အခန်း ၃၀၄

အခန်း (၃၀၄)အရပ်လေးမျက်နှာမှ အစီအရင်မျက်လုံးများ၊ ပိုမို ကြောက်မက်ဖွယ်ကောင်းသော မိုးကြိုးကပ်ဘေး

ထို့ကြောင့် သူတို့က တက်လှမ်းခြင်း အစီအရင်ကို ဖွင့်လှစ်ပြီး အစီအရင်မျက်လုံးကို ယူဆောင်ပြီးနောက် အရှေ့၊ အနောက်၊ တောင်၊ မြောက် အရပ်လေးမျက်နှာ၌ ဆက်လက် မနေနိုင်ကြတော့ပေ။

ထိုအစား တောင်ပေါင်းတစ်သိန်းတောင်တန်းဆီသို့ သွားရမည် ဖြစ်၏။

မည်သို့ပင်ဆိုစေကာမူ ချမ်ချန်ကန်းက ပြောထားခဲ့သည်။

ဤတက်လှမ်းခြင်း မိုးကြိုးကပ်ဘေးက မည်မျှပင် ကြောက်မက်ဖွယ်ကောင်းပြီး အစွမ်းထက်နေပါစေ တက်လှမ်းခြင်း မိုးကြိုးကပ်ဘေးကို တောင်ပေါင်းတစ်သိန်းတောင်တန်းဆီသို့သာ ခေါ်ဆောင်လာခဲ့ရန် ဖြစ်သည်။

ထိုအခါ သူ ဖြေရှင်းပေးမည်ဖြစ်၏။

ကောင်းကင်ယံက မည်းမှောင်နေပြီး အရာခပ်သိမ်းက အမှောင်ထုထဲ ကျရောက်နေသည်။ လောကရှိ အရာအားလုံးကို ဖျက်ဆီးပစ်တော့မည့်အလား ရေတွက်၍မရသော မိုးကြိုးများက ကျဆင်းလာကြ၏။

ထိုအထဲတွင် ပိုင်ယွဲ့က တက်လှမ်းခြင်း မိုးကြိုးကပ်ဘေး၏ အကြောက်မက်ဖွယ်အကောင်းဆုံး တိုက်ခိုက်မှုကို ပထမဆုံး ရင်ဆိုင်လိုက်ရသည်။ ကံကောင်းထောက်မစွာဖြင့် သူမက ကောင်းကင်တာအိုကို ထိန်းချုပ်ထားသူ ဖြစ်၏။ သို့ဖြစ်ရာ တက်လှမ်းခြင်း မိုးကြိုးကပ်ဘေးနှင့်လည်း ရင်ပေါင်တန်းနိုင်စွမ်း ရှိပေသည်။

ဝုန်းခနဲ မြည်ဟည်းသွားသည်။ အထူးသဖြင့် ကောင်းကင်ယံအထက်တွင် ကြောက်မက်ဖွယ်ကောင်းပြီး အဆုံးအစမဲ့သော အက်ကွဲကြောင်းကြီးတစ်ခု ပေါ်လာ၏။

ဤအက်ကွဲကြောင်းက အောက်ဘုံနှင့် အထက်ဘုံတို့ကြားမှ နယ်နိမိတ် ဖြစ်သည်။ ၎င်းက အင်မော်တယ်တံခါး တစ်ပေါက်နှင့်လည်း ညီမျှပေသည်။

ယခုအခါ ကျူးရှိူ့တိုက်ကြီးတစ်ခုလုံးက အထက်သို့ တက်လှမ်း၍ အင်မော်တယ်နယ်မြေအဖြစ် ပြောင်းလဲသွားခြင်းမှာ အမှန်တကယ်တော့ ဤအက်ကွဲကြောင်းမှတဆင့် ဖြစ်၏။

ဤအက်ကွဲကြောင်းမှတဆင့်သာလျှင် ကျူးရှိူ့တိုက်ကြီးတစ်ခုလုံးက အထက်ဘုံသို့ ရောက်ရှိပြီး အင်မော်တယ်နယ်မြေတစ်သောင်းအနက်မှ တစ်ခုအဖြစ် အောင်မြင်စွာ တက်လှမ်းနိုင်ပြီဟု သတ်မှတ်နိုင်မည် ဖြစ်ပေသည်။

