အခန်း ၃၈၀

အခန်း (၃၈၀) လောင်ရွှီ... မင်း ဘာစကားတွေ ပြောနေတာလဲ...

ဆင်အုပ်ကြီး နေရာပြောင်းရွှေ့သည့် ကိစ္စ၏ လူကြိုက်များမှုက ပို၍ပို၍ မြင့်တက်လာခဲ့သည်။

ဧရာမ ဆင်အုပ်ကြီးက မြောက်ဘက်သို့ တောက်လျှောက် ရွေ့လျားသွားနေကြပြီး မည်သည့်နေရာသို့ သွားမည်ကို မသိရသော်လည်း လုံးဝ ရပ်တန့်ခြင်း မရှိခဲ့ချေ။

အတော်လေး စိတ်ဝင်စားစရာ ကောင်းသည်မှာ ရွာသား အတော်များများက ဆင်များ သူတို့၏ နေရာကို ဖြတ်သန်းသွားမည်ကို သိရှိသောအခါ စောစောစီးစီး ကတည်းက အစားအသောက်များ ပြင်ဆင်ထားကြခြင်းပင်။

ထို့နောက် ရွာသား အများအပြားက တောင်စောင်းပေါ်သို့ သွားရောက်ကာ ဆင်အုပ်ကြီး ဖြတ်သန်းသွားသည်ကို အဝေးမှနေ၍ ကြည့်ရှုနေကြလေသည်။

ဤကိစ္စက အတော်လေး စိတ်ဝင်စားစရာ ကောင်းလှပေသည်။

ရွှီယန် ကလည်း ဤနေရာတွင် ရှိနေပြီး ဆင်အုပ်ကြီး နောက်သို့ လိုက်ပါလာခဲ့သည်။

သူက သတ္တိ အလွန်ကောင်းပြီး ဆင်အုပ်ကြီး၏ ဘေးတွင် တိုက်ရိုက်ပင် လမ်းလျှောက်နေလေသည်။

ဤဆင်များ ကလည်း အနှောင့်အယှက် ဖြစ်သည့် ပုံစံ မပြသဘဲ သူတို့ လျှောက်ရမည့် လမ်းအတိုင်းသာ လျှောက်နေကြလေသည်။

ရွှီယန်၏ အပြုအမူကို မြင်သောအခါ လူများက အထူးပင် အံ့ဩသွားကြတော့သည်။

သို့သော် ခဏမျှ လမ်းလျှောက်ပြီးနောက် ရွှီယန်က ဆင်အုပ်ကြီး ထဲမှနေ၍ ပြန်ထွက်လာခဲ့သည်။

"ဆက်မလိုက်တော့ဘူး... အခု ဆင်အုပ်ကြီး ကို အာရုံစိုက်နေတဲ့သူ အရမ်း များတယ်... ကျွန်တော်က အမြဲတမ်း နောက်က လိုက်နေရင် သူတို့ရဲ့ နာမည်ကျော်ကြားမှု ကို အသုံးချနေသလို ဖြစ်နေလိမ့်မယ်..."

"သူတို့ ဘယ်သွားမလဲ ဆိုတာကို ကြည့်ပြီး တစ်ခါတလေ သွားပြီး အစာကျွေးရုံနဲ့တင် လုံလောက်ပါပြီ..."

ရွှီယန်က တိုက်ရိုက်ထုတ်လွှင့်မှု ထဲရှိ အင်တာနက်သုံးစွဲသူများကို ပြောလိုက်သည်။

သူ၏ စကားကို ကြားသောအခါ အားလုံးကလည်း ရယ်မောလိုက်ကြသည်။

[အစ်ကိုယန်... ဒီလို ဆင်တွေကို အစာကျွေးနိုင်တဲ့သူ ဆိုလို့ မင်း တစ်ယောက်တည်းပဲ ရှိတာလေ]

[ဆက်ပြီး လိုက်သွားပါလား... ငါတို့လည်း ဒီဆင်ကြီးတွေကို ကြည့်ချင်သေးတယ်]

[အခု ဒီဆင်ကြီးတွေက တော်တော်လေး နာမည်ကြီးနေတာ... ဆင်အတော်များများ နာမည်တောင် ရနေပြီ... အားလုံးက အရမ်းကို အာရုံစိုက်နေကြတာလေ]

[ဆက်ပြီး လိုက်သွားရင် နာမည်ကျော်ကြားမှု သေချာပေါက် ပိုများလာမှာပဲ]

ရွှီယန်က ပြုံးကာ ခေါင်းခါလိုက်ပြီး ပြောလိုက်သည်။

"တိတ်တဆိတ်လေး အာရုံစိုက်နေရုံနဲ့တင် လုံလောက်ပါပြီ..."

