အခန်း ၃၂၁
Vol. 33 Ch. 321
ပြိုင်ဘက်ကင်း အင်ပါယာ။ အပိုင်း ၃၂၁
ဘာသာပြန် - Ko Yoohtoo
True Immortal Team
မြို့၏ အစီအရင်နှင့် တံခါးပေါက်ကို ပြန်လည်မွမ်းမံပြီး ဖြစ်သော်လည်း အသိပညာရှင်များနှင့် လက်မှုပညာရှင်များသည် အရာအားလုံး စိတ်ချရစေရန် မြို့တစ်မြို့လုံးကို လှည့်လည်စစ်ဆေးနေကြဆဲ ဖြစ်၏။
လေဟုန်စစ်သည် အယောက်တစ်ထောင် တပ်ဖွဲ့သည် မြို့ထဲမှ ထွက်ခွာသွားကြပြီး လာမည့် စစ်ပွဲအတွက် တန်ဖိုးရှိသည့် သတင်းအချက်အလက်များကို ရှာဖွေရန် အရပ်မျက်နှာ အသီးသီးသို့ ဖြန့်ကျက်သွားကြပြီ ဖြစ်သည်။
ပိုင်ချီနှင့် ဝူလျန်တို့ထံမှ သတင်းအချက်အလက်များ ရရှိထားသော်လည်း နည်းဗျူဟာမြေပုံပေါ်၌ အရိပ်မဲ့မျိုးနွယ်နှင့် ကိုယ်ယောင်ဖျောက်မျိုးနွယ်တို့၏ မြို့များ တည်နေရာကို ခန့်မှန်းခြေသာ ပြသထားခြင်း ဖြစ်၏။
နည်းဗျူဟာမြေပုံပေါ်၌ မြို့များ၏ တည်နေရာအတိအကျကို သိရှိနိုင်ရန် လေဟုန်စစ်သည်များ၏ ထောက်လှမ်းမှုသည် မရှိမဖြစ် လိုအပ်သည်။
ရှန်ဟွမ်ကြယ်၌လည်း အလုံးစုံစစ်ပွဲအတွက် လိုအပ်သည့် အရင်းအမြစ်များကို စတင်စုဆောင်းနေကြပြီ ဖြစ်သည်။
လေဟုန်စစ်သည်များ၏ ထောက်လှမ်းမှု ပြီးဆုံးသွားသည်နှင့် တကယ့်စစ်ပွဲကြီး စတင်ရန် အချိန်ကျရောက်လာမည် ဖြစ်၏။
အရိပ်မဲ့မျိုးနွယ်နှင့် ကိုယ်ယောင်ဖျောက်မျိုးနွယ်တို့သည် ဤကမ္ဘာ၌ ဟွာရှာအင်ပါယာ၏ စွမ်းအားကို ပထမဆုံး ခံစားရမည့်သူများ ဖြစ်လာကြပြီး ကဏ္ဍပေါင်းစုံ၌ အလုံးစုံ ဖိနှိပ်ခံရခြင်း ဆိုသည်မှာ မည်သို့ဖြစ်ကြောင်း နားလည်သွားကြရပေလိမ့်မည်။
စစ်သည် သုံးသိန်းသည် ဟွာရှာအင်ပါယာသို့ ပြန်လည်မဆုတ်ခွာဘဲ မြို့ရိုးအတွင်းရှိ လွင်ပြင်ကျယ်ကြီး၌ တပ်စွဲအခြေချ နေထိုင်လိုက်ကြ၏။
သူတို့၏ ခန္ဓာကိုယ်များပေါ်၌ သွေးရောင်လွှမ်းသည့် အရှိန်အဝါများ ရစ်ပတ်နေဆဲပင် ဖြစ်သည်။
