အခန်း ၃၇၁

အခန်း (၃၇၁) ဆုလာဘ် ရရှိခြင်းနှင့် အသုံးမဝင်သော စွမ်းရည်တစ်ခု ထပ်တိုးလာခြင်း

တောင်ထဲရှိ ထုံးကျောက်လိုဏ်ဂူက အလွန် လှပလွန်းလှပြီး တစ်ကိုယ်လုံး အရောင်အသွေး စုံလင်နေလေသည်။

ကွေ့ကျိုး အစိုးရ က ရွှီယန်၏ တိုက်ရိုက်ထုတ်လွှင့်မှုကို သတိထားမိသွားသောအခါ အလွန် စိတ်လှုပ်ရှားသွားကြသည်။ ဤသည်မှာ ဖွံ့ဖြိုးတိုးတက်အောင် လုပ်ဆောင်ရန် တန်ဖိုးရှိသော ရှုခင်းသာ နေရာကောင်း တစ်ခု ဖြစ်ပေသည်။

သို့သော် များမကြာမီမှာပင် သူတို့က နေရခက်သော ပြဿနာ တစ်ခုကို တွေ့ရှိသွားကြသည်။

ရွှီယန် မည်သည့် နေရာတွင် ရှိနေမှန်း လုံးဝ မသိရှိကြခြင်းပင်။

ရွှီယန်က တောင်နက်ကြီး အတွင်းပိုင်းသို့ ဝင်ရောက်သွားခြင်း ဖြစ်ရာ ရှာဖွေရန်မှာ တကယ်ကို မလွယ်ကူလှချေ။

သူက အလွန် ပုန်းကွယ်တတ်လွန်းလှသည်။

ထို့ကြောင့် ကွေ့ကျိုး ၏ ဘူမိဗေဒ ဌာနက အရှေ့မြောက်ဒေသ ဘက်မှနေ၍ ရွှီယန်၏ အဆက်အသွယ် ဖုန်းနံပါတ်ကို တောင်းယူကာ ရွှီယန်ထံသို့ ဖုန်းဆက်လိုက်ကြသည်။

"ဟယ်လို... ဘူမိဗေဒ ဌာန ကလား... ကျွန်တော် ဘယ်မှာလဲ လို့ မေးနေတာလား..."

"တောင်းပန်ပါတယ်ဗျာ... ခင်ဗျားတို့ရဲ့ အမည်အထောက်အထားကို အတည်မပြုနိုင်လို့ ပြောပြလို့ မရဘူး..."

"ဒါပဲနော်..."

ရွှီယန်က ဖုန်းလက်ခံ ပြောဆိုပြီး စကားနှစ်ခွန်းခန့် ပြောပြီးသည်နှင့် ဖုန်းကို ချက်ချင်း ချပစ်လိုက်တော့သည်။

မတတ်နိုင်ချေ။ အရင်တုန်းကလည်း သူက ဤကဲ့သို့သော ဖုန်းမျိုး လက်ခံရရှိဖူးပြီး ကံကောင်းစွာဖြင့် အနည်းငယ် သတိထားလိုက်မိခြင်း ဖြစ်သည်။

ထိုသို့သာ မဟုတ်လျှင် သူ ရတနာရှာဖွေနေသည့် နေရာကို အခြားသူများ တွေ့ရှိသွားမည် ဖြစ်သည်။

ဘူမိဗေဒ ဌာန မှ လူများမှာလည်း ရယ်ရခက် ငိုရခက် ဖြစ်သွားကြပြီး တစ်ခဏချင်း ဘာပြောရမှန်း မသိအောင် ဖြစ်သွားကြရသည်။

သို့သော် ဤသို့ ဖြစ်သွားသည် ကလည်း ကောင်းမွန်သော ကိစ္စတစ်ခုပင်။

သူတို့ အနေဖြင့် ရွှီယန် ထွက်လာမည့် အချိန်အထိ စောင့်ဆိုင်းကာ သူ့ကို လူချင်း တွေ့ဆုံပြီးမှသာ ဤထုံးကျောက်လိုဏ်ဂူ၏ အတိအကျ တည်နေရာကို အတည်ပြုနိုင်မည် ဖြစ်သည်။

အပြင်ဘက်ရှိ ရှုခင်းများက အလွန် ကောင်းမွန်နေဆဲပင်။

ဤရှားပါး ရတနာရှာဖွေရေး တာဝန်က သာမန်လူများ အတွက်တော့ အလွန် ခက်ခဲလှသော်လည်း ရွှီယန် အတွက်တော့ အခက်အခဲ ကြီးကြီးမားမား မရှိခဲ့ချေ။

