အခန်း ၂၉၅

အခန်း (၂၉၅) ကျန်းမိသားစု၏ ပူးပေါင်းဆောင်ရွက်မှုက ပြဿနာသေးသေးလေး တစ်ခုသာဖြစ်သည်

ဤထိပ်တန်းအဆင့် အင်မော်တယ်ကျောက်တုံး ငါးသောင်းက အဝတ်မပါသည့် အလှမယ်တစ်ဦးနှင့် တူလှပေ၏။ ချမ်ချန်ကန်း၏ ရှေ့မှောက်တွင် သူ့အနေဖြင့် မည်သို့လုပ် ငြင်းပယ်နိုင်ပါမည်နည်း။ အင်မော်တယ်ကျောက်တုံးများ ရှိနေပါလျက်နှင့် ငြင်းပယ်လျှင် သူသည် လူမိုက်တစ်ဦးသာ ဖြစ်ပေလိမ့်မည်။

"ကျန်းသခင်မလေး... မင်းတို့ကျန်းမိသားစုက တော်တော် သဘောထားကြီးတာပဲ... ကျူးယန်အင်မော်တယ်သစ်သီးတင် မကပါဘူး... မင်းကျန်းမိသားစုက လိုအပ်သေးတယ်ဆိုရင် ငါ့ဆီမှာ အများကြီး ရှိပါသေးတယ်..."

အစကတည်းက စိုက်ပျိုးထားခဲ့သည့် ကျူးယန်အင်မော်တယ်သစ်ပင်က ယခုတိုင် ဖေးရှန့်တောင်ပေါ်တွင် ရှင်သန်ကြီးထွားနေဆဲဖြစ်ပြီး ကျူးယန်အင်မော်တယ်သစ်သီးများ ဝေဆာစွာ သီးပွင့်နေလေ၏။ လင်းပေါင်အာနှင့် အမြီးလေးတို့မှာ ထိုအသီးများကို စားရလွန်း၍ ကြာမြင့်စွာကတည်းကပင် ငြီးငွေ့နေခဲ့ကြပြီ ဖြစ်သည်။

သူက စိတ်ထဲမှ တစ်ချက် တွေးတောလိုက်၏။ ကျူးယန်အင်မော်တယ်သစ်ပင်ပေါ်မှ ကျူးယန်အင်မော်တယ်သစ်သီးများက ကျန်းယုချန်၏ ရှေ့မှောက်တွင် ပေါ်လာတော့သည်။ ထို့နောက် မြေပြင်ပေါ်သို့ ဘုန်းခနဲ ပြုတ်ကျလာပြီး အပုံလိုက် ဖြစ်သွားလေ၏။

အရေအတွက်မှာ ရာနှင့်ချီ၍ ရှိနေသည်ဟု ဆိုရပေမည်။ ကျန်းယုချန်မှာ တစ်ခဏမျှ အင်တင်တင် ဖြစ်သွားတော့သည်။

ကျူးယန်အင်မော်တယ်သစ်သီးအတွက် ချမ်ချန်ကန်းကို ကျေးဇူးတင်ကြောင်း သူမပြောခဲ့သည့် စကားမှာ ယဉ်ကျေးမှုအရ ပြောလိုက်ခြင်းသာ ဖြစ်ပေ၏။ ချမ်ချန်ကန်းက တကယ်အတည်မှတ်ယူသွားလိမ့်မည်ဟု သူမ ထင်မှတ်မထားခဲ့ပေ။ ထို့ပြင် သူမကို ကျူးယန်အင်မော်တယ်သစ်သီး တစ်ပုံတစ်ပင်ကြီးပင် ထပ်ပေးလိုက်သေးသည်။

ဘေးဘက်တွင် မိန်နျင်က ပိုင်ယွဲ့အား ကျန်းယုချန်အကြောင်းကို ပြောပြပြီးပြီ ဖြစ်၏။ ပိုင်ယွဲ့က အနည်းငယ် ပြုံးလိုက်သည်။

"ကျန်းမိသားစုက ဟွမ်ဖူအင်မော်တယ်မိသားစုနဲ့ ယှဉ်ပြိုင်ချင်နေမှတော့ ယှဉ်ပြိုင်ပါစေပေါ့... ဆရာ့အတွက် အကျိုးရှိသရွေ့ပေါ့..."

