အခန်း ၁၃၃
Vol. 14 Ch. 133
အခန်း (၁၃၃) နောက်ထပ် ကိုယ်ပွား ဆယ်ယောက်၊ အသေခံ အင်အားသုံး၍ တိုက်ခိုက်သည့် နည်းလမ်း
"ခရက် ခရက် ခရက်..." ပြတ်သားလှသော အသံများ ဆက်တိုက် မြည်ဟည်းသွားပြီးနောက် ကြေးမုံလ မီးလျှံလက်သည်းနွားသိုး ဆင့်ခေါ်ထားသော နောက်ဆုံး မှန်ချပ်ကလည်း အပိုင်းအစများအဖြစ် ပြိုကွဲသွားခဲ့ပြီ ဖြစ်သည်။
တစ်ချိန်တည်းမှာပင် ကြေးမုံလ မီးလျှံလက်သည်းနွားသိုးက ၎င်း၏ မူလမန္တန် ကို ထုတ်ဖော်၍ ဖန်တီးထားသော ပုံရိပ်ယောင် ကြေးမုံလ မီးလျှံလက်သည်းနွားသိုးများ အားလုံးသည်လည်း အပိုင်းအစများအဖြစ် ပြောင်းလဲကာ ပျောက်ကွယ်သွားခဲ့ကြသည်။
ကြေးမုံလ မီးလျှံလက်သည်းနွားသိုး၏ မူလခန္ဓာကိုယ်ကလည်း သွေးတစ်လုပ် ပြင်းထန်စွာ အန်ထုတ်လိုက်ရသည်။
ထိုအချိန်တွင် ချန်ကျီ၏ ပြိုင်ဘက်ကင်းရွှေခန္ဓာ အာနိသင် အချိန်ကလည်း ကုန်ဆုံးသွားခဲ့ပြီ ဖြစ်သည်။
နောက်ထပ် မျက်စိတစ်မှိတ်အတွင်းမှာပင် ချန်ကျီက ကြေးမုံလ မီးလျှံလက်သည်းနွားသိုး၏ နွားချိုတစ်စုံ၏ ထိုးဖောက်ခြင်းကို ခံလိုက်ရတော့သည်။
ချန်ကျီ၏ ခန္ဓာကိုယ် ထိုးဖောက်ခံလိုက်ရသော နေရာမှ သွေးများက ပန်းထွက်လာခဲ့သော်လည်း သူ တွေးထင်ထားသကဲ့သို့ နာကျင်မှု ဝေဒနာကမူ ပေါ်ပေါက်လာခြင်း မရှိပေ။
"ဒါက ကိုယ်ပွားရဲ့ ခန္ဓာကိုယ် ဖြစ်နေတာကို ငါ လုံးဝ မေ့သွားတယ်"
နွားချိုပေါ်တွင် ချိတ်ဆွဲခံထားရသော အမှတ် ၆၆ ကိုယ်ပွား၏ ခန္ဓာကိုယ်က ဖြည်းညှင်းစွာ ပုံရိပ်ယောင်အဖြစ် ပြောင်းလဲကာ ပျောက်ကွယ်သွားခဲ့သည်။
သူက ကြေးမုံလ မီးလျှံလက်သည်းနွားသိုးထံမှ သေစေနိုင်လောက်သော ထိခိုက်မှုကို ခံလိုက်ရခြင်း ဖြစ်သော်လည်း နောက်ထပ် နှစ်ဆယ့်လေးနာရီ ကြာပြီးနောက်တွင်မူ သူက နောက်ထပ် သူရဲကောင်းတစ်ယောက်အဖြစ် ပြန်လည် ပေါ်ပေါက်လာဦးမည် ဖြစ်သည်။
ချန်ကျီ၏ အသိစိတ် ကလည်း သူ၏ မူလခန္ဓာကိုယ်ဆီသို့ ပြန်လည် ရောက်ရှိသွားခဲ့ပြီ ဖြစ်သည်။
