အခန်း ၉၇၁

အခန်း (၉၇၁) - ခန္ဓာပေါင်းစည်းခြင်းအဆင့် ရုပ်ခန္ဓာသို့ တက်လှမ်းခြင်း၊ နဂါးဆင်ခန္ဓာကိုယ်နှင့် သတ္တမအဆင့် ဝိညာဉ်ဆေးပင် ဖီးနစ်သွေးပန်းကို ရရှိခြင်း (၁)

'အင်း...'

ဤအခိုက်အတန့်တွင် ကျိုးစွေ့သည်ကား ဖီးနစ်အင်မော်တယ်စံအိမ်၏ တားမြစ်အစီအရင်တစ်ခုလုံးကို အာရုံခံနေလေ၏။

ယခုအချိန်၌ သူ၏ကိုယ်ပေါ်တွင် 'အစီအရင်နှလုံးသားကူ' မရှိသော်ငြား အစီအရင်ကျင့်ကြံမှုမှာ သတ္တမအဆင့် အထွတ်အထိပ်သို့ ရောက်ရှိနေခဲ့ပြီဖြစ်သည်။ ဤသည်မှာ အလွန်တရာ နက်နဲလှသော နယ်ပယ်တစ်ခုပင် ဖြစ်ချေပြီ။

ထို့ကြောင့် ဖီးနစ်အင်မော်တယ်စံအိမ်၏ တားမြစ်အစီအရင်ကို သူသည် အခက်အခဲမရှိ အာရုံခံနိုင်နေခြင်း ဖြစ်၏။

အင်မော်တယ်စံအိမ်တစ်ခုလုံးအား အင်မော်တယ်အစီအရင်တစ်ခုက လွှမ်းခြုံထားပုံရသည်။

ဝိညာဉ်လောက၏ အစီအရင်များနှင့် မတူညီသည်မှာ ဤအင်မော်တယ်အစီအရင်၏ မျဉ်းကြောင်းများက လေဟာနယ်အတွင်းသို့ အပြည့်အဝ ပေါင်းစပ်ဝင်ရောက်နေခြင်းပင် ဖြစ်လေသည်။ ဤသည်မှာ ဥပဒေသမျဉ်းကြောင်းများကဲ့သို့ ဤကမ္ဘာလောကနှင့် တစ်သားတည်း ပေါင်းစပ်နေကာ အမှန်တကယ်ပင် အနက်အဓိပ္ပါယ်ကို ခန့်မှန်း၍မရနိုင်အောင် နက်နဲလှပေသည်။

မဟာယာနအဆင့် ကျင့်ကြံသူများပင်လျှင် ဖီးနစ်အင်မော်တယ်စံအိမ်ကို မည်သို့မျှ မတတ်နိုင်သည်မှာ အံ့ဩစရာ မဟုတ်တော့ပေ။

ဤသို့သော အင်မော်တယ်အဆင့် အစီအရင်မှ ပေါက်ကွဲထွက်လာသည့် စွမ်းအားတစ်ခုတည်းနှင့်ပင် မဟာယာနအဆင့် ကျင့်ကြံသူမည်မျှကို သေဆုံးအောင် တုန်ခါသွားစေနိုင်မည်နည်းဆိုသည်ကို မသိနိုင်ချေ။

ယခင်က မိုးကြိုးအင်မော်တယ်စံအိမ်အတွင်းသို့ လူအများ ဝင်ရောက်နိုင်ခဲ့ရခြင်းမှာ အဆိုပါစံအိမ်သည် အင်မော်တယ်ကမ္ဘာမှ ကျဆင်းလာခဲ့ပြီးနောက် ကြီးမားစွာ ပျက်စီးသွားခဲ့သဖြင့် အစီအရင်များ မပြည့်စုံတော့သောကြောင့်သာ ဖြစ်၏။

သို့သော်ငြား ဖီးနစ်အင်မော်တယ်စံအိမ်မှာမူ တူညီမည်မဟုတ်ပေ‌။ ၎င်းသည် မိုးကြိုးအင်မော်တယ်စံအိမ်ထက် အဆပေါင်းများစွာ ပိုမိုပြည့်စုံနေလေသည်။

