အခန်း ၂၂၈၈

အခန်း ၂၂၈၈ ကြေကွဲဖွယ်ကောင်းသော ဟိုက်ဒရာဘတ်

ရွှီချီချင်၏ စကားကို ကြားလိုက်ရသောအခါ ဝမ်ချောင်၏ ရင်ထဲတွင် နွေးထွေးသော ခံစားချက်များ စီးဆင်းသွားခဲ့သည်။

“အင်း”

ဝမ်ချောင်က ခေါင်းညိတ်လိုက်ပြီး ထပ်မံ၍ များများစားစား မပြောတော့ပေ။

မည်သည့်အချိန်တွင်မဆို ရွှီချီချင်မှာ အမြဲတမ်း အခြေအနေကို နားလည်သဘောပေါက်တတ်သူဖြစ်ပြီး ဤအချက်က ဝမ်ချောင် သူမကို စွဲလမ်းရသည့် နောက်ထပ် အကြောင်းရင်းတစ်ခုလည်း ဖြစ်သည်။

အရာအားလုံးကို သေသေချာချာ စီစဉ်ပြီးနောက် မြို့တော်ကို စောင့်ရှောက်ရန်နှင့် ရှန်းလျူမဟာအစီအရင်ကို ထိန်းချုပ်ရန် ကိုယ်ပွားနှစ်ခုကို ချန်ထားခဲ့ကာ ဝမ်ချောင်သည် လူအနည်းငယ်ကိုသာ ခေါ်ဆောင်ပြီး လျင်မြန်စွာပင် ထွက်ခွာသွားခဲ့သည်။

ဆင်းဒုနှင့် မဟာထန်တို့ကြား အကွာအဝေးမှာ အလွန်ဝေးကွာသော်လည်း ရွှီချီချင်ပြောခဲ့သကဲ့သို့ပင် ဝမ်ချောင်၏ လက်ရှိစွမ်းအားဖြင့်ဆိုလျှင် မည်မျှပင် ဝေးကွာသော အကွာအဝေးဖြစ်ပါစေ အဓိပ္ပာယ် မရှိတော့ပေ။

ခြောက်ရက်၊ ခုနစ်ရက်ခန့် ကြာပြီးနောက် ဝမ်ချောင်သည် နောက်ဆုံးတွင် ဆင်းဒုသို့ ရောက်ရှိသွားခဲ့သည်။

ဟူး…

အေးစက်သော လေများ တိုက်ခတ်နေခဲ့သည်။

ဆင်းဒုရှိ မြင့်မားသော မီးခိုးရောင် တောင်ကုန်းတစ်ခုပေါ်တွင် ဝမ်ချောင်၊ ချင်းယန် သခင်လေး၊ လီစီယီနှင့် သိန်းငှက်အိုကြီးတို့ လူအနည်းငယ်က အတူတကွ ရပ်နေကြပြီး အမြင့်မှနေ၍ အဝေးသို့ လှမ်းကြည့်နေကြသည်။

မျက်စိရှေ့ရှိ ဆင်းဒုမှာ မှတ်ဉာဏ်ထဲကအတိုင်းပင်ဖြစ်ပြီး အလွန်အမင်း ဆင်းရဲမွဲတေနေဆဲ ဖြစ်သည်။

အဝေးသို့ လှမ်းကြည့်လိုက်ပါက နေရာတိုင်းတွင် လွင်တီးခေါင် ဖြစ်နေပြီး ရွှံ့နွံတောများနှင့် ပြောင်စင်နေသော ကျောက်တုံးများသာ ပြည့်နှက်နေကာ သူတို့ ရပ်နေသည့် တောင်ကုန်းပင်လျှင် ပြောင်စင်နေခဲ့သည်။

ကြီးမားသော အအေးလှိုင်းကြီး ပြီးဆုံးသွားသည်မှာ လပေါင်းများစွာ ကြာမြင့်ခဲ့ပြီဖြစ်ရာ အလယ်ပိုင်းဒေသ ကုန်းတွင်းပိုင်းတွင်မူ ရေခဲနှင့် နှင်းများ အရည်ပျော်ကာ အရာအားလုံးက နွေဦးရာသီသို့ ရောက်ရှိနေပြီဖြစ်ပြီး မက်မွန်ပန်းများပင် အကိုင်းအခက်များပေါ်တွင် ဝေဆာစွာ ပွင့်လန်းနေခဲ့ပြီ ဖြစ်သည်။