ထိုစဉ်မှာပင် ရှေ့သို့ ရွေ့လျားနေသော ဆင်အုပ်ကြီး က ရုတ်တရက် ရပ်တန့်သွားပြီး ပြဿနာ တစ်ခုခု ဖြစ်ပေါ်သွားသည့် အလားပင်။

ထိုအထဲမှ ဆင်ကြီး နှစ်ကောင်က ကျယ်လောင်စွာ အဆက်မပြတ် အော်ဟစ်နေကြလေသည်။

ဆင်များ၏ အော်သံက အလွန် ကျယ်လောင်လှပြီး ဦးနှောက်ထဲတွင် တိုက်ရိုက် ပဲ့တင်ထပ်နေသည့် အလား ခံစားရကာ ခေါင်းတစ်ခုလုံးပင် အူသွားသကဲ့သို့ ခံစားရလေသည်။

ရွှီယန် က ချက်ချင်းပင် အရှေ့ဘက်သို့ လှမ်းကြည့်လိုက်သည်။

"ဘာဖြစ်တာလဲ... ဘာလို့ ရပ်သွားကြတာလဲ..."

သူက အရှေ့သို့ လျှောက်သွားပြီး ဆင်အုပ်ကြီး ၏ ဘေးသို့ ရောက်ရှိသွားခဲ့သည်။

ရွှီယန် က သတ္တိကောင်းလှပေသည်။ တောင်ခါးပန်း ပေါ်တွင် ကြည့်ရှုနေကြသော ပြည်သူများ နှင့် အတူ လိုက်ပါလာသော ရဲတပ်ဖွဲ့ဝင်များ က မည်သို့ ဖြစ်ပျက်နေကြောင်း သိရှိရန် ကြိုးစားနေဆဲ အချိန်မှာပင် ရွှီယန်က ဆင်အုပ်ကြီး ၏ ဘေးသို့ ရောက်ရှိနေပြီ ဖြစ်လေသည်။

ဒရုန်း ကလည်း နောက်မှ လိုက်ပါလာခဲ့သည်။

မလှမ်းမကမ်းရှိ ရဲတပ်ဖွဲ့ဝင် တစ်ဦးက နည်းပညာ ဝန်ထမ်း ကို လှမ်းပြောလိုက်သည်။

"ရွှီယန် ရဲ့ လိုက်ဖ်လွှင့်တာကို အရင် ပြောင်းကြည့်လိုက်ပါဦး... သူ့ရဲ့ ကင်မရာက တော်တော်လေး ရှင်းတယ်... ဘာဖြစ်နေလဲ ဆိုတာကို အရင်ဆုံး ကြည့်ကြည့်ရအောင်..."

နည်းပညာ ဝန်ထမ်း က ချက်ချင်းပင် ရွှီယန်၏ တိုက်ရိုက်ထုတ်လွှင့်မှု သို့ ပြောင်းလဲလိုက်သည်။

ဤတိုက်ရိုက်ထုတ်လွှင့်မှုက အလွန် ကောင်းမွန်စွာ ရိုက်ကူးထားနိုင်ပြီး ဆင်အုပ်ကြီးကို စောင့်ကြည့်ရန် အတွက် အလွန် အဆင်ပြေလှပေသည်။

ရွှီယန် က ဆင်အုပ်ကြီး ၏ အလယ်သို့ ရောက်ရှိသွားပြီး သေချာစွာ ကြည့်ရှုလိုက်သောအခါ ဆင်ပေါက်လေး ၏ ခြေဖဝါး အောက်တွင် သံမှို တစ်ချောင်း စူးဝင်နေကြောင်းကို တွေ့ရှိလိုက်ရသည်။