သို့သော်လည်း ဤလုပ်ငန်းစဉ်က အလွန် ခက်ခဲလှ၏။ ခေတ်အဆက်ဆက်တွင် အောက်ဘုံမှ အင်မော်တယ်နယ်မြေသို့ တက်လှမ်းနိုင်သူမှာ လက်ချိုးရေတွက်၍ ရလောက်အောင်ပင် နည်းပါးလှသည်။

တက်လှမ်းခြင်း မိုးကြိုးကပ်ဘေးမှ အသွင်ပြောင်းလာသော မိုးကြိုးနဂါး ထောင်သောင်းချီ၍ ရှိနေသည်။ ၎င်းတို့က ကောင်းကင်နှင့် မြေကြီးကို ဟိန်းဟောက်၍ အရာအားလုံးကို ဖျက်ဆီးပစ်မတတ် အဟုန်ဖြင့် ပိုင်ယွဲ့ထံသို့ သတ်ဖြတ်ရန် တိုးဝင်လာကြ၏။

ပိုင်ယွဲ့က ကောင်းကင်တာအို၏ အစောင့်အရှောက် စွမ်းအားဖြင့် တန်ပြန် တိုက်ခိုက်လိုက်သည်။ သူမလက်ထဲတွင် ကောင်းကင်တာအို၏ ကောင်းချီးဖြင့် ကောင်းကင်တာအို မြင့်မြတ်သောဓားအဖြစ် ပြောင်းလဲ၍ ဆုပ်ကိုင်ထား၏။ ထို့နောက် သတ်ဖြတ်ရန် ရောက်လာသော မိုးကြိုးနဂါး ထောင်ပေါင်းများစွာကို ဆက်တိုက် ခုတ်ပိုင်းပစ်လိုက်သည်။

ဤမြင်ကွင်းကို ကျူးရှိူ့တိုက်ကြီးရှိ မရေမတွက်နိုင်သော ကျင့်ကြံသူများက မျက်ဝါးထင်ထင် တွေ့မြင်လိုက်ကြရသည်။ သူတို့က ပိုင်ယွဲ့၏ ဘေးကင်းရေးအတွက် အလွန် စိုးရိမ်နေကြ၏။

တစ်ဘက်တွင်လည်း ဝေးကွာသော အခြား အရပ်သုံးမျက်နှာ၌ မိုဝန်ထျန်း၊ အင်မော်တယ်အင်ပါယာ ယီဟိုင်နှင့် ကျူးပါကျဲတို့ ရှိနေကြသည်။ သူတို့သည်လည်း တက်လှမ်းခြင်း မိုးကြိုးကပ်ဘေး၏ ကြောက်မက်ဖွယ် တိုက်ခိုက်မှုကို ခံစားနေကြရ၏။

ကံကောင်းထောက်မစွာဖြင့် အင်မော်တယ်အင်ပါယာ ယီဟိုင်မှာ ခွန်အားကြီးမား၍ ခုခံနိုင်စွမ်း ရှိသေးသည့်အပြင် သူ၏ ခန္ဓာကိုယ်ထဲတွင်လည်း သေခြင်းရှင်ခြင်းအဆောင်ရှိနေသေးသည်။

၎င်းက တောင်ပေါင်းတစ်သိန်းတောင်တန်းဆီသို့ ရောက်သည့်တိုင်အောင် သူ့ကို ထောက်ပံ့ပေးရန် လုံလောက်မည် ဖြစ်၏။ တောင်ပေါင်းတစ်သိန်းတောင်တန်းဆီသို့ ရောက်သွားရုံဖြင့် သူ၏ တာဝန် ပြီးမြောက်ပြီ ဖြစ်သည်။ နောက်ထပ် ကျန်ရှိနေသည့် တက်လှမ်းခြင်း မိုးကြိုးကပ်ဘေးကို စီနီယာ့ထံ လွှဲပြောင်းပေးရုံသာ ရှိတော့သည်။

ထိုနည်းတူစွာပင် ကျူးပါကျဲကလည်း ၎င်းကို ရင်ဆိုင်ဖြေရှင်းနိုင်စွမ်း ရှိပေသည်။ မည်သို့ပင်ဆိုစေ သူက ထျန်းကန်းအသွင်ပြောင်းခြင်း သုံးဆယ့်ခြောက်ပါးကို ပိုင်ဆိုင်ထားသည် မဟုတ်ပါလော။