သို့သော်လည်း တောင်တန်းများ ခြားနားနေပြီး နွေဦးလေကို ပိတ်ဆို့ထားသောကြောင့် ဖြစ်နိုင်သည်။ ဆင်းဒုတွင်မူ ရေခဲကဲ့သို့ အေးစက်နေဆဲဖြစ်ပြီး လေတိုက်ခတ်လာချိန်တွင် အေးစက်သော အငွေ့အသက်များ ပါဝင်နေဆဲ ဖြစ်သည်။

“သိန်းငှက်အိုကြီး”

ဝမ်ချောင်က ရုတ်တရက် စကားပြောလိုက်သည်။

“အရှင်၊ ကျွန်တော် ဆက်သွယ်ကြည့်ပြီးပါပြီ၊ အခြေအနေက သိပ်မကောင်းဘူး၊ ကျွန်တော်တို့ ဟိုက်ဒရာဘတ်မှာ ချန်ထားခဲ့တဲ့ လူတွေနဲ့ ရုတ်တရက် အဆက်အသွယ် ပြတ်သွားတယ်၊ အခုအချိန်အထိ သူတို့ဆီက ဘာသတင်းမှ မရသေးဘူး”

သိန်းငှက်အိုကြီးက လေးနက်သော မျက်နှာဖြင့် အသံနှိမ့်ကာ ပြောလိုက်သည်။

ဟိုက်ဒရာဘတ်သည် မဟာထန်အတွက် အလွန် အရေးကြီးသော မဟာဗျူဟာမြောက် နေရာတစ်ခုဖြစ်ပြီး ဝုစ် သံမဏိလက်နက်များ အားလုံးမှာ ထိုနေရာမှ ထွက်ရှိလာခြင်း ဖြစ်သည်။

ထို့ကြောင့် အချိန်အတော်ကြာကတည်းက ဝမ်ချောင်သည် ထိုနေရာတွင် တပ်မတော်ကြီး တစ်ခုကို ချန်လှပ်၍ တပ်စွဲထားခဲ့ပြီး အကယ်၍ ပြင်ပရန်သူများ ဝင်ရောက်လာပါက ဤတပ်မတော်က ဟိုက်ဒရာဘတ်ကို အချိန်မီ ကာကွယ်ပေးနိုင်မည် ဖြစ်သည်။

ဟိုက်ဒရာဘတ်၏ မြေမျက်နှာသွင်ပြင်မှာ ရှုပ်ထွေးပြီး ထိုနေရာတွင် ကျန်ရစ်နေသူများမှာ မဟာထန်၏ ထိပ်တန်း တပ်ဖွဲ့ဝင်များဖြစ်ကြရာ ပုံမှန်အခြေအနေတွင် လူတစ်သောင်းအောက် ပြင်ပရန်သူများ ဝင်ရောက်လာပါက ကိုယ့်ကိုယ်ကိုယ် ကာကွယ်ရန်မှာ လုံးဝလုံလောက်မှု ရှိပေသည်။

အကယ်၍ ခုခံ၍ မရနိုင်လျှင်တောင်မှ ဤ တပ်စွဲထားသော တပ်ဖွဲ့ဝင်များက အချိန်မီ အကူအညီ တောင်းခံနိုင်ပြီး သတင်းအချက်အလက်များကို ပေးပို့နိုင်မည် ဖြစ်သည်။

ယခုကဲ့သို့ အသံအနည်းငယ်မျှပင် မရှိဘဲ ဝမ်ချောင်ဘက်မှ ချိုးငှက်ဖြင့် စာပို့ဆက်သွယ်လျှင်တောင်မှ တစ်ဖက်မှ မည်သည့် တုံ့ပြန်မှုမျှ မရှိခြင်းမျိုး လုံးဝဖြစ်နိုင်မည် မဟုတ်ပေ။

ဝမ်ချောင်သည် စကားမပြောဘဲ မျက်မှောင်အနည်းငယ် ကြုတ်ထားလိုက်ရာ သူ၏ ရင်ထဲတွင် အခြေအနေများကို နားလည်နေခဲ့ပြီး ဤအခြေအနေမျိုးမှာ လုံးဝမကောင်းမွန်ကြောင်း၊ မတော်တဆမှု တစ်ခုခု မရှိလျှင် ဟိုက်ဒရာဘတ်တွင် တပ်စွဲထားသော စစ်သည်များမှာ ကံဆိုးမိုးမှောင်ကျသွားလောက်ပြီ ဖြစ်ကြောင်း တွေးတောမိလိုက်သည်။

“ကောင်းရှန်းကျစ် နဲ့ အန်းစီရှန်း တို့ဆီကနေရော ဘာသတင်းမှ မရသေးဘူးလား”

