အခန်း ၃၇၉

အခန်း (၃၇၉) အစာကျွေးခြင်း

[လောင်ရွှီ... မင်း ဘာတွေ လုပ်နေတာလဲ]

[ဒါက ဘာတွေ လုပ်နေတာလဲ]

တိုက်ရိုက်ထုတ်လွှင့်မှု မြင်ကွင်းထဲတွင် လူသူကင်းမဲ့သော တောလမ်းလေး တစ်ခုပေါ်၌ သစ်သီးခြင်း အကြီးကြီး အများအပြားကို ရွှီယန် ချထားသည်ကို မြင်တွေ့ရသည်။

ငှက်ပျောသီးနှင့် ပန်းသီးများက အများဆုံး ဖြစ်သည်။

အင်တာနက်သုံးစွဲသူများက အကြောင်းရင်းကို နားမလည်နိုင်ကြဘဲ ရင်ထဲတွင် ပို၍ စူးစမ်းချင်စိတ် ဖြစ်ပေါ်လာကြသည်။

ရွှီယန်က ပြုံးကာ ပြန်ဖြေလိုက်သည်။

"စားစရာလေး နည်းနည်း ပြင်ဆင်ထားတာ... ခဏနေရင် ဧည့်သည်တွေ လာလိမ့်မယ်"

သူ၏ စကားကို ကြားသောအခါ အားလုံးက ပို၍ပင် ကြောင်အမ်းအမ်း ဖြစ်သွားကြသည်။

'ဧည့်သည်'

'ဘာဧည့်သည်များလဲ'

တိုက်ရိုက်ထုတ်လွှင့်မှု၏ လူကြိုက်များမှုက အလွန် မြင့်မားနေဆဲ ဖြစ်သည်။ ရွှီယန်၏ တိုက်ရိုက်ထုတ်လွှင့်မှုက အမြဲတမ်း ဆန်းသစ်တီထွင်မှု ရှိပြီး လူတိုင်း မမြင်ဖူးသော ရှုခင်းများကို မြင်တွေ့ခွင့် ပေးစွမ်းနိုင်လေသည်။

အင်တာနက် တစ်ခွင်တွင် အထူးခြားဆုံးသော တိုက်ရိုက်ထုတ်လွှင့်မှုပင် ဖြစ်သည်။

[လောင်ရွှီ... ဒီလိုနေရာမျိုးမှာ ဘယ်က ဧည့်သည် လာမှာလဲ]

[သရဲတစ္ဆေများ ဖြစ်နေမလား]

အင်တာနက်သုံးစွဲသူများ သံသယ ဖြစ်နေကြစဉ်မှာပင် ရွှီယန်က အဝေးမှနေ၍ နေရာပြောင်းရွှေ့လာသော ဆင်အုပ်ကြီးကို မြင်တွေ့လိုက်ရသည်။

ဤဆင်အုပ်ကြီးက အလွန် ကြီးမားသော အင်အားဖြင့် တဝုန်းဝုန်း ချီတက်လာကြသည်။

ထိုအထဲတွင် ချစ်စရာကောင်းသော ဆင်ပေါက်လေး နှစ်ကောင်လည်း ပါဝင်နေလေသည်။

"လာနေပြီ"

ရွှီယန်က ပြုံးလျက် ပြောလိုက်သည်။

ဒရုန်း၏ ကင်မရာက ဖြည်းညင်းစွာ လှည့်သွားပြီး အဝေးဆီသို့ ချိန်ရွယ် ရိုက်ကူးလိုက်သည်။

အင်တာနက်သုံးစွဲသူများက ရွှီယန် ဘာကို ပြောနေသနည်းဟု တွေးတောနေစဉ်မှာပင် ဧရာမ ဆင်အုပ်ကြီး တစ်အုပ်က ရွှီယန် ရှိရာဘက်သို့ လျှောက်လာနေသည်ကို မြင်တွေ့လိုက်ရသည်။

'ဘာကြီးလဲ'

အင်တာနက်သုံးစွဲသူများ အားလုံး ထုံကျဉ်သွားကြတော့သည်။

'ဘာအခြေအနေကြီးလဲ... အဲဒါ ဘာကြီးလဲ... ဆင်ကြီးတွေပါလား'