အထူးသဖြင့် ယခုအချိန်တွင် ချမ်ချန်ကန်းထံ၌ အင်မော်တယ်ကျောက်တုံးများ အလွန် လိုအပ်နေပုံရကြောင်း ပိုင်ယွဲ့ သိထားလေ၏။ မည်သည့်နေရာတွင် သုံးရန်အတွက်မှန်း မသိသော်လည်း ဟွမ်ဖူအင်မော်တယ်မိသားစုမှ ထောက်ပံ့ပေးနိုင်သည့် အင်မော်တယ်ကျောက်တုံးများကလည်း ကန့်သတ်ချက် ရှိနေသည်။ ထို့ပြင် ကျန်းမိသားစုကလည်း အင်မော်တယ်သတ္တုတွင်းကြီးများကို ပိုင်ဆိုင်သည့် မိသားစုကြီးဖြစ်ပြီး သူတို့၏ အင်မော်တယ်ကျောက်တုံး နောက်ခံ အင်အားက ပို၍ပင် တောင့်တင်းခိုင်မာပေသည်။ ထို့ကြောင့် ကျန်းမိသားစုက ဆရာ့ကို အင်မော်တယ်ကျောက်တုံးများ ထောက်ပံ့ပေးနိုင်မည်ဆိုလျှင် ပိုင်ယွဲ့အနေဖြင့်လည်း အလွန် ဝမ်းသာမိမည် ဖြစ်၏။

"ကျန်းသခင်မလေး... အရမ်း အားနာမနေပါနဲ့... ဒီအင်မော်တယ်သစ်သီးတွေကို လက်ခံလိုက်ပါ... မင်းရဲ့ အလှတရား ထာဝရ တည်တံ့နေဖို့အတွက် ထမင်းမစားခင် တစ်လုံး၊ ထမင်းစားပြီး တစ်လုံး စားပေးလို့ ရတယ်..."

"ကျန်းသခင်မလေးက မပျော်ဘူးဆိုရင်လည်း အင်း... နည်းနည်းလောက် ထပ်ပြီး စဉ်းစားပေးလို့ ရပါတယ်... ထိပ်တန်းအဆင့် အင်မော်တယ်ကျောက်တုံး ငါးသောင်း ဒါမှမဟုတ် တစ်သိန်းလောက် ဆိုရင်လည်း မဖြစ်နိုင်စရာ မရှိပါဘူး..."

ချမ်ချန်ကန်းက ရယ်မောလိုက်၏။

ထို့နောက် ကျန်းယုချန်မှာ ချမ်ချန်ကန်း၏ စကားကို ကြားပြီး ဆွံ့အသွားတော့သည်။ ကျန်းမိသားစုက အင်မော်တယ်သတ္တုတွင်းကြီးများ ပိုင်ဆိုင်ထားပြီး ကြွယ်ဝသည့် အမွေအနှစ်များ ရှိသော်လည်း အင်မော်တယ်များစွာကိုလည်း မွေးမြူထားရပေသည်။ ထိပ်တန်းအဆင့် အင်မော်တယ်ကျောက်တုံး ငါးသောင်းကို ထုတ်ပေးနိုင်ခြင်းကပင် ကျန်းမိသားစု၏ စေတနာကို ကိုယ်စားပြုရန် လုံလောက်နေပြီ ဖြစ်၏။ နောက်ထပ် ငါးသောင်း သို့မဟုတ် တစ်သိန်းဆိုလျှင် ကျန်းမိသားစုက တတ်နိုင်သေးသော်လည်း အနာဂတ်တွင် အခြားအရာများကို တိုးတက်အောင် လုပ်ဆောင်ရန် နည်းလမ်း ရှိတော့မည် မဟုတ်ပေ။

