အခန်း ၁၃၇၄
Vol. 121 Ch. 1374
အခန်း ၁၃၇၄
“လက်မှတ်ထိုးဝင်ခြင်း အောင်မြင်သည်။ ရရှိသောဆုလာဘ် - အာကာသ တစ်ကိုယ်ရေသန့်ရှင်းရေး သန့်စင်မှုစနစ် (SSS အဆင့်) ၁။”
ရှောင်းယီသည် ထိုဆုလာဘ်ကို ကြည့်ပြီး အနည်းငယ် ဇဝေဇဝါ ဖြစ်သွားခဲ့သည်။
“ငါ့မှာ အညစ်အကြေး စုဆောင်းတဲ့စနစ် ရှိနေပြီပဲ။ ဘာလို့ သန့်ရှင်းရေးစနစ်တစ်ခု ထပ်ရပြန်တာလဲ။”
“ဒီသန့်ရှင်းရေးစနစ်က ခံတွင်းသန့်ရှင်းရေး၊ ခန္ဓာကိုယ်သန့်ရှင်းရေး၊ အဝတ်အထည်သန့်ရှင်းရေး စတဲ့ တစ်ကိုယ်ရေသန့်ရှင်းရေး ကိစ္စရပ်တွေအတွက် ဖြစ်ပါတယ်။”
“ဒါဆို မင်းပြောချင်တာက ငါ ဒီသန့်ရှင်းရေးစနစ်ကို သုံးပြီး သွားတိုက်တာ၊ မျက်နှာသစ်တာနဲ့ ရေချိုးတာတွေ လုပ်လို့ရတယ်ပေါ့ ဟုတ်လား။”
ရှောင်းယီက စိတ်လှုပ်ရှားစွာ မေးလိုက်သည်။
“ဟုတ်ပါတယ်။”
စနစ်၏ အတည်ပြုချက်ကို ကြားလိုက်ရသောအခါ ရှောင်းယီသည် မိမိအဝတ်အစားများပေါ်မှ ချွေးနံ့များကို ခံစားရင်း ချက်ချင်းပင် ကျွန်းအထိမ်းအမှတ်ကျောက်တိုင်ဆီသို့ လွင့်မျောသွားကာ စနစ်သိုလှောင်ခန်းထဲမှ အာကာသ တစ်ကိုယ်ရေသန့်ရှင်းရေး သန့်စင်မှုစနစ်ကို ထုတ်ယူလိုက်တော့သည်။
ထိုစဉ် ကျွန်းအထိမ်းအမှတ်ကျောက်တိုင်က အချက်ပေးလာခဲ့သည်။
“သင့်တွင် [အာကာသ တစ်ကိုယ်ရေသန့်ရှင်းရေး သန့်စင်မှုစနစ်] (SSS အဆင့်) ၁ ခုကို ရရှိထားကြောင်း စစ်ဆေးတွေ့ရှိရပါသည်။ ဤစနစ်ကို အသေးစားအာကာသယာဉ်အတွင်း တပ်ဆင်ရန် အုတ်မြစ်ကျောက်နှင့် အနက်ရောင်ရွှေများကို အသုံးပြုလိုပါသလား။”
“အသုံးပြုမယ်။”
“ဤစနစ်ကို သန့်ရှင်းရေးအခန်း တစ်ခုဖြစ်လာအောင် အညစ်အကြေးစုဆောင်းခြင်းစနစ်နှင့် ပေါင်းစပ်လိုပါသလား။”
ကျွန်းအထိမ်းအမှတ်ကျောက်တိုင်က ဆက်လက်အချက်ပေးလာခဲ့သည်။
ရှောင်းယီတစ်ယောက် ခေတ္တမျှ မှင်တက်သွားခဲ့ပြီးနောက် ပြန်ဖြေလိုက်သည်။
“ပေါင်းစပ်မယ်။”
“ပေါင်းစပ်ခြင်း ပြီးဆုံးပါပြီ။”
