အခန်း ၅၆၈
Vol. 57 Ch. 568
အခန်း (၅၆၈)
" အဲ့ဒီဗုဒ္ဓတရားတော်က ငါတို့ ချင်ရဲ့ အနာဂတ် ဗုဒ္ဓလမ်းစဉ်ဖြစ်လာလိမ့်မယ်။ အင်မော်တယ်ဘုံမှာရှိတဲ့ အင်မော်တယ်တွေနဲ့ ဗုဒ္ဓတွေက ငါတို့ လူသားဘုံမှာလည်း ရှိလာလိမ့်မယ်။ ဗုဒ္ဓလမ်းစဉ်အပြင် အနာဂတ်မှာ အင်မော်တယ်ဘုံရဲ့ ယိုယွင်းနေတဲ့ ကောင်းကင်ဘုံကိုလည်း ငါတို့ ချင်က ပြန်လည်ပုံသွင်းသွားမယ်။ ဗုဒ္ဓဆိုတာ အနာဂတ်ကို ပိုင်ဆိုင်ရမယ်။ ချင်မှာ အနာဂတ်ဗုဒ္ဓပဲရှိရမယ်။ " ကျောက်ဖုန်းက လေးနက်စွာ ပြောလိုက်သည်။
သူက ယခင်ဘဝတွင် ဗုဒ္ဓဘုရားကျောင်းများစွာကို မြင်ဖူးခဲ့သည်။ အချို့က ဗုဒ္ဓနာမည်ကို အသုံးပြုပြီး စည်းစိမ်များ စုဆောင်းကြသည်။ နာမည်အရ ဗုဒ္ဓဘာသာဖြစ်သော်လည်း နှလုံးသားတွင် ဗုဒ္ဓမရှိပေ။ သို့သော် စစ်မှန်စွာ ကျင့်ကြံနေကြသော ဘုန်းကြီးများလည်းရှိသည်။ သူတို့က စည်းစိမ်ဥစ္စာများမရှိဘဲ ပေါ့ပါးပြီး သူတို့၏ နှလုံးသားတွင် ဗုဒ္ဓရှိသည်။ သူတို့က အခြားသူများ၏ ဒုက္ခများကို လျော့ပါးစေသော စစ်မှန်သည့် ရဟန်းများဖြစ်ကြသည်။
ကျောက်ဖုန်းက စစ်မှန်သော ဗုဒ္ဓတရားတော်ဆိုတာ ဘာလဲဆိုတာ စစ်မှန်သော ဗုဒ္ဓဆိုတာဘာလဲဆိုတာ သိသည်။ ယနေ့ခေတ် နတ်ဘုရားများနှင့် ဗုဒ္ဓများက ပျက်စီးနေပြီဖြစ်သည်။ ချင်က အနာဂတ်ကို ပြန်လည်ပုံဖော်ရန် လိုအပ်သည်။ အနာဂတ်ဗုဒ္ဓ၊ အနာဂတ်အင်မော်တယ်များနှင့် နတ်ဘုရားများဖြစ်သည်။
" အော်မိတော်ဖု.... တကာတော်ရဲ့ ဗုဒ္ဓတရားတော်အပေါ် နားလည်မှုက တကယ်ကို အံ့ဩစရာကောင်းပါတယ်။ "
ထိုအချိန်တွင် ကျန်းထိုင်နန်းဆောင်ထဲ၌ ရုတ်တရက် အသံတစ်ခု ထွက်ပေါ်လာသည်။
" ဘယ်သူလဲ။ " ရင်ကျန့်၏ အမူအရာက ပြောင်းလဲသွားပြီး အင်ပါယာကံကြမ္မာစွမ်းအားက ချက်ချင်း ထွက်ပေါ်လာကာ ဖိအားများ ထွက်ပေါ်လာသည်။ သို့သော် ထိုဖိအားအောက်တွင် အသံက ထွက်ပေါ်နေဆဲ ဖြစ်သည်။
" ခမည်းတော် အင်ပါယာကံကြမ္မာစွမ်းအားကို ပြန်ရုပ်သိမ်းလိုက်ပါ။ " ကျောက်ဖုန်းက လက်မြှောက်ပြီး ပြောလိုက်သည်။
