အခန်း ၃၅၉

အခန်း (၃၅၉) ပင်လယ်အောက်ကြမ်းပြင်မှာလည်း တောထွက်ပစ္စည်းရှာဖွေခြင်း... နောက်ထပ် ရတနာသိုက်တစ်ခုနဲ့ ဆုံတွေ့ပြန်ပြီ

ရွှီယန်သည် အနောက်သဲကျွန်းစု၌ နေရာချထားမှု ပြီးစီးသွားခဲ့သည်။ ထို့ပြင် ညှိနှိုင်းရေး အစည်းအဝေး တစ်ခုသို့လည်း တက်ရောက်ခဲ့ရသေးသည်။ သို့သော် သူ၏ဘက်မှ အထူးတလည် လုပ်ဆောင်ပေးရမည့်အရာများ မရှိဘဲ တိုက်ရိုက်ထုတ်လွှင့်မှု ပြုလုပ်စဉ်အတွင်း အနောက်သဲကျွန်းစု၏ သာယာလှပသော ရှုခင်းများကို ထည့်သွင်းပြောကြားပေးရန်သာ ဖြစ်သည်။

ထို့အပြင် ခရီးသွားလာရေး ဌာနမှ အကြီးအကဲများနှင့်အတူ လူအများအပြား ခြံရံလျက် ကျွန်းကို တစ်ပတ်လှည့်လည်ကာ သတင်းမီဒီယာများအတွက် သတင်းဓာတ်ပုံရယူနိုင်ရန် ကူညီပေးခဲ့ရသည်။

လူအုပ်၏ အလယ်ဗဟို၌ လျှောက်လှမ်းနေသော ရွှီယန်၏ ပုံစံမှာ အတော်လေး ဟန်ကျနေပေသည်။ ရေပန်းစားမှုကို အဓိကထားရသော ခေတ်ကာလတွင် ဤသို့ဖြစ်နေခြင်းမှာ ပုံမှန်ပင်ဖြစ်သည်။ သို့သော် ဌာနဆိုင်ရာများအတွက်မူ ဤသည်မှာ သာမန် စီးပွားရေးလုပ်ငန်းစဉ် တစ်ခုသာ ဖြစ်ပြီး အကြီးအကဲများက အလေးထားသောကြောင့်သာ လူအများအပြား ခြံရံလိုက်ပါလာခြင်း ဖြစ်လေသည်။

မကြာမီမှာပင် သတင်းများ ပျံ့နှံ့သွားခဲ့သည်။

အင်တာနက်သုံးစွဲသူများမှာ သတင်းခေါင်းစဉ်နှင့် ဓာတ်ပုံများကို မြင်တွေ့လိုက်ရချိန်တွင် အံ့အားသင့်သွားကြသည်။

[လခွမ်း... အလယ်က ဘဲကြီးက လောင်ရွှီနဲ့ တူနေတယ်နော်]

[နေပါဦး... သူက ဘယ်တွေရောက်နေလို့ ဒီလောက်လူတွေအများကြီး ဝိုင်းရံနေရတာလဲ... အဆက်အသွယ်က တော်တော်လေး မိုက်တာပဲ]

အားလုံးက သတင်းအတွင်းသို့ ဝင်ရောက်ဖတ်ရှုလိုက်မှသာ အနောက်သဲကျွန်းစု၏ ကြော်ငြာလှုပ်ရှားမှု ဖြစ်ကြောင်း သိရှိသွားကြသည်။

ရွှီယန်သည် မကြာသေးမီက အနောက်သဲကျွန်းစုသို့ ရောက်ရှိနေပြီး ဤနေရာ၌ တိုက်ရိုက်ထုတ်လွှင့်မှု ပြုလုပ်မည်ဖြစ်ရာ ခရီးသွားလာရေး ဌာနက သူနှင့် ပူးပေါင်းကာ လှုပ်ရှားမှု တစ်ရပ် ပြုလုပ်ခြင်းဖြစ်သည်။ နှစ်ဦးနှစ်ဖက် အကျိုးရှိသည့် လုပ်ရပ်ပင် ဖြစ်သည်။ ဤအချက်ကပင် ပရိသတ်များကို ပို၍ မျှော်လင့်လာစေသည်။

