အခန်း ၉

အခန်း ၉ ပေါက်ကွဲမှု လေးကြိမ်ဆက်တိုက်

စကားစ်ဒေးလ် မြို့လေး၏ မြောက်ဘက်တွင် သစ်တောအုပ်ငယ်လေး တစ်ခုရှိသည်။ အချိန်ကား ညနေစောင်းနေပြီဖြစ်ရာ သစ်တောအုပ်အတွင်းရှိ ကားလမ်းမပေါ်မှ လမ်းမီးတိုင်များက စတင် လင်းထိန်လာလေပြီ။

"အရာရှိကြီး... ကျွန်မ မိုနာပါ"

အနက်ရောင် အက်စ်ယူဗီကားကြီးက ကွေ့ကောက်နေသော လမ်းမထက်တွင် အလွန်မြန်ဆန်စွာ ဖြတ်သန်းသွားနေသည်။ မိုနာက ရင်ထဲမှ စိုးရိမ်ထိတ်လန့်မှုများကို တိတ်တဆိတ် ဖိနှိပ်ထားလိုက်ပြီး ရိုအန်၏ ဖုန်းကိုကိုင်ကာ ဖုန်းတစ်ဖက်ခြမ်းရှိ သြဂတ်စ်ထံသို့ လက်ရှိ အခြေအနေများကို သတင်းပို့နေလေသည်။

"လူသတ်သမား ကွန်ရက်က လွှတ်တော်အမတ် ကတော်တစ်ယောက်ရဲ့ ကယ်ဒီလက်ကားကို လုယူသွားပါတယ်... လောလောဆယ် ကားလမ်းမပေါ်မှာ ထွက်ပြေးနေပြီး သူ့ကို တားဆီးပေးဖို့ အထူးစစ်ဆင်ရေး တပ်ဖွဲ့ကို တောင်းဆိုပါတယ်"

"အထူးစစ်ဆင်ရေး တပ်ဖွဲ့က နောက်ဆယ်မိနစ်နေရင် ရောက်လာလိမ့်မယ်"

ဖုန်းတစ်ဖက်ခြမ်းမှ သြဂတ်စ်က အဓိကရုဏ်းနှိမ်နင်းရေး ကားပေါ်တွင် ထိုင်နေပြီး တည်ငြိမ်စွာ ပြန်ပြောလိုက်သည်။

"ဒါပေမဲ့ နယူးယောက်ရဲတပ်ဖွဲ့ကို ငါ ကြိုပြီး အကြောင်းကြားထားတယ်... သူတို့က ပစ်မှတ်နေရာနဲ့ အနီးဆုံးမှာရှိတဲ့ ကင်းလှည့်ရဲတွေကို လွှတ်ပြီး တစ်ဖက်လူကို တားဆီးခိုင်းထားတယ်... မင်းတို့လည်း သတိထားကြဦး"

"ဟုတ်ကဲ့ပါ အရာရှိကြီး"

မိုနာက ဖုန်းချလိုက်ပြီး ရိုအန်၏ နိုကီယာဖုန်းကို အိတ်ကပ်ထဲသို့ အလွယ်တကူ ထိုးထည့်လိုက်သည်။ ထို့နောက် ခေါင်းငုံ့ကာ ကွန်ပျူတာ ကီးဘုတ်ကို တဖြောက်ဖြောက် ဆက်လက် ရိုက်နှိပ်နေပြီး သူမ၏ မျက်နှာတွင် စိုးရိမ်ပူပန်မှုများ အထင်းသား ပေါ်လွင်နေသည်။

