောင်လာရသနည်း။
“မင်းတို့မှာ ဒီလောက်လူပဲ ကျန်တော့တာလား” ရှောင်ပီလီက မျက်မှောင် အနည်းငယ် ကြုတ်လိုက်သည်။
“ကျန်းနန်ပြည်နယ် ဌာနခွဲကို တာဝန်ခံတဲ့သူက ဘယ်မှာလဲ”
ဝူယုံသည် ရှောင်ပီလီ အရင်က ကယ်တင်ခဲ့သည့် သွေးဝတ်ရုံခန်းမဆောင်မှ သိုင်းဆရာကြီး ဖြစ်သည်။ ဤလူတစ်ဒါဇင်ထဲတွင် ဝူယုံမှာ သိုင်းပညာ အမြင့်ဆုံးဖြစ်ပြီး၊ ကျန်သူအများစုမှာ ဒဏ်ရာများ ရထားကြသည်။
ဝူယုံက ခါးသီးစွာ ပြုံးလျက် ပြောလိုက်သည်။
“ပုံမှန်အားဖြင့်တော့ ကျန်းနန်ပြည်နယ် ဌာနခွဲကို တာဝန်ခံတဲ့ ဆရာကြီးဟဲ တစ်ယောက်ပဲ ကျန်းရွှမ်မင်ရဲ့ အစစ်အမှန် ဖြစ်ကြောင်းကို သိထားတာပါ။ ကျွန်တော်တို့က ယွမ်ချန်း(၁၂)ပါးထဲက ဝူမာဆိုတဲ့သူက ကျွန်တော်တို့ ကျန်းနန်ပြည်နယ် ဌာနခွဲမှာ ရှိနေတယ်ဆိုတာပဲ သိခဲ့တာပါ”
“ဆရာကြီးဟဲကလည်း အဆင့်(၃) မဟာဆရာသခင်ကြီး အဆင့်ရှိပေမဲ့ ဝူမာက အလစ်အငိုက် တိုက်ခိုက်ခဲ့သလို ဧရာမဝိညာဉ်ဂိုဏ်းနဲ့ အရှေ့ဘက်စခန်းမှ ကျွမ်းကျင်သူတွေလည်း ရှိနေခဲ့တာပါ။ ဆရာကြီးဟဲသာ အသေခံ တိုက်ခိုက်ပြီး လမ်းဖွင့်မပေးခဲ့ရင် ကျွန်တော်တို့ အသက်ရှင်ဖို့ ခက်ခဲခဲ့မှာပါ”
“ဆရာကြီးဟဲကလည်း ဝိုင်းပတ် တိုက်ခိုက်ခြင်းထဲကနေ ကျွန်တော်တို့ကို ခေါ်ထုတ်လာရင်း ဒဏ်ရာပြင်းထန်စွာနဲ့ ကွယ်လွန်သွားခဲ့ပါပြီ”
“အခုတော့ ကျွန်တော်တို့ ကျန်းနန်းပြည်နယ် ဌာနခွဲမှာ ဒီလူတွေပဲ ကျန်ပါတော့တယ်”
ဤအချိန်တွင် ခြံဝင်းထဲမှ သွေးဝတ်ရုံခန်းမဆောင် လူသတ်သမားများလည်း သဘောပေါက်သွားကြပြီး ဝူယုံကို တိုးတိုးလေး မေးလိုက်ကြသည်။
“သူက ခန်းမဆောင်က ကျွမ်းကျင်သူ တစ်ယောက်လား”
သူတို့မှာ အနည်းငယ် မှန်းဆမိသော်လည်း၊ ရှေ့မှ လူငယ်မှာ အလွန်ပင် ငယ်ရွယ်နုပျိုနေ၍ သူတို့ ကျန်းနန်ပြည်နယ် ဌာနခွဲကို အခက်အခဲထဲကနေ ကယ်တင်နိုင်မည့် ကျွမ်းကျင်သူမျိုးနှင့် မတူပေ။
ဝူယုံ မပြောမီမှာပင် အခြားသူတစ်ယောက်က ဝင်ပြောလိုက်သည်။
“ကျွန်တော် ခုနက သတင်းသွားစုံစမ်းတုန်းက ကျန်းရွှမ်မင်ရဲ့ ရွှေဖလားနှင့် လက်ဆေးအငြိမ်းစားယူခြင်း အခမ်းအနားမှာ တစ်ခုခု ဖြစ်သွားတယ်လို့ ကြားလိုက်သလိုပဲ၊ ဒါပေမဲ့ ဖော်ထုတ်ခံရမှာ ကြောက်လို့ သေချာ မမေးကြည့်ရဲခဲ့ဘူး”
ထိုစကားကို ကြားသော် သွေးဝတ်ရုံခန်းမဆောင်မှ လူသတ်သမား အချို့ စတင် ပြောဆိုကြသည်။
“ဟုတ်တယ်၊ ဒီနေ့ မြို့ထဲမှာ တစ်ခုခု ဖြစ်ပျက်သွားပုံရတယ်”
“ကျန်းရွှမ်မင်ရဲ့ ရွှေဖလားနှင့် လက်ဆေးအငြိမ်းစားယူခြင်း အခမ်းအနားကို တစ်ယောက်ယောက်က ဝင်ရောက် တိုက်ခိုက်ပြီး လူအများကြီးကို သတ်သွားတယ်လို့ ကြားလိုက်တယ်”
“ဟုတ်မယ်၊ လူအများကြီး မြင်လိုက်ကြတာ”
“...”
