အခန်း ၁၀၅၉

အခန်း (၁၀၅၉) ရှေးဟောင်း ကောင်းကင်ဘုံ မိစ္ဆာ။ မိစ္ဆာအသွင်ပြောင်းခြင်း အခမ်းအနား။ (၁)

"ကျန်းယောင်၊ ခုနက ဘာတွေ ဖြစ်ခဲ့တာလဲ"

အဖြူရောင်ဆံပင်နှင့် အဘိုးအို ကျန်းရှော‌တောက်က ဒေါသထွက်ခြင်းမရှိဘဲ ကြောက်မက်ဖွယ် ကောင်းသော အရှိန်အဝါကို ထုတ်လွှတ်ကာ ထွက်ပြေးရန် ကြိုးစားနေသော ကျန်းယွမ်ဝူကို အလွယ်တကူ တားဆီးထားလိုက်သည်။

သူ၏ အကြည့်တို့မှာ ပင်လယ်ရေအောက်ရှိ မိစ္ဆာသားရဲ၏ အလောင်းနှင့် ကျန်းယောင်တို့၏ မျက်နှာပေါ်တွင် ကျန်ရှိနေသေးသော ကြောက်ရွံ့မှုများဆီသို့ ရောက်ရှိသွားသည်။ သူက လေးနက်သော အသံဖြင့် မေးမြန်းသည်။

"အကြီးအကဲ ရှောတောက်၊ မကြာသေးခင်က ကျန်းယွမ်ဝူက မိစ္ဆာသားရဲတစ်ကောင်ကို အမဲလိုက်ဖို့ အကူအညီတောင်းခဲ့ပေမယ့် သူက အကြံဆိုးတွေ ရှိနေခဲ့တာ..."

ကျန်းယောင်က ခုနက ဖြစ်ပျက်ခဲ့သမျှကို အလျင်အမြန် ပြန်လည်ပြောပြသည်။

ကြားပြီးနောက် ကျန်းရှောတောက် အံ့အားသင့်သွားသည်။ သူက ကျန်းယွမ်ဝူကို နောင်တရသည့် အကြည့်ဖြင့် ကြည့်ကာ "နှမြောစရာပဲ... မင်းရဲ့ အရည်အချင်းက မဆိုးဘူး။ အနာဂတ်အတွက် အလားအလာကောင်းတွေ ရှိခဲ့ပေမယ့် မိစ္ဆာသားရဲ လှည့်စားတာကို ခံလိုက်ရပြီး မင်းရဲ့ အနာဂတ်ကို ဖျက်ဆီးပစ်လိုက်တာပဲ" ဟု ဆိုသည်။

ကျန်းယွမ်ဝူမှာ စကားမပြောဘဲ သွားများကိုသာ တင်းတင်းစေ့ထားလိုက်သည်။

မိသားစုအပေါ် ခွင့်မလွှတ်နိုင်သော ပြစ်မှုတစ်ခုကို ကျူးလွန်မိခြင်း၏ အကျိုးဆက်ကို သူ ကောင်းကောင်း သိထားသည်။ မိသားစုဝင်များက သူ့ကို ဘယ်တော့မှ အလွယ်တကူ လွှတ်ပေးလိမ့်မည် မဟုတ်ပေ။

သူ့ဘေးတွင် ကျန်းဖော့မှာ စိတ်တည်ငြိမ်အောင် ကြိုးစားပြီးနောက် "အဲဒီ နတ်ဘုရားတမန်တော်... သူက ဘယ်သူလဲ။ ဧကရာဇ်မင်းမြတ်တောင်မှ သတိထားပြီး ကိုယ်တိုင် ရောက်လာတဲ့အထိပဲ" ဟု မေးလိုက်သည်။

စူးချန်ခုန်းလည်း ဂရုတစိုက် နားထောင်နေသည်။ မိစ္ဆာသားရဲက နတ်ဘုရားတမန်တော်ဟု ခေါ်ဆိုခဲ့သည့် ထိုသူမှာ အလွန် ကြောက်မက်ဖွယ်ကောင်းပြီး နက်ရှိုင်းသော ပင်လယ်ပြင်ကဲ့သို့ ခန့်မှန်းရခက်သည်။ သူ၏ အကြည့်တစ်ချက်တည်းဖြင့်ပင် သူတို့ကို တုန်လှုပ်စေနိုင်ခဲ့သည်။

