အခန်း ၁၀၃၅

အခန်း(၁၀၃၅)

ချင်ယွမ်ဖုန်း ချက်ချင်းထရပ်လိုက်ပြီး "တောင်းပန်ပါတယ် အားလုံးခင်ဗျာ ကျွန်တော် နည်းနည်း မူးနေလို့ အရင်နားလိုက်ပါဦးမယ်" ဟု ပြောလိုက်သည်။

အိုချီဟွာလည်း ထရပ်လိုက်ပြီး "ညီအစ်ကို ချင်ယွမ်ဖုန်း ကျွန်တော် လူတစ်ယောက်လွှတ်ပြီး လိုက်ပို့ခိုင်းလိုက်မယ်လေ" ဟု ဆိုသည်။

"မလိုပါဘူး ကျွန်တော်ဘာသာ ပြန်နိုင်ပါတယ်" ဟု ချင်ယွမ်ဖုန်းက ပြန်ဖြေလိုက်သည်။

ထို့နောက် သူ နန်းတော်ထဲမှ ထွက်ခွာပြီး နေအိမ်သို့ တန်းတန်းမတ်မတ် လျှောက်သွားခဲ့သည်။ ခဏအကြာတွင် အိုယန်ယွန်း ပြေးထွက်လာပြီး ချင်ယွမ်ဖုန်းကို နေအိမ်အထိ လိုက်ပို့ပေးရန် အတင်းတောင်းဆိုလေသည်။

ချင်ယွမ်ဖုန်း ထွက်သွားပြီးနောက် အိုချီဟွာ၏ အကြည့်များ သိသိသာသာ ပြောင်းလဲသွားသည်။ စားပွဲမှာပင် ဆက်ရှိနေသေးသော သားနှစ်ယောက်ကို ကြည့်ကာ နှာခေါင်းရှုံ့လျက် "မင်းတို့ရဲ့ ရည်ရွယ်ချက်ကို ငါ့ဆီကနေ ဖုံးကွယ်ဖို့ မလိုပါဘူး။ ငါ အမှန်အတိုင်း ပြောပြမယ်။ ချင်ယွမ်ဖုန်းရဲ့ ရည်ရွယ်ချက်က ရိုးရှင်းတာ မဟုတ်ဘူး။ သူ့ကို မိတ်ဖွဲ့ဖို့တောင် စိတ်မကူးနဲ့။ မဟုတ်ရင် ငါတို့ မိသားစုအတွက် ပြဿနာတွေပဲ အဆုံးမသတ်ဘဲ ရောက်လာလိမ့်မယ်" ဟု ပြောလိုက်သည်။

သားအစ်ကိုနှစ်ယောက်မှာ စားပွဲတွင် အရက်အတော်အတန် သောက်ထားကြသော်လည်း အိုချီဟွာ၏ စကားကြောင့် ချက်ချင်းပင် သတိဝင်သွားကြသည်။ ချင်ယွမ်ဖုန်းကို မိတ်ဖွဲ့ရန် သို့မဟုတ် စည်းရုံးရန် သူတို့၏ ဆန္ဒကို ဖခင်ဖြစ်သူက ကြိုတင်မြင်နေခဲ့ခြင်း ဖြစ်သည်။

ထို့ပြင် ဖခင်ဖြစ်သူ၏ နောက်ဆုံးစကားက သူတို့နှစ်ယောက်လုံးကို အတွေးနက်စေသည်။ ဤချင်ယွမ်ဖုန်းက အိုမိသားစုအတွက် တကယ်ပဲ ပြဿနာတွေ ယူဆောင်လာနိုင်မလား။

---

ထိုအချိန်တွင် ချင်ယွမ်ဖုန်း နေအိမ်သို့ ပြန်ရောက်နေပြီဖြစ်သည်။

"သခင်လေး ပြန်လာပြီလား" လျန်ဟွာက တံခါးဝတွင် စောင့်နေသည်။ သူ့ကို မြင်သည်နှင့် အလျင်အမြန် တံခါးဖွင့်ပေးပြီး အခန်းထဲအထိ လိုက်လာသည်။