ဆင်ပေါက်လေး မှာ နာကျင်လွန်းသဖြင့် အဆက်မပြတ် အော်ဟစ်နေပြီး သံမှိုကို ထုတ်ယူရန် ကြိုးစားနေသော်လည်း မည်သို့မျှ ထုတ်ယူ၍ မရနိုင်အောင် ဖြစ်နေလေသည်။

မိခင် ဆင်မကြီး နှင့် အခြား ဆင်ကြီးများ မှာလည်း စိုးရိမ်တကြီးဖြင့် အကူအညီမဲ့စွာ ကြည့်နေကြပြီး မည်သို့ လုပ်ဆောင်ရမည်ကို မသိကြချေ။

ဆင်ပေါက်လေး မှာ ငိုတော့မည့် အလား ဖြစ်နေပြီး အလွန် သနားစရာ ကောင်းသော အော်သံများကို အဆက်မပြတ် ထုတ်လွှင့်နေလေသည်။

ဤမြင်ကွင်းကို မြင်သောအခါ ရွှီယန် က ချက်ချင်းပင် လျှောက်သွားလိုက်သည်။

"ဆင်ပေါက်လေး ရဲ့ ခြေထောက်မှာ သံမှို စူးဝင်နေတာပဲ... သေချာ မကြည့်ရင် တကယ် မတွေ့နိုင်ဘူး..."

ရွှီယန်၏ အမြင်အာရုံက အလွန် ကောင်းမွန်သဖြင့် ပြဿနာ၏ အရင်းအမြစ်ကို တစ်ချက်တည်းဖြင့် မြင်တွေ့လိုက်ရခြင်း ဖြစ်ပေသည်။

ဆင်ပေါက်လေး ၏ ဘယ်ဘက် ရှေ့ခြေထောက် က မြောက်တက်နေပြီး ထိခိုက် ဒဏ်ရာ ရရှိထားကြောင်း သိသာလှပေသည်။

ဤမြင်ကွင်းက အတော်လေး စိတ်ဝင်စားစရာ ကောင်းလှပေသည်။ ဆင်ကြီး အများအပြား က လူသား တစ်ယောက်ကို ဝိုင်းရံထားကြပြီး ဤလူသားက သူတို့ကို ကူညီပေးနိုင်လိမ့်မည်ဟု မျှော်လင့်နေကြသည့် ပုံစံမျိုး ပေါက်နေလေသည်။

[သံမှို စူးဝင်သွားတာလား]

[နားထောင်ကြည့်တာနဲ့တင် တော်တော်လေး နာကျင်ရမယ့်ပုံပဲ]

[အစ်ကိုယန်... သူ့ကို မြန်မြန် ကူညီပေးလိုက်ပါဦး]

[ဘယ်သူက ကူညီရဲမှာလဲ... အဲဒါ ဆင်ကြီးတွေလေ... ပြီးတော့ ဘေးမှာ အမေ ဆင်မကြီး လည်း ရှိနေသေးတယ်... တစ်ခုခု မှားယွင်းသွားရင် ဘယ်လောက်တောင် အန္တရာယ် များလိုက်မလဲ]

[အစ်ကိုယန် ကတော့ တူညီမှာ မဟုတ်ပါဘူး]

အင်တာနက်သုံးစွဲသူများ က ရွှီယန်၏ စကားကို ကြားပြီးနောက် ဆင်ပေါက်လေး ၏ အခြေအနေကို အလွန် စိုးရိမ် ပူပန်လာကြတော့သည်။

ဤကဲ့သို့သော ခံစားချက်မျိုးက နားထောင်ရသည်မှာ အလွန် ခံရခက်လှပေသည်။

ရွှီယန် ကတော့ အလွန် တည်ငြိမ်နေပြီး ပထမဆုံး အချိန်မှာပင် အရှေ့သို့ လျှောက်သွားကာ ဆင်ပေါက်လေး ၏ အနားသို့ ရောက်ရှိသွားခဲ့သည်။

[လောင်ရွှီ တကယ်ကြီး သွားပြီဟေ့]

အင်တာနက်သုံးစွဲသူများ၏ မျက်လုံးများ ပြောင်းလဲသွားပြီး ရင်ထဲတွင် နောက်တစ်ကြိမ် စိုးရိမ် ထိတ်လန့်လာကြပြန်သည်။