"ဆက်ပြီး ဘာလုပ်ကြမလဲ... စောစောက ယူလန်ဒါရဲ့ ယောကျ်ား လွှတ်တော်အမတ် ယေးလ်ရဲ့ အချက်အလက်ကို ငါ ရှာကြည့်လိုက်တယ်... သူက နယူးယောက် ဒေသက ခိုင်မာတဲ့ ရီပတ်ဘလီကန် ပါတီဝင် ဖြစ်သလို သေနတ်ကိုင်ဆောင်ခွင့်ကို အပြင်းအထန် ထောက်ခံတဲ့သူပဲ... သူ ဘယ်သွားသွား သေနတ် သယ်သွားလေ့ရှိပြီး ကားထဲမှာလည်း ချွင်းချက်မရှိဘူးလို့ လူလုံးပြပွဲတွေမှာ အကြိမ်ကြိမ် ပြောဖူးတယ်"

"အမေရိကန်ဆိုတဲ့ နာမည်နဲ့ လိုက်ဖက်တာပဲ"

ရိုအန်မှာ အနည်းငယ် စိတ်ပျက်သွားသော်လည်း ကိစ္စများက အဆုံးသတ်ရန် ခြေတစ်လှမ်းသာ လိုတော့သဖြင့် နောက်ဆုတ်ရန် လုံးဝ မဖြစ်နိုင်တော့ပေ။ ထို့ကြောင့် မိုနာ့ဘက်သို့ လှည့်ကြည့်ကာ မှာကြားလိုက်သည်။

"ကျည်ကာအင်္ကျီကို ဝတ်ထားလိုက်... ခဏနေလို့ ရန်သူနဲ့ တွေ့ရင် သေချာပေါက် သတိထားရမယ်"

"အိုကေ"

မိုနာက ခေါင်းညိတ်လိုက်သည်။ ကိုယ်ပိုင် အသက်အန္တရာယ် လုံခြုံရေး ကိစ္စနှင့် ပတ်သက်လာလျှင် အရေးကြီးသည်နှင့် မကြီးသည်ကို သူမ ကောင်းစွာ ခွဲခြားတတ်လေသည်။

အက်စ်ယူဗီ ကားကြီးက လမ်းမထက်တွင် အရှိန်ပြင်းပြင်း ပြေးလွှားနေသည်။ လမ်းကွေ့ အနည်းငယ်ကို ဖြတ်ကျော်ပြီးနောက် ကွန်ပျူတာပေါ်ရှိ အနီရောင် အစက်ကလေးနှင့် ပို၍ နီးကပ်လာသည်ကို ရိုအန် မြင်လိုက်ရသည်။ ထိုအချိန်တွင် အပြင်ဘက်မှ ပြင်းထန်သော အပြန်အလှန် ပစ်ခတ်သံများ ရုတ်တရက် ထွက်ပေါ်လာတော့သည်။

သေနတ်သံများ ဆက်တိုက် ထွက်ပေါ်လာသည်။

ရိုအန်က ချက်ချင်းပင် လီဗာကို အဆုံးထိ နင်းချလိုက်ရာ ကားကြီးက ရှေ့ရှိ တောင်ကုန်းငယ်ကို ဖြတ်ကျော်သွားသည်။ ထိုအခါ ကားခေါင်းပိုင်း ပျက်စီးနေပြီး လမ်းဘေး တစ်ဖက်တစ်ချက်စီသို့ လွင့်စင်သွားသော နယူးယောက် ရဲတပ်ဖွဲ့၏ ကင်းလှည့်ကားများကို ချက်ချင်း မြင်လိုက်ရတော့သည်။

ထို့မျှမက မြေပြင်ပေါ်တွင် လဲကျကာ သေနတ်ဒဏ်ရာ ရထားသော အခြား ကင်းလှည့်ရဲ တစ်ဦးကို ကျန်ရဲအရာရှိ နှစ်ဦးက အရေးပေါ် ကုသမှုများ ပြုလုပ်ပေးနေကြသည်။

ရိုအန်က ဘရိတ်ကို ဖမ်းနင်းလိုက်ပြီး မိုနာက ကားပြတင်းပေါက်ကို အလျင်အမြန် ဖွင့်ကာ မေးလိုက်သည်။