အဘယ်ကြောင့်ဆိုသော် ၎င်းတွင် ပါဝင်နေသော စွမ်းအားများက စိတ်ကူးမယဉ်ရဲလောက်အောင် ကြောက်မက်ဖွယ်ကောင်းလွန်းနေပြီး အင်မော်တယ်တစ်ပါး လူ့လောကသို့ ဆင်းသက်လာသည့်အလား ဖြစ်နေသောကြောင့်ပင်။

'ဖီးနစ်အင်မော်တယ်စံအိမ်မှာ ဟင်းလင်းပြင်မှတ်တိုင် ချန်ထားခဲ့ရင်တောင် ‘တည်နေရာပြောင်းကူ’က ဝင်လာနိုင်ဖို့ မသေချာဘူး...'

ကျိုးစွေ့က မျက်လုံးများကို မှေးကျဉ်းလိုက်၏။

အမှန်စင်စစ်အားဖြင့် သူသည် ယခုအချိန်တွင် ဖေးဟော်ပျံလျှို့ဝှက်နယ်မြေမှ ပုံစံအတိုင်း ပြန်လည်အသက်သွင်းကာ သူ၏ လှည့်ကွက်ဟောင်းကို ထပ်မံအသုံးပြုချင်နေခဲ့သည်။

အကယ်၍ ဖီးနစ်အင်မော်တယ်စံအိမ်တွင် ဟင်းလင်းပြင်မှတ်တိုင် ချန်ထားနိုင်ခဲ့ပါက စံအိမ်ပိတ်သွားလျှင်ပင် သူသည် အချိန်မရွေး ဝင်ရောက်နိုင်မည်ဖြစ်ပြီး အတွင်းရှိ အရင်းအမြစ်များကို လုယက်ယူငင်နိုင်မည် မဟုတ်ပါလော။

ထိုသို့ဆိုလျှင် အင်မော်တယ်စံအိမ်တစ်ခုလုံးရှိ ရတနာများအားလုံးသည် သူဆန္ဒရှိသလို ယူငင်နိုင်ပေမည်။

အခြားကျင့်ကြံသူများကဲ့သို့ တစ်ကြိမ်ဝင်ရောက်နိုင်ရန်အတွက် နှစ်ပေါင်းသောင်းချီ၍ စောင့်ဆိုင်းနေရန် လုံးဝ လိုအပ်တော့မည် မဟုတ်ပေ။

သို့ရာတွင် ယခုအခါ၌ ကိစ္စရပ်များက ဤမျှ မရိုးရှင်းကြောင်း သူ သဘောပေါက်သွားခဲ့ချေပြီ။

အဘယ်ကြောင့်ဆိုသော် အင်မော်တယ်အဆင့် အစီအရင်၏ စွမ်းအားက အလွန်တရာ ကြီးမားလွန်းလှပြီး လေဟာနယ်ကိုပါ ဖြတ်တောက်နိုင်စွမ်းရှိသော လေဟာနယ်အတားအဆီးတစ်ခုကို ဖြစ်ပေါ်စေသောကြောင့်ပင်။

ဆဋ္ဌမအဆင့် 'တည်နေရာပြောင်းကူ' ၏ စွမ်းအားကို အားကိုးရုံဖြင့် ဤတားမြစ်အစီအရင်ကို ဖောက်ထွက်နိုင်မည်ဟု မသေချာပေ။

'နေဦး... မဟုတ်သေးဘူး... ဆဋ္ဌမအဆင့် ‘တည်နေရာပြောင်းကူ’က မလုပ်နိုင်ရုံသက်သက်ပဲ...'

'ဒါပေမယ့် သတ္တမအဆင့် ‘တည်နေရာပြောင်းကူ’က မလုပ်နိုင်ဘူးလို့ ဆိုလိုတာမှ မဟုတ်တာ...'