အားလုံးက ဆင်ကြီးများ သောင်းကျန်းလာမည်ကို တကယ်ကို စိုးရိမ်နေကြလေသည်။

မည်သို့ပင်ဖြစ်စေ ကိုယ်အလေးချိန် အရ လုံးဝ ယှဉ်နိုင်မည် မဟုတ်ချေ။

သို့သော် ရွှီယန် ကတော့ အလွန် တည်ငြိမ်နေလေသည်။ သေးငယ်သော သံမှို တစ်ချောင်းက လူသား တစ်ယောက် အတွက် လုံးဝ ခက်ခဲသော ကိစ္စ တစ်ခု မဟုတ်ချေ။

ရွှီယန် က တစ်ဝက်ခန့် ထိုင်ချလိုက်ပြီး လက်ဆန့်ထုတ်ကာ သံမှိုကို ကိုင်၍ အားကုန်သုံးပြီး ဆွဲနှုတ်လိုက်သည်ကို မြင်တွေ့လိုက်ရသည်။

သံမှို က သူ၏ အလွယ်တကူ ဆွဲနှုတ်ခြင်းကို ခံလိုက်ရလေသည်။

သံမှို က အခြား တိရစ္ဆာန်များကို ထပ်မံ အန္တရာယ် မပြုနိုင်စေရန် အတွက် သူက သံမှို၏ အချွန်ကို ချိုးဖဲ့လိုက်ပြီး အိတ်ထဲသို့ ထည့်ကာ နောက်ပိုင်း အမှိုက်ပုံး ရှာတွေ့ပါက လွှင့်ပစ်ရန် ပြင်ဆင်လိုက်သည်။

ဆင်ပေါက်လေး က ခြေဖဝါးမှ နာကျင်မှု ပျောက်ကွယ်သွားသည်ကို ခံစားလိုက်ရသောအခါ ခြေထောက်ကို မြေကြီးပေါ်သို့ ချကြည့်လိုက်ရာ ထိုးစိုက်နေသော နာကျင်မှု လုံးဝ ပျောက်ကွယ်သွားပြီ ဖြစ်ကြောင်း သိရှိသွားတော့သည်။

ဤကောင်လေး က ချက်ချင်းပင် ပျော်ရွှင်စွာဖြင့် အော်ဟစ်လိုက်တော့သည်။

၎င်း၏ အော်သံကို ကြားသောအခါ ဘေးနားရှိ ဝိုင်းရံထားသော ဆင်အုပ်ကြီး ကလည်း ငြိမ်သက်သွားကြတော့သည်။

ဆင်များက မိသားစု အလိုက် အတူတကွ နေထိုင်ကြလေသည်။

၎င်းတို့၏ စိတ်ခံစားချက် များက အလွန် ကြွယ်ဝလှပေသည်။

တစ်ကောင်နှင့်တစ်ကောင်၏ ခံစားချက်များမှ တစ်ဆင့် တစ်ဖက်လူ၏ အခြေအနေကို ခံစားသိရှိနိုင်ကြလေသည်။

ဆင်ပေါက်လေး ၏ ဒဏ်ရာ ပျောက်ကင်းသွားသဖြင့် ဆင်အုပ်ကြီး အားလုံး ပျော်ရွှင်နေကြလေသည်။

[ဆင်ခေါင်းဆောင် ခင်မင်မှု ၆၀ ရာခိုင်နှုန်း]

ဤအချိန်တွင် စနစ်၏ အချက်ပြသံ ထွက်ပေါ်လာခဲ့သည်။

ရွှီယန်၏ တာဝန်မှာ တိုးတက်မှု အဆင့် ရရှိသွားပြီ ဖြစ်သည်။ မူလက ခင်မင်မှု ၂၀ ရာခိုင်နှုန်း သာ ရှိခဲ့သော်လည်း ယခုတော့ ၆၀ ရာခိုင်နှုန်း အထိ ရုတ်တရက် ခုန်တက်သွားခဲ့ပြီ ဖြစ်သည်။