တိုက်ရိုက်ထုတ်လွှင့်မှုထဲတွင် ဆင်များကို မြင်တွေ့ရလိမ့်မည်ဟု မည်သူကမျှ မျှော်လင့်မထားခဲ့ကြဘဲ တကယ်ကို အဓိပ္ပာယ်မဲ့လွန်းလှပေသည်။

[ဘယ်က ဆင်တွေလဲ... နေပါဦး... ဆင်တွေကို အစာကျွေးလို့ ရတာလား]

[ဘာအခြေအနေကြီးလဲ... ဆင်တွေ အများကြီးပါလား]

[ငါ မျက်စိများ မှားနေတာလား... လောင်ရွှီ က ဘယ်နေရာကို ရောက်သွားတာလဲ]

[သူ ဆင်တွေကိုပါ မွေးထားတာလား]

မှတ်ချက်များက ချက်ချင်းပင် ပေါက်ကွဲထွက်လာတော့သည်။

ယနေ့ တိုက်ရိုက်ထုတ်လွှင့်မှုက အတော်လေး စည်ကားလှသည်။ ရုတ်တရက်ကြီး ဆင် ဆယ်ကောင်ကျော် ပေါ်ထွက်လာခဲ့သည် မဟုတ်ပါလော။

ဆင်များ၏ တိုက်ခိုက်နိုင်စွမ်းက အလွန် အားကောင်းလှပြီး မောင်းထုတ်ရန်လည်း မဖြစ်နိုင်ချေ။

ဤကဲ့သို့သော ကိစ္စမျိုးတွင် ၎င်းတို့၏ အလိုသို့သာ လိုက်လျောရမည် ဖြစ်သည်။

ရွှီယန်က ဆူညံပွက်လောရိုက်နေသော မှတ်ချက်များကို မြင်သောအခါ ရှင်းပြလိုက်သည်။

"ဒီနှစ်ရက်အတွင်း သတင်းတွေကို အားလုံး သတိထားမိကြလား မသိဘူး... တောဆင်ရိုင်း တောင်ကြား ဘက်မှာ ဆင် ဆယ်ကောင်ကျော်က ရုတ်တရက် မြောက်ဘက်ကို နေရာပြောင်းရွှေ့လာကြတာ..."

"ရွာသားတွေရဲ့ ရွာတွေကို ဖြတ်သွားတဲ့ အချိန်မှာ ဆင်တွေက ဗိုက်ဆာနေတော့ ပြောင်းဖူးတွေနဲ့ စိုက်ခင်းထဲက ဟင်းသီးဟင်းရွက် အများကြီးကို စားပစ်ခဲ့ကြတယ်..."

"ဟင်းသီးဟင်းရွက် စိုက်ခင်းတွေကို အကုန် ဖျက်ဆီးပစ်ခဲ့ကြတာ..."

"သူတို့က ခွန်အား ဖြည့်တင်းဖို့ လိုအပ်တယ်... အကယ်၍ ဗိုက်ဆက်ဆာနေမယ် ဆိုရင် လူတွေ လှုပ်ရှားသွားလာတဲ့ နယ်မြေထဲကို ထပ်ဝင်လာနိုင်သေးတယ်..."

"ကျွန်တော်ကလည်း တိုက်တိုက်ဆိုင်ဆိုင် ရှီးရွှမ်ပန်းနား ဘက်မှာ ရောက်နေတော့ သစ်သီး နည်းနည်း ဝယ်ပြီး ဒီဆင်တွေကို အစာကျွေးဖို့ ပြင်ဆင်လိုက်တာပါ..."

"အခု သူတို့ကို အစာကျွေးတဲ့ လူတွေ အများကြီး ရှိတယ်... တချို့ ရွာသားတွေ ဆိုရင် သစ်သီးတွေကို စောစောစီးစီး ကတည်းက ပြင်ဆင်ထားပြီး ဒီဆင်တွေ လာစားမယ့် အချိန်ကို စောင့်နေကြတာ..."