သူက အပေါ်သို့ တောက်လျှောက် တွယ်တက်လာခဲ့သည်။

တချို့နေရာများက အတော်လေး မတ်စောက်သဖြင့် သူက နောက်သို့ ခြေနှစ်လှမ်းခန့် ဆုတ်ကာ အရှိန်ယူပြီး အပြင်းအထန် ခုန်တက်လိုက်ကာ ခြေထောက်ကို နှစ်ချက် သုံးချက်ခန့် ကန်လိုက်ရုံဖြင့် ထုံးကျောက်လိုဏ်ဂူ၏ အပေါ်သို့ ရောက်ရှိသွားတော့သည်။

ဤလှုပ်ရှားမှု အနည်းငယ် ကပင် အခြားလူများ လိုက်လုပ်၍ မရနိုင်သော လှုပ်ရှားမှုများ ဖြစ်ပေသည်။

သူ၏ ခန္ဓာကိုယ်က အလွန် ပေါ့ပါးသွက်လက်နေပြီး ကိုယ်ဖော့ပညာ တတ်ကျွမ်းနေသည့် အလားပင်။

[လခွမ်း... အစ်ကိုယန် ရဲ့ ဒီကိုယ်ဟန်က အရမ်း ကြမ်းတာပဲ]

[အခု မင်း ပျံနိုင်တယ် လို့ ပြောရင်တောင် ငါ ယုံတယ်]

[ဟားဟားဟား... တကယ်ကို စတိုင်ကျတာပဲ... သေချာပေါက် လေ့ကျင့်ထားတာ ဖြစ်ရမယ်]

အင်တာနက်သုံးစွဲသူများ က အဆက်မပြတ် အံ့ဩချီးကျူးနေကြတော့သည်။

ရွှီယန်က တွယ်တက်ရမည့် လမ်းကြောင်းကို စောစောစီးစီး ကတည်းက ကြိုတင် ရေးဆွဲထားပြီး ဖြစ်ရာ ဤလမ်းတစ်လျှောက်လုံး အတားအဆီး မရှိဘဲ လွယ်ကူစွာ တက်လာနိုင်ခဲ့သည်။

အားလုံးက ဤမြင်ကွင်းကို အစအဆုံး မြင်တွေ့ခဲ့ကြရသည်။

ဤဗီဒီယို အကြောင်းအရာများက တကယ်ကို တုန်လှုပ်ဖွယ် ကောင်းလွန်းလှပေသည်။

ယခုအခါ ရွှီယန်၏ ဗီဒီယိုများက နိုင်ငံရပ်ခြား တွင်လည်း အလွန် နာမည်ကြီးနေပြီဖြစ်ပြီး နိုင်ငံခြားသားများ ကလည်း ဤကဲ့သို့သော အကြောင်းအရာများကို အထူး ကြည့်ရှုချင်ကြလေသည်။

ဥပမာအားဖြင့် မကြာသေးမီက အရှေ့မြောက်ဒေသ မှ အဘိုးအို တစ်ယောက် ကျားတိုက်ခိုက်ခံရလုနီးပါး ဖြစ်ခဲ့ပြီး ကျားက သံတံခါးကိုပင် ဝင်တိုက်ခဲ့သည့် ဗီဒီယိုမျိုးက နိုင်ငံရပ်ခြားတွင် အတော်လေး နာမည်ကြီးခဲ့လေသည်။

ရွှီယန်၏ ဗီဒီယိုများကတော့ ပို၍ပင် လူကြိုက်များလှပေသည်။

ရွှီယန် ကိုယ်တိုင်ပင် နိုင်ငံရပ်ခြားရှိ နေရာအတော်များများတွင် သူ၏ ဗီဒီယိုများ လူကြိုက်များနေကြောင်းကို သတိမထားမိသေးချေ။

လူများက သူ့ကို တရုတ်နိုင်ငံ၏ စွန့်စားရှာဖွေရေး ဘုရင် ဟုပင် တင်စား ခေါ်ဝေါ်နေကြလေသည်။

ဤသည်မှာလည်း ဗီဒီယိုများကို ကူးယူ ဖော်ပြကာ ငွေရှာနေသူများ၏ ကျေးဇူးကြောင့်ပင် ဖြစ်သည်။ သူတို့က ငွေပိုမို ရရှိစေရန်အတွက် ရွှီယန်ကို အလွန် ကြီးကျယ်ခမ်းနားသော နာမည်များ ပေးထားကြခြင်း ဖြစ်သည်။

ရွှီယန် ကိုယ်တိုင်ပင် သူ နိုင်ငံရပ်ခြားတွင် ဤမျှ နာမည်ကြီးနေပြီ ဖြစ်ကြောင်းကို တွေးထားမိမည် မဟုတ်ချေ။

