အခန်း ၁၀၅၁

အခန်း (၁၀၅၁) အသွင်ပြောင်းလဲခြင်း နတ်ဘုရားတမန်တော်နှင့် နဂါးမြွေမိစ္ဆာသားရဲ။ (၂)

ဤသို့ပြုလုပ်ခြင်းက လူအများ၏ အထင်သေးရွံရှာမှုကို ခံရမည်ဆိုလျှင်တောင် အရေးမကြီးပေ။

"မကြုံဖူးတဲ့ ကပ်ဘေးကြီး... မဟာနတ်ဘုရားစွမ်းအားရှိတဲ့ သိုင်းဝိဇ္ဇာသူတော်စင်တောင် သေဆုံးနိုင်တယ်ဆိုတော့ ဒါက မိစ္ဆာသားရဲတွေနဲ့များ ပတ်သက်နေတာလား။"

ကျန်းယွမ်ဝူ၏ စကားထဲမှ ဖော်ပြလိုက်သော သတင်းအချက်အလက်များကြောင့် စူးချန်ခုန်းမှာ မျက်မှောင်များ စုကြုတ်သွားသည်။ ရှေးဟောင်းခေတ်ကာလတွင် မြင့်မြတ်သော ရှေးဟောင်းနိုင်ငံတော် မတည်ထောင်မီကပင် သဘာဝဘေးအန္တရာယ်များနှင့် ကပ်ဘေးများဖြင့် ပြည့်နှက်နေခဲ့သည်။ ရှေးဟောင်းသူတော်စင် ကိုးပါးသည် ထိုအချိန်တွင် ထမြောက်လာပြီး ကပ်ဘေးကို နှိမ်နင်းကာ မြင့်မြတ်သော ရှေးဟောင်းနိုင်ငံတော်ကို တည်ထောင်ပေးခဲ့၍ လူသားမျိုးနွယ်စုမှာ ဘုန်းတန်ခိုး တောက်ပခဲ့ခြင်းဖြစ်သည်။

ရှေးဟောင်းသူတော်စင် ကိုးပါးထဲမှ ပထမဆုံးသော သူတော်စင် ဧကရာဇ်မင်းမြတ်ကျန်း၏ မျိုးဆက်ဖြစ်သူ ကျန်းယွမ်ဝူမှာ လျှို့ဝှက်ချက်များကို ပိုမိုသိရှိထားပြီး ဝိညာဉ်စွမ်းအင်များ ဤကဲ့သို့ ပြန်လည်မြင့်တက်လာခြင်းမှာ ထိုကြောက်မက်ဖွယ်ကောင်းသော ရန်သူများ ပြန်လည်ရောက်ရှိလာမည့် ရှေ့ပြေးနိမိတ်ဖြစ်ကြောင်း သိရှိနေသည်။

ထို့ကြောင့် ကျန်းယွမ်ဝူမှာ စိတ်ပျက်လက်ပျက်ဖြစ်ပြီး ရှေးဟောင်းသူတော်စင် ကိုးပါး ပြန်လည်မွေးဖွားလာလျှင်ပင် ရှေးအခါကကဲ့သို့ ကပ်ဘေးကို ငြိမ်းချမ်းအောင် မစွမ်းဆောင်နိုင်တော့ဟု ယူဆထားသည်။

ထို့ကြောင့် လူသားမျိုးနွယ်စုမှာ မိစ္ဆာသားရဲများအဖြစ် အပြည့်အဝ အသွင်ကူးပြောင်းနိုင်ကြောင်း ရှေးဟောင်းကျမ်းအချို့တွင် ဖတ်ရှုလိုက်ရချိန်၌ သူ၏နှလုံးသားထဲတွင် မျှော်လင့်ချက်တစ်ခု ပေါ်ပေါက်လာသည်။ မိစ္ဆာသားရဲများ၏ အသိုင်းအဝိုင်းထဲသို့ ဝင်ရောက်ခြင်းဖြင့် သူသည် အောင်နိုင်သူတစ်ယောက်ဖြစ်လာပြီး သူလိုချင်သမျှ အရာအားလုံးကို ရရှိနိုင်မည်ဟု ယုံကြည်ထားသည်။

"ကျန်းယွမ်ဝူ... ရာစုနှစ်ပေါင်းများစွာ ခင်မင်ခဲ့ကြတဲ့ ငါတို့ကြားထဲမှာ မင်းက ဒီလောက်အထိ တကယ့်ကို ယုတ်ညံ့တဲ့ကောင် ဖြစ်နေလိမ့်မယ်လို့ မထင်ထားခဲ့ဘူး။ ငါ့ရဲ့ ကျန်းမိသားစုထဲက ဒီသစ္စာဖောက်ကို ငါကိုယ်တိုင် ရှင်းပစ်မယ်။” ကျန်းယွီက အေးစက်သော ဒေါသဖြင့် ကြုံးဝါးလိုက်သည်။

