အခန်း ၉၇၃

အခန်း (၉၇၃) - ခန္ဓာပေါင်းစည်းခြင်းအဆင့် ရုပ်ခန္ဓာသို့ တက်လှမ်းခြင်း၊ နဂါးဆင်ခန္ဓာကိုယ်နှင့် သတ္တမအဆင့် ဝိညာဉ်ဆေးပင် ဖီးနစ်သွေးပန်းကို ရရှိခြင်း (၃)

ထိုအချိန်၌ပင် ၎င်းတို့၏ ခန္ဓာကိုယ်များမှ ခန္ဓာပေါင်းစည်းခြင်း ပိုင်နက်နယ်ပယ်များ အသီးသီး ထွက်ပေါ်လာကြပြီး ၎င်းပိုင်နက်နယ်ပယ်များအားလုံး ပေါင်းစပ်သွားကာ မိုင်ပေါင်းသောင်းချီ ကျယ်ဝန်းသော ဧရာမ ပိုင်နက်နယ်ပယ်ကြီးတစ်ခုအဖြစ် ပြောင်းလဲသွားသည်ကို မြင်တွေ့လိုက်ရသည်။

အဆုံးအစမဲ့သော ကောင်းကင်နှင့် မြေကြီး၏ ဝိညာဉ်ချီစွမ်းအင်များ စုဝေးလာကြပြီး ဧရာမ ထိုက်ယင်ကျောက်စိမ်းယုန်ကြီးတစ်ကောင်အဖြစ် ပုံပေါ်လာ၏။ ဤသည်မှာ ကောင်းကင်နှင့် မြေကြီး၏ ဓမ္မသဏ္ဌာန်ဖြစ်ပြီး အရပ်အမြင့် ပေတစ်ထောင်ကျော်ခန့် ရှိလေသည်။

ဤထိုက်ယင်ကျောက်စိမ်းယုန်မှာ သာမန် ကျောက်စိမ်းယုန်မျိုးနွယ်စု ကျင့်ကြံသူမဟုတ်ဘဲ ဒဏ္ဍာရီလာ အစစ်အမှန်ဝိညာဉ် ထိုက်ယင်ကျောက်စိမ်းယုန်ပင် ဖြစ်၏။

၎င်း၏ ခန္ဓာကိုယ်ပေါ်တွင် မီးခိုးရောင် ထိုက်ယင်ရုန်းစာလုံးများ မရေမတွက်နိုင်အောင် တောက်ပနေပြီး ရှေးဟောင်းကျကာ အရိုင်းဆန်ပြီး နက်နဲလှသော အငွေ့အသက်များကို ထုတ်လွှတ်နေပေသည်။ ၎င်း၏ ဦးခေါင်းထက်တွင် လပြည့်ဝန်းတစ်ခု ပေါ်ထွက်လာကာ မှိန်ပျပျ တောက်ပသော အပြာရောင်အလင်းတန်းများ ဖြာထွက်နေ၏။

ရွှစ်...

မျက်စိတစ်မှိတ်အတွင်းမှာပင် ထိုထိုက်ယင်ကျောက်စိမ်းယုန်ကြီးသည် လှုပ်ရှားလာဟန်ရှိကာ မူလနေရာမှ ခုန်ထွက်လိုက်ပြီး ထျန်းဖန်မျိုးနွယ်စုမှ ခန္ဓာပေါင်းစည်းခြင်းအဆင့် ကျင့်ကြံသူများထံသို့ အသာအယာ ကန်ကျောက်လိုက်လေသည်။

ချက်ချင်းပင် တားဆီး၍မရနိုင်သော စွမ်းအားတစ်ရပ် ပေါက်ကွဲထွက်ပေါ်လာကာ ကြယ်တစ်ပွင့် ပေါက်ကွဲသွားသည့်အလား ကောင်းကင်နှင့် မြေကြီးကိုပင် တုန်လှုပ်သွားစေခဲ့သည်။

ဤလေဟာနယ်၏ စွမ်းအားများအားလုံး စုစည်းသွားပြီး အရာအားလုံးကို ဖိနှိပ်ခြေမွပစ်လိုက်သည့်အလား ထင်မှတ်ရပေသည်။

"ဒုက္ခပဲ..."

