အခန်း ၁၄၀
Vol. 14 Ch. 140
အခန်း (၁၄၀) မိတ်ဆွေ ဒုတိယထပ်ကို ကြွပါ၊ စီနီယာ ကျေးဇူးပြုပြီး ခွင့်လွှတ်ပေး ပါ
ချန်ကျီက အမှတ် ၆၆ ကိုယ်ပွား၏ ခန္ဓာကိုယ်ကို ထပ်မံထိန်းချုပ်လိုက်ရာ ယခုတစ်ခေါက်တွင် သူ၏ ခံစားချက်မှာ ယခင်ကထက် သိသိသာသာ ထူးခြားကွဲပြားနေသည်ကို ခံစားလိုက်ရသည်။
ရွှေအူတိုင်အဆင့်သို့ တက်လှမ်းပြီးနောက် ချန်ကျီ၏ ဝိညာဉ်အာရုံ မှာ သိသိသာသာ ပိုမိုသန်မာ လာခဲ့သည်။
ယခင်က ကျင့်ကြံခြင်းအဆင့်ကို အကဲမဖြတ်နိုင်ခဲ့သော ကျင့်ကြံသူများကိုပင် ယခုအခါ သူ သိလိုပါက အလွယ်တကူ အာရုံခံ ကြည့်နိုင်ပြီ ဖြစ်သည်။
"ဘာလို့ ရွှေအူတိုင်အဆင့် ကျင့်ကြံသူတွေ ဒီလောက်တောင် များနေရတာလဲ" ချန်ကျီက ရင်ထဲမှ မချီးမွမ်းဘဲ မနေနိုင်တော့ပေ။
ယခင်ကမူ သူက လုံချင်းမြို့တွင် ချီသန့်စင်ခြင်း နှင့် အုတ်မြစ်ချခြင်း အဆင့်များသာ များပြားသည်ဟု ထင်မှတ်ခဲ့ခြင်း ဖြစ်သည်။ ယခုအခါ ဝိညာဉ်အာရုံ သန်မာလာသည့်အတွက် အာရုံခံနိုင်သည့် အတိုင်းအတာမှာလည်း ပိုမိုကျယ်ပြန့်လာပြီး အာရုံခံနိုင်စွမ်းမှာလည်း ပိုမိုထက်မြက်လာခဲ့သည်။
သို့သော်လည်း ဤသို့ ပြုလုပ်ခြင်းက တစ်ဖက်လူအား သူ၏ စုံစမ်းထောက်လှမ်းမှုကို ရိပ်မိသွားစေနိုင်သဖြင့် ပုံမှန်အားဖြင့် သူက ကျင့်ကြံသူတစ်ဦး၏ အတိအကျ ကျင့်ကြံခြင်းအဆင့်ကို ဝိညာဉ်အာရုံဖြင့် တိုက်ရိုက် စုံစမ်းလေ့မရှိဘဲ တစ်ဖက်လူ၏ အော်ရာကိုသာ အနည်းငယ် ခံစားကြည့်လေ့ရှိသည်။
မကြာမီ အချိန်အတွင်းမှာပင် ချန်ကျီက စစ်ဟိုင် ကုန်သွယ်ရေးအသင်း၏ အဆောက်အအုံ ရှေ့သို့ ပြန်လည်ရောက်ရှိလာခဲ့သည်။
စစ်ဟိုင် ကုန်သွယ်ရေးအသင်းအတွင်းသို့ ဝင်ထွက်သွားလာနေကြသော လူများမှာ တကယ့်ကို မနည်းလှပေ၊ ကျင့်ကြံသူ တစ်ယောက်ပြီးတစ်ယောက် သားနားလှပသော ဝတ်စုံများကို ဝတ်ဆင်ထားကြပြီး မျက်နှာပေါ်တွင်လည်း ယုံကြည်ချက်ရှိသော အပြုံးများ ဆင်မြန်းထားကြရာ ကြည့်ရုံမျှဖြင့် ဝိညာဉ်ကျောက်တုံး မရှားပါးသော သူဌေးများဖြစ်ကြောင်း သိသာလှသည်။