ရှောင်းယီသည် အသစ်ပေါင်းစပ်လိုက်သော သန့်ရှင်းရေးအခန်းဆီသို့ ချက်ချင်း လွင့်မျောသွားလိုက်သည်။ အကြောင်းမှာ အာကာသထဲတွင် မြေပြင်ပေါ်ထက် ပို၍ ချွေးထွက်လွယ်ခြင်းကြောင့် ဖြစ်သည်။
အကယ်၍ စနစ်က သူ့ကို ဤအာကာသ တစ်ကိုယ်ရေသန့်ရှင်းရေးစနစ်သာ ဆုမချခဲ့လျှင် ရှောင်းယီသည် ရေမချိုးရသည်မှာ လဝက်ခန့် ရှိနေပြီဖြစ်သော်လည်း ဘာမှ ထူးထူးခြားခြား ခံစားရမည်မဟုတ်ပေ။
သို့သော် ဤစနစ်ကို ရရှိပြီးနောက်တွင်မူ ရှောင်းယီသည် မိမိခန္ဓာကိုယ်ပေါ်မှ ပြင်းထန်သော ချဉ်စုပ်စုပ် ချွေးနံ့ကို ချက်ချင်း ခံစားလိုက်ရပြီး တစ်စက္ကန့်မျှပင် ထပ်မစောင့်နိုင်တော့ပေ။
သန့်ရှင်းရေးအခန်းသို့ ရောက်သောအခါ နံရံများတွင် ပုံသေတပ်ဆင်ထားသော ကိရိယာတန်ဆာပလာ အများအပြား ရှိနေသည်ကို တွေ့လို့ရသည်။ သေချာကြည့်လိုက်လျှင် မြေပြင်ပေါ်၌ရှိသော အခြေခံသန့်ရှင်းရေးသုံး ကိရိယာအားလုံး ရှိနေ၏။
“အခု ရေချိုးလို့ရပြီလား။”
ရှောင်းယီသည် ဆလင်ဒါပုံစံ ကိရိယာတစ်ခု၏ ဘေးတွင် လွင့်မျောနေရင်း ရေရွတ်လိုက်ကာ ၎င်းကို စတင်အသုံးပြုလိုက်သည်။
“ကိုယ်တိုက်ဆပ်ပြာရည်၊ ခေါင်းလျှော်ရည်... မရှိပါ။ လောလောဆယ် ရေဖြင့်သာ ဆေးကြောသည့် လုပ်ဆောင်ချက် ရှိပါသည်။”
ကိရိယာက အချက်ပေးလာခဲ့သည်။
၎င်းကို မြင်သောအခါ ရှောင်းယီတစ်ယောက် အားကိုးရာမဲ့စွာ ပြောလိုက်မိ၏။
“SSS အဆင့် သန့်ရှင်းရေးစနစ် ဖြစ်နေပြီးတော့ ဒီလို ပစ္စည်းလေးတွေကိုတောင် ကိုယ်တိုင် ထုတ်မပေးနိုင်ဘူးလား။”
“သန့်ရှင်းရေးစနစ်က သန့်စင်ပေးဖို့ပဲ တာဝန်ရှိပါတယ်။ သန့်ရှင်းရေးလုပ်ငန်းစဉ်မှာ သုံးမယ့် ပစ္စည်းတွေကိုတော့ မိမိဘာသာ ပြင်ဆင်ပါ။”
စနစ်က အချက်ပေးလာ၏။ ရှောင်းယီ မျက်လုံးလှန်လိုက်မိသည်။
“ကောင်းပြီလေ။ ရေနဲ့ ဆေးရတာက ရေမချိုးရတာထက်စာရင် အများကြီး ပိုကောင်းပါတယ်။”
ထိုသို့တွေးပြီး ရှောင်းယီသည် အဝတ်အစားများကို အကုန်ချွတ်ကာ ဘေးနားရှိ အဝတ်လျှော်စက်ထဲသို့ ပစ်ထည့်လိုက်သည်။