ဝမ်ချောင်က ခဏမျှ တိတ်ဆိတ်သွားပြီးနောက် မေးလိုက်သည်။

ဟိုက်ဒရာဘတ်နှင့် အနီးဆုံး နေရာတွင် တပ်စွဲထားသူများမှာ အာရပ်တွင် တပ်စွဲထားသော ကောင်းရှန်းကျစ်နှင့် အန်းစီရှန်းတို့ပင် ဖြစ်သည်။

ဟိုက်ဒရာဘတ်တွင် ပြဿနာ ဖြစ်ပွားနေကြောင်း သတင်းရရှိသည်နှင့် ဝမ်ချောင်သည် ဟိုက်ဒရာဘတ်တွင် တပ်စွဲထားသော စစ်သည်များကို ချက်ချင်း ဆက်သွယ်ခဲ့သည့်အပြင် အာရပ်ဘဂ္ဂဒက်တွင် တပ်စွဲထားသော ကောင်းရှန်းကျစ်နှင့် အန်းစီရှန်းတို့ကိုလည်း ဆက်သွယ်ကာ သတင်းအချက်အလက်များကို စုံစမ်းရန် လူလွှတ်ခိုင်းခဲ့သည်။

ဤသည်မှာ ဟိုက်ဒရာဘတ်၏ သတင်းများကို အမြန်ဆုံး သိရှိနိုင်မည့် နည်းလမ်းပင် ဖြစ်သည်။

“ကောင်းရှန်းကျစ်တို့ဘက်က သတင်းပြန်လာတာ နည်းနည်း နောက်ကျတယ်၊ သူတို့ စုံစမ်းသိရှိရတဲ့ အခြေအနေတွေအရ ဆင်းဒုဟိုက်ဒရာဘတ်မှာ မကြာသေးခင်က အပြောင်းအလဲ တချို့ ဖြစ်သွားပုံရတယ်။ လက်မှုပညာရှင်တွေ အားလုံးက ဟိုက်ဒရာဘတ်ကနေ ထွက်ပြေးသွားကြပြီး လူတစ်ယောက်ကိုတောင် ရှာမတွေ့တော့ဘူးတဲ့၊ သူတို့ အသေးစိတ် မေးမြန်းကြည့်ပေမဲ့ ဘာတွေဖြစ်ခဲ့တယ်ဆိုတာကို ဒေသခံတွေ တစ်ယောက်မှ မသိကြဘူးတဲ့”

သိန်းငှက်အိုကြီးက အသံနှိမ့်ကာ ပြောလိုက်သည်။

“ဒါပဲလား”

ဝမ်ချောင်က မျက်မှောင်အနည်းငယ် ကြုတ်လိုက်သည်။

“ဒါပါပဲ၊ နောက်ဆုံး သတင်းက လွန်ခဲ့တဲ့ သုံးရက်လောက်က ပို့ထားတာပါ၊ အဲဒီနောက်ပိုင်းတော့ ဘာသတင်းမှ မရတော့ပါဘူး၊ အချိန်အရ တွက်ကြည့်မယ်ဆိုရင်တော့ သူတို့တွေ ဟိုက်ဒရာဘတ် တောင်တန်းတွေဆီ ဝင်သွားလောက်ပြီ ထင်ပါတယ်”

သိန်းငှက်အိုကြီးက ခေါင်းငုံ့ကာ ရိုးသားစွာ ပြောလိုက်သည်။

ဝမ်ချောင်သည် စကားမပြောဘဲ မျက်လုံးထဲတွင် တွေးတောနေသည့် အရိပ်အယောင်များ ပေါ်ထွက်လာခဲ့ရာ ဟိုက်ဒရာဘတ် တောင်တန်းများမှာ ကျောက်ဆောင်များ ထူထပ်ပြီး သွားလာရန် အလွန် ခက်ခဲလှရာ အကယ်၍ ယခင်က ထိုနေရာသို့ မရောက်ဖူးပါက အချိန်တိုအတွင်း နေရာကိုပင် ရှာတွေ့နိုင်ရန် ခက်ခဲလှပေသည်။

ဝမ်ချောင်သည်လည်း ယခင်က တစ်ဖက်မှ လာရောက်ကြိုဆိုသူများ ရှိသောကြောင့်သာလျှင် နေရာကို ရှာတွေ့ခဲ့ခြင်းဖြစ်ပြီး ယခုအခါ ဟိုက်ဒရာဘတ် အပေါ်ရှိ လူများအားလုံး ထွက်ပြေးသွားကြပြီဖြစ်ရာ အချိန်တိုအတွင်း ကောင်းရှန်းကျစ် စေလွှတ်လိုက်သော လူများအနေဖြင့် နေရာကို မှန်ကန်စွာ ရှာတွေ့နိုင်မည်မှာ သေချာပေါက် မဟုတ်ပေ။