"တကယ့်ကို ကျင့်ကြံသူတွေရဲ့ မြို့ကြီးပဲ၊ ကျင့်ကြံခြင်း အငွေ့အသက်က တကယ့်ကို အားကောင်းတာပဲ" ချန်ကျီ၏ မျက်စိရှေ့တွင် လမ်းလျှောက်နေသော သိုးကမ္ဘာပတ် အုပ်စုကြီးကို မြင်တွေ့နေရသည့်အလား ခံစားလိုက်ရသည်။
"မဖြစ်ဘူး၊ နောင်ကျရင် ဒီလို ကျင့်ကြံခြင်း မြို့ကြီးတွေမှာ ငါ့ရဲ့ ကုန်စုံဆိုင်တွေကို လိုက်ဖွင့်ရမယ်"
ချန်ကျီက စိတ်ထဲမှ တွေးတောရင်း စစ်ဟိုင် ကုန်သွယ်ရေးအသင်းအတွင်းသို့ ဖြည်းညှင်းစွာ လျှောက်လှမ်း ဝင်ရောက်သွားခဲ့သည်။
ချက်ချင်းပင် ဝန်ထမ်းတစ်ဦးက ချန်ကျီကို လာရောက် နှုတ်ဆက်လေသည်။ " မိတ်ဆွေ ... ကျွန်တော်တို့ဆီက ဘာများ ကူညီပေးရမလဲ"
"ဒီလို ဝန်ဆောင်မှုပေးတဲ့ အမူအရာက မဆိုးဘူးပဲ၊ ငါ့ကုန်စုံဆိုင်ကလူတွေ ဒါကို အတုယူရမယ်"
ချန်ကျီသည် အတွင်းသို့ မဝင်ခင်က မသိခဲ့သော်လည်း ဝင်ကြည့်လိုက်မှသာ စစ်ဟိုင် ကုန်သွယ်ရေးအသင်းကြီး၏ အတွင်းပိုင်းမှာ တကယ့်ကို ကျယ်ဝန်းလှကြောင်း သိရှိလိုက်ရသည်။
ကောင်တာ တစ်ဒ အပြင် ယခု ပထမထပ်တွင် လူပေါင်း လေးဆယ်ကျော်ခန့် ရှိနေသော်လည်း ဤနေရာကြီးမှာ လုံးဝ ကျပ်ညပ်ပိတ်လှောင်နေခြင်း မရှိပေ။
ယခုအခြေအနေမှာ စစ်ဟိုင် ကုန်သွယ်ရေးအသင်း၏ ပထမထပ်မျှသာ ရှိသေးပြီး ချန်ကျီက ဒုတိယထပ်သို့ တက်ရောက်နိုင်သော လှေကားကိုလည်း မြင်တွေ့ထားပြီး ဖြစ်သည်။
"ဒုတိယထပ်မှာတော့ ပိုပြီး အဖိုးတန်တဲ့ ပစ္စည်းတွေကို ရောင်းချတဲ့နေရာ ဖြစ်ရမယ်"
ချန်ကျီက စစ်ဟိုင် ကုန်သွယ်ရေးအသင်းအတွင်းရှိ ဧည့်ကြို ဝန်ထမ်း အရေအတွက်မှာ ပစ္စည်းလာ ဝယ်ယူကြသော ကျင့်ကြံသူများထက်ပင် ပိုမိုများပြားနေသည်ကို သတိပြုမိလိုက်သည်။
" မိတ်ဆွေ..." ဝန်ထမ်းက ချန်ကျီကို နောက်တစ်ကြိမ် လှမ်းခေါ်လိုက်သည်။
ချန်ကျီက ထိုအခါမှ အကြည့်ကို ပြန်လည်ရုပ်သိမ်းလိုက်ပြီး တည်ငြိမ်ဟန်ဆောင်ကာ မေးလိုက်သည်။ "မင်းတို့ဆီမှာ ဘာပစ္စည်းတွေ ရောင်းဖို့ရှိလဲ ငါ လိုအပ်တဲ့ ပစ္စည်းတွေက နည်းနည်း များတယ်"