သူက ရွှေရောင်အလင်းတန်း ဖြောင့်မတ်ခြင်းဟူသော သဘာဝလွန် စွမ်းရည်ကို အသုံးပြု၍ သူ၏ တစ်ကိုယ်လုံးကို ရွှေရောင်အလင်းတန်းတစ်ခုအဖြစ် လုံးလုံးလျားလျား ပြောင်းလဲလိုက်ပြီး မျက်စိတစ်မှိတ်အတွင်း ပျောက်ကွယ်သွားကာ တောင်ပေါင်းတစ်သိန်းတောင်တန်းရှိရာ အရပ်ဆီသို့ ဦးတည်သွားတော့သည်။

မိုဝန်ထျန်းအနေဖြင့်ဆိုရလျှင် သူ၏ ကျင့်ကြံခြင်းအဆင့်က အားအနည်းဆုံး ဖြစ်နေသော်ငြားလည်း ယခုအချိန်၌ သူက သွေးငရဲနဂါးနတ်ဘုရားခန္ဓာကိုယ်ကို ပိုင်ဆိုင်ထားသဖြင့် သူ၏ ခန္ဓာကိုယ်က သန်မာလှပြီး သူ့ကို ကာကွယ်ပေးရန် ရေတွက်၍မရသော အင်မော်တယ် ရတနာများလည်း ရှိနေပေသည်။

အရေးကြီးဆုံးအချက်မှာ သူ၏ လက်ထဲတွင် ကျန်းရူဟွာက သူ့အား ပေးအပ်ထားသည့် ထိပ်တန်း အကာအကွယ် အင်မော်တယ်လက်နက် တာ့ဖုန်း အင်မော်တယ်လက်စွပ်လည်း ရှိနေခြင်းပင်။

ထို့ကြောင့် လက်ရှိ တက်လှမ်းခြင်း မိုးကြိုးကပ်ဘေးကို ခုခံရန်မှာလည်း ဖြစ်နိုင်ချေ ရှိပေသည်။ သို့ဖြစ်ရာ ယခုအခါ ကျူးရှိူ့တိုက်ကြီးက အထက်သို့ တက်လှမ်းနေပြီဖြစ်ပြီး အရာအားလုံးက အမြဲတမ်းလိုလို အလွန် ချောမွေ့စွာ လည်ပတ်နေ၏။

ဖေးရှန့်တောင်တွင် ချမ်ချန်ကန်းက ပိုင်ယွဲ့နှင့် အခြားသူများ ရောက်လာမည့်အချိန်ကို စောင့်ဆိုင်းနေသည်။

ပိုင်ယွဲ့နှင့် အခြားသူများ တောင်ပေါင်းတစ်သိန်းတောင်တန်းဆီသို့ အောင်မြင်စွာ ပြန်ရောက်လာချိန်မှသာ ကျူးရှိူ့တိုက်ကြီး၏ တက်လှမ်းခြင်းက အမှန်တကယ် ချောမွေ့မည်ဖြစ်ကြောင်း သူ့စိတ်ထဲတွင် ကောင်းစွာ သိရှိထားပေသည်။

ထိုအချိန်ကျလျှင် သူတို့က တက်လှမ်းခြင်း မိုးကြိုးကပ်ဘေးကို တောင်ပေါင်းတစ်သိန်းတောင်တန်းဆီသို့ ခေါ်ဆောင်လာကြလိမ့်မည်။ ပြိုင်ဘက်ကင်းနယ်မြေ၏ ခွန်အားဖြင့် ချမ်ချန်ကန်းအတွက် ဤတက်လှမ်းခြင်း မိုးကြိုးကပ်ဘေး၏ စွမ်းအားကို ခုခံရန်မှာ လွယ်ကူသော ကိစ္စတစ်ခုတော့ မဟုတ်ပေ။

ယခုအချိန်တွင် တောင်ပေါင်းတစ်သိန်းတောင်တန်း၏ အထက် ကောင်းကင်ယံ၌ပင် ကြောက်မက်ဖွယ်ကောင်းသော မိုးကြိုးကပ်ဘေးများ ရှိနေသည်။