“လောလောဆယ် သူတို့ကို ဂရုစိုက်နေစရာ မလိုသေးဘူး၊ ငါတို့ ဟိုက်ဒရာဘတ် ကို တိုက်ရိုက် သွားကြမယ်”

ဝမ်ချောင်က ခဏမျှ စဉ်းစားလိုက်ပြီးနောက် လျင်မြန်စွာ ပြောလိုက်သည်။

သုံးရက်ဆိုသော အချိန်မှာ သိပ်မကြာလှပေ။ ထို့အပြင် လူတိုင်း ရှိနေသော နေရာမှ ဟိုက်ဒရာဘတ် သို့လည်း သိပ်မဝေးတော့ရာ ဝမ်ချောင်၏ စွမ်းအားဖြင့်ဆိုလျှင် နေ့တစ်ဝက်ခန့်အတွင်း ရောက်ရှိနိုင်မည် ဖြစ်သည်။

“ဝုန်း”

လျှပ်စီးလက်သကဲ့သို့ မြန်ဆန်သော အခိုက်အတန့်တွင် အလင်းတစ်ချက် လက်သွားပြီး ရေခဲကဲ့သို့ ဖြူဖွေးသော ငွေရောင် အကာအကွယ် တစ်ခုက ဝမ်ချောင်၏ ခန္ဓာကိုယ်အတွင်းမှ ရုတ်တရက် ပေါက်ကွဲထွက်လာကာ သိန်းငှက်အိုကြီး၊ ချင်းယန် သခင်လေး၊ လီစီယီနှင့် အခြားသူများကို အထဲသို့ ဆွဲသွင်းလိုက်ပြီး နောက်တစ်ခဏတွင် ဝမ်ချောင်က လူအနည်းငယ်ကို ခေါ်ဆောင်ကာ လေထဲသို့ ပျံတက်သွားပြီး အမြောက်ဆံ တစ်ခုအလား အဝေးသို့ ပျောက်ကွယ်သွားတော့သည်။

……

နေ့တစ်ဝက် ကြာပြီးနောက် ဟိုက်ဒရာဘတ် တောင်တန်းများသို့ ရောက်ရှိသွားသည်။

ကောင်းကင်ယံမှ အောက်သို့ ငုံ့ကြည့်လိုက်ပါက ဟိုက်ဒရာဘတ် တောင်တန်းများမှာ မြေပြင်ပေါ်တွင် ဝပ်ဆင်းနေသော သမိုင်းမတင်မီခေတ်က သားရဲကြီး တစ်ကောင်အလား ခန္ဓာကိုယ် တစ်ခုလုံးတွင် ချွန်ထက်သော ကျောက်တုံးများ အပြည့် ရှိနေပြီး ဤတောင်တန်းများမှာ လူအများ တွေးထင်ထားသည်ထက် များစွာ ပို၍ ခမ်းနားကြီးကျယ်ကာ မတ်စောက်နေခဲ့သည်။

“အရမ်း ပြင်းထန်တဲ့ မီးလောင်ထားတဲ့ အနံ့ပဲ”

လူတစ်စုက လေထဲတွင် မျောလွင့်နေပြီး အောက်သို့ မဆင်းသက်ရသေးခင်မှာပင် ချင်းယန် သခင်လေး၏ နှာခေါင်းက နှစ်ချက်ခန့် ရှုံ့သွားပြီး ချက်ချင်း မျက်မှောင်ကြုတ်ကာ ပြောလိုက်သည်။

သူတို့ ရှိနေသော အမြင့်ပေမှနေ၍ ပုံမှန် အခြေအနေတွင် ဤမျှ ပြင်းထန်သော မီးလောင်ထားသည့် အနံ့ကို လုံးဝမရနိုင်ပေ။ မီးလောင်မှု ပမာဏမှာ အတိုင်းအတာ တစ်ခုအထိ အလွန်အမင်း ကြီးမားနေမှသာ ဖြစ်နိုင်ပေမည်။

ထို့အပြင် ပို၍ ထူးဆန်းသည်မှာ ဟိုက်ဒရာဘတ် တောင်တန်းများပေါ်တွင် နေရာတိုင်း၌ ပြောင်စင်နေပြီး မာကျောသော ကျောက်တုံးများသာ ရှိနေရာ တကယ်တော့ ဘာတွေများ မီးလောင်သွားလို့ ဒီလောက် ပြင်းထန်တဲ့ အနံ့တွေ ထွက်လာရတာလဲ။

