အခန်း ၃၇၀

အခန်း (၃၇၀) အောက်ခြေသို့ စူးစမ်းရှာဖွေခြင်း၊ လှုပ်ရှားနေသော အရိပ်မည်း

ရွှီယန်က အပေါ်ဝတ်အင်္ကျီမှစ၍ အတွင်းခံအထိ အားလုံးကို ရေညှစ်ချလိုက်သည်။

အတွင်းခံဘောင်းဘီကိုပါ တစ်ချက် ညှစ်လိုက်သေးသည်။

ဤမြင်ကွင်းကို တောင်ထဲရှိ ငှက်လေးများသာ မြင်တွေ့လိုက်ရသည်။

ငှက်လေးများမှာ အတော်လေး ပျော်ရွှင်နေပုံရသည်။

၎င်းတို့သည် တကျီကျီ အော်မြည်နေကြပြီး ဤခြေနှစ်ချောင်းသတ္တဝါမှာ အတော်လေး ဖြူဝင်းနေကြောင်း ပြောဆိုနေကြသည့်အလားပင်။

ရွှီယန်သည် အဝတ်အစားများ ပြန်ဝတ်လိုက်ပြီးနောက်မှသာ ဒရုန်းကို အလိုအလျောက် နောက်ယောင်ခံပျံသန်းသည့် စနစ်သို့ ပြန်လည်ပြောင်းလဲလိုက်သည်။

အင်တာနက်သုံးစွဲသူများမှာ ခြောက်သွေ့သွားသော အဝတ်အစားများကို မြင်လိုက်ရသောအခါ ချက်ချင်းပင် ညည်းတွားပြောဆိုလာကြတော့သည်။

[လောင်ရွှီ... ကိုယ့်လူတွေကိုတောင် ဖုံးကွယ်ထားတာလား]

[မိသားစုဝင်တွေကိုတောင် ဖုံးကွယ်ထားရလား]

[ငါတို့ကို ပြလိုက်ရင် ဘာဖြစ်သွားမှာမို့လို့လဲ]

ဤကိစ္စနှင့် ပတ်သက်၍ ရွှီယန်မှာ ပြုံးရုံသာ ပြုံးနေလိုက်ပြီး အများကြီး ရှင်းပြမနေတော့ချေ။ ဤသို့သာ လုပ်ဆောင်၍ ရနိုင်မည်ဖြစ်သည်။

"ဒီနေရာက ရေကန်ကြီး တစ်ခုပဲ... ရေတွေက ဒီနေရာကနေ ပန်းထွက်လာပြီး အဆုံးအစမရှိ စီးဆင်းနေတဲ့ မြစ်တစ်စင်း ဖြစ်လာတာ"

"ဒီနေရာက မြေအောက်ရေ အရင်းအမြစ်တွေ တကယ်ကို ကြွယ်ဝမှာ သေချာတယ်"

ရွှီယန်သည် ရေတိမ်ပိုင်း သဲသောင်ပြင်အတိုင်း အထက်သို့ လျှောက်တက်သွားရာ အပေါ်ဘက်တွင်တော့ ရေမရှိတော့ချေ။

ဤနယ်မြေမှာ မကျယ်ဝန်းလှဘဲ အပေါ်သို့ ထပ်တက်ပါက မတ်စောက်သော ကျောက်ကမ်းပါးများ ရှိနေသဖြင့် တက်ရောက်ရန် အလွန် ခက်ခဲလှသည်။

တောင်ကြား၏ အဆုံးသတ်သို့ ရောက်ရှိသွားခဲ့ပြီဖြစ်သည်။

ရွှီယန်သည် ပတ်ဝန်းကျင်ကို လှည့်ပတ်ကြည့်ရှုကာ အထဲသို့ ဝင်ရောက်နိုင်မည့် ဝင်ပေါက် ရှိမရှိကို ရှာဖွေနေလေသည်။

ထုံးကျောက်လိုဏ်ဂူ တစ်ခု ဖြစ်တည်လာရန်မှာ နှစ်ပေါင်း သောင်းချီမှ သန်းချီအထိ ကြာမြင့်တတ်ပြီး တောင်နံရံများမှာ ရေစီးကြောင်း၏ စားသုံးယိုယွင်းမှုကို ခံရကာ လိုဏ်ဂူအဖြစ် ဖြစ်ပေါ်လာခြင်းဖြစ်သည်။

ဤကဲ့သို့သော မြေမျက်နှာသွင်ပြင်မျိုးမှာ ကွေ့ကျိုးတွင် အလွန် အတွေ့ရများလှသည်။

ရွှီယန်သည် အချိန်အတော်ကြာ ရှာဖွေခဲ့သော်လည်း လတ်တလောတွင် ဘာကိုမျှ မတွေ့ရှိရသေးချေ။