သွေးဆာခြင်း အရှိန်အဝါများ ထပ်ပေါင်းစုစည်းထားမှုသည် ဆယ်ရက်တိတိ ကြာမြင့်နိုင်ပြီး ထိုအချိန်ကျော်လွန်မှသာ အာနိသင်ပြယ်သွားမည် ဖြစ်သည်။
သို့သော် ထိုဆယ်ရက်အတွင်း ရန်သူတစ်ယောက်ကို သတ်ဖြတ်နိုင်ပါက သွေးဆာခြင်း အာနိသင်သည် နောက်ထပ် ဆယ်ရက် ထပ်မံ သက်တမ်းတိုးသွားပေလိမ့်မည်။
ထို့ကြောင့် ယခင်ဘဝ ဂိမ်းကစားစဉ်က သွေးလွှမ်းစစ်သည်တပ်ဖွဲ့ကို စောစောစီးစီး အမြန်ဆုံး ရှင်းပစ်လေ့ရှိကြ၏။
အထူးသဖြင့် သွေးဆာခြင်းစွမ်းရည်များ မစုစည်းမိခင် အချိန်၌ ဖြစ်၏။
အစွမ်းကုန် ဖြည့်ဆည်းထားသည့် သွေးဆာခြင်း အရှိန်အဝါပိုင်ဆိုင်သော သွေးလွှမ်းစစ်သည်အဖွဲ့သည် အလွန်တရာ ကြောက်မက်ဖွယ် ကောင်းလှ၏။
သို့သော် ဤကမ္ဘာ၌မူ အရိပ်မဲ့မျိုးနွယ်နှင့် ကိုယ်ယောင်ဖျောက်မျိုးနွယ်တို့သည် သွေးလွှမ်းစစ်သည်ဆိုသည်မှာ မည်သည့်အရာမှန်း မသိကြသကဲ့သို့၊ သူတို့ကို ရစ်ပတ်ထားသည့် သွေးရောင်အရှိန်အဝါများ၏ အဓိပ္ပာယ်ကိုလည်း နားမလည်ကြချေ။
ယွမ်ရှန့်သည် ထို သွေးလွှမ်းစစ်သည်တပ်မတော်ကြီးကို ကြည့်ကာ အံ့အားသင့်နေမိ၏။ လူပေါင်းသုံးသိန်း၏ စိတ်ဝိညာဉ်စွမ်းအင်များ၊ ခန္ဓာကိုယ် အချိုးအစားများနှင့် အရှိန်အဝါများအားလုံး ထပ်တူညီမျှ ဖြစ်နေသည်ကို သူ နားမလည်နိုင်အောင် ဖြစ်ရသည်။
ကွာခြားသွားသည်မှာ... သူတို့၏ မျက်နှာများသာ ဖြစ်သည်။
စိတ်ဝိညာဉ်စွမ်းအင်များ ထပ်တူညီမျှ ဖြစ်နေခြင်းမှာ မဖြစ်နိုင်သည့်အရာပင်။ လူနှစ်ဦးစလုံး မီးစွမ်းအား ပိုင်ဆိုင်ထားသည် ဆိုလျှင်တောင် သူတို့၏ စိတ်ဝိညာဉ်စွမ်းအား အတက်အကျ လှိုင်းများမှာ ကွာခြားနေမည်သာ ဖြစ်၏။
တူညီသည့် စွမ်းအားစွမ်းရည်များ ရှိနေခြင်းက မဆန်းကြယ်သော်လည်း စိတ်ဝိညာဉ်စွမ်းအား အတက်အကျ လှိုင်းများပါ တူညီနေခြင်းမှာမူ နားလည်နိုင်စွမ်းထက် ကျော်လွန်နေသည်။
ယွမ်ရှန့်ပင် နားမလည်နိုင်သည်မှာ မဆန်းပေ။ လင်းချန် ကိုယ်တိုင်ပင် နားမလည်နိုင်ချေ။