ရွှီယန်ကိုယ်တိုင်လည်း ဤလှုပ်ရှားမှုမှာ အလွန်ကောင်းမွန်သည်ဟု ခံစားရသည်။ အဓိကအားဖြင့် သူ့ကို ငါးဖမ်းလှေတစ်စင်း၊ လှေသူကြီးတစ်ဦး၊ လုံခြုံရေးဝန်ထမ်း တစ်ဦးနှင့် ညှိနှိုင်းရေးမှူး ယောင်းယွမ် တို့ကိုပါ စီစဉ်ပေးထားခြင်း ဖြစ်သည်။ ခရီးသွားလာရာတွင် အလွန် အဆင်ပြေလှသည်။

အကယ်၍ ခရီးသွား ဧည့်သည်တစ်ယောက် အနေဖြင့် လာရောက်မည်ဆိုပါက ကန့်သတ်ချက်များ အလွန်များပြားလှမည် ဖြစ်သည်။ သတ်မှတ်ထားသော လမ်းကြောင်းအတိုင်းသာ သွားလာရမည်ဖြစ်ပြီး သတ်မှတ်ထားသော နေရာများ၌သာ လည်ပတ်ခွင့်ရမည်ဖြစ်ရာ အလွန်ကို စီးပွားရေးဆန်လွန်းနေမည် ဖြစ်သည်။

ယခုမူ သူသည် မဖွံ့ဖြိုးသေးသော နေရာများသို့ သွားရောက်နိုင်ပြီး အစစ်အမှန် သဘာဝတရားနှင့် ပိုမို နီးကပ်စွာ ထိတွေ့နိုင်ပြီ ဖြစ်သည်။ ထို့အပြင် ဤနေရာများ၏ ရှုခင်းများမှာလည်း အလွန် လှပလွန်းလှပေသည်။

နောက်တစ်နေ့ နံနက်ပိုင်းတွင် တိုက်ရိုက်ထုတ်လွှင့်မှု စတင်လိုက်သည်။

အင်တာနက်သုံးစွဲသူများက တိုက်ရိုက်ထုတ်လွှင့်မှု အတွင်းသို့ အဆက်မပြတ် ဝင်ရောက်လာကြသည်။ တိုက်ရိုက်ထုတ်လွှင့်မှု မြင်ကွင်းထဲတွင် လှိုင်းပုတ်ခတ်နေသော မှန်သားပြင်ကဲ့သို့ ကြည်လင်နေသည့် ပင်လယ်ပြင်ပေါ်၌ ငါးဖမ်းလှေငယ်လေး တစ်စင်း ဖြည်းညင်းစွာ ခုတ်မောင်းနေသည်ကို မြင်တွေ့လိုက်ရသည်။

ပင်လယ်ရေမှာ အလွန် ကြည်လင်နေပြီး ရေအောက်ကြမ်းပြင်ရှိ သဲသောင်ပြင်ကိုပင် မြင်တွေ့နေရလေသည်။

[ဘုရားရေ... ဒါဘယ်နေရာလဲ... အရမ်းလှတာပဲ]

[တောင်တရုတ်ပင်လယ်မှာ ဒီလိုလှတဲ့နေရာ ရှိလို့လား... ငါအရင်က တစ်ခါမှ မမြင်ဖူးပါဘူး]

[မိုက်တယ်ဟေ့... ငါတို့သွားဖူးတဲ့ နေရာနဲ့ တစ်နေရာတည်းရော ဟုတ်ရဲ့လား]

ရွှီယန်သည် လှေပေါ်တွင် မတ်တတ်ရပ်လျက် ရှေ့သို့ ဆက်လက် ထွက်ခွာလာခဲ့သည်။

ယနေ့တွင် ယောင်းယွမ်၏ စီစဉ်ပေးမှုဖြင့် အလွန်လှပသော သန္တာကျောက်တန်းများ ရှိရာ ပင်လယ်ပြင်သို့ သွားရောက် ကြည့်ရှုမည်ဖြစ်သည်။ ထိုနေရာတွင် ကာကွယ်စောင့်ရှောက်ထားရသည့် သန္တာကျောက်တန်းများ အများအပြား ရှိနေသဖြင့် ပြင်ပသို့ ဖွင့်လှစ်ပေးထားခြင်း မရှိချေ။ ဤသည်မှာလည်း အထူး အခွင့်အရေး တစ်ရပ်ကို ရှားရှားပါးပါး ခံစားခွင့်ရရှိခြင်းပင် ဖြစ်လေသည်။

"အခု ကျွန်တော် အနောက်သဲကျွန်းစုရဲ့ ရေပိုင်နက်ထဲကို ရောက်နေတာပါ... ဒီဘက်က ပင်လယ်ရေက အားလုံးမြင်တဲ့အတိုင်းပဲ အရမ်းကို ကြည်လင်ပြီး လှပလွန်းတယ်..."