ကြေးမုံလ မီးလျှံလက်သည်းနွားသိုးက သူ၏ နွားချိုပေါ်ရှိ လူသားက မည်သည့်နေရာသို့ ရောက်ရှိသွားသည်ကို သံသယ ဝင်နေခဲ့သည်၊ ၎င်း၏ ခန့်မှန်းချက်က တကယ်ပဲ မှန်ကန်နေခဲ့သည်။
မူလနေရာတွင် ကျန်ရှိနေသေးသော ကိုယ်ပွားများသည်လည်း တစ်ချိန်တည်းမှာပင် ချန်ကျီ၏ အတွေး ကို ရရှိလိုက်ကြသည်။
"သူ့ကို အပိုင်ပိတ်ဆို့ထားကြစမ်း၊ အလွတ်မပေးနဲ့၊ ငါ အခုချက်ချင်း ပြန်လာခဲ့မယ်၊ တကယ်လို့ မတတ်နိုင်ရင် ကိုယ်ယောင် ဖျောက်မန္တန် ကို အသုံးပြုလို့ရတယ်"
ချန်ကျီ၏ အသိစိတ် က သူ၏ မူလခန္ဓာကိုယ်ဆီသို့ ပြန်လည် ရောက်ရှိသွားပြီးနောက် မျက်လုံးကိုပင် တစ်ချက်မျှ မဖွင့်ဘဲ အသိစိတ် က အနန္တနေရာလွတ် အတွင်းသို့ ထပ်မံ ဝင်ရောက်သွားခဲ့ပြန်သည်။
"ငါ့ကို ကိုယ်ပွားနဲ့ လာကစားတာလား၊ ကိုယ်ပွား ဆယ်ယောက်က မင်းကို မနိုင်ဘူးဆိုရင် ငါ နောက်ထပ် ဆယ်ယောက် ထပ်ခေါ်မယ်ကွ"
ချန်ကျီက အနန္တနေရာလွတ် အတွင်းသို့ ရောက်ရှိသွားပြီးနောက် ချက်ချင်းပင် အနန္တဆိုင်သို့ သွားလိုက်သည်။
"ငါ ကိုယ်ပွား ဆယ်ယောက် လဲလှယ်ချင်တယ်"
"ကိုယ်ပွား ဆယ်ယောက် လဲလှယ်မယ်ဆိုရင် အမှတ် ၇၁၅၀၀ ကုန်ကျမှာ ဖြစ်ပါတယ်၊ လဲလှယ်ဖို့ သဘောတူ ပါသလား"
"သဘောတူ တယ်"
ကိုယ်ပွား ဆယ်ယောက်က ခန္ဓာကိုယ် အစစ်အမှန်အဖြစ် စတင် စုစည်းနေစဉ်အတွင်း ချန်ကျီက အားမနေဘဲ ကိုယ်ပွားတစ်ယောက်၏ ခန္ဓာကိုယ်ပေါ်သို့ အသိစိတ် ထပ်မံ ဆင်းသက် လိုက်ပြန်သည်။
ချန်ကျီ ရောက်ရှိသွားသည့် အချိန်တွင် ကိုယ်ပွားများက ကြေးမုံလ မီးလျှံလက်သည်းနွားသိုးနှင့် ပြောက်ကျားစစ် ဆင်နွှဲနေသည်ကို မြင်တွေ့လိုက်ရသည်။
ကိုယ်ပွားများ အားလုံးက ကိုယ်ယောင်ဖျောက်မန္တန် ကို အသုံးပြုထားကြပြီး နေရာအနှံ့ ပတ်ပြေးကာ ကြေးမုံလ မီးလျှံလက်သည်းနွားသိုးကို လှည့်စားနေကြကာ ရံဖန်ရံခါတွင် ရုတ်တရက် ပေါ်လာပြီး ကြေးမုံလ မီးလျှံလက်သည်းနွားသိုးကို ခိုးတိုက်လေ့ ရှိကြသည်။
ချန်ကျီက ဤကဲ့သို့ ပြုလုပ်ခြင်းက ရေရှည်နည်းလမ်း မဟုတ်ကြောင်း သိရှိသဖြင့် ချက်ချင်းပင် ကိုယ်ပွားများကို အပြန်အလှန် ပူးပေါင်းဆောင်ရွက်ရန် ညွှန်ကြားလိုက်တော့သည်။