ဆိုင်ဝန်ထမ်းက ချန်ကျီ၏ စကားကို ကြားလိုက်ရသောအခါ မျက်လုံးထဲတွင် အရောင်တစ်ချက် တောက်ပသွားပြီး ပြုံးရွှင်စွာဖြင့် ပြောလိုက်သည်။ "အော်... မိတ်ဆွေ စိတ်ချပါ၊ ကျွန်တော်တို့ဆီမှာ အကုန်ရှိပါတယ်၊ မိတ်ဆွေ လိုအပ်တာမှန်သမျှ အားလုံးကို တောင်းဆိုနိုင်ပါတယ်။ တကယ်လို့ ရှားပါးအဖိုးတန် ပစ္စည်းတွေဆိုရင်တောင် ကျွန်တော်တို့ စစ်ဟိုင် ကုန်သွယ်ရေးအသင်းရဲ့ လေလံပွဲမှာ ဝယ်ယူနိုင်ပါတယ်"
"အော်... ဒီလိုလား ဒါဆိုရင် ငါက ဆေးလုံးအချို့ လိုချင်တယ်၊ ပြီးတော့ ပစ္စည်းအချို့လည်း ရှိသေးတယ်၊ မင်းတို့ဆီက လက်ခံမခံတော့ မသိဘူး"
ချန်ကျီက ဤစစ်ဟိုင် ကုန်သွယ်ရေးအသင်း၏ အရောင်းအဝယ် အယူအဆမှာ သူ၏ အနန္တကုန်စုံဆိုင်နှင့် တစ်ပုံစံတည်း တူညီနေလိမ့်မည်ဟု မထင်မှတ်ထားခဲ့ပေ။
"ကျေးဇူးပြုပြီး မိတ်ဆွေ ဘာပစ္စည်းတွေ လိုအပ်လဲဆိုတာ ပြောပြပေးပါ၊ ကျွန်တော်တို့ စစ်ဟိုင် ကုန်သွယ်ရေးအသင်းမှာ မရှိဘူးဆိုရင် လုံချင်းမြို့က ဘယ်ဆိုင်မှာမှ ဒုတိယတစ်ဆိုင် ရှိလာမှာ မဟုတ်ပါဘူး"
"အုတ်မြစ်ချ ဆေးလုံး ရော ရှိလား"
"ရှိပါတယ်"
ချန်ကျီက ခေါင်းငြိမ့်ပြလိုက်ပြီး "တစ်လုံးကို ဝိညာဉ်ကျောက်တုံး ဘယ်လောက်လဲ"
"အဆင့်နိမ့် ဝိညာဉ်ကျောက်တုံး ၆၀၀၀ ပါ"
ဆိုင်ဝန်ထမ်း၏ ဈေးနှုန်းကို ကြားလိုက်ရသောအခါ ချန်ကျီက ခေတ္တမျှ ဆွံ့အသွားပြီး ဆိုင်ဝန်ထမ်းကို ချက်ချင်း ပြန်မဖြေဘဲ ရင်ထဲ၌ တွက်ချက်နေမိသည်။
"ဒီအုတ်မြစ်ချ ဆေးလုံးက ထင်သလောက် ဝယ်ရမခက်ပါလား၊ ဒါပေမဲ့ ဈေးက နည်းနည်း ကြီးတယ်၊ အရင်းဈေးက အဆင့်နိမ့် ဝိညာဉ်ကျောက်တုံး ၃၀၀ ပဲ ရှိတာကို အဆ ၂၀ တောင် တင်ထားတာပဲ၊ အရေးကြီးဆုံးက ငါရောင်းတာထက် ပိုဈေးကြီးနေတယ်၊ ပြီးတော့ ဒါက အလယ်အလတ် ဆေးလုံးလည်း သေချာပေါက် မဟုတ်လောက်ဘူး"
" မိတ်ဆွေ..." ဆိုင်ဝန်ထမ်းက ချန်ကျီကို သံသယဖြင့် ကြည့်လိုက်သည်။
"အင်း... စျေးသိပ် မကြီးပါဘူး၊ ဆန်းကြယ် အဆင့် လက်နက် ရော ရှိလား"
ဆိုင်ဝန်ထမ်းက ဤသူသည် ဖောက်သည်ကြီး ဖြစ်ကြောင်း သိလိုက်သဖြင့် မျက်နှာတွင် ဝမ်းသာအားရ ဖြစ်သွားပြီး ပြောလိုက်သည်။ "မိတ်ဆွေ လိုအပ်တယ်ဆိုရင် ကျွန်တော် အခုပဲ မိတ်ဆွေကို ဒုတိယထပ်ကို ကြွဖို့ စီစဉ်ပေးပါ့မယ်"