'သတ္တမအဆင့်ကို တက်လှမ်းသွားတာနဲ့ တစ်ပြိုင်နက် ‘တည်နေရာပြောင်းကူ’ရဲ့ စွမ်းအားက အကြီးအကျယ် တိုးတက်လာလိမ့်မယ်...'

'အဲ့ဒီအချိန်ကျရင် ဖီးနစ်အင်မော်တယ်စံအိမ်ရဲ့ တားမြစ်အစီအရင်ကတောင် ငါဝင်လာတာကို တားဆီးနိုင်ဖို့ မသေချာတော့ဘူး...'

ကျိုးစွေ့က ဖီးနစ်အင်မော်တယ်စံအိမ်အတွင်း၌ ဟင်းလင်းပြင်မှတ်တိုင်တစ်ခု ချန်ထားခဲ့ရန် ပိုကောင်းမည်ဟု တွေးတောလိုက်သည်။

နောင်တစ်ချိန်တွင် သတ္တမအဆင့် 'တည်နေရာပြောင်းကူ' က မဝင်ရောက်နိုင်ခဲ့လျှင်ပင် အဋ္ဌမအဆင့် 'တည်နေရာပြောင်းကူ' ကမူ အသေအချာ ဝင်ရောက်နိုင်မည်မှာ သံသယဖြစ်ဖွယ်မရှိပေ။

တစ်နည်းအားဖြင့် ဆိုရသော် နောက်ချန်လှည့်ကွက်တစ်ခု ချန်ထားခဲ့ပါက အနာဂတ်၌ ဖီးနစ်အင်မော်တယ်စံအိမ်သည် မိမိ၏ အဓိကစခန်းကြီး ဖြစ်လာပေလိမ့်မည်။

ထိုမှ ရရှိလာမည့် အကျိုးကျေးဇူးများကို မှန်းဆကြည့်နိုင်ပြီး အခြားကျင့်ကြံသူများ စိတ်ကူးယဉ်နိုင်စွမ်းရှိသည့် အရာမျိုး လုံးဝ မဟုတ်ပေ။

'ကံကောင်းတာက အခုအချိန်မှာ ဖီးနစ်အင်မော်တယ်စံအိမ်ဟာ ပွင့်နေဆဲအခြေအနေမှာ ရှိနေသေးတာပဲ...'

'ဒါကြောင့် ဆဋ္ဌမအဆင့် ‘တည်နေရာပြောင်းကူ’ရဲ့ စွမ်းအားကို အသုံးပြုလို့ ရနေသေးတယ်...'

'ဖီးနစ်အင်မော်တယ်စံအိမ်ထဲကနေ အချိန်မရွေး ထွက်ခွာနိုင်သလို အထဲမှာရှိတဲ့ ရတနာတွေအားလုံးကိုလည်း သယ်ယူသွားနိုင်တယ်...'

ကျိုးစွေ့က မိမိ၏ နောက်ထပ်လုပ်ဆောင်ရမည့် အစီအစဉ်ကို စဉ်းစားနေခဲ့လေသည်။

ထိုအချိန်တွင် ကျောက်စိမ်းယုန်မျိုးနွယ်စုမှ အမျိုးသမီးကျင့်ကြံသူတစ်ဦးက ရုတ်တရက် အာမေဍိတ်သံဖြင့် အော်ဟစ်လိုက်၏။

"ညီမတို့... မြန်မြန်ကြည့်လိုက်ကြစမ်း... ဒီမှာ သတ္တမအဆင့် ဝိညာဉ်ဆေးပင် ဖီးနစ်သွေးပန်းတွေ ပေါက်နေပုံပဲ... အနည်းဆုံး ဆယ်ပင်လောက်တောင် ရှိတယ်... ငါတို့တော့ လုံးဝ ချမ်းသာတာပဲ..."

'ဟင်...'