"ဘာဖြစ်သွားတာလဲ"

"ကယ်ဒီလက် ကားတစ်စီးက ကျွန်တော်တို့ ချထားတဲ့ ယာယီ စစ်ဆေးရေးဂိတ်ကို အတင်း ဖြတ်မောင်းသွားတာ"

ကင်းလှည့်ရဲ တစ်ဦးက ကြောက်လန့်တကြားဖြင့် ပြန်ဖြေလိုက်သည်။

"တစ်ဖက်လူက ဂိတ်ကို ဖြတ်မောင်းသွားတဲ့ အချိန်မှာ ရိုင်ဖယ်သေနတ် တစ်လက် ထုတ်ပြီး ကျွန်တော်တို့ကို ပစ်သွားသေးတယ်"

"တစ်ဖက်လူရဲ့ ရုပ်ကို သေချာ မြင်လိုက်ရလား"

"လူဖြူ အမျိုးသားကြီး တစ်ယောက်ပဲ"

"အိုကေ... သတင်းအချက်အလက်အတွက် ကျေးဇူးပဲ"

မိုနာက ယာဉ်မောင်းဘေးခုံ အောက်ရှိ အရေးပေါ် ဆေးသေတ္တာကို ရဲအရာရှိ နှစ်ဦးထံ လှမ်းပစ်ပေးလိုက်ပြီး ရိုအန်က လီဗာကို နင်းကာ ကားကို ဆက်လက် မောင်းနှင်ထွက်ပြေးသွားသည်။

"လွှတ်တော်အမတ် ယေးလ်ရဲ့ အကူအညီကို ကျေးဇူးတင်ရမယ်... အခုတော့ ကွန်ရက်မှာ ရိုင်ဖယ်သေနတ် ရသွားပြီ"

မိုနာက ရင်ဘတ်ပေါ်ရှိ ကျည်ကာအင်္ကျီကို ပွတ်သပ်နေသည်ကို မြင်လိုက်ရသောအခါ ရိုအန်က မျက်မှောင်ကြုတ်လိုက်သည်။

"နောက်ခန်းကို သွားပြီး သေချာ ပုန်းနေလိုက်"

"အိုကေ"

အရေးကြီးသော အချိန်တွင် မိုနာက ခေါင်းမာမနေတော့ပေ။ ကွန်ပျူတာကို ပိုက်ကာ ထရပ်လိုက်ပြီး ယာဉ်မောင်းဘေးခုံမှနေ၍ ကားနောက်ခန်းဆီသို့ ရွှေ့ပြောင်းသွားလေသည်။

မိုနာ ကားနောက်ခန်းတွင် ထိုင်ကာ ထိုင်ခုံခါးပတ် ပတ်ပြီးသွားသည်ကို မြင်သောအခါ ရိုအန်၏ မျက်လုံးများက ချက်ချင်းပင် စူးရှထက်မြက်သွားတော့သည်။

"ကားပြိုင်မောင်းမယ့် အချိန် စပြီ"

ညအမှောင်ထုအောက်တွင် သစ်တောအုပ် လမ်းမကြီး၏ တစ်ဖက်တစ်ချက်စီ၌ လျှပ်စစ်မီးများ လင်းထိန်နေသည်။ မလှမ်းမကမ်းတွင် မီးရောင်စုံများ တောက်ပနေသော နယူးယောက် မြို့လယ်ခေါင် ရှိနေပြီး မြို့ကြီးပြကြီး၏ ညဘဝက ယခုမှ စတင်နေလေသည်။