အင်တာနက်သုံးစွဲသူများမှာ ဤနေရာ၏ ပတ်ဝန်းကျင်ကို ကြည့်ရှုရင်း တစ်ယောက်တစ်ပေါက် မှတ်ချက်ပေးလာကြသည်။

[လောင်ရွှီ... ဒီမှာ ဘာမှမရှိတာ အသိသာကြီးကို]

[ထူးဆန်းတဲ့ ရှုခင်းတွေ ရှိတယ်ဆိုတာ မဟုတ်ဘူးလား]

[လမ်းဆုံးသွားပြီ... လမ်းပိတ်နေပြီမို့လို့ နောက်ကြောင်းပြန်လှည့်ကြရအောင်]

သို့သော် ရွှီယန်၏ အမြင်တွင်တော့ ဤသို့ မဟုတ်ကြောင်း သိသာနေလေသည်။ ဤနေရာက ဖုံးကွယ်ထားသော မြေပုံတစ်ခုနှင့် အလွန် တူညီနေလေသည်။ ဖုံးကွယ်ထားသော မြေပုံများမှာ ဤကဲ့သို့ပင် ပုံသဏ္ဌာန် ရှိတတ်သည်။

ထင်ထားသည့်အတိုင်းပင် သေချာစွာ ရှာဖွေပြီးနောက် ရွှီယန်သည် ကျဉ်းမြောင်းသော ဝင်ပေါက်ငယ်တစ်ခုကို တကယ်ပင် ရှာဖွေတွေ့ရှိသွားခဲ့သည်။

ဤဝင်ပေါက်မှာ တောင်ခါးပန်းတွင် ရှိနေပြီး အပေါ်သို့ အနည်းငယ် တက်သွားရုံဖြင့် မြင်တွေ့နိုင်လေသည်။

ရွှီယန်သည် ဓာတ်မီးကို ထုတ်ယူကာ လိုဏ်ဂူပေါက်ဝဆီသို့ ချိန်ရွယ် ဖွင့်လိုက်သည်။ တစ်ခဏချင်းမှာပင် အလင်းရောင် စူးစူးက လိုဏ်ဂူပေါက်ဝ၏ အမှောင်ထုကို ဖယ်ရှားပေးလိုက်ပြီး လိုဏ်ဂူပေါက် တစ်ခုလုံး လင်းထိန်သွားတော့သည်။

ရွှီယန်က သေချာစွာ ကြည့်ရှုလိုက်ရာ အောက်ဘက်ရှိ ကျောက်စက်ပန်းဆွဲများကို ချက်ချင်း မြင်တွေ့လိုက်ရသည်။

ဤကျောက်စက်ပန်းဆွဲများမှာ အနည်းငယ် ထူးခြားနေပုံရပြီး ဆန်းကြယ်သော အရောင်အသွေးများ ပေါ်လွင်နေလေသည်။ ပုံမှန် တွေ့ရလေ့ရှိသော မီးခိုးရောင် ပြောင်ပြောင်များ မဟုတ်ချေ။

"ဒီနေရာ ဖြစ်နေတာကိုး"

"နောက်ထပ် လုပ်ရမှာက တာဝန်ရဲ့ တောင်းဆိုချက် အတိုင်း အောက်ဆုံး အခြေကို သွားရုံပဲ"

ရွှီယန်သည် အောက်သို့ ဆင်းကြည့်ရန် ဆုံးဖြတ်လိုက်သည်။

သူသည် ဒရုန်းကို ပြန်ခေါ်လိုက်ပြီး ဒရုန်းကို ပိုက်လျက် လိုဏ်ဂူပေါက်ဝ အတိုင်း အတွင်းသို့ ဝင်ရောက်သွားလေသည်။ ဝင်သွားသည်နှင့် တစ်ပြိုင်နက် ဧရာမ ဆင်ခြေလျှော ကြီးတစ်ခု ရှိနေပြီး သူ့အတွက် အောက်သို့ ဆင်းရန် အဆင်ပြေစေသည်။

အင်တာနက်သုံးစွဲသူများမှာ တိုက်ရိုက်ထုတ်လွှင့်မှု မြင်ကွင်းက အနည်းငယ် လှုပ်ယမ်းသွားသည်ကို မြင်တွေ့လိုက်ရသဖြင့် အထူးပင် အံ့အားသင့်သွားကြသည်။

အားလုံးက မည်သို့ ဖြစ်ပျက်သွားသည်ကို စူးစမ်းချင်စိတ် ဖြစ်ပေါ်နေကြစဉ် ရွှီယန်သည် ဒရုန်းကို ပြန်လည် လွှတ်တင်လိုက်ပြီး ဓာတ်မီးကို ထပ်မံ ဖွင့်လိုက်သည်။ ဤဓာတ်မီး၏ အလင်းရောင်က အလွန်အမင်း အားကောင်းလှသဖြင့် ထုံးကျောက်လိုဏ်ဂူကြီး တစ်ခုလုံး ချက်ချင်း လင်းထိန်သွားတော့သည်။