ရွှီယန်၏ ရှင်းပြချက်ကို ကြားသောအခါမှသာ အားလုံးက သဘောပေါက်သွားကြတော့သည်။

'ဒီလိုကိုး'

'ဒါပေမဲ့ နားထောင်ကြည့်ရတာ ပိုပြီး အဓိပ္ပာယ်မဲ့လွန်းနေတယ်'

[ငါ မှတ်မိပြီ... ဒီကိစ္စ တကယ် ရှိတယ်... အခု လူမှုကွန်ရက် ရေပန်းစားတဲ့ သတင်းတွေထဲမှာ နံပါတ်သုံး နေရာ ရောက်နေပြီ]

[ငါလည်း ဖတ်ဖူးတယ် မှတ်မိတယ်... ဆင်တွေ မြောက်ဘက်ကို နေရာပြောင်းရွှေ့နေတာ]

[ဒီနေရာမှာ ရောက်နေတာကိုး]

[လောင်ရွှီ တကယ် အစွမ်းထက်တာပဲ... ဒီလို ကိစ္စမျိုးကိုတောင် အခင်းဖြစ်ပွားရာ နေရာမှာ ရောက်နေသေးတယ်]

အားလုံးက သဘောကျစွာ ရယ်မောလိုက်ကြသည်။

မကြာခင်မှာပင် ဆင်များက ပို၍ပို၍ နီးကပ်လာခဲ့သည်။

အရှေ့ဆုံးမှ ဆင်ကြီးကို ကြည့်လိုက်ရာ ခန္ဓာကိုယ်က အလွန် ကြီးမား မြင့်မားပြီး ဆင်စွယ် နှစ်ချောင်းက ရှည်လျားကာ ချွန်ထက်နေသည်ကို မြင်တွေ့လိုက်ရသည်။

ဤကဲ့သို့သော သတ္တဝါမျိုးက တကယ်ကို ကြောက်မက်ဖွယ် ကောင်းလှပေသည်။

မျက်နှာချင်းဆိုင် ရင်ဆိုင်ရမည် ဆိုပါက အရှေ့မြောက်ကျား နှင့် ဝင်ရိုးစွန်းဝက်ဝံ တို့ပင် ၎င်း၏ ပြိုင်ဘက် လုံးဝ မဟုတ်ကြချေ။

ထိုဆင်စွယ်များက နောက်ပြောင်နေခြင်း မဟုတ်ဘဲ ဆင်များ၏ အင်အား ကလည်း အလွန် ကြီးမားလှပေသည်။

ဆင်စွယ်ဖြင့် တစ်ချက် အထိုးခံရပါက မည်သူမျှ ခံနိုင်ရည် ရှိမည် မဟုတ်ချေ။

အင်တာနက်သုံးစွဲသူများ က တိုက်ရိုက်ထုတ်လွှင့်မှု မြင်ကွင်းကို ကြည့်ရင်း ဖိအားများ အပြည့်အဝ ဝင်ရောက်လာသည်ဟု ခံစားလိုက်ရသည်။

သို့သော် ရွှီယန်က ဘေးသို့ အနည်းငယ် ဆုတ်ရပ်လိုက်ရုံမျှသာ ရှိပြီး ထွက်ခွာသွားရန် ရည်ရွယ်ထားခြင်း မရှိချေ။

ဤသည်ကလည်း သဘာဝကျပေသည်။ သူ၏ တာဝန်မှာ ဆင်ခေါင်းဆောင်၏ ခင်မင်မှုကို ရရှိရန် ဖြစ်လေသည်။

မည်သို့ပင်ဖြစ်စေ ဤသစ်သီးများကို မည်သူက ကျွေးမွေးကြောင်းကို ဆင်ခေါင်းဆောင်အား သိရှိစေရမည် ဖြစ်သည်။ ထိုသို့မှသာ ခင်မင်မှုကို တည်ဆောက်နိုင်မည် မဟုတ်ပါလော။

ထို့ကြောင့် အနားသို့ အနည်းငယ် ကပ်ရမည်သာ ဖြစ်သည်။

"ဟေး... ဆင်ကြီးတွေ... ဒီမှာ..."

"သစ်သီးတွေ ရှိတယ်..."