ကျိုးစွေ့၏ စိတ်အစဉ် လှုပ်ရှားသွားလေသည်။ ဝေးကွာသောနေရာရှိ လျှို့ဝှက်ချိုင့်ဝှမ်းတစ်ခုအတွင်း၌ အနီရောင်ပန်းပွင့်များ အစီအရီ ပေါက်ရောက်နေသည်ကို သူ ချက်ချင်း မြင်တွေ့လိုက်ရ၏။

၎င်းပန်းပွင့်များအထက်တွင် ဖီးနစ်ပုံရိပ်ယောင်တစ်ခု ပေါ်ထွက်နေပုံရပြီး ပန်းပွင့်များ၌ လျှို့ဝှက်ဆန်းကြယ်သော မျဉ်းကြောင်းများ ပေါ်လွင်နေကာ ပြင်းရှသော ရနံ့များ လွင့်ပျံ့နေလေသည်။

တစ်ချိန်တည်းမှာပင် ဖီးနစ်သွေးပန်း တစ်ပွင့်စီတိုင်းက နေမင်းကြီးအလား ပူပြင်းလှသော အငွေ့အသက်များကို ထုတ်လွှတ်နေပြီး ပြင်းထန်သော မီးတောက်များ လောင်ကျွမ်းနေသည့်နှယ် ဖြစ်နေကာ ၎င်းတို့တွင် အနည်းဆုံး နှစ်ငါးသောင်း သက်တမ်းရှိ ဆေးစွမ်းအာနိသင်များ ပါဝင်နေပေသည်။

ခန္ဓာပေါင်းစည်းခြင်းအဆင့် ကျင့်ကြံသူများအတွက် ဤသို့သော သတ္တမအဆင့် ဝိညာဉ်ဆေးပင်ဖြစ်သည့် ဖီးနစ်သွေးပန်းမှာ အကြွင်းမဲ့ တန်ဖိုးကြီးမားလှပေသည်။

အကယ်၍ ပြင်ပလောကတွင်သာဆိုလျှင် ငွေကြေးများစွာ ရှိနေသည့်တိုင် ဝယ်ယူနိုင်ရန် မသေချာပေ။

"ချမ်းသာပြီ... ချမ်းသာပြီ... အရင်က ဖီးနစ်အင်မော်တယ်စံအိမ်ထဲမှာ နေရာတိုင်းက ရတနာတွေဖြစ်ပြီး ဘယ်နေရာမှာမဆို ဝိညာဉ်ဆေးပင် အများကြီးကို ရှာတွေ့နိုင်တယ်လို့ ငါ ကြားဖူးတယ်... ဒါက တကယ်ဖြစ်နေလိမ့်မယ်လို့ ငါ မမျှော်လင့်ထားခဲ့ဘူး..."

"ဖီးနစ်အင်မော်တယ်စံအိမ်ထဲက ပတ်ဝန်းကျင်ဟာ အရမ်းထူးခြားပြီး ဝိညာဉ်ဆေးပင်တွေရဲ့ ကြီးထွားမှုကို အကြီးအကျယ် အထောက်အကူပြုနိုင်တယ်လို့ ဆိုကြတယ်... အစက ဖီးနစ်အင်မော်တယ်စံအိမ်မှာ ဒီလောက် ဝိညာဉ်ဆေးပင်တွေ အများကြီး မရှိခဲ့ပေမယ့် ပြင်ပက ကျင့်ကြံသူတွေ အဆက်မပြတ် ဝင်ရောက်လာတာနဲ့အမျှ တချို့ကျင့်ကြံသူတွေက ဝိညာဉ်ဆေးပင် မျိုးစေ့အများကြီးကို ယူဆောင်လာပြီး ဖီးနစ်အင်မော်တယ်စံအိမ်ထဲမှာ စိုက်ပျိုးခဲ့ကြတယ်..."