ဟွာရှာအင်ပါယာ၌ ဉာဏ်ရည်နှင့် အသက်ရှိသည့် သတ္တဝါတိုင်း မိတ်လိုက်သားပေါက်နိုင်သော်လည်း တိုက်ခိုက်ရေးစစ်သည် နှစ်မျိုးမှာမူ ချွင်းချက်ဖြစ်သည်။
ထိုသည်တို့မှာ တော်ဝင်တပ်မတော်နှင့် သားရဲ စစ်သည်များပင် ဖြစ်၏။ စစ်သူကြီးများနှင့် သားရဲစစ်သည် တပ်မှူးများကသာ ဉာဏ်ရည်နှင့် အသက်ကို ပိုင်ဆိုင်ကြ၏။
သို့သော် သာမန်စစ်သည်များနှင့် သားရဲစစ်သည်များသည် ထူးဆန်းစွာပင် ဉာဏ်ရည်ရှိသည့် ရုပ်သေးရုပ်များနှင့် တူညီနေသည်။
သားရဲစစ်သည်များသည် အခြေခံ စစ်သည်အမျိုးအစား ခြောက်မျိုးထဲမှ ဓားကိုင်စစ်သည်များကို စစ်တန်းလျားထဲသို့ ပြန်လည်ပို့ဆောင်ကာ ပြုပြင်ပြောင်းလဲထားခြင်း ဖြစ်၏။
ဓားကိုင်စစ်သည် ငါးဦးလျှင် သားရဲစစ်သည်တစ်ဦးနှုန်းဖြင့် ဖန်တီးထားခြင်း ဖြစ်သည်။ ထို့အတူ လှံကိုင်စစ်သည်၊ ဓားကိုင်စစ်သည်၊ သိုင်းဓားစစ်သည်၊ ဒိုင်းကာစစ်သည်၊ လေးသည်တော်နှင့် လေဟုန်စစ်သည်များသည်လည်း စစ်တန်းလျားထဲမှ တိုက်ရိုက်ဖန်တီးထားခြင်း ဖြစ်၏။
အချို့ကိုမူ ကျပန်းပေါ်ထွက်လာသည့် တောရိုင်းသားရဲများကို ယဉ်ပါးအောင် မွေးမြူထားခြင်း ဖြစ်သည်။
အစုလိုက်အပြုံလိုက် ထုတ်လုပ်ထားသည့် အရာများ ဖြစ်သောကြောင့် တစ်ပုံစံတည်း တူညီနေသည်မှာ မဆန်းပေ။
မျက်နှာများ မတူညီကြခြင်းမှာမူ ယခင်ဘဝ ဂိမ်းကုမ္ပဏီ၏ ဒီဇိုင်းကြောင့် ဖြစ်၏။
ကစားသမားများအနေဖြင့် တစ်ပုံစံတည်းတူညီသည့် မျက်နှာများကို မြင်ရလျှင် ငြီးငွေ့သွားမည် စိုးသဖြင့် ကျပန်းမျက်နှာပုံစံ စနစ်ကို ထည့်သွင်းထားခဲ့ခြင်း ဖြစ်သည်။
ဤကမ္ဘာသို့ ရောက်ရှိလာချိန်၌လည်း ဟွာရှာအင်ပါယာသည် ထိုဝိသေသလက္ခဏာကို ဆက်လက် ထိန်းသိမ်းထားသည်။
ယွမ်ရှန့် တစ်ယောက် လင်းချန်၏ ဘေးနားသို့ ရောက်လာသည်။ "ဒါနဲ့... အရိပ်မဲ့မျိုးနွယ်နဲ့ ကိုယ်ယောင်ဖျောက်မျိုးနွယ်ကို စစ်တိုက်ဖို့ ပြင်နေပြီဆိုတော့ ဘယ်တော့လောက် စမလဲ။"