[လခွမ်း... ဘယ်သူက နေမင်းကြီးကို ဖွင့်လိုက်တာလဲ]

[ဒါက ဘယ်လို နေရာကြီးလဲ]

[လောင်ရွှီ က ရတနာသိုက်ကြီးကို တကယ် ရှာတွေ့သွားတာလား]

[တကယ့် ရတနာရှာတဲ့ ကျွမ်းကျင်သူကြီးပဲ]

အင်တာနက်သုံးစွဲသူများမှာ မနေနိုင်ဘဲ ဆူညံပွက်လောရိုက်သွားကြတော့သည်။ ဤအရာမှာ တကယ်ကို အပြစ်ပြောစရာ မရှိပေ။ ရွှီယန်၏ တိုက်ရိုက်ထုတ်လွှင့်မှုကို ကြည့်ရတိုင်း အမြဲတမ်း တစ်ခုခုတော့ ထူးခြားမှု ရှိနေတတ်သည်။

ယခုအခါတွင် သူသည် ဖုန်းရွှေလျှို့ဝှက်ပညာကို တတ်ကျွမ်းနေပြီး သာမန်လူများ မသိရှိနိုင်သော အရာတစ်ခုခုကို သိရှိနေကြောင်း အချို့က သံသယ ဝင်နေကြပြီဖြစ်သည်။ မည်သို့ပင်ဖြစ်စေ ရိုးရာယဉ်ကျေးမှုများမှာ သမိုင်းကြောင်း ရှည်လျားလှပေရာ တကယ့်ကို ထူးဆန်းဆန်းကြယ်သော နေရာရှာဖွေရေး ပညာရပ်များ ရှိနေမည်ဆိုလျှင်လည်း အံ့ဩစရာ မဟုတ်ချေ။

တကယ်တမ်းတွင် ရွှီယန်၌ ထိုအရာမျိုး တကယ် ရှိနေလေသည်။ ထိုအရာမှာ ရတနာရှာဖွေရေး သံလိုက်အိမ်မြှောင်ပင် ဖြစ်သည်။ သူကိုယ်တိုင် စဉ်းစားတွက်ချက်ထားခြင်း မဟုတ်ဘဲ ရတနာရှာဖွေရေး သံလိုက်အိမ်မြှောင်၏ လမ်းညွှန်မှု သက်သက်သာ ဖြစ်လေသည်။

ဤသံလိုက်အိမ်မြှောင် ရှိနေသဖြင့် မည်မျှပင် ထူးဆန်းဆန်းကြယ်သော ရတနာသိုက် နေရာများ ဖြစ်နေပါစေ ရတနာရှာဖွေရေး သံလိုက်အိမ်မြှောင်က ရှင်းလင်းစွာ မှတ်သား ပြသပေးမည်သာ ဖြစ်သည်။ ထို့ကြောင့်သာ ဤရတနာသိုက် နေရာများကို ရှာဖွေတွေ့ရှိနိုင်ခြင်းဖြစ်သည်။

အင်တာနက်သုံးစွဲသူများက တိုက်ရိုက်ထုတ်လွှင့်မှု မြင်ကွင်းကို သေချာစွာ မြင်တွေ့လိုက်ရသောအခါ အားလုံးမှာ တစ်ခဏချင်း တိတ်ဆိတ်သွားကြတော့သည်။

ရွှီယန်မှာ မှော်ဆန်သော ကမ္ဘာတစ်ခု အတွင်းသို့ ဝင်ရောက်သွားသည့်အလားပင်။ ဤနေရာရှိ ကျောက်စက်ပန်းဆွဲများမှာ အပြာရင့်ရောင် ဘက်သို့ သန်းနေပြီး တချို့နေရာများတွင် အရောင်အသွေးများပင် ပြောင်းလဲနေသေးရာ ကြည့်ရသည်မှာ အထူးပင် ဆန်းကြယ်လှပေသည်။

ခေါင်းထက်တွင် ကျောက်တိုင်များက တစ်ခုပြီးတစ်ခု တွဲလောင်းကျနေပြီး မြေပြင်မှာလည်း ကျောက်စက်ပန်းဆွဲများ တစ်ထပ်ပြီးတစ်ထပ် စုပုံနေကာ အနိမ့်အမြင့် မညီညာဘဲ ရှိနေလေသည်။