အင်အားအပြည့် ပါဝင်သော အင်ဂျင်သံကြီး တစ်ခုက အဝေးမှနေ၍ နီးကပ်လာသည်။ ထို့နောက် မင်ရည်ကဲ့သို့ နက်မှောင်နေသော လျှပ်စီးကြောင်း တစ်ခုအလား အက်စ်ယူဗီ ကားကြီးက လမ်းမထက်တွင် အရှိန်ပြင်းပြင်း ပြေးလွှားသွားသည်။ ရိုအန်က အေးစက်သော မျက်နှာထားဖြင့် ယာဉ်မောင်းခုံတွင် ထိုင်ကာ လက်နှစ်ဖက်ဖြင့် စတီယာရင်ကို ထိန်းချုပ်ရင်း ယခင်ကထက် ဆယ်ဆမျှ ပို၍ ရူးသွပ်သော အရှိန်ဖြင့် ကားများကို ကျော်တက်နေတော့သည်။

ကားနောက်ကြည့်မှန်မှ တစ်ဆင့် မိမိနှင့် တဖြည်းဖြည်း နီးကပ်လာသော အနက်ရောင် အက်စ်ယူဗီ ကားကြီးကို မြင်လိုက်ရသောအခါ ဘယ်ဘက်လက်မှ အလွန်အမင်း နာကျင်နေသော ကွန်ရက်၏ နှလုံးသားမှာ ဒိတ်ဒိတ်ကြဲ ခုန်ပေါက်လာသည်။ ဤမျှ ကွေ့ကောက်နေသော တောတွင်းလမ်းမပေါ်တွင် ဤကဲ့သို့ ရူးရူးမူးမူး ကားမောင်းသူမျိုးကို သူ ပထမဆုံးအကြိမ် တွေ့ဖူးခြင်း ဖြစ်သည်။

ယာဉ်မောင်းဘေးခုံပေါ်ရှိ ရိုင်ဖယ်သေနတ်ကို မျက်လုံးထောင့်မှနေ၍ တစ်ချက် ကြည့်လိုက်ပြီးနောက် ကွန်ရက်၏ ရင်ထဲတွင် အေးစက်သွားသည်။ သူက စတီယာရင်ကို အားကုန် ချိုးလှည့်ကာ ဘရိတ်ကို နင်းချလိုက်ရာ ကယ်ဒီလက် ကားကြီးက မြေပြင်ပေါ်တွင် နက်ရှိုင်းသော ဘီးရာနှစ်ကြောင်းကို ချန်ရစ်ခဲ့တော့သည်။

ယာဉ်မောင်းဘေးခုံဘက်က အက်စ်ယူဗီကားဘက်သို့ မျက်နှာမူမိသွားချိန်တွင် ကွန်ရက်၏ မျက်နှာက ချက်ချင်းပင် ရက်စက်ကြမ်းကြုတ်သွားသည်။ သူက ကားထဲတွင် ထိုင်လျက်ပင် ရိုင်ဖယ်သေနတ်ကို ဆွဲယူကာ သူ့နောက်မှ လိုက်လာသော ကားဆီသို့ ချိန်ရွယ်ပြီး ခလုတ်ကို ဆွဲလိုက်တော့သည်။

"အကုန် သွားသေလိုက်ကြ"

ရိုင်ဖယ်သေနတ်ပြောင်းဝမှ မီးပွင့်များ ထွက်ပေါ်လာပြီး ကျည်ဆန်များက မိုးသီးများအလား ရွာကျလာသည်။

"ရိုအန်... တစ်ဖက်က ပစ်နေပြီ"

သေနတ်သံများ ထွက်ပေါ်လာသည်နှင့် မိုနာက ထိတ်လန့်တကြား အော်ဟစ်လိုက်သည်။ ရိုအန်က လေးနက်သော မျက်နှာထားဖြင့် စတီယာရင်ကို လှည့်ကာ ရှောင်တိမ်းလိုက်သည်။ အက်စ်ယူဗီ ကားကြီးက တောတွင်းလမ်းမပေါ်တွင် လျင်မြန်စွာ ပြေးလွှားနေသော မြွေဟောက် တစ်ကောင်အလား ကွေ့ကောက်သွားလာနေသော်လည်း အရှိန်က လုံးဝ ကျဆင်းမသွားဘဲ ကယ်ဒီလက်ကားနှင့် ပို၍ နီးကပ်လာတော့သည်။