လူတစ်စုက ဆက်လက်၍ ရှေ့သို့ သွားလိုက်ရာ အချိန်ခဏလေးအတွင်းမှာပင် ရှေ့မှ မြင်ကွင်းကို မြင်တွေ့လိုက်ရသောအခါ လူတိုင်းက ဘာကြောင့် ဤမျှ ပြင်းထန်သော မီးလောင်ထားသည့်အနံ့ ထွက်ပေါ်လာရသနည်း ဆိုသည်ကို နောက်ဆုံးတွင် သိရှိသွားကြတော့သည်။

“အလောင်းတွေပဲ”

လီစီယီက ရုတ်တရက် ပြောလိုက်ရာ စကားပြောနေစဉ် သူ၏ မျက်ခွံများက ပြင်းထန်စွာ တစ်ချက် လှုပ်ရှားသွားခဲ့သည်။

အရပ်လေးမျက်နှာ ရှစ်မျက်နှာသို့ ထင်ရှားကျော်ကြားသော နတ်ဘုရား စွမ်းအင် ပိုင်ရှင် တပ်မှူးတစ်ဦး အနေဖြင့် ဝူရှန်း သံချပ်ကာ မြင်းတပ်သောင်းချီ၏ ခေါင်းဆောင်ဖြစ်သူ လီစီယီ သည် တစ်ဘဝလုံး အလောင်းများ တောင်လိုပုံကာ သွေးများ ပင်လယ်လို စီးဆင်းနေသည့် မရေမတွက်နိုင်သော တိုက်ပွဲများကို ဖြတ်သန်းခဲ့ဖူးရာ ထိုကြောက်မက်ဖွယ်ကောင်းသော သေဆုံးမှု မြင်ကွင်းများမှာ လီစီယီအတွက် အစောကြီးကတည်းက ရိုးအီနေခဲ့ပြီး ဘာမှမဟုတ်တော့ပေ။ သို့သော် ငွေရောင် အကာအကွယ် မှတစ်ဆင့် အောက်ဘက်ရှိ ကြမ်းတမ်းသော တောင်ထိပ်ပေါ်တွင် ကြယ်များအလား ပြန့်ကျဲနေသော အလောင်းများကို မြင်တွေ့လိုက်ရချိန်တွင် လီစီယီ၏ ရင်ထဲ၌ ပြင်းထန်စွာ ခုန်လှုပ်သွားသည်ကို မတားဆီးနိုင်ခဲ့ပေ။

အောက်ဘက် တောင်ထိပ်ပေါ်တွင် ပြန့်ကျဲနေသော အလောင်းများမှာ တွေးထင်ထားသည်ထက် များစွာပိုမိုများပြားနေပြီး အသားအရေ မည်းနက်သော ဆင်းဒုသတ္တုတွင်း အလုပ်သမားများအပြင် လီစီယီ သည် သံချပ်ကာ အင်္ကျီများကို ဝတ်ဆင်ထားသော လူရိပ် အချို့ကိုလည်း မြင်တွေ့လိုက်ရသည်။

၎င်းတို့မှာ ဟိုက်ဒရာဘတ် တွင် တပ်စွဲထားသော မဟာထန်၏ ထိပ်တန်း တပ်ဖွဲ့ဝင်များ ပင်ဖြစ်သည်။

နောက်တစ်ခဏတွင် အလင်းတစ်ချက် လက်သွားပြီး ဝမ်ချောင်သည် လူတိုင်းကို ခေါ်ဆောင်ကာ ဥက္ကာပျံ တစ်ခုအလား ကောင်းကင်ယံမှ ဆင်းသက်လာပြီး အောက်ဘက်ရှိ ဟိုက်ဒရာဘတ် တောင်ထိပ်ပေါ်သို့ ရောက်ရှိသွားခဲ့သည်။

ဤနေရာရှိ မီးလောင်ထားသော အနံ့မှာ ယခင်က လေထဲတွင် ရခဲ့သော အနံ့ထက် အဆပေါင်း ရာချီ၍ ပိုမို ပြင်းထန်နေခဲ့ပြီး ဤအခိုက်အတန့်တွင် မီးလောင်ထားသည့် အနံ့၏ ဇာစ်မြစ်ကို လူတိုင်း သိရှိသွားကြပြီ ဖြစ်သည်။

၎င်းမှာ အရေပြားနှင့် အသားများ မီးလောင်ကျွမ်းနေသည့် အနံ့ပင် ဖြစ်သည်။

“အမည်းရောင်ဝတ်စုံဝတ် လူတွေပဲ… အရာအားလုံးက သူတို့ကြောင့် ဖြစ်ရတာပဲ”