ဝူယုံက ခေါင်းညိတ်လိုက်သည်။
“မှန်တယ်၊ ကျွန်တော်တို့ သွေးဝတ်ရုံခန်းမဆောင်ရဲ့ သစ္စာဖောက် ကျန်းရွှမ်မင်ကို ဆရာကြီးက ကိုယ်တိုင် သတ်ဖြတ်လိုက်ပြီ”
“ကျန်းမိသားစုလည်း အမြစ်ပြတ် ချေမှုန်းခံလိုက်ရပြီ”
“ဒါတင်မကသေးဘူး၊ ပန်းပွင့်စိမ်းအိမ်တော်နဲ့ ကျန်းနန်းပြည်နယ် အရှေ့ဘက်စခန်းတို့လည်း မရှိတော့ဘူး”
ထိုစကားကို ကြားသော် သွေးဝတ်ရုံခန်းမဆောင်မှ လူသတ်သမားများအားလုံး အံ့ဩတုန်လှုပ်သွားကြသည်။
ဤလူငယ်မှာ အလွန်ပင် ရက်စက်လွန်းလှသည် မဟုတ်လော။
ခန်းမဆောင်မှ အဆင့်(၁) ကျွမ်းကျင်သူက မွေးထုတ်ပေးလိုက်သည့် ထိပ်တန်းကျွမ်းကျင်သူများထဲမှ တစ်ယောက်များ ဖြစ်နေမလား။
အပြင်ပန်းကပဲ ငယ်ရွယ်နေတာလား။
ရှောင်ပီလီက ဝူယုံကို ကြည့်၍ ပြောလိုက်သည်။
“ယန်ပြည်နယ် သွေးဝတ်ရုံခန်းမဆောင် ဌာနခွဲက လူတွေလည်း ကျန်းနန်ပြည်နယ်ကို ထွက်ပြေးလာကြတယ်လို့ ကြားတယ်၊ မင်းတို့ရဲ့ အရင် သတင်းရယူတဲ့ လမ်းကြောင်းက အခုထိ သုံးလို့ရသေးလား”
“သူတို့ ရှိနေတဲ့နေရာကို ရှာပေးနိုင်မလား”
ဝူယုံက ခေါင်းခါ၍ ပြောလိုက်သည်။
“အဲဒီကိစ္စတွေကိုတော့ ဆရာကြီးဟဲ တစ်ယောက်တည်းပဲ စီမံတာပါ။ သူ ကွယ်လွန်သွားတဲ့နောက်မှာ ကျွန်တော်တို့နဲ့ အဓိက ခန်းမဆောင်နဲ့ အဆက်အသွယ် ပြတ်တောက်သွားပြီး၊ သတင်းအချက်အလက် အချို့ကို ကျွန်တော်တို့ မရနိုင်တော့ဘူး”
“ဒါပေမဲ့ ကျွန်တော် ကျန်းနန်ပြည်နယ်မှာ နေတာ ကြာပြီဆိုတော့ သတင်း စုံစမ်းဖို့ လမ်းကြောင်းလေးတော့ နည်းနည်းပါးပါး ရှိပါသေးတယ်”
“အခု အရှေ့ဘက်စခန်းနဲ့ ဧရာမဝိညာဉ်ဂိုဏ်းတို့က ဆရာကြီးလက်ချက်နဲ့ ဆုံးရှုံးမှုတွေ ရှိသွားပြီဆိုတော့၊ ကျွန်တော်တို့ သတင်း သွားစုံစမ်းရင် သူတို့တွေလည်း အလွယ်တကူ လှုပ်ရှားရဲတော့မှာ မဟုတ်ဘူး”
သူတို့ ဌာနခွဲ ပျက်စီးသွားပြီးနောက်၊ သူတို့နှင့် အရင်က ဆက်ဆံဖူးသူတွေက သူတို့ကို ပြန်နင်းသွားမလားဆိုသည့် စိုးရိမ်စိတ်ကြောင့် အပြင်ကို မထွက်ရဲကြပေ။ သို့သော် ယနေ့ ကျန်းအိမ်တော်မှ ရွှေဖလားနှင့် လက်ဆေးအငြိမ်းစားယူခြင်း အခမ်းအနား သတင်း ပျံ့နှံ့သွားပါက၊ ကျန်းနန်းပြည်နယ်ထဲတွင် စင်ကြယ်သော ယန်ဂိုဏ်း၊ ဧရာမဝိညာဉ်ဂိုဏ်းနှင့် ထန်ထိုက်မိသားစုမှ လွဲ၍ သူတို့ကို အသက်အန္တရာယ်ပြုဖို့ ကြိုးစားရဲမည့်သူ မည်သူမျှ ရှိလိမ့်မည် မဟုတ်ပေ။