ကလေးငယ် ကို ကူညီပေးလိုက်ခြင်းက ဆင်အုပ်ကြီးကို အထူးပင် ကျေနပ်သွားစေခဲ့ပုံ ရလေသည်။

ဆင်များ အားလုံးက ဝိုင်းအုံလာကြသဖြင့် ရွှီယန်က နောက်သို့ ခြေအနည်းငယ် ဆုတ်လိုက်ပြီး ကွက်လပ် တစ်ခုသို့ ရောက်ရှိသွားခဲ့သည်။

ဆင်ပေါက်လေး က ရွှီယန်၏ အနားသို့ ပျော်ရွှင်စွာ ပြေးလာပြီး အတော်လေး ချွဲနွဲ့နေပုံ ရလေသည်။

တိုက်ရိုက်ထုတ်လွှင့်မှု ထဲရှိ အင်တာနက်သုံးစွဲသူများ က အဆက်မပြတ် ဝမ်းသာအားရ အော်ဟစ်နေကြတော့သည်။

[လောင်ရွှီ တကယ် အစွမ်းထက်တာပဲ... တကယ်ကြီး သွားနှုတ်ပေးလိုက်နိုင်တယ်]

[သာမန် လူတွေ ကတော့ အနား မကပ်တာ ပိုကောင်းပါတယ်... ဆင်တွေရဲ့ ထိုးသတ်တာကို ခံရနိုင်တယ်]

[သံမှို ကို ဆွဲနှုတ်လိုက်တာ ကြည့်ရတာ တကယ် နေလို့ ကောင်းသွားသလိုပဲ]

[အရမ်း အစွမ်းထက်တာပဲ... သူ့ရဲ့ လိုက်ဖ်လွှင့်တာကိုပဲ ကြည့်ရမယ်]

တိုက်ရိုက်ထုတ်လွှင့်မှု ကို ကြည့်ရှုနေကြသူများ သာမက နောက်ယောင်ခံ ရိုက်ကူးနေသော ရဲတပ်ဖွဲ့ဝင်များ အားလုံး ကလည်း ရင်ထဲတွင် သက်ပြင်းချသွားနိုင်ခဲ့ကြသည်။

ကံကောင်းသည်မှာ ဤကိစ္စကို ဖြေရှင်းနိုင်သွားခြင်းပင်။

ထိုသို့သာ မဟုတ်လျှင် ထိုသံမှိုကို မည်သို့ ဖြေရှင်းရမည်ကို သူတို့ကိုယ်တိုင်ပင် မသိနိုင်အောင် ဖြစ်နေရမည်သာ။

ဆင်ပေါက်လေး ကို မေ့ဆေးပေးပြီးမှ ဖြေရှင်းရမည် ဆိုပါက ဆင်ကြီးများ အမှန်တကယ် သောင်းကျန်းလာနိုင်ချေ ရှိပေသည်။

ရွှီယန် ကသာ ဖြေရှင်းနိုင်ခြင်း ဖြစ်ပေသည်။

ဒီလောက်အထိ အနားကပ်ရဲသည် မဟုတ်ပါလော။

ရွှီယန် က အနားသို့ ကပ်လာသော ဆင်ပေါက်လေး ကို ကြည့်ကာ လက်ဆန့်ထုတ်ပြီး ၎င်း၏ နဖူးပြောင်ကြီးကို ပွတ်သပ်ပေးလိုက်သည်။

အရေပြားက အနည်းငယ် ကြမ်းတမ်းသော်လည်း ကိုင်ရသည်မှာ အတော်လေး စိတ်ဝင်စားစရာ ကောင်းလှပေသည်။

ဆင်ပေါက်လေး ဟု ဆိုသော်လည်း အရွယ်အစားက ရွှီယန် နှင့် နီးပါးခန့် ရှိနေပြီ ဖြစ်ရာ သွားရောက် ပွတ်သပ်ရန် အတွက် လက်ဆန့်ထုတ်ရသေးသည်။

သူက ဆင်ပေါက်လေး နှင့် ဆော့ကစားနေချိန်တွင် မိခင် ဆင်မကြီး၏ မျက်လုံးများက အမြဲတမ်း စိုက်ကြည့်နေလေသည်။ မကောင်းသော ရည်ရွယ်ချက် မရှိသော်လည်း ကြည့်ရသည်မှာ အနည်းငယ် ကြောက်စရာ ကောင်းနေဆဲပင်။