အချိန် သိပ်မကြာခင်မှာပင် ရွှီယန်သည် ထုံးကျောက်လိုဏ်ဂူ ထဲမှ ထွက်လာခဲ့သည်။

အပြင်ဘက်ရှိ လေထုက အလွန် လတ်ဆတ်ပြီး အပူချိန် ကလည်း အတွင်းဘက်ထက် သိသိသာသာ ပိုမို မြင့်မားလေသည်။

နေရောင်ခြည်က သူ၏ ကိုယ်ပေါ်သို့ ပြန်လည် ကျရောက်လာခဲ့သည်။

[ရှားပါး ရတနာရှာဖွေရေး တာဝန် ပြီးမြောက်ပါပြီ... ဆုလာဘ်များ ရရှိပါသည်]

[ကျပန်း ကျွမ်းကျင်မှု... လေထဲတွင် လည်ပတ်ခြင်း]

[လေထဲတွင် လည်ပတ်ခြင်း... ပိုင်ရှင်သည် လေထဲတွင် လည်ပတ်နိုင်သော စွမ်းရည်ကို ကျွမ်းကျင်စွာ တတ်မြောက်သွားမည် ဖြစ်ပြီး လက်တစ်ဖက်တည်းဖြင့် လည်ပတ်ခြင်းနှင့် လက်နှစ်ဖက်ဖြင့် လည်ပတ်ခြင်း နှစ်မျိုးစလုံးကို ကျွမ်းကျင်စွာ လုပ်ဆောင်နိုင်မည် ဖြစ်သည်]

[မှတ်ချက်... အထူး အတားအဆီးများကို ကျော်ဖြတ်ရန် သင့်တော်ပါသည်]

[ဒေ့ဗ် ၏ စတိုးဆိုင်ကို ဖွင့်လှစ်လိုက်ပါပြီ]

စနစ်၏ အချက်ပြသံကို ကြားသောအခါ ရွှီယန် တစ်ယောက် တစ်ခဏချင်း ကြောင်အမ်းအမ်း ဖြစ်သွားတော့သည်။

မည်သို့သော ခံစားချက်မျိုး ခံစားရမည်ကိုပင် သူ မသိတော့ချေ။

လူများက ပြောစရာ စကားမရှိ ဖြစ်သွားသောအခါ ရယ်မောတတ်ကြလေသည်။

ရွှီယန်က ဟက်ခနဲ တစ်ချက် ရယ်မောလိုက်ပြီး စိတ်ခံစားချက်ကတော့ တည်ငြိမ်နေဆဲပင်။

'လေထဲတွင် လည်ပတ်ခြင်း ဟုတ်လားကွန်ထရာ ဂိမ်းမှ မဟုတ်တာ... လေထဲမှာ အပတ်ရေ အများကြီး လည်ပြီး ဘာလုပ်ရမှာလား..’

စနစ်က အထူး အတားအဆီးများကို ကျော်ဖြတ်ရန် သင့်တော်သည်ဟု သတိပေးထားသေးသည်။ ရွှီယန်က ဆပ်ကပ်ရုံမှ ခြင်္သေ့လည်း မဟုတ်သလို မီးကွင်းများထဲသို့ ခုန်ဝင်နေရန်လည်း မလိုအပ်သဖြင့် မည်သည့် အထူး အတားအဆီးများကို ကျော်ဖြတ်ရမည်နည်း။

ပုံမှန်အားဖြင့် လေထဲတွင် လည်ပတ်သည့် လှုပ်ရှားမှုများက တကယ်ကို ပိုလျှံနေသော လှုပ်ရှားမှုများ ဖြစ်ပြီး ပြသရန် သက်သက်သာ ဖြစ်လေသည်။ ဥပမာအားဖြင့် နံရံပေါ်မှ ခုန်ချခြင်း မျိုးတွင် ဖြစ်သည်။

တိုက်ရိုက် ခုန်ချ၍လည်း ရသလို အပေါ်သို့ အပြင်းအထန် ခုန်တက်ကာ လေထဲတွင် ၃၆၀ ဒီဂရီ လည်ပတ်ပြီးမှ မြေကြီးပေါ်သို့ ဆင်းသက်၍လည်း ရလေသည်။

ပထမနည်းလမ်းက သာမန်လူများ လုပ်ဆောင်သည့် နည်းလမ်းဖြစ်ပြီး ဒုတိယနည်းလမ်းကတော့ အနည်းငယ် ရူးကြောင်ကြောင် နိုင်သည့် နည်းလမ်းပင် ဖြစ်သည်။

မည်သို့ပင်ဖြစ်စေ အသုံးမဝင်သော စွမ်းရည်များ အများအပြား ရှိနေပြီဖြစ်ရာ ရွှီယန် ကလည်း ဂရုမစိုက်တော့ချေ။

"ဒီစွမ်းရည်က ရေငုပ်ဖို့ အတွက်တော့ တော်တော်လေး သင့်တော်တာပဲ..."