အဝတ်လျှော်စက်သည်လည်း သဘာဝအတိုင်း သူ့တွင် အဝတ်လျှော်ဆပ်ပြာ မရှိကြောင်း အချက်ပေးလာသော်လည်း ရှောင်းယီက ၎င်းကို လုံးဝဥပေက္ခာပြုကာ ရေဖြင့်သာ လျှော်ခိုင်းလိုက်သည်။
ထို့နောက် ရှောင်းယီတစ်ယောက် ဆလင်ဒါပုံစံ အခန်းထဲသို့ ဝင်သွားလိုက်သည်။ သူ စတင်အသုံးပြုလိုက်ပြီးနောက် ရေချိုးခန်းတံခါးက တန်းပိတ်သွားခဲ့သည်။
သူ၏ပတ်ပတ်လည်တွင် ပုံသေထိန်းချုပ်ပေးမည့် လက်ကိုင်ကွင်းအချို့ ထွက်ပေါ်လာပြီး ရှောင်းယီကို ဘေးကင်းအောင် ထိန်းထားပေးလိုက်သည်။ ထို့နောက် အရပ်မျက်နှာအနှံ့မှ ရေများ စတင်ထွက်ပေါ်လာတော့သည်။
ရေအပူချိန်မှာ ၄၀ ဒီဂရီစင်တီဂရိတ် ဖြစ်ပြီး ၎င်းက ခန္ဓာကိုယ်အတွက် အလွန်အမင်း သက်တောင့်သက်သာ ရှိလှသည်။ ရေစီးဆင်းမည့် ဦးတည်ချက်ကိုလည်း စိတ်ကြိုက် လွတ်လပ်စွာ ထိန်းချုပ်နိုင်သည်။
အကယ်၍ ရှောင်းယီက ရေကို အပေါ်ကနေ ကျစေချင်လျှင် ပါးစပ်ဖြင့် ပြောလိုက်ရုံရုံပင် ဖြစ်သည်။
ရေများ စီးဆင်းနေစဉ်အတွင်း ရှောင်းယီ၏ ခန္ဓာကိုယ်ပေါ်တွင် အပေါ်အောက် ဖြည်းညှင်းစွာ ပွတ်တိုက်ပေးသည့် စက်မှုလက်တံ အချို့လည်း ရှိနေသေးသည်။
“နေလို့ကောင်းလိုက်တာ။”
ရှောင်းယီ စိတ်ထဲမီ ရေရွတ်လိုက်မိသည်။
ရေချိုးပြီးနောက် ဆလင်ဒါပုံစံ ရေချိုးခန်းသည် ရှောင်းယီကို လေပူဖြင့် စတင်အခြောက်ခံပေးသည်ဖြစ်ရာ သဘက်ပင် သုံးစရာ မလိုတော့ပေ။
လေပူဖြင့် အခြောက်ခံခြင်း ပြီးဆုံးသောအခါ ရေချိုးခန်းတံခါး ပွင့်သွားပြီး ရှောင်းယီတစ်ယောက် လန်းဆန်းတက်ကြွစွာဖြင့် လျှောက်ထွက်လာခဲ့လိုက်သည်။
ဘေးနားရှိ အဝတ်လျှော်စက်သည်လည်း ၎င်း၏အလုပ်ကို အပြီးသတ်ထားပြီးဖြစ်ကာ သူ၏ အဝတ်အစားများကို အခြောက်ခံပေးပြီးဖြစ်သည်။
အဝတ်လျှော်ဆပ်ပြာ မရှိသော်လည်း အဝတ်အစားများမှာ အလွန်စင်ကြယ်စွာ လျှော်ဖွတ်ပြီးသား ဖြစ်နေခဲ့သည်။
သန့်ရှင်းသော အဝတ်အစားများကို ဝတ်ဆင်လိုက်ရသဖြင့် ရှောင်းယီတစ်ယောက် အလွန်အမင်း သက်တောင့်သက်သာ ရှိသွား၏။ ယာဉ်မောင်းခန်းဆီသို့ ပြန်ရောက်သောအခါ အာကာသစက်ရုပ် ၁ က သူ့ကို သတိပေးလာခဲ့သည်။