ရင်ကျန့်က ကျောက်ဖုန်း၏ တည်ငြိမ်သော အမူအရာကို မြင်သောအခါ အင်ပါယာကံကြမ္မာစွမ်းအားကို ပြန်ရုပ်သိမ်းလိုက်သည်။ အင်ပါယာကံကြမ္မာစွမ်းအားများ ပျောက်ကွယ်သွားချိန်တွင် ခန်းမထဲ၌ ဗုဒ္ဓအလင်းများ ထွက်ပေါ်လာပြီး တဖြည်းဖြည်း ဗုဒ္ဓပုံရိပ်တစ်ခု ပေါ်လာသည်။ ထိုဗုဒ္ဓအလင်းများထဲတွင် မကောင်းသော အငွေ့အသက်များ မပါဘဲ သန့်ရှင်းသော ဗုဒ္ဓအလင်းများသာ ဖြစ်သည်။
" မင်းက ဘယ်သူလဲ။ " ရင်ကျန့်က ဗုဒ္ဓပုံရိပ်ကို ကြည့်ပြီး မေးလိုက်သည်။
ဝမ်ကျန့်ကလည်း အံ့ဩစွာ ကြည့်နေသည်။ ကျောက်ဖုန်းကတော့ တည်ငြိမ်စွာ ရှိနေသည်။
" အနာဂတ်မှာ ငါ့ကိုမြင်ရင် ငါက အနာဂတ်ပဲ။ ဒကာတော်က ငါ့နာမည်ကို ခေါ်နိုင်တာ ရေစက်ရှိနေလို့ပါ။ အနာဂတ်ဗုဒ္ဓမီလဲ (မေတ္တေယျဗုဒ္ဓ)က ဒကာတော်ကို နှုတ်ဆက်ပါတယ်။ " မီလဲ့ဗုဒ္ဓက ကျောက်ဖုန်းကို ပြုံး၍ ကြည့်ပြီး ပြောလိုက်သည်။
" ကိုယ်တော်က ကျုပ်မြင်ဖူးတဲ့ အင်မော်တယ်တွေ၊ ဗုဒ္ဓတွေနဲ့ မတူဘူးပဲ။ " ကျောက်ဖုန်းက ဖြည်းညင်းစွာ ပြောလိုက်သည်။
" အို ဘယ်လိုများမတူတာလဲ။ " မီလဲ့ဗုဒ္ဓက ညင်သာစွာ ပြုံးပြီး ပြောလိုက်သည်။
" ကိုယ်တော်ရဲ့ ဗုဒ္ဓအလင်းတွေက သန့်စင်ပြီး သွေးချီနဲ့ အငြိုးအတေးတွေ မပါဝင်ဘူး။ " ကျောက်ဖုန်းက ပြောလိုက်သည်။
" ဒကာတော်က ဗုဒ္ဓကို အသိအမှတ်ပြုတာလား ဒါမှမဟုတ် အင်မော်တယ်ဘုံက အင်မော်တယ်တွေနဲ့ ဗုဒ္ဓတွေကို မထီမဲ့မြင်ပြုတာလား။ " မီလဲ့ဗုဒ္ဓက ညင်သာစွာ မေးလိုက်သည်။
" အနာဂတ်ဗုဒ္ဓရဲ့ စွမ်းအားက တကယ်ကို ကြီးမားတယ်။ အင်မော်တယ်ဘုံနဲ့ လူသားဘုံကို ခွဲခြားထားပေမယ့် ဗုဒ္ဓကျင့်ကြံသူတွေရဲ့ ပူဇော်မှုမလိုဘဲ နယ်ပယ်ကို ဖြတ်ကျော်လာနိုင်တယ်။ " ကျောက်ဖုန်းက သက်ပြင်းချပြီး ပြောလိုက်သည်။
" လူတွေက အတိတ်နဲ့ ပစ္စုပ္ပန်ကို သိတယ်။ ဒါပေမယ့် အနာဂတ်ကို မသိကြဘူး။ ဒကာတော်က ဗုဒ္ဓရဲ့ နာမည်ကို ခေါ်နိုင်တာ ရေစက်ရှိလို့ပါ။ " မီလဲ့ဗုဒ္ဓက ပြုံး၍ ပြောလိုက်သည်။
" မီလဲ့ဗုဒ္ဓက အင်မော်တယ်ဘုံက ဗုဒ္ဓတစ်ပါးပဲ။ အင်မော်တယ်ဘုံက ဘာလို့ သတ်ဖြတ်မှုတွေနဲ့ ပြည့်နှက်သွားတာလဲ။ အင်မော်တယ်တွေနဲ့ ဗုဒ္ဓတွေက ဘာလို့ သတ်ဖြတ်မှုထဲ နစ်မြှုပ်သွားတာလဲ။ စိတ်ဝိညာဉ်အမြစ်ဆေးလုံးဆိုတာ ဘာလဲ။ ပြီးတော့ သူတော်စင်တွေက ဘယ်ရောက်ကုန်တာလဲ။ "