ထျန်းဖန်မျိုးနွယ်စုမှ ခန္ဓာပေါင်းစည်းခြင်းအဆင့် ကျင့်ကြံသူများ၏ မျက်နှာများ အကြီးအကျယ် ပြောင်းလဲသွားကြလေသည်။ သူတို့သည် ကျောက်စိမ်းယုန်မျိုးနွယ်စုကို အမှန်တကယ် အထင်သေးမိသွားပြီဟု ခံစားလိုက်ကြရ၏။

ကျောက်စိမ်းယုန်မျိုးနွယ်စုသည် နှစ်ပေါင်းသန်းချီတိုင်အောင် အမှန်တကယ် ကျဆင်းလာခဲ့သော်ငြား အစစ်အမှန်ဝိညာဉ် မျိုးနွယ်စုတစ်ခု ဖြစ်သည့်အတွက် နောက်ခံအုတ်မြစ်က နက်ရှိုင်းလှပေသည်။

သူတို့အနေဖြင့် ပေါ့ပေါ့ဆဆဖြင့် အထင်သေး၍ ရနိုင်မည့်အရာမျိုး လုံးဝ မဟုတ်ချေ။ သေရေးရှင်ရေး တိုက်ပွဲတစ်ခုတွင် ရန်သူကို အထင်သေးခြင်းသည် ကိုယ့်သေတွင်းကိုယ် တူးခြင်းပင် မဟုတ်ပါလော။

ဘန်း… ဘန်း… ဘန်း…

သို့ရာတွင် မည်သို့ပင်ဆိုစေကာမူ သူတို့သည်လည်း ခန္ဓာပေါင်းစည်းခြင်းအဆင့် ဓားကျင့်ကြံသူများ ဖြစ်ကြပေသည်။ ၎င်းတို့သည် ချက်ချင်း တုံ့ပြန်လိုက်ကြပြီး လက်ထဲရှိ ဓားပျံများကို ဝှေ့ယမ်းလိုက်ရာ ခန္ဓာကိုယ်အတွင်းမှ ဧရာမ ခန္ဓာပေါင်းစည်းခြင်း ဓားစွမ်းအင်များ ချက်ချင်း ပေါက်ကွဲထွက်ပေါ်လာ၏။

လေပြင်လယ်တွင် ထောင်သောင်းမကသော ကြောက်မက်ဖွယ် ရွှေရောင်ဓားစွမ်းအင်များ တစ်ဟုန်ထိုး ထွက်ပေါ်လာပြီး အစစ်အမှန်ပုံသဏ္ဌာန်အဖြစ် စုစည်းသွားကာ ရွှေရောင်ရုန်းစာလုံးများ တောက်ပနေပြီး အရာအားလုံးကို ထိုးဖောက်ဖျက်ဆီးပစ်တော့မည့်အလား ဖြစ်နေပေသည်။

ဝုန်း... ဝုန်း... ဝုန်း...

သို့သော် ဝမ်းနည်းစရာကောင်းသည်မှာ ဤရွှေရောင်ဓားစွမ်းအင်များက မည်သည့်အကျိုးသက်ရောက်မှုမျှ မရှိခဲ့ခြင်းပင်။

လေလယ်ပြင်၌သာ တားဆီးထားနိုင်ပြီး ကျောက်စိမ်းယုန်မျိုးနွယ်စုမှ အမျိုးသမီးကျင့်ကြံသူများထံ မရောက်မီမှာပင် ထိုထိုက်ယင်ကျောက်စိမ်းယုန်ကြီးက ခြေတစ်လှမ်းဖြင့် ကန်ကျောက်လာခဲ့လေသည်။