ရွှီယန်က မလှမ်းမကမ်းရှိ ဆင်များထံသို့ လှမ်း၍ အော်ဟစ်လိုက်သည်။

ဆင်အုပ်ကြီးက သူ၏ အော်သံကို ကြားသောအခါ စူးစမ်းချင်စိတ်ဖြင့် သူ၏ ဦးတည်ရာဘက်သို့ လှမ်းကြည့်လာကြသည်။

ထို့နောက် ၎င်းတို့က သစ်သီးများ၏ မွှေးရနံ့ကို ရရှိသွားသောအခါ တစ်လှမ်းချင်းစီဖြင့် ဤဘက်သို့ ချက်ချင်း ချဉ်းကပ်လာကြတော့သည်။

[လာနေပြီဟေ့]

ဤမြင်ကွင်းကို မြင်သောအခါ အင်တာနက်သုံးစွဲသူများ လည်း စိတ်လှုပ်ရှားလာကြတော့သည်။

ချက်ချင်းပင် အားလုံးက တစ်ခုခု မှားယွင်းနေကြောင်းကို သတိထားမိလိုက်ကြသည်။

ရွှီယန်က အနည်းငယ်မျှပင် မလှုပ်ရှားခဲ့ချေ။

[လောင်ရွှီ... မြန်မြန် ပြေးလေ... အမြန် ဖယ်လိုက်စမ်းပါ... အနင်းခံရပြီး အသားစတွေ ဖြစ်ကုန်ပါဦးမယ်]

[ဒီဆင်ကြီးက အရမ်းကို ကြီးမားလွန်းတယ်နော်]

[တစ်ကောင်ချင်းစီက ရွေ့လျားနေတဲ့ တောင်ကုန်းလေးတွေ နဲ့ တူနေတယ်]

[ဒီလောက်တောင် ဖြစ်နေတာကို မြန်မြန် မပြေးသေးဘူးလား... လခွမ်း]

အင်တာနက်သုံးစွဲသူများ က ချက်ချင်းပင် စိုးရိမ်တကြီး ဖြစ်လာကြတော့သည်။

အင်တာနက်သုံးစွဲသူများကို မဆိုထားနှင့်။

ဤအချိန် ဤအခိုက်အတန့်တွင် ဒေသတွင်း ရဲတပ်ဖွဲ့ဝင်များ နှင့် သစ်တောဦးစီးဌာန မှ လူများ အားလုံးက ဤဆင်အုပ်ကြီးကို ပတ်ဝန်းကျင်မှနေ၍ ကြီးကြပ် စောင့်ကြည့်နေကြပြီး ဒရုန်းများကိုပင် စေလွှတ်ထားကြလေသည်။

ရုတ်တရက် ဖြစ်ပေါ်လာသော ကိစ္စရပ် ဖြစ်သလို လူကြိုက်များမှု ကလည်း အတော်လေး ကြီးမားသဖြင့် အစိုးရ အနေဖြင့် ဤကိစ္စ အပေါ် အလွန် သတိထားနေကြလေသည်။

ထိုလူများက ရွှီယန်၏ လုပ်ရပ်ကို မြင်သောအခါ အနည်းငယ် စိုးရိမ် ထိတ်လန့်သွားကြသည်။

'သူ ဘာလုပ်နေတာလဲ... နည်းနည်းလေးတောင် မကြောက်ဘူးလား'

သို့သော် ဆင်များ ချဉ်းကပ်လာသည့် အရှိန်က အလွန် မြန်ဆန်လွန်းလှရာ သူတို့ အနေဖြင့် တုံ့ပြန်ရန် အချိန် လုံလုံလောက်လောက် မရရှိခဲ့ကြချေ။

မကြာခင်မှာပင် ဆင်များက သစ်သီးခြင်း အရှေ့သို့ ရောက်ရှိလာပြီး နှာမောင်းဖြင့် တစ်ချက် ယက်ထုတ်လိုက်ရာ ခြင်းတောင်းထဲရှိ သစ်သီးများ အားလုံး မြေကြီးပေါ်သို့ ကျသွားတော့သည်။

ထို့နောက် ဆင်များက တစ်ကောင်ပြီး တစ်ကောင် ဝိုင်းအုံလာကြပြီး နှာမောင်းဖြင့် သစ်သီးများကို လိပ်ယူကာ ပါးစပ်ထဲသို့ သွင်းနေကြတော့သည်။

သစ်သီး စားနေစဉ်တွင် ဆင်များက သူတို့၏ မျက်လုံး ပြူးကြီးများဖြင့် ရွှီယန်ကို အကဲခတ်နေကြသေးသည်။

၎င်းတို့က ရွှီယန် အပေါ် မကောင်းသော ရည်ရွယ်ချက် မရှိသလို သတိထားနေခြင်း လည်း မရှိဘဲ ရွှီယန်ကို ရင်းနှီးသော သူတစ်ယောက် အဖြစ် သတ်မှတ်ထားကြလေသည်။