မီလဲ့ဗုဒ္ဓကို မြင်လိုက်ရချိန်တွင် ကျောက်ဖုန်းက မေးခွန်းများစွာ ရှိနေသည်။ မီလဲ့ဗုဒ္ဓက ထိုအကြောင်းများကို ပြောပြမလား မပြောပြဘူးလား သူမသိသော်လည်း မီလဲ့ဗုဒ္ဓက သူမြင်ဖူးသမျှထဲတွင် အစွမ်းထက်ဆုံးထဲမှ တစ်ယောက်ဖြစ်သည်။ ထို့အပြင် သူတို့ကြားတွင် ဘာအငြိုးအတေးမှ မရှိပေ။
" ဒကာတော်က မေတ္တာရှိတယ်။ လူသားဘုံက ဗုဒ္ဓကျောင်းတော်တွေကို မဖျက်ဆီးဘဲ ဗုဒ္ဓတရားတော်တွေကို ထိန်းသိမ်းပေးတယ်။ ဗုဒ္ဓက တကာတော်ကို ကျေးဇူးတင်ကြောင်း ပြောချင်ပါတယ်။ " မီလဲ့ဗုဒ္ဓက ပြုံးပြီး ကျောက်ဖုန်းကို ဗုဒ္ဓနည်းလမ်းအတိုင်း ဦးညွှတ်လိုက်သည်။
၎င်းကို မြင်သောအခါ ကျောက်ဖုန်းက အံ့ဩသွားသည်။ " အနာဂတ်ဗုဒ္ဓဆိုတာ ဗုဒ္ဓတစ်ပါးပဲ။ မီလဲ့ဗုဒ္ဓက လူသားဖြစ်တဲ့ ကျုပ်ကို ဦးညွှတ်တာ တကယ်ကို အံ့ဩစရာပဲ။ "
" သတ္တဝါတွေအားလုံး ဒုက္ခရောက်နေတယ်။ ဗုဒ္ဓတရားတော်က သတ္တဝါအားလုံးကို ဒုက္ခကနေ ကယ်တင်နိုင်တယ်။ ဒါပေမယ့် ကောင်းကင်က ပြောင်းလဲသွားပြီ။ အင်မော်တယ်တွေနဲ့ ဗုဒ္ဓတွေကလည်း ပြောင်းလဲသွားပြီ။ ဗုဒ္ဓက ဘာမှမတတ်နိုင်ဘဲ ကြည့်နေရတယ်။ ဒီနေ့ ဒကာတော်ပြောသလိုပဲ ဗုဒ္ဓဆိုတာ သဘာဝအားဖြင့် ပုံသဏ္ဍန်မရှိဘူး။ နှလုံးသားထဲမှာ ဗုဒ္ဓရှိရင် ဗုဒ္ဓပဲ။ ဗုဒ္ဓတရားတော်တွေက အနှစ်သာရပဲ။ ဒီဦးညွှတ်မှုက စစ်မှန်တဲ့ ဗုဒ္ဓတရားတော်အတွက်ပါ။ ဒကာတော်က စစ်မှန်တဲ့ ဗုဒ္ဓနှလုံးသားကို နားလည်လို့ ဦးညွှတ်တာပါ။ " မီလဲ့ဗုဒ္ဓက ပြုံး၍ ပြောလိုက်သည်။
" ဒါက စစ်မှန်တဲ့ ဗုဒ္ဓပဲ။ သန့်စင်တဲ့ဗုဒ္ဓပဲ။ " ကျောက်ဖုန်းက မီလဲ့ဗုဒ္ဓ၏ လုပ်ရပ်ကို ကြည့်ပြီး စိတ်ထဲတွင် ခံစားချက်တစ်ခု ပေါ်လာသည်။
အင်မော်တယ်ဘုံတွင် အင်မော်တယ်များနှင့် ဗုဒ္ဓများက သတ်ဖြတ်မှုတွင် နစ်မွန်းနေကြသည်။ အကျင့်ပျက်ခြင်းမရှိဘဲ မိမိကိုယ်ကို ထိန်းသိမ်းနိုင်သော အင်မော်တယ်များနှင့် ဗုဒ္ဓများလည်း ရှိနေသည်။ သို့သော် ကောင်းကင်နှင့် မြေကြီး၏ ကြီးမားသော ပြောင်းလဲမှုအောက်တွင် သူတို့က ပုန်းကွယ်နေရုံသာ တတ်နိုင်ကြသည်။
" ဗုဒ္ဓအနေနဲ့ အခု ကျုပ်မေးခွန်းကို ဖြေပေးလို့ရပြီလား။ " ကျောက်ဖုန်း၏ လေသံက နူးညံ့သွားသည်။