ထို့နောက် ချန်ကျီ၏ ညွှန်ကြားမှုအောက်တွင် ကိုယ်ပွားများက ကြေးမုံလ မီးလျှံလက်သည်းနွားသိုးနှင့် ပြောက်ကျားစစ် မဆင်နွှဲကြတော့ပေ ။
ကြေးမုံလ မီးလျှံလက်သည်းနွားသိုး နေရာအနှံ့ ဝင်တိုက်ခြင်းကို ကာကွယ်ရန်အတွက် ချန်ကျီက ကိုယ်ပွား လေးယောက်ကို ကြေးမုံလ မီးလျှံလက်သည်းနွားသိုးထံသို့ တိတ်တဆိတ် ချဉ်းကပ်စေကာ မြေကြီးဒိုင်းကာ မန္တန် ကို ထုတ်ဖော်စေလိုက်ရာ မြေတံတိုင်း လေးခုက ကြေးမုံလ မီးလျှံလက်သည်းနွားသိုးကို သေချာပေါက် ပိတ်လှောင်ထားလိုက်တော့သည်။
ကြေးမုံလ မီးလျှံလက်သည်းနွားသိုးက မြေတံတိုင်း လေးခု၏ ပိတ်လှောင်ခြင်းကို ခံထားရလျှင်ပင် ၎င်းက ရုန်းထွက်မည့် လှုပ်ရှားမှုများကို မရပ်တန့်ခဲ့ဘဲ ခန္ဓာကိုယ်ကို အဆက်မပြတ် ဝှေ့ယမ်းနေခဲ့ရာ မြေတံတိုင်း လေးခုက တုန်ခါနေခဲ့ရသည်။
၎င်းမှာ ကိုယ်ပွားများတွင် နာကျင်မှု ဝေဒနာ မရှိခြင်းနှင့် သေခြင်းတရားကို မသိရှိခြင်းကြောင့် ဖြစ်ပြီး အကယ်၍ သာမန် ကျင့်ကြံသူတစ်ယောက်သာ ဆိုပါက ဤတုန်ခါမှုကြောင့်ပင် ဒွါရခုနစ်ပေါက်မှ သွေးထွက်ကာ သေဆုံးသွားလောက်ပြီ ဖြစ်သည်။
သို့သော်လည်း ကိုယ်ပွား လေးယောက်က အချိန်အကြာကြီး တောင့်ခံထားနိုင်လိမ့်မည် မဟုတ်ဘဲ ဖျက်ဆီးခြင်း ခံရတော့မည် ဖြစ်သည်။
ထိုကိုယ်ပွား လေးယောက်အပြင် ချန်ကျီ အရင်က အသုံးပြုခဲ့သော နဂါးလှံနှင့် ချင်းယွမ်ဓား နှစ်လက်ကိုလည်း ကိုယ်ပွားများကို ထုတ်ယူ၍ အသုံးပြုစေလိုက်သည်။
လက်နက် သုံးခုက ကြေးမုံလ မီးလျှံလက်သည်းနွားသိုးအပေါ် ပေးနိုင်သော ထိခိုက်မှုက အကန့်အသတ် ရှိသော်လည်း ကောင်းကင်ဝိညာဉ်ပေါက်တူးကို လွှဲယမ်းခြင်းထက်စာရင်မူ ထိခိုက်မှု ပိုမို မြင့်မားလှသည်။
ထို့ပြင် လက်နက် သုံးခုလုံးတွင် မန္တန်ရုန်းများ ၏ ပံ့ပိုးမှု ရှိနေသဖြင့် ကြေးမုံလ မီးလျှံလက်သည်းနွားသိုးကို ထိခိုက်ဒဏ်ရာ အချို့ ပေးနိုင်ဆဲ ဖြစ်သည်။