ယွမ်ရှန့်၏ စူးစမ်းလိုစိတ် ပြင်းပြနေသည့် မျက်နှာထားကို ကြည့်ရင်း လင်းချန် ပြုံးလိုက်သည်။ "အကြီးအကဲ... ခင်ဗျားပဲ ကျုပ်ကို အရိပ်မဲ့မျိုးနွယ်နဲ့ ကိုယ်ယောင်ဖျောက်မျိုးနွယ်ကို စစ်မတိုက်ဖို့ တားခဲ့တာ မဟုတ်ဘူးလား။ အခုကျတော့ ခင်ဗျားက ကျုပ်ထက်တောင် ပိုစိတ်လောနေပါရောလား။"
ယွမ်ရှန့်က အလျင်အမြန် ခေါင်းရမ်းလိုက်သည်။ "ဘယ်တူမလဲကွ... အစတုန်းက မင်း လူလေးငါးဆယ်လောက်နဲ့ လူသန်းပေါင်းများစွာရှိတဲ့ မျိုးနွယ်စုနှစ်ခုကို သွားတိုက်မယ် ထင်လို့ ငါ တားခဲ့တာပေါ့။ မင်းမှာ စစ်တပ်နဲ့ လူစွမ်းကောင်းတွေကို ဆင့်ခေါ်နိုင်တဲ့ စွမ်းရည်ရှိမယ်လို့ ငါ ဘယ်ထင်မလဲ။"
ယွမ်ရှန့်၏ စကားကို ကြားပြီးနောက် လင်းချန်၏ မျက်နှာပေါ်၌ အပြုံးတစ်ခု ဖြစ်ပေါ်လာ၏။
စောစောက သူ နောက်ပြောင်ခြင်းသာ ဖြစ်သည်။ အဝေးတစ်နေရာကို လှမ်းကြည့်လိုက်သည်။ "ရန်သူကိုသိပြီး ကိုယ့်ကိုယ်ကိုယ်သိရင် စစ်ပွဲတစ်ရာ တိုက်လည်း အန္တရာယ်မရှိနိုင်ဘူး... ဘာမှ နားမလည်ဘဲ ဒီအတိုင်း တိုက်ရင်တော့ ရှုံးနိုင်တယ်။"
ယွမ်ရှန့်က မျက်မှောင်ကြုတ်လိုက်သည်။ "အဲဒါကို ငါ နားမလည်ဘူး... မင်း အရင်က သူတို့ကို အမှန်အတိုင်း ပြောစေဖို့ ထူးဆန်းတဲ့ဆေးရည် တိုက်ခဲ့တယ် မဟုတ်ဘူးလား။"
ထိုအချိန်၌ လင်းချန်၏ မျက်နှာထားသည် ယုံကြည်မှုအပြည့် ရှိနေသည်။ "တချို့ကိစ္စတွေကို ကိုယ်တိုင် အတည်ပြုမှ ရမှာ... စီနီယာ... စောင့်သာ ကြည့်နေ။"
သူ၏ နှုတ်ခမ်းထောင့်များ တွန့်ကွေးသွားသည်။ "အလုံးစုံစစ်ပွဲဆိုတာ ဘယ်လိုမျိုးလဲ... ကျုပ် တိုက်မယ့် မျိုးနွယ်စုနှစ်ခု ဒူးထောက်ပြီး အမေကိုတောင် တစာစာ အော်ဟစ်တမ်းတသွားစေရမယ်။"
ပြောရင်းဆိုရင်း လင်းချန်၏ မျက်နှာ၌ ရူးသွပ်မှုနှင့် စိတ်လှုပ်ရှားမှုများ ရောယှက်နေသည့် အမူအရာများ ပေါ်လာပြီး လက်နှစ်ဖက်ကို ပွတ်သပ်ကာ စိတ်လှုပ်ရှားလွန်း၍ ခန္ဓာကိုယ်ပင် အနည်းငယ် တုန်ယင်နေ၏။