ချက်ချင်းပင် ရွှေရောင်ဓားစွမ်းအင်များသည် အပိုင်းပိုင်းအစစ ပြိုကွဲသွားခဲ့ရ၏။ တစ်ချိန်တည်းမှာပင် ထိုစွမ်းအားများက ထျန်းဖန်မျိုးနွယ်စုမှ ခန္ဓာပေါင်းစည်းခြင်းအဆင့် ကျင့်ကြံသူများထံသို့ တိုက်ရိုက် ရိုက်ခတ်သွားပြီး ၎င်းတို့ကို ချက်ချင်း လွင့်စင်သွားစေခဲ့သည်။

ဘုန်း… ဘုန်း… ဘုန်း…

ချက်ချင်းပင် ထျန်းဖန်မျိုးနွယ်စုမှ ခန္ဓာပေါင်းစည်းခြင်းအဆင့် ဓားကျင့်ကြံသူများသည် နောက်သို့ လွင့်စဉ်ထွက်သွားကြပြီး ၎င်းတို့၏ ရင်ဘတ်များပေါ်တွင် ထင်ရှားလှသော ခြေရာများအသီးသီး ပေါ်လာကာ တစ်ကိုယ်လုံးက တောင်တန်းကြီးများကို တစ်လုံးပြီးတစ်လုံး ရိုက်ချိုးမိသွားကြလေသည်။

မိုင်ပေါင်းများစွာ နောက်သို့ လွင့်စဉ်သွားပြီးနောက် မြေပြင်ပေါ်တွင် ကြောက်မက်ဖွယ်ကောင်းသော စွတ်ကြောင်းကြီးများကို အတင်းအကျပ် ထိုးဖောက်ချန်ရစ်ခဲ့ပြီးမှသာ နောက်ဆုံးတွင် ရပ်တန့်သွားကြတော့၏။

သူတို့သည်လည်း သွေးစိမ်းများကို အန်ချလိုက်ရပြီး ကိုယ်တွင်းအင်္ဂါများ အတော်အတန် ထိခိုက်ပျက်စီးသွားခဲ့ရသည်။ အမှန်စင်စစ်အားဖြင့် ခန္ဓာပေါင်းစည်းခြင်းအဆင့် ကျင့်ကြံသူများအတွက် ဤသည်မှာ အသက်အန္တရာယ်ရှိသော ဒဏ်ရာမျိုး မဟုတ်ပေ။ ခေတ္တမျှ အနားယူလိုက်ရုံဖြင့် အလျင်အမြန် ပြန်လည်ကောင်းမွန်လာနိုင်လေသည်။

"သူတို့ကို တစ်ချက်တည်းနဲ့ သေအောင် မကန်နိုင်ခဲ့ဘူးပဲ..."

"ထျန်းဖန်မျိုးနွယ်စုရဲ့ ခန္ဓာပေါင်းစည်းခြင်းအဆင့် ကျင့်ကြံသူတွေဆိုတဲ့အတိုင်း ရုပ်ခန္ဓာက အရမ်းသန်မာလွန်းတယ်..."

"ငါတို့က လုံးဝ ပြိုင်ဘက်တွေ မဟုတ်ဘူး..."

"သူတို့ ကြောင်တောင်တောင် ဖြစ်နေတုန်း အခွင့်ကောင်းယူပြီး မြန်မြန် ထွက်ပြေးကြတာ ပိုကောင်းမယ်..."

ကျောက်စိမ်းယုန်မျိုးနွယ်စုမှ အမျိုးသမီးကျင့်ကြံသူ အများအပြားက တီးတိုးပြောဆိုနေကြပြီး ထွက်ပြေးရန် ပြင်ဆင်နေကြပြီ ဖြစ်လေသည်။

ခုနက သူတို့သည် မျှော်လင့်မထားသော အခြေအနေတွင် တစ်ဖက်လူ ပေါ့ဆနေချိန်ကို အခွင့်ကောင်းယူကာ အကြမ်းပတမ်း တိုက်ခိုက်ခဲ့ပြီး ထျန်းဖန်မျိုးနွယ်စုမှ ခန္ဓာပေါင်းစည်းခြင်းအဆင့် ကျင့်ကြံသူများကို အပြင်းအထန် ကန်ကျောက်ခဲ့သဖြင့် တစ်ဖက်လူကို ဒဏ်ရာအပြင်းအထန် ရသွားစေခဲ့သည်ကမူ မှန်ပေ၏။