အားလုံးမှာ ကြောင်အမ်းအမ်း ဖြစ်သွားကြရသည်။ ဤနေရာက မည်သည့် နေရာနည်း။ အခြားကမ္ဘာသို့ ကူးပြောင်းသွားနိုင်သည့် ဝင်ပေါက်ကိုများ ရှာတွေ့သွားသည်လားဟု တွေးတောနေမိကြသည်။

လူအချို့က ချက်ချင်းပင် မှတ်ချက်ပေးလာကြသည်။

[လောင်ရွှီ က အခြားကမ္ဘာကို ကူးပြောင်းသွားတာတော့ မဟုတ်ပါဘူးနော်... ဒါက ဘယ်နေရာကို ရောက်သွားတာလဲ]

[ဒီလူက အမြဲတမ်း ဒီလို ထူးဆန်းဆန်းကြယ်တဲ့ နေရာတွေကို ရှာတွေ့နိုင်တာပဲ]

[ထုံးကျောက်လိုဏ်ဂူ ဖြစ်မယ် ထင်တယ်... ဒါပေမဲ့ ဘာလို့ အရောင်စုံ ဖြစ်နေရတာလဲ]

[အရမ်းကို မှော်ဆန်လွန်းတယ်... သူ လူကြိုက်များတဲ့ သတင်းတွေထဲ ထပ်ပါတော့မှာပဲ]

ရွှီယန်၏ တိုက်ရိုက်ထုတ်လွှင့်မှု တိုင်းတွင် အမြဲတမ်း အံ့မခန်း ကိစ္စကြီးများကို ဖန်တီးနိုင်စွမ်း ရှိကြောင်း ဝန်ခံရမည်ဖြစ်သည်။ ဤအရာမှာ ရွှီယန်ကို အပြစ်တင်၍ မရနိုင်ချေ။ ရတနာရှာဖွေရေး သံလိုက်အိမ်မြှောင်က ဤနေရာကို ညွှန်ပြနေပြီဆိုမှတော့ သေချာပေါက် လာရောက် ကြည့်ရှုရမည်သာ ဖြစ်သည်။

ရွှီယန်သည် ကျောက်စက်ပန်းဆွဲများ အတိုင်း အောက်သို့ ဆင်းသွားလေသည်။ အရှေ့ပိုင်းတွင်တော့ လမ်းလျှောက်ရ အဆင်ပြေပြီး ကြီးမားသော ဆင်ခြေလျှော တစ်ခုသာ ဖြစ်သည်။ အတွင်းသို့ ပိုဝင်သွားလေလေ အနည်းငယ် မတ်စောက်လာလေလေ ဖြစ်သည်။

ရွှီယန်သည် အောက်သို့ ဆင်းသွားရင်း တစ်ဖက်မှလည်း အပေါ်သို့ ပြန်တက်ရမည့် လမ်းကြောင်းကို တွက်ချက်နေလေသည်။ အောက်ဘက်တွင် ပိတ်မိသွား၍ မဖြစ်နိုင်ချေ။

ဤလမ်းတစ်လျှောက်လုံးတွင် အသစ်အဆန်း မြင်ကွင်းများချည်းသာ ဖြစ်သည်။ မျိုးစုံသော ကျောက်စက်ပန်းဆွဲ ရှုခင်းများက မျက်စိရှေ့တွင် ပေါ်ထွက်နေလေသည်။

အရှေ့ဘက်ရှိ လမ်းက အနည်းငယ် မှောင်မိုက်နေလေသည်။ ထိုစဉ်မှာပင် အားလုံးက ဓာတ်မီး၏ အလင်းရောင် အကူအညီဖြင့် အရှေ့ဘက်ရှိ ကျောက်နံရံတွင် လှုပ်ရှားနေသော အရိပ်မည်း အချို့ကို မြင်တွေ့လိုက်ရသည်။

ရုတ်တရက် လှုပ်ရှားလာသော အရိပ်မည်းများကြောင့် အားလုံးက တစ်ခဏချင်း သတိထားမိသွားကြတော့သည်။

[ဟိုဘက်ကို ကြည့်လိုက်... အရိပ်မည်းတွေ ရှိနေတယ်]

[ငါလည်း မြင်လိုက်တယ်... အရမ်း ကြောက်စရာကောင်းတာပဲ]

[သူက အောက်ကို ဆင်းသွားနေတုန်းပဲလား]

လိုဏ်ဂူ၏ အနက်ပိုင်း ဖြစ်သဖြင့် ပတ်ဝန်းကျင် တစ်ခုလုံးက မှောင်မိုက်နေလေသည်။ ကံကောင်းသည်မှာ ဓာတ်မီး၏ အလင်းရောင်က အားကောင်းသဖြင့် ရွှီယန်၏ ပတ်ဝန်းကျင်ရှိ လမ်းများကို လင်းထိန်စေနိုင်ခြင်း ဖြစ်သည်။ သို့သော် အလင်းရောင် မရောက်ရှိနိုင်သော နေရာများမှာတော့ အမှောင်ထု၏ မျိုချခြင်းကို ခံထားရဆဲပင်။