ထိုနည်းတူစွာပင် ကျန်းမိသားစု၏ အထက်အောက် နေရာတိုင်းတွင် အင်မော်တယ်ကျောက်တုံးများ အသုံးပြုရန် လိုအပ်သည့် နေရာများစွာ ရှိနေလေသည်။ ကျန်းမိသားစုကလည်း သေချာစွာ စဉ်းစားသုံးသပ်ပြီးနောက်မှ ထိပ်တန်းအဆင့် အင်မော်တယ်ကျောက်တုံး ငါးသောင်းကို ပေးပို့ရန် ဆုံးဖြတ်ခဲ့ခြင်း ဖြစ်၏။

"စီနီယာ... ကျွန်မကို ခွင့်လွှတ်ပေးပါ... ကျွန်မက အလျင်စလို လာခဲ့ရတော့ လုံလုံလောက်လောက် ပြင်ဆင်မလာနိုင်ခဲ့ဘူး... ထိပ်တန်းအဆင့် အင်မော်တယ်ကျောက်တုံး ငါးသောင်းပဲ ယူလာခဲ့ရတယ်... အကယ်၍ စီနီယာက မလုံလောက်ဘူးလို့ထင်ရင် ကျွန်မ ကျန်းမိသားစုဆီ ပြန်ရောက်တဲ့အခါ မိသားစုကို ထပ်ပြီး ပြင်ဆင်ခိုင်းပါ့မယ်..."

ချမ်ချန်ကန်းမှာ တကယ့်ကို အံ့အားသင့်သွားခဲ့သည်။ ဤကျန်းယုချန်က တကယ့်ကို သူဌေးမလေးပင် ဖြစ်၏။ ထိပ်တန်းအဆင့် အင်မော်တယ်ကျောက်တုံးများ၏ တန်ဖိုးကြီးမားမှုက အင်မော်တယ်သတ္တုတွင်းများမှ အလွယ်တကူ တူးဖော်ရရှိနိုင်သောအရာ မဟုတ်ကြောင်းကို သူ သိထားပေသည်။ ထိပ်တန်းအဆင့် အင်မော်တယ်ကျောက်တုံး သောင်းချီ၍ အလွယ်တကူ ထုတ်ပေးနိုင်သော ဤကျန်းမိသားစုက တကယ့်ကို ချမ်းသာကြွယ်ဝပြီး အင်အားကြီးမားလှပေ၏။

သေချာသည်မှာ ချမ်ချန်ကန်းအနေဖြင့် သဘောတူ ခေါင်းညိတ်ရန်အတွက် ထိုမျှလောက် အရှက်မရှိသည့်သူ မဟုတ်ပေ။ မည်သို့ပင်ဆိုစေ ယခု သူက ထိပ်တန်းအဆင့် အင်မော်တယ်ကျောက်တုံး ငါးသောင်းကို ရရှိထားပြီဖြစ်ရာ လဲလှယ်ရရှိမည့် နယ်မြေတန်ဖိုးက မှန်းဆ၍ပင် မရနိုင်ချေ။ သူက အလွန် ကျေနပ်အားရနေဆဲပင် ဖြစ်၏။

"ပြောကြတာပေါ့... ထိပ်တန်းအဆင့် အင်မော်တယ်ကျောက်တုံး ငါးသောင်းက နည်းတဲ့ အရေအတွက် မဟုတ်ဘူး... ဒီတစ်ခေါက် ကျန်းသခင်မလေး အထူးတလည် လာရောက်ရတဲ့ အဓိက ရည်ရွယ်ချက်က ဘာများလဲ..."

အင်မော်တယ်ကျောက်တုံး ငါးသောင်းကို ရရှိထားသဖြင့် ချမ်ချန်ကန်းမှာ စိတ်အခြေအနေ ကောင်းမွန်နေလေသည်။ သူက လိုရင်းကိုသာ တိုက်ရိုက်မေးလိုက်၏။ မည်သို့ပင်ဆိုစေ သူက စကားကို လှည့်ပတ်ပြောဆိုနေခြင်းများကို မနှစ်သက်ပေ။ ပြောစရာရှိသည်ကို တည့်သာပြောရန် ဖြစ်သည်။

ကျန်းယုချန်က မိန်နျင်နှင့် ပိုင်ယွဲ့ကို တစ်ချက် ကြည့်လိုက်သည်။ ထို့နောက် ရိုသေလေးစားစွာဖြင့် ပြောလိုက်၏။