သို့သော်လည်း ပြိုင်ဘက်ကင်းနယ်မြေထဲသို့ ကျရောက်လာသရွေ့ ချက်ချင်းပင် ပျက်စီးသွားရ၏။ မိုးကြိုးကပ်ဘေး၏ စွမ်းအားများက လုံးလုံးလျားလျား ချေမှုန်းခံလိုက်ရသည်။ တောင်ပေါင်းတစ်သိန်းတောင်တန်းရှိ မြက်တစ်ပင်၊ သစ်တစ်ပင်ကိုမျှ အနာတရ ဖြစ်စေရန်ပင် မဖြစ်နိုင်ပေ။

သေချာပေါက် ဤအရာအားလုံးက တောင်ပေါင်းတစ်သိန်းတောင်တန်းကိုသာ ရည်ညွှန်းခြင်း ဖြစ်၏။ ၎င်းကို ချမ်ချန်ကန်း၏ ပြိုင်ဘက်ကင်းနယ်မြေက ကာကွယ်ပေးထားသည်။ မည်သည့် ကျင့်ကြံသူမျှ အနာတရဖြစ်မည် မဟုတ်ပေ။

သို့သော်လည်း ကျူးရှိူ့တိုက်ကြီး၏ ကျန်ရှိနေသော အခြားနေရာများကတော့ ကွာခြားပေသည်။ အခြားဒေသများမှာလည်း တက်လှမ်းခြင်း မိုးကြိုးကပ်ဘေး၏ ဖျက်ဆီးမှုကို အနည်းနှင့်အများ ဆိုသလို ခံစားနေကြရ၏။ ပိုင်ယွဲ့က ကျူးရှိူ့တိုက်ကြီးကို ကာကွယ်ရန် ကောင်းကင်တာအို၏ စွမ်းအားကို အသုံးပြုထားသော်ငြားလည်း ထိုသို့ဖြစ်နေဆဲပင်။

သို့သော် ဤသည်မှာ လုံလောက်မှု မရှိကြောင်း ထင်ရှားလှသည်။ အချိန်တိုအတွင်းမှာပင် အပြစ်ကင်းစင်သော သက်ရှိများစွာမှာ တက်လှမ်းခြင်း မိုးကြိုးကပ်ဘေးထဲတွင် မြှုပ်နှံခံလိုက်ကြရ၏။

ဤသည်ကပင် တက်လှမ်းခြင်း၏ ရက်စက်ကြမ်းကြုတ်မှု ဖြစ်ပေသည်။ ကျူးရှိူ့တိုက်ကြီးရှိ ကျင့်ကြံသူများ အနေဖြင့် သူတို့ လုပ်ရမည့်အရာမှာ ဤတက်လှမ်းခြင်း မိုးကြိုးကပ်ဘေးကို ခုခံရှောင်ရှားရင်း အတွေ့အကြုံ ယူရန်ပင်။ သူတို့ အသက်ရှင် ကျန်ရစ်နိုင်သရွေ့ အကောင်းဆုံးသော အနာဂတ်က သူတို့ကို စောင့်ကြိုနေမည် ဖြစ်၏။

တက်လှမ်းခြင်း မိုးကြိုးကပ်ဘေးက ကြောက်မက်ဖွယ် ကောင်းလှသည်။ သို့သော်လည်း ပိုင်ယွဲ့၊ အင်မော်တယ်အင်ပါယာ ယီဟိုင်၊ ကျူးပါကျဲနှင့် မိုဝန်ထျန်းတို့က သူတို့၏ စွမ်းရည်များဖြင့် ခုခံနိုင်စွမ်း ရှိနေဆဲပင်။

လမ်းတစ်လျှောက်တွင် မည်သည့် အန္တရာယ်မျှမရှိခဲ့ဘဲ တစ္ဆေပြည်နယ်ဆီသို့ ပြန်လည် ရောက်ရှိလာခဲ့ကြသည်။ သူတို့က တောင်ပေါင်းတစ်သိန်းတောင်တန်းနှင့် အလွန် နီးကပ်နေပြီ ဖြစ်၏။