"အခု ကျွန်တော်တို့က သန္တာကျောက်တန်း ကာကွယ်ရေးဇုန် တစ်ခုကို သွားပြီး ပင်လယ်အောက်ကြမ်းပြင်က ရှုခင်းတွေကို သွားကြည့်ကြမှာပါ..."

ရွှီယန်က လှေပေါ်တွင် မတ်တတ်ရပ်လျက် ပရိသတ်များအား ပြောပြနေလေသည်။

သွားရမည့် နေရာသို့ ရောက်ခါနီးပြီ ဖြစ်သည်။ ရှေ့တွင် သဲသောင်ကျွန်းငယ်လေး အချို့ ပေါ်ထွက်လာသည်။ သဲသောင်ကျွန်းမှာ အနည်းငယ်မျှသာ ပေါ်ထွက်နေပြီး လူအနည်းငယ်ခန့်သာ မတ်တတ်ရပ်နိုင်မည့် အနေအထားရှိသည်။

သို့သော် ထိုသို့ဖြစ်နေခြင်းကပင် ပို၍ ထူးခြားနေစေသည်။ အကြောင်းမှာ သဲသောင်ကျွန်း ရှိနေခြင်းသည် ထိုနေရာ၏ အောက်ဘက်တွင် ကြီးမားကျယ်ပြန့်သော ပင်လယ်ကြမ်းပြင် ရှိနေကြောင်းကို ဖော်ပြနေခြင်းကြောင့် ဖြစ်သည်။ ပင်လယ်ကြမ်းပြင်၏ အနက်မှာ သိပ်မနက်လှဘဲ သန္တာကျောက်တန်းများနှင့် ငါးများ ရှင်သန်ပေါက်ပွားရန် အလွန် သင့်တော်လှပေသည်။

လှေကလေးမှာ ပင်လယ်ပြင်ပေါ်တွင် မျောပါနေပြီး အင်တာနက်သုံးစွဲသူများက ရှင်းလင်းစွာ မြင်တွေ့နေကြရသည်။

ပိုးသားအလား ချောမွေ့နေသော ပင်လယ်ရေပြင် အောက်တွင် အရောင်အသွေး စုံလင်လှသည့် သန္တာကျောက်တန်းများ အစုလိုက် အပြုံလိုက် ရှိနေလေသည်။ အနီရောင်... အပြာရောင်... ခရမ်းရောင် စသည်ဖြင့် အရောင်အသွေး စုံလင်လှရာ အိပ်မက်ကမ္ဘာ တစ်ခုအလားပင် ခံစားရစေသည်။

[အစ်ကိုယန် သွားတဲ့နေရာတွေက အမြဲတမ်းကို ထူးခြားနေတာပဲ]

[ဒါဘယ်နေရာလဲ... ပြည်တွင်းမှာပဲ ရှိသေးတာ သေချာရဲ့လား]

[ငါလည်း ဒီလိုနေရာမျိုး သွားကြည့်ချင်လိုက်တာ]

[ကိုယ့်ဘာသာကိုယ် သွားမယ်ဆိုရင် ကုန်ကျစရိတ်က တော်တော်လေး ကြီးမှာ... လောင်ရွှီရဲ့ တိုက်ရိုက်ထုတ်လွှင့်မှုကို ကျေးဇူးတင်ရမယ်... ဒါမှပဲ ဒီလောက် အံ့မခန်းလှတဲ့ ရှုခင်းတွေကို မြင်ရတာလေ]

[ပြည်တွင်းမှာ အိပ်မက်ဆန်ဆုံး တိုက်ရိုက်ထုတ်လွှင့်မှုလေးပါပဲ]

ဤနေရာရှိ ပင်လယ်ပြင် ရှုခင်းမှာ တကယ်ကို ကောင်းမွန်လှပြီး ပြိုင်ဘက်ကင်းလှပေသည်။

ရွှီယန်က လှေဝမ်းဗိုက်အတွင်းသို့ ပြန်ဝင်သွားကာ ရေငုပ်ဝတ်စုံကို လဲလှယ်ဝတ်ဆင်လိုက်ပြီး အောက်ဆီဂျင်ဘူးကိုပါ လွယ်ပိုးလိုက်သည်။

"အားလုံးကို ပြောဖို့ မေ့နေတာ... ကျွန်တော် အားတုန်းက ရေငုပ်လက်မှတ် သွားဖြေထားလို့ ရေငုပ်တတ်တယ်ဗျ..."