ဤအရာက ရွှီယန် လိုချင်သော အကျိုးသက်ရောက်မှု ပင် ဖြစ်လေသည်။

တဝုန်းဝုန်း ချီတက်လာသော ဆင်ကြီးများက ရွှီယန်၏ ဘေးတွင် သစ်သီး စားနေကြသည်ကို မြင်သောအခါ အင်တာနက်သုံးစွဲသူများ မှာ အံ့ဩမှင်တက် သွားကြကာ စကား တစ်ခွန်းမျှပင် မပြောနိုင်တော့ချေ။

ပွင့်ပွင့်လင်းလင်း ပြောရလျှင် ဤမြင်ကွင်းက တကယ်ကို ကြောက်မက်ဖွယ် ကောင်းလှပေသည်။

၎င်းတို့ အားလုံးက တောဆင်ရိုင်းများ ဖြစ်ကြပြီး အကယ်၍သာ ရမ်းကားလာမည် ဆိုပါက လူသားများ အနေဖြင့် အသက်ရှင်နိုင်မည် မဟုတ်ချေ။

မည်သူမဆို တောဆင်ရိုင်း များကို ဤမျှ အနီးကပ် ထိတွေ့ရမည် ဆိုပါက သေချာပေါက် ကြောက်ရွံ့နေမည်သာ ဖြစ်သည်။

သို့သော် ရွှီယန် ကတော့ အနည်းငယ်မျှပင် မကြောက်ရွံ့ခဲ့ချေ။

ထိုစဉ်မှာပင် အလွန် ချစ်စရာ ကောင်းသော ဆင်ပေါက်လေး တစ်ကောင်က ရွှီယန်၏ အနားသို့ ကပ်လာပြီး ရွှီယန်၏ ဘေးတွင် ရပ်လျက် စူးစမ်းချင်စိတ်ဖြင့် သူ့ကို အကဲခတ်နေလေသည်။

ဆင်ပေါက်လေး က မိခင် ဆင်မကြီး၏ ဘေးတွင် ကပ်ရပ်နေပြီး ဘာမှ မစားဘဲ ရွှီယန်ကိုသာ စိုက်ကြည့်နေလေသည်။

ဤကောင်လေးက အူကြောင်ကြောင် ပုံစံလေး ဖြစ်နေပြီး အတော်လေး ချစ်စရာ ကောင်းလှပေသည်။

ရွှီယန် ကိုယ်တိုင်လည်း ဆင်များကို ပထမဆုံး အကြိမ် အနီးကပ် ထိတွေ့ဖူးခြင်း ဖြစ်လေသည်။

အရေပြားက အလွန် ကြမ်းတမ်းပြီး နှာမောင်းနှင့် ကိုယ်ပေါ်တွင် အမွေးများ ရှိနေကာ ကြည့်ရသည်မှာ ချောမွေ့မှု မရှိချေ။

သို့သော် အရွယ်အစား ကတော့ တကယ်ကို ကြီးမားလှပေသည်။

သူ့ကို စိုက်ကြည့်နေသော ဤဆင်ပေါက်လေး ကလည်း တုံးအအ ပုံစံလေး ဖြစ်နေသည်ဟု ခံစားရလေသည်။

[လောင်ရွှီ... မင်း ဘာလုပ်နေတာလဲ]

[အခုထိ မပြေးသေးဘူးလား]

[အရမ်း အစွမ်းထက်တာပဲ... လခွမ်း... တကယ့် အကြမ်းစား ကြီးပဲ... ဆင်ကြီးတွေကိုတောင် မကြောက်ဘူး]

[ကုန်းပေါ်မှာ မင်း ကြောက်တဲ့ အရာ ဘာများ ရှိသေးလို့လဲ]

တိုက်ရိုက်ထုတ်လွှင့်မှုထဲရှိ အင်တာနက်သုံးစွဲသူများ မှာ အံ့ဩမှင်တက်စွာဖြင့် ကြည့်ရှုနေကြလေသည်။