သို့သော်ငြား ဆက်လက် တိုက်ခိုက်နေဦးမည်ဆိုပါက မိမိတို့ဘက်မှလည်း အကြီးအကျယ် ဆုံးရှုံးရဖွယ် ရှိလေသည်။ အဖော်တစ်ယောက် သေဆုံးသွားလျှင်ပင် ၎င်းတို့အတွက် လုံးဝ လက်ခံနိုင်စွမ်းမရှိသော ဆုံးရှုံးမှုတစ်ခု ဖြစ်လာပေမည်။ ထို့ကြောင့် သူတို့ ထွက်ပြေးချင်နေကြခြင်း ဖြစ်၏။

ဆန်းစစ်ကြည့်လျှင် ဖီးနစ်အင်မော်တယ်စံအိမ်တော်သို့ ဝင်ရောက်လာခြင်းမှာ ချမ်းသာကြွယ်ဝရန်အတွက်သာ ဖြစ်ပြီး ဤထျန်းဖန်မျိုးနွယ်စု ကျင့်ကြံသူများနှင့် အသေအကျေ တိုက်ခိုက်ရန် မဟုတ်ပေ။

"ထွက်ပြေးဖို့ မလိုပါဘူး။ သူတို့ကို သတ်ပစ်လိုက်ရင် ရပါပြီ..."

ထိုအချိန်၌ပင် ကျိုးစွေ့က အသာအယာပြုံးကာ ပြောလိုက်လေသည်။

'ဘာ...'

ထိုစကားကို ကြားသောအခါ ကျောက်စိမ်းယုန်မျိုးနွယ်စုမှ အမျိုးသမီးကျင့်ကြံသူ အများအပြားသည် ကျိုးစွေ့ကို တညီတညွတ်တည်း ကြည့်လိုက်ကြလေသည်။

ဤအမျိုးသားက အဘယ်ကြောင့် ဤမျှ ယုံကြည်မှုလွန်ကဲနေသနည်းဆိုသည်ကို သူတို့ နားမလည်နိုင်ကြပေ။ ဤသည်က ထျန်းဖန်မျိုးနွယ်စု၏ ခန္ဓာပေါင်းစည်းခြင်းအဆင့် ဓားကျင့်ကြံသူ အပါး (၂၀) တိတိ ရှိနေခြင်း မဟုတ်ပါလော။ မည်သို့လျှင် ဤမျှ လွယ်ကူစွာဖြင့် သတ်ဖြတ်နိုင်ပါမည်နည်း။

ယခုလေးတင် သူတို့ ဒဏ်ရာအပြင်းအထန် ရသွားသယောင် ရှိသော်ငြား မည်သည့်ဒဏ်ရာကမျှ အသက်အန္တရာယ်ရှိသည်အထိ မပြင်းထန်ပေ။ အကယ်၍ အသေအကျေသာ ဆက်လက်တိုက်ခိုက်ကြမည်ဆိုပါက နောက်ဆုံးတွင် မည်သူက အနိုင်ရမည်ကို မည်သူကမျှ ကြိုတင် မသိနိုင်ချေ။

ရွှစ်...

သို့ရာတွင် ကျိုးစွေ့သည် မည်သည့်အရာကိုမျှ ရှင်းပြမနေတော့ဘဲ ချက်ချင်းပင် သူ၏ခန္ဓာကိုယ်ထဲမှ ရွှေရောင်အလင်းတန်းတစ်ခု ပျံသန်းထွက်ပေါ်လာ၏။