ရွှီယန်လည်း အရှေ့ဘက်မှ အရိပ်မည်းများကို မြင်တွေ့လိုက်ရသည်။

မြေအောက် အနက်ပိုင်းတွင် တစ်ခုခု လှုပ်ရှားနေသည်ကို မြင်တွေ့ရခြင်းမှာ ကြောက်မက်ဖွယ် ကောင်းနေမည်မှာ သေချာလှသည်။ တစ်ချိန်တည်းမှာပင် သူက ရေစီးသံများကိုပါ ကြားလိုက်ရသည်။ ဤသည်မှာ အောက်ဘက်သို့ ထပ်ဆင်းပါက မြေအောက်ရေ ရှိနေပြီး အတိုင်းအတာ တစ်ခုအထိ အန္တရာယ် ရှိနိုင်ကြောင်း ဖော်ပြနေခြင်းဖြစ်သည်။

"ဒီနေရာမှာ သက်ရှိတွေ ရှိနေတာလား"

"တိရစ္ဆာန် တစ်ကောင်ကောင် ခိုးဝင်လာပြီး နေထိုင်နေတာများလား"

ရွှီယန်က အသံထွက်ကာ ပြောလိုက်သည်။ သူ၏ အသံကြောင့် အင်တာနက်သုံးစွဲသူများမှာ ပို၍ပင် စိုးရိမ်ထိတ်လန့်လာကြတော့သည်။

[လောင်ရွှီ... မပတ်သက်သင့်တာတွေနဲ့ မပတ်သက်မိစေနဲ့နော်]

[ထုံးကျောက်လိုဏ်ဂူထဲမှာ ဒိုင်နိုဆောခေတ်က ဖွတ်ပုတတ်ကြီးတွေများ ရှိနေမလား]

[သူ ရှာတွေ့ထားတဲ့ ဒီလိုဏ်ဂူက အရမ်းကို နက်ရှိုင်းလွန်းတယ်... အထဲမှာ တကယ်ပဲ ထူးဆန်းတာ တစ်ခုခု ရှိနေနိုင်တယ်]

လူအတော်များများမှာ အသက်ကို ပြင်းပြင်း မရှူရဲလောက်အောင်ပင် ဖြစ်သွားကြရပြန်သည်။ တောင်ပေါ်သို့ တက်လာစဉ်က ရွှီယန်က ဤတစ်ကြိမ် တိုက်ရိုက်ထုတ်လွှင့်မှုမှာ ပေါ့ပေါ့ပါးပါး စွန့်စားခန်း တစ်ခုသာ ဖြစ်ပြီး ဘာအန္တရာယ်မှ ရှိမည် မဟုတ်ကြောင်း ပြောဆိုခဲ့သေးသည်။ သို့သော် ဒုတိယနေ့ အရောက်မှာပင် အလွန် နက်ရှိုင်းသော ထုံးကျောက်လိုဏ်ဂူ တစ်ခုကို တိုက်ရိုက် ရှာဖွေတွေ့ရှိကာ ဝင်ရောက်သွားလိမ့်မည်ဟု မည်သူကများ ထင်မှတ်ထားမည်နည်း။

ပတ်ဝန်းကျင် အခြေအနေက အနည်းငယ် ဖိအားများနေလေသည်။ ရွှီယန်ကတော့ တည်ငြိမ်နေပြီး အောက်ဘက်သို့သာ တောက်လျှောက် ဆင်းသွားနေလေသည်။

"အားလုံးပဲ စိတ်ချပါ... ဘာမှ မဖြစ်ပါဘူး"

"ထုံးကျောက်လိုဏ်ဂူထဲမှာ တိရစ္ဆာန်တွေ ရှိနေတာကလည်း ပုံမှန်ပါပဲ... ကွေ့ကျိုး ဘက်မှာ ထုံးကျောက်လိုဏ်ဂူပေါင်း တစ်သိန်းလောက် ရှိတယ်... နွေရာသီမှာ လေပူတွေက အထဲကို မဝင်နိုင်သလို ဆောင်းရာသီမှာလည်း အထဲက လေနွေးတွေက အပြင်ကို မထွက်နိုင်တဲ့အတွက် လိုဏ်ဂူထဲမှာ ဆောင်းနွေးနွေအေး ဖြစ်နေတတ်တယ်"

"ဒေသခံတွေကလည်း ထုံးကျောက်လိုဏ်ဂူတွေထဲကို လာပြီး အပူရှောင်ရတာ သဘောကျကြတယ်"