ကွန်ရက်၏ အလွန်အမင်း အံ့သြတုန်လှုပ်နေသော အကြည့်များအောက်တွင် ကားပြတင်းပေါက်၌ ကျည်ပေါက် အနည်းငယ် ရှိနေသော်လည်း ယာဉ်မောင်းမှာ ဘာဒဏ်ရာမှ မရထားသော အက်စ်ယူဗီ ကားကြီးက ကယ်ဒီလက်ကား၏ ညာဘက်ခြမ်းကို အားကုန် ဝင်တိုက်ပစ်လိုက်တော့သည်။

ကြီးမားလှသော ကားတိုက်သံကြီး ထွက်ပေါ်လာသည်။

"နင် ရူးနေတာလား... ရိုအန်"

ကားနောက်ခန်းမှ မိုနာက အသံကုန် ဟစ်အော် ကျိန်ဆဲလိုက်သည်။

"ခေါင်းငုံ့ထား... မလှုပ်နဲ့"

တစ်ဖက်လူမှာ ကားတိုက်ခံရမှုကြောင့် ခေါင်းမူးနောက်သွားသည့် အချိန်တိုလေးအတွင်း ရိုအန်က ခန္ဓာကိုယ်၏ မသက်မသာ ဖြစ်မှုများကို အောင့်ခံကာ ခါးဆီမှ အသံဖမ်းဗုံး တစ်လုံးကို ယူ၍ ကယ်ဒီလက်ကား၏ နောက်ခန်းထဲသို့ လှမ်းပစ်ထည့်လိုက်သည်။

အသံဖမ်းဗုံးဆိုသည်မှာ အသက်အန္တရာယ် မဖြစ်စေသော လက်နက်တစ်ခု ဖြစ်ပြီး အဓိကအားဖြင့် ကြီးမားသော အသံနှင့် စူးရှသော အလင်းရောင်ကို အသုံးပြု၍ ရန်သူကို မူးဝေသွားစေရန် ရည်ရွယ်သည်။

ကျယ်လောင်လှသော ပေါက်ကွဲသံကြီး ထွက်ပေါ်လာသည်။

အလွန် ကျယ်လောင်သော ဆူညံသံကြီးက ကယ်ဒီလက်ကား အတွင်း၌ ပဲ့တင်ထပ်သွားပြီး ကားနှစ်စီးလုံး၏ မှန်ပြတင်းပေါက်များက ချက်ချင်း ပျက်စီးကာ မြေပြင်ပေါ်သို့ ပြန့်ကျဲသွားတော့သည်။

ရိုအန်က အက်စ်ယူဗီကား၏ ဘေးဘက်တွင် ဂလော့ခ် ဆယ့်ရှစ် သေနတ်ကို ကိုင်ဆောင်ကာ ခေါင်းငုံ့ရှောင်နေသည်။ တစ်ချိန်တည်းမှာပင် မိုနာကို ကားပေါ်မှ ဆွဲချကာ သူ့နောက်သို့ ရွှေ့လိုက်သည်။ သူ ခေါင်းမော့ကြည့်လိုက်ရာ ကယ်ဒီလက် ကား၏ ယာဉ်မောင်းခုံတွင် မည်သူမျှ မရှိတော့သည်ကို မြင်လိုက်ရသည်။ တစ်ဖက်လူက စောစောကတည်းက ကားပေါ်မှ ခုန်ဆင်းသွားပြီး အသံဖမ်းဗုံး၏ အလယ်ဗဟိုမှ အရှိန်ကို မခံလိုက်ရကြောင်း သူ နားလည်သွားသည်။ ထို့ကြောင့် ရိုအန်က အပိုစကားများ မပြောနေတော့ဘဲ နောက်ထပ် အသံဖမ်းဗုံး တစ်လုံးကို ကောက်ယူကာ ထပ်မံ လှမ်းပစ်လိုက်တော့သည်။