"ငါ ထင်တာမမှားဘူးဆိုရင်... ဒီနတ်ဘုရားတမန်တော်က 'ကောင်းကင်ဘုံ မိစ္ဆာ' ဖြစ်ဖို့ များတယ်။ ရှေးဟောင်း သူတော်စင် ကိုးပါးက အရင်ကတည်းက ဖိနှိပ်ထားခဲ့တာ" ဟု ကျန်းရှောတောက်က လေးနက်သော မျက်နှာထားဖြင့် ဆိုသည်။

"ကောင်းကင်ဘုံ မိစ္ဆာ"

အားလုံးမှာ တုန်လှုပ်သွားကြသည်။

"အကြီးအကဲ စူး... မိစ္ဆာသားရဲတွေထဲမှာ အစွမ်းထက်ဆုံးကို ကောင်းကင်ဘုံ မိစ္ဆာလို့ ခေါ်တယ်။ တစ်ကောင်ချင်းစီက ရှေးခေတ်ကာလတုန်းက ကပ်ဆိုးကြီးတွေကို ဖန်တီးခဲ့တာ။ ရှေးဟောင်း သူတော်စင် ကိုးပါးကသာ ဒီကောင်းကင်ဘုံ မိစ္ဆာတွေကို ဖိနှိပ်နိုင်ခဲ့တာ..." ကျန်းယောင်က စူးချန်ခုန်း၏ နားထဲသို့ တိုးတိုးလေး ရှင်းပြပေးသည်။

"ရှေးဟောင်း သူတော်စင် ကိုးပါးက ဖိနှိပ်ထားတဲ့ ကောင်းကင်ဘုံ မိစ္ဆာ..."

စူးချန်ခုန်းမှာ အံ့အားသင့်သွားသည်။ ထိုနတ်ဘုရားတမန်တော်မှာ မိစ္ဆာသားရဲများထဲတွင် အထွတ်အထိပ်ဖြစ်သည့် ကောင်းကင်ဘုံ မိစ္ဆာဖြစ်နေသည်။

"ဒီကောင်းကင်ဘုံ မိစ္ဆာတွေက သတ်ရခက်တယ်။ ရှေးဟောင်း သူတော်စင် ကိုးပါးတောင်မှ သူတို့က နှစ်အနည်းငယ်ကြာရင် ပြန်ပေါ်လာနိုင်တယ်လို့ ပြောခဲ့ကြတယ်။ ပထမဆုံး သူတော်စင်က ကျန်းမိသားစုကို 'ကောင်းကင်ကြည့် မှန်' တစ်ခု ပေးခဲ့တယ်။ ဒီမှန်က ကောင်းကင်ဘုံ မိစ္ဆာတွေရဲ့ အရှိန်အဝါကို ဖမ်းယူနိုင်တယ်။ သူတို့သာ မြင့်မြတ်တဲ့ ရှေးဟောင်းနိုင်ငံတော်ထဲ ရောက်လာရင် ဒီမှန်က သိနိုင်တယ်" ဟု ကျန်းရှောတောက်က ရှင်းပြသည်။

"အဲဒီလိုလား..."

စူးချန်ခုန်းမှာ ဧကရာဇ်မင်းမြတ်တို့ အဘယ်ကြောင့် အလျင်အမြန် ရောက်ရှိလာသလဲဆိုတာကို နားလည်သွားသည်။ 'ကောင်းကင်ကြည့်မှန်' က ကောင်းကင်ဘုံ မိစ္ဆာ၏ အရှိန်အဝါကို သိရှိသွားခြင်းကြောင့် ဖြစ်သည်။