" ဒကာတော် မဟာကပ်ဘေးအကြောင်း သိပါသလား။ " မီလဲ့ဗုဒ္ဓက ပြန်မေးလိုက်သည်။
" အတိတ်က နတ်ဘုရားခန့်အပ်ခြင်းက မဟာကပ်ဘေးပဲလေ။ ကျုပ် အဲ့ဒါကို သိပါတယ်။ ဒါပေမယ့် အဲ့ဒါဖြစ်ခဲ့တာ နှစ်ပေါင်းများစွာ ကြာပြီမဟုတ်လား။ အဲ့ဒါက ကောင်းကင်နဲ့ မြေကြီး ပြောင်းလဲသွားတာနဲ့ ဆက်စပ်နေတာလား။ " ကျောက်ဖုန်းက ပြန်ပြောလိုက်သည်။
" ဒကာတော်မှာ ထူးခြားတဲ့ နောက်ခံရှိတာပဲ။ " မီလဲ့ဗုဒ္ဓက ကျောက်ဖုန်းကို အဓိပါယ်ပါပါ ကြည့်ပြီး ပြောလိုက်သည်။ " နတ်ဘုရားခန့်အပ်ခြင်းမဟာကပ်ဘေးပြီးတဲ့နောက်မှာ တာအိုဘိုးဘေးက သူတော်စင်တွေကို အင်မော်တယ်ဘုံကို ဝင်ရောက်ခွင့်မပေးတဲ့အတွက် အင်မော်တယ်ဘုံက နှစ်ပေါင်းများစွာ အေးချမ်းခဲ့တယ်။ ဒါပေမယ့် နှစ်တစ်သိန်းကြာပြီးတဲ့နောက်မှာ ကောင်းကင်အလွန်က သူတော်စင်တွေ ပျောက်ကွယ်သွားတယ်။ အဲ့ဒီနောက် ကောင်းကင်တာအိုက ရှုပ်ထွေးသွားတဲ့အပြင် ကပ်ဘေးချီတွေပေါ်လာပြီး ကောင်းကင်နဲ့မြေကြီးက ပြောင်းလဲသွားခဲ့တယ်။ "
" ဒါက အင်မော်တယ်ဘုံမှာ လက်ရှိဖြစ်ပျက်နေတဲ့ မငြိမ်မသက်မှုတွေ၊ အင်မော်တယ်တွေနဲ့ ဗုဒ္ဓတွေရဲ့ ပြောင်းလဲမှုတွေအတွက် အဓိကအကြောင်းရင်းပဲ။ ဒကာတော်ပြောတဲ့ စိတ်ဝိညာဉ်အမြစ်ဆေးလုံးက ကပ်ဘေးချီကနေ ပုံဖော်ထားတာပဲ။ အဲ့ဒီဆေးလုံးက သတ်ဖြတ်မှုနဲ့ စားသုံးမှုတွေကတစ်ဆင့် ကျင့်ကြံမှုကို သန်မာစေပြီး သက်တမ်းကို ရှည်စေတယ်။ ကပ်ဘေးချီကို ဆေးလုံးအဖြစ်သုံးတာ တကယ်ကို အံ့ဩစရာကောင်းတယ်။ " မီလဲ့ဗုဒ္ဓက ပြုံး၍ ရှင်းပြလိုက်သည်။
" အင်မော်တယ်တွေနဲ့ နတ်ဘုရားတွေရဲ့ သက်တမ်းက နှစ်ပေါင်းသိန်းချီရှိတာကို သူတို့က ဘာလို့သက်တမ်းတိုးဖို့ လိုအပ်တာလဲ။ " ကျောက်ဖုန်းက စိတ်ရှုပ်ထွေးစွာဖြင့် မေးလိုက်သည်။
" ကောင်းကင်နဲ့ မြေကြီး မပြောင်းလဲခင်တုန်းက အဲ့ဒီအတိုင်းပဲ။ ဒါပေမယ့် ကောင်းကင်နဲ့ မြေကြီး ပြောင်းလဲပြီးသွားတဲ့နောက်မှာ နိယာမတွေလည်း ရှုပ်ထွေးသွားတယ်။ ကောင်းကင်တာအိုရဲ့ စွမ်းအားက အားနည်းသွားတဲ့အတွက် အင်မော်တယ်အဆင့်အထက်မှာ ရှိသူတွေရဲ့ သက်တမ်းက ကောင်းကင်နဲ့မြေကြီးရဲ့ နိယာမတွေ ရှင်းလင်းနေတုန်းကလို မဟုတ်တော့ဘူး။ သာမန်အင်မော်တယ်တစ်ယောက်ရဲ့ သက်တမ်းက နှစ်တစ်ထောင်ပဲရှိပြီး ရွှေအင်မော်တယ်အဆင့်ရောက်ရင်တောင် နှစ်တစ်သောင်းမပြည့်တော့ဘူး။ အချိန်၊ သက်တမ်း ဒါတွေက အင်မော်တယ်ဘုံအတွက်တော့ အရမ်းတန်ဖိုးကြီးနေပါပြီ။ " မီလဲ့ဗုဒ္ဓက ဖြည်းညင်းစွာ ပြောလိုက်သည်။