“ကျွန်းပိုင်ရှင်...ကစဉ့်ကလျားကြယ်ရဲ့ အာကာသယာဉ်က ဒီဘက်ကို ပြန်ပျံသန်းလာပြန်ပြီ။”
“ဒီလောက်တောင် မြန်တာလား။”
ရှောင်းယီက ဇဝေဇဝါဖြင့် ပြောလိုက်သည်။
တစ်ဖက်လူက သတင်းစကားတစ်ခု ပေးပို့ထားပြီးဖြစ်ကာ ၎င်းကို ခွဲခြမ်းစိတ်ဖြာပြီး ရှားနိုင်ငံ ဘာသာစကားသို့ ပြန်ဆိုထားပြီး ဖြစ်သည်။
“လေးစားအပ်ပါသော ကမ္ဘာမြေသားခင်ဗျာ... မင်္ဂလာပါ။ ကျွန်တော်က ကစဉ့်ကလျားကြယ်ရဲ့ အရှင်သခင် ဝမ်ယန် ဖြစ်ပါတယ်။ ကျွန်တော်တို့ ခင်ဗျားဆီကနေ လေဆာပစ္စတို အချို့ကို ဝယ်ယူချင်ပါတယ်။”
ရှောင်းယီတစ်ယောက် ထိုသတင်းစကားကို မြင်လိုက်ရသောအခါ အနည်းငယ် အံ့အားသင့်သွားခဲ့သည်။
“တစ်ဖက်လူက တကယ်ပဲ ငါနဲ့ ကုန်သွယ်ချင်နေတာလား။”
သူ ယခုလေးတင် ရရှိထားသည့် ရေချိုးခန်း သန့်ရှင်းရေးသုံး ကိရိယာများကို တွေးမိပြီးနောက် ရှောင်းယီက ချက်ချင်း ပြန်ဖြေလိုက်သည်။
“ငါ့မှာ အစားအစာ၊ သန့်ရှင်းရေးသုံးပစ္စည်းတွေ၊ အဝတ်လျှော်ဆပ်ပြာ၊ ကိုယ်တိုက်ဆပ်ပြာရည် စတဲ့ သုံးစွဲစရာ ပစ္စည်းအချို့ ဖြည့်တင်းဖို့ လိုအပ်နေတယ်လို့ သူတို့ကို ပြောလိုက်ပါ။”
အချက်ပြလှိုင်း ပေးပို့၊လက်ခံခြင်း ကိရိယာနှင့် ခွဲခြမ်းစိတ်ဖြာစက်သည် ရှောင်းယီ၏ တောင်းဆိုချက်ကို ချက်ချင်း ပြန်ပို့ပေးလိုက်သည်။
ကစဉ့်ကလျားကြယ်၏ အာကာသယာဉ်ပေါ်ရှိ အာကာသယာဉ်မှူး အတော်များများမှာမူ ရှောင်းယီ၏ သတင်းစကားကို လက်ခံရရှိပြီးနောက် လူတိုင်း မှင်တက်သွားကြသည်။
“အစားအစာ လိုချင်တာကတော့ နားလည်ပေးလို့ရပါ။ ဒါပေမယ့် အဝတ်လျှော်ဆပ်ပြာနဲ့ ကိုယ်တိုက်ဆပ်ပြာရည်က ဘာကြီးလဲ။”
“ဒီလို ဆွဲငင်အားမဲ့တဲ့ ပတ်ဝန်းကျင်ထဲမှာ သူက အဝတ်လျှော်တာနဲ့ ရေချိုးတာတွေကို လုပ်နိုင်သေးတာလား။”
“ကမ္ဘာမြေသားတွေရဲ့ အာကာသယာဉ်ပေါ်မှာ ဆွဲငင်အားထိန်းညှိခြင်း နည်းပညာတွေ ရှိနေပြီလို့ ဆိုလိုတာလား။”