"ဘယ်လိုပဲဖြစ်ဖြစ် ဖီးနစ်အင်မော်တယ်စံအိမ်က နှစ်သောင်းချီမှ တစ်ကြိမ်သာ ပွင့်တာဖြစ်လို့ ဒီဆေးပင်တွေဟာ အခြေခံအားဖြင့် ဘာအနှောင့်အယှက်မှ မရှိဘဲ လွတ်လွတ်လပ်လပ် ကြီးထွားနိုင်တယ်... ဒါကြောင့် ပွင့်တဲ့အချိန်တိုင်းမှာ အဆင့်မြင့်ဆေးပင် အများအပြားကို ရိတ်သိမ်းနိုင်တာပဲ..."

"တချို့ အင်အားကြီးမျိုးနွယ်စုက ကျင့်ကြံသူတွေဆိုရင် ဝိညာဉ်ဆေးပင်တွေ သီးသန့်စိုက်ပျိုးဖို့ လျှို့ဝှက်တဲ့နေရာတစ်ခုကို တမင်သက်သက် ရှာဖွေခဲ့ကြတယ်... ရည်ရွယ်ချက်ကတော့ နောက်တစ်ကြိမ် ဝင်လာတဲ့အခါ ဒီအဆင့်မြင့်ဆေးပင်တွေကို ရိတ်သိမ်းနိုင်ဖို့ မျှော်လင့်လို့ပဲ..."

"အဲဒီကျင့်ကြံသူတွေကလည်း တော်တော်လေးကို ဉာဏ်များတာပဲ... ဖီးနစ်အင်မော်တယ်စံအိမ်ကို သူတို့ရဲ့ ကိုယ်ပိုင်ဆေးခင်းလို လုံးဝ သဘောထားကြတာကိုး... ဒါပေမယ့် ဒီလိုလုပ်ရပ်က ငါတို့ကို တကယ် အကျိုးအမြတ်ရစေခဲ့တယ်ဆိုတာကိုတော့ ဝန်ခံရလိမ့်မယ်..."

"ဖီးနစ်သွေးပန်း ဆယ်ပွင့်တောင်... အင်မော်တယ်သလင်းကျောက် ဘယ်လောက်များတောင် လဲလှယ်နိုင်မလဲမသိဘူး..."

ကျောက်စိမ်းယုန်မျိုးနွယ်စုမှ အမျိုးသမီးကျင့်ကြံသူ များစွာမှာ အလွန်အမင်း စိတ်လှုပ်ရှားနေကြလေသည်။

သူတို့၏ တစ်သက်တာလုံးတွင် ဤမျှများပြားသော သတ္တမအဆင့် ဝိညာဉ်ဆေးပင်များကို မည်သည့်နေရာ၌ မြင်ဖူးပါမည်နည်း။ သာမန်အချိန်များ၌ ဆဋ္ဌမအဆင့် ဆေးပင်များကိုပင် မြင်တွေ့ရခဲလှသည်။

ဤသည်မှာလည်း ရှောင်လွှဲ၍မရနိုင်သော ကိစ္စရပ်ပင် ဖြစ်၏။

အဘယ်ကြောင့်ဆိုသော် ယခုအခါ၌ ကျောက်စိမ်းယုန်လျှို့ဝှက်နယ်မြေတွင် လူဦးရေများ ပြည့်ကျပ်နေသောကြောင့်ပင် ဖြစ်လေသည်။ ထို့ကြောင့် ကျောက်စိမ်းယုန်မျိုးနွယ်စု ကျင့်ကြံသူများထံ ခွဲဝေပေးရသော အရင်းအမြစ်များမှာ သိသိသာသာ လျော့နည်းသွားခဲ့ချေပြီ။

ထို့အပြင် သူတို့က အလွန် စားသောက်နိုင်ကြသောကြောင့် ကျောက်စိမ်းယုန်မျိုးနွယ်စုကို အလွန်အမင်း ဆင်းရဲမွဲတေသွားစေခြင်း ဖြစ်၏။

မကြာသေးမီ အချိန်ကာလအတွင်း ကျောက်စိမ်းယုန်မျိုးနွယ်စု ကျင့်ကြံသူများစွာမှာ ကျောက်စိမ်းယုန်လျှို့ဝှက်နယ်မြေမှ နှင်ထုတ်ခံခဲ့ရသည်။ သို့မှသာ လျှို့ဝှက်နယ်မြေ၏ လူဦးရေဖိအားကို လျော့ကျစေနိုင်မည် ဖြစ်၏။