"ဒါပေမဲ့ ရေငုပ်တာက လေထဲမှာ လည်ပတ်တဲ့ အပတ်ရေကို ကြည့်ရုံတင် မကဘူး... ရေထဲ ကျသွားတဲ့ အချိန်မှာ ရေစင်တဲ့ ပမာဏ ကိုပါ ကြည့်ရတာလေ..."

"ငါ ရေထဲကျရင် ရေစင်တာ သေချာပေါက် များမှာဆိုတော့ ဘာမှ အသုံးဝင်မှာ မဟုတ်ပါဘူး..."

ရွှီယန်က စိတ်ထဲမှ တွေးတောနေလိုက်သည်။

စွမ်းရည်က အသုံးမဝင်သော်လည်း အပိုဆုလာဘ် အဖြစ် စွမ်းဆောင်ရည် အလွန်မြင့်မားသော ပြင်ပစွန့်စားမှုသုံး ဒစ်ဂျစ်တယ် လက်ပတ်နာရီ တစ်လုံး ရရှိခဲ့သည့်အပြင် ဒေ့ဗ် ၏ စတိုးဆိုင်ကိုပါ ဖွင့်လှစ်နိုင်ခဲ့သဖြင့် ဤသည်က အတော်လေး စိတ်ဝင်စားစရာ ကောင်းလှပေသည်။

ရွှီယန်က ဒေ့ဗ် ၏ စတိုးဆိုင်ကို ချက်ချင်းပင် ဝင်ကြည့်လိုက်သည်။

ဤအခိုက်အတန့်တွင် စတိုးဆိုင် အတွင်း၌ သီးနှံမျိုးစေ့ သုံးမျိုးကို ရောင်းချနေသည်ကို တွေ့လိုက်ရသည်။

စပါး မျိုးစေ့ (အရည်အသွေးမြင့်) - တစ်အိတ်လျှင် အမှတ် ၁၀၀၀

ငရုတ်ချို မျိုးစေ့ (အရည်အသွေးမြင့်) - တစ်အိတ်လျှင် အမှတ် ၃၀၀၀

အထူးစပ် ငရုတ် မျိုးစေ့ (အရည်အသွေးမြင့်) - တစ်အိတ်လျှင် အမှတ် ၃၀၀၀

ဒေ့ဗ် ၏ စတိုးဆိုင်က အချိန်အကန့်အသတ်မရှိ သီးနှံမျိုးစေ့များကို မွမ်းမံပေးမည် ဖြစ်ပြီး တစ်ကြိမ် မွမ်းမံတိုင်း မျိုးစေ့များ ကလည်း မတူညီကြချေ။

ရွှီယန်က ဤမျိုးစေ့များကို မြင်သောအခါ အားလုံး မဆိုးလှဟု ထင်မြင်မိသည်။

လယ်ယာခြံဝင်းသို့ ပြန်ရောက်ပါက အားလုံးကို ဝယ်ယူလိုက်မည် ဖြစ်သည်။

လောလောဆယ်တွင်တော့ တောင်နက်ကြီးထဲ၌ ရှိနေဆဲဖြစ်ပြီး ပတ်ဝန်းကျင် အခြေအနေက အလွန် ကောင်းမွန်လှပေသည်။

တောထဲရှိ တိရစ္ဆာန်များ ကလည်း အလွန် များပြားပြီး ပထမအဆင့် ကာကွယ်စောင့်ရှောက်ရမည့် တိရစ္ဆာန် အသစ်များ အများအပြား ရှိနေသေးသည်။

ဥပမာအားဖြင့် ကြောင်ကတိုး နှင့် မျက်နှာမည်း မျောက်များ ပင် ဖြစ်သည်။

ရွှီယန်က ဆက်လက် လှည့်ပတ်ကြည့်ရှုရန် ရည်ရွယ်ထားလေသည်။

မည်သို့ပင်ဖြစ်စေ ဤနေရာရှိ ရှုခင်းများကိုတော့ အပြည့်အဝ ခံစားသွားရမည် မဟုတ်ပါလော။

ထို့နောက် သူက မြစ်ကြောင်းအတိုင်း အပြင်သို့ ရေကူး ထွက်လာခဲ့သည်။

အပြင်သို့ ထွက်သည့် အချိန်တွင် မြစ်ကြောင်းအတိုင်း စုန်ဆင်းလာရသဖြင့် သူ၏ အရှိန်က အလွန် မြန်ဆန်လှပေသည်။

အင်အား အများကြီး သုံးစရာ မလိုဘဲ တောင်ကြားထဲမှ တောက်လျှောက် ကူးခတ် ထွက်လာနိုင်ခဲ့သည်။