အရက်ရှိန်ကြောင့် ချင်ယွမ်ဖုန်း သူမကို ကြည့်လိုက်ရာ ယောကျာ်းသားတို့ အကြည့်မလွှဲနိုင်လောက်အောင် ဆွဲဆောင်မှု ရှိနေသည်ကို တွေ့ရသည်။ သူမ၏ စွဲမက်ဖွယ်ကောင်းသော ခန္ဓာကိုယ်ကလည်း တပ်မက်မှုကို ပိုမိုနှိုးဆွစေသည်။

သို့သော် ချင်ယွမ်ဖုန်းတွင် မိသားစု ရှိနှင့်ပြီးဖြစ်ရာ ထို့ထက်ပိုသော အတွေးများကို မတွေးတော့ပေ။ သူက သူမကို "နင် အရင်သွားတော့။ ပြီးတော့ နောက်တစ်ခါ ငါ မရှိတဲ့အခါ နင်ဘာသာ နင် အလုပ်လုပ်နေလိုက်ပါ။ ငါ့ကို ပြန်လာစောင့်နေဖို့ မလိုဘူး" ဟု ပြောလိုက်သည်။

"ပြီးတော့ နင်က ငါ့ဆီကို တခြားသူတစ်ယောက်ယောက်က ပို့လိုက်တာ ဖြစ်ပေမဲ့ သူတို့ရဲ့ ရည်ရွယ်ချက်တွေကို ငါ အသေးစိတ် မပြောတော့ဘူး။ ဒါပဲ ပြောလိုက်မယ် ငါ့မှာ မိသားစု ရှိနှင့်ပြီးသားမို့ နင် ကိုယ့်ကိုယ်ကိုယ်ပဲ တန်ဖိုးထားဖို့ မျှော်လင့်တယ်"

သူမ ခဏမျှ ကြောင်သွားပြီးမှ ပြုံးလျက် "လျန်ဟွာ နားလည်ပါတယ်" ဟု ဆိုသည်။

ချင်ယွမ်ဖုန်း ခေါင်းညိတ်ပြီး "သွားတော့" ဟု ပြောလိုက်သည်။

သူမ ထွက်သွားပြီး အခန်းတံခါးကို ပိတ်လိုက်သည့်အခါ ချင်ယွမ်ဖုန်း အခန်းထဲတွင် တစ်ယောက်တည်း ကျန်ခဲ့သည်။ သူ ကိုယ်ခန္ဓာထဲမှ အရက်ရှိန်ကို ဖယ်ထုတ်လိုက်ပြီး လက်ချောင်းကို ခပ်ဖြည်းဖြည်း လှုပ်ရှားလိုက်ရာ လက်ဖျားမှ ဓားအရှိန်အဝါ တစ်ချက် ထွက်ပေါ်လာသည်။

ထိုဓားအရှိန်အဝါက ပေါ်လိုက် ပျောက်လိုက်နှင့် ဝဲလိုက် ယာလိုက် ဖြစ်နေသဖြင့် မည်သည့်နေရာမှ ထွက်လာမှန်း ခန့်မှန်းရ ခက်ခဲသည်။

သို့သော် ဤသည်မှာ ထိုက်ရွှီဓားသိုင်း ဖြစ်ကြောင်း ချင်ယွမ်ဖုန်းသာ သိသည်။ ၎င်းသည် မည်သို့မျှ ခန့်မှန်း၍ မရနိုင်ပေ။ ချင်ယွမ်ဖုန်း လက်ချောင်းကို တစ်ချက်ယမ်းလိုက်သည်နှင့် ဓားအရှိန်အဝါများက သူ့ပတ်လည်တွင် လည်ပတ်သွားပြီးနောက် တဝီဝီမြည်နေသော မုန်တိုင်းတစ်ခုအဖြစ် ပြောင်းလဲသွားကာ ချင်ယွမ်ဖုန်းကို လုံးဝ ဖုံးအုပ်သွားသည်။ တစ်ခန်းလုံးလည်း ချွန်မြသော အရှိန်အဝါများဖြင့် ပြည့်နှက်သွားသည်။