ဤသည်မှာ သတ္တမအဆင့် ‘ရွှေအလင်းအဆိပ်တစ်ထောင်ကူ’ပင် ဖြစ်ပြီး ယခု ဖီးနစ်အင်မော်တယ်စံအိမ်တော်ခရီးစဉ်တွင် ၎င်းကိုလည်း သူ ခေါ်ဆောင်လာခဲ့ခြင်း ဖြစ်လေသည်။ ၎င်းမှာ သတ္တမအဆင့်သို့ တက်လှမ်းထားသည်မှာ အချိန်သိပ်မကြာသေးသည့်အတွက် ယခုက သူ၏အစွမ်းသတ္တိကို ထုတ်ဖော်ပြသရန် အကောင်းဆုံးအချိန်ပင် ဖြစ်သည်။

တစ်ခဏချင်းမှာပင် ရွှေအလင်းအဆိပ်တစ်ထောင်ကူသည် တောင်ပံများကို ခတ်လိုက်ရာ တစ်ကိုယ်လုံးက လေဟာနယ်ထဲသို့ ပျော်ဝင်သွားသည့်အလား တည်နေရာရွှေ့ပြောင်းခြင်းကို အသုံးပြုလိုက်၏။ ထို့နောက် အသံတိတ် တိတ်ဆိတ်စွာဖြင့် မျက်စိတစ်မှိတ်အတွင်း ထျန်းဖန်မျိုးနွယ်စုမှ ခန္ဓာပေါင်းစည်းခြင်းအဆင့် ကျင့်ကြံသူများ၏ ရှေ့မှောက်သို့ ရောက်ရှိသွားလေသည်။

"ချီးဘဲ..."

ထျန်းဖန်မျိုးနွယ်စုမှ ခန္ဓာပေါင်းစည်းခြင်းအဆင့် ကျင့်ကြံသူများ၏ မျက်နှာများ အကြီးအကျယ် ပြောင်းလဲသွားကြလေသည်။ သူတို့အားလုံး အသက်အန္တရာယ်ရှိသော အကျပ်အတည်းတစ်ခုကို ခံစားလိုက်ကြရ၏။

သို့သော် ယခုအချိန်မှ ပြန်လည်တိုက်ခိုက်ရန် ကြိုးစားမည်ဆိုလျှင်ပင် လွန်စွာ နောက်ကျနေခဲ့ချေပြီ။

အဘယ်ကြောင့်ဆိုသော် ယခုလေးတင် သူတို့သည် ကျောက်စိမ်းယုန်မျိုးနွယ်စုမှ အမျိုးသမီးကျင့်ကြံသူများ၏ ပူးပေါင်းတိုက်ခိုက်မှုကြောင့် ခန္ဓာကိုယ်များ အပြင်းအထန် ထိခိုက်သွားခဲ့ပြီး ကိုယ်တွင်းအင်္ဂါများပါ ဒဏ်ရာရသွားခဲ့သောကြောင့်ပင် ဖြစ်၏။

၎င်းက အသက်အန္တရာယ်ရှိသော ဒဏ်ရာမဟုတ်သော်ငြား အချိန်တိုအတွင်း ခန္ဓာကိုယ်ထဲရှိ ကျင့်စဉ်စွမ်းအင်များကို အသုံးမပြုနိုင်တော့ဘဲ ကာကွယ်ရေးတွင် ခေတ္တမျှ ကွက်လပ်တစ်ခု ဖြစ်ပေါ်သွားခဲ့စေသည်။

ကျိုးစွေ့သည် ထိုအခွင့်အရေးကို အတိအကျ ဆုပ်ကိုင်ကာ အသက်အန္တရာယ်ပေးနိုင်သော တိုက်ခိုက်မှုတစ်ရပ်ကို စတင်လိုက်ခြင်းပင် ဖြစ်သည်။

ဘန်း… ဘန်း… ဘန်း…

ချက်ချင်းပင် ရွှေရောင်အလင်းတန်း လင်းလက်သွားပြီး လေဟာပြင်တွင် လှပသော အလင်းကွေးတစ်ခုကို ဖန်တီးလိုက်လေသည်။