သူက ကင်မရာကို ထပ်မံ လှည့်လိုက်ပြီး သန့်ရှင်းသော အဝတ်အစား တစ်စုံကို လဲလှယ်လိုက်သည်။ ထိုအချိန်တွင် အင်တာနက်သုံးစွဲသူများ က တိုက်ရိုက်ထုတ်လွှင့်မှုထဲတွင် အဆက်မပြတ် အော်ဟစ်ကာ တိုက်ရိုက်ထုတ်လွှင့်ပြရန် တောင်းဆိုနေကြပြီး အကျိုးအမြတ်လေးများ ကြည့်ရှုချင်နေကြလေသည်။

တိုက်ရိုက်ထုတ်လွှင့်မှု၏ ပတ်ဝန်းကျင် အခြေအနေ ကလည်း အထူးပင် ဆူညံပွက်လောရိုက်နေတော့သည်။

ထို့နောက် ရွှီယန်က တောင်ပေါ်သို့ ဆက်လက် လျှောက်လှမ်းသွားလိုက်သည်။

သူ့တွင် ရတနာရှာဖွေရေး အကြိမ်ရေ အချို့ ကျန်ရှိနေသေးရာ တောင်ပေါ်တွင် အသုံးပြုရသည်က အတော်လေး ကောင်းမွန်လှပေသည်။

သာမန် ရတနာရှာဖွေရေး တာဝန် တစ်ခုကို လုပ်ဆောင်ခဲ့ပြီး ရွှေလင်းယုန် တစ်ကောင်နှင့် အတူ ဓာတ်ပုံ တွဲရိုက်ခဲ့ရာ ရွှေရောင် ငှက်မွေး တစ်ချောင်းကို ဆုလာဘ် အဖြစ် ရရှိခဲ့သည်။

ထို့နောက် တောထွက်ပစ္စည်း နှစ်ကြိမ်ခန့် ထပ်မံ ရှာဖွေခဲ့ပြီး ပထမအဆင့် ကာကွယ်စောင့်ရှောက်ရမည့် အပင်ဖြစ်သော ခိုဖြူပင် ကို ရှာတွေ့ခဲ့သည်။

ဤခိုဖြူပင်ကြီးက အလွန် ကြီးမားလှပြီး ပန်းပွင့်ချိန်သို့ ရောက်ရှိနေသဖြင့် သစ်ပင် တစ်ပင်လုံးတွင် အဖြူရောင် ပန်းပွင့်များ အပြည့်အနှက် ပွင့်လန်းနေရာ ခိုဖြူလေးများ နှင့်ပင် တူနေလေသည်။

ဤသစ်ပင်က အထူးပင် လှပလွန်းလှပြီး အင်တာနက်သုံးစွဲသူများ လည်း အမြင်အာရုံ စည်းစိမ် အပြည့်အဝ ခံစားလိုက်ကြရသည်။

နောက်တစ်ကြိမ် တွင်တော့ ကြောင်ကတိုး တစ်ကောင်ကို ရှာတွေ့ခဲ့သော်လည်း တိုက်ရိုက်ထုတ်လွှင့် မပြသခဲ့ချေ။

ယခုအခါ ခိုးဝှက် အမဲလိုက်သူများ က ကြောင်ကတိုးများကို ခိုးဝှက် အမဲလိုက်သည့် ဖြစ်စဉ်များ အတော်လေး များပြားနေသဖြင့် ရွှီယန် အနေဖြင့် ဤအကောင်လေးကို ကံဆိုးမှုများ မယူဆောင်လာပေးချင်သောကြောင့် ဖြစ်သည်။

ထို့ကြောင့် သူက အနည်းငယ်မျှသာ ကြည့်ရှုလိုက်ပြီး တိုက်ရိုက်ထုတ်လွှင့် မပြသခဲ့ခြင်း ဖြစ်သည်။

ချစ်စရာကောင်းသော အကောင်လေးကို မြင်တွေ့လိုက်ရခြင်း ကပင် လုံလောက်ပြီ ဖြစ်သည်။

ဤတစ်ကြိမ် တိုက်ရိုက်ထုတ်လွှင့်မှုတွင်တော့ အသည်းယားဖွယ်ရာ ကိစ္စရပ်များ သိပ်မရှိခဲ့ချေ။

သို့သော် လူကြိုက်များမှု ကတော့ မြင့်မားနေဆဲပင်။

ဘူမိဗေဒ ဌာန က သူ့ကို သီးသန့် တစ်ခေါက် လာရောက် ရှာဖွေခဲ့ပြီး ထုံးကျောက်လိုဏ်ဂူ၏ တည်နေရာကို အတည်ပြုခဲ့ကြသည်။