ဓားအရှိန်အဝါများက နေရာအနှံ့အပြား ရောက်ရှိနေသည့်နှယ်ပင်။

ဓားအရှိန်အဝါများက အခန်း၏ အစီအရင်ကိုပင် ဖောက်ထွက်ပြီး အပြင်ဘက်အထိ ရောက်ရှိသွားသည်။ အပြင်ဘက်မှ အစောင့်များမှာလည်း မရည်ရွယ်ဘဲ တုန်ယင်သွားကြပြီး ချင်ယွမ်ဖုန်း၏ အခန်းထဲမှ ဤမျှ ပြင်းထန်သော ဓားအရှိန်အဝါမျိုး ထွက်ပေါ်လာလိမ့်မည်ဟု မထင်မှတ်ထားသဖြင့် အံ့အားသင့်စွာ ကြည့်နေကြသည်။

---

ဤကာလအတွင်း ချင်ယွမ်ဖုန်းသည် နတ်ဘုရားဝိညာဉ်စွမ်းအင်ကို ကျင့်ကြံရင်း ဓားအရှိန်အဝါကိုလည်း တစ်ပြိုင်နက် ကျင့်ကြံနေသဖြင့် အတော်လေး သက်သောင့်သက်သာ ရှိနေသည်။ တစ်ချိန်တည်းမှာပင် သူသည် ကုဇေကြယ်၏ တည်ဆောက်ပုံနှင့် နတ်ဘုရားနယ်ပယ် တစ်ခုလုံးအကြောင်းကို စုံစမ်းရန် စတင်ခဲ့သည်။

သို့သော် ကုဇေကြယ်ပေါ်ရှိ လူများမှာ ပြင်ပကမ္ဘာနှင့် အဆက်အသွယ်နည်းပါးသဖြင့် နတ်ဘုရားနယ်ပယ် တစ်ခုလုံး၏ အခြေအနေကို သိပ်မသိကြပေ။ သို့ရာတွင် ယင်းက ချင်ယွမ်ဖုန်းကို ကုဇေကြယ်၏ အခြေအနေကို ရှင်းရှင်းလင်းလင်း မြင်နိုင်စေသည်။

လက်ရှိတွင် ကုဇေကြယ်ကို အိုချီဟွာတစ်ယောက်တည်းက အဓိက ထိန်းချုပ်ထားသည်။ ဤနေရာရှိ ဝိညာဉ်သတ္တုတွင်း အရင်းအမြစ်များမှာ အတော်လေး ကောင်းမွန်သော်လည်း ၎င်းတို့အားလုံး အိုချီဟွာ၏ လက်ထဲသို့ ရောက်ရှိသွားပြီး သူကသာ အကျိုးအမြတ်များကို ခွဲဝေပေးသည်။

ထို့ပြင် ကုဇေကြယ်၏ နောက်ထပ် ဝင်ငွေအရင်းအမြစ် တစ်ခုမှာ ဤနေရာသို့ စီးပွားရေးလုပ်ရန် ခရီးသွားလာကြသူများ ဖြစ်သည်။ သူတို့ကလည်း ဤနေရာတွင် စီးပွားရေး လှုပ်ရှားမှုများစွာကို လှုံ့ဆော်ပေးနေပြီး အိုချီဟွာ၏ ကုန်သည်များအပေါ် ကောက်ခံသော အခွန်မှာလည်း သင့်တင့်မျှတကာ ကုန်သွယ်မှုဆိုင်ရာ မူဝါဒများမှာလည်း ပွင့်လင်းသဖြင့် လူအများအပြား ကုဇေကြယ်သို့ စီးပွားရေးလုပ်ရန် လာလိုကြသည်။

ထို့အပြင် အိုချီဟွာတွင် သူ၏ ကိုယ်ပိုင် သိုင်းပညာရှင် တပ်မတော်သာမက သူ့အနီးတွင်လည်း ကျွမ်းကျင်သူများစွာ ရှိနေသည်။ သူ၏ နီးကပ်သော အစောင့်အချို့မှာ အခြေခံအားဖြင့် ဘုရင်နယ်ပယ် သို့မဟုတ် ထိုထက် မြင့်မားသည့်အဆင့်တွင် ရှိကြသည်။ ယမမင်းမျိုးနွယ်စုမှ သိုင်းပညာရှင်တစ်ယောက်က သူ့ကို လုပ်ကြံရန် ကြိုးပမ်းနိုင်ခဲ့ခြင်းသည် သူတို့တွင် စွမ်းရည်အချို့ ရှိကြောင်း ပြသနေသည်။