ဝမ်ချောင်သည် ဘုရင်ဝတ်စုံကို ဝတ်ဆင်ထားကာ တောင်ထိပ်ပေါ်တွင် ရပ်နေပြီး သူ၏ လက်ဝါးကို ဆန့်ထုတ်လိုက်ရာ မြေပြင်ပေါ်တွင် ပြည့်နှက်နေသော အလောင်းများကြားမှ အနက်ရောင်ဝတ်စုံကို ဝတ်ဆင်ထားသော အလောင်းတစ်ခုက လျင်မြန်စွာ လွင့်ပျံလာပြီး ဝမ်ချောင်၏ ရှေ့သို့ ကျဆင်းလာခဲ့သည်။

ဖြတ်ခနဲ အသံနှင့်အတူ ဝမ်ချောင်က လက်ချောင်းဖြင့် တစ်ချက် ကော်ထုတ်လိုက်ရာ ဤအလောင်း၏ ခါးပေါ်မှ လက်နှစ်ချောင်းစာခန့် အကျယ်ရှိသော သစ်သားပြား တစ်ခုက လက်ထဲသို့ ချက်ချင်း ခုန်တက်လာခဲ့သည်။

ဤသစ်သားပြားပေါ်တွင် အနက်ရောင် နတ်ဘုရား ရုပ်တုတစ်ခုကို ရေးထွင်းထားပြီး နတ်ဘုရား ရုပ်တု၏ မျက်လုံးများမှာ လူသားများ၏ ဝိညာဉ် အနက်ရှိုင်းဆုံး နေရာအထိ ထိုးဖောက် မြင်နိုင်သကဲ့သို့ အလွန် စူးရှထက်မြက်နေပုံ ရသည်။

၎င်းမှလွဲ၍ သစ်သားပြားပေါ်တွင် အခြားမည်သည့် အမှတ်အသားမျှ မရှိတော့ဘဲ စာလုံး တစ်လုံးမျှပင် မရှိပေ။

ဤကဲ့သို့သော ပုံစံမျိုးရှိသည့် အမိန့်ပေး ကတ်ပြား များနှင့် ပတ်သက်၍ ဝမ်ချောင်သည် မစိမ်းလှပေ။ ၎င်းမှာ နတ်ဘုရား သခင်တစ်ပါးပါး၏ လက်အောက်ခံများကို ကိုယ်စားပြုသော အမှတ်အသား ဖြစ်သင့်သည်။

တောင်ထိပ်ပေါ်တွင် အများစုမှာ ထိုဆင်းဒုလူမျိုးများ၏ အလောင်းများ ဖြစ်သော်လည်း ရှေ့သို့ ဆက်သွားသည်နှင့်အမျှ တွေ့ရှိရသော အမည်းရောင်ဝတ်စုံဝတ်လူများ၏ အလောင်းများကလည်း ပိုမိုများပြားလာပြီး သူတို့ထဲမှ အချို့မှာ လူဝူသားရဲ တစ်ပိုင်း ပြောင်းလဲနေသည့် အခြေအနေတွင် ရှိနေဆဲဖြစ်ကာ အလွန်တရာ ရက်စက်ကြမ်းကြုတ်ပြီး ကြောက်မက်ဖွယ်ကောင်းပုံ ရသည်။

တိုက်ပွဲက အစောကြီးကတည်းက ပြီးဆုံးသွားခဲ့သော်လည်း အဝေးသို့ လှမ်းကြည့်လိုက်ပါက နေရာတိုင်းတွင် လုဝူမီး၊ မာရာမီးနှင့် ကျွီပိုင်မီးတို့ လောင်ကျွမ်းထားသည့် အရာများကို မြင်တွေ့နိုင်ပေသည်။

ထိုနေ့က ဖြစ်ပျက်ခဲ့သည့် မြင်ကွင်းများကို မမြင်တွေ့ခဲ့ရသော်လည်း တောင်ထိပ်ပေါ်တွင် ကျန်ရစ်နေသော အရာများအရ ကြည့်မည်ဆိုပါက ထိုတိုက်ပွဲမှာ တွေးထင်ထားသည်ထက် များစွာ ပို၍ကြေကွဲဖွယ် ကောင်းနေလောက်ပေမည်။

“အရှင် တွေ့ပြီ”

ဝမ်ချောင်သည် အရပ်လေးမျက်နှာကို သေချာစွာ အကဲခတ်နေချိန်တွင် ရှေ့မှ တပ်မှူးလီစီယီသည် လက်ထဲတွင် ပစ္စည်းတစ်ခုကို ကိုင်ဆောင်ထားကာ လေးနက်သော မျက်နှာဖြင့် ဝမ်ချောင်ရှိရာ အရပ်ဆီသို့ ရုတ်တရက် အမြန် လျှောက်လာခဲ့သည်။