စစ်ဟိုင် ကုန်သွယ်ရေးအသင်းတွင် ဖောက်သည်များ၏ ကျင့်ကြံခြင်းအဆင့်ကို စိတ်ကြိုက် စုံစမ်းထောက်လှမ်းခြင်း မပြုရဟူသော စည်းကမ်းရှိသည်၊ ဤအရာက ရိုင်းပျသော အပြုအမူ ဖြစ်သောကြောင့် ဖြစ်သည်။
ထို့ပြင် အကယ်၍သာ အဆင့်မြင့် ကျင့်ကြံသူကြီးများကို စိတ်အနှောင့်အယှက် ဖြစ်စေပါက မကောင်းသဖြင့် သူက ချန်ကျီ၏ ကျင့်ကြံခြင်းအဆင့်ကို အာရုံမခံခဲ့သောကြောင့် ချန်ကျီတွင် မည်သည့် လိုအပ်ချက်များ ရှိနေသည်ကို မသိရှိရခြင်း ဖြစ်သည်။
ချန်ကျီကဲ့သို့ ရောက်ရောက်ချင်း ဆန်းကြယ် အဆင့် လက်နက်ကို မေးမြန်းသော ဖောက်သည်မျိုးမှာ ကျင့်ကြံခြင်းအဆင့် သေချာပေါက် မနိမ့်နိုင်သကဲ့သို့ အရေးကြီးဆုံးမှာ ဝိညာဉ်ကျောက်တုံး မရှားပါးသည်မှာ သေချာသဖြင့် သေချာပေါက် ဒုတိယထပ်သို့ ဖိတ်ခေါ်ရမည် ဖြစ်သည်။
စစ်ဟိုင် ကုန်သွယ်ရေးအသင်း၏ ပထမထပ်တွင် ချီသန့်စင်ခြင်း အဆင့် ကျင့်ကြံသူများ လိုအပ်သော ပစ္စည်းများကိုသာ ရောင်းချပြီး ဒုတိယထပ်မှသာ အုတ်မြစ်ချခြင်းအဆင့် ကျင့်ကြံသူများအတွက် ပစ္စည်းများကို ရောင်းချခြင်း ဖြစ်သည်။
"အော်... ဒီလိုလား ဒါဆိုရင် ဒုတိယထပ်ကို သွားကြတာပေါ့" ချန်ကျီက စိတ်ထဲမှ ကြိုတင် ခန့်မှန်းထားပြီး ဖြစ်သည်။
"ကောင်းပါပြီ၊ မိတ်ဆွေ ဒီဘက်ကို ကြွပါ"
ချန်ကျီက ခေါင်းငြိမ့်ပြလိုက်ပြီး လောက အပြင်မှ ပညာရှိကြီးတစ်ဦးအလား ဟန်ပန်ဖြင့် လျှောက်လှမ်းလိုက်သည်။ သူက ထိုလှေကားကို စောစောကတည်းက သတိပြုမိထားပြီး ဖြစ်ရာ သူ၏ ခန့်မှန်းချက်နှင့် ကွက်တိ ကိုက်ညီနေခဲ့သည်။
ဆိုင်ဝန်ထမ်းက ချန်ကျီကို ခေါ်ဆောင်ကာ ဒုတိယထပ်သို့ တက်သွားစဉ် အခြားသော ဝန်ထမ်းများက သူ့ကို အားကျသော အကြည့်များဖြင့် ဝိုင်းကြည့်ကြသည်။
ဒုတိယထပ်တွင် ရောင်းချသော ကုန်ပစ္စည်းများ၏ ဈေးမှာ မြင့်သဖြင့် ရရှိမည့် ကော်မရှင်ခမှာလည်း ပထမထပ်ထက် အဆမတန် များပြားသည်။
အကယ်၍ အရောင်းအဝယ်တစ်ခု အောင်မြင်သွားပါက ပထမထပ်တွင် တစ်လလုံး ရောင်းချရသည့် ကော်မရှင်ခထက်ပင် ပိုမိုများပြားလှသည်။