" လူသက်တမ်းနဲ့ အင်မော်တယ်သက်တမ်းဆိုပြီး ကွာခြားချက်ရှိတာပဲ။ " ကျောက်ဖုန်းက အံ့ဩသွားသည်။
" ဒါဆို ကပ်ဘေးချီဆေးလုံးပေါ်လာတာကို ရှင်းပြလို့ရသွားတာပေါ့။ ကပ်ဘေးချီဆေးလုံးက အင်မော်တယ်ဘုံမှာ အဆုံးမရှိတဲ့ သတ်ဖြတ်မှုတွေကို ဖြစ်ပေါ်စေခဲ့တယ်။ ကျင့်ကြံမှုနဲ့ သက်တမ်းကို တိုးမြှင့်ဖို့အတွက် ကပ်ဘေးချီဆေးလုံးကတစ်ဆင့် သန်မာလာအောင်လုပ်ပြီး ကံကြွေးတွေနဲ့ ကိုယ့်ကိုကိုယ် ညစ်ညမ်းအောင် လုပ်နေကြတယ်။ ကောင်းကင်ဘုံနဲ့ ဗုဒ္ဓဂိုဏ်းက ကပ်ဘေးချီဆေးလုံးကို အသုံးမပြုတဲ့သူတွေကို သတ်ဖြတ်ပြီး ဝိညာဉ်အနှစ်သာရကို သိမ်းပိုက်ကြတယ်။ " ရင်ကျန့်က အမှန်တရားကို နားလည်သွားသည်။
" ချင်ဧကရာဇ်က တကယ်ကို ဧကရာဇ်ဖြစ်ဖို့ ထိုက်တန်တာပဲ။ အခြေအနေကို ရှင်းရှင်းလင်းလင်း မြင်နိုင်တယ်။ " မီလဲ့ဗုဒ္ဓက ပြုံး၍ ပြောလိုက်သည်။
" သူတို့က ရှန်းကျိုးကို ဘာလို့ပစ်မှတ်ထားနေကြတာလဲ။ ရှန်းကျိုးမှာ ဘာရှိလို့ သူတို့က ဒီလောက်တောင် လိုချင်နေကြတာလဲ။ " ရင်ကျန့်က မေးလိုက်သည်။
မီလဲ့ဗုဒ္ဓက ပြုံး၍ စကားတစ်ခွန်းသာ ပြန်ဖြေလိုက်သည်။ " လွတ်မြောက်ခြင်းအတွက် အခွင့်အရေး "
ရင်ကျန့်က နားမလည်နိုင်ဖြစ်သွားသည်။ သို့သော် ကျောက်ဖုန်းက ချက်ချင်း နားလည်သွားသည်။ " လူသားတာအိုလား။ "
လူသားတာအို၊ သက်ရှိအားလုံး၏ လမ်းစဉ်။ ကောင်းကင်နှင့်မြေကြီးက ပြောင်းလဲသွားပြီးနောက် ကောင်းကင်တာအိုက ကမ္ဘာကို အုပ်ချုပ်သော စည်းမျဉ်းများ ဆုံးရှုံးသွားပုံရသည်။ မြေကြီးတာအိုက ပုန်းကွယ်နေပြီး သံသရာလမ်းစဉ်ခြောက်သွယ်တွင် ကန့်သတ်ခံထားရသည်။ နောက်ဆုံးတာအိုက လူသားတာအိုဖြစ်သည်။ ၎င်းက သက်ရှိအားလုံး၏ တာအိုဖြစ်သကဲ့သို့ သက်ရှိအားလုံးအတွက် ကယ်တင်ခြင်းလမ်းစဉ်လည်း ဖြစ်သည်။
စစ်မြေပြင်မှ ထာဝရရှင်သန်ခြင်းဆီသို့