"ဒီနေ့ ရေအောက်ကို ဆင်းကြည့်ကြမယ်..."

ရွှီယန်က ရေငုပ်ကိရိယာများကို ပြင်ဆင်ရင်း ပရိသတ်များနှင့် စကားစမြည် ပြောဆိုနေလေသည်။

အင်တာနက်သုံးစွဲသူများမှာ ကြောင်အမ်းအမ်း ဖြစ်သွားကြသည်။

'နေပါဦး... မင်းက တောထွက်ပစ္စည်းရှာတဲ့ လိုက်ဖ်လွှင့်သူလေ... ဘယ်ကနေ ဘယ်လို ရေငုပ်တတ်သွားရတာလဲ...'

[ဟင်... မင်းက ရေပါ ငုပ်တတ်တာလား]

[နေပါဦး... မင်းက ဘယ်လိုလုပ် အကုန်လုံး တတ်နေရတာလဲ]

[လောင်ရွှီ ကတော့ လောင်ရွှီပါပဲ... တကယ်ကို လန်ထွက်နေတာပဲ]

[ပြင်ပစွန့်စားမှုတွေမှာတော့ အစုံတတ်တဲ့ ဆရာကြီးပဲ]

အင်တာနက်သုံးစွဲသူများက အချင်းချင်း ဆွေးနွေးနေကြသည်။

ရွှီယန်အပြင် ရေငုပ်လုံခြုံရေးဝန်ထမ်း တစ်ဦးလည်း သူနှင့်အတူ ရေအောက်သို့ လိုက်ပါသွားမည် ဖြစ်သည်။ ထိုအချိန်မှာပင် ရွှီယန်က ကျောပိုးအိတ်ထဲမှ ရေအောက်သုံး ကင်မရာကို ထုတ်ယူလိုက်သည်ကို မြင်တွေ့လိုက်ရသည်။

ပုံမှန် ရေအောက်သုံး ကင်မရာများမှာ ခေါင်းတွင် တပ်ဆင်ရသည့် အမျိုးအစားများ ဖြစ်သည်။ သို့သော် ရွှီယန်၏ ရေအောက်သုံး ကင်မရာမှာမူ ဇီဝနည်းပညာသုံး စက်ရုပ်ငါးလေး တစ်ကောင် ဖြစ်နေလေသည်။ ၎င်းက ပရိသတ်များအား တတိယလူ အမြင်ရှုထောင့်မှနေ၍ တိုက်ရိုက်ထုတ်လွှင့်မှုကို ကြည့်ရှုနိုင်စေမည်ဖြစ်ရာ တိုက်ရိုက်ထုတ်လွှင့်မှု၏ အရည်အသွေးကို ပိုမို မြင့်မားစေမည် ဖြစ်သည်။

ရွှီယန်သည် ရေအောက်သုံး ကင်မရာ၏ နောက်ယောင်ခံ ရိုက်ကူးမှု အစီအစဉ်ကို သတ်မှတ်လိုက်ပြီးနောက် လှေစွန်းတွင် ထိုင်ကာ နောက်သို့ ပက်လက်လှန် ချလိုက်ရာ လှိုင်းပုတ်ခတ်နေသော ပင်လယ်ရေထဲသို့ ကျဆင်းသွားတော့သည်။

ဤနေရာရှိ ပင်လယ်ရေမှာ တကယ်ကို လှပလွန်းလှသည်။ ဖော်ပြ၍ မရနိုင်လောက်အောင်ပင် လှပလွန်းလှပေသည်။ ပင်လယ်ရေထဲသို့ ဝင်ရောက်သွားသည်နှင့် တစ်ပြိုင်နက် ရွှီယန်သည် ဘလွတ်ဘလွတ် ဟူသော အသံများကို အရင်ဆုံး ကြားလိုက်ရပြီးနောက် တစ်ကမ္ဘာလုံး တိတ်ဆိတ်ငြိမ်သက်သွားတော့သည်။

တိတ်ဆိတ်ခြင်း။

အလွန် တိတ်ဆိတ်ငြိမ်သက်လှပေသည်။

ရေမျက်နှာပြင်နှင့် နီးကပ်နေချိန်တွင် အနည်းငယ် ဆူညံနေသော်လည်း ပင်လယ်ရေအောက်သို့ ရောက်ရှိသွားချိန်တွင် အသံများ အားလုံး ပျောက်ကွယ်သွားခဲ့သည်။