ကျန်ရှိသော ကိုယ်ပွားများက တစ်ဖက်မှ ကောင်းကင်ဝိညာဉ်ပေါက်တူးဖြင့် တိုက်ခိုက်နေကြပြီး တစ်ဖက်မှလည်း ယာယီ ပိတ်လှောင်ခြင်း ခံထားရသော ကြေးမုံလ မီးလျှံလက်သည်းနွားသိုးထံသို့ မီးလုံးများကို ပစ်ပေါက်နေကြသည်။
ကိုယ်ပွားများက သူတို့၏ စွမ်းရည်အားလုံးကို ထုတ်သုံးနေကြသော်လည်း ကြေးမုံလ မီးလျှံလက်သည်းနွားသိုးကို အားအင်ကုန်ခမ်းအောင်သာ ပြုလုပ်နိုင်ခြင်း ဖြစ်ပြီး ၎င်းမှာ အသက်နှင့်လဲ၍ အားအင်ကုန်ခမ်းအောင် ပြုလုပ်နေခြင်း ဖြစ်သည်။
ချန်ကျီက ဤမြင်ကွင်းကို ကြည့်ကာ မချိပြုံး ပြုံးလိုက်ပြီး "ကြည့်ရတာ ငါက ကိုယ့်ကိုယ်ကိုယ် သိပ်ပြီး အထင်ကြီးမိသွားတာပဲ၊ ဆန်းကြယ် အဆင့်မြင့် မန္တန်အချို့နဲ့ ဆန်းကြယ် အဆင့်မြင့် လက်နက် ပြီးတော့ စနစ်စွမ်းရည် အနည်းငယ် ရှိရုံနဲ့ ကျင့်ကြံခြင်းနယ်ပယ် ကြီးတစ်ခုကို ကျော်ပြီး ရင်ဆိုင်နိုင်မယ်လို့ ထင်ထားမိတာ။ အနန္တဆိုင်ထဲက အဆင့်မြင့် မန္တန်တွေနဲ့ လက်နက် အများကြီးကို အချည်းနှီး ဖြစ်အောင် အသုံးမပြုဘဲ ထားမိတာပဲ၊ မဖြစ်ဘူး၊ ဒီတစ်ခေါက် ခရီးစဉ် ပြီးဆုံးသွားတဲ့အခါကျရင် ကိုယ့်ကိုယ်ကိုယ် သေသေချာချာ ထပ်ပြီး မြှင့်တင်ရမယ်။ ဒါမှမဟုတ်ရင် တကယ်လို့ ယဲ့ကိုင်လိုမျိုး ရွှေအူတိုင်အဆင့် ကျင့်ကြံသူတစ်ယောက်သာ လာတိုက်ခိုက်မယ်ဆိုရင် အနန္တကုန်စုံဆိုင်လေးက သူ့ကြောင့် မြေလှန်ခံလိုက်ရလိမ့်မယ်။ မတတ်နိုင်ရင်တော့ ကုန်စုံဆိုင်ဘက်မှာလည်း အရင်ဆုံး အစီအရင် တစ်ခုကို ခင်းကျင်း ထားရမယ်"
ချန်ကျီက သူ၏ လိုအပ်ချက်များကို တွေးတောနေစဉ်အတွင်း ကြေးမုံလ မီးလျှံလက်သည်းနွားသိုးက နောက်ထပ် ကိုယ်ပွားတစ်ယောက်ကို ထပ်မံ၍ တုန်ခါ သတ်ဖြတ်လိုက်ပြန်သည်။
သို့သော်လည်း ချက်ချင်းပင် နောက်ထပ် ကိုယ်ပွားတစ်ယောက်က နေရာဝင်ယူလိုက်ပြီး မြေကြီးဒိုင်းကာ မန္တန် ဖြင့် ကြေးမုံလ မီးလျှံလက်သည်းနွားသိုးကို ဆက်လက် ပိတ်လှောင်ထားလိုက်သည်။
ကြေးမုံလ မီးလျှံလက်သည်းနွားသိုးက လုံးဝကို ရူးသွပ် သွားခဲ့ပြီ ဖြစ်သည်၊ ဤလူများက ဘယ်ကလူတွေလဲ။
ကြေးမုံလ မီးလျှံလက်သည်းနွားသိုးက မပီပြင်လှသော စကားလုံးများဖြင့် ကိုယ်ပွားအားလုံးထံသို့ အသံလှမ်းပို့လိုက်သည်။ "မင်းတို့က ဘယ်သူတွေလဲ"