ဤသည်မှာ ဒေသတွင်း၌ သတင်းကြီး တစ်ခု ဖြစ်လာခဲ့ပြန်သည်။

ဒေသခံ အများအပြား က ကြားသိရသောအခါ အထူးပင် အံ့ဩသွားကြတော့သည်။

"ဒီခေတ်ကြီးမှာတောင် ထုံးကျောက်လိုဏ်ဂူကို ရှာတွေ့နိုင်သေးတယ်... ဒီလူက တော်တော်လေး စွမ်းတာပဲ"

"ဘူမိဗေဒ ဌာန က နှစ်တိုင်း စစ်ဆေးနေတာတောင် မတွေ့ခဲ့ဘူးလား"

"အဲဒါကြောင့် သူပဲ လုပ်နိုင်တယ်လို့ ပြောကြတာပေါ့... သူက တောင်ထဲမှာ ပစ္စည်းရှာတာ တကယ် တော်တာပဲ"

"ဘာပစ္စည်းကောင်းကို မဆို ရှာတွေ့နိုင်တယ်လို့ ခံစားရတယ်"

လူများက ထမင်းစားပြီးတိုင်း ဤအကြောင်းကို ဆွေးနွေးပြောဆိုနေကြပြီး ရွှီယန်က ဒေသတွင်း၌ ကျန်ရစ်ခဲ့သော နာမည်သတင်း ကလည်း ကောင်းမွန်လှပေသည်။

ဤတစ်ကြိမ် ရတနာရှာဖွေ ထွက်လာရသည်က ပေါ့ပေါ့ပါးပါးနှင့် ပျော်ရွှင်စရာ ကောင်းလှပေသည်။

အထူးသဖြင့် မျိုးစေ့ စတိုးဆိုင် ကို ဖွင့်လှစ်လိုက်နိုင်သဖြင့် ပို၍ပင် စိတ်ဝင်စားစရာ ကောင်းသည်ဟု ခံစားရလေသည်။

ရွှီယန်က လယ်ယာခြံဝင်း သို့ ချက်ချင်း ပြန်မသွားသေးချေ။

ရောက်လာပြီးမှတော့ မျက်နှာမည်း မျောက်များကို သွားကြည့်ရမည် မဟုတ်ပါလော။

ဤနေရာတွင် မျက်နှာမည်း မျောက်များ အလွန် များပြားလှပြီး အုပ်စုလိုက် ရှိနေတတ်လေသည်။

မျက်နှာမည်း မျောက်များ၏ တစ်ကိုယ်လုံးရှိ အမွေးအမှင်များက အမည်းရောင် ဖြစ်ပြီး အော်မေတောင် မျောက်များနှင့် ရွှေရောင် မျောက်များ နှင့် လုံးဝ မတူညီကြချေ။

ထို့ကြောင့် ရွှီယန်က ရှုခင်းသာ နေရာများသို့ သွားရောက် လည်ပတ်ရန် ရည်ရွယ်လိုက်သည်။

လမ်းတစ်လျှောက်တွင် သူ့ကို ခိုးရိုက်သူများ... သူနှင့်အတူ ဓာတ်ပုံ တွဲရိုက်သူများ ကလည်း မနည်းလှချေ။

တိုက်ဆိုင်သည်ဟု ဆိုရမည်လော မသိပေ။ ရွှီယန်က လေယာဉ်ပေါ်တွင် တွေ့ခဲ့ရသော ထိုင်ဝမ်က ကောင်မလေး နှစ်ယောက်ကို ထပ်မံ တွေ့ဆုံလိုက်ရသည်။

တစ်ယောက်က သူ၏ ပရိသတ် ဖြစ်ပြီး နောက်တစ်ယောက် ကတော့ လှပသူလေး ဖြစ်သည်။

နှစ်ဖက်စလုံး တွေ့ဆုံလိုက်ရသောအခါ အားလုံးက အထူး အံ့အားသင့်သွားကြတော့သည်။

ဒီလိုမျိုး ထပ်တွေ့လိမ့်မည်ဟု မည်သူကမျှ တွေးမထားခဲ့ကြချေ။

သူတို့ သုံးယောက် အတူတကွ နို့လက်ဖက်ရည် တစ်ခွက်စီ သောက်ကြကာ ခဏမျှ စကားစမြည် ပြောဆိုကြပြီးနောက် WeChat အချင်းချင်း လဲလှယ်လိုက်ကြသည်။