သူတို့က ရွှီယန်ကြောင့် တစ်ကြိမ်ပြီး တစ်ကြိမ် အံ့အားသင့် နေရခြင်း ပင် ဖြစ်လေသည်။

ရွှီယန် က အလွန် တည်ငြိမ်နေလေသည်။ ဤအချိန်တွင် သူက ဆင်ပေါက်လေး အတော်လေး ချစ်စရာ ကောင်းနေသည်ကို မြင်သောအခါ အိတ်ကပ်ထဲမှ ပန်းသီး တစ်လုံးကို နှိုက်ယူကာ ဆင်ပေါက်လေး ထံသို့ ကမ်းပေးလိုက်သည်။

ဤပန်းသီးကို မူလက သူ့ဘာသာ စားရန် ချန်ထားခဲ့ခြင်း ဖြစ်လေသည်။

သူက ကိုယ်ပေါ်တွင် သရေစာများ သိမ်းဆည်းထားတတ်သော အကျင့် ရှိလေသည်။

အချိန်မရွေး တစ်ခုခု စားသောက်ရန် အတွက် ဖြစ်သည်။

ဆင်ပေါက်လေး က ရွှီယန် ကမ်းပေးလာသော ပန်းသီးကို မြင်သောအခါ အနည်းငယ် တွန့်ဆုတ်နေလေသည်။

ထို့နောက် ဤကောင်လေး က မည်သည့် အန္တရာယ်မှ မရှိကြောင်း သတိထားမိသွားသောအခါ သတိကြီးစွာဖြင့် အရှေ့သို့ ခြေနှစ်လှမ်းခန့် တိုးလာပြီး နှာမောင်းကို ဆန့်ထုတ်ကာ နှာမောင်းဖြင့် ပန်းသီးကို တိုက်ရိုက် စုပ်ယူလိုက်တော့သည်။

ဆင်များ၏ နှာမောင်းက အတော်လေး စိတ်ဝင်စားစရာ ကောင်းလှသည်။ ဤမျှလောက် ရှည်လျားနေသော်လည်း အသက်ရှူရသည်မှာ ချောမွေ့နေဆဲပင်။

ရွှီယန် က ဆင်ပေါက်လေး ၏ နှာမောင်းထဲမှ လေပူများ ထွက်ပေါ်လာသည်ကို ခံစားသိရှိနိုင်လေသည်။

ဆင်ပေါက်လေး က ပန်းသီးကို လှမ်းယူလိုက်ပြီး ပါးစပ်ထဲသို့ ထည့်ကာ ပန်းသီး အရိုးနှင့် အစေ့များကိုပါ အားလုံး ဝါးစားပစ်လိုက်ပြီး မျိုချလိုက်တော့သည်။

ဤကောင်လေး က ချက်ချင်းပင် ပျော်ရွှင်စွာ လှုပ်ရှားလာတော့သည်။

ထိုပုံစံလေးက အလွန် ချစ်စရာ ကောင်းလှပေသည်။

တိုက်ရိုက်ထုတ်လွှင့်မှုထဲရှိ လူသိန်းပေါင်းများစွာ မှာ အံ့ဩမှင်တက်စွာ ကြည့်ရှုနေကြပြီး နှုတ်ခမ်းထောင့်များပင် တွန့်လိမ်နေကြတော့သည်။

'လောင်ရွှီ က တကယ်ကို... ဘာကိုမဆို ကျွေးရဲတာပဲ'

'ဒီလောက်များတဲ့ ဆင်တွေ ရှေ့မှာ မင်းက သူတို့ရဲ့ ကလေးကို အစာကျွေးတယ်ပေါ့'

'ဆင် တစ်ကောင်ကောင်များ မကျေနပ်ရင် မင်းကို ဖင်နဲ့ ဖိထိုင်ပြီး သတ်ပစ်မှာ မကြောက်ဘူးလား'

ရွှီယန် က ဆင်ပေါက်လေး ၏ ချစ်စရာကောင်းသော ပုံစံကို မြင်သောအခါ ရယ်မောလိုက်လေသည်။

အဝေးရှိ ဒရုန်းမှ ရိုက်ကူးထားသော ဗီဒီယိုများကို ကြည့်ရှုနေကြသော ရဲစခန်းမှ ရဲအရာရှိများ အားလုံး တစ်ယောက်မျက်နှာ တစ်ယောက် ကြည့်ကာ ဘာပြောရမှန်း မသိအောင် ဖြစ်နေကြရသည်။

"ဒီလိုက်ဖ်လွှင့်သူ က ဆင်အုပ်ကြီး ထဲမှာ ဒီအတိုင်း ရပ်နေတာလား... ဘာမှ မဖြစ်ဘူးလား..."