ထို့နောက် သူ၏ရှေ့မှောက်တွင် ပေါ်လာသည်မှာ အိပ်မက်ဆန်လွန်းသော မြင်ကွင်းတစ်ခုပင် ဖြစ်သည်။ ရေတိမ်ပိုင်းမှ ပင်လယ်ငါးအုပ်ကြီးများက သူ၏ရှေ့မှ ဖြတ်သန်း ကူးခတ်သွားကြပြီး ငါးမျိုးစိတ် တစ်ခုစီတိုင်းတွင် အကောင်ရေ ထောင်သောင်းချီ ရှိနေသည့်အလားပင်။ ကြီးမားလှသော ငါးအုပ်ကြီးများက ဟိုဟိုဒီဒီ ကူးခတ်သွားလာနေကြပြီး လေဆင်နှာမောင်း တစ်ခု၏ ပုံသဏ္ဌာန်နှင့်ပင် တူနေလေသည်။

အောက်ဘက်တွင်တော့ အလွန်လှပသော သန္တာကျောက်တန်းများ အစုလိုက် အပြုံလိုက် ရှိနေသည်။ ဤသန္တာကျောက်တန်းများ၏ ရှင်သန်နိုင်စွမ်းက အလွန် အားကောင်းလှပြီး အရောင်အသွေးမှာလည်း လှပတောက်ပနေသည်။ ရွှီယန် တစ်ယောက် ဤမြင်ကွင်းထဲတွင် လုံးလုံးလျားလျား နစ်မျောသွားတော့သည်။

သူက မတူညီသော ရှုခင်းများကို ကြည့်ရှုရသည်ကို နှစ်သက်သည်။ တောင်ပေါ်ရှိ စိမ်းလန်းစိုပြည်မှုများကို သဘောကျသကဲ့သို့ ကုန်းပြင်မြင့်၏ အထီးကျန်ဆန်သော လွင်ပြင်များကိုလည်း နှစ်သက်သည်။ ထို့အပြင် ရေခဲပြင်ပေါ်ရှိ အရာခပ်သိမ်း တိတ်ဆိတ်ငြိမ်သက်နေခြင်းကိုလည်း သဘောကျလှသည်။

ဤသို့သော ရှုခင်းများကို အနီးကပ် မြင်တွေ့ရချိန်တိုင်း အမြဲတမ်း စိတ်လှုပ်ရှား အံ့ဩရမြဲဖြစ်သည်။ ယခုအခါတွင်တော့ ပင်လယ်ကြီး၏ အလှတရားကို ခံစားနေရပြီ ဖြစ်သည်။

ရွှီယန်က ရေအောက်တွင် ရောက်ရှိနေသဖြင့် စကားပြော၍ မရနိုင်သောကြောင့် ရှေ့သို့သာ အဆက်မပြတ် ကူးခတ်သွားနေလိုက်သည်။

ထိုအချိန်တွင် ပင်လယ်ငါး အတော်များများက စူးစမ်းချင်စိတ်ဖြင့် ရွှီယန်၏ ဘေးသို့ ကူးခတ်လာကြပြီး သူနှင့်အတူ လိုက်ပါလာကြသည်။ ဤနေရာရှိ ငါးများက လူကို သိပ်မကြောက်ကြချေ။

ဤနေရာမှာ အလွန် လုံခြုံပြီး ပင်လယ်ငါးများ၏ ပရဒိသုဘုံ ဖြစ်နေသောကြောင့် ၎င်းတို့ မွေးဖွားလာကတည်းက သတိထားရမည်ဟူသော အသိစိတ်မျိုး သိပ်မရှိခြင်းလည်း ဖြစ်နိုင်ပေသည်။ ကြည့်ရသည်မှာ အားလုံးက ပူပင်သောက ကင်းမဲ့နေပုံရသည်။ အလွန် ရှားပါးလှသော သန့်စင်သည့် နယ်မြေတစ်ခုပင်။

အင်တာနက်သုံးစွဲသူများမှာ ပို၍ပင် အံ့ဩမှင်တက်သွားကြတော့သည်။

[ဘုရားရေ... ဒီရှုခင်းက ရုပ်ရှင်ရိုက်နေတာ ကျနေတာပဲ]

[အရမ်း လှလွန်းတယ်ကွာ... ပင်လယ်ကြီးနဲ့ ပတ်သက်ပြီး ငါစိတ်ကူးယဉ်ထားတဲ့ အကောင်းဆုံး ပုံရိပ်တွေနဲ့ အတိအကျပဲ]