ဆိုင်ဝန်ထမ်းက ချန်ကျီကို ဒုတိယထပ်သို့ ခေါ်ဆောင်လာပြီးနောက် ချန်ကျီက ပတ်ဝန်းကျင်ကို ဝေ့ဝဲကြည့်လိုက်သည်။
ဤနေရာက ပထမထပ်ထက် သေချာပေါက် ပိုမိုတိတ်ဆိတ် ငြိမ်သက်လှသည်၊ ဒုတိယထပ်ရှိ ကောင်တာများမှာ ပထမထပ်လောက် မများပြားသကဲ့သို့ နေရာလွတ် မှာလည်း ပိုမိုကျယ်ဝန်းကာ ပစ္စည်းလာ ဝယ်ယူနေကြသော ကျင့်ကြံသူများမှာလည်း ခုနစ်ယောက်၊ ရှစ်ယောက်ခန့်သာ ရှိသည်။
"ဒီကို တက်လာတော့ တခြား ဝန်ထမ်းနဲ့ လဲဖို့ မလိုဘူးလား" ချန်ကျီက သံသယဖြင့် မေးလိုက်သည်။
"မိတ်ဆွေ တွေးလွန်သွားပါပြီ၊ ဒုတိယထပ်မှာလည်း ကျွန်တော်ကပဲ မိတ်ဆွေအတွက် ဝန်ဆောင်မှု ပေးသွားမှာပါ၊ ဒုတိယထပ်ကို ဖိတ်ခေါ်ရတာက ပထမတစ်ခုအနေနဲ့ မိတ်ဆွေရဲ့ ဂုဏ်သိက္ခာကို ဖော်ဆောင်ပေးတာဖြစ်ပြီး ဒုတိယအနေနဲ့ကတော့ ဒီနေရာက ပိုပြီး တိတ်ဆိတ်တဲ့အပြင် လူရှုပ်တာ ကင်းတဲ့အတွက် မိတ်ဆွေရဲ့ လျှို့ဝှက်ချက်ကိုလည်း အာမခံချက် ပေးနိုင်လို့ပါ"
"ဒီလိုကိုး" ချန်ကျီက သဘောပေါက်သွားသော်လည်း ဤမျှအထိ လုပ်ရန် မလိုအပ်ဟု ခံစားလိုက်ရသည်။
"မိတ်ဆွေက ဆန်းကြယ် အဆင့် လက်နက်ကို ဝယ်ယူဖို့ လိုအပ်တာ မဟုတ်လား"
"ဟုတ်တယ်၊ ဆန်းကြယ် အဆင့် လက်နက်တွေက ဈေးနှုန်း ဘယ်လောက်ရှိလဲ"
ဆိုင်ဝန်ထမ်းက တက်ကြွစွာဖြင့် ပြောလိုက်သည်။ "ဆန်းကြယ် အဆင့် အဆင့်နိမ့် လက်နက်တစ်ခုကို အဆင့်နိမ့် ဝိညာဉ်ကျောက်တုံး ၁၀၀၀၀၊ အလယ်အလတ် ဆိုရင် ၂၀၀၀၀ နဲ့ အဆင့်မြင့် ဆိုရင်တော့ အဆင့်နိမ့် ဝိညာဉ်ကျောက်တုံး ၄၀၀၀၀ ပါ၊ မိတ်ဆွေ ကြည့်ပါ၊ ဘယ်လိုအမျိုးအစားကို လိုချင်ပါသလဲ"
"ဒီဈေးက နည်းနည်း ကြီးတယ်၊ ငါ တခြားဟာတွေပဲ အရင်ကြည့်လိုက်ဦးမယ်"
" မိတ်ဆွေ... ဒီဈေးက မကြီးလှပါဘူး၊ မိတ်ဆွေအနေနဲ့ ကျွန်တော်တို့ စစ်ဟိုင် ကုန်သွယ်ရေးအသင်းမှာမို့လို့သာ ဒီပစ္စည်းတွေကို ဝယ်ယူနိုင်တာပါ၊ တကယ်လို့ တခြားဆိုင်တွေကို သွားမယ်ဆိုရင် ဒီဈေးနဲ့ ရဖို့ မပြောနဲ့၊ ပစ္စည်း ရှိမရှိဆိုတာတောင် မသေချာပါဘူး"