“ကောင်းရှန်းကျစ်နဲ့ အန်းစီရှန်းတို့ စေလွှတ်လိုက်တဲ့ တပ်ဖွဲ့က တိုက်ခိုက်ခံရပြီး တစ်တပ်လုံး ကျဆုံးသွားတယ်၊ အားလုံး ဒီနေရာမှာ သေဆုံးနေကြတယ်၊ မတော်တဆမှု မရှိဘူးဆိုရင် သူတို့တွေ တောင်ပေါ်မှာ အဲဒီအမည်းရောင်ဝတ်စုံဝတ် လူတွေနဲ့ သွားတိုးမိတာ ဖြစ်လောက်တယ်”

လီစီယီက အသံနှိမ့်ကာ ပြောလိုက်ပြီး သူ၏ညာဘက်လက်ကို ဖြန့်လိုက်ရာ လက်ဝါးထဲတွင် သေးငယ်သော သတ္တု အမိန့်ပေး ကတ်ပြား လေးတစ်ခု ရှိနေပြီး အမိန့်ပေး ကတ်ပြားပေါ်တွင် ထျဲ့ပိ(သံတံတိုင်း)ဟူသော ရှေးဟောင်းကျွမ်စာလုံး အနည်းငယ် ပါရှိနေသည်။

ဤသည်မှာ ကောင်းရှန်းကျစ်၏ လက်အောက်ရှိ ထိပ်တန်း တပ်ဖွဲ့တစ်ခု ပင်ဖြစ်သည်။

ဤတစ်ကြိမ် ဟိုက်ဒရာဘတ်၏ အခြေအနေများကို စစ်ဆေးရန် ကောင်းရှန်းကျစ်က ဤတပ်ဖွဲ့၏အဖွဲ့ဝင်များကို စေလွှတ်ခဲ့ခြင်း ဖြစ်သည်။

လီစီယီ၏ စကားကို ကြားလိုက်ရသောအခါ လူတိုင်း၏မျက်ခွံများမှာ တစ်ချက် လှုပ်ရှားသွားခဲ့ကြသည်။

“အားလုံး သတိထားကြ၊ ကောင်းကင်နတ်ဘုရား အဖွဲ့အစည်းက လူတွေ အားလုံး ထွက်မသွားသေးဘူး ထင်တယ်”

ချင်းယန် သခင်လေး၏ မျက်နှာအမူအရာက အေးစက်သွားပြီး ရုတ်တရက် ပြောလိုက်သည်။

ဟိုက်ဒရာဘတ် တောင်တန်းများတွင် ပြဿနာ ဖြစ်ပွားခဲ့သည့် အချိန်မှာ ခြောက်ရက်၊ ခုနစ်ရက်ခန့်က ဖြစ်ပြီး ကောင်းရှန်းကျစ်၏ တပ်ဖွဲ့ ဤနေရာသို့ ရောက်ရှိလာသည့် အချိန်မှာ သုံးရက်ခန့်ကဖြစ်ရာ၊ ပုံမှန် အခြေအနေတွင် ထိုအချိန်က ဟိုက်ဒရာဘတ် တောင်တန်းများပေါ်ရှိ တိုက်ပွဲမှာ ပြီးဆုံးသွားလောက်ပြီဖြစ်ပြီး ကောင်းကင်နတ်ဘုရား အဖွဲ့အစည်းမှ လူများလည်း အပြည့်အဝ ဆုတ်ခွာသွားလောက်ပြီ ဖြစ်သည်။

သို့သော် မျက်စိရှေ့ရှိ အခြေအနေများအရ ကြည့်မည်ဆိုပါက သိသာထင်ရှားစွာပင် ထိုသို့ မဟုတ်ပေ။

မျက်တောင်တစ်ခတ်အတွင်းမှာပင်၊ လူတိုင်း၏ ခန္ဓာကိုယ်ထဲရှိ သိုင်းစွမ်းအင်များက လှုပ်ရှားလာပြီး အချိန်မရွေး တိုက်ပွဲဝင်ရန် ချက်ချင်း အဆင်သင့် ဖြစ်နေကြပြီ ဖြစ်သည်။

ရှေ့တွင်မူ ဝမ်ချောင်၏ မျက်နှာအမူအရာမှာ ပုံမှန်အတိုင်းပင် ဖြစ်နေခဲ့သည်။

သူ၏ မျက်လုံးနှစ်လုံးကို မှိတ်လိုက်ပြီး စိတ်ထဲမှ တွေးတောလိုက်ချိန်တွင် ကောင်းကင်နှင့် မြေကြီးကိုပင် အရောင်ပြောင်းသွားစေနိုင်သည့် ကြီးမားကျယ်ပြန့်လှသော စိတ်စွမ်းအင်တစ်ခုက ဝမ်ချောင်ကို ဗဟိုပြုကာ ပြဒါးများ ဖိတ်ကျသွားသကဲ့သို့ မျက်တောင်တစ်ခတ်အတွင်း ဟိုက်ဒရာဘတ် တောင်တန်းကြီး တစ်ခုလုံးအတွင်းသို့ ဝင်ရောက်သွားခဲ့သည်။