ဖြစ်နိုင်သည်မှာ တက်လှမ်းခြင်းအစီအရင်၏ အစီအရင်မျက်လုံးများက တစ္ဆေပြည်နယ်တွင် စုစည်းနေသောကြောင့် ဖြစ်ပေမည်။ ထို့ကြောင့် တက်လှမ်းခြင်း မိုးကြိုးကပ်ဘေး၏ စွမ်းအားများက တစ္ဆေပြည်နယ်၌ လုံးလုံးလျားလျား စုစည်းသွားသကဲ့သို့ ရှိနေသည်။

၎င်းက တက်လှမ်းခြင်း မိုးကြိုးကပ်ဘေးမှ ဖြစ်ပေါ်လာသော ပေါက်ကွဲမှု စွမ်းအားကိုလည်း မကြုံစဖူး အစွမ်းထက်လာစေခဲ့၏။ အင်မော်တယ်အင်ပါယာ ယီဟိုင်၏ မျက်နှာက မကောင်းလှဘဲ သူ၏ အမူအရာက အလွန် ညှိုးနွမ်းလေးလံနေသည်။

"ဒုက္ခပါပဲ... ဒီတက်လှမ်းခြင်း မိုးကြိုးကပ်ဘေးက အခုထိ အားကောင်းနေတုန်းပဲ... ပြီးတော့ ငါ့ဝိညာဉ်ကိုတောင် တုန်လှုပ်သွားစေလောက်တဲ့ ရင်ဖိုစရာ လှိုင်းလုံးတွေ ထုတ်လွှတ်နေတယ်..."

"အားလုံးပဲ... သခင့်ဆီကို မြန်မြန် ပြန်သွားကြမယ်...သခင် ရှိနေသရွေ့ ဒီတက်လှမ်းခြင်း မိုးကြိုးကပ်ဘေးကို ခုခံနိုင်မှာပါ..."

ကျူးပါကျဲက သူ၏ လက်ထဲမှ အသွားကိုးချောင်းထွန်ခြစ်လက်နက်ကို ဆုပ်ကိုင်၍ အသံကျယ်ကျယ်ဖြင့် ပြောလိုက်သည်။

ပိုင်ယွဲ့၏ အမူအရာက တည်ကြည်လေးနက်နေ၏။

"ငါတို့က အရပ်လေးမျက်နှာက အစီအရင်မျက်လုံးတွေကို သယ်ဆောင်လာတာ... ငါတို့ သေသွားတာနဲ့ တက်လှမ်းခြင်း အစီအရင်က ပျက်စီးသွားလိမ့်မယ်… အခုတက်လှမ်းခြင်း မိုးကြိုးကပ်ဘေးရဲ့ စွမ်းအားတွေက လုံးဝ စုစည်းသွားပြီ ဆိုတော့ သူ့အင်အားက ပိုပြီး ကြောက်စရာကောင်းလာတော့မှာပဲ... ငါတို့တွေ ပူးပေါင်းလိုက်ရင်တောင် ခုခံဖို့ မဖြစ်နိုင်တော့ဘူး..."

မိုဝန်ထျန်းက အသက်ပြင်းပြင်း တစ်ချက်ရှူလိုက်ပြီး ခေါင်းညိတ်လိုက်သည်။

"ဟုတ်တယ်... ငါတို့ရဲ့ ခွန်အားနဲ့ဆိုရင် ခုခံနိုင်မှာ မဟုတ်ဘူး... ဒါ့ကြောင့် ဆရာ့ကိုပဲ လွှဲပေးလိုက်တာ အကောင်းဆုံးပဲ... ဆရာက တောင်ပေါင်းတစ်သိန်းတောင်တန်းထဲ ဝင်သွားတာနဲ့ ဒီတက်လှမ်းခြင်း မိုးကြိုးကပ်ဘေးကို သူ့ဆီ လွှဲပေးဖို့ ပြောထားခဲ့တယ်... ဒါက ဆရာ့ဆီမှာ အကြောင်းပြချက် တစ်ခုခု ရှိလို့ နေမှာပဲ..."

ထို့နောက် သူတို့လေးယောက်က အရှိန်ထပ်တင်လိုက်ပြီး တောင်ပေါင်းတစ်သိန်းတောင်တန်းဆီသို့ တစ်ဟုန်ထိုး ပြေးထွက်သွားကြတော့သည်။