ရှောင်ပီလီ ခေါင်းညိတ်လိုက်သည်။
“ဒါဆိုရင် သွားစုံစမ်းလိုက်ကြတော့”
“ငြိမ်သက်တဲ့ အခန်းတစ်ခန်း ရှာပေးပါ၊ ကျွန်တော် ကျင့်ကြံရမယ်၊ အရေးကြီးတဲ့ကိစ္စ မဟုတ်ရင် ဘယ်သူ့ကိုမှ လာမနှောင့်ယှက်နဲ့”
---
ခဏအတွင်းမှာပင်။
သွေးဝတ်ရုံခန်းမဆောင်မှ လူသတ်သမားများက သန့်ရှင်းသော အခန်းတစ်ခန်းကို ပြင်ဆင်ပေးလိုက်သည်။
အရှင်သခင် - ရှောင်ပီလီ။
ကျင့်စဉ် - အဆင့်(၂) ကောင်းကင်-လူသားနယ်ပယ်အလယ်အဆင့်။
သိုင်းပညာ - ချန်ရှန့်ကျင့်စဉ် (၇၀/၁၀၀)၊ မဖျက်ဆီးနိုင်သော နတ်ဘုရားပေးပညာ (၅/၁၀၀)၊ ခုနစ်သတ်ဓားသိုင်း (၁၈/၁၀၀)၊ ဓားထုတ်သိုင်းပညာ (အထွတ်အထိပ်)... အဘိဓမ္မာ ဓားမသုံးမျိုး (အထွတ်အထိပ်)၊ အသက်ရှူခြင်းပညာ (အထွတ်အထိပ်)၊ နတ်ဘုရားဓားချက် (အထွတ်အထိပ်)၊ နဂါးနတ်ဆိုး ရွှေကိုယ်ခန္ဓာ (၁၂/၁၀၀)၊ ဓားမဲ့နယ်ပယ်၊ ကြေးရောင်အရေပြားနှင့် သံမဏိအရိုး၊ ပေါ့ပါးမှု သိုင်းပညာ။
ကျင့်ကြံမှုအမှတ် - ၂၈၇၆၄၀။
ရယူရန် - ကောင်းကင်ဓား ကျင့်စဉ်(၈)ရပ်၊ ဒေါင်းမွှေးလက်နက်။
ကျန်းအိမ်တော်၊ ပန်းပွင့်စိမ်းအိမ်တော်နှင့် အရှေ့ဘက်စခန်းတို့မှ လူအများစုမှာ သိုင်းပညာ မမြင့်မား၍ ကျင့်ကြံမှုအမှတ် အနည်းငယ်သာ ပေးစွမ်းနိုင်ခဲ့သည်မှာ နှမြောစရာပင်။ မဟုတ်ပါက သူသည် အဆင့်(၁) နယ်ပယ်ကို တိုက်ရိုက် ရောက်သွားနိုင်ပေသည်။
သို့သော်လည်း သူ့အစွမ်းအစသာ တိုးတက်လာပါက နတ်ဆိုးများကို စိုက်ပျိုးဖို့ ပို၍ လွယ်ကူသွားပေမည်။
အခု ကျန်းနန်ပြည်နယ်တွင် ဒီလောက်အထိ လှုပ်ခတ်အောင် လုပ်ထားပြီးပြီဆိုတော့ နန်းတော်က သူ့ကို ကိုင်တွယ်ဖို့ လူမပို့မှာကို သူ ကြောက်နေရဦးမလား။
“ကောင်းကင်ဓား ကျင့်စဉ်(၈)ရပ်နဲ့ ဒေါင်းမွှေးလက်နက်ကို ရယူမယ်”
စနစ် မျက်နှာပြင်ကို ကြည့်ရင်း ရှောင်ပီလီက တိုးတိုးလေး ပြောလိုက်သည်။
ဘုန်း။
ကောင်းကင်ဓား ကျင့်စဉ်(၈)ရပ်၏ ကျင့်ကြံမှုများစွာသည် ရှောင်ပီလီ၏ စိတ်ထဲသို့ စီးဝင်လာသည်။