"လစ်စမ်း"
ကိုယ်ပွားအားလုံးက ကြေးမုံလ မီးလျှံလက်သည်းနွားသိုးကို လုံးဝ ဂရုမစိုက်ကြဘဲ သူတို့က သတ်ဖြတ်ခြင်းကြောင့် မျက်စိ နီမြန်းနေသည့်အလား တစ်စက္ကန့်မျှပင် မရပ်တန့်ကြပေ ။
ချန်ကျီ၏ ညွှန်ကြားမှုအောက်တွင် ကိုယ်ပွားများက မဟာဗျူဟာမြောက် စနစ်တကျ ပူးပေါင်းကာ ကြေးမုံလ မီးလျှံလက်သည်းနွားသိုး၏ အားအင်များကို ကုန်ခမ်းအောင် ပြုလုပ်နေကြသည်။
၎င်းသည်လည်း ချန်ကျီ လက်ရှိတွင် ကြေးမုံလ မီးလျှံလက်သည်းနွားသိုးကို ရင်ဆိုင်နိုင်မည့် တစ်ခုတည်းသော နည်းလမ်း ဖြစ်ပြီး ကိုယ်ပွားများကို အားကိုး၍သာ အားအင်ကုန်ခမ်းအောင် ပြုလုပ်နိုင်ခြင်း ဖြစ်သည်။
မကြာမီ အချိန်အတွင်းမှာပင် နောက်ထပ် ကိုယ်ပွားတစ်ယောက်က အားအင်ကုန်ခမ်းမှုကြောင့် သေဆုံးသွားခဲ့ပြန်သည်။
ထိုအချိန်တွင် ချန်ကျီက အနန္တဆိုင်အတွင်း ခုနက လဲလှယ်ထားသော ကိုယ်ပွား ဆယ်ယောက်လုံး ခန္ဓာကိုယ် စုစည်းမှု ပြီးဆုံးသွားပြီ ဖြစ်ကြောင်း ခံစားမိလိုက်သည်။
ချန်ကျီက နောက်ထပ် စကားအများကြီး ပြောမနေတော့ဘဲ ကိုယ်ပွား ဆယ်ယောက်လုံးကို ဤနေရာသို့ ဆင့်ခေါ်လိုက်ပြီး တစ်ဆက်တည်းမှာပင် သူတို့ကို ကောင်းကင်ဝိညာဉ်ပေါက်တူးများကိုပါ ယူဆောင်လာစေခဲ့သည်။
ကိုယ်ပွား ဆယ်ယောက် နေရာသို့ ရောက်ရှိလာသည်နှင့် ချန်ကျီ၏ အမိန့်ကို လက်ခံရရှိလိုက်ကြပြီး ကောင်းကင်ဝိညာဉ်ပေါက်တူးများကို လွှဲယမ်းကာ ကြေးမုံလ မီးလျှံလက်သည်းနွားသိုးကို တိုက်ခိုက်ကြတော့သည်။
ဖြည်းဖြည်းချင်းစီ ချန်ကျီက ကြေးမုံလ မီးလျှံလက်သည်းနွားသိုး၏ အော်ရာက ပိုမို၍ အားနည်းလာကာ ခုခံမှု ကလည်း ပိုမို၍ သေးငယ် လာသည်ကို ခံစားမိလိုက်သည်၊ ကြည့်ရတာ အားအင်ကုန်ခမ်းလုနီးပါး ပုံစံမျိုး ဖြစ်နေခဲ့ပြီ ဖြစ်သည်။
"ညီအစ်ကိုတို့... အားစိုက်ကြစမ်း"
"ဟုတ်ကဲ့ပါ သခင်"
ချန်ကျီက တစ်ဖက်တွင် မတ်တတ်ရပ်နေခဲ့ပြီး မီးလုံးများကို အဆက်မပြတ် ပစ်ပေါက်ကာ ကြေးမုံလ မီးလျှံလက်သည်းနွားသိုးကို တိုက်ခိုက်နေခဲ့သည်။