"စီနီယာ... စီနီယာက ဟွမ်ဖူအင်မော်တယ်မိသားစုနဲ့ ပူးပေါင်းဆောင်ရွက်ဖို့ သဘောတူညီခဲ့ပြီး ထိပ်တန်းအဆင့် တာအိုစည်းချက် ပစ္စည်းတစ်သုတ်ကို ထုတ်ရောင်းပေးလိုက်တယ်ဆိုတာ ရွှယ်ဝူအင်မော်တယ်နယ်မြေမှာ ကျွန်မ ကြားခဲ့ရပါတယ်..."

ချမ်ချန်ကန်းက ခေါင်းညိတ်လိုက်သည်။

"အဲ့ဒါ အမှန်ပဲ..."

"ဒါဆို မင်းတို့ကျန်းမိသားစုကလည်း ထိပ်တန်းအဆင့် တာအိုစည်းချက် ပစ္စည်းအတွက် လာတာပေါ့..."

"ဟုတ်ပါတယ် စီနီယာ... ကျန်းမိသားစုကလည်း စီနီယာနဲ့ ပူးပေါင်းဆောင်ရွက်ဖို့ မျှော်လင့်နေပါတယ်... စီနီယာအနေနဲ့ အင်မော်တယ်ကျောက်တုံး ဘယ်လောက်လိုအပ်လဲဆိုတာ ကျွန်မ မသိပေမဲ့လေ..."

"ဒါပေမဲ့ ကျန်းမိသားစုက စီနီယာ စိတ်ကျေနပ်အောင် သေချာပေါက် ကြိုးစားပေးပါ့မယ်... စီနီယာအနေနဲ့ ကျန်းမိသားစုကိုလည်း ထည့်သွင်းစဉ်းစားပေးဖို့ မျှော်လင့်ပါတယ်..."

ကျန်းယုချန်က တုံ့ဆိုင်းဆိုင်းနှင့် ရိုသေလေးစားစွာ ပြန်ဖြေလိုက်ရင်း ပို၍ပင် စိုးရိမ်တကြီး ဖြစ်လာတော့သည်။ မည်သို့ပင်ဆိုစေ ချမ်ချန်ကန်းက သဘောတူမည်လား၊ မတူဘူးလား ဆိုသည်ကို သူမ မသိပေ။

အထူးသဖြင့် ပိုင်ယွဲ့နှင့် မိန်နျင်တို့က ချမ်ချန်ကန်း၏ ဘေးတွင် နေထိုင်ပြီး အလွန်ကောင်းမွန်သည့် ဆက်ဆံရေး ရှိနေပုံရကြောင်းကို တွေ့မြင်ပြီးနောက်တွင် ပို၍ပင် ဆိုးရွားလေ၏။ ကျန်းမိသားစုဘက်တွင်မူ ချမ်ချန်ကန်းနှင့် မည်သို့မျှ ပတ်သက်မှု မရှိခဲ့ချေ။ အင်မော်တယ်ကျောက်တုံးများမှလွဲ၍ ကျန်းမိသားစုမှာ ရှောင်လွှဲ၍မရသော ရှုံးနိမ့်မည့် အခြေအနေတွင် ရှိနေပေသည်။

ကျန်းယုချန်ကို အနည်းငယ် ကံကောင်းသည်ဟု ခံစားရစေသည့် တစ်ခုတည်းသောအရာမှာ ထိုအရာပင် ဖြစ်၏။ ချမ်ချန်ကန်းက သူမ၏ ကျန်းမိသားစုထံမှ ထိပ်တန်းအဆင့် အင်မော်တယ်ကျောက်တုံး ငါးသောင်းကို လက်ခံခဲ့လေသည်။