[ငါ့အိပ်မက်ထဲမှာ ပေါ်လာဖူးတဲ့ မြင်ကွင်းက သူအခု ကြုံတွေ့နေရတဲ့ မြင်ကွင်းမျိုးပဲ]

ရွှီယန် ရှေ့သို့ ကူးခတ်နေစဉ်မှာပင် အဝါနုရောင် ငါးငယ်လေး အချို့က ရွှီယန်၏ ရှေ့သို့ ရုတ်တရက် ရောက်ရှိလာပြီး အမြီးများကို တဖျပ်ဖျပ် ခတ်နေကြသည်။

ထိုငါးငယ်လေးများကို မြင်သောအခါ ရွှီယန် ချက်ချင်းပင် သဘောကျသွားတော့သည်။ ပင်လယ်ရေအောက် သက်ရှိမျိုးစိတ်များမှာ အလွန် များပြားလှပြီး အရောင်အသွေး စုံလင်လှသော ငါးများမှာလည်း ရေတွက်၍ မရနိုင်လောက်အောင် ရှိနေလေသည်။

ရွှီယန် သိရှိသော ငါးမျိုးစိတ်မှာ သိပ်မများလှသော်လည်း ဤငါးမျိုးစိတ်ကိုတော့ တိုက်တိုက်ဆိုင်ဆိုင် သိရှိနေပေသည်။ ဆက်ကြေးငါးလေးများပင် ဖြစ်သည်။

ဤငါးမျိုးစိတ်မှာ အတော်လေး စိတ်ဝင်စားစရာ ကောင်းလှသည်။ ရွှီယန် တစ်ခုခုကို တွေးမိသွားပြီး ရေမျက်နှာပြင်ပေါ်သို့ ချက်ချင်း ပေါ်လာခဲ့သည်။

သူက လှေဘေးသို့ ကူးသွားကာ လှေကိုယ်ထည်ကို ကိုင်တွယ်လျက် ယောင်းယွမ်ကို လှမ်းပြောလိုက်သည်။

"ယောင်းယွမ်... အောက်မှာ ဆက်ကြေးငါးလေးတွေ ကျွန်တော့်ရှေ့မှာ လာကူးနေတယ်... အောက်ခြေနားမှာ ပင်လယ်ဆူးကောင်တွေ ရှိလောက်တယ်..."

"လှေပေါ်မှာ ပင်လယ်ဆူးကောင် ဖမ်းတဲ့ ခြင်းတောင်းနဲ့ ညှပ်ကို တွေ့တယ်... အဲဒါလေး ခဏလောက် ယူပေးပါလား..."

ဤအချိန်တွင် ယောင်းယွမ်က ရွှီယန်၏ တိုက်ရိုက်ထုတ်လွှင့်မှု မြင်ကွင်းကို ထိန်းချုပ်ပေးရသည်။ သူက မြင်ကွင်းကို ဒရုန်းကင်မရာဘက်သို့ အရင်ပြောင်းလိုက်ပြီးနောက် ရွှီယန်အတွက် ပင်လယ်ဆူးကောင် ဖမ်းသည့် ခြင်းတောင်းကို အမြန် သွားယူပေးလေသည်။

ဒရုန်းက ရွှီယန်ကို ရိုက်ကူးနေစဉ် ရွှီယန်က အခွင့်ကောင်းယူကာ အင်တာနက်သုံးစွဲသူများကို ပြောပြလိုက်သည်။

"ဒီနေ့ ကံကောင်းတယ်ဗျ... စိတ်ဝင်စားစရာကောင်းတဲ့ ကိစ္စတစ်ခုကို တွေ့လိုက်ရတယ်..."

"ဆက်ကြေးငါးလေးတွေနဲ့ သွားဆုံတာလေ..."

"ဒီငါးမျိုးစိတ်က အရမ်း စိတ်ဝင်စားဖို့ ကောင်းတယ်... သူတို့က ပင်လယ်ရေညှိ စားရတာကို သဘောကျတော့ နေရာကောင်း တစ်ခုကိုရှာပြီး သေချာ ပြုစုပျိုးထောင်လေ့ ရှိတယ်..."

"လယ်ယာခြံဝင်းထဲက လယ်သမားတွေလိုပဲ နေ့တိုင်း စိုက်ခင်းကို သေချာ ဂရုစိုက်ကြတာပေါ့... နောက်ဆုံးတော့ ကြီးမားပြီး ရှင်သန်နေတဲ့ ရေညှိခင်းကြီး တစ်ခု ရလာတာပေါ့ဗျာ..."