ပေါက်ကွဲသံ နောက်တစ်ချက် ထွက်ပေါ်လာပြန်သည်။

အသံဖမ်းဗုံးက ကယ်ဒီလက်ကား၏ အခြားတစ်ဖက်တွင် ထပ်မံ ပေါက်ကွဲသွားသည်။ ရိုအန်က ခေါင်းစောင်းကာ စဉ်းစားကြည့်လိုက်ပြီး မလုံခြုံသေးဟု ခံစားရသဖြင့် အိတ်ကပ်ထဲတွင် ကျန်နေသော အသံဖမ်းဗုံး လေးလုံးစလုံးကို တစ်ပြိုင်နက်တည်း လှမ်းပစ်လိုက်တော့သည်။

ပေါက်ကွဲသံများ ဆက်တိုက် ထွက်ပေါ်လာသည်။

ပေါက်ကွဲသံ လေးကြိမ်ဆက်တိုက် ထွက်ပေါ်လာပြီးနောက် ရိုအန်က အတော်လေး စိတ်အေးသွားသည်။ သူက မတ်တပ်ရပ်ကာ ဂလော့ခ် ဆယ့်ရှစ် သေနတ်ကို မြှောက်လျက် ကယ်ဒီလက်ကား၏ ဘေးဘက်သို့ အရှိန်ပြင်းပြင်း ပြေးဝင်သွားသည်။ ထိုအခါ ကွန်ရက်မှာ အသံဖမ်းဗုံး၏ လေလှိုင်းဒဏ်ကြောင့် မြေပြင်ပေါ်တွင် လဲကျနေပြီး လုံးဝ မလှုပ်ရှားနိုင်တော့သည်ကို တွေ့လိုက်ရသည်။

ရိုင်ဖယ်သေနတ်ကို အဝေးသို့ သတိတကြီး ကန်ထုတ်လိုက်ပြီးနောက် ရိုအန်က လက်ထိတ်ကို ထုတ်ယူကာ သတိလစ်နေသော ကွန်ရက်၏ လက်နှစ်ဖက်နှင့် ခြေနှစ်ဖက်လုံးကို ခတ်လိုက်သည်။ ထို့နောက်မှ သူက သက်ပြင်းချနိုင်တော့သည်။

ထို့နောက် ရုပ်အလောင်းကို စတင် စမ်းသပ်... မဟုတ်သေး... တစ်ဖက်လူ၏ ခန္ဓာကိုယ်တွင် ဖုံးကွယ်ထားသော လက်နက်များ ရှိမရှိကို စတင် စစ်ဆေးလေတော့သည်။

တစ်ကိုယ်လုံး ဖုန်တွေ ပေကျံနေသော မိုနာက သေနတ်ကို ကိုင်ဆောင်ကာ ကယ်ဒီလက်ကား၏ ဘေးဘက်သို့ သတိတကြီး လျှောက်လာသည်။ ရန်သူကို လက်ထိတ်ခတ်ထားပြီးဖြစ်ကာ ရိုအန်မှာလည်း ဘာဒဏ်ရာမှ မရထားသည်ကို မြင်သောအခါမှ သူမလည်း သက်ပြင်းချနိုင်တော့သည်။ သို့သော် စောစောက ကားဝင်တိုက်ခဲ့သည့် ကိစ္စကို ပြန်တွေးမိသွားသောအခါ ဒေါသက ငယ်ထိပ်အထိ ဆောင့်တက်လာပြီး သေနတ်ကို ပြန်သိမ်းကာ ရိုအန်၏ လက်မောင်းကို အားကုန် ရိုက်ချလိုက်သည်။

"နင် တကယ့် အရူးပဲ... ရိုအန်"