"ဟားဟားဟား.. မင်းတို့မှာ အဲဒီလောက်စွမ်းအား ရှိလို့လား။ ငါတစ်ယောက်တည်းနဲ့တင် မင်းတို့ကို အကုန်ရှင်းထုတ်ပစ်ဖို့ လုံလောက်တယ်။ အစ်ကို မြွေနဂါးကလည်း ဒီမှာ ရှိနေတာကို" ကျန်းယွမ်ဝူက ကျယ်လောင်စွာ ရယ်မောလိုက်သည်။

မိစ္ဆာသားရဲတစ်ကောင် ဖြစ်လာရန်အတွက် သတ်မှတ်ချက်အချို့ ရှိပြီး ကျန်းယွမ်ဝူမှာ အများစုကို ပြည့်မီနေပြီဖြစ်သည်။ သူ့ကိုယ်ခန္ဓာအတွင်းမှ အမှတ်အသားကို အသက်သွင်းပေးမည့် 'နတ်ဘုရားစေတမန်' တစ်ဦးသာ လိုအပ်သည်။

ထို 'နတ်ဘုရားစေတမန်' က မိစ္ဆာသားရဲ 'မြွေနဂါး' မှတစ်ဆင့် သူ့အတွက် စည်းကမ်းချက်များ သတ်မှတ်ပေးထားသည်။ သူ၏ သစ္စာရှိမှုကို သက်သေပြရန်နှင့် မိစ္ဆာသားရဲအဖြစ် အသွင်ကူးပြောင်းရာတွင် အသားနှင့်သွေး အာဟာရအဖြစ် ကျန်းမိသားစုမှ ထူးချွန်သူ သုံးဦးကို ပူဇော်ရန် လိုအပ်သည်။ ထို့ကြောင့် သူသည် ကျန်းယောင်၊ ကျန်းဖော့နှင့် ကျန်းယွီတို့ကဲ့သို့ နတ်ဘုရားကိုယ်ခန္ဓာ ပိုင်ဆိုင်ထားသူများကို ရွေးချယ်ခဲ့ခြင်းဖြစ်သည်။

ကျန်းယွမ်ဝူသည် သူတို့၏ စွမ်းအားကို ကောင်းစွာ သိရှိသည်။ နတ်ဘုရားခန္ဓာကိုယ် ပိုင်ဆိုင်ထားသော သိုင်းဝိဇ္ဇာသူတော်စင်အဆင့်တွင် သူ၏ အဆင့်အတန်းအရ တစ်ယောက်တည်းဖြင့်ပင် သူတို့ကို အနိုင်ယူရန် မဖြစ်နိုင်သည်မဟုတ်၊ မိစ္ဆာသားရဲ 'မြွေနဂါး' ၏ အကူအညီပါရှိလျှင် ပို၍ပင် လွယ်ကူသည်။

စူးချန်ခုန်းကို လိုက်ပါလာရန် ဖိတ်ခေါ်ခဲ့ခြင်းမှာမူ စူးချန်ခုန်း၏ မူလဝိညာဉ်ကြောင့်ဖြစ်သည်။ မိစ္ဆာသားရဲအဖြစ် ပြောင်းလဲရန် အဓိကအချက်မှာ မူလဝိညာဉ်အဆင့်သို့ ရောက်ရှိနေရန် လိုအပ်ခြင်းဖြစ်သည်။

ကျန်းယွမ်ဝူအနေဖြင့် သူ၏ ကိုယ်ပိုင်ကျင့်ကြံမှုဖြင့်ဆိုလျှင် အလွန်ခက်ခဲသော်လည်း စူးချန်ခုန်း၏ မူလဝိညာဉ်ကို ဝါးမြိုသန့်စင်ခြင်းဖြင့် သူ၏ ဝိညာဉ်အသွင်ကူးပြောင်းမှုကို အားဖြည့်နိုင်မည်ဖြစ်သည်။ စူးချန်ခုန်းမှာ ငယ်ရွယ်သော်လည်း မူလဝိညာဉ်ကို ပိုင်ဆိုင်ထားသူဖြစ်ရာ အကောင်းဆုံးသော အားဖြည့်ပစ္စည်းပင် ဖြစ်သည်။