"အဲဒီအချိန်မှာ ပင်လယ်ဆူးကောင်တွေက ရောက်လာကြတယ်... သူတို့က ရေညှိရဲ့ အမြစ်ကို တိုက်ရိုက် စားပစ်တာဆိုတော့ အမြစ်ပြတ်သွားရင် ဆက်မပေါက်နိုင်တော့ဘူးလေ..."

"အဲဒီနောက် ပင်လယ်ဆူးကောင်တွေက အမြန် မျိုးပွားလာပြီး နေရာအနှံ့ ရောက်လာကြရော..."

"ဆက်ကြေးငါးလေးတွေက တစ်ကောင်ချင်းစီ လိုက်ရွှေ့ပစ်ပေမယ့် သိပ်ပြီး အကျိုးမထူးဘူး... ပင်လယ်ဆူးကောင်တွေက ပိုပိုပြီး များလာတာကိုး..."

"နောက်ပိုင်းကျတော့ လူတွေက ပင်လယ်ဆူးကောင်တွေကို ဖမ်းရတာ ကြိုက်တယ်ဆိုတာကို ဆက်ကြေးငါးလေးတွေ သိသွားတော့ လူတွေကို လမ်းပြပေးတတ်လာကြတယ်..."

"ခုနက ကျွန်တော့်ရှေ့မှာ ဆက်ကြေးငါးလေးတွေ လာပြီး လှုပ်နေတာက ကျွန်တော့်ကို လမ်းပြပေးချင်လို့ နေမှာ..."

"အောက်မှာ သေချာပေါက် ပင်လယ်ဆူးကောင် အသိုက် ရှိရမယ်..."

"အားလုံးကို ဗဟုသုတအနေနဲ့ ပြောရရင် ပင်လယ်ဆူးကောင်တွေ အရမ်းများလွန်းရင် သန္တာကျောက်တန်းတွေအတွက် မကောင်းဘူးဗျ... အခုလုပ်တာက ကာကွယ်ရေး အစီအစဉ် တစ်ခုလို့ မှတ်ယူလို့ရတယ်..."

ရွှီယန်က ပင်လယ်ဆူးကောင် အသိုက်ကို ရှာတွေ့ပြီဟု ပြောဆိုနေချိန်တွင် မျက်လုံးများပင် အရောင်လက်နေတော့သည်။ တောထွက်ပစ္စည်း ရှာဖွေသူ၏ ဗီဇက နိုးထလာခဲ့ပြီ ဖြစ်သည်။

သဘာဝတရားကြီး၏ လက်ဆောင်ကို ကြုံတွေ့ရပါက သေချာပေါက် သိမ်းဆည်းရမည်သာ ဖြစ်သည်။ အင်တာနက်သုံးစွဲသူများမှာ သူပြောသည်များကို ကြားပြီး ကြောင်အမ်းအမ်း ဖြစ်သွားကြလေသည်။

[ဘာ... ငါးတွေက စိုက်ပျိုးရေး လုပ်တတ်ပြီး လမ်းတောင် ပြပေးတတ်တယ် ဟုတ်လား]

[ပင်လယ်ဆူးကောင်က တော်တော် ဈေးကြီးတာနော်... အဲဒါက ငါးတွေရဲ့ စိုက်ခင်းကို အတင်း သိမ်းပိုက်ထားတာလား]

[ဆက်ကြေးငါးလေးတွေက သခင်ကြီး... ဒီဘက်မှာ လုပ်စရာ ရှိတယ်ဗျ လို့ ပြောနေတာပေါ့]

[လောင်ရွှီက ရတနာတွေ တွေ့ပြီလို့ ပြောတဲ့အချိန် မျက်လုံးတွေ အရောင်လက်သွားတာပဲ]

[ဟားဟားဟား... တောထွက်ပစ္စည်းရှာတဲ့ လိုက်ဖ်လွှင့်သူဆိုတဲ့ နာမည်နဲ့ တကယ် လိုက်ဖက်တာပဲ]

ဤအချိန်တွင် ယောင်းယွမ်က ပင်လယ်ဆူးကောင်ချိတ်နှင့် ခြင်းတောင်းကို ယူလာပေးကာ မေးလိုက်သည်။

"ဒီအောက်မှာ တကယ်ပဲ ပင်လယ်ဆူးကောင်တွေ ရှိနေလို့လား... အဲဒါတွေက သန္တာကျောက်တန်းတွေ ကြီးထွားဖို့အတွက် တကယ် မကောင်းဘူး... တကယ်လို့ တွေ့ရင်လည်း ကျွန်တော်တို့က တစ်စိတ်တစ်ပိုင်း ရှင်းလင်းပေးရမှာပဲ..."