"သေချာတာကတော့ ဒီလို ကြီးမားတဲ့ ထုံးကျောက်လိုဏ်ဂူမျိုးက တွေ့ရခဲတယ်... ပြီးတော့ ဒီလိုဏ်ဂူက ဘယ်သူမှ ရှာမတွေ့သေးတဲ့ လိုဏ်ဂူတစ်ခု ဖြစ်နေတာပဲ"

"ဒါက ကျွန်တော် တောတောင်ရှာဖွေရေး လုပ်လာတဲ့ တစ်လျှောက်လုံး တွေ့ဖူးသမျှထဲမှာ အထူးဆန်းဆုံး တောင်ရှုခင်း ဖြစ်လောက်တယ်"

"အရိပ်မည်းတွေ ရှိတဲ့နေရာကို သွားကြည့်ကြရအောင်... ကျွန်တော့် အထင်တော့ အလင်းရောင် အောက်မှာ ကျောက်စက်ပန်းဆွဲတွေရဲ့ အရိပ်က လှုပ်ယမ်းနေတာ ဖြစ်နိုင်တယ်... သက်ရှိသတ္တဝါတော့ မဟုတ်လောက်ဘူး"

ရွှီယန်သည် ဆင်ခြေလျှော အတိုင်း အောက်သို့ ဆက်လက် ဆင်းသွားလိုက်သည်။ တချို့နေရာများမှာ အတော်လေး ချော်နေလေသည်။ အင်တာနက်သုံးစွဲသူများမှာ သူ၏ သတ္တိကို အံ့ဩလေးစားနေကြသလို တစ်ချိန်တည်းမှာပင် သူတို့၏ အကြည့်များကို တိုက်ရိုက်ထုတ်လွှင့်မှု မြင်ကွင်းမှ တစ်စက္ကန့်မျှပင် ဖယ်ခွာခြင်း မရှိကြချေ။

ဤအချိန် ဤအခိုက်အတန့်တွင် ရွှီယန်၏ တိုက်ရိုက်ထုတ်လွှင့်မှုမှာ တကယ်ကို ရေပန်းစားနေလေသည်။ နေရာအနှံ့အပြားတွင် ကြည့်ရှုနေသူများ ရှိနေကြသည်။ မြေအောက်ရထား စီးနေစဉ်မှာပင် လူအချို့က ရွှီယန်၏ တိုက်ရိုက်ထုတ်လွှင့်မှုကို ကြည့်ရှုနေသည်ကို မြင်တွေ့နိုင်လေသည်။

ကွေ့ကျိုး ရှိ ဌာနဆိုင်ရာ အတော်များများ ကလည်း ရွှီယန်၏ လှုပ်ရှားမှုများကို စောစောစီးစီး ကတည်းက သတိထားမိနေကြပြီး ဌာန အချင်းချင်းကြားတွင် ဖုန်းခေါ်ဆိုမှုများ အဆက်မပြတ် ဖြစ်ပေါ်နေလေသည်။

မကြာသေးမီကမှ အနောက်ပိုင်းသဲကျွန်းစု တွင် ပင်လယ်အောက်ခြေရှိ နစ်မြုပ်နေသော သင်္ဘော တစ်စင်းကို ရှာဖွေတွေ့ရှိကာ သတင်းကြီး တစ်ခု အဖြစ် ပါဝင်ခဲ့သေးသည်။ ယခု တစ်လှည့်တွင် ကွေ့ကျိုး၌ ကြီးမားသော ထုံးကျောက်လိုဏ်ဂူ ကြီးတစ်ခုကို ထပ်မံ ရှာဖွေတွေ့ရှိပြန်ပြီး မည်သူမျှ မတွေ့ရှိသေးသော လိုဏ်ဂူတစ်ခု ဖြစ်နေပြန်သည်။

လူများမှာ အဓိပ္ပာယ်မဲ့လွန်းသည် ဟုသာ ခံစားနေကြရသည်။ ပြည်တွင်းရှိ တစ်ဦးတည်းသော ရတနာရှာဖွေရေး ကျွမ်းကျင်သူ ပညာရှင်ပင် ဖြစ်သည်။

တချို့ နေရာများ ဆိုလျှင် ရွှီယန်၏ တိုက်ရိုက်ထုတ်လွှင့်မှုကို မြင်တွေ့ပြီးနောက် ရွှီယန် သူတို့၏ ပြည်နယ်သို့ အမြန်လာရောက်ကာ ရှေးဟောင်း အမွေအနှစ်များနှင့် အကြွင်းအကျန်များ အစရှိသည်တို့ကို ရှာဖွေတွေ့ရှိနိုင်ခြင်း ရှိမရှိ စမ်းသပ်ကြည့်စေချင်နေကြသည်။ လမ်းကြုံသည့် အနေဖြင့် ခရီးသွားလာရေး လုပ်ငန်းကိုပါ မြှင့်တင်ပေးနိုင်သဖြင့် တကယ့်ကို ခဲတစ်လုံးတည်းဖြင့် ငှက်နှစ်ကောင် ပစ်သကဲ့သို့ပင် ဖြစ်ပေသည်။