ရုတ်တရက် ခုနကတင် အားအင်ချည်းနဲ့နေသော ကြေးမုံလ မီးလျှံလက်သည်းနွားသိုးက မျက်စိတစ်မှိတ်အတွင်းမှာပင် ပြင်းထန်လှသော ဝိညာဉ်စွမ်းအား လှိုင်းကို ပေါက်ကွဲစေလိုက်သည်။
ကြေးမုံလ မီးလျှံလက်သည်းနွားသိုးကို ပိတ်လှောင်ထားသော ကိုယ်ပွား လေးယောက်က ချက်ချင်းပင် သေဆုံးသွားခဲ့ရသည်။
ချန်ကျီက ကြေးမုံလ မီးလျှံလက်သည်းနွားသိုး နောက်ထပ် မည်သည့်အရာကို ပြုလုပ်တော့မည်လဲဆိုသည်ကို သိလိုက်သည်။ "သူ ထွက်ပြေးချင်နေတာ၊ သူ့ကို အလွတ်မပေးနဲ့"
ကိုယ်ပွားများက သဘောပေါက်လိုက်ကြပြီး ချက်ချင်းပင် နောက်ထပ် ကိုယ်ပွား လေးယောက်က ထွက်လာခဲ့ကာ အသစ်စက်စက် မြေတံတိုင်း လေးခုဖြင့် ကြေးမုံလ မီးလျှံလက်သည်းနွားသိုးကို ထပ်မံ၍ ပိတ်လှောင်လိုက်ပြန်သည်။
ကြေးမုံလ မီးလျှံလက်သည်းနွားသိုးက ခုနကတင် ခန္ဓာကိုယ်အတွင်းရှိ ဝိညာဉ်စွမ်းအား အားလုံးကို ပေါက်ကွဲစေခဲ့ပြီး အရင်ဆုံး ထွက်ပြေးရန် ပြင်ဆင်ခဲ့ခြင်း ဖြစ်သည်။
နှမြောစရာကောင်းသည်က ချန်ကျီ၏ ကိုယ်ပွားများက တကယ်ကို ရင်ဆိုင်ရ ခက်ခဲလွန်းလှသဖြင့် ၎င်းကို မည်သည့် အခွင့်အရေးမျှ မပေးခဲ့ကြဘဲ ၎င်း၏ အစီအစဉ်အားလုံးကို ပျက်ပြယ်သွားစေခဲ့သည်။
ချန်ကျီက ကျယ်လောင်စွာ ရယ်မောလိုက်ပြီး "ဟားဟား... လက်နက်ချလိုက်စမ်း၊ မင်း ဘယ်လိုမှ ထွက်ပြေးလို့ မလွတ်နိုင်ဘူး"
သို့သော်လည်း ချန်ကျီ၏ မျက်ဝန်းများက ချက်ချင်းပင် ခက်ထန်ပြတ်သား သွားခဲ့ရသည်၊ ကြေးမုံလ မီးလျှံလက်သည်းနွားသိုးကြောင့် ယခုအကြိမ်တွင် သူ၏ ဆုံးရှုံးမှုက အနည်းငယ် ကြီးမားလွန်းလှသည်။
"ဒီတစ်ခေါက် ကိုယ်ပွားတွေရဲ့ ဆုံးရှုံးမှုက ကြီးမားလွန်းတယ်၊ သူ့ကို သတ်ပြီးရင်တောင် ဒီတစ်ခေါက် ဆုံးရှုံးမှုကို ပြန်ကာမိပါ့မလား မသိဘူး"
အချိန်က ဖြည်းညှင်းစွာ ကုန်ဆုံးသွားခဲ့ပြီး ကိုယ်ပွားများထဲမှ နောက်ထပ် နှစ်ယောက် ထပ်မံ၍ သတ်ဖြတ်ခြင်း ခံလိုက်ရပြန်သည်။