"သေစမ်း… ဒီပင်လယ်ပြင်တစ်ခုလုံးကို မင်ရည်လို အနက်ရောင်ရေတွေနဲ့ ဖုံးလွှမ်းထားပြီး လေဟာနယ်ကိုလည်း ပိတ်ဆို့ထားတယ်။ မိသားစုက ပေးလိုက်တဲ့ 'ရွေ့ပြောင်းမဟာစာလိပ်' လည်း အလုပ်မလုပ်တော့ဘူး။" ကျန်းယောင်က မျက်မှောင်ကြုတ်လျက် ဆိုသည်။ ကျန်းယွမ်ဝူမှာ သူတို့၏ ထွက်ပြေးနိုင်သော နည်းလမ်းအားလုံးကို ကြိုတင်တွက်ချက်ထားပြီးဖြစ်သည်။

မှောင်မိုက်သော ရေပြင်ထဲတွင် မိစ္ဆာသားရဲ၏ ပုံသဏ္ဌာန်မှာ ဝိုးတဝါး ပေါ်လာသည်။ လူပုံသဏ္ဌာန်ဖြစ်သော်လည်း ဆယ်ပေကျော်မြင့်ပြီး လူ့ကိုယ်ပေါ်တွင် မြွေခေါင်းပါရှိကာ ခြေထောက်နေရာတွင် ရှည်လျားသော မြွေအမြီးပါဝင်သည်။ ခန္ဓာကိုယ်တစ်ခုလုံးတွင် အနီရင့်ရောင် အကြေးခွံများ ဖုံးလွှမ်းထားပြီး ခေါင်းပေါ်တွင် ချိုကောက်နှစ်ချောင်းပါရှိကာ ရက်စက်သော မြွေမျက်လုံးများက အမုန်းတရားများဖြင့် ပြည့်နှက်နေသည်။

မြွေနဂါးဟု ခေါ်ဆိုသော မိစ္ဆာသားရဲက လျှာကို ယမ်းကာ ရယ်မောလိုက်သည်။ "ပထမဆုံး သူတော်စင်ရဲ့ မျိုးဆက်က ငါတို့ဆီ ရောက်လာတာပဲ... ပထမဆုံး သူတော်စင်သာ သိသွားရင် ဘယ်လိုနေမလဲ။"

စူးချန်ခုန်းသည် အသက်ကို ပြင်းပြင်းရှူသွင်းလိုက်ပြီး သူ၏ မျက်လုံးများမှာ အေးစက်သွားသည်။

"အစ်ကိုတို့ သုံးယောက် ကျန်းယွမ်ဝူကို ထိန်းထားလိုက်။ ဒီမိစ္ဆာသားရဲကိုတော့ ကျွန်တော် တာဝန်ယူမယ်။"

စူးချန်ခုန်း၏ အာရုံခံစားမှုအရ 'မြွေနဂါး' ၏ အရှိန်အဝါမှာ ပြင်းထန်သော်လည်း နတ်ဘုရားခန္ဓာကိုယ် သိုင်းဝိဇ္ဇာသူတော်စင်တစ်ဦး၏ အတိုင်းအတာထဲတွင်သာ ရှိသည်။ သူ၏ မူလဝိညာဉ်ဖြင့်ဆိုလျှင် မိစ္ဆာသားရဲကို အတိုင်းအတာတစ်ခုအထိ တန်ပြန်နိုင်လိမ့်မည်။

အကယ်၍ မြွေနဂါးကို အရင်ရှင်းပြီးပါက သူတို့လေးယောက်ပေါင်းပြီး ကျန်းယွမ်ဝူကို တိုက်ကာ အနိုင်ရဖို့ အခွင့်အရေးရှိလေသည်။

"မင်းက ဒီမိစ္ဆာသားရဲကို ရင်ဆိုင်မှာလား။ သူ့ရဲ့ အရှိန်အဝါက ကျန်းယွမ်ဝူနဲ့ သိပ်မခြားနားဘူး။" စူးချန်ခုန်း၏ စကားကို ကြားပြီး ကျန်းဖော့နှင့် ကျန်းယွီတို့မှာ အလွန်အံ့ဩသွားကြသည်။ နတ်ဘုရားမျိုးစေ့ သိုင်းဝိဇ္ဇာသူတော်စင်တစ်ဦးအနေဖြင့် မူလဝိညာဉ်ရှိလျှင်ပင် ဤမိစ္ဆာသားရဲကို အနိုင်ယူရန်မှာ အလွန်ခက်ခဲသော ကိစ္စဖြစ်သည်ဟု သူတို့ ယုံကြည်ထားကြသည်။