---

နောက်ထပ် ရက်အနည်းငယ် ကြာသွားသည်။

ချင်ယွမ်ဖုန်း သတင်းစကား တစ်ခု ရရှိခဲ့ပြီး ၎င်းကို အကိုနဂါးက ပြန်လည် ပေးပို့လာခြင်း ဖြစ်သည်။ သို့သော် ခရီးဝေးလွန်း၍ ဖြစ်မည် အကိုနဂါး၏ သတင်းစကား အများစုမှာ ပျောက်ဆုံးသွားခဲ့သည်။ ချင်ယွမ်ဖုန်းလည်း တခြားကိစ္စ မရှိပါက ပြန်လာပြီး မျက်နှာချင်းဆိုင် ပြောရန် တိုက်ရိုက် မှာကြားလိုက်သည်။

ထို့ကြောင့် မကြာမီမှာပင် အကိုနဂါးက ချင်ယွမ်ဖုန်း၏ ဘေးတွင် ရောက်ရှိလာသည်။ ပြန်ဆုံကြချိန်တွင် အကိုနဂါး၏ ကျင့်ကြံခြင်းအဆင့်လည်း တိုးတက်လာသည်ကို ချင်ယွမ်ဖုန်း သတိပြုမိသည်။ သူ နတ်ဘုရားနယ်ပယ်သို့ ရောက်ရှိလာသောအခါ နတ်ဘုရားဝိညာဉ်စွမ်းအင်ကို ပြန်လည် ကျင့်ကြံရမည်ကို သဘောပေါက်သွားပုံရပြီး ပိဖူကျန့်ကလည်း သူ့ကို သင်ပေးခဲ့ပုံရသည်။

"သတင်း ရရှိလား" ဟု ချင်ယွမ်ဖုန်း မေးလိုက်သည်။

အကိုနဂါးက ခေါင်းညိတ်ပြီး "ရတာပေါ့။ ဒီကာလအတွင်းငါတို့ တခြားနေရာတွေမှာ စုံစမ်းခဲ့ရာမှာ ယမမင်းမျိုးနွယ်စုက တခြား လျှို့ဝှက်စစ်ဆင်ရေးတွေ လုပ်ဆောင်နေတာကို တွေ့ရှိခဲ့ရတယ်" ဟု ပြောသည်။

"အို ဘာလို လျှို့ဝှက်စစ်ဆင်ရေးမျိုးလဲ" ဟု ချင်ယွမ်ဖုန်း မေးလိုက်သည်။ ယမမင်းမျိုးနွယ်စု၏ အိုချီဟွာအပေါ် လုပ်ကြံမှုကို ကြုံတွေ့ပြီးခါစ ဖြစ်သဖြင့် ချင်ယွမ်ဖုန်းက ဤလူများ တခြား ဘာတွေ လုပ်နေသလဲဆိုသည်ကို သိလိုစိတ် ရှိနေသည်။

အကိုနဂါး ခေါင်းခါလျက် "အဲဒါနဲ့ ပတ်သက်ပြီးတော့ သေချာတဲ့ သတင်းတော့ မရသေးဘူး။ ဒါပေမဲ့ ပိဖူကျန့်နဲ့ ကျွမ်ယွမ်တို့ကတော့ နောက်ယောင်ခံ လိုက်စုံစမ်းနေကြပြီ" ဟု ဆိုသည်။

"အင်း"