ဒါပေမဲ့ ကြေးမုံလ မီးလျှံလက်သည်းနွားသိုးတွင်လည်း ပြန်လည်ခုခံရန် ခွန်အား မရှိတော့ပေ ၊ တစ်ကိုယ်လုံး သွေးချင်းချင်းနီနေခဲ့ပြီး မည်သည့်အရာက ၎င်းကို ဤမျှအထိ ထိခိုက်ဒဏ်ရာ ရစေခဲ့သည်ကိုပင် ခွဲခြား၍ မရနိုင်တော့ပေ ။
"ဒီသားရေကိုလည်း သုံးလို့ရတော့မှာ မဟုတ်ဘူး ထင်တယ်"
"သူ့ကို အဆုံးသတ် လိုက်တော့"
ချန်ကျီက ကျယ်လောင်စွာ အော်ဟစ်လိုက်ပြီး ကိုယ်ပွားတစ်ယောက်၏ လက်ထဲမှ နဂါးလှံကို လှမ်းယူကာ ကြေးမုံလ မီးလျှံလက်သည်းနွားသိုး၏ လည်ပင်းဆီသို့ တိုက်ရိုက်ပင် ထိုးစိုက်ချလိုက်တော့သည်။
နဂါးလှံက ကြေးမုံလ မီးလျှံလက်သည်းနွားသိုးကို တိုက်ရိုက် ထိုးဖောက်သွားခဲ့ပြီး မြေကြီးထဲသို့ နက်ရှိုင်းစွာ စိုက်ဝင်သွားခဲ့သည်။
ကြေးမုံလ မီးလျှံလက်သည်းနွားသိုး၏ အသက်ရှူသံက လုံးဝ ပြတ်တောက်သွားခဲ့ပြီ ဖြစ်သည်။
ချန်ကျီက နဂါးလှံကို ဆွဲနှုတ်လိုက်ပြီး ကြေးမုံလ မီးလျှံလက်သည်းနွားသိုး၏ ခန္ဓာကိုယ်ပေါ်သို့ နောက်ထပ် လှံချက်အချို့ ထပ်မံ ထိုးစိုက်လိုက်ရာ ကြေးမုံလ မီးလျှံလက်သည်းနွားသိုး၏ ခန္ဓာကိုယ်ပေါ်တွင် ထိုးဖောက်ဒဏ်ရာ အနည်းငယ် ထပ်မံ တိုးပွားလာခဲ့သည်။
ကိုယ်ပွားများသည်လည်း နောက်ထပ် အချက်အချို့ ထပ်မံ ထိုးနှက် လိုက်ကြသည်၊ ၎င်းမှာ သေဆုံးသွားသော ၎င်းတို့၏ ရဲဘော်များအတွက် ကလဲ့စားချေပေးနေသည့်အလား ဖြစ်သည်။
ကြေးမုံလ မီးလျှံလက်သည်းနွားသိုးက လုံးဝကို သေဆုံးသွားခဲ့ပြီ ဖြစ်သည်။
"ဒီနေရာမှာတင် ချက်ချင်း ခွဲစိတ်လိုက် "
"ဟုတ်ကဲ့ပါ သခင်"
ချန်ကျီက နဂါးလှံကို သိမ်းဆည်းလိုက်ပြီး ကိုယ်ပွားများသည်လည်း လက်နက်များကို သိမ်းဆည်းလိုက်ကြကာ လက်ထဲရှိ လက်နက်များက ဓားမြှောင်အဖြစ်သို့ ပြောင်းလဲသွားခဲ့ကြသည်။
အရင်က မိစ္ဆာသားရဲများကို ခွဲစိတ် ဖူးသော အတွေ့အကြုံရှိသည့် ကိုယ်ပွားက အသစ်ရောက်လာသော ကိုယ်ပွားများကို ခွဲစိတ် သည့် အတွေ့အကြုံများကို သင်ကြားပေးနေခဲ့သည်။
"သခင်... မိစ္ဆာအူတိုင် တစ်တုံး ရှိတယ်"
"ငါ့ကို ပေး၊ ကြည့်ရအောင်" ချန်ကျီက အလွန်ပင် စိတ်ဝင်တစားဖြင့် ပြောလိုက်သည်။