မည်သို့ပင်ဖြစ်စေ ကုန်းပေါ်တွင် အသန်မာဆုံးသော တိရစ္ဆာန် ဖြစ်လေသည်။

ပြိုင်ဘက်ကင်းသော သတ္တဝါမျိုး ပင်။

ရွှီယန်က ဆင်ပေါက်လေး ကို ပွတ်သပ်ပေးလိုက်ပြီး ဆင်အုပ်ကြီး က ဆက်လက် အရှေ့သို့ သွားရန် ပြင်ဆင်နေကြသဖြင့် သူက နေရာတွင်ပင် ရပ်လျက် ၎င်းတို့ ထွက်ခွာသွားသည်ကို လိုက်လံ ကြည့်ရှုနေလိုက်သည်။

ဤဆင်အုပ်ကြီး က ဘာလုပ်ချင်နေကြမှန်း မသိချေ။

သို့သော် ၎င်းတို့က ထွက်လာခဲ့ပြီ ဖြစ်ရာ နောက်ကြောင်း ပြန်လှည့်ခိုင်းရန် ကလည်း မဖြစ်နိုင်တော့ချေ။

မကြာခင်မှာပင် ဆင်အုပ်ကြီး က ရွာအနားသို့ ရောက်ရှိသွားခဲ့ပြီး ဤနေရာတွင် ရွာသားများ ပြင်ဆင်ပေးထားသော သစ်သီးများ အများအပြား ရှိနေလေသည်။

အားလုံးက ဤဆင်များကို အလွန် သဘောကျကြလေသည်။

ဒေသခံများ ဖြစ်ကြသော်လည်း ဆင်ကို မမြင်ဖူးသူများ အများအပြား ရှိကြသေးသည်။

ထို့အပြင် တိရစ္ဆာန်များကို အစာကျွေးရခြင်း က မူလကတည်းက အလွန် စိတ်ဖိစီးမှု ပြေပျောက်စေသော ကိစ္စ တစ်ခု ဖြစ်လေသည်။

ပြောရမည် ဆိုလျှင် အနည်းငယ် ထူးဆန်းသော်လည်း လူသားများက တိရစ္ဆာန်များကို အစာကျွေးရသည့် ခံစားချက်ကို အလွန် နှစ်သက်ပုံ ရလေသည်။

ဥပမာအားဖြင့် တိရစ္ဆာန်ရုံ များတွင် အစာကျွေးခြင်းကို တားမြစ်ထားလေ့ ရှိသော်လည်း ခရီးသွား အချို့က မုန်လာဥနီ အချောင်းများ သို့မဟုတ် မုန်လာဥနီ အပြားများကို ခိုးယူသွားကာ တိရစ္ဆာန်များကို ခိုး၍ အစာကျွေးတတ်ကြလေသည်။

ဤကြီးမားသော သတ္တဝါများက ကိုယ်တိုင် ပြင်ဆင်ထားသော အစားအသောက်များကို စားသောက်နေသည်ကို ကြည့်ရှုရခြင်းက ရင်ထဲတွင် အမြဲတမ်း ပျော်ရွှင်စေလေသည်။

ဆင်အုပ်ကြီး ကိစ္စ၏ လူကြိုက်များမှု က အလွန် မြင့်မားနေပြီး ရွှီယန်၏ လူကြိုက်များမှု ကလည်း အလွန် မြင့်မားနေလေသည်။

သတ္တိကောင်းသူ အချို့က ဆင်များကို အနားကပ်ရန် ကြိုးစားကြသေးသည်။

ရလဒ် အနေဖြင့် ဆင်ခေါင်းဆောင် က သူ့ကို ဟိန်းဟောက်လိုက်ပြီး ခြေလှမ်း အနည်းငယ် ပြေးလာကာ တိုက်ခိုက်မည့် ဟန်ရေးပြလိုက်လေသည်။