သို့မဟုတ်ပါက ဤမျှများပြားသော ကျောက်စိမ်းယုန်မျိုးနွယ်စု ကျင့်ကြံသူများကို လုံးဝ ကျွေးမွေးစောင့်ရှောက်ထားနိုင်မည် မဟုတ်ပေ။

'ဖီးနစ်သွေးပန်းလား... ဒါက သတ္တမအဆင့် ဝိညာဉ်ဆေးပင်ပဲ...'

'တစ်ပင်လောက်လေး ရရင်တောင်မှ ငါ့အတွက် အများကြီး အကျိုးအမြတ် ရနိုင်တယ်...'

'ဒါ့အပြင် ဒါက သတ္တမအဆင့် ရတနာဆေးလုံးဖြစ်တဲ့ ဖီးနစ်သွေးဆေးလုံးရဲ့ အဓိကဆေးဘက်ဝင်ပစ္စည်းလည်း ဖြစ်တယ်...'

'အကယ်လို့ ဒီဆေးလုံးကို သောက်သုံးခဲ့မယ်ဆိုရင် ခန္ဓာပေါင်းစည်းခြင်းအဆင့် ကျင့်ကြံသူရဲ့ ကျင့်ကြံမှုကို အကြီးအကျယ် တိုးတက်စေနိုင်ပြီး အတားအဆီးတွေကို ကျော်ဖြတ်ဖို့လည်း ကူညီပေးနိုင်တယ်...'

'အခုလက်ရှိ ငါ သောက်သုံးရင်တောင်မှ ကျင့်ကြံမှုက မြန်မြန်ဆန်ဆန် တိုးတက်လာနိုင်တယ်...'

'အဲ့ဒီအချိန်ကျရင် ငါ့ကျင့်ကြံမှုကို လေဟာနယ်သန့်စင်ခြင်းအဆင့် ပြည့်စုံခြင်းအထိ မြန်မြန်ဆန်ဆန် မြှင့်တင်နိုင်လိမ့်မယ်...'

'ဖီးနစ်အင်မော်တယ်စံအိမ်က ငါ့အတွက် အမှန်တကယ်ကို ကြီးမားတဲ့ အခွင့်အရေးကြီးတစ်ခု ဖြစ်ပြီး လက်လွတ်ခံလို့ မရဘူး...'

ကျိုးစွေ့၏ မျက်လုံးများအတွင်း၌ စူးရှသောအလင်းရောင်တစ်ခု တောက်ပသွားလေသည်။

ပုံမှန်အားဖြင့် ပြောရလျှင် အကယ်၍ သူသာ ခန္ဓာပေါင်းစည်းခြင်းအဆင့်သို့ တက်လှမ်းလိုပါက နှစ်ပေါင်းရာချီသော အချိန်များ လိုအပ်ပေလိမ့်မည်။

သို့သော်ငြား ဖီးနစ်အင်မော်တယ်စံအိမ်အတွင်းမှ လုံလောက်သော အရင်းအမြစ်များကို ရရှိနိုင်မည်ဆိုပါက နှစ်တစ်ရာအတွင်း အဆင့်တက်နိုင်ခြေ အလွန်များပြားပြီး မကြာမီအချိန်၌ သူက ခန္ဓာပေါင်းစည်းခြင်းအဆင့်သို့ အောင်မြင်စွာ တက်လှမ်းနိုင်မည် ဖြစ်လေသည်။

ဤသည်မှာ အခွင့်အရေး၏ အရေးပါမှုပင် ဖြစ်၏။

လုံလောက်သော အခွင့်အရေးများသာ ရှိခဲ့မည်ဆိုပါက ကျင့်ကြံမှုမှာလည်း လျှပ်စီးပမာ လျင်မြန်စွာ တိုးတက်လာပေလိမ့်မည်။