ရွှီယန်က ပြုံးကာ ပြန်ဖြေလိုက်သည်။

"စမ်းကြည့်ရတာပေါ့... ကျွန်တော်ကတော့ ရှိမယ်လို့ ခံစားရတယ်..."

ထို့နောက် ရွှီယန်သည် လက်တစ်ဖက်တွင် ချိတ်ကို ကိုင်ကာ နောက်လက်တစ်ဖက်တွင် ခြင်းတောင်းရှည်ကို ကိုင်ထားလိုက်ပြီး အောက်ဆီဂျင်ပိုက်ကို ကိုက်လျက် ပင်လယ်ရေထဲသို့ ပြန်လည် ငုပ်လျှိုးသွားတော့သည်။

ယောင်းယွမ်က တိုက်ရိုက်ထုတ်လွှင့်မှု မြင်ကွင်းကို ရေအောက် ကင်မရာဘက်သို့ ချက်ချင်း ပြောင်းပေးလိုက်သည်။ အင်တာနက်သုံးစွဲသူများက ရွှီယန် တစ်ယောက် အောက်ဘက်သို့ တောက်လျှောက် ကူးခတ်သွားသည်ကို မြင်တွေ့လိုက်ရသည်။

သူ၏ ရှေ့တွင် လိမ္မော်ရောင် ငါးငယ်လေး အချို့က အဆက်မပြတ် ဟိုဟိုဒီဒီ ကူးခတ်နေကြသည်။ ရွှီယန် နောက်မှ လိုက်ပါလာသည်ကို မြင်သောအခါ ၎င်းတို့က ပို၍ပင် ပျော်ရွှင်စွာ ကူးခတ်သွားကြတော့သည်။ မြင်ကွင်းက တကယ်ကို စိတ်ဝင်စားစရာ ကောင်းလှပေသည်။

ဆက်ကြေးငါးလေးများက အောက်ဘက်သို့ တောက်လျှောက် ဆင်းသွားကြပြီး ရွှီယန်ကလည်း နောက်မှ တောက်လျှောက် လိုက်ပါသွားလေသည်။ သူက ငါးလေးများနှင့်အတူ သန္တာကျောက်တန်း ဇုန်တစ်ခုကို ဖြတ်သန်းသွားကာ အနည်းငယ် ရှင်းလင်းနေသော နေရာတစ်ခုသို့ ရောက်ရှိသွားခဲ့သည်။

ရေအောက်ချောက်ကမ်းပါး တစ်ခုကို ထပ်မံ ဖြတ်ကျော်လိုက်သောအခါ ရှေ့ရှိ မြေမျက်နှာပြင်မှာ ဇောက်ထိုးတွဲလောင်း ဖြစ်နေသော တောင်တန်းတစ်ခုအလား အနည်းငယ် ရှုပ်ထွေးနေသည်ကို တွေ့လိုက်ရသည်။ အရာအားလုံးက အနည်းငယ် လျှို့ဝှက်ဆန်းကြဲနေပုံ ရလေသည်။

ဆက်ကြေးငါးလေးများက အမြီးကို လှုပ်ခါရင်း ဆက်လက် လမ်းပြနေကြသည်။ မကြာခင်မှာပင် ရှေ့ရှိ မို့မောက်နေသော ရေအောက် တောင်ကုန်းငယ်လေး တစ်ခုပေါ်တွင် မည်းနက်နေသော ပင်လယ်ဆူးကောင် အကြီးကြီးများ ပြည့်နှက်နေသည်ကို မြင်တွေ့လိုက်ရတော့သည်။

ဤမြင်ကွင်းကို မြင်သောအခါ ရွှီယန် ချက်ချင်းပင် ပြုံးလိုက်မိတော့သည်။

'နောက်ဆုံးတော့ ရှာတွေ့သွားပြီ... ပင်လယ်ဆူးကောင် အသိုက်ပဲ... ဒါက တောထဲမှာ တောထွက်ပစ္စည်း အဖိုးတန်ရတနာတွေ တွေ့တာနဲ့ အတူတူပဲ မဟုတ်လား…’