ဤသည်မှာ ဝမ်ချောင်ဟိုက်ဒရာဘတ် တောင်တန်းများသို့ ရောက်ရှိလာခြင်း ပထမဆုံးအကြိမ် မဟုတ်သော်လည်း ဤနေရာသို့ ထပ်မံ ရောက်ရှိလာချိန်တွင် စိတ်စွမ်းအင်၏ အမြင်အောက်၌ ခံစားရမှုမှာ ယခင်ကနှင့် လုံးဝမတူညီတော့ပေ။

ဟိုက်ဒရာဘတ် တောင်တန်းများ၏ မြေအောက်တွင် များပြားလှသော အစီအရင်များနှင့် ဝင်္ကပါများ ရှိနေသည်။ ထို့အပြင် ဟိုက်ဒရာဘတ် တောင်တန်းများ၏ မြေအောက် အနက်ရှိုင်းဆုံး နေရာတွင် ကြီးမားလှသော စွမ်းအင် အချက်အချာ နေရာ တစ်ခုလည်း ရှိနေသေးရာ ဤအရာများက ဝမ်ချောင်၏ စိတ်စွမ်းအင် စူးစမ်းရှာဖွေမှုကို ကြီးမားသော အနှောင့်အယှက်များ ဖြစ်ပေါ်စေခဲ့သော်လည်း ဝမ်ချောင်သည် မိမိလိုချင်သော အရာများကို ရှာဖွေတွေ့ရှိခဲ့ဆဲ ဖြစ်သည်။

“သူတို့ရဲ့ အဓိက တပ်ဖွဲ့တွေ ထွက်သွားကြပြီ၊ ကျန်နေခဲ့တာက တပည့်တပန်း အနည်းငယ်ပဲ”

ခဏအကြာတွင် ဝမ်ချောင်က မျက်လုံးကို ဖွင့်ကာ ပြောလိုက်သည်။

စကားသံ မဆုံးသေးခင်မှာပင်၊ ဝမ်ချောင်၏ ခန္ဓာကိုယ်အတွင်းမှ ငွေရောင် အကာအကွယ် တစ်ခုက ထပ်မံပေါက်ကွဲထွက်လာပြီး လူတိုင်းကို ခေါ်ဆောင်ကာ တစ္ဆေတစ်ကောင်အလား မူလနေရာမှ ပျောက်ကွယ်သွားတော့သည်။

……

ဟိုက်ဒရာဘတ် တောင်တန်းများ၏ အရှေ့မြောက်ဘက်တွင် အလောင်းများ ပြည့်နှက်နေသော ဧရာမ တွင်းကြီးတစ်ခု ရှိပြီး ဤနေရာမှာ ဟိုက်ဒရာဘတ် သတ္တုရိုင်းများ တူးဖော်ရာ အရေးကြီးသော နေရာတစ်ခု ဖြစ်ခဲ့ဖူးသည်။

ထိုကျောက်တုံး အစုအပုံများ ကြားတွင် ဟိုက်ဒရာဘတ် သတ္တုရိုင်းများကို တူးဖော်ရန် ဝမ်ချောင် ဒီဇိုင်းဆွဲထားသော စွန့်ပစ်ထားသည့် စက်ကိရိယာ များကိုလည်း မြင်တွေ့နိုင်ပေသေးသည်။

“သွားကြစို့ တာဝန် ပြီးဆုံးသွားပြီ၊ ဒီနေရာကနေ အမြန်ဆုံး ဆုတ်ခွာရမယ်”

အလောင်းများ ပြည့်နှက်နေပြီး ကျောက်တုံးများ ပုံနေသော နေရာတွင် ခေါင်းဆောင်ပုံပေါက်သည့် အမည်းရောင်ဝတ်စုံဝတ် လူတစ်ဦးက အသံနှိမ့်ကာ ပြောလိုက်သည် -

“ဘဂ္ဂဒက်က မဟာထန် ရဲ့ စစ်တပ်တွေ တောင်တန်းတွေဆီ ရောက်လာကြပြီ၊ သိသာထင်ရှားစွာပဲ သူတို့ ဒီနေရာကို သတိထားမိသွားကြပြီ၊ သိပ်မကြာခင်မှာ မဟာထန်က အဲဒီလူလည်း ဒီနေရာကို မြန်မြန် ရောက်လာလောက်တယ်”

******