တစ်ချိန်တည်းမှာပင်၊ ငွေရောင်အခြေခံဖြင့် ဒေါင်းအမွှေးအမျှင်များဖြင့် ဝိုင်းရံထားပြီး အနုပညာလက်ရာ တစ်ခုကဲ့သို့ ဒေါင်းမွှေးလက်နက်သည် ရှောင်ပီလီ၏ လက်ထဲသို့ ရောက်ရှိလာသည်။
ရှောင်ပီလီသည် သူ့ရှေ့ရှိ ဒေါင်းမွှေးလက်နက်ကို ဂရုတစိုက် ကြည့်ရှုလိုက်သည်။
ဤလျှို့ဝှက်လက်နက်မှာ ဝတ္ထုထဲရှိ ဖော်ပြချက်နှင့် မတူဘဲ၊ သူ အရင်က ကြည့်ခဲ့ဖူးသည့် ရုပ်သံဇာတ်လမ်းများထဲတွင် ပါဝင်သည့် ဒေါင်းမွှေးလက်နက်၏ ပြုပြင်ထားသော ဗားရှင်းနှင့် ပို၍ ဆင်တူနေသည်။
ပေါ်လာသည်နှင့်တစ်ပြိုင်နက် စိုးမိုးထားနိုင်သည့် သတ်ဖြတ်ရေး လက်နက် ဖြစ်သည်။
ရှောင်ပီလီပင် ဒေါင်းမွှေးလက်နက်ထဲတွင် စုစည်းနေသည့် ကြီးမားသော စွမ်းအင်ကို ခံစားမိသည်။
မိုးရေထဲက မက်မွန်ပွင့်အပ်များနှင့် လုံးဝ မနှိုင်းယှဉ်နိုင်ပေ။
အဆင့်(၂) ကောင်းကင်-လူသားနယ်ပယ် ကျွမ်းကျင်သူများကိုပင် ခြိမ်းခြောက်နိုင်စွမ်း ရှိသည်။
သို့သော်လည်း သူသည် ယခုအခါတွင် ကောင်းကင်-လူသား တစ်ယောက် ဖြစ်နေပြီ ဖြစ်ပြီး ဆက်လက်၍ တိုးတက်နေဦးမည် ဖြစ်၍ ဒေါင်းမွှေးလက်နက်မှာ သူ့အတွက် အသုံးမဝင်လှပေ။
ဒေါင်းမွှေးလက်နက်ကို တိုက်ရိုက် သိမ်းဆည်းလိုက်ပြီးနောက်၊
ရှောင်ပီလီက တိုးတိုးလေး ပြောလိုက်သည်။
“ကျင့်ကြံမှုအမှတ် ၁၈၀,၀၀၀ ကို သုံးပြီး ချန်ရှန့်ကျင့်စဉ်ကို အဆင့်မြှင့်မယ်”
ချန်ရှန့်ကျင့်စဉ် (၈၈/၁၀၀)
နယ်ပယ် - အဆင့်(၂) ကောင်းကင်-လူသား အထွတ်အထိပ်။ (နယ်ပယ်ကို အဆင့်မြှင့်တင်ရန် ချန်ရှန့်ကျင့်စဉ် ကျွမ်းကျင်မှုကို ၁၂ ရာခိုင်နှုန်း တိုးမြှင့်ရန် လိုအပ်သည်။)
သူ့စကားသံ ပျောက်ကွယ်သွားသည်နှင့်။
ဘုန်း။
ချန်ရှန့်ကျင့်စဉ် ကျင့်ကြံမှု အတွေ့အကြုံများစွာသည် ရှောင်ပီလီ၏ စိတ်ထဲသို့ လှိုင်းထန်စွာ စီးဝင်လာပြီး၊ သူသည် ချန်ရှန့်ကျင့်စဉ်ကို နှစ်ပေါင်းများစွာ နေ့ရောညပါ ကျင့်ကြံလာခဲ့သကဲ့သို့ ဖြစ်သွားသည်။ တစ်ချိန်တည်းမှာပင်၊ သန့်စင်သော စွမ်းအင်တစ်ခုသည် သူ့ ဝိညာဉ်ပင်လယ်ထဲမှ ပျံ့နှံ့ထွက်ပေါ်လာပြီး သူ့ခြေလက်အရိုးအဆစ်များဆီသို့ စီးဆင်းသွားသည်။
ရှောင်ပီလီ၏ အရှိန်အဝါသည် တည်ငြိမ်စွာ မြင့်တက်လာပြီး၊ သူ၏ မူလဝိညာဉ်ပေါ်ရှိ ချီစွမ်းအင်သည်လည်း သန့်စင်သော ယန်စွမ်းအင်ဘက်သို့ ပြောင်းလဲသွားသည်။