"ကောင်းကင်ဘုံ မိစ္ဆာက ကျွန်တော်တို့ကို ဘာလို့ မသတ်တာလဲ။ သူ့စွမ်းအားနဲ့ဆိုရင် လွယ်လွယ်လေး မဟုတ်ဘူးလား" ဟု ကျန်းပိုက မေးသည်။

ကျန်းရှောင်တောက်က သူ့ကို တစ်ချက်ကြည့်ကာ "ဖြစ်နိုင်တာက... သူက မင်းတို့ကို အရေးမပါဘူးလို့ ထင်တာပဲ။ သူက ကောင်းကင်ဘုံ မိစ္ဆာလေ။ ပုရွက်ဆိတ်တွေကို နင်းချေဖို့ သူ အချိန်ကုန်ခံပါ့မလား" ဟု အေးစက်စက် ပြောသည်။

ထိုစကားကြောင့် ကျန်းဖော့၏ ပါးစပ် တွန့်ချိုးသွားသည်။ ကောင်းကင်ဘုံ မိစ္ဆာများ၏ အမြင်တွင် သူတို့မှာ ပုရွက်ဆိတ်များသာ ဖြစ်သည်။ ပုရွက်ဆိတ်တစ်ကောင်ကို ဘယ်သူက ဂရုစိုက်မိမည်နည်း။

"ဒါပေမယ့် ကောင်းကင်ဘုံ မိစ္ဆာတစ်ကောင်က အကြောင်းမဲ့နဲ့ သူ့ကိုယ်သူ ဖော်ထုတ်မှာတော့ မဟုတ်ဘူး။ သူ တစ်ခုခု လုပ်ခဲ့မှာပဲ"

လူတိုင်းမှာ အတွေးများဖြင့် နစ်မွန်းနေကြသည်။ စူးချန်ခုန်းမှာ ထိုနတ်ဘုရားတမန်တော် ပြောခဲ့သည့် စကားများ၊ မြင်ခဲ့ရသည့် မြင်ကွင်းများနှင့် ရှေးဟောင်းဘာသာစကားကို ပြန်တွေးမိသည်။

"ဝီ ဝီ ဝီ"

မသိစိတ်အရ ပြန်တွေးမိစဉ် စူးချန်ခုန်း၏ ခန္ဓာကိုယ်မှာ ရုတ်တရက် တုန်ခါသွားလေ၏။ ဦးနှောက်အတွင်း ရှေးဟောင်းဘာသာစကားများ ပြန်လည် ပဲ့တင်ထပ်လာသည်။ သူ၏ စိတ်ဝိညာဉ်နယ်ပယ်အတွင်းရှိ မိစ္ဆာဝိညာဉ် အမှတ်အသားမှာ ပူလောင်လာသည်။

ယခင်ကကဲ့သို့ စူးချန်ခုန်း၏ အသက်စွမ်းအင်ကို စုပ်ယူရုံသာမကဘဲ သူ၏ ခန္ဓာကိုယ်ကိုပါ ပေါင်းစပ်ရန် ကြိုးစားနေသကဲ့သို့ ထူးဆန်းသော စွမ်းအားများ ထုတ်လွှတ်နေသည်။

"ဒုန်း"

စူးချန်ခုန်း၏ မျက်လုံးရှေ့တွင် မိစ္ဆာသားရဲကဲ့သို့ သတ္တဝါများ ဖျက်ဆီးနေသည့် မြင်ကွင်းများ ထပ်မံ ပေါ်လာသည်။ သူတို့ ဖြတ်သန်းသွားသည့် နေရာတိုင်းတွင် မိစ္ဆာသားရဲ တစ်ကောင်ချင်းစီမှာ ပိုမို သန်မာလာကြသည်။

ခဏတာအတွင်းမှာပင် စူးချန်ခုန်းသည်... သူကိုယ်တိုင်လည်း ထိုသူတို့ထဲမှ တစ်ဦး ဖြစ်သွားသလို ခံစားလိုက်ရသည်။

"အကြီးအကဲ စူး"

ထိုအချိန်တွင် ကျန်းယောင်၏ အော်သံမှာ စူးချန်ခုန်း၏ နားထဲသို့ ရောက်ရှိလာသည်။