ထိုင်ဝမ် ဘက်တွင်လည်း ယခုအခါ WeChat အသုံးပြုသူ အတော်လေး များပြားနေပြီ ဖြစ်သည်။

စကားပြောရသည်က အတော်လေး အဆင်ပြေ ချောမွေ့လှပေသည်။

သူတို့ နှစ်ယောက်စလုံးက တရုတ်ပြည်မကြီးကို အထူး သဘောကျကြပြီး သူတို့၏ Douyin အကောင့်များကိုလည်း အမြဲတမ်း မွမ်းမံလေ့ ရှိကာ အားလုံးက နေ့စဉ်ဘဝ ပုံရိပ်များသာ ဖြစ်ကြသည်။

သို့သော် အရမ်းကို သာမန် နေ့စဉ်ဘဝ ဖြစ်နေသဖြင့် ပရိသတ် အရေအတွက် ကတော့ သိပ်မများလှချေ။

မည်သို့ပင်ဖြစ်စေ အင်တာနက်သုံးစွဲသူများ က အမြည်းလေးများကိုသာ ကြည့်ချင်ကြသည် မဟုတ်ပါလော။

သို့သော်လည်း ပရိသတ် တစ်သောင်း နှစ်သောင်းခန့် တော့ ရှိနေသေးသည်။

ရွှီယန် က မူလကတည်းက စကားပြောကောင်းသူ တစ်ယောက် ဖြစ်ရာ သူတို့နှင့် စကားပြောရသည်မှာ အလွန် ပျော်ရွှင်စရာ ကောင်းလှပေသည်။

အဓိက အကြောင်းရင်းမှာ သူတို့ စကားပြောသည်ကို နားထောင်ရသည်က အထူးပင် စိတ်ဝင်စားစရာ ကောင်းနေသောကြောင့် ဖြစ်သည်။

ရွှီယန်က မကြာခဏ အပြင်ထွက်လေ့ ရှိသော်လည်း လူသူကင်းမဲ့သော နေရာများကိုသာ သွားရောက်လေ့ ရှိသဖြင့် ခင်မင်ရင်းနှီးရသော သူငယ်ချင်း

သိပ်မရှိလှချေ။

သို့သော် ဤတစ်ကြိမ်တွင် သူတို့ နှစ်ယောက်ကို သိကျွမ်းခွင့် ရလိုက်သဖြင့် အကျိုးအမြတ် မဆိုးလှဟု ဆိုရမည်။

စကားစမြည် ပြောဆိုပြီးနောက် ရွှီယန်က သူတို့ကို နှုတ်ဆက်လိုက်သည်။

မျောက်များကို ကြည့်ရှုပြီးနောက် ညဘက် ဟိုတယ်သို့ ပြန်ရောက်သောအခါ သူက စုယွီထုံ နှင့် စကားအနည်းငယ် ထပ်မံ ပြောဆိုဖြစ်ခဲ့ပြီး အတော်လေး စိတ်ဝင်စားစရာ ကောင်းလှပေသည်။

မည်သို့ပင်ဖြစ်စေ ရွှီယန် ကိုယ်တိုင်က အလွန် ထူးချွန်သူ တစ်ယောက် ဖြစ်ရာ မိန်းကလေးများကို ဆွဲဆောင်နိုင်စွမ်း အလွန် မြင့်မားလှပေသည်။

စုယွီထုံ က ပုံမှန်အားဖြင့် အတော်လေး အေးစက်စက် နေတတ်သူ တစ်ယောက် ဖြစ်သော်လည်း သူမ၏ သူငယ်ချင်း လွှမ်းမိုးမှုကြောင့် ရွှီယန်၏ ဗီဒီယိုများကို အများအပြား ကြည့်ရှုခဲ့ပြီးနောက် တဖြည်းဖြည်း နှင့်ပင် ရွှီယန်၏ ပရိသတ် တစ်ယောက် ဖြစ်လာခဲ့လေသည်။

သိသာထင်ရှားစွာ ဖော်ပြခြင်း မရှိခဲ့ရုံ သာ ဖြစ်သည်။

သို့သော် ယနေ့ စကားပြောဆိုရာတွင် သူမ၏ အကြည့်များ ကလည်း ရွှီယန်၏ မျက်နှာပေါ်တွင် မကြာခဏ ရောက်ရှိနေတတ်သည်။

တစ်ခါတစ်ရံ မျက်လုံးချင်း ဆုံသွားတတ်ကြသည်။

ခံစားချက် ကလည်း အတော်လေး ထူးဆန်းလှပေသည်။

ညဘက်တွင် ရွှီယန်က ကုတင်ပေါ်၌ လှဲလျောင်း အနားယူနေရင်း စဉ်းစားတွက်ချက်ကြည့်လိုက်ရာ ဤမိန်းကလေးက တကယ်ကို မဆိုးလှဟု ထင်မြင်မိသည်။