လူအတော်များများမှာ တိုက်ရိုက်ထုတ်လွှင့်မှုကို ကြည့်ရှုရင်း အံ့ဩတကြီးဖြင့် ချီးကျူးစကား ဆိုနေမိကြသည်။

[သူက အောက်ကို ဆင်းနေတုန်းပဲ... နည်းနည်းလေးတောင် မကြောက်ဘူးလား]

[အရမ်း အကြမ်းစားပဲ]

[အစ်ကိုယန် က တကယ် ပြိုင်ဘက်ကင်းပဲ]

ဤအချိန် ဤအခိုက်အတန့်တွင် ရွှီယန်သည် စောစောက အရိပ်မည်းများ လှုပ်ရှားနေသော နေရာသို့ ရောက်ရှိသွားခဲ့ပြီဖြစ်သည်။ ထင်ထားသည့်အတိုင်းပင် ကျောက်စက်ပန်းဆွဲ တိုင်အချို့သာ ဖြစ်ပြီး ထူးခြားဆန်းကြယ်မှု မရှိလှချေ။

ထို့နောက် သူသည် မြေအောက် မြစ်ရေကို မြင်တွေ့နိုင်သည်အထိ အောက်သို့ ဆက်လက် ဆင်းသွားလေသည်။ တဝေါဝေါ စီးဆင်းနေသော မြစ်ရေများက မြစ်ကြောင်းအတိုင်း စီးဆင်းနေပြီး အလွန် ကြည်လင်နေကာ စမ်းသပ်ကြည့်လိုက်သောအခါ အနည်းငယ် အေးစက်စက် ရှိနေလေသည်။

မြေအောက် မြစ်များက အတော်လေး အန္တရာယ် များလှပေသည်။ အကယ်၍ ပြုတ်ကျသွားပြီး ပြန်မတက်နိုင်ပါက နတ်ဘုရားများပင် ကယ်တင်နိုင်ရန် ခက်ခဲလှပေမည်။ မည်သို့ပင်ဖြစ်စေ မြစ်အောက်ခြေ၏ မြေမျက်နှာသွင်ပြင်က အလွန် ရှုပ်ထွေးလွန်းလှသည်။

"မြေအောက်ရေကို ပထမဆုံးအကြိမ် အနီးကပ် လေ့လာခွင့်ရတာ တော်တော်လေး ထူးဆန်းတာပဲ"

ရွှီယန်သည် အောက်ဘက်တွင် စီးဆင်းနေသော မြစ်ကို ကြည့်ရင်း အံ့ဩတကြီး ပြောလိုက်သည်။

"ဟိုဘက်မှာ ရေတံခွန် အသေးလေး တစ်ခုတောင် ရှိသေးတယ်"

သူသည် အရှေ့ဘက်သို့ လက်ညှိုးထိုးပြကာ မိတ်ဆက်ပေးလိုက်သည်။

အင်တာနက်သုံးစွဲသူများလည်း အဆက်မပြတ် အံ့ဩချီးကျူးနေကြလေသည်။ လောင်ရွှီ တစ်ယောက် နေ့စဉ်နေ့တိုင်း သွားရောက်နေသော နေရာများမှာ သာမန်လူများ သွားရောက်နိုင်ခြင်း မရှိသော နေရာများချည်းသာ ဖြစ်နေလေသည်။ ပြိုင်ဘက်ကင်း ကြီးကျယ်သော စွန့်စားရှာဖွေသူကြီး တစ်ယောက်ဟု ဆိုနိုင်ပေသည်။

တာဝန် သတ်မှတ်ထားသော နေရာက အောက်ဘက်တွင် ဆက်လက် ရှိနေသေးသဖြင့် ရွှီယန်သည် အောက်သို့ ဆက်လက် ဆင်းသွားလေသည်။

အောက်ဘက်ရှိ ရှုခင်းများက အနည်းငယ် မှိုင်းလုံးလာပြီး ငရဲပြည် ၁၈ ထပ်သို့ သွားရောက်သည့် အလားပင်။ လူအချို့မှာ ဆက်လက်၍ပင် မကြည့်ရဲတော့ချေ။

ရွှီယန် သွားရောက်သော နေရာများမှာ သာမန်လူများ သွားရောက်နိုင်သော နေရာများ မဟုတ်ကြောင်းကိုသာ သူတို့ အမြဲတမ်း ခံစားနေကြရသည်။