ရဲအရာရှိ တစ်ဦးက မျက်နှာ တစ်ခုလုံး အံ့ဩမှင်တက်မှုများ ပြည့်နှက်နေလျက် ပြောလိုက်သည်။

"သူ ဆိုရင်တော့ မဆန်းပါဘူး... တောရိုင်း ကျားကိုတောင် သူ အစာကျွေးဖူးတယ်... တောရိုင်း ကျားသစ် ကိုလည်း အစာကျွေးဖူးတယ်လေ..."

အခြား လူငယ် ရဲအရာရှိ တစ်ဦးက ပြောလိုက်သည်။

"အဲဒါတွေ အကုန်လုံး အမှန်တွေလား... ငါလည်း မြင်ဖူးတယ်... အတုတွေ လို့ပဲ ထင်နေခဲ့တာ..."

နောက်ထပ် လူတစ်ယောက်က ထပ်ပြောလိုက်သည်။

"သေချာပေါက် အမှန်တွေပေါ့... လိုက်ဖ်လွှင့်နေတာကို ဘယ်လိုလုပ် လိမ်လို့ ရမှာလဲ... ဒါတွေ အကုန်လုံး လိုက်ဖ်လွှင့်ပြထားတာတွေချည်းပဲ..."

ထိုရဲအရာရှိ က ဆက်လက် ရှင်းပြလိုက်သည်။

ကိစ္စရပ်များက အလွန် အဓိပ္ပာယ်မဲ့လွန်းလှရာ အားလုံးက ရှင်းပြ၍ မရနိုင်အောင် ဖြစ်နေကြရသည်။

သို့သော် အားလုံး သိထားကြသည့် အချက် တစ်ချက်မှာ ရွှီယန် က အလွန် အစွမ်းထက်ပြီး အထူး အစွမ်းထက်သူ ဖြစ်ကြောင်းပင်။

တောရိုင်း တိရစ္ဆာန်များ ပြဿနာကို ကိုင်တွယ် ဖြေရှင်းရာတွင် သူက အပြစ်ပြောစရာ မရှိအောင် အစွမ်းထက်သူ တစ်ယောက် ဖြစ်လေသည်။

ဆင်ကြီးများက အထူး ပျော်ရွှင်စွာ စားသောက်နေကြပြီး ငှက်ပျောသီး နှင့် ပန်းသီးများ အားလုံးက ၎င်းတို့ နှစ်သက်သော အရာများ ဖြစ်ကြရာ အချိန် သိပ်မကြာခင်မှာပင် ငှက်ပျောသီး နှင့် ပန်းသီးများ အားလုံးကို ပြောင်စင်အောင် စားပစ်လိုက်ကြတော့သည်။

သစ်သီးများ စားပြီးသွားသောအခါ ၎င်းတို့က ရွှီယန်ကို ခဏမျှ စိုက်ကြည့်နေကြသေးသည်။

ထို့နောက် အသန်မာဆုံးသော ဆင်ကြီး၏ ဦးဆောင်မှု အောက်တွင် ဆင်အုပ်ကြီး က နောက်တစ်ကြိမ် အရှေ့သို့ ဖြည်းညင်းစွာ လျှောက်သွားကြပြန်သည်။

ရွှီယန် က ၎င်းတို့ကို လက်ပြ နှုတ်ဆက်လိုက်သည်။

ခင်မင်မှု ဆိုသည်မှာ ဖြည်းဖြည်းချင်း တည်ဆောက်ယူရခြင်း ဖြစ်ရာ အလောတကြီး လုပ်၍ မရနိုင်ချေ။

သို့သော် ဤကိစ္စက အချိန် အတန်ကြာအောင် ဆက်လက် ဖြစ်ပေါ်နေမည်ဟု ခန့်မှန်းရသဖြင့် ရွှီယန် ကလည်း နောက်မှ လိုက်ပါ ကြည့်ရှုရန် ရည်ရွယ်ထားလေသည်။

အကယ်၍ ဤတစ်ကြိမ်တွင် တာဝန် မပြီးမြောက်ပါက လယ်ယာခြံဝင်း သို့ ပြန်သွားပြီး အချိန် အတန်ကြာမှ ထပ်မံ လာရောက်၍လည်း ရနိုင်ပေသည်။ မည်သို့ပင်ဖြစ်စေ တာဝန်တွင် အချိန် အကန့်အသတ် မရှိချေ။