ထိုလူမှာ လန့်ဖြတ်သွားပြီး လူးလှိမ့်ကာ ထွက်ပြေးသွားတော့သည်။

ခိုးစားဖို့ ကြိုးစားရင်း ကိုယ့်ကြက်ပါ ဆုံးသွားရသကဲ့သို့ အရှက်ကွဲသွားရတော့သည်။

မတတ်နိုင်ချေ။ မည်သို့ပင်ဖြစ်စေ ဤကဲ့သို့သော ကိစ္စမျိုးကို ရွှီယန် မှလွဲ၍ အခြား မည်သူမျှ လုပ်ဆောင်နိုင်စွမ်း မရှိကြချေ။

ရွှီယန် ကတော့ အတော်လေး အားလပ်နေလေသည်။

ဤနှစ်ရက် အတွင်း သူက ဒေသခံ ရဲတပ်ဖွဲ့ဝင်များ နှင့်လည်း ရင်းနှီးကျွမ်းဝင်အောင် လုပ်ဆောင်ထားနိုင်ခဲ့သည်။

တစ်ခါတစ်ရံ တချို့သော နေရာများကို ဆင်များ ဝင်ရောက်ခွင့် မပြုနိုင်သော အခါတွင်လည်း ရွှီယန်က သွားရောက် ကူညီ ဟန့်တားပေးရလေသည်။

တစ်ချိန်တည်းမှာပင် ဆင်များ ဆာလောင်မည့် ပြဿနာကို ထည့်သွင်း စဉ်းစားကာ ရွှီယန် ကိုယ်တိုင် သွားရောက် အစာကျွေးရလေသည်။

လူများ အားလုံးက ဆင်အုပ်ကြီး အပေါ် အလွန် အာရုံစိုက် နေကြလေသည်။

ကံကောင်းသည်မှာ ရွှီယန် ၏ စောင့်ရှောက်မှု အောက်တွင် ဆင်အုပ်ကြီး က လမ်းတစ်လျှောက်လုံး အလွန် ဘေးကင်းလုံခြုံ နေခဲ့ခြင်းပင်။

ထို့အပြင် တွေ့ဆုံရသည့် အကြိမ်အရေအတွက် များပြားလာသဖြင့် ဆင်ခေါင်းဆောင် က သူ၏ အပေါ်တွင် ခင်မင်မှုများ ပိုမို များပြားလာခဲ့လေသည်။

၅ ရက် မြောက်နေ့ သို့ ရောက်သောအခါ...

[ဆင်အုပ်ကြီး ခေါင်းဆောင် ၏ ခင်မင်မှု ၁၀၀ ရာခိုင်နှုန်း]

တာဝန်က နောက်ဆုံးတွင် တစ်စိတ်တစ်ပိုင်း ပြီးမြောက်သွားခဲ့ပြီ ဖြစ်ပြီး နောက်ဆက်တွဲ အနေဖြင့် ၎င်းတို့ သတ်မှတ်ထားသော နေရာသို့ ရောက်ရှိမည့် အချိန်ကို စောင့်ဆိုင်းရုံသာ ဖြစ်လေသည်။

ရွှီယန်က ဆင်ခေါင်းဆောင် ကို ကြည့်ရင်း စိတ်သက်သာရာ ရသွားတော့သည်။

နောက်ဆုံးတော့ အောင်မြင်သွားခဲ့ပြီ ဖြစ်သည်။

ခင်မင်မှု ၁၀၀ ရာခိုင်နှုန်း ရရှိသွားပြီ ဖြစ်ရာ သူ၏ ရင်ထဲတွင် အနည်းငယ် ပေါ့ပါးသွားပြီး သတ္တိ ကလည်း ပိုမို ကြီးမားလာခဲ့လေသည်။

သူက ဆင်ခေါင်းဆောင် ၏ အနားသို့ လျှောက်သွားလိုက်ပြီး ဆင်ခေါင်းဆောင် ၏ တောင်ကုန်းငယ်လေး နှင့်တူသော ကျောပြင်ကြီးကို ကြည့်ကာ တစ်ခဏချင်း စိတ်ဝင်စားသွားတော့သည်။

အနည်းငယ် စီးချင်စိတ် ပေါ်လာခဲ့သည်။

ဆင်ခေါင်းဆောင် ကလည်း သူ့ကို ကြည့်နေပြီး လေးလံသော ဖိအားကြီး က မျက်နှာဆီသို့ ရိုက်ခတ်လာခဲ့သည်။

ရွှီယန်က ဆင်ကြီး၏ ဘေးဘက်ကို ပွတ်သပ်ပေးရင်း မေးမြန်းလိုက်သည်။ "နည်းနည်းလောက် စီးလို့ ရမလား..."