ထိုခဏ၌ ‘ရွှေအလင်းအဆိပ်တစ်ထောင်ကူ’သည် ထျန်းဖန်မျိုးနွယ်စုမှ ခန္ဓာပေါင်းစည်းခြင်းအဆင့် ဓားကျင့်ကြံသူများ၏ ခန္ဓာကိုယ်များကို တစ်ယောက်ပြီးတစ်ယောက် ဆက်တိုက် ထိုးဖောက်သွားခဲ့ရာ ၎င်းတို့၏ ရင်ဘတ်များထက်တွင် အပ်ပေါက်အရွယ်အစားခန့်သာရှိသော သွေးပေါက်ငယ်လေးတစ်ခု ချက်ချင်း ပေါ်ထွက်လာ၏။

ခန္ဓာပေါင်းစည်းခြင်းအဆင့် ကျင့်ကြံသူများအတွက် ဤသည်က ခြင်ကိုက်ခံရသည်နှင့်ပင် တူညီနေပြီး ဒဏ်ရာဟုပင် ဆို၍ မရနိုင်ချေ။

"ရိုင်းစိုင်းလိုက်တဲ့ ကျောက်စိမ်းယုန်မျိုးနွယ်စု... ငါ မင်းတို့ကို သတ်ပြီး အပိုင်းပိုင်းအစစ ဆုတ်ဖြဲပစ်မယ်..."

ထျန်းဖန်မျိုးနွယ်စုမှ ခန္ဓာပေါင်းစည်းခြင်း နှောင်းပိုင်းအဆင့် ကျင့်ကြံသူ ဖန်ယုံကန်းက ဒေါသတကြီး ဟိန်းဟောက်လိုက်လေသည်။ သူ၏ ဒေါသတရားများက ကောင်းကင်သို့တိုင် မြင့်တက်နေပြီး ယခုလက်ရှိတွင် အရှက်ကွဲသွားပြီဟု ခံစားနေရ၏။

အဆင့်နိမ့် ကျောက်စိမ်းယုန်မျိုးနွယ်စု ကျင့်ကြံသူများ၏ အလစ်အငိုက်တိုက်ခိုက်မှုကို ခံလိုက်ရပြီး ပြင်းထန်သော ဒဏ်ရာရရှိသွားသည် မဟုတ်ပါလော။

အကယ်၍ သတင်းသာ ပေါက်ကြားသွားပါက မျိုးနွယ်စုအတွင်း လူရယ်စရာတစ်ခု ဖြစ်လာပေလိမ့်မည်။ ထိုသို့သော ကိစ္စရပ်မျိုးကို သူ လုံးဝ သည်းမခံနိုင်ချေ။

အနာဂတ်တွင် သူသာ မဟာယာနအဆင့် သို့ တက်လှမ်းနိုင်သွားခဲ့ပါက ဤသည်က သူ၏ အရှက်ကွဲစရာဖြစ်ပြီး ဘဝ၏ အမည်းစက်တစ်ခု၊ မည်သို့မျှ ဖျက်ဆီးပစ်၍ မရနိုင်သော အညစ်အကြေးတစ်ခု ဖြစ်လာပေလိမ့်မည်။

"ဒုက္ခပဲ... ငါတို့ မြန်မြန် ထွက်ပြေးမှ ရမယ်..."

ထိုသို့ ဒေါသထွက်နေသော အသံများကို ကြားလိုက်ရသောအခါ ကျောက်စိမ်းယုန်မျိုးနွယ်စုမှ အမျိုးသမီးကျင့်ကြံသူ အများအပြားမှာ သေမတတ် ထိတ်လန့်သွားကြလေသည်။

သူတို့ တစ်ယောက်စီတိုင်းသည် ဤအန္တရာယ်များသော နေရာမှ အမြန်ဆုံး ထွက်ပြေးလွတ်မြောက်ရန် ခြေကုန်သုတ်တော့၏။ သို့သော်ငြား သူတို့ စတင်မလှုပ်ရှားရသေးမီမှာပင် အခြေအနေက ရုတ်တရက် အပြောင်းအလဲ ဖြစ်သွားခဲ့ချေပြီ။