“မဖြစ်နိုင်တာ...ဒါက အရမ်းလွန်လွန်းသွားပြီ။ ဘယ်လိုလုပ် ဖြစ်နိုင်မှာလဲ။”
“မဖြစ်နိုင်ဘူး ဟုတ်လား။ သူတို့ ဒီကိုရောက်ဖို့ ကြယ်စုတန်း မြောက်မြားစွာကို ဖြတ်သန်းလာနိုင်တာကတင် သူတို့ ဘယ်လောက်အစွမ်းထက်လဲဆိုတာ ပြနေတာပဲလေ။”
“ဟုတ်တယ်။ ငါတို့ကြယ်စုတန်းထဲကို အောင်အောင်မြင်မြင် ရောက်လာနိုင်တယ်ဆိုကတည်းက ဒီနည်းပညာက ငါတို့ စိတ်ကူးတွေးတောနိုင်တာထက် ကျော်လွန်နေပြီ။”
“ပြီးတော့ ငါတို့ ဒီမှာ ငြင်းခုံနေဖို့ မလိုပါဘူး။ တစ်ဖက်လူက ငါတို့ကို ပြန်ဖြေလာပြီဆိုမှတော့ ဒီအဖြေကို နောက်ကြောင်းပြန် ပို့ပေးလိုက်ရုံပဲ။”
ကစဉ့်ကလျားကြယ်၏ ယာဉ်တန်းသည် ထိုသတင်းစကားကို သူတို့၏ အာကာသစခန်းသို့ ချက်ချင်း ပြန်ပို့ပေးလိုက်ပြီး ထိုမှတစ်ဆင့် အာကာသစခန်းမှ ဂြိုဟ်ပေါ်သို့ ထပ်ဆင့်ပေးပို့လိုက်သည်။
ဝမ်ယန်သည် ထိုပြန်ကြားချက်ကို လက်ခံရရှိသောအခါ သူသည်လည်း အာကာသယာဉ်မှူးများကဲ့သို့ပင် လုံးဝ ဝေခွဲမရ ဖြစ်သွားခဲ့တော့သည်။
သူသည် ရှောင်းယီ၏ ပြန်ကြားချက်ကို ခွဲခြမ်းစိတ်ဖြာရန် လူတစ်စုကို ချက်ချင်း စုဝေးစေလိုက်သည်။
အချိန်အကြာကြီး ခွဲခြမ်းစိတ်ဖြာပြီးနောက်တွင်လည်း သူတို့ ထူးထူးခြားခြား အရေးကြီးသော ကောက်ချက်တစ်စုံတစ်ရာ မချနိုင်ခဲ့ကြပေ။
သို့သော် အချက်အနည်းငယ်ကိုတော့ သဘောတူညီခဲ့ကြသည်။
ပထမအချက်မှာ ကမ္ဘာမြေသား၏ အာကာသယာဉ်ပေါ်တွင် အရင်းအမြစ်များ အနည်းငယ် ပြတ်လပ်နေပုံရသည်။
ဒုတိယအချက်မှာ ကမ္ဘာမြေသားများသည် အာကာသယာဉ်ပေါ်တွင် အဝတ်လျှော်ခြင်းနှင့် ရေချိုးခြင်းကဲ့သို့သော လုပ်ဆောင်ချက်များကို လုပ်ဆောင်နိုင်သည်။ ၎င်းကို မည်သို့လုပ်ဆောင်သည်ကမူ မရှင်းလင်းပေ။
တတိယအချက်မှာ ကမ္ဘာမြေသားများသည် ယခင်က ပေးခဲ့သော လေဆာပစ္စတိုကို စဉ်ဆက်မပြတ် ထုတ်လုပ်နိုင်စွမ်း ရှိပေသည်။ မဟုတ်လျှင် အရောင်းအဝယ် လုပ်ရန် ဖြစ်နိုင်ကြောင်း ပြန်ဖြေလိမ့်မည် မဟုတ်ပေ။