သူ၏ စကားကို ကြားသောအခါ ဆင်ခေါင်းဆောင် က မတုံ့ပြန်ရသေးခင် တိုက်ရိုက်ထုတ်လွှင့်မှု ထဲရှိ အင်တာနက်သုံးစွဲသူများ မှာ နောက်တစ်ကြိမ် ကြောင်အမ်းအမ်း ဖြစ်သွားကြရပြန်သည်။

[လောင်ရွှီ... မင်း ဘာစကားတွေ ပြောနေတာလဲ…]

[ဒီကောင်ကြီးက တောဆင်ရိုင်း ကြီးလေ... မင်းက သူ့ကို စီးခိုင်းဖို့ မေးနေတာလား…]

[ဒါက အရမ်းကို အဓိပ္ပာယ်မဲ့လွန်း မနေဘူးလား…]

နောက်ဆက်တွဲ ဖြစ်ပေါ်လာမည့် ကိစ္စရပ် ကလည်း ထိုနည်းတူစွာပင် အဓိပ္ပာယ်မဲ့လွန်းလှပေသည်။

တောဆင်ရိုင်း ကြီးက နောက်ခြေထောက်ကို တကယ်ပင် မြှောက်တင်ပေးလိုက်ပြီး ရွှီယန် အတွက် လှေကားထစ် သဖွယ် လုပ်ပေးလိုက်လေသည်။

ရွှီယန် က အလိုက်သင့် နင်းလိုက်ပြီးနောက် အားကုန်သုံးကာ အပေါ်သို့ ခုန်တက်လိုက်ရာ ဆင်ကြီး၏ ကျောပေါ်သို့ တကယ်ပင် ရောက်ရှိသွားတော့သည်။

[လခွမ်း…]

အင်တာနက်သုံးစွဲသူများ အားလုံး ထုံကျဉ်သွားကြတော့သည်။

[တကယ်ကြီး ဆင်စီးလို့ ရတာပါလား…]

[ဒါက အရမ်းကို အကြမ်းစားပဲ…]

ဆင်ကြီး၏ ကျောပြင်က တကယ်ကို ကျယ်ဝန်းလှပြီး တင်ပျဉ်ခွေ ထိုင်နေလျှင်ပင် နေရာ လွတ်လပ်စွာ ကျန်ရှိနေသေးသည်။

ထို့အပြင် ၎င်းတို့၏ ခံနိုင်ရည် ကလည်း အလွန် ကောင်းမွန်သဖြင့် ရွှီယန်ကို ထမ်းထားရသည်မှာ အလွန် လွယ်ကူလှပေသည်။

ဆင်ပေါက်လေး က အောက်ဘက်တွင် ရွှီယန်ကို မြင်သောအခါ ပျော်ရွှင်စွာဖြင့် ပတ်ပြေးနေလေသည်။

ရွှီယန် နှင့် ဤသတ္တဝါကြီးများ ၏ ဆက်ဆံရေးက အလွန် ကောင်းမွန်လှပေသည်။

ထို့နောက် ဆင်အုပ်ကြီး က ဆက်လက် နေရာပြောင်းရွှေ့ သွားကြသည်။

ထိုအထဲတွင် ရွှီယန် က ဆင်ခေါင်းဆောင် ၏ ကျောပေါ်တွင် စီးနင်းလိုက်ပါလာပြီး လမ်းပြ တစ်ယောက် နှင့်ပင် တူနေလေသည်။

ဤမြင်ကွင်းကို ကြည့်လေလေ ပို၍ အဓိပ္ပာယ်မဲ့လွန်းသည်ဟု ခံစားရလေလေ ပင်။

အင်တာနက်သုံးစွဲသူများ မှာ တိတ်တဆိတ် ချီးကျူးရုံသာ တတ်နိုင်တော့သည်။

[အစ်ကိုယန် ကတော့ အစ်ကိုယန် ပါပဲ... တကယ် အကြမ်းစားပဲ…]