ကံကောင်းသည်မှာ ဤလမ်းတစ်လျှောက်လုံးတွင် အသည်းယားစရာ ကောင်းသော်လည်း ရွှီယန်က အမြဲတမ်း တည်ငြိမ်စွာ ဖြေရှင်းနိုင်ခဲ့ခြင်းပင်။

"ဒီဘက်က ရှုခင်းတွေက မဆိုးဘူး... ဒါပေမဲ့ အောက်ဘက်မှာက နည်းနည်း အန္တရာယ်များတယ်"

"နောက်ပိုင်း တာဝန်ရှိသူတွေက ဖွံ့ဖြိုးတိုးတက်အောင် လုပ်မယ်ဆိုရင် အကာအကွယ် အစီအမံတွေကို သေချာလေး လုပ်ထားသင့်တယ်"

"ပြီးတော့ အောက်ကို ရောက်လေလေ ပိုအေးလေလေပဲ... အခုဆို ကျွန်တော့် ခန္ဓာကိုယ်တောင် နည်းနည်း အေးစက်စက် ဖြစ်လာပြီ"

ရွှီယန်က အောက်ဆုံး အခြေသို့ ရောက်ရှိသွားသောအခါ ရှင်းပြလိုက်သည်။

အင်တာနက်သုံးစွဲသူများမှာ ပတ်ဝန်းကျင်ရှိ မှောင်မိုက်ပြီး ကျဉ်းမြောင်းနေသော အခြေအနေကို ကြည့်ရှုရင်း အားလုံးမှာ ကြောင်အမ်းအမ်း ဖြစ်သွားကာ စကားတစ်ခွန်းမျှပင် မပြောနိုင်တော့ချေ။ ဤကဲ့သို့သော အခြေအနေမျိုးကို ရောက်ရှိအောင် လုပ်ဆောင်နိုင်သူမှာ သူ တစ်ယောက်တည်းသာ ရှိနိုင်မည်မှာ သေချာလှပေသည်။

အချိန် သိပ်မကြာခင်မှာပင် ရွှီယန်သည် နောက်ဆုံး၌ အောက်ဆုံး အခြေသို့ ရောက်ရှိသွားခဲ့သည်။ ဤနေရာက အောက်သို့ ချိုင့်ဝင်နေသော ကျင်းတစ်ခု ဖြစ်လေသည်။

သူသည် ကျိုးပဲ့နေသော ကျောက်စက်ပန်းဆွဲ အပိုင်းအစ အချို့ကို မြင်တွေ့လိုက်ရသဖြင့် အမှတ်တရ အနေဖြင့် တစ်ခုကို ကောက်ယူ သိမ်းဆည်းလိုက်သည်။

တာဝန်လည်း အောင်မြင်စွာ ပြီးမြောက်သွားခဲ့ပြီဖြစ်သည်။ အကြမ်းဖျင်းအားဖြင့် ပြောရလျှင် ဤအတွေ့အကြုံက အတော်လေး ထူးဆန်းလှပေသည်။

ထို့နောက် ရွှီယန်သည် အပေါ်ဘက်သို့ မော့ကြည့်လိုက်ပြီး လေကို ပြင်းပြင်း တစ်ချက် ရှူသွင်းကာ ဖြည်းညင်းစွာ ပြောလိုက်သည်။

"အောက်ဆုံး ရောက်ပြီဆိုတော့ ပြန်ရတော့မယ်"

"ဒါပေမဲ့ ပြန်ထွက်ဖို့ နည်းနည်းတော့ မလွယ်ဘူး"

"နေရာတော်တော်များများက ဆင်းလာတုန်းက တော်တော်လေး ချောနေတာ"

"တစ်လှမ်းပြီးတစ်လှမ်း သတိထားပြီး သွားရုံပဲ ရှိတော့တယ်"

ပြောပြီးသည်နှင့် သူသည် နောက်လှည့်ကာ ထုံးကျောက်လိုဏ်ဂူ၏ အပေါ်ဘက်သို့ စတင် တွယ်တက်လေတော့သည်။

သူ၏ စကားကို ကြားသောအခါ အင်တာနက်သုံးစွဲသူများမှာ ဘာပြောရမှန်း မသိအောင် ဖြစ်သွားကြရသည်။

[မင်း ဒီစကားကို ပြောတဲ့အချိန်မှာ နည်းနည်းလောက် ကြောက်နေတဲ့ ပုံစံမျိုးလေး လုပ်ပြလို့ မရဘူးလား]

[ထုံးကျောက်လိုဏ်ဂူ ကြီးကို နည်းနည်းလောက်တော့ လေးစားမှု ပေးလိုက်ပါလား]