ထိုသို့ဆိုလျှင်။ အနည်းဆုံးတော့ မျှော်လင့်ချက် ရောင်ခြည်လေးတစ်ပွင့် ရှိနေပေသေးသည်။ ချမ်ချန်ကန်းက သဘောမတူခဲ့လျှင်ပင်။ သို့သော်လည်း ထိပ်တန်းအဆင့် အင်မော်တယ်ကျောက်တုံး ငါးသောင်းကို ပေးပို့ခဲ့ပြီး သူတို့က ချမ်ချန်ကန်းနှင့် ကောင်းမွန်သည့် ဆက်ဆံရေးတစ်ခုကို တည်ဆောက်နိုင်ခဲ့ပြီ ဖြစ်၏။

အနာဂတ်တွင် သူက ပြန်လည်အင်အားကြီးမားလာပြီး အင်မော်တယ်နယ်မြေ တစ်သောင်းဆီသို့ ပြန်လည်ရောက်ရှိလာမည့် အချိန်အထိ စောင့်ဆိုင်းရမည်ဖြစ်သည်။ တစ်ခါတစ်ရံတွင် ချမ်ချန်ကန်းက ဤထိပ်တန်းအဆင့် အင်မော်တယ်ကျောက်တုံး ငါးသောင်း၏ မျက်နှာကြောင့် ကျန်းမိသားစုကို လွှတ်ပေးကောင်း လွှတ်ပေးနိုင်ပေလိမ့်မည်။ ကျန်းယုချန်မှာ အတော်လေး ဂနာမငြိမ် ဖြစ်နေတော့သည်။

သို့သော်လည်း ချမ်ချန်ကန်းက အနည်းငယ် ပြုံး၍ ပြောလိုက်သည်ကို သူမ တွေ့လိုက်ရ၏။

"ကျန်းသခင်မလေး... မင်းတို့ကျန်းမိသားစုက တကယ့်ကို စေတနာ အပြည့်ပါပဲ... ဒါပေမဲ့ အဲ့ဒါက သာမန်တာအိုစည်းချက် ပစ္စည်းတစ်ခုပဲလေ... ကျန်းမိသားစုက ငါနဲ့ ပူးပေါင်းဆောင်ရွက်ချင်တယ် ဆိုရင်လည်း ငါက သဘာဝကျကျ သဘောတူရမှာပေါ့..."

ချမ်ချန်ကန်း၏ စကားထွက်ပေါ်လာသည်နှင့် တစ်ပြိုင်နက် ကျန်းယုချန်မှာ အလွန် ဝမ်းသာသွားပြီး ပို၍ပင် စိတ်သက်သာရာ ရသွားတော့သည်။

"ကျေးဇူးတင်ပါတယ် စီနီယာ..."

ထို့နောက် ကျန်းယုချန်က ပိုင်ယွဲ့နှင့် မိန်နျင်တို့ကို တစ်ချက်ပြန်ကြည့်လိုက်ပြီး တစ်ခဏမျှ တုံ့ဆိုင်းသွားကာ အနည်းငယ် ရှက်ရွံ့စွာဖြင့် ပြောလိုက်၏။

"စီနီယာ... ကျန်းမိသားစုက ထိပ်တန်းအဆင့် တာအိုစည်းချက် ပစ္စည်းတွေကို အများကြီး လိုအပ်နေပါတယ်... ဒါပေမဲ့ စီနီယာက ဟွမ်ဖူအင်မော်တယ်မိသားစုနဲ့ ပူးပေါင်းဆောင်ရွက်ဖို့ သဘောတူထားပြီးသား ဆိုတော့..."

"အင်း... ဒါက ပြဿနာသေးသေးလေး တစ်ခုပါပဲ... ငါ့လက်ထဲမှာ ထိပ်တန်းအဆင့် တာအိုစည်းချက်ပစ္စည်းတွေ အများကြီး ရှိပါသေးတယ်..."

"မင်းတို့ဆီမှာ အင်မော်တယ်ကျောက်တုံးတွေ အလုံအလောက် ရှိနေသရွေ့တော့ ထိပ်တန်းအဆင့် တာအိုစည်းချက် ပစ္စည်းတွေ အများကြီး ရှိနေဦးမှာပဲ... ဒါကြောင့် ငါနဲ့ ဟွမ်ဖူအင်မော်တယ်မိသားစုကြားက ပူးပေါင်းဆောင်ရွက်မှုအတွက် စိတ်ပူစရာ မလိုပါဘူး..."