သူ့ယခင်ဘဝမှ လက်ရှိအချိန်အထိ ဟွာရှာအင်ပါယာသည် စစ်မှန်သည့် စစ်ပွဲတစ်ခုကို အမှန်တကယ် ဆင်နွှဲတော့မည် ဖြစ်သည်။
ယခင်က မူလပြည်နယ်နှင့် ကမ်းရိုးတန်းပြည်နယ်တို့၌ ဖြစ်ပွားခဲ့သည့် တိုက်ပွဲများသည် စစ်ပွဲဟု မခေါ်ဆိုနိုင်ပေ။
ထိုသည်တို့မှာ တစ်ဖက်သတ် အနိုင်ကျင့် သတ်ဖြတ်ခြင်းများသာ ဖြစ်ပြီး စိတ်ဝင်စားဖွယ်ရာ မရှိချေ။
အထူးသဖြင့် ယခုတစ်ကြိမ် ရင်ဆိုင်ရမည့် ရန်သူများထဲ၌ နိုးထခြင်းနယ်ပယ် ရောက်ရှိနေသူများပင် ပါဝင်နေသဖြင့် လင်းချန်၏ သွေးများ ဆူပွက်ကာ စိတ်လှုပ်ရှားလာရခြင်း ဖြစ်၏။
အခက်အခဲ အနည်းငယ် ရှိမှသာ စိန်ခေါ်မှု ရှိပေမည်။ အလွယ်တကူ သိမ်းပိုက်နိုင်လျှင် ဤမျှကောင်းမွန်သည့် ကမ္ဘာငယ်လေးကို သိမ်းပိုက်ရခြင်းက မည်သို့ အဓိပ္ပာယ် ရှိပါတော့မည်နည်း။
လင်းချန် စိတ်လှုပ်ရှားနေသည်ကို မြင်လိုက်ရသည့် ယွမ်ရှန့်သည် တစ်ဖက်လူ ပြောသောစကားများကို တွေးတောရင်း လင်းချန်ပြောသည့် အလုံးစုံ စစ်ပွဲဆိုသည်မှာ မည်သို့ ဖြစ်မည်ကို တိတ်တဆိတ် စောင့်ကြည့်ရုံသာ တတ်နိုင်တော့သည်။
လက်ရှိ လင်းချန် ရှိနေသည့် မြို့၏ ရှေ့မျက်နှာစာရှိ လွင်ပြင်ကျယ်ကြီးပေါ်၌ လေဟုန်စစ်သည် တစ်ထောင်သည် အလွန်လျင်မြန်သော နှုန်းဖြင့် ပြေးလွှားသွားလာနေကြသည်။
ရုတ်တရက် လေဟုန်စစ်သည်များ လူစုခွဲလိုက်ကြပြီး နှစ်ယောက်တစ်တွဲစီ လှုပ်ရှားလိုက်ကြ၏။
သူတို့ ပြေးလွှားနေရင်း လက်ထဲ၌ စွမ်းရည်ကျောက်တုံး အများအပြား ပေါ်လာပြီး ဝါးပင်မဝါးဘဲ ပါးစပ်ထဲသို့ ပစ်ထည့်ကာ မျိုချလိုက်ကြသည်။
"ထောက်လှမ်းမှု ဟန့်တားခြင်း အစီအရင် စတင်ခြင်း..."
"အစီအရင် ထောက်လှမ်းမှုကို ပိတ်ဆို့ခြင်း..."
"အမြင်အာရုံ မြှင့်တင်ခြင်း..."
"ရှင်းလင်းပြတ်သားမှု နှစ်ဆ တိုးမြှင့်ခြင်း.."
"အမြန်နှုန်း မြှင့်တင်ခြင်း..."