သူက အမြဲတမ်း ပွင့်လင်းမြင်သာစွာ နေတတ်သူ ဖြစ်ရာ ဖိတ်ခေါ်သင့်လျှင် ဖိတ်ခေါ်ရမည်ဟု တွေးကာ WeChat မှတစ်ဆင့် မနက်ဖြန် အတူတကွ တောင်တက်ရန် ဖိတ်ခေါ်လိုက်သည်။

စုယွီထုံ ကလည်း ဝမ်းသာအားရဖြင့် သဘောတူလိုက်ပြီးနောက် သူတို့ နှစ်ယောက်က ယန်ရွှမ်ရွှမ် ကို မည်သို့ ပြောရမည်ကိုပင် တိုင်ပင် ဆွေးနွေးလိုက်ကြသေးသည်။

စုယွီထုံ ကတော့ သိပ်မကောင်းလှဟု ခံစားရသည်။ မည်သို့ပင်ဖြစ်စေ သူမက သူငယ်ချင်း ဖြစ်သူနှင့် အတူ လာရောက်ခြင်း ဖြစ်ရာ သူငယ်ချင်းကို တစ်ယောက်တည်း ထားခဲ့ရန် မသင့်တော်ဟု တွေးတောမိသည်။

ရွှီယန်က အကြံဉာဏ် အချို့ ပေးလိုက်ပြီး ဒုတိယနေ့ တွင် သူမတို့ကို အတူတကွ လည်ပတ်ရန် ထပ်မံ ဖိတ်ခေါ်ကာ အစားထိုးပေးမည်ဟု ပြောလိုက်သည်။

မတတ်နိုင်ချေ။ ချိန်းတွေ့ရာတွင် ကြားလူ ပါနေခြင်းက အလွန် အနှောင့်အယှက် ဖြစ်စေသည် မဟုတ်ပါလော။

စုယွီထုံ က ယန်ရွှမ်ရွှမ်၏ သဘောထားကို မေးမြန်းကြည့်လိုက်သေးသည်။

"ဘာ... ရွှီယန် က နင့်ကို သီးသန့် အပြင်ထွက်ဖို့ ဖိတ်တာလား... တောင်တက်ဖို့..."

"သူက... အမြင်တော့ အတော်လေး ရှိသားပဲ..."

ယန်ရွှမ်ရွှမ် အနည်းငယ် အံ့အားသင့်သွားသည်။

"နင်တို့ နှစ်ယောက် အတူတူ သွားရမှာ ငါ သေချာပေါက် ဝမ်းသာတာပေါ့... ဒါက ဘာဖြစ်လို့လဲ... သူက အရမ်း ကောင်းတာပဲလေ..."

"နင်သာ သူ့ကို သိမ်းသွင်းနိုင်ရင် အဲဒါကမှ တကယ် ကောင်းတာ..."

ထိုစကားကို ကြားသောအခါ စုယွီထုံ က ပြုံးကာ ပြန်ဖြေလိုက်သည်။ "ဘာ သိမ်းသွင်းတာတွေ ပြောနေတာလဲ... ဒီအတိုင်း တောင်တက်ပြီး ရှုခင်းကြည့်ဖို့ အတူတူ သွားတာပါ..."

"ပုံမှန်ပါပဲ..."

သူတို့ နှစ်ယောက်က ရယ်မော နောက်ပြောင်နေကြပြီး ပတ်ဝန်းကျင် အခြေအနေ ကလည်း အလွန် ကောင်းမွန်လှပေသည်။

ဒုတိယနေ့တွင် ရွှီယန် နှင့် စုယွီထုံ တို့ တွေ့ဆုံကြပြီးနောက် ရှုခင်းသာ နေရာများသို့ သွားရောက်ကာ လှပသော ရှုခင်းများကို ခံစား ကြည့်ရှုကြပြီး ကွေ့ကျိုး ၏ အလွန် လှပသော တောင်နှင့် ရေ ရှုခင်းများကို အတူတကွ ကြည့်ရှုခဲ့ကြသည်။

အတွေ့အကြုံက အလွန် ကောင်းမွန်လှပေသည်။

သူတို့ နှစ်ယောက် စကားပြောဆိုရသည်မှာ အလွန် အဆင်ပြေ ချောမွေ့လှသည်။

ကိစ္စရပ်များကို ရှုမြင် သုံးသပ်သည့် ရှုထောင့်ချင်း တူညီကြောင်းကို ခံစားသိရှိနိုင်လေသည်။

ယခုခေတ်တွင် စကားပြောဆို၍ အဆင်ပြေသော သူများနှင့် တွေ့ဆုံရန် အနည်းငယ် ခက်ခဲလှပေသည်။

ထို့ကြောင့် အတူတကွ လည်ပတ်ခွင့် ရရှိခြင်းက အတော်လေး ရှားပါးလှပေသည်။