"အော် စစ်ဟိုင် ကုန်သွယ်ရေးအသင်းရဲ့ အင်အားက ဒီလောက်တောင် သန်မာ တာလား ငါ အရင်က ဘာလို့ မကြားဖူးရတာလဲ"
"မိတ်ဆွေ... ဒါကတော့ မိတ်ဆွေ မသိသေးလို့ပါ၊ ကျွန်တော်တို့ စစ်ဟိုင် ကုန်သွယ်ရေးအသင်းက လုံချင်းမြို့ကို ရောက်ရှိ အခြေစိုက်လာတာ တစ်နှစ်တောင် မပြည့်သေးပါဘူး"
"စစ်ဟိုင် ကုန်သွယ်ရေးအသင်းက ဒီလောက် အစွမ်းထက်တာကို အရင်က ဘာလို့ လုံချင်းမြို့ကို မလာခဲ့တာလဲ"
"ဒါကတော့ ထုတ်ပြောဖို့ အဆင်မပြေပါဘူး" ဆိုင်ဝန်ထမ်းက လျှို့ဝှက်ဆန်းကြယ်ဟန်ဖြင့် ပြောလိုက်သည်။
ချန်ကျီက ခေတ္တမျှ တွေးပြီးနောက် ထပ်မံ မေးလိုက်သည်။"ဒါဆို ရွှေအူတိုင်အဆင့်တက် ဆေးလုံး ကော ဝိညာဉ်ကျောက်တုံး ဘယ်လောက်လဲ"
"ရွှေအူတိုင်အဆင့်တက် ဆေးလုံး ဟုတ်လား" ဆိုင်ဝန်ထမ်းက ခေတ္တမျှ တွန့်ဆုတ်သွားပြီး ချန်ကျီကို အကဲခတ်ကြည့်ကာ နောက်ဆုံးတွင် ပြောလိုက်သည်။ "ရွှေအူတိုင်အဆင့်တက် ဆေးလုံး တစ်လုံးကို အဆင့်နိမ့် ဝိညာဉ်ကျောက်တုံး ၄၀၀၀၀ လိုအပ်ပါတယ်"
ချန်ကျီက ပြုံး၍ ပြောလိုက်သည်။ "စစ်ဟိုင် ကုန်သွယ်ရေးအသင်းမှာ တကယ်ကို အကုန်ရှိတာပဲ"
"ဒါကတော့ မိတ်ဆွေ စိတ်ချပါ၊ စစ်ဟိုင် ကုန်သွယ်ရေးအသင်းမှာ ဒီလောက် အင်အားတော့ ရှိပါတယ်" ဆိုင်ဝန်ထမ်း၏ စကားလုံးများထဲတွင် ဂုဏ်ယူဝင့်ကြွားနေသော အငွေ့အသက်များ ပါဝင်နေသည်။
"ဒါဆို မြေကြီး အဆင့် လက်နက် နဲ့ အခြေတည်ဝိညာဉ် အဆင့်တက် ဆေးလုံး ကော ရှိလား"
ဆိုင်ဝန်ထမ်းက ချန်ကျီ၏ ရည်ရွယ်ချက်ကို စတင် သံသယဝင်လာခဲ့ပြီး လေသံမှာလည်း မာထန်သွားကာ ပြောလိုက်သည်။ " မိတ်ဆွေ... မိတ်ဆွေက တကယ်ပဲ ပစ္စည်းလာဝယ်တာ ဟုတ်ရဲ့လား"
"ဘာလဲ... မတူလို့လား" ချန်ကျီက ခပ်ဖွဖွ ရယ်မောလိုက်ပြီးနောက် သူ၏ ခန္ဓာကိုယ်မှ ရွှေအူတိုင်အဆင့် ၏ ဖိအားနှင့် အော်ရာများကို ချက်ချင်း ထုတ်လွှတ်လိုက်သည်။
ဆိုင်ဝန်ထမ်း၏ မျက်နှာမှာ ချက်ချင်းပင် ဖြူလျော်သွားခဲ့ပြီး သူ စကားမှားသွားကြောင်း သိလိုက်ရသည်။ "စီနီယာ... ကျွန်တော် အဲဒီလို ရည်ရွယ်တာ မဟုတ်ပါဘူး၊ ကျေးဇူးပြုပြီး ခွင့်လွှတ်ပေးပါ"