ချင်ယွမ်ဖုန်း ခေါင်းညိတ်လိုက်သည်။ ထိုနှစ်ယောက် ပါဝင် စုံစမ်းနေသည်ဆိုမှတော့ ပြဿနာ မရှိနိုင်ပေ။ ပထမအချက်အနေဖြင့် ပိဖူကျန့်က ယမမင်းမျိုးနွယ်စုနှင့် အတော်လေး ရင်းနှီးပြီး ဒုတိယအချက်အနေဖြင့် ကျွမ်ယွမ်၏ စိတ်နေသဘောထားမှာ အစဉ်အမြဲ တည်ငြိမ်မှုဖြင့် ကျော်ကြားသည်။ ထိုနှစ်ယောက် ပူးပေါင်း စုံစမ်းမည်ဆိုပါက ရလဒ်များ မြန်မြန်ရရှိသင့်သည်။

"ငါ သူတို့နောက်ကို လောလောဆယ် မလိုက်တော့ဖို့ ဆုံးဖြတ်ထားတယ်" ဟု အကိုနဂါး ရုတ်တရက် ပြောလာသည်။

ချင်ယွမ်ဖုန်း စိတ်ဝင်တစား မေးလိုက်သည် "ဘာလို့လဲ"

"ငါ တစ်ယောက်တည်း နေတာကိုပဲ ကျင့်သားရနေတာ။ သူတို့နောက် လိုက်ရတာ နည်းနည်း ချုပ်ချယ်သလို ခံစားရတယ်" ဟု ပြောသည်။

ချင်ယွမ်ဖုန်း ပြုံးလိုက်သည်။ အကယ်၍ ထိုသို့သာ ဖြစ်ပါက သူလည်း ဘာမှ လုပ်၍ မရပေ။ သူ သွားချင်သည့်နေရာ သွားနိုင်သည်မို့ "မင်းက သဘာဝအတိုင်း လွတ်လပ်သူပဲ။ သွားချင်တဲ့နေရာကို သွားပါ။ ကံကြမ္မာ အဆင်သင့်ရင် ပြန်ဆုံကြတာပေါ့" ဟု ဆိုသည်။

"ငါ ထွက်သွားမယ်လို့ မပြောပါဘူး" ဟု အကိုနဂါးက ပြောလိုက်သည်။ "ငါခဏတော့ သခင်လေးနောက် လိုက်ဦးမယ်။ ဘယ်လိုပဲဖြစ်ဖြစ် သူတို့နှစ်ယောက်နောက် လိုက်ရတာထက် သခင်လေးနောက် လိုက်ရတာ ပိုစိတ်ဝင်စားဖို့ ကောင်းဦးမယ်။ သူတို့နောက် လိုက်ရတာ အရမ်း ပျင်းစရာ ကောင်းတယ်"

ချင်ယွမ်ဖုန်း တစ်ဖန် ပြုံးလိုက်သည်။

အကိုနဂါး ပြောသည်မှာ မှန်သည်။ ပိဖူကျန့်နှင့် ကျွမ်ယွမ်တို့မှာ နှစ်ယောက်လုံး စိတ်ထား တည်ငြိမ်သူများ ဖြစ်ပြီး သိပ်ပြီး တက်ကြွလှုပ်ရှားမှု မရှိကြသော်လည်းအကိုနဂါးကမူ လွတ်လပ်မှုကို နှစ်သက်သူ ဖြစ်သည်။ သူတို့၏ စိတ်နေသဘောထားများမှာ ကွဲပြားခြားနားကြသည်။ သူက ဘေးတွင် နေလိုသည်ဟု ဆိုသဖြင့် ချင်ယွမ်ဖုန်းလည်း သဘာဝအတိုင်းပင် ကန့်ကွက်စရာ မရှိချေ။

"သခင်လေး လက်ဖက်ရည် သောက်ပါဦး"

စကားပြောနေစဉ် လျန်ဟွာက လက်ဖက်ရည်ခွက်ကို ကိုင်ကာ ခြေလှမ်း ပေါ့ပါးစွာဖြင့် ဝင်လာသည်။ အခန်းထဲတွင် လူတစ်ယောက် ထပ်တိုးနေသည်ကို မြင်ရသဖြင့် ခဏတာ အံ့အားသင့်သွားသည်။

ထိုအချိန်တွင် အကိုနဂါးလည်း လှပသော လျန်ဟွာကို သတိပြုမိသွားပြီး မျက်လုံးများ ပြူးကျယ်သွားတော့သည်။