ဆင်အုပ်ကြီး က သိပ်မကြာခင်မှာပင် သစ်ပင် အရိပ်အောက် တစ်နေရာတွင် အနားယူလိုက်ကြသည်။

ယူနန် တွင် တောင်ကုန်းများ များပြားပြီး တောင်ပေါ်သို့ တက်ရမည့် လမ်းများက သွားလာရန် မလွယ်ကူလှသဖြင့် အားလုံးက တောင်ခြေကို ပတ်၍သာ လျှောက်သွားရရာ အများစုမှာ လူသားများ လှုပ်ရှား သွားလာသော နေရာများ ဖြစ်နေလေသည်။

ထို့ကြောင့် ဆင်အုပ်ကြီး က လူများနှင့် အများအပြား အပြန်အလှန် ဆက်သွယ်မှုများ ရှိလာဦးမည် ဖြစ်သည်။

နောက်မှ လိုက်ပါ ကြည့်ရှုရသည် ကလည်း အတော်လေး စိတ်ဝင်စားစရာ ကောင်းလှပေသည်။

"ဒီကိစ္စက တော်တော်လေး စိတ်ဝင်စားဖို့ ကောင်းတယ်... ဒီလောက် နှစ်တွေ အကြာကြီး နေလာတာ ဆင်တွေ နေရာပြောင်းရွှေ့တာကို မမြင်ဖူးခဲ့ဘူး..."

"ခန့်မှန်းရသလောက်တော့ ခေါင်းဆောင်ဆင် က နယ်မြေ ချဲ့ထွင်ချင်နေတာ ဖြစ်မယ်..."

"စွမ်းရည် ကလည်း အတော်လေး ကောင်းမွန်နေတော့ သင့်တော်တဲ့ နေထိုင်ကျက်စားရာ နေရာကို ရှာဖွေချင်နေတာပေါ့..."

"ဒါပေမဲ့ အခုက နေရာတိုင်းမှာ လူတွေ လှုပ်ရှား သွားလာတဲ့ နေရာတွေချည်းပဲ... ဒါမှမဟုတ်ရင်လည်း တောင်မြင့်ကြီးတွေ ဆိုတော့ သူတို့နဲ့ မသင့်တော်ဘူးလေ..."

"ခန့်မှန်းရသလောက်တော့ နောက်ဆုံးကျရင် သူတို့ ပြန်သွားရဦးမှာပါပဲ..."

ရွှီယန် က အဝေးသို့ ထွက်ခွာသွားသော ဆင်များကို ကြည့်ရင်း အင်တာနက်သုံးစွဲသူများကို ပြောလိုက်သည်။

သူ၏ စကားကို ကြားသောအခါ အင်တာနက်သုံးစွဲသူများ လည်း စူးစမ်းချင်စိတ် ဖြစ်ပေါ်လာကြတော့သည်။

[ဒီဆင်အုပ်ကြီး က အတိအကျ ဘယ်ကို သွားချင်နေကြတာလဲ]

[အရမ်း ကြောက်စရာကောင်းတာပဲ... အကုန်လုံးက ပထမအဆင့် ကာကွယ်စောင့်ရှောက်ရမယ့် တိရစ္ဆာန်တွေ ဆိုတော့ သူတို့ကို ဘာမှလည်း သွားလုပ်လို့ မရဘူးလေ]

[အဓိက အချက်က တားဆီးလို့လည်း မရတာပဲ... တားလို့တောင် တားလို့ မရနိုင်ဘူး]

[လမ်းကြောင်း ရှင်းပေးရုံပဲ တတ်နိုင်မှာပေါ့... ပြဿနာ မရှိရင် ရပါပြီ... သူတို့ကို ပေးသွားလိုက်တာပဲ ကောင်းတယ်]

အားလုံးက တစ်ယောက်တစ်ပေါက် ပြောဆိုနေကြသည်။

ဤတစ်ကြိမ် ဆင်အုပ်ကြီး နေရာပြောင်းရွှေ့သည့် ကိစ္စက လူအများအပြား၏ အာရုံစိုက်မှုကို ဆွဲဆောင်ထားနိုင်ခဲ့လေသည်။