"ဝုန်းခနဲးး ဝုန်းခနဲးး"
မျက်စိတစ်မှိတ် အတွင်းမှာပင် လေဟုန်စစ်သည်များ၏ အမြန်နှုန်းသည် ရုတ်တရက် မြင့်တက်လာပြီး လေထုကို ခွင်းလျက် အသံထက်မြန်သည့် လေခွင်းသံများ ထွက်ပေါ်လာကာ ထောက်လှမ်းရမည့် မြို့ဆီသို့ ဦးတည်ပြေးဝင်သွားကြသည်။
လင်းချန်၏ အစီအမံများက အလွန် ရှင်းလင်းပြတ်သားလှ၏။
အရိပ်မဲ့မျိုးနွယ်နှင့် ကိုယ်ယောင်ဖျောက်မျိုးနွယ်တို့၏ မြို့အနေအထားများကို တစ်ကြိမ်တည်းဖြင့် အကုန်အစင် ထောက်လှမ်းရန် ရည်ရွယ်ထားခြင်း ဖြစ်သည်။
လူစုခွဲသွားသည့် လေဟုန်စစ်သည်များထဲမှ အလယ်ဗဟိုအနီးရှိ နှစ်ဦးသည် ရှေ့မှ မြို့၏ ပုံသဏ္ဌာန်ကို စတင် မြင်တွေ့နေရပြီ ဖြစ်၏။
မြို့နှင့် နီးကပ်လာသည်နှင့်အမျှ ထိုလေဟုန်စစ်သည်နှစ်ဦး၏ အရှိန်သည် တဖြည်းဖြည်း လျော့ကျသွားသည်။
မြို့အနီးသို့ ရောက်သည့်အခါ လေဟုန်စစ်သည်နှစ်ဦးသည် ခေါင်းဆောင်းများကို အနည်းငယ် ပြင်ဆင်လိုက်ပြီး အစိမ်းရင့်ရောင် သံချပ်ကာများသည် အရောင်စတင် ပြောင်းလဲလာကာ အောက်ဘက်ရှိ မြက်ခင်းပြင်အရောင်နှင့် တစ်သားတည်း ဖြစ်သွား၏။
ထိုအချိန်၌ ရှေ့ရှိမြို့မှ အစီအရင်၏ စွမ်းအင်လှိုင်းတစ်ခုသည် လေဟုန်စစ်သည်နှစ်ဦး ရှိရာနေရာသို့ ရုတ်တရက် ဖြတ်သန်းသွားသည်။
သို့သော် အစီအရင်၏ ထောက်လှမ်းမှုလှိုင်းသည် အလွန် အားနည်းလှ၏။
လေဟုန်စစ်သည်နှစ်ဦးကို ဖြတ်ကျော်သွားသော်လည်း သူတို့၏ ကိုယ်ပေါ်၌ မြက်နံ့သင်းသည့် အစိမ်းရောင် အလင်းပါးပါးလေး လွှမ်းခြုံထားသဖြင့် မည်သည့်အရာကိုမျှ ထောက်လှမ်းမိခြင်း မရှိချေ။
ထိုမြို့၏ အစီအရင်သည် လေဟုန်စစ်သည်နှစ်ဦး ကပ်လာသည်ကို သတိမထားမိလိုက်ကြောင်း ထင်ရှားလှသည်။
အမှန်တကယ်၌လည်း ဤမြို့အတွင်းရှိ အစီအရင်၏ ထောက်လှမ်းနိုင်စွမ်းသည် အလွန်တရာ အားနည်းလှသည်။
အဘယ်ကြောင့်ဆိုသော် အရိပ်မဲ့မျိုးနွယ်နှင့် ကိုယ်ယောင်ဖျောက်မျိုးနွယ်တို့သည် လင်းချန်ကဲ့သို့ ထူးဆန်းသည့် လူတစ်ယောက်က သူတို့ကို တိုက်ရိုက် စစ်ကြေညာလိမ့်မည်ဟု ထင်မှတ်မထားခဲ့သကဲ့သို့၊ စွမ်းရည်ကျောက်တုံးများ စားသုံးပြီးနောက် သူတို့၏ အာရုံခံနိုင်စွမ်းကို ပိတ်ဆို့ထားနိုင်သော လေဟုန်စစ်သည်များ ရှိနေမည်ဟုလည်း မျှော်လင့်မထားခဲ့ကြသောကြောင့်ပင်။
မြို့ရိုးပေါ်ရှိ အရိပ်မဲ့မျိုးနွယ်နှင့် ကိုယ်ယောင်ဖျောက်မျိုးနွယ်မှ ကင်းသမားများသည် ပေါ့ပေါ့ပါးပါး စကားပြော ရယ်မောနေကြ၏။
လေဟုန်စစ်သည်နှစ်ဦး တိတ်တဆိတ် ကပ်လာသည်ကို မည်သူမျှ သတိမထားမိကြပေ။
ပြိုင်ဘက်ကင်း အင်ပါယာ။ အပိုင်း ၃၂၁ ပြီး။
ဘာသာပြန် - Ko Yoohtoo
True Immortal Team