"ငါ အရင်ကတည်းက နင့်ကို ပြောထားတယ်လေ... ငါ့ကားမောင်းစွမ်းရည်ကို ယုံကြည်ပါလို့"

ရိုအန်က လက်ကာပြလိုက်ပြီး စမ်းသပ်တွေ့ရှိသော အဝါရောင် မှတ်စုစာအုပ် တစ်အုပ်ကို အိတ်ကပ်ထဲသို့ ထည့်လိုက်သည်။ သူ၏ ယခင်ဘဝက အဆင့်နိမ့် ဗင်ကားလေး တစ်စီးကို မောင်းနှင်ကာ ကွေ့ကောက်နေသော တောင်ပေါ်လမ်းများတွင် ပြိုင်ကားမောင်းခဲ့ရာ၌ တစ်ခါမှ ရှုံးနိမ့်ဖူးခြင်း မရှိပေ။ ထိုအချိန်က တာဝန်ရှိနေခြင်းကြောင့်သာ မဟုတ်လျှင် သူက နိုင်ငံတကာ ပြိုင်ပွဲကြီးများဆီသို့ သွားရောက်ကာ အခြားသူများနှင့် သွားရောက် ယှဉ်ပြိုင်နေလောက်ပြီ ဖြစ်သည်။

"ဒါက ကားမောင်းစွမ်းရည် ပြဿနာ မဟုတ်ဘူး... အသက်အန္တရာယ် လုံခြုံရေး ပြဿနာပဲ"

မိုနာက ရိုအန်ကို သေချာပေါက် ဆူပူကြိမ်းမောင်းရန် ပြင်ဆင်နေစဉ်မှာပင် ရိုအန်၏ နှာခေါင်းက အနည်းငယ် လှုပ်ရှားသွားပြီး သူမ၏ ပါးစပ်ကို ရုတ်တရက် လှမ်းအုပ်လိုက်သည်။

မိုနာမှာ လုံးဝ နားမလည်နိုင်အောင် ဖြစ်သွားရသည်။

ရိုအန်က လေးနက်သော မျက်နှာထားဖြင့် ဂလော့ခ် ဆယ့်ရှစ် သေနတ်ကို ဆွဲထုတ်ကာ ကယ်ဒီလက်ကား၏ နောက်ဖုံးကို လက်ညှိုးထိုးပြလိုက်သည်။ မိုနာကလည်း ချက်ချင်း သဘောပေါက်သွားပြီး သေနတ်ကို အလျင်အမြန် ထုတ်ကာ ကားနောက်ဖုံးဆီသို့ ချိန်ရွယ်လိုက်သည်။

သူတို့နှစ်ဦးက ကားနောက်ဖုံး၏ ဘယ်ညာ တစ်ဖက်တစ်ချက်စီတွင် နေရာယူလိုက်ကြသည်။ ရိုအန်က လက်ချောင်းများဖြင့် သုံးစက္ကန့် ရေတွက်ရန် အချက်ပြလိုက်ရာ မိုနာက ခေါင်းညိတ်ကာ အသင့်ပြင်လိုက်သည်။

ဒိုင်းခနဲ မြည်သံနှင့်အတူ ကားနောက်ဖုံး ပွင့်သွားသည်။

ရေတွက်ခြင်း ပြီးဆုံးသွားသည်နှင့် ရိုအန်က ကားနောက်ဖုံးကို အားကုန် ဆွဲဖွင့်လိုက်ပြီး မိုနာကလည်း သေနတ်ကို မြှောက်ကာ နောက်ဖုံးထဲသို့ ချိန်ရွယ်လိုက်သည်။

ထိုအခါ သူတို့နှစ်ဦး၏ မျက်စိရှေ့တွင် ပေါ်လာသည်က အသက်ငင်နေသော ကောင်မလေး တစ်ယောက်ပင် ဖြစ်တော့သည်။