“အခု ငါတို့ ဆွေးနွေးရမှာက... သူနဲ့ ဒီကုန်သွယ်မှုကို လုပ်မှာလား မလုပ်ဘူးလား ဆိုတာပဲ။”
ဝမ်ယန်က အစည်းအဝေးခန်းထဲရှိ လူများကို ကြည့်ကာ မေးလိုက်သည်။
“ဒါပေါ့... လုပ်ရမှာပေါ့။ ဒါက ငါတို့ ပိုမိုအဆင့်မြင့်တဲ့ လူသားမျိုးနွယ် ယဉ်ကျေးမှုနဲ့ ဆက်သွယ်ဖို့အတွက် အခွင့်အရေးပဲ။”
“မှန်တယ်။ ဝေခွဲမရ ဖြစ်နေစရာ အကြောင်းမရှိဘူး။ ငါတို့ ဧကန်မုချ ကုန်သွယ်ရမယ်။”
“ငါတို့သာ သူတို့ရဲ့ ကြယ်တာရာချင်းကူး ပြောင်းသွားလာနိုင်တဲ့နည်းပညာကို ရရင် ငါတို့ ရှင်သန်နေထိုင်ဖို့ သင့်တော်မယ့် အခြားဂြိုဟ်တွေကို သွားရှာလို့ရပြီ။”
“ဟုတ်တယ်။ ဒီကမ္ဘာမြေသားတွေ ပေါ်လာတာကလည်း ဒီစကြာဝဠာထဲမှာ ငါတို့ ရှင်သန်ဖို့ သင့်တော်တဲ့ ဂြိုဟ်တွေ ရှိကိုရှိရမယ်ဆိုတာကို ငါတို့ကို သက်သေပြနေတာပဲ။”
ဝမ်ယန်က ခေါင်းငြိမ့်ပြလိုက်ပြီး ညွှန်ကြားလိုက်သည်။
“ဒါဆိုရင် ကမ္ဘာမြေသား တောင်းဆိုထားတဲ့ ပစ္စည်းတွေကို ချက်ချင်းပြင်ဆင်ပြီး ဟိုဘက်ကို ပို့ဖို့ အဆင်သင့်လုပ်ထားကြ။”
“ဟုတ်ကဲ့။”
ဘေးနားရှိ စစ်သည်တစ်ဦးက တုံ့ပြန်လိုက်သည်။
“အရှင်သခင်... ကျွန်တော့်မှာ နောက်ထပ် အကြံတစ်ခု ရှိပါသေးတယ်။”
လူတစ်ယောက်က မတ်တပ်ရပ်ပြီး ပြောလိုက်သည်။
“ဘာအကြံလဲ။”
ဝမ်ယန်က မျက်မှောင်ကြုတ်ကာ မေးလိုက်သည်။
“တစ်ဖက်လူက အစားအသောက် လိုအပ်နေတာဆိုတော့... ကျွန်တော်တို့ အဲဒီအစားအသောက်ထဲမှာ တစ်ခုခု လုပ်ထားလိုက်မယ်ဆိုရင်ကော။”
ထိုလူက အကြံပြုလိုက်၏။
ထိုအကြံပြုချက်ကို ကြားလိုက်ရသောအခါ အစည်းအဝေးခန်းထဲရှိ လူတိုင်း၏ မျက်လုံးများ လင်းလက်သွားကြသည်။
အကယ်၍ သူတို့သည် ထိုအသေးစားအာကာသယာဉ်ပေါ်ရှိ ကမ္ဘာမြေသားအားလုံးကို ရှင်းလင်းပစ်နိုင်ခဲ့လျှင် ထိုအသေးစားအာကာသယာဉ်ကြီးမှာ ကစဉ့်ကလျားကြယ်စု၏ ပိုင်ဆိုင်မှုတစ်ခု ဖြစ်သွားမည် မဟုတ်ပါလော။
“မရဘူး။”
ဝမ်ယန်က တုံ့ဆိုင်းခြင်းမရှိဘဲ ချက်ချင်းနီးပါး ပြတ်ပြတ်သားသား ပြန်လည်